Novembre

Se te ghè fioi che i ze picinini, giuteli a pareciar un comentàrio de acordo con quel che i capisse. Par esémpio, anca se el stùdio el parla sora problemi nel matrimònio, sora imoralità e robe che no ghemo mia de far, te pol giutar i to fioi a catar fora un o due paràgrafi che lori i sarà boni spiegar. Proa anca giutarli a capir che el fradel che fà la parte no’l ndarà ciamarli sempre che i leva su la man. Cossita, i to fioi no i restarà disgustadi quando altri i comenta invesse de lori. (1 Tim. 6:18) Tuti noantri podemo pareciar bei comentari che i loda a Geovà e i incoraia nostri fradei. (Pro. 25:11) Dele volte, podemo comentar sora quel che ga belche sucedesto nela nostra vita. Magari, ghemo de star atenti de no parlar massa de noantri stessi. (Pro. 27:2; 2 Cor. 10:18) Invesse, ghemo de ricordarse che l’è pi importante parlar sora Geovà, la Bìblia e i so servi, e nò de noantri. — Apo. 4:11. w23.04 p. 24, 25 §§ 17, 18

El amor el ndarà giutarne a seitar desmissiadi e atenti. (Mat. 22:37-39) Par causa del nostro amor a Dio e ale persone, noantri seitemo predicar ancora che sìpia fadiga. (2 Tim. 1:7, 8) Alora, femo el nostro meio nela predicassion anca par meso del telèfono e dele carte. Noantri seitemo a predicar parché ghemo speransa che le persone le cambiarà e le farà quel che l’è giusto. (Eze. 18:27, 28)Noantri anca amemo i nostri fradei, e podemo mostrar questo amor quando li incoraiemo. (1 Tes. 5:11) Ghemo de giutarse intrà de noantri compagno i soldadi che i ze drio lotar insieme contra el nemigo. Noantri mai ndaremo farghe mal ai nostri fradei o assarli disgustadi aposta. (1 Tes. 5:13, 15) Podemo mostrar che amemo i fradei che i tende dela congregassion se ghe mostremo rispeto. — 1 Tes. 5:12. w23.06 p. 10 § 6; p. 11 §§10, 11

Podemo far pi forte la nostra fede quando pensemo sora el sacrifìssio che Gesù el ga fato. Par causa de questo, podemo esser sicuri che le promesse de Dio le ndarà suceder. Se se tolemo tempo par pensarghe sora parché Gesù l’è morto e come so Pare el ga sofrio, saremo ancora pi sicuri che ndaremo viver par sempre nel novo mondo. Varda cossa che Geovà el ga fato. Lu el ga mandà so caro Fiol qua ala Tera, e Gesù l’è nassesto come un omo perfeto. Gesù el ga infrontà diverse dificoltà intanto che l’era qua. Dopo, lu el ga sofrio tanto e l’è morto. Pensa come l’è stà fadiga par Geovà veder tuto quel che ga sucedesto cola persona che lu el ama de pi. Geovà no’l gavaria mai assà che so Fiol el sofrisse e morisse par darne una vita sol un poco meio e che la duresse poco tempo. (Gioani 3:16; 1 Pie. 1:18, 19) Come Geovà el ga dato so caro Fiol come sacrifìssio, lu el farà de tuto par darne la vita eterna nel novo mondo. w23.04 p. 27 §§ 8, 9

Sarà che Geovà el vol ressussitar quei che i ze morti? Sicuro che si! Lu el ga fato che arquante persone le scrivesse questa promessa nela Bìblia. (Isa. 26:19; Apo. 20:11- 13) Savemo che, se Geovà el promete qualcossa, lu la fà. (Gios. 23:14) Geovà l’è premoso de far i morti viver nantra volta. Pensa sora quel che Giò el ga dito. Lu l’era sicuro che, se el morisse, Geovà el volaria vederlo nantra volta. (Giò 14:14, 15) Geovà el sente la medèsima roba par tuti i so servi che i ze morti. Lu l’è premoso de vederli vivi nantra volta con salute e contenti. Ma Geovà el vol ressussitar anca i bilioni che i ze morti sensa cognosserlo. (Ati 24:15) Cossita, lori i podarà cognosser a Geovà, deventar so amighi e viver par sempre nela Tera. — Gio. 3:16. w23.04 p. 9 §§ 5, 6

