Otobre

El rè Davi el fea fadiga obedir a Dio anca se lo amesse tanto. Par quela, lu el ga pregà che Geovà lo giutesse a gaver ‘voia de esser obediente’. (Sal. 51:12) Pol esser che noantri se sentimo compagno a lu. Ma, parché che fursi femo fadiga esser obedienti? Prima, par causa dela nostra imperfession, no ghemo rento de noantri la voia de sempre esser obedienti. Seconda, Sàtana sempre el proa farne desobedir a Geovà. (2 Cor. 11:3) Tersa, vivemo nte un mondo pien de “persone desobediente”. (Efe. 2:2) Alora, ghemo de sforsarse tanto par ndar contra Sàtana, questo mondo e la nostra voia de far quel che l’è sbalià. Cossita, saremo boni de obedir a Geovà e a quei che lu el ga dato autorità. w23.10 p. 6 § 1

Cossa che imparemo de questo miràcolo de Gesù? Imparemo che ghemo de esser ùmili. Dopo de far el miràcolo, lu no’l se ga fato veder. Lu mai se sprosiea de quel che el fea. Invesse, Gesù sempre l’era ùmile e el ghe dea tuta la glòria a so Pare. (Gio. 5:19, 30; 8:28) Se femo compagno a Gesù, mai ndaremo pensar che semo meio che i altri gnanca ndaremo sprosiarse de qualcossa che ghemo fato. Volemo mostrar che quel che ghemo fato l’è stà gràssie al aiuto de Dio. (Ger. 9:23, 24) L’è Geovà el mèrita tuta la glòria parché no sarìssino boni de far gnente sensa el so aiuto. (1 Cor. 1:26-31) Se semo ùmili, no ndaremo farse veder quando giutemo a qualchedun. Invesse, noantri restemo contenti de saver che Geovà el vede quel che femo e el ghe dà tanto valor. (Varda anca Mateo 6:2-4; Ebr. 13:16) Se femo cossita, saremo drio mostrar umiltà compagno a Gesù e assaremo Geovà pròpio contento. — 1 Pie. 5:6. w23.04 p. 4 § 9; p. 5 §§ 11, 12

El apòstolo Paolo el ga dito che ghemo de preocuparse con quel che l’è meio par i altri. E come che ti te pol meter in pràtica questo consìlio de Paolo nele riunion? Proa ricordarte che, compagno a ti, anca i altri i vol comentar.Rèstito contento de ciacolar con un amigo che no’l te assa mia parlar? Sicuro che nò. Invesse, l’è tanto meio quando valtri due parlé. L’è compagno nele nostre riunion. Quando ghe demo ai nostri fradei la oportunità de far un comentàrio e de parlar dela so fede, lori i resta incoraiadi. Cossita, tanti fradei i ze boni de comentar e tuti i resta contenti. (1 Cor. 10:24) Fà un comentàrio pìcolo. Cossita, ghen sarà tempo par anca altri comentar. Anca se el to comentàrio l’è pìcolo, no stà parlar massa robe del paràgrafo. Se te parli tuto quel che el paràgrafo el spiega, no ghen sarà pi gnente par i altri comentar. w23.04 p. 22, 23 §§ 11-13

Ghemo de ricordarse che l’è tanto importante giutar i altri, ancora de pi par meso dela predicassion. Quando predichemo, noantri catemo persone che le vien de diversi posti e che le crede e le pensa in robe pròpio difarente una del’altra. Par quela, ghemo de esser sempre pronti par cambiar quel che ndemo dir. El apòstolo Paolo el fea pròpio cossita, e podemo imparar tanto col so esémpio. Gesù el ga scoliesto Paolo par esser un ‘apòstolo par le nassion’. (Rom. 11:13) Alora, Paolo el predichea ai giudei, ai grechi, ale persone che le gavea stùdio, a quei che no i era mia studiadi, ale autorità del governo e anca ai rè. Come Paolo el volea tocar el cuor de quei che i lo scoltea, lu l’è deventà “tute le cose par persone de tuti i tipi”. (1 Cor. 9:19-22) Paolo el restea atento par saver cossa che le persone le credea, de ndove le vegnea e come le era state slevade. Cossita, lu l’è stà bon de cambiar quel che parlea e de giutar le persone a cognosser a Dio. Anca noantri podemo predicar ancora meio se stemo atenti a quel che le persone le pensa e cambiemo quel che parlemo. w23.07 p. 23 §§ 11, 12

