Ni Ḓiṱukufhadze Musi Hu Na Zwine Na Sa Zwi Ḓivhe

1. Yehova o ri ṋea vhukoni ha mini nahone ndi ngani?

YEHOVA o ri sika nga nḓila i akhamadzaho, o ri sika ri na vhukoni ha u humbula, ha u guda zwithu zwiswa na u ḓivha uri ri nga shumisa hani zwine ra khou zwi guda. Ndi ngani o ri sika nga yeneyo nḓila? Ndi ngauri u ṱoḓa ri tshi ‘mu ḓivha’ na uri musi ri tshi khou mu shumela ri ite phetho dza vhuṱali ro ḓitika nga zwine ra zwi ḓivha nga hae.​—Mir. 2:1-5; Vharoma 12:1.

2. (a) Ri tea u pfesesa mini nga ha nḓila ye ra sikwa ngayo? (Yobo 37:23, 24) (Sedzani tshifanyiso.) (b) Ri vhuyelwa hani nga u pfesesa uri a ri ḓivhi zwithu zwoṱhe?

² Naho Yehova o ri sika ri na vhukoni ha u guda zwithu zwinzhi, hu na zwithu zwinzhi zwine ra sa zwi ḓivhe. (Vhalani Yobo 37:23, 24.) Kha ri ambe nga ha tsumbo ya Yobo. Yehova o vhudzisa Yobo mbudziso nnzhi dze dza thusa Yobo u vhona uri hu na zwithu zwinzhi zwine a sa zwi ḓivhe. Nge Yehova a vhudzisa Yobo dzenedzo mbudziso, zwo thusa Yobo u vhona uri u tea u ḓiṱukufhadza na u shandula mahumbulele awe. (Yobo 42:3-6) Na riṋe ri a vhuyelwa musi ri tshi pfesesa uri a ri ḓivhi zwithu zwoṱhe. Musi ri tshi ḓivha zwenezwo, zwi ḓo ri thusa uri ri ḓiṱukufhadze na uri ri fhulufhele uri Yehova u ḓo dzula a tshi ri vhudza zwithu zwine ra zwi ṱoḓa uri ri ite phetho dzavhuḓi.​—Mir. 2:6.

3. Ri ḓo amba nga ha mini kha ino thero?

³ Kha ino thero, ri ḓo amba nga ha zwiṅwe zwithu zwine ra sa zwi ḓivhe na uri u sa ḓivha nga ha zwenezwo zwithu zwi nga ri konḓisela hani vhutshilo nga zwiṅwe zwifhinga. Ri ḓo dovha ra guda uri ndi ngani zwi zwavhuḓi uri a ri ḓivhi zwiṅwe zwithu. U guda nga ha zwenezwi zwithu zwi ḓo ri thusa uri ri fhulufhele uri Yehova “ane a vha na nḓivho yo fhelelaho,” u ri vhudza zwithu zwine ra tea u zwi ḓivha.​—Yobo 37:16.

A RI ḒIVHI URI VHUFHELO VHU ḒO ḒA LINI

4. U ya nga Mateo 24:36, ndi mini zwine ra sa zwi ḓivhe?

⁴ Vhalani Mateo 24:36. A ri ḓivhi uri vhufhelo ha ḽino shango vhu ḓo ḓa lini. Na musi Yesu e kha ḽifhasi, o vha a sa ḓivhi “ḓuvha na tshifhinga” tsha uri vhufhelo vhu ḓo vha hone lini.a Nga murahu ha tshifhinga, o vhudza vhaapostola vhawe uri Yehova ndi ene a re na maanḓa a u vhea tshifhinga tshine zwithu zwa ḓo itea ngatsho. (Mish. 1:6, 7) Yehova o no dzhia phetho ya uri vhufhelo ha ḽino shango vhu ḓo vha hone lini nahone riṋe ri nga si kone u ḓivha uri zwi ḓo itea lini.

5. U sa ḓivha uri vhufhelo vhu ḓo ḓa lini zwi nga ri kwama hani?

⁵ A ri ḓivhi uri ri ḓo tea u lindela tshifhinga tshingafhani u swika vhufhelo vhu tshi ḓa. Zwenezwo zwi nga ita uri ri fhele mbilu kana u kulea nungo, zwihuluhulu arali ri na tshifhinga tshilapfu ro lindela ḓuvha ḽa Yehova. Kana zwa ita uri zwi ri konḓele u konḓelela musi ri tshi khou pikiswa nga miṱa yashu kana nga vhaṅwe. (2 Pet. 3:3, 4) Ri nga humbula uri arali ro vha ri tshi ḓivha uri vhufhelo vhu ḓo ḓa lini, zwo vha zwi tshi nga ri lelutshela u konḓelela musi ri tshi pikiswa na u sa fhela mbilu.

