A Ri Roṱhe

1-2. (a) Ndi ngani ri tshi nga amba uri ri nga si sedzane na milingo ri roṱhe? (b) Ri ḓo haseledza mini kha ino thero?

MUSI ri tshi khou ṱangana na milingo, ri nga ḓipfa u nga ro xela ḓakani ri roṱhe. Naho zwo ralo, a ri sedzani na yeneyo milingo ri roṱhe. Khotsi ashu wa ṱaḓulu u a vhona vhuimo vhune ra vha khaho nahone u fhulufhedzisa uri u ḓo ri thusa. U vhudza vhatevheli vhawe vha fhulufhedzeaho uri: “Ndi ḓo u thusa.”​—Yes. 41:10.

² Kha ino thero, ri ḓo haseledza nḓila nṋa dzine Yehova a ri thusa ngadzo. Ya u thoma, u a ri livhisa. Ya vhuvhili, u a ri ṱhogomela. Ya vhuraru, u a ri tsireledza. Ya vhuṋa, u a ri khuthadza. Yehova u a ri khwaṱhisedza uri hu sa londwi milingo ine ra ṱangana nayo vhutshiloni, a nga si ri hangwe. A nga si ri laṱe. A ri roṱhe.

YEHOVA U A RI LIVHISA

3-4. Yehova u ri livhisa hani? (Phisalema 48:14)

³ Vhalani Phisalema 48:14. Yehova ha lavheleli uri ri ḓilivhise riṋe vhaṋe. U livhisa hani vhashumeli vhawe vha fhulufhedzeaho ṋamusi? Tshiṅwe tsha zwithu zwine a zwi shumisa u ri livhisa ndi Bivhili. (Ps. 119:105) U shumisa Bivhili u ri thusa uri ri ite phetho dzavhuḓi na uri ri humbule na u ita zwithu u fana nae. Musi ri tshi ita zwine a ri funza zwone Bivhilini, ri a takala zwazwino, ra dovha ra vha na fhulufhelo ḽa u tshila tshoṱhe.a Sa tsumbo, u ri gudisa uri ri hangwele vhaṅwe, ri si vha fare nga mbilu, ri fhulufhedzee kha zwithu zwoṱhe na u funa vhaṅwe zwi tshi bva mbiluni. (Ps. 37:8; Vhahev. 13:18; 1 Pet. 1:22) Musi ri tshi ita zwenezwi zwithu zwoṱhe, ri vha vhabebi vhavhuḓi, vhavhingani vhavhuḓi na khonani dzavhuḓi.

⁴ Yehova o ita uri hu ṅwaliwe nga ha vhathu vhe vha ṱangana na milingo ine ra khou sedzana nayo na vhe vha ḓipfa nga nḓila i fanaho na yashu. (1 Vhakor. 10:13; Yak. 5:17) Musi ri tshi vhala nga ha vhenevho vhathu nahone ri tshi edzisa tsumbo yavho, ri ḓo vhuyelwa nga nḓila mbili. Ya u thoma, ri ḓo pfesesa uri a si riṋe ri roṱhe vhane vha ṱangana na milingo vhutshiloni, na vhaṅwe vho ḓi ṱangana nayo, Yehova a vha thusa u i konḓelela. (1 Pet. 5:9) Ya vhuvhili, ri ḓo guda uri ri nga konḓelela hani milingo ine ra ṱangana nayo na u dzula ro takala.​—Vharoma 15:4.

5. Yehova u shumisa vhonnyi u itela u ri livhisa?

⁵ Yehova u dovha a ita ndugiselelo ya uri vhahashu vha ri livhise.b Sa tsumbo, vhalavhelesi vha ḽiisela vha ita vha tshi dalela zwivhidzo u itela u zwi ṱuṱuwedza. Nyambo dzavho dzi a ri khwaṱhisa lutendo, dza ri thusa uri ri bvele phanḓa ri na vhuthihi. (Mish. 15:40–16:5) Vhahulwane vha zwivhidzo vha shuma nga maanḓa u itela u thusa muṅwe na muṅwe washu uri a bvele phanḓa a tshi sendela tsini na Yehova. (1 Pet. 5:2, 3) Vhabebi vha gudisa vhana vhavho u funa Yehova na u vha thusa uri vha dzhie phetho dzavhuḓi na uri vha ḓifare zwavhuḓi. Vha dovha vha vha ṱuṱuwedza u vhala Bivhili, u ya miṱanganoni na u huwelela. (Mir. 22:6) Vhakriste vha tshifumakadzini vhane vha vha na vhushaka havhuḓi na Yehova vha nga thusa vha re vhaṱuku khavho nga u vha vhetshela tsumbo yavhuḓi, u vha ṋea nyeletshedzo na u vha ṱuṱuwedza.​—Tito 2:3-5.