Noantri podemo dir che una persona branda o calma la ga tanta forsa. Come cossita? Questa persona la ga de far tanto sforso par seitar calma quando la ga una dificoltà. La parola greca par “brandura” la ze doperada par parlar de un caval cativo che l’è stà mansà. Ancora che el sìpia manso, lu el seita tanto forte. Anca noantri ghemo de esser cossita. Magari, ghemo de far de pi che sol sforsarse. Come la brandura la fà parte del “fruto del spìrito”, ne ocore pregar a Geovà e domandarghe aiuto par gaver questa qualità. (Gàl. 5:22, 23) El esémpio de tanti fradei mostra che noantri podemo esser mansi. Lori i ze stati boni de seitar calmi anca quando i altri i ghe ga dito su. Par causa del so bel esémpio, tante persone le ga cambià quel che le pensea sora Geovà. — 2 Tim. 2:24, 25. w23.09 p. 15 § 3

Nte una vision, el apòstolo Gioani el ga visto che 24 ansiani i era drio lodar e adorar a Geovà. Questi ansiani i disea che Dio el mèrita “ricever la glòria, el onor e el poder”. (Apo. 4:10, 11) Anca i àngeli i loda a Geovà parché i cognosse tanto ben le so bele qualità e tuto quel che lu el fà. Par quela, i àngeli i vol pròpio lodar a Geovà. (Giò 38:4-7) Anca noantri volemo lodar a Geovà quando preghemo a lu. Quando te studi la Bìblia, proa veder le bele qualità de Geovà e quale che te piase de pi. (Giò 37:23; Rom. 11:33) Alora, te pol parlarghe sora queste bele qualità e come lu sempre el tende tanto ben de ti e de tuti i fradei. — 1 Sam. 2:1, 2. w23.05 p. 3, 4 §§ 6, 7

Del ano 1919 avanti, Babilònia, la Granda, no la ze pi stata bona de intrigar el pòpolo de Dio de adorarlo. In quel ano, el “schiavo fedele e prudente” el ga tacà a laorar par giutar tante persone a scominsiar a caminar nela “Strada dela Santità”, o sia, adorar a Dio dela maniera giusta. (Mat. 24:45-47; Isa. 35:8) Par causa del sforso che tanti studiosi i gavea belche fato par studiar la Bìblia, queste persone le ze state bone de capir cada volta meio quel che Geovà el vol far nel futuro. (Pro. 4:18) Cossita, lore le ze state bone de cambiar quel che ghe ocorea nela so vita par contentar a Geovà. Ma, lu el ga assà che le cambiesse pin pianeto. Saremo pròpio contenti nel futuro parché podaremo contentar a Geovà in tuto quel che femo. Dopo del ano 1919, tante persone le ga scominsià a caminar nela “Strada dela Santità” dopo de ndar via de Babilònia. w23.05 p. 17 §§ 15, 16

El Corpo Governante l’è drio pareciar i assistenti dele comission. Questi bravi fradei belche i ga tanto laoro de far e i ze pareciadi par tender dei servi de Dio nel futuro. I untadi che ghen’è nela Tera i ndarà al cielo vanti de finir la granda tribolassion. Ma no saremo mia abandonadi parché Gesù l’è drio tender de noantri. Alora, podemo esser sicuri che seitaremo a adorar a Geovà dela maniera giusta. In quela època, un grupo de nassion che ga nome Goghe de Magoghe vegnarà contra i servi de Geovà. (Eze. 38:18-20) Ma lori no i sarà mia boni finir con noantri, parché Geovà el ndarà sarlvarne. El apòstolo Gioani el ga visto nte una vision che “una mùcia de gente”, o sia, i servi de Dio qua nela Tera, i ‘vegnaria fora la granda tribolassion’. (Apo. 7:9, 14) Alora, podemo esser sicuri che Geovà el ndarà salvarne. w24.02 p. 5, 6 §§ 13, 14