6. Ndi ngani zwi zwavhuḓi uri a ri ḓivhi uri vhufhelo vhu ḓo ḓa lini?

⁶ Nga nṱhani ha uri Yehova ha ngo ri vhudza uri vhufhelo vhu ḓo ḓa lini, zwenezwo zwi ri ṋea tshibuli tsha uri ri sumbedze uri ri mu shumela ngauri ri a mu funa na ngauri ri a mu fhulufhela. A ri ṱoḓi u shumela Yehova u swika vhufhelo vhu tshi ḓa fhedzi, ri ṱoḓa u mu shumela lwa tshoṱhe. Nṱhani ha uri ri livhise ṱhogomelo kha uri “ḓuvha ḽa Yehova” ḽi ḓo ḓa lini, ri tea u livhisa ṱhogomelo kha uri hu ḓo itea mini musi vhufhelo ho no pfuka. Musi ri tshi ita nga u ralo, zwi ḓo ita uri ri bvele phanḓa ri tshi sendela tsini na Yehova, ri tshi mu fhulufhela na u ita zwoṱhe zwine ra nga kona uri ri mu takadze.​—2 Pet. 3:11, 12.

7. Ri ḓivha mini?

⁷ Ndi zwa ndeme uri ri livhise ṱhogomelo kha zwine ra zwi ḓivha. Ri a ḓivha uri maḓuvha a vhufhelo o thoma nga 1914. Bivhilini Yehova o ri ṋea vhuporofita vhune ha sumbedza uri maḓuvha a vhufhelo a ḓo thoma nga 1914. O dovha a ri vhudza uri hu ḓo itea mini nga murahu ha wonoyo ṅwaha. Zwenezwo zwi ita uri ri vhe na vhungoho ha uri “ḓuvha ḽihulu ḽa Yehova ḽi tsini.” (Tsef. 1:14) Ri dovha ra ḓivha uri ndi mushumo ufhio une Yehova a ṱoḓa ri tshi u ita. U khou ṱoḓa uri vhathu vhanzhi nga hune zwa nga konadzea ngaho vha pfe “mafhungo maḓifha a Muvhuso.” (Mat. 24:14) Eneo mafhungo maḓifha a khou ḓivhadziwa mashangoni a ṱoḓaho u vha 240 na nga nyambo dzi fhiraho 1 000. A ri tei u ḓivha “ḓuvha na tshifhinga” tshine vhufhelo ha ḓo ḓa ngatsho u itela u ita wonoyo mushumo nga u fhisea.

A RI ḒIVHI URI YEHOVA U ḒO RI THUSA HANI

8. Maipfi ane a ri “mushumo wa Mudzimu wa ngoho” a amba mini? (Muhuweleli 11:5)

⁸ A si tshifhinga tshoṱhe hune ra ḓo dzula ri tshi ḓivha “mushumo wa Mudzimu wa ngoho.” (Vhalani Muhuweleli 11:5.) Maipfi ane a ri “mushumo wa Mudzimu wa ngoho” a nga ambela kha zwine Yehova a ita uri zwi itee kana kha zwine a tendela zwi tshi itea uri hu swikelelwe tshipikwa tshawe. A ri ḓivhi nga vhuḓalo uri ndi ngani Yehova a tshi tendela uri zwiṅwe zwithu zwi itee kana u ḓo ri thusa hani. (Ps. 37:5) Bivhili i vhambedza u sa ḓivha “mushumo wa Mudzimu wa ngoho” na u sa ḓivha nḓila ine ṅwana a aluwa ngayo musi e mbumbeloni ya mme awe. Vhorasaintsi na vhone a vha pfesesi nga vhuḓalo uri ṅwana u aluwa hani e mbumbeloni. Nga hu fanaho, a ri pfesesi nga vhuḓalo zwithu zwine Yehova a ḓo zwi ita.

