Naa Yehova U Ḓo Fhindula Thabelo Dzanga?

1-2. Ndi ngani ri tshi nga pfa u nga Yehova ha khou fhindula thabelo dzashu?

“WANA dakalo ḽihulu kha Yehova, u ḓo u ṋea zwine mbilu yau ya zwi tama.” (Ps. 37:4) Ḽeneḽo ndi fhulufhedziso ḽavhuḓi lungafhani. Fhedzi naa ri tea u lavhelela uri Yehova a ri ṋee zwoṱhe zwine ra ṱoḓa nga tshenetsho tshifhinga? Ndi ngani u ḓivhudzisa yeneyo mbudziso zwi zwa ndeme? Ṱhogomelani tsumbo dzi tevhelaho. Wahashu wa tshifumakadzini a songo vhingwaho u rabelela uri a rambiwe Tshikoloni tsha Vhahuweleli vha Muvhuso. Fhedzi miṅwaha ya ḓi ṱanḓulukana i tshi ya a sa khou rambiwa. Wahashu wa tshinnani ane a kha ḓi vha muswa u humbela Yehova uri a mu thuse vhulwadze hawe vhu fhole uri a kone u mu shumela nga ho engedzeaho tshivhidzoni. Fhedzi vhulwadze hawe a vhu vhi khwine. Vhabebi vha Vhakriste vha rabela uri ṅwana wavho a dzule a ngohoni, fhedzi ṅwana a khetha u litsha u shumela Yehova.

² Khamusi na inwi no humbela Yehova tshiṅwe tshithu, fhedzi na si tshi wane. Zwenezwo zwi nga vha zwo ita uri ni pfe u nga Yehova u fhindula thabelo dza vhaṅwe ngeno dzaṋu a sa dzi fhinduli. Kana ni nga humbula uri ni nga vha no ita tshiṅwe tshithu tsho khakheaho. Muṅwe wahashu wa tshifumakadzini ane a pfi Janiceb o ḓipfa nga yeneyo nḓila. Ene na mukalaha wawe vho rabela nga ha lutamo lwavho lwa u ya u shuma Bethele. U ri: “Ndo vha ndi tshi tou vha na vhungoho ha uri ri ḓo ya Bethele hu songo fhela tshifhinga tshilapfu.” Fhedzi ho fhela miṅwedzi minzhi na miṅwaha minzhi vhenevho vhavhingani vha sa athu u rambiwa. Janice u ri: “Ndo pfa ndo ṱungufhala nahone ndo ḓaḓa. Ndo ḓivhudzisa uri ndo khakhela Yehova nga mini. Ndo rabela nga maanḓa nga ha u ya Bethele, ndi ngani Yehova a songo fhindula thabelo yanga?”

3. Ri ḓo haseledza mini kha ino thero?

³ Nga tshiṅwe tshifhinga ri nga ḓivhudzisa arali Yehova a tshi thetshelesa thabelo dzashu. Na vhaṅwe vhanna vha fhulufhedzeaho vha tshifhingani tsha kale vho ḓivhudzisa mbudziso i fanaho na yeneyo. (Yobo 30:20; Ps. 22:2; Hab. 1:2) Ndi mini tshine tsha nga ita uri ni vhe na vhungoho ha uri Yehova u ḓo fhindula thabelo dzaṋu? (Ps. 65:2) U itela u ri thusa u fhindula yeneyo mbudziso, ri ḓo tea u thoma ra fhindula mbudziso dzi tevhelaho: Ya u thoma, ndi mini zwine ra nga zwi lavhelela kha Yehova? Ya vhuvhili, ndi mini zwine Yehova a zwi lavhelela kha riṋe? Ya vhuraru, ndi ngani ri tshi nga tea u shandula zwine ra zwi humbela?

NDI MINI ZWINE RA NGA ZWI LAVHELELA KHA YEHOVA?

4. U ya nga Yeremia 29:12, Yehova o fhulufhedzisa uri u ḓo ita mini?

⁴ Yehova u fhulufhedzisa uri u ḓo thetshelesa thabelo dzashu. (Vhalani Yeremia 29:12.) Mudzimu u a ri funa ngauri ri mu shumela nga u fhulufhedzea, ngauralo a nga si litshe u thetshelesa thabelo dzashu. (Ps. 10:17; 37:28) Naho zwo ralo, a zwi ambi uri u ḓo ri ṋea zwoṱhe zwine ra mu humbela. Ri nga tea u lindela shango ḽiswa uri ri kone u wana zwiṅwe zwe ra humbela.