6. Ri nga ita mini uri ri vhuyelwe nga u livhiswa nga Yehova?

⁶ Yehova o ri ṋea zwoṱhe u itela u ri thusa uri ri ite phetho dzavhuḓi na uri ri dzule ro takala. Ndi mini zwine ra nga zwi ita u itela uri ri vhuyelwe nga zwoṱhe zwe a ri itela zwone? Mirero 3:5, 6 i ri: “Fhulufhela Yehova nga mbilu yau yoṱhe, u songo ḓitika nga ṱhalukanyo yau.” Arali ra ita zwenezwo, ‘u ḓo ri lugiselela nḓila dzashu.’ Zwenezwo zwi amba uri u ḓo ri thusa uri ri iledze thaidzo nnzhi na u ḓiphiṋa nga vhutshilo. Ri a livhuwa uri Yehova u a ri ḓivha na u ri funa nga maanḓa, lune a ṋea muṅwe na muṅwe washu nyeletshedzo ine a i ṱoḓa.​—Ps. 32:8.

YEHOVA U A RI ṰHOGOMELA

7. Yehova u ri ṱhogomela hani? (Vhafilipi 4:19)

⁷ Vhalani Vhafilipi 4:19. Yehova u dovha a ri thusa uri ri wane zwine ra zwi shaya, zwi ngaho sa zwiḽiwa, zwiambaro na vhudzulo. (Mat. 6:33; 2 Vhathes. 3:12) Zwo ḓowelea uri ri vhilaele nga hazwo, fhedzi Yehova ha ṱoḓi ri tshi vhilaela nga maanḓa nga hazwo. (Sedzani study note tsha Mateo 6:25 fhasi ha “Stop being anxious.”) Ndi ngani? Ndi nga nṱhani ha uri Khotsi ashu a nga si vuwe o ri laṱa. (Mat. 6:8; Vhahev. 13:5) Ri nga mu fhulufhela nga ho fhelelaho musi a tshi ri u ḓo ri ṱhogomela.

8. Yehova o ṱhogomela hani Davida?

⁸ Humbulani nga ha nḓila ye Yehova a thusa ngayo Davida. Nga miṅwaha i konḓaho musi Davida a tshi khou shavha Khosi Saulo, Yehova o ṋea ene na vhanna vhe a vha a tshi khou tshimbila navho zwine vha zwi shaya u itela uri vha kone u tshila. Musi Davida a tshi humbula nga ha nḓila ye Yehova a mu ṱhogomela ngayo nga zwifhinga zwi konḓaho, o ri: “U bva ndi tshee muṱuku u swika zwino ndo no aluwa, a thi athu u vhona muvhuya o laṱiwa, kana vhana vhawe vha tshi humbela vhurotho.” (Ps. 37:25) U fana na Davida, na inwi ni nga vha no vhona nḓila ye Yehova a ni ṱhogomela ngayo kana nḓila ye a ṱhogomela ngayo vhahashu nga zwifhinga zwi konḓaho.

9. Yehova u ṱhogomela hani vhathu vhawe musi hu tshi vha na khombo? (Sedzani zwifanyiso.)

⁹ Yehova u dovha a ṱhogomela vhathu vhawe musi hu na khombo. Sa tsumbo, musi hu tshi vha na nḓala ngei Yerusalema nga tshifhinga tsha Vhakriste vha u thoma, vhaṅwe vhahavho vha re kha maṅwe mashango vho vha rumela zwine vha zwi shaya. (Mish. 11:27-30; Vharoma 15:25, 26) Na ṋamusi vhathu vha Yehova vha ita zwi fanaho, vha thusa vhahavho musi vha tshi ṱoḓa thuso. Musi hu tshi vha na khombo, Yehova u a vha ṱuṱuwedza uri vha vha ṋee zwine vha zwi shaya zwi ngaho zwiḽiwa, maḓi, zwiambaro na mishonga. Vha re kha muhasho wa u fhaṱa vha a lugisa Dziholo na mahaya avho o tshinyalaho. Vhashumeli vha Yehova vha a khuthadza na u ṱuṱuwedza vhathu vho xelelwaho nga mahaya avho kana vho lovhelwaho nga vhane vha vha funa.c

10-11. Ni guda mini kha tsumbo ya Vho Borys?

