Humbulani Uri Yehova Ndi “Mudzimu A Tshilaho”

1. Ndi mini zwine zwa thusa vhathu vha Yehova uri vha bvele phanḓa vha tshi mu gwadamela naho vhe na dzithaidzo?

MUSI Bivhili i tshi ṱalusa zwifhinga zwine ra khou tshila khazwo i ri ndi “zwifhinga zwi lemelaho zwi konḓaho u sedzana nazwo.” (2 Tim. 3:1) Sa vhathu vha Yehova ri sedzana na thaidzo dzine muthu muṅwe na muṅwe a sedzana nadzo kha ḽino shango ḽivhi ḽa Saṱhane, fhedzi ri a dovha ra pikiswa na u tovholwa ngauri ri shumela Yehova. Ndi mini zwine zwa ri thusa uri ri bvele phanḓa ri tshi shumela Yehova naho ri na dzenedzi thaidzo? Tshiitisi tshihulwane ndi uri ri ḓivha Yehova sa “Mudzimu a tshilaho.”​—Yer. 10:10; 2 Tim. 1:12.

2. Ndi mini zwine ra zwi ḓivha nga ha Yehova zwine zwa ri khwaṱhisa?

² Yehova ndi Muthu wa vhukuma ane a ri thusa musi ri tshi khou sedzana na milingo nahone u ṱoḓa zwibuli zwa u ri tikedza. (2 Koron. 16:9; Ps. 23:4) U humbula uri Yehova ndi Mudzimu a tshilaho zwi nga ri thusa u konḓelela milingo ine ra ṱangana nayo. Ṱhogomelani uri zwo thusa hani Khosi Davida.

3. Davida o vha tshi khou amba uri mini musi a tshi ri “Yehova u a tshila”?

³ Davida o vha a tshi ḓivha Yehova zwavhuḓi nahone a tshi ḓitika ngae. Musi Khosi Saulo na maṅwe maswina a Davida a tshi khou ṱoḓa u mu vhulaya, Davida o rabela kha Yehova uri a mu thuse. (Ps. 18:6) Musi Mudzimu o no fhindula thabelo yawe na u mu tshidza, Davida o ri: “Yehova u a tshila!” (Ps. 18:46) Davida o vha a tshi khou amba uri mini? Iṅwe ṱhalusamaipfi i amba uri Davida o vha a tshi khou ombedzela uri Yehova ndi Mudzimu wa ngoho, ane a ḓo dzula a tshi thusa vhashumeli vhawe. Davida o vha a tshi zwi ḓivha uri Mudzimu u a ḓivha zwoṱhe zwine zwa khou itea khae na uri o vha o ḓiimisela u mu thusa. Zwenezwo zwo ṱuṱuwedza Davida uri a bvele phanḓa a tshi shumela Yehova na u mu renda.​—Ps. 18:28, 29, 49.

4. Ri vhuyelwa hani nga u dzhia Yehova sa Mudzimu a tshilaho?

⁴ U tenda uri Yehova ndi Mudzimu a tshilaho zwi ḓo ri thusa uri ri mu shumele nga u fhisea. Zwi ḓo ita uri ri vhe na nungo dza u konḓelela milingo na u ita uri ri bvele phanḓa ri tshi shuma nga maanḓa tshumeloni yawe. Zwi ḓo dovha zwa ita uri ri ḓiimisele u dzula ri tsini na Yehova.

MUDZIMU A TSHILAHO U ḒO NI KHWAṰHISA

5. Ndi mini zwine zwa ita uri ri vhe na vhungoho ha uri ri nga kona u konḓelela milingo? (Vhafilipi 4:13)

⁵ Arali ra humbula uri Yehova ndi Mudzimu a tshilaho na uri u ḓo dzula a tshi ri thusa zwi ḓo ri thusa uri ri kone u konḓelela milingo yoṱhe hu sa londwi uri ndi mihulwane kana miṱuku. Yehova a nga ri thusa kha mulingo muṅwe na muṅwe ngauri a hu na tshine tsha mu balela. Ndi Ramaanḓaoṱhe nahone a nga ri ṋea maanḓa a u konḓelela. (Vhalani Vhafilipi 4:13.) Zwenezwi zwi ita uri ri vhe na vhungoho ha uri ri nga kona u konḓelela milingo. Musi ri tshi vhona Yehova a tshi ri thusa kha milingo miṱuku zwi ita uri ri vhe na vhungoho ha uri u ḓo ri thusa na musi ri tshi khou sedzana na milingo mihulwane.