Cossa che ghemo de far par gaver el spìrito santo de Dio? Ghemo de pregar, studiar la Bìblia e far parte dela so organisassion. Se femo cossita, saremo boni de gaver el “fruto del spìrito”. (Gàl. 5:22, 23) Alora, no ghemo mia de seitar a pensar in robe sbaliade, parché Geovà el dà so spìrito santo sol a quei che i pensa e i fà quel che l’è giusto. (1 Tes. 4:7, 8) Par seitar a gaver spìrito santo de Dio, el testo de 1 Tessalonissensi 5:20 dise che no podemo ‘far de poco dele professie’. Le ‘professie’, in questo testo, le ze quel che Geovà el dise par meso del so spìrito, come le professie che le mostra che semo drio viver nel fin. Alora, no podemo mia pensar che ghen volarà tanto tempo fin che vegna el Armagedon. Invesse, ghemo de ricordarse che el giorno de Geovà l’è pròpio darente, seitar a far quel che l’è giusto e mostrar che semo fedeli a Dio. — 2 Pie. 3:11, 12. w23.06 p. 12 §§13, 14

Cossa che noantri ghemo de far se semo drio doperar el telèfono o el computador e vien fora qualcossa pornogràfica? Ne toca svelti vardar par nantra banda e cavar via quela roba. Saremo boni de far cossita se seitemo a ricordarse che la nostra amicìssia con Geovà la ze la roba pi importante che ghemo. E anca ne ocore star atenti a robe che no le ze mia pornografia, ma che ne fà pensar in sesso e gaver voia de far qualcossa che la ze sbaliada. Ma parché che no ghemo de vardar queste robe? Parché volemo star distante de qualcossa che pol farne disgustar a Geovà. (Mat. 5:28, 29) Varda quel che David, un ansiano dela Tailàndia, el ga dito: “Mi penso: ‘Anca se queste robe no le ze pornografia, sarà che Geovà el restarà contento se mi seito a vardarle?’ Pensar cossita me giuta a far bone dessision.” Podemo far bone dessision se ghemo paura de far qualcossa che ndarà disgustar a Geovà. Par quela che la Bìblia la dise che se ghemo un ‘grando rispeto par Geovà’, gavaremo ‘sabedoria’. w23.06 p. 23 §§ 12, 13

Pol esser che questi “quarti” i ze le congregassion. Alora, gavaremo de seitar insieme ai nostri fradei par gaver la protession de Geovà. Par quela, ghemo de sforsarse adesso no sol par star insieme ai nostri fradei, ma par amarli. Cossita, saremo boni de seitar vivi! “El grando giorno de Geovà” el sarà una època pròpio fadiga par tute le persone. (Sof. 1:14, 15) Anca noantri ndaremo sofrir. Ma, se se pareciemo adesso, saremo boni de seitar calmi e giutar i altri. Alora, ndaremo perseverar, no importa le dificoltà che le vegnarà fora. Faremo el nostro meio par mostrar compassion e giutar i nostri fradei quando i sofre. E se imparemo a amar i nostri fradei adesso, saremo boni de star insieme a lori nela granda tribolassion. Alora, Geovà el ne darà la vita eterna nte un novo mondo ndove no ghen sarà pi desgràssie gnanca tribolassion. — Isa. 65:17. w23.07 p. 7 §§ 16, 17

La Bìblia la parla de arquanti servi fedeli del passà che i ga bio tanta forsa. Magari, anca lori i se sentia strachi. Par esémpio, el rè Davi el ga dito che, dele volte, el se sentia ‘forte compagno un monte’. Ancora cossita, ghen’era volte che ‘l’era spaurà’. (Sal. 30:7) Sanson el gavea tanta forsa par causa del spìrito de Geovà. Ma lu el savea che el ‘saria fiaco compagno ai altri òmini’ se no’l gavesse el aiuto de Dio. (Giui. 14:5, 6; 16:17) Savemo che questi òmini fedeli i gavea tanto poder sol parché l’è stà Geovà che ghe ga dato forsa. El apòstolo Paolo el savea che el gavea bisogno del aiuto de Geovà. (2 Cor. 12:9, 10) Lu el gavea problemi de salute e anca el tribolea par far quel che l’era giusto. (Rom. 7:18, 19; Gàl. 4:13, 14) Dele volte, Paolo el gavea paura de quel che podaria suceder. (2 Cor. 1:8, 9) Magari, lu l’era poderoso anca quando el se sentia fiaco. Parché? Parché Geovà el ghe dea la forsa che Paolo ghe ocorea. w23.10 p. 12 §§ 1, 2