9. U sa ḓivha uri Yehova u ḓo ri thusa hani, zwi nga ita uri ri humbule mini?

⁹ Nga nṱhani ha uri a ri ḓivhi uri Yehova u ḓo ri thusa hani, zwi nga ita uri ri timatime u ita dziṅwe phetho. Ri nga kha ḓi timatima u dzhia phetho ya u shuma fhethu hu re na ṱhoḓea, kana ra timatima u ḓidzima zwiṅwe zwithu u itela u ita zwo engedzeaho tshumeloni ya Yehova, zwi ngaho u vha na thundu nnzhi. Ri nga dovha ra vhona u nga Yehova ha ri takaleli ngauri naho ri tshi khou lingedza u ita zwo engedzeaho tshumeloni yawe, a ri khou swikelela tshipikwa tshashu. Zwiṅwe hafhu, ri nga vha ri tshi khou ita zwoṱhe zwine ra nga kona kha mushumo wa u huwelela fhedzi ra vha ri si na pfunzo dza Bivhili, kana ra vha ri tshi khou shuma nga maanḓa kha muṅwe mushumo ndanguloni, fhedzi ra vha ri tshi khou ṱangana na dziṅwe thaidzo nnzhi kha wonoyo mushumo une ra khou ita. Zwenezwi zwi nga ita uri ri pfe u nga Yehova ha khou ri thusa.

10. U sa ḓivha uri Yehova u ḓo ita mini zwi nga ri thusa u khwinisa mini?

¹⁰ Nga nṱhani ha uri a ri ḓivhi uri Yehova u ḓo ita mini, zwi a ri thusa uri ri kone u khwinisa kha zwine ra vha zwone. Sa tsumbo, ri nga kha ḓi khwinisa kha u ḓiṱukufhadza. Zwi a ri thusa u pfesesa uri Yehova u ḓivha zwo ri teaho. (Yes. 55:8, 9) Zwi dovha zwa ri gudisa uri ri fhulufhele Yehova nga ho fhelelaho. Nahone musi ri tshi vha na mvelelo dzavhuḓi vhuḓinḓani kana kha mushumo muṅwe na muṅwe ndanguloni, ri renda Yehova ngauri ndi ene we a ri thusa uri ri vhe na mvelelo dzavhuḓi. (Ps. 127:1; 1 Vhakor. 3:7) Musi hu tshi itea zwithu zwe ri si zwi lavhelele, ri a humbula uri Yehova ndi ene ane a ḓivha zwithu zwoṱhe. Zwenezwi zwi ḓo ri thusa uri ri dzule ri na mulalo. (Yes. 26:12) Ri ita zwoṱhe zwine ra nga kona ri tshi fhulufhela uri Yehova u ḓo dzula a tshi ri thusa. Ri a vha na vhungoho ha uri Yehova u ḓo ri livhisa naho a sa ḓo zwi ita nga lwa vhuṱolo u fana na zwe a zwi ita tshifhingani tsho fhiraho.​—Mish. 16:6-10.

11. Ndi zwifhio zwithu zwa ndeme zwine ra zwi ḓivha?

¹¹ Ri a zwi ḓivha uri Yehova o ṱalifha, u ḓo dzula a tshi ri funa na u dzula a tshi haṱula nga nḓila yo teaho. Ri a zwi ḓivha uri u a dzhiela nṱha zwine ra mu itela zwone na zwine ra zwi itela vhahashu. Ri dovha ra zwi ḓivha uri u dzula a tshi lambedza vhane vha fhulufhedzea khae.—Vhahev. 11:6.

A RI ḒIVHI URI MATSHELO ḼO RI FARELA MINI

12. U ya nga Yakobo 4:13, 14, ndi mini zwine ri si zwi ḓivhe?

¹² Vhalani Yakobo 4:13, 14. U tou amba ngoho, a ri ḓivhi uri ḽa matshelo ḽo ri farela mini. Kha ḽino shango, “tshifhinga na zwiitea zwi songo lavhelelwaho zwi wela vhoṱhe.” (Muh. 9:11) Nga zwenezwo, a ri koni u ḓivha arali ri tshi ḓo kona u ita zwe ra dzudzanya u zwi ita kana arali ri tshi ḓo vha ri tshi kha ḓi tshila uri ri kone u zwi ita.

13. U sa ḓivha zwine zwa ḓo itea tshifhingani tshi ḓaho zwi nga ri kwama hani?

¹³ Nga nṱhani ha uri a ri ḓivhi uri hu ḓo itea mini tshifhingani tshi ḓaho, zwi nga ri konḓela u konḓelela. Nga nḓila-ḓe? Ri nga kha ḓi vhilaela nga ha uri hu nga itea mini nahone zwa ita uri ri si takale. Vhutshilo hashu vhu nga kha ḓi shanduka ri songo zwi lavhelela kana ha itea zwithu zwi si zwavhuḓi nga u ṱavhanya nahone zwenezwo zwa ita uri ri kulee nungo. Musi zwe ra zwi lavhelela zwi sa khou itea, ri nga kulea nungo.​—Mir. 13:12.