6. Ndi mini zwe zwa itea kha Davida musi a tshi kha ḓi vha muṱuku, zwe zwa ita uri a fhulufhele Yehova nga ho engedzeaho?

⁶ Ṱhogomelani zwiitea zwivhili zwe zwa ita uri Davida a vhe na vhungoho ha uri Yehova u ḓo mu thusa. Musi a tshi kha ḓi vha muṱuku a tshi khou lisa sambi, ho ḓa ndau na tshivhingwi zwa fara nngu kha sambi. Kha zwenezwo zwiitea zwivhili Davida o pandamedza zwenezwo zwivhanda nga tshivhindi, a tshidza nngu. Fhedzi Davida ho ngo vhuya a humbula uri o kona u ita zwenezwi zwithu nga maanḓa awe. O vha a tshi zwi ḓivha uri Yehova ndi ene we a mu ṋea maanḓa a u zwi ita. (1 Sam. 17:34-37) Davida ho ngo vhuya a hangwa zwenezwi zwithu zwe a zwi tshenzhela. O dzula a tshi elekanya nga hazwo zwa ita uri a vhe na vhungoho ha uri Mudzimu a tshilaho u ḓo mu khwaṱhisa na tshifhingani tshi ḓaho.

7. Ndi mini zwe Davida a livhisa ṱhogomelo khazwo nahone zwo mu thusa hani u lwa na Goliata?

⁷ Musi Davida e minwahani ya vhufumi, o dalela madennde a mmbi ya Vhaisiraele. O wana maswole a Vhaisiraele o tshuwa a tshi khou ofha Mufilisita wa muswonḓa ane a pfi Goliata we a vha o ḓa u “nyadza mmbi ya Isiraele.” (1 Sam. 17:10, 11) Maswole a Vhaisiraele o vha a tshi khou ofha ngauri o vha o livhisa ṱhogomelo kha nḓila ye Goliata a vha o hula ngayo na kha zwe a vha a tshi khou zwi amba. (1 Sam. 17:24, 25) Fhedzi Davida ho ngo livhisa ṱhogomelo kha zwenezwo. O vha tshi zwi ḓivha uri musi Goliata a tshi nyadza mmbi ya Isiraele o vha a tshi khou nyadza “Mudzimu a tshilaho.” (1 Sam. 17:26) Davida o vha a tshi khou humbula nga ha Yehova. Davida o fhulufhela uri Mudzimu u ḓo mu thusa kha honovhu vhuimo sa izwi o ḓi mu thusa na tshifhingani tsho fhiraho musi a tshi khou lisa nngu. Nga nṱhani ha zwenezwo, o lwa na Goliata nahone a kunda.​—1 Sam. 17:45-51.

8. Ndi mini zwine zwa nga ita uri ri vhe na vhungoho ha uri Yehova u ḓo ri thusa musi ro sedzana na milingo? (Sedzani tshifanyiso.)