Cossa che podemo far se scominsiemo a pensar che no ghemo mia valor par Geovà? Ghemo de ricordarse che l’è stà lu che el ga volesto esser nostro amigo. (Gio. 6:44) Lu el cognosse quel che ghemo rento el cuor e el vede quel che ghemo de bon, anca se noantri no semo mia boni de veder. (2 Cró. 6:30) Alora, podemo fidarse in Geovà quando el dise che semo pressiosi par lu. (1 Gio. 3:19, 20) Pol esser che se sentimo ancora in colpa par causa dele robe sbaliade che ghemo fato prima de imparar la verità. (1 Pie. 4:3) Anca servi fedeli de Geovà i ga de sforsarse par no ndarghe drio la voia de far qualcossa de sbalià. E ti? Dele volte, pénsito che Geovà no’l te ga mia perdonà? Alora, ricòrdate che anca servi fedeli del passà i se ga sentio cossita. Par esémpio, el apòstolo Paolo el se sentia un poro gramo quando el pensea sora i sbali che el gavea fato. (Rom. 7:24) Paolo el se gavea ciamà gramo dei so pecati e el se gavea batesà. Ancora cossita, lu el disea che l’era el ‘manco importante dei apòstoli’ e el ‘pedo pecador’. — 1 Cor. 15:9; 1 Tim. 1:15. w24.03 p. 27 §§ 5, 6

Una roba che podemo imparar dela bruta dessision del rè Geoàs l’è che ghemo de scòlier boni amighi. L’è importante gaver amighi che i ama a Geovà, che i vol contentarlo e che i ndarà giutarne a seitar leai. Ricòrdate che Geoiada l’era pi vècio che Geoàs e l’è stà un bon amigo par lu. Alora, anca ti te pol scòlier amighi che i ze pi gióveni o pi veci che ti. Quando te vè scòlier i to amighi, proa domandarte: ‘Sarà che lori i me giuta a far pi forte la me fede in Geovà? Sarà che i se sforsa de obedirlo e i me giuta a far compagno? Lori i parla sora Geovà e sora quel che i ga imparà dela Bìblia? Sarà che i me amighi i me dà consili quando go de bisogno o sol i me dise quel che me piaseria scoltar?’ (Pro. 27:5, 6, 17) Ricòrdate che, se i to amighi no i ama a Geovà, ti no te ghè mia bisogno de lori. Ma se te ghè amighi che i ama a Geovà, lori i te farà tanto ben. Alora, stà darente de lori! — Pro. 13:20. w23.09 p. 9, 10 §§ 6, 7

Nel alfabeto greco, la létera alfa la ze la prima, e la létera ómega la ze la ùltima. Cossita, capimo che, quando Geovà el dise che l’è el ‘Alfa e el Ómega’, lu l’è drio mostrar che sempre el finisse del bon tuto quel che el scomìnsia. Dopo che Geovà el ga creà Adon e Eva, lu el ga dito: “Gàpie tanti fioi. Gavé de impienir la tera e gavé de esser paroni dela tera.” (Gén. 1:28) Alora, quando Geovà el ga dito che el volea che la Tera la deventesse un Paradiso ndove ghen saria sol persone fedele e perfete, l’era come se el fusse drio dir che l’è el “Alfa”. E quando lu ndarà dir che l’è el “Ómega”? Dopo che sucederà tuto quel che lu el vol par le persone e la Tera nel futuro, Geovà el ga dito che el sètimo giorno l’è santo. Cossa che imparemo? Questo mostra che quel che el vol par le persone e par la Tera ndarà suceder nel fin del sètimo giorno. — Gén. 2:1-3. w23.11 p. 5 §§ 13, 14