Cossa che te pol far par gaver una speransa pi forte? Se la to speransa la ze viver par sempre qua nela Tera, ledi e stùdia i testi che i parla sora el Paradiso e pensaghe sora come sarà la to vita. (Isa. 25:8; 32:16-18) Se se tolemo el tempo par pensarghe sora come sarà la nostra vita in Paradiso, sarà pi fàcile dàrghene fora coi problemi che ghemo ancoi. (2 Cor. 4:17) Sicuro che la speransa che Geovà el ne ga dato pol giutarne a gaver forsa. Lu sempre el ne darà forsa par meso dei fradei, dela Bìblia e dela nostra speransa. Alora, se l’è fadiga far el to laoro par Geovà, se te toca dàrghene fora con una dificoltà o se te sì desanimà, prega a lu e stùdia la Bìblia. Anca aceta el aiuto dei fradei e seita a pensarghe sora la bela speransa che te ghè. Cossita, ‘par meso del glorioso poder de Dio, te restarè cada volta pi forte par perseverar in tuto con passiensa e alegria’. — Col. 1:11. w23.10 p. 17 §§ 19, 20

Geovà el ne ga dato tute le robe bone che ghemo. (Tia. 1:17) Alora, podemo pregar e ringrassiar a Geovà par causa de queste robe. Par esémpio, lu el ne ga dato la Tera, tute le robe bele che ghen’è e la nostra vita. Geovà anca el ne ga dato una fameia, amighi, una bela speransa e la so amicìssia. Sicuro che volemo ringrassiarlo tanto. Noantri ghemo de sforsarse par no assar de ringrassiar a Geovà nele nostre orassion. Parché? Parché vivemo nte un mondo ndove le persone le pensa sol in quel che le vol invesse de ringrassiar ai altri. Alora, se no stemo atenti, ndaremo sol domandarghe a Geovà una mùcia de robe invesse de ringrassiarlo par tuto quel che el fà. Par quela, noantri volemo seitar a pensarghe sora e a darghe valor a tuto quel che Geovà ne fà. — Luc. 6:45. w23.05 p. 4 §§ 8, 9

Geovà l’è el nostro Pare e ghe despiase tanto vederne sofrir. (Isa. 63:9) Ancora cossita, dele volte, gavaremo dificoltà che le sarà come ‘rii’ o come el ‘fogo’. (Isa. 43:2) Geovà el ga prometesto giutarne a infrontar tute queste dificoltà. Lu el ndarà darne el so spìrito santo par esser boni de seitar leai e no’l assarà che gnanca un problema ne intrighe de servirlo. (Luc. 11:13; Fil. 4:13) Alora, podemo esser sicuri che Geovà sempre el ndarà darne pròpio quel che ne ocore par seitar leai a lu. Geovà el vol che se fidemo del tuto in lu. (Ebr. 11:6) Ma dele volte, ne par che no saremo mia boni de dàrghene fora con una dificoltà. Ancora cossita, invesse de domandarse se Geovà el ndarà pròpio giutarne, ghemo de esser sicuri che lu sempre el ndarà darne la forsa che ne ocore. (Sal. 18:29) Alora, ghemo de pregar con fede e esser sicuri che Geovà sempre el ndarà risponderne. — Tia. 1:6, 7. w23.11 p. 22 §§ 8, 9

Queste parole le ze pròpio bele e le ne insegna una roba tanto importante. Cossa? Quei che i ze maridadi i pol gaver un forte amor un al altro par sempre. El fogo el seita a brusar quando metemo legna. Magari, se se fermemo de farlo, el fogo el more. La medèsima roba la sucede col amor nel matrimònio. El omo e la dona i ga de sforsarse par far cada volta pi forte el so amor. Ma pol esser che el amor el reste pi fiaco se lori i infronta problemi de salute, se ghe manca i soldi, o se i ga preocupassion de come slevar su i fioi. Alora, un omo e una dona sol i sarà boni de seitar a gaver un forte amor intrà de lori se i ze amighi de Geovà. w23.05 p. 20, 21 §§ 1-3

Cossa ghemo de far par esser