5. Ndi mini zwine Yehova a zwi sedza musi a tshi thetshelesa thabelo dzashu? Ṱalutshedzani.

⁵ Yehova u sedza uri zwine ra humbela zwi tshimbidzana hani na tshipikwa tshawe. (Yes. 55:8, 9) Tshiṅwe tsha zwipikwa zwawe tshi katela uri ḽifhasi ḽi ḓale nga vhanna na vhafumakadzi vho takalaho vha re na vhuthihi nga fhasi ha Muvhuso wawe. Fhedzi Saṱhane o amba uri vhathu vho vha vha tshi nga vha vho takalaho musi vha tshi ḓivhusa vhone vhaṋe. (Gen. 3:1-5) Uri a sumbedza uri Saṱhane ndi muzwifhi, Yehova o tendela vhathu vha tshi ḓivhusa vhone vhaṋe. Fhedzi muvhuso wa vhathu ndi wone wo itaho uri ri vhe na dzithaidzo nnzhi dzine ra ṱangana nadzo ṋamusi. (Muh. 8:9) Ri a pfesesa uri Mudzimu a nga si fhelise thaidzo dzoṱhe dzine ra vha nadzo nga tshino tshifhinga. Arali a fhelisa thaidzo dzoṱhe zwino, vhathu vha sa tendi kha Mudzimu vha nga humbula uri ndi vhathu vhane vha khou tandulula dzenedzo thaidzo dzoṱhe. Vha nga dovha hafhu vha humbula uri vhathu vha nga kona u ḓivhusa vhone vhaṋe zwavhuḓi.

6. Ndi ngani ri tshi nga vha na vhungoho ha uri zwine Yehova a zwi ita, u zwi ita nga lufuno nahone ha khakhi?

⁶ Yehova a nga u fhindula thabelo dzi fanaho, fhedzi nga nḓila dzi sa fani. Sa tsumbo, musi Khosi Hiskia a tshi khou lwala nga maanḓa, o humbela Yehova uri a mu thuse uri a fhole. Yehova a mu fhodza. (2 Dzikh. 20:1-6) Fhedzi kha ḽiṅwe sia, musi muapostola Paulo a tshi humbela Yehova uri a mu vangule “mupfa ṋamani,” une wa nga vha wo vha u thaidzo ya mutakalo, Yehova ha ngo mu fhodza. (2 Vhakor. 12:7-9) Ṱhogomelani tsumbo ya muapostola Yakobo na Petro. Khosi Herode o vha a tshi ṱoḓa u vhulaya vhuvhili havho. Tshivhidzoni vhathu vho rabelela Petro khamusi vha rabelela na Yakobo. Naho zwo ralo, Yakobo o vhulawa, ngeno Petro o tshidzwa nga lwa vhuṱolo. (Mish. 12:1-11) Ri nga ḓivhudzisa uri: ‘Ndi ngani Yehova o tshidza Petro a litsha Yakobo?’ Bivhili a i ri vhudzi.c Fhedzi ri nga vha na vhungoho ha uri Yehova ha “khakhi.” (Dot. 32:4) Nahone ri a zwi ḓivha uri Yehova o vha a tshi funa Petro na Yakobo. (Nzumb. 21:14) Nga tshiṅwe tshifhinga Yehova a nga fhindula thabelo dzashu nga nḓila ye ra vha ri songo i lavhelela. Fhedzi ngauri ri na vhungoho ha uri tshifhinga tshoṱhe musi Yehova a tshi ri fhindula, u fhindula nga lufuno nahone ha khakhi, a ri gunguleli nḓila ine a nanga u fhindula ngayo thabelo dzashu.​—Yobo 33:13.