¹⁰ Yehova u dovha a thusa vhathu vhane vha si mu shumele. Ri edzisa Yehova nga u ṱoḓa zwibuli zwa u sumbedza vhuthu kha vhane vha si shumele Yehova. (Vhagal. 6:10) Musi ri tshi ita nga u ralo, ri vha ri tshi khou vha thusa u guda nga ha riṋe na nga ha Yehova. Ṱhogomelani tsumbo ya Vho Borys vhane vha vha ṱhoho ya tshikolo vhane vha dzula ngei Ukraine. Naho Vho Borys vha si Ṱhanzi ya Yehova, vho vha vha tshi fara vhagudiswa vhavho vha re Ṱhanzi dza Yehova nga vhuthu nahone vha tshi ṱhonifha zwine vha zwi tenda. Musi Vho Borys vha tshi ita phetho ya u pfuluwa nga nṱhani ha nndwa dze dza vha dzi hone, vhahashu vho vha thusa. Nga murahu, Vho Borys vho ya Tshihumbudzoni tsha lufu lwa Kristo. Musi vha tshi humbula nga ha nḓila ye vhahashu vha vha thusa ngayo, Vho Borys vho ri: “Ṱhanzi dza Yehova dzo ntsumbedza vhuthu na u nṱhogomela, ndi a vha livhuwa nga maanḓa.”

¹¹ Na riṋe ri nga edzisa Khotsi ashu wa ṱaḓulu nga u sumbedza vhathu vhoṱhe lufuno hu sa londwi uri vha shumela Yehova kana a vha mu shumeli. (Luka 6:31, 36) Ri fhulufhela uri u vha sumbedza hashu lufuno, zwi nga vha ṱuṱuwedza uri vha gude zwo engedzeaho nga ha Yehova nahone vha ṱoḓe u mu shumela. (1 Pet. 2:12) Hu sa londwi uri vha khetha u mu shumela kana u sa mu shumela, arali ra vha sumbedza lufuno, ri ḓo takala ngauri “u ṋea zwi a takadza u fhira u ṋewa.”​—Mish. 20:35.

YEHOVA U A RI TSIRELEDZA

12. Yehova u fhulufhedzisa vhathu vhawe uri u ḓo vha tsireledza hani? (Phisalema 91:1, 2, 14)

¹² Vhalani Phisalema 91:1, 2, 14. Ṋamusi, Yehova o fhulufhedzisa vhathu vhawe uri u ḓo vha tsireledza kha zwithu zwine zwa nga tshinya vhushaka havho nae. A nga si tendele Saṱhane a tshi ita uri vha litshe u mu shumela nga nḓila ine a funa. (Yoh. 17:15) Nga tshifhinga tsha ‘maṱungu mahulu,’ ri nga vha na vhungoho ha uri Yehova u ḓo ita zwe a zwi fhulufhedzisa musi a tshi ri u ḓo ri tsireledza na u khwaṱhisa lutendo lwashu.​—Nzumb. 7:9, 14.

13. Yehova u tsireledza hani muṅwe na muṅwe washu?

¹³ Yehova u tsireledza hani muṅwe na muṅwe washu? U shumisa Bivhili u itela uri ri ḓivhe zwo lugaho na zwi songo lugaho. (Vhahev. 5:14) Musi ri tshi tshila u tendelana na zwine Bivhili ya zwi amba, zwi tsireledza vhushaka hashu nae, zwa dovha zwa ita uri ri ite phetho dzine dza ḓo ri thusa uri ri takale na uri ri vhe na mutakalo wavhuḓi. (Ps. 91:4) Yehova u dovha a ri tsireledza a tshi shumisa tshivhidzo. (Yes. 32:1, 2) Vhahashu tshivhidzoni vha a funa Yehova na u mu ṱhonifha. Nga zwenezwo, musi ri tshi fhedza tshifhinga navho miṱanganoni, tsimuni na u ṱwa navho, zwi a ri ṱuṱuwedza, zwa ri thusa uri ri iledze zwithu zwivhi.​—Mir. 13:20.