Quel viaio de Babilònia fin Israel el saria pròpio fadiga de far, e fursi i israeliti i ghe meteria fin quatro mesi par rivar. Ma, Geovà el ga prometesto che el ndaria cavar via tute le dificoltà che ghen saria par strada. Anca se i israeliti fedeli i gavesse de far tanti sacrifissi par tornar a Israel, lori i savea che saria tanto bon tornar parché i podaria adorar a Geovà dela maniera giusta. Là in Babilònia no ghen’era mia un témpio par i israeliti adorar a Geovà gnanca altar o sasserdoti par far sacrifissi. Alora, tanti israeliti fedeli i era pròpio premosi de tornar a Israel par adorar a Geovà dela maniera giusta. w23.05 p. 14, 15 §§ 3, 4

Noantri ghemo bisogno del spìrito santo de Geovà par seitar esser “fioi dela luce”. Parché? Parché no l’è mia fàcile seitar a far quel che l’è giusto in meso a questo bruto mondo de ancoi. (1 Tes. 4:3-5, 7, 8) Tanti ancoi i pensa de una maniera difarente de quel che Geovà el pensa. Ma el spìrito santo pol giutarne a dàrghene fora cola maniera sbaliada de pensar de questo mondo. Geovà el pol darne forsa par seitar a far tuto quel che vien dela luce e che l’è bon, giusto e vero. (Efe. 5:9) Gesù el ga dito che Geovà “el darà spìrito santo a quei che i ghe lo domanda”. (Luc. 11:13) Alora, ghemo de pregar a Geovà par domandar el so aiuto. Nantra maniera de ricever el spìrito santo de Geovà l’è quando lo lodemo nele nostre riunion insieme ai nostri fradei. (Efe. 5:19, 20) Sicuro che Geovà el ndarà doperar la so forsa par giutarne a far quel che l’è giusto. w24.03 p. 23, 24 §§ 13-15

Cossa che te pol far se te ocore de pi passiensa? Prega a Geovà. La passiensa la fà parte del fruto del spìrito. (Gàl. 5:22, 23) Par quela, ghemo de domandar che Geovà el ne dae so spìrito santo. Alora, se semo drio infrontar un problema e ne fà fadiga restar calmi, ‘seitaremo a domandar’ spìrito santo par esser boni de portar passiensa. (Luc. 11:13) Podemo anca domandar che Geovà el ne giute a veder le robe come lu el vede e sforsarse par portar passiensa tuti i giorni. Se seitemo a domandar che Geovà el ne giute a gaver passiensa, gavaremo questa qualità pi forte nel nostro cuor. Nantra roba che pol giutarte l’è pensaghe sora i esempi dela Bìblia. La Bìblia la parla de arquanti servi de Geovà che i ga bio passiensa. Quando pensemo sora quel che lori i ga fato, imparemo come che podemo gaver passiensa anca noantri. w23.08 p. 22, 23 §§ 10, 11

Dopo che Gesù l’è stà ressussità, lu el ga fato che el apòstolo Piero e i so altri apòstoli i ciapesse tanti pessi par meso de un miràcolo. (Gio. 21:4-6) Sicuro che Piero el ga capio che Geovà ghe daria tuto quel che el gavesse de bisogno. Pol esser che lu el se ga ricordà de quando Gesù el ghe ga dito de ‘meter el Regno nel primo posto’. (Mat. 6:33) Cossita, Piero no’l ga seità a pensar sol nel so laoro de pesca. Invesse, la predicassion la ze deventada la roba pi importante dela so vita. Nel Pentecoste de 33, Piero el ga parlà con coraio e el ga giutà tante persone a acetar le bone notìssie. (Ati 2:14, 37-41) Dopo, lu el ga giutà i samaritani e altri che no i era giudei a deventar dissìpoli de Gesù. (Ati 8:14-17; 10:44-48) Sicuro che Geovà el ga doperà Piero de tante maniere par giutar tuti i tipi de persone a adorarlo dela maniera giusta. w23.09 p. 20 § 1; p. 23 § 11