7. Ndi mini zwine ra iledza u zwi ita nahone ndi ngani?

⁷ Ri lingedza u sa vhambedza vhuimo hashu na ha vhaṅwe. Sa tsumbo, ri nga humbela Yehova nga ho livhaho uri a ri thuse nga tshiṅwe tshithu, fhedzi a si ri ṋee zwe ra humbela. Nga murahu ra pfa uri muṅwe muthu we a ita khumbelo i fanaho zwi vhonala u nga Yehova o mu ṋea zwe a humbela. Wahashu wa tshifumakadzini ane a pfi Anna o tshenzhela zwithu zwo raloho. O rabela uri mukalaha wawe Vho Matthew vhe vha vha vhe na khentsara vha fhole. Nga tshenetsho tshifhinga, ho vha hu na vhahashu vha vhaaluwa vhavhili vhe na vhone vha vha vhe na khentsara. Anna o rabelela Vho Matthew na vhenevho vhahashu vhavhili nga maanḓa. Vhenevho vhahashu vho fhola, fhedzi Vho Matthew vha lovha. Mathomoni Anna o ḓivhudzisa arali Yehova o dzhenelela uri vhenevho vhahashu vha fhole. Arali zwo ralo, ndi ngani a songo fhindula thabelo yawe ya uri mukalaha wawe vha vhe khwiṋe? Ngoho ndi ya uri a ri ḓivhi uri ndi mini tsho itaho uri vhenevho vhahashu vha fhole. Fhedzi zwine ra ḓivha ndi zwa uri Yehova u ḓo fhelisa vhuṱungu hoṱhe na uri u ṱoḓa u vusa khonani dzawe dzo lovhaho.​—Yobo 14:15.

8. (a) U ya nga Yesaya 43:2, Yehova u ri tikedza hani? (b) Thabelo i nga ri thusa hani musi ro sedzana na milingo i konḓaho? (Ṱalelani vidio U rabela Zwi Ri Thusa U Konḓelela.)

⁸ Yehova u ḓo dzula a tshi ri tikedza tshifhinga tshoṱhe. Sa Khotsi ashu wa lufuno, Yehova ha takaleli u ri vhona ri tshi khou pfa vhuṱungu. (Yes. 63:9) Naho zwo ralo, ha thivheli milingo yashu yoṱhe ine ya nga fanyiswa na mulambo kana khavhu dza mulilo. (Vhalani Yesaya 43:2.) Fhedzi u ri fhulufhedzisa uri u ḓo ri thusa u “fhira vhukati” hayo. U ḓo ita uri vhushaka hashu nae vhu dzule ho khwaṱha hu sa londwi milingo ine ra khou ṱangana nayo zwino. Yehova u dovha hafhu a ri ṋea muya mukhethwa wawe u re na maanḓa u ri thusa u konḓelela. (Luka 11:13; Vhafil. 4:13) Nga zwenezwo, ri nga vha na fhulufhelo ḽa uri Yehova u ḓo dzula a tshi ri ṋea zwine ra zwi ṱoḓa u itela uri ri kone u konḓelela na u dzula ri tshi fhulufhedzea khae.d

NDI MINI ZWINE YEHOVA A ZWI LAVHELELA KHA RIṊE?

9. U ya nga Yakobo 1:6, 7, ndi ngani ri tshi tea u fhulufhela uri Yehova u ḓo ri thusa?

⁹ Yehova u lavhelela uri ri mu fhulufhele. (Vhahev. 11:6) Nga tshiṅwe tshifhinga milingo yashu i nga vhonala i tshi nga sa thavha. Ri nga thoma na u timatima arali Yehova a tshi ḓo ri thusa. Fhedzi Bivhili i a ri khwaṱhisedza uri maanḓa a Yehova a nga ri thusa u “gonya luvhondo.” (Ps. 18:29) Nga zwenezwo, nṱhani ha u timatima, ri tea u rabela ri na lutendo na fhulufhelo ḽa uri Yehova u ḓo fhindula thabelo dzashu.​—Vhalani Yakobo 1:6, 7.

10. Fanyisani uri ri nga tshila hani u tendelana na thabelo dzashu.

¹⁰ Yehova u lavhelela uri ri ite zwoṱhe zwine ra nga kona u tendelana na thabelo dzashu. Sa tsumbo, wahashu a nga humbela Yehova uri a mu thuse uri a wane maḓuvha mushumoni uri a kone u ya buthanoni. Yehova a nga fhindula hani yeneyo thabelo? Yehova a nga ṋea wahashu tshivhindi tsha u amba na mutholi wawe. Onoyo wahashu u ḓo tea uri a ye a ite yeneyo khumbelo kha mutholi wawe. Zwi nga ṱoḓea uri a humele lwo vhalaho. A nga tea na u humbela u tshintshana maḓuvha na muṅwe mutholiwa ngae. Nahone arali zwi tshi ṱoḓea, a nga tea uri a dzhie maḓuvha ane a sa ḓo badeliwa.