⁸ Na riṋe ri nga kona u kunda milingo arali ra dzula ri tshi humbula uri Mudzimu a tshilaho u dzula o lugela u ri thusa. (Ps. 118:6) U humbula nga ha nḓila ye a ri thusa ngayo tshifhingani tsho fhiraho zwi nga ita uri ri mu fhulufhele nga ho engedzeaho. Vhalani mafhungo a re Bivhilini a ambaho nga ha nḓila ye Yehova a tshidza ngayo vhagwadameli vhawe. (Yes. 37:17, 33-37) Zwiṅwe hafhu, vhalani kana ni ṱalele mivhigo i re kha website yashu ya jw.org ine ya sumbedza nḓila ine Yehova a tikedza ngayo vhahashu musalauno. Ni humbule na nga zwifhinga zwe Yehova a ni thusa. Khamusi ni nga pfa u nga Yehova ha athu ni itela zwithu zwi mangadzaho u fana na u ni tshidza kha ndau kana kha tshivhingwi. Naho zwo ralo, ngoho ndi ya uri Yehova o no ḓi ni itela zwithu zwinzhi vhutshiloni haṋu. O ni kokodza uri ni vhe khonani yawe. (Yoh. 6:44) Na zwino ni kha ḓi vha ngohoni ngauri Yehova u a ni thusa. Ndi ngani ni sa mu humbeli uri a ni thuse u humbula zwiitea zwe khazwo a fhindula thabelo dzaṋu, a ni tikedza nga tshifhinga tsho teaho kana zwe a ni thusa musi ni kha vhuimo vhu konḓaho. U humbula nga ha zwenezwo zwithu zwi ḓo ita uri ni vhe na vhungoho ha uri Yehova u ḓo bvela phanḓa a tshi ni thusa.

9. Ndi mini zwine ra tea u zwi humbula musi ro sedzana na milingo? (Mirero 27:11)

⁹ Musi ri milingoni ri tea u livhisa ṱhogomelo kha zwine zwa vha zwa ndeme vhukuma. Diabolo u amba uri musi ri khou sedzana na vhuimo vhu konḓaho ri ḓo laṱa Yehova, nga zwenezwo, zwine ra zwi ita musi ri khou sedzana na milingo zwi kwama Yehova. (Yobo 1:10, 11; vhalani Mirero 27:11.) Musi ri tshi dzula ri tshi konḓelela hu sa londwi milingo, ri vha ri khou sumbedza uri ri funa Yehova na u sumbedza uri Saṱhane ndi muzwifhi. Naa ni khou tovholwa nga muvhuso wa hune na dzula hone? Naa ni na thaidzo ya zwa masheleni? Naa vhathu vhane na huwelela khavho a vha ṱoḓi u thetshelesa mafhungo maḓifha? Kana naa ni khou sedzana na muṅwe mulingo vho? Arali zwo ralo, ni humbule uri vhuimo haṋu vhu ni vulela tshibuli tsha u takadza mbilu ya Yehova. Ni humbule na uri a nga si tende ni tshi lingwa lune na sa ḓo kona u konḓelela. (1 Vhakor. 10:13) U ḓo ni ṋea nungo uri ni kone u konḓelela.

MUDZIMU A TSHILAHO U ḒO NI LAMBEDZA

10. Ndi mini zwine Mudzimu a tshilaho a ḓo zwi itela vhagwadameli vhawe?

¹⁰ Yehova u dzula a tshi lambedza vhagwadameli vhawe. (Vhahev. 11:6) U ri ṋea mulalo na u ita uri ri fushee zwino nahone u ḓo ri ṋea vhutshilo vhu sa fheli tshifhingani tshi ḓaho. Ri nga fhulufhela uri Yehova u khou ṱoḓa u ri lambedza na uri u na maanḓa a u ita nga u ralo. Nga nṱhani ha zwenezwo, ri bvela phanḓa ri tshi ita zwine ra nga kona u itela u mu gwadamela u fana na vhashumeli vhawe vha tshifhingani tsho fhiraho. Zwenezwo ndi zwe Timotheo a ita.​—Vhahev. 6:10-12.

11. Ndi mini zwo ṱuṱuwedzaho Timotheo uri a shume nga maanḓa tshivhidzoni? (1 Timotheo 4:10)

¹¹ Vhalani 1 Timotheo 4:10. Timotheo o vha e na fhulufhelo ḽa uri Mudzimu a tshilaho u ḓo mu lambedza. Ndi ngazwo o shuma nga maanḓa a tshi itela Yehova na vhaṅwe. Ndi mini zwe a zwi ita? Muapostola Paulo o mu ṱuṱuwedza uri a khwinise nḓila ine a funza ngayo tshivhidzoni na vhuḓinḓani. O dovha a mu vhudza uri a vhe tsumbo yavhuḓi kha vhahawe vhaṱuku na vhahulwane. Timotheo o dovha a ṋewa mishumo i konḓaho ye ya vha i tshi katela u kaidza nga lufuno vhathu vhe vha vha vha tshi tea u kaidziwa. (1 Tim. 4:11-16; 2 Tim. 4:1-5) Timotheo o vha e na vhungoho ha uri Yehova u ḓo mu lambedza naho nga zwiṅwe zwifhinga vhaṅwe vho vha vha sa vhoni mushumo we a vha a tshi khou u ita kana vha sa u dzhieli nṱha.​—Vharoma 2:6, 7.

