1 Determinassion

COSSA VOL DIR

Quando un sposo e una sposa i ze determinadi a restar insieme e i vede che el so matrimònio mai el ndarà finirse, lori i se sente tanto sicuri. Lori i se fida che el altro sempre el sarà determinà a restar insieme, anca nele dificoltà.

Arquanti maridadi i sente che i ga de restar insieme par forsa, par causa de quel che la fameia e i amighi i podaria dir. Ma l’è tanto meio quando che el sposo e la sposa i resta insieme parché i se ama e i se rispeta.

COSSA LA BÌBLIA LA DISE: “El sposo no’l ga de assar la so sposa.” — 1 Corinti 7:11.

“Se ti te sì determinà a restar insieme, ti no te ve ofenderte par poco gnente. Suito te ve desmentegarte e perdonar. Te vederè i problemi sol come un ostàcolo, e nò come una rason par finir fora col to matrimònio.” — Micah.

PARCHÉ L’È IMPORTANTE

Quando i maridadi no i ze determinadi a restar insieme e i ga problemi, lori belche i pensa suito che lori no i era fati par star insieme e i va in serca de scuse par finir col matrimònio.

“Tante persone le se marida cola idea de divòrsio in testa. Ma quando qualchedun el se marida belche drio pensar che podaria divorsiarse, lu no l’è determinà a restar insieme.” — Jean.

COSSA TE POL FAR

DOMÀNDATE

Quando ti e el to sposo o la to sposa sì drio barufar . . .

• Gheto belche pensà che te sì maridà cola persona sbaliada?

• Gheto belche pensà de esser maridà con nantra persona?

• Gheto belche dito robe cossita: “Par mi, basta!” o “Vao in serca de qualchedun che me dà valor”?

Se ti te ghè rispondesto si a una o pi de queste domande, alora te toca gaver de pi determinassion a restar maridà.

PARLÉ INTRÀ DE VALTRI

• Sarà che una volta èrino de pi determinadi a restar insieme? Se la risposta la ze si, ve in serca de saver el parché questo el ga sucedesto.

• Cossa ne toca far par esser determinadi ancora de pi a restar maridadi?

PROA FAR QUESTO

• Dele volte, scrivi messagi par dimostrar el to amor par el to sposo o la to sposa.

• Nela to tola de laoro, meti ritrati del to sposo o dela to sposa. Questa la ze una maniera de dimostrar che te sì determinà a restar insieme.

• Ciama par telèfono el to sposo o la to sposa tuti i giorni. Fà questo quando te sì drio laorar e quando valtri sì distanti un del altro.

COSSA LA BÌBLIA LA DISE: “Quei che Dio el ga unio, el omo no’l pol spartir.” — Mateo 19:6.