14. (a) Ndi ngani Yehova a sa ri tsireledzi kha milingo yoṱhe? (b) Phisalema 9:10 i ri khwaṱhisedza mini? (Sedzani ṱhaluso i re magumoni a siaṱari.)

¹⁴ Tshifhingani tsha kale, Yehova o vha a tshi ita a tshi tsireledza vhathu vhawe uri vha songo huvhala kana u vhulawa. Fhedzi o vha a sa zwi iti tshifhinga tshoṱhe. Bivhili i ri vhudza uri “zwiitea zwi songo lavhelelwaho zwi wela vhoṱhe.” (Muh. 9:11) Zwiṅwe hafhu, Yehova u tendela vhashumeli vhawe vha tshi pikiswa na u vhulawa u itela u sumbedza uri Saṱhane u a zwifha. (Yobo 2:4-6; Mat. 23:34) Na ṋamusi zwi nga kha ḓi itea na kha riṋe. Naho Yehova a sa ḓo ri tsireledza kha milingo yoṱhe, ri nga vha na vhungoho ha uri a nga si ṱutshele vhane vha mu funa.d​—Ps. 9:10.

YEHOVA U A RI KHUTHADZA

15. Ri khuthadzwa hani nga u rabela, u vhala Bivhili na nga vhahashu? (2 Vhakorinta 1:3, 4)

¹⁵ Vhalani 2 Vhakorinta 1:3, 4. Nga tshiṅwe tshifhinga, ri nga ḓipfa ro ṱungufhala, ri tshi khou vhilaela kana ro tsikeledzea. Khamusi ri tshi khou amba zwino, no tsikeledzea nahone ni khou ḓipfa ni noṱhe. Naa hu na muthu ane a pfesesa nḓila ine na khou ḓipfa ngayo? Ee, Yehova u a pfesesa. U a ḓivha vhuṱungu vhune ra ṱangana naho nahone u dovha a ri “khuthadza kha milingo yoṱhe.” U zwi ita hani? Musi ri tshi rabela khae zwi tshi bva mbiluni, u ri ṋea “mulalo une vhathu vha si kone u u pfesesa.” (Vhafil. 4:6, 7) Ri dovha ra khuthadzwa musi ri tshi vhala Ipfi ḽawe ḽine ḽa vha Bivhili. Nga ngomu haḽo, Yehova u ri vhudza nḓila ine a ri funa ngayo, u ri gudisa uri ri nga vha hani na vhuṱali, a dovha a ri ṋea fhulufhelo. Ri dovha ra khuthadzwa musi ri tshi ya miṱanganoni ngauri ndi hune ra guda zwithu zwi ṱuṱuwedzaho zwi bvaho Bivhilini na hune ra vha ri na vhahashu vhane vha ri funa.

16. Ni guda mini kha tsumbo ya Nathan na Priscilla?

¹⁶ U itela u vhona nḓila ine Yehova a khuthadza na u ṱuṱuwedza ngayo a tshi shumisa Bivhili, kha ri ṱhogomele tsumbo ya Nathan na Priscilla vhane vha dzula Amerika. Miṅwahani yo fhiraho, vho ita phetho ya uri vha pfulutshele fhethu hu re na ṱhoḓea ya vhahuweleli. Nathan u ri: “Ro fhulufhela uri Yehova u ḓo fhaṱutshedza vhuḓidini hashu.” Fhedzi musi vha tshi swika henengei, vho mbo ḓi vha na thaidzo dza masheleni na dza mutakalo. Zwenezwo zwa ita uri vhenevho vhavhingani vha hume vha ye hayani, fhedzi vha ḓi bvela phanḓa vhe na thaidzo dza masheleni. Nathan o bvela phanḓa a ri: “Ndo ḓivhudzisa uri ndi ngani Yehova a songo ri thusa musi ri tshi ṱoḓa thuso. Ndo thoma u ḓivhudzisa arali hu na zwe nda khakha.” Fhedzi nga murahu ha tshifhinga, Nathan na Priscilla vho thoma u zwi ṱhogomela uri Mudzimu ha ngo vha laṱa nga tshifhinga tshe vha vha vha tshi khou ṱoḓa thuso. O bvela phanḓa a ri: “Nga zwenezwo zwifhinga zwi konḓaho, Bivhili yo mbo ḓi vha khonani yanga ye ya vha i tshi nṱuṱuwedza na u nndivhisa. U livhisa ṱhogomelo kha nḓila ye Yehova a nthusa ngayo, nṱhani ha u livhisa ṱhogomelo kha thaidzo dze ra vha ri nadzo, zwo nthusa u vha na vhungoho ha uri Yehova u ḓo bvela phanḓa a tshi ri thusa na tshifhingani tshi ḓaho.”