11. Ndi ngani ri tshi tea u rabela lunzhi nga ha zwine zwa ri vhilaedzisa?

¹¹ Yehova u lavhelela uri ri dzule ri tshi mu rabela nga zwithu zwine zwa ri vhilaedzisa. (1 Vhathes. 5:17) Samusi ro zwi vhona kha maipfi a Yesu, zwiṅwe zwa zwithu zwine ra zwi humbela, ri nga si zwi wane nga tshenetsho tshifhinga. (Luka 11:9) Nga zwenezwo ri songo neta, kha ri dzule ri tshi rabela. (Luka 18:1-7) Musi ri tshi dzula ri tshi rabela nga ha tshenetsho tshithu, ri vha ri tshi khou sumbedza Yehova uri tshenetsho tshithu tshine ra khou rabela nga hatsho, ndi tsha ndeme kha riṋe. Nahone ri vha ri tshi khou sumbedza uri ri na lutendo lwa uri Yehova u ḓo ri thusa.

NDI NGANI RI TSHI NGA TEA U SHANDULA ZWINE RA ZWI HUMBELA?

12. (a) Ndi ifhio mbudziso ine ra tea u ḓivhudzisa nga ha khumbelo dzashu nahone ndi ngani? (b) Ri nga ita hani vhungoho ha uri thabelo dzashu dzi sumbedza uri ri a ṱhonifha Yehova? (Sedzani bogisi “Naa Zwine Nda Humbela Nga Thabelo Zwi A Sumbedza Uri Ndi Ṱhonifha Yehova?”)

¹² Arali ri sa khou wana zwithu zwine ra khou zwi rabelela, ri nga ḓivhudzisa mbudziso tharu dzi tevhelaho. Ya u thoma: ‘Naa zwine nda khou zwi rabelela zwo tea?’ Tshifhinga tshinzhi ri humbula u nga ri a ḓivha zwo ri teaho. Fhedzi zwithu zwine ra zwi humbela, zwi nga vha zwi zwithu zwine zwa si ḓo ri vhuyedza. Arali ri tshi khou rabela nga ha iṅwe thaidzo, hu nga vha hu na thandululo ya khwiṋe u fhira ine ra khou humbela yone. Nahone zwiṅwe zwithu zwine ra humbela zwi nga vha zwi sa tshimbidzani na zwine Mudzimu a funa. (1 Yoh. 5:14) Sa tsumbo, ṱhogomelani tsumbo ya vhabebi vhe ra amba nga havho mathomoni. Vho humbela uri Yehova a ite uri ṅwana wavho a dzule a tshi mu shumela. Yeneyo yo vha i tshi pfala i khumbelo yo teaho, fhedzi Yehova ha kombetshedzi muthu na muthihi uri a mu shumele. U ṱoḓa uri riṋe u katela na vhana vhashu, ri tou ḓikhethela u mu shumela. (Dot. 10:12, 13; 30:19, 20) Ngauralo, vhabebi vho vha vha tshi nga ḓi vha vho humbela Yehova uri a vha thuse uri vha swikelele mbilu ya ṅwana wavho uri a fune Yehova na u vha khonani yawe.​—Mir. 22:6; Vhaef. 6:4.

13. U ya nga Vhahevheru 4:16, ndi lini hune Yehova a ḓo ri thusa? Ṱalutshedzani.

¹³ Mbudziso ya vhuvhili i nga vha ya uri: ‘Naa ndi tshifhinga tsho teaho tsha uri Yehova a fhindule khumbelo yanga?’ Ri nga pfa u nga ri khou ṱoḓa uri thabelo dzashu dzi fhindulwe nga tshenetsho tshifhinga. Fhedzi naho zwo ralo, Yehova u a ḓivha tshifhinga tsha khwiṋe tsha u ri thusa. (Vhalani Vhahevheru 4:16.) Musi ri sa wani zwe ra humbela nga tshenetsho tshifhinga, ri nga humbula u nga phindulo ya Yehova ndi ‘Hai.’ Fhedzi ngoho ndi ya uri phindulo i nga vha i ‘Hu sini zwino.’ Sa tsumbo, kha ri dovhe ri humbule nga wahashu we a rabelela uri vhulwadze hawe vhu fhole. Arali Yehova o vha o fhodza wahashu vhulwadze nga lwa vhuṱolo, Saṱhane o vha a tshi nga kha ḓi vha o amba uri onoyo wahashu u khou bvela phanḓa a tshi shumela Yehova ngauri o mu fhodza. (Yobo 1:9-11; 2:4) Zwiṅwe hafhu, Yehova o dzula o vhea tshifhinga tshine a ḓo fhodza malwadze oṱhe. (Yes. 33:24; Nzumb. 21:3, 4) U swika tshenetsho tshifhinga tshi tshi swika, ri nga si lavhelele uri Yehova a ri fhodze nga lwa vhuṱolo. Nga zwenezwo, onoyo wahashu o vha a tshi nga kha ḓi vha o humbela Yehova uri a mu ṋee maanḓa na mulalo uri a kone u konḓelela vhulwadze na u bvela phanḓa a tshi mu shumela nga u fhulufhedzea.​—Ps. 29:11.