Intorno de due ani dopo che i babiloni i ga finio fora con Gerusalen, el rè Nabucodonosor el se ga insognà con una granda stàtua. Alora, lu el ga dito che, se i so òmini sabi no i fusse boni de spiegar cossa che lu el gavea visto e cossa volea dir, lu el ndaria coparli tuti. Anca Daniel el podaria esser copà. (Dan. 2:3-5) Alora, cossa galo fato? Daniel el ga dito al rè che, se el ghe desse pi tempo, lu el saria bon de spiegar quel che el rè el volea saver. (Dan. 2:16) Lu el ga mostrà coraio e fede, parché la Bìblia no la dise mia che Daniel el gavea belche spiegà quel che una persona la se gavea insognà. Lu el ga domandà che i so amighi i preghesse a Geovà par domandarghe che lo giutesse. (Dan. 2:18) E Geovà el ga giutà Daniel a spiegar cossa che el rè el se gavea insognà. Cossita, lori no i ze stati copadi. w23.08 p. 3 § 4

Pensa sora parché che l’è bon mostrar passiensa. Quei che i ga passiensa, i ze pi contenti e calmi. La passiensa anca la ne giuta a gaver una bona salute e manco pensieri in testa. Se ghemo passiensa coi altri, gavaremo anca bone amicìssie, e la nostra congregassion la restarà pi unida. E se qualchedun el proa sgionfarne, no restaremo suito cativi e no assaremo che el problema el vegna ancora pedo. (Sal. 37:8; Pro. 14:29) Ma ancora pi importante l’è che saremo drio far compagno a Geovà e la nostra amicìssia la restarà ancora pi forte. Sicuro che la passiensa la ze una bela qualità che la giuta a tuti. Magari, savemo che no l’è sempre fàcile mostrar passiensa. Ancora cossita, col aiuto de Geovà, saremo boni gaver questa qualità. Intanto che spetemo el novo mondo con passiensa, podemo esser sicuri che Geovà l’è drio vardar ‘quei che i lo rispeta e i porta passiensa nel so amor leal’. (Sal. 33:18) Par quela, ghemo de esser dessididi come mai a seitar a mostrar passiensa. w23.08 p. 22 § 7; p. 25 §§ 16, 17

Tiago el ga parlà de un omo che el mostra bontà a qualchedun che l’è sior, ma no’l ghe bada mia un poareto. Cossita, lu l’era drio spiegar che questo omo el disea che el gavea fede, ma no la mostrea mia. (Tia. 2:1-5, 9) Tiago anca el ga parlà de una persona che la vede che ghe manca robe de vestir e de magnar a so fradel, ma no la fà gnente par giutarlo. Alora, anca se questa persona la dise che la ga fede, quel che la fà mostra che no la ga. (Tia. 2:14-16) Tiago anca el ga parlà sora Raabe. Par meso de quel che la ga fato, ela la ga mostrà che la gavea fede. (Tia. 2:25, 26) Raabe la gavea sentio dir sora Geovà e la savea che lu l’era drio tender dei israeliti. (Gios. 2:9-11) Alora, ela la ga fato quel che l’era giusto quando la ga sconto due spioni israeliti che i podaria esser copadi. Cossita, anca se quela dona no la fusse israelita e la fesse robe sbaliade, ela la ze stata giusta par Geovà compagno a Abraon. El esémpio de Raabe el ne mostra che, se ghemo fede, femo quel che l’è giusto. w23.12 p. 5 §§ 12, 13

Intanto che studiemo la Bìblia, no volemo mia sol imparar dele verità pi fàcile de capir. Invesse, volemo domandar el aiuto del spìrito santo par imparar anca dele verità che ne toca studiar de pi, parché le ne giutarà a esser pi amighi de Geovà. (1 Cor. 2:9, 10) Alora, cossa pénsito de studiar qualcossa che te giutarà a far pi forte la to amicìssia con lu? Par esémpio, varda come che Geovà el ga mostrà el so amor ai so servi del passà e come el mostra che el te ama. Proa anca studiar come che el pòpolo de Dio lo adorea nel passà e come lu el vol che lo adoremo ancoi. Anca sfòrsate par imparar dele professie sora Gesù che le ga sucedesto intanto che lu l’era qua nela Tera. Proa doperar el Índice das Publicações da Torre de Vigia o el Guia de Pesquisa para Testemunhas de Jeová. Cossita, te ndarè far pi forte la to fede e te ndarè cognosser ancora meio a Geovà. — Pro. 2:4, 5. w23.10 p. 18, 19 §§ 3-5