12. Ndi ngani vhahulwane vha tshi bvela phanḓa na u shuma nga maanḓa tshivhidzoni? (Sedzani tshifanyiso.)

¹² Na vhahulwane vha tshivhidzo ṋamusi vha nga vha na vhungoho ha uri Yehova u a vhona mushumo une vha u ita na uri u a u dzhiela nṱha. Vha ita mushumo wa u lisa, u funza na u huwelela nahone vhaṅwe vha a thusa kha mushumo wa u fhaṱa na wa u phalala vho welwaho nga khombo. Vhaṅwe vha shuma kha Zwigwada Zwine Zwa Dalela Vhalwadze kana kha Komiti Ya Vhulamukanyi Na Vhuongelo (HLC). Vhahulwane vhane vha shela mulenzhe kha yeneyi mishumo vha a zwi ḓivha uri vha vha vha tshi khou tikedza ndugiselelo ya Yehova sa izwi tshivhidzo tshi tshawe tshi si tsha vhathu. Nga zwenezwo, vha shuma nga maanḓa tshivhidzoni vha tshi fhulufhela uri Mudzimu u ḓo lambedza mushumo wavho.​—Vhakol. 3:23, 24.

13. Yehova u ḓipfa hani nga zwine ra mu itela zwone?

¹³ A si vhathu vhoṱhe vhane vha nga kona u vha vhahulwane. Fhedzi roṱhe ri na zwine ra nga zwi ṋea Yehova. U a zwi dzhiela nṱha musi ri tshi ita zwine ra nga kona u itela u mu shumela. U a zwi vhona musi ri tshi ṋeela u itela u tikedza mushumo wa shango ḽoṱhe naho ri tshi ṋeela nga zwiṱukuṱuku. U a takala musi ri tshi imisa tshanḓa ra fhindula miṱanganoni naho ri na ṱhoni nahone zwi a mu takadza musi ri tshi hangwela vho ri khakhelaho. Naho ni tshi vhona u nga zwine na khou zwi itela Yehova a si zwinzhi, ni nga vha na vhungoho ha uri u a zwi dzhiela nṱha. Zwi ita uri a ni fune nahone u ḓo ni lambedza.​—Luka 21:1-4.

DZULANI NI TSINI NA MUDZIMU A TSHILAHO

14. U dzula ri na vhushaka ha tsini na Yehova zwi ri thusa hani uri ri dzule ri tshi fhulufhedzea? (Sedzani tshifanyiso.)

¹⁴ Arali ri na vhushaka ha tsini na Yehova zwi ḓo ri lelutshela uri ri dzule ri tshi fhulufhedzea khae. Ndi zwe zwa itea kha Yosefa. O hana u ḓifara luvhi nga zwa vhudzekani. O vha a tshi dzhia Yehova sa khonani yawe nahone o vha a sa ṱoḓi u ita zwine zwa si mu takadze. (Gen. 39:9) Uri ri vhe na vhushaka ha tsini na Yehova ri tea u ḓiṋea tshifhinga tsha u rabela khae na u vhala Ipfi ḽawe. Zwenezwo zwi ḓo ita uri vhukonani hashu nae vhu khwaṱhe. Musi ri tshi vha na vhushaka ha tsini na Yehova u fana na Yosefa, a ri nga ḓo ṱoḓa u ita tshithu na tshithihi tshine tsha si mu takadze.​—Yak. 4:8.