17. Wahashu Vho Helga vho khuthadziwa hani? (Sedzani tshifanyiso.)

¹⁷ Yehova u dovha a ri khuthadza a tshi shumisa vhahashu. Zwenezwo ri zwi vhona kha tsumbo ya Vho Helga vhane vha dzula Hungary. Lwa miṅwaha minzhi, vho ṱangana na thaidzo nnzhisa dze dza ita uri vha ḓipfe vho tsikeledzea, vhe si tshithu. Musi vha tshi humbula nga zwoṱhe zwe vha sedzana nazwo kha yeneyo miṅwaha, vho zwi ṱhogomela uri Yehova o shumisa vhahashu tshivhidzoni u itela u vha khuthadza. Vho ri: “Yehova u dzula a tshi nthusa musi a tshi vhona uri a thi na maanḓa kana ndo tsikeledzea nga nṱhani ha mushumo, u ṱhogomela ṅwananga we a vha a tshi khou lwala na dziṅwe thaidzo. A hu na na ḓuvha na ḽithihi kha miṅwaha ya 30 yo fhiraho ye a si ite zwe a zwi fhulufhedzisa musi a tshi ri u ḓo nkhuthadza. O vha a tshi dzula a tshi nkhwaṱhisa nga maipfi a vhuthu, a ṱuṱuwedzaho a bvaho kha vhahashu. Ndo vha ndi tshi anzela u wana milaedza, dzigaraṱa nahone ndi tshi khoḓiwa nga tshifhinga tshe nda vha ndi tshi zwi ṱoḓesa.”

18. Ri nga khuthadza hani vhaṅwe?

¹⁸ Ri na tshibuli tsha u edzisa Mudzimu nga u khuthadza vhaṅwe. Ri nga zwi ita hani? Nga u vha thetshelesa nga vhuronwane, nga u amba navho nga vhuthu na u vha thusa musi vha tshi ṱoḓa thuso. (Mir. 3:27) Ri ṱuṱuwedzwa u khuthadza vhathu vhoṱhe, u katela na vhane vha sa shumele Mudzimu. Musi vhahura vhashu vho ṱungufhala, vha tshi khou lwala kana vha tshi khou vhilaela, ri nga vha dalela ra vha thetshelesa musi vha tshi amba na u vha ṱuṱuwedza ri tshi shumisa Bivhili. Musi ri tshi edzisa Yehova ane a vha “Mudzimu wa u khuthadza hoṱhe,” ri ḓo thusa vhahashu uri vha konḓelele milingo, ra dovha ra thusa na vhane vha si shumele Yehova uri vha gude nga hae.​—Mat. 5:16.

YEHOVA U ḒO DZULA A TSHI RI THUSA

19. Yehova u ri itela mini nahone ri nga mu edzisa hani?

¹⁹ Yehova u dzhiela nṱha vhoṱhe vhane vha mu funa. Ha ri laṱi musi ri tshi ṱangana na zwithu zwi konḓaho. Sa mubebi a re na lufuno ane a ṱhogomela ṅwana wawe, Yehova u a ṱhogomela vhashumeli vhawe vha fhulufhedzeaho. U a ri livhisa, u a ri ṱhogomela, u a ri tsireledza na u ri khuthadza. Ri edzisa Khotsi ashu wa ṱaḓulu a re na lufuno nga u tikedza na u ṱuṱuwedza vhaṅwe musi vha tshi khou ṱangana na zwithu zwi konḓaho. Naho ra nga ṱangana na zwithu zwi konḓaho, Yehova u ḓo dzula e na riṋe. O ri fhulufhedzisa uri: “U songo ofha, ngauri ndi na iwe.” (Yes. 41:10) Zwenezwi zwi ita uri ri vhe na vhungoho ha uri musi ri na Yehova, a ri roṱhe.