4 Perdon

COSSA VOL DIR

Perdonar vol dir desmentegarse de una roba che qualchedun el ga fato o dito e no restar ofendesto. Ma questo no vol mia dir che te ghè de far finta che no gàpia sucedesto gnente o che quela roba lì che la persona la ga fato no la ze stata tanto grave cossita.

COSSA LA BÌBLIA LA DISE: “Seité soportarve un al altro e a perdornarve de tuto un al altro, anca se qualchedun el ga rason par brontolar contra nantra persona.” — Colossensi 3:13.

“Quando te ami una persona, ti no te te consentri mia su i so difeti, ma te te sforsi par veder quel che la persona la ze drio sforsarse de deventar.” — Aaron.

PARCHÉ L’È IMPORTANTE

Restar ofendesto pol far mal ala to salute, tanto fìsica come emossional, e anca pol far mal al to matrimònio.

“Una volta, el me sposo el me ga domandà scusa parché el ga fato qualcossa che me gavea disgustà tanto. L’è stà tanto difìcile perdonarlo, ma lo go fato. Sol me dispiase de no gaverlo perdonà prima. Semo restadi tristi un colaltro par gnente.” — Julia.

COSSA TE POL FAR

DOMÀNDATE

La pròssima volta che el to sposo o la to sposa el fà qualcossa che te assa disgustà, domàndate:

• ‘Sarà che son permaloso o massa sensìbile?’

• ‘Quel che ga sucedesto l’è tanto grave cossita? Go bisogno pròpio che el me domande scusa, o posso sol desmentegar questa roba?’

PARLÉ INTRÀ DE VALTRI

• Sarà che ghe metemo tanto tempo par perdonarse un al altro?

• Cossa che podemo far par perdonar pi presto?

PROA FAR QUESTO

• Se te resti ofendesto, no stà suito pensar che el to sposo o la to sposa el ga fato questo aposta par disgustarte.

• Proa perdonar. Ricòrdate che “tuti noantri sbaliemo tante volte”. — Tiago 3:2.

“L’è fàcile perdonar quando i due i ga sbalià. Ma l’è tanto difìcile far questo quando par che sol uno el ga sbalià. In questa ocasion, ghe vol tanta umiltà par acetar le scuse e perdonar.” — Kimberly.

COSSA LA BÌBLIA LA DISE: “Te ghè de risolver presto i problemi.” — Mateo 5:25.