14. Ndi mini zwine zwa ita uri ri takale? (Sedzani zwifanyiso.)

¹⁴ Musi ri tshi konḓelela thaidzo dzine ra khou ṱangana nadzo, ri vha ri tshi khou sumbedza uri ri shumela Yehova nga nṱhani ha uri ri a mu funa. Mafhungo a re Bivhilini a a zwi sumbedza uri a ri lavheleli uri Yehova a ri tsireledze kha thaidzo dzoṱhe dzine ra ṱangana nadzo na uri Yehova ha dzuli o dzudzanya uri hu ḓo itea mini vhutshiloni hashu. Yehova u a zwi ḓivha uri ri nga takala naho ri sa ḓivhi zwoṱhe zwine zwa ḓo itea kha riṋe tshifhingani tshi ḓaho. Zwine zwa ita uri ri takale ndi vhulivhisi vhune a ri ṋea hone na u mu thetshelesa. (Yer. 10:23) U ṱoḓa vhulivhisi ha Yehova musi ri tshi ita phetho, zwi a ri thusa uri ri si vhilaele nga ha uri hu ḓo itea mini kha riṋe. Zwi ita uri ri vhe na mavhonele a fanaho na a Yakobo we a ri: “Arali Yehova a tshi zwi funa, ri ḓo tshila ra ita izwi kana zwiḽa.”​—Yak. 4:15.

15. Ndi mini zwine ra zwi ḓivha nga ha vhumatshelo?

¹⁵ Naho ri sa ḓivhi uri ḽa matshelo ḽo ri farela mini, zwine ra zwi ḓivha ndi uri Yehova u ri fhulufhedzisa vhutshilo vhu sa fheli ṱaḓulu kana kha ḽifhasi. Ri a zwi ḓivha uri Yehova ha zwifhi na uri a hu na tshine tsha nga mu thivhela uri a ite zwoṱhe zwe a ri fhulufhedzisa. (Tito 1:2) Ndi ene e eṱhe ane a amba ‘zwine zwa ḓo itea, na u amba u bva misini ya kale zwine zwa sa athu u itea.’ Zwe a zwi amba tshifhingani tsho fhiraho Bivhilini uri zwi ḓo itea, zwo itea nahone zwe a amba uri zwi ḓo itea tshifhingani tshi ḓaho, zwi ḓo itea. (Yes. 46:10) Ri a zwi ḓivha uri a hu na tshithu tshine tsha nga ita uri Yehova a si ri fune. (Vharoma 8:35-39) U ḓo ri ṋea vhuṱali, a ri khuthadza na u ri ṋea nungo dza uri ri konḓelele thaidzo dzine ra ṱangana nadzo. Ri na vhungoho ha uri Yehova u ḓo ri thusa na u ri fhaṱutshedza.​—Yer. 17:7, 8.

A RI KONI U PFESESA NGA VHUḒALO NḒILA INE YEHOVA A RI ḒIVHA NGAYO

16. Samusi zwo sumbedzwa kha Phisalema 139:1-6, ndi mini zwine Yehova a zwi ḓivha nga ha riṋe zwine ri si kone u zwi pfesesa?

¹⁶ Vhalani Phisalema 139:1-6. Musiki washu u a ḓivha tshithu tshiṅwe na tshiṅwe nga ha riṋe. U a ḓivha zwine ra zwi humbula na nḓila ine ra ḓipfa ngayo na uri ndi ngani ri tshi humbula na u ḓipfa nga yeneyo nḓila. U a ḓivha zwoṱhe zwine ra zwi amba na zwine zwa vha mbiluni dzashu. U dovha a ḓivha tshithu tshiṅwe na tshiṅwe tshine ra tshi ita na uri ndi ngani ri tshi tshi ita. Khosi Davida o amba uri Yehova u dzula o lugela u ri thusa nahone u a kona u ri thusa. U ḓivha uri Yehova Ramaanḓaoṱhe ane a vha Musiki wa zwithu zwoṱhe u na ndavha na inwi nga yeneyo nḓila, zwi ita uri ni ḓipfe hani? Davida o ri: “Nḓivho yo raloho i a mangadza vhukuma. Ndi khulwane lune ndi si kone u i pfesesa.”​—Ps. 139:6, ṱms.