14. Ri guda mini kha tshenzhelo ya Janice?

¹⁴ Humbulani nga ha tshenzhelo ya Wahashu Janice we a rabela uri a ye u shuma Bethele. Ho fhela miṅwaha miṱanu a sa khou pfesesa nḓila ye Yehova a fhindula ngayo thabelo yawe. U ri: “Yehova o shumisa tshenetsho tshifhinga u mpfunza na u ita uri ndi vhe Mukriste wa khwine. Fhulufhelo ḽanga kha Yehova ḽo vha ḽi tshi kha ḓi tea u engedzea. Ndo vha ndi kha ḓi tea u khwinisa ngudo yanga ya muthu nga eṱhe. Ndo vha ndi tshi tea u guda u vha na dakalo huṅwe na huṅwe hune nda khou shumela Yehova ndi hone.” Nga murahu, Janice na mukalaha wawe vho rambiwa uri vha ye u shuma mushumo wa u dalela zwivhidzo. Musi Janice a tshi humbula murahu u ri: “Yehova o fhindula thabelo dzanga fhedzi nga nḓila ye nda vha ndi songo i lavhelela. Zwo ndzhiela tshifhinga u pfesesa uri phindulo ye Yehova a nṋea, yo vha i tshi tou vha tshifhiwa tshavhuḓi. Ndi a livhuwa uri ndo wana tshibuli tsha u tshenzhela lufuno na vhuthu ha Yehova.”

15. Ndi ngani nga tshiṅwe tshifhinga ri tshi nga tea u sa amba nga ho livhaho musi ri tshi rabela? (Sedzani zwifanyiso.)

¹⁵ Mbudziso ya vhuraru i nga vha ya uri: ‘Naa ndi a iledza uri thabelo dzanga dzi vhe dzo livhaho tshifhinga tshoṱhe?’ Naho zwi zwavhuḓi uri musi ri tshi rabela ri humbele tshithu nga ho livhaho, nga tshiṅwe tshifhinga ndi zwavhuḓi uri musi ri tshi rabela ri si humbele tshithu nga ho livhaho, uri ri kone u ḓivha uri ndi zwifhio zwine Yehova a ṱoḓa u ri itela zwone. Ṱhogomelani tsumbo ya wahashu wa tshifumakadzini a songo vhingwaho we a vha a tshi khou rabelela uri a kone u ya Tshikoloni tsha Vhahuweleli vha Muvhuso. O vha a tshi khou ṱoḓa u ya tshikoloni uri a kone u ya u shuma hu re na ṱhoḓea khulwane. Fhedzi zwenezwi a tshi khou bvela phanḓa a tshi humbela uri a rambiwe tshikoloni, o vha a tshi nga kha ḓi vha o humbela Yehova uri a mu thuse uri a kone u vhona zwiṅwe zwibuli zwine a nga kona u engedza ngazwo vhuḓinḓa hawe. (Mish. 16:9, 10) Musi o no rabela nga hazwo o vha a tshi nga humbela mulavhelesi arali hu na tshivhidzo tsha tsini tshine ha vha na ṱhoḓea ya vhavulanḓila. Kana o vha a tshi nga kha ḓi vha o ṅwalela ofisi ya davhi a vhudzisa hune ha vha na ṱhoḓea khulwane ya vhahuweleli.e

16. Ri nga vha na vhungoho ha mini?

¹⁶ Samusi ro zwi guda, ri nga vha na vhungoho ha uri Yehova u ḓo fhindula thabelo dzashu nga nḓila ya lufuno na uri ha khakhi. (Ps. 4:3; Yes. 30:18) Nga zwiṅwe zwifhinga, ri nga kha ḓi wana phindulo ye ra vha ri songo i lavhelela. Fhedzi Yehova a nga si vhuye a litsha u thetshelesa thabelo dzashu. U a ri funa nga maanḓa nahone a nga si vhuye a vuwa o ri laṱa. (Ps. 9:10) Ngauralo, “fhulufhelani ene misi yoṱhe,” ni mu shululele zwoṱhe zwi re mbiluni yaṋu nga thabelo.​—Ps. 62:8.