La parola che el apòstolo Piero el ga doperà par “grando” la vol dir “stirar”. Dopo, lu el ga parlà che se ghemo un amor grando cossita, saremo boni de perdonar tuti sbali dei altri. Par giutarne a capir, pensemo nte un esémpio. Metemo dir che te ghè una tola piena de maciete. Alora, se te ciapi una tovaia e te la stiri sora la tola, te sarè bon de querzer tute le maciete che ghen’è. Dela medèsima maniera, se noantri ghemo un grando amor par i fradei, saremo boni de stirarlo par querzer i so sbali, o sia, perdonar tuti so pecati. Alora, el nostro amor par i fradei el ga de esser pròpio forte. Cossita, saremo boni perdonarli anca quando no l’è mia fàcile. (Col. 3:13.) Quando semo boni perdonarli, mostremo che ghemo un forte amor par lori e assaremo Geovà contento. w23.11 p. 11, 12 §§ 13-15

Quando el rè Giosia el gavea 26 ani, el ga mandà rangiar su el témpio. Alora, l’è stà “catà el libro dela Lege che Geovà el gavea dato par meso de Moisè”. Quando Giosia el ga scoltà quel che el libro el disea, lu el ga scominsià a cambiar quel che ghe ocorea. Cossita, l’è stà bon de seitar fedele a Geovà. (2 Cró. 34:14, 19-21) Se te sì gióveno, cossa che te pol imparar del esémpio de Giosia? Fursi te sì belche drio proar leder la Bìblia tuti i di. Te piase lederla? Proa anca scriver do i testi che te pensi che ndarà giutarte. Cossita, te sarè bon de ricordarte dei testi che te ghè ledesto e de quel che te ghè imparà. Quando Giosia el gavea intorno de 39 ani, el se ga fidà de pi in lu stesso che in Geovà. Par causa de questo sbàlio, lu l’è stà copà. (2 Cró. 35:20-25) Cossa che noantri podemo imparar? No importa se semo pi veci o se fà tanto tempo che studiemo la Bìblia, ghemo de seitar a ndar in serca de Geovà. Questo vol dir che ghemo de pregar sempre, studiar la Bìblia e acetar i consili de bravi fradei. Cossita, saremo boni de far quel che l’è giusto e saremo pi felici. — Tia. 1:25. w23.09 p. 12, 13 §§ 15, 16

La Bìblia la parla de brave done che le ga amà a Geovà e lo ga servio. Queste done le era ‘echilibrade in tuto quel che le fea e fedele in tute le robe’. (1 Tim. 3:11) Ma anca ancoi ghen’è brave sorele nele congregassion che le pol insegnar tanto a quele pi gióvene. Se te sì una gióvena, proa pensar nte una sorela dela to congregassion che la ze un bel esémpio. Proa veder le bele qualità che la ga e quel che te toca far par gaverle anca ti. Bravi servi de Geovà i ze ùmili. Se una dona la ze ùmile, ela la gavarà una bela amicìssia con Geovà e coi altri. Una dona che la ze ùmile e che la ama a Geovà la ndarà rispetar la autorità de quei che lu el ga scoliesto par tender dela congregassion e dela fameia. — 1 Cor. 11:3. w23.12 p. 18, 19 §§ 3-5

Geovà el vol che el omo che l’è maridà el sìpia amigo de so dona, ghe mostre amor e la giute a gaver una forte fede. Alora, mostrar rispeto ala to dona e esser una persona de fidarse te giutarà a pensar ben vanti de far qualcossa. Se te te maridi, pol esser che te gavarè un fiol. Alora cossa che te ghè de far par esser un bon pare? (Efe. 6:4) Arquante volte, Geovà el ga lodà Gesù e el ga dito che lo amea. (Mat. 3:17) Compagno a Geovà, un bon pare sempre el se sforsa de lodar so fiol par quel che el fà e de dirghe che lo ama. I genitori che i va drio al esémpio de Geovà i ze boni de giutar so fioi a esser brave persone. E cossa che te pol far ancora adesso? Te pol dirghe e mostrar che te ghe vol ben a quei dela to fameia e ai fradei dela congregassion. — Gio. 15:9. w23.12 p. 28, 29 §§ 17, 18