17. Ndi ngani zwi tshi nga ri konḓela u tenda uri Yehova u a pfesesa nḓila ine ra vha ngayo?

¹⁷ Nga zwiṅwe zwifhinga zwi nga ri konḓela u dzhia Yehova sa Khotsi ashu ane a ri funa na ane a vha na ndavha na riṋe, khamusi nga nṱhani ha nḓila ye ra aluswa ngayo, mvelele yashu kana nga nṱhani ha zwe ra vha ri tshi zwi tenda musi ri sa athu guda ngoho. Kana ri nga vhona u nga ro itesa zwithu zwivhi tshifhingani tsho fhiraho lune Yehova a sa ḓo ṱoḓa u vha khonani dzashu na uri u kule na riṋe. Na Davida o vhuya a ḓipfa nga yeneyo nḓila nga zwiṅwe zwifhinga. (Ps. 38:18, 21) Zwiṅwe hafhu, muthu ane a khou lingedza u shandula vhutshilo hawe uri a tshile nga nḓila ine Yehova a i takalela, a nga kha ḓi ḓivhudzisa uri: ‘Arali Yehova a tshi nḓivha zwa vhukuma, ndi ngani a tshi lavhelela uri ndi litshe vhutshilo he nṋe nda vhu ḓowela?’

18. Ri vhuyelwa hani nga u tenda uri Yehova u a ri ḓivha u fhira nḓila ine ra ḓiḓivha ngayo? (Sedzani zwifanyiso.)

¹⁸ Ri nga guda u tenda uri Yehova u a ri ḓivha u fhira nḓila ine riṋe vhaṋe ra ḓiḓivha ngayo na uri u a vhona zwithu zwavhuḓi kha riṋe zwine na riṋe ri si kone u zwi vhona. U a vhona vhukhakhi hashu, fhedzi u a zwi ḓivha uri ri khou ṱoḓa u khwinisa nahone u a ri funa. (Vharoma 7:15) U ḓivha uri Yehova u a vhona zwine ra ṱoḓa u vha zwone, zwi ḓo ri ṋea maanḓa a uri ri bvele phanḓa ri tshi mu shumela nga u fhulufhedzea, ro takala.

19. Ndi mini zwine ra zwi ḓivha nga ha Yehova?

¹⁹ Ri a zwi ḓivha uri Yehova ndi lufuno. (1 Yoh. 4:8) Ri a zwi ḓivha uri u ri vhetshela milayo nga nṱhani ha uri u a ri funa na ngauri u ri ṱoḓela zwa khwine. Ri a zwi ḓivha uri u ṱoḓa ri tshi wana vhutshilo vhu sa fheli. O ri ṋea tshirengululi uri ri kone u vhu wana. Tshifhiwa tsha tshirengululi tshi ri khwaṱhisedza uri ri nga kona u shumela Yehova naho ri na tshivhi. (Vharoma 7:24, 25) Ri dovha ra zwi ḓivha uri “Mudzimu ndi muhulwane u fhira mbilu dzashu, u ḓivha zwoṱhe.” (1 Yoh. 3:19, 20) Yehova u a vhona zwithu zwoṱhe zwine zwa itea kha riṋe nahone u na vhungoho ha uri ri nga kona u dzula ri tshi mu takadza.

20. Ndi mini zwine zwa nga ri thusa uri ri si vhilaele nga ha zwithu zwine ri si zwi ḓivhe?

²⁰ Yehova u ri vhudza zwoṱhe zwine ra tea u zwi ḓivha. Nga zwenezwo, ri songo vhilaela nga ha zwithu zwine riṋe ri si zwi ḓivhe. Nṱhani hazwo, kha ri livhise ṱhogomelo kha zwithu zwine zwa vha zwa ndeme. Musi ri tshi ita nga u ralo, ri vha ri tshi khou sumbedza uri ri a ḓiṱukufhadza na uri ri fhulufhela Yehova “a re na nḓivho yo fhelelaho.” (Yobo 36:4) Naho zwa zwino hu na zwiṅwe zwithu zwine ri si kone u zwi pfesesa, ri a zwi ḓivha uri Yehova u ḓo dzula a tshi ri gudisa zwithu zwiswa u ya nga hu sa fheli. Ro lavhelela u dzula ri tshi guda zwithu zwiswa nga ha Mudzimu washu a mangadzaho.​—Muh. 3:11.