15. Ndi mini zwine ra zwi guda kha zwe zwa itea kha Vhaisiraele musi vhe sogani? (Vhahevheru 3:12)

¹⁵ Vhane vha hangwa uri Yehova ndi mudzimu a tshilaho, zwi nga vha lelutshela u sendela kule nae. Ṱhogomelani zwe zwa itea kha Vhaisiraele musi vhe sogani. Vho vha vha tshi zwi ḓivha uri Yehova u hone fhedzi vho timatima arali a tshi ḓo vha ṱhogomela. Vho ita na u vhudzisa uri: “Naa Yehova u na riṋe kana ha na riṋe?” (Ek. 17:2, 7) Zwenezwo zwo ita uri vha shandukele Yehova. Zwi tou vha khagala uri ri ṱoḓa u iledza tsumbo yavho i si yavhuḓi.​—Vhalani Vhahevheru 3:12.

16. Ndi mini zwine zwa nga linga lutendo lwashu?

¹⁶ Ḽino shango ḽi ita uri zwi konḓe u dzula ri tsini na Yehova. Vhathu vhanzhi a vha tendi uri Mudzimu u hone. Kanzhi vhathu vhane vha si ite zwine Mudzimu a zwi funa vha vhonala vha tshi khou ḓiphiṋa nga vhutshilo. Musi ri tshi vhona zwenezwo, zwi nga linga lutendo lwashu. Naho ri sa ḓo hanedza uri Mudzimu u hone, ri nga thoma u timatima arali a tshi ḓo ri thusa. Muṅwali wa Phisalema 73 na ene o vhuya a ḓipfa nga yeneyo nḓila. O vhona vhathu vha sa thetshelesi milayo ya Mudzimu vha tshi khou ḓiphiṋa nga vhutshilo. Zwenezwo zwo ita uri a timatime arali u shumela Yehova zwi tshi vhuyedza.​—Ps. 73:11-13.

17. Ndi mini zwine zwa ḓo ri thusa uri ri dzule ri tsini na Yehova?

¹⁷ Ndi mini zwo thusaho muphisalema uri a shandule nḓila ye a vha a tshi khou humbula ngayo? O elekanya nga ha zwithu zwine zwa ḓo itea kha vhathu vhane vha litsha u fhulufhela Yehova. (Ps. 73:18, 19, 27) O dovha a humbulisisa nga ha nḓila ine u gwadamela Yehova zwa vhuyedza ngayo. (Ps. 73:24) Na riṋe ri nga humbulisisa nga ha zwithu zwoṱhe zwe Yehova a ri fhaṱutshedza ngazwo. Ri nga humbula nga ha uri vhutshilo hashu ho vha vhu tshi ḓo vha vhu hani arali ro vha ri sa khou shumela Yehova. U humbula uri ndi ngani u shumela Yehova zwi zwavhuḓi zwi ḓo ri thusa uri ri dzule ri tshi fhulufhedzea khae. Nahone u fana na muphisalema ri ḓo amba uri: “A vha nṋe, u sendela tsini na Mudzimu ndi zwone zwavhuḓi kha nṋe.”​—Ps. 73:28.

18. Ndi ngani ri songo tea u ofha zwine zwa ḓo itea tshifhingani tshi ḓaho?

¹⁸ Ri nga kona u kunda mulingo muṅwe na muṅwe une ra nga sedzana nawo kha ano maḓuvha a vhufhelo ngauri ri “shumela Mudzimu a tshilaho wa ngoho.” (1 Vhathes. 1:9) Mudzimu washu u na ndavha na riṋe nahone u ḓo dzula a tshi ri thusa. O thusa vhashumeli vhawe tshifhingani tsho fhiraho nahone na riṋe u khou ri thusa ṋamusi. Hu si kale hu ḓo vha na maṱungu mahulu ane a sa athu vhuya a vha hone fhano kha ḽifhasi. Fhedzi nga tshenetsho tshifhinga Yehova u ḓo vha e na riṋe. (Yes. 41:10) U nga ri roṱhe ri nga vha na ‘fhulufhelo ra ri: “Yehova ndi muthusi wanga; a thi nga ofhi.”’​—Vhahev. 13:5, 6.