Anca se servimo a Geovà, noantri infrontemo dificoltà e malatie compagno a tute le altre persone. Ma pol esser che anca infrontemo perseghission de quei che i ga òdio dei servi de Dio. L’è vera che Geovà el assa che queste robe le suceda, ma lu el promete giutarne. (Isa. 41:10) Se ghemo el aiuto de Geovà, faremo bone dessision e seitaremo a esser contenti anca cole dificoltà. Geovà el promete darne la so pace. (Fil. 4:6, 7) Questa pace la ze una calma che la vien de gaver una forte amicìssia con Geovà, e la ze tanto bela che no semo gnanca boni spiegarla. Fursi te ga belche sucedesto de pregar a Geovà, e pena dopo, sentir una calma che no te eri gnanca bon de capir. Questa la ze la pace de Dio! w24.01 p. 20 § 2; p. 21 § 4

Davi el volea de tuto el so cuor lodar a Geovà. E lu el savea che, par lodar a Geovà, ghemo de lodar anca el so nome. Parché? Quando scoltemo el nome de Geovà, noantri se ricordemo dele so bele qualità e de tuto quel che el ga fato. Par quela che Davi el lodea el nome de Geovà con tuto el so cuor. Nantro bel esémpio l’è stà i leviti. Lori i giutea el pòpolo a lodar el santo nome de Geovà. Ma lori i era ùmili e i savea che mai i saria boni de lodar el so nome dela maniera che lu el mèrita. (Nee. 9:5) Sicuro che Geovà el restea tanto contento de veder che lori i i era ùmili e che i lo lodea de cuor. w24.02 p. 9 § 6

Geovà mai el restarà disgustà se no te sì bon de far quel che te volei. (2 Cor. 8:12) Impara de quel che te ga sucedesto. Pensaghe sora quel che te sì belche stà bon de far. La Bìblia la dise che ‘Dio no l’è mia ingiusto par desmentegarse del to laoro’. (Ebr. 6:10) Se Geovà el se ricorda de tuto quel che te ghè fato de bon, anca ti te ghè de ricordarte. Par esémpio, se te sì stà bon de far pi forte la to amicìssia con Geovà, de parlar ai altri sora quel che te ghè imparà e de esser batesà, pensaghe sora queste robe. Cossita come te ghè belche fato tanto, te pol esser sicuro che te sarè bon de far ancora de pi. Sìpia sicuro che te sarè bon de adorar a Geovà cada volta meio parché lu el ndarà giutarte! Sìpia contento de veder le benedission de Geovà intanto che te sì drio sforsarte. (2 Cor. 4:7) Cossita, invesse de desistir, te gavarè cada volta pi benedission. — Gàl. 6:9. w23.05 p. 31 §§ 16-18

Geovà el ga caro de mostrar ai so servi che lu li ama e che el ghe vol ben. La Bìblia la parla de due volte che el ghe ga dito a Gesù che lo amea e che el ghe dea valor. (Mat. 3:17; 17:5) Vuto che Geovà el diga anca a ti queste robe? Ricòrdate che lu no’l ndarà dìrtele del cielo. Invesse lu el dise che te ghè tanto valor par lu par meso dela Bìblia. Par esémpio, noantri podemo “scoltar” Geovà parlar quando ledemo le parole de Gesù nei Vangeli. Gesù el ga fato pròpio tuto compagno a so Pare. Alora, quando ledemo quel che Gesù el ga parlà ai so dissìpoli, podemo imaginar che Geovà el diria queste parole a noantri. (Gio. 15:9, 15) E se vien fora dificoltà, no vol mia dir che Geovà el se ga fermà de darne valor. Invesse, quando semo drio infrontar problemi, semo boni de veder quanto Geovà el ne ama e che el ne giuta a dàrghene fora con tute le dificoltà. — Tia. 1:12. w24.03 p. 27, 28 §§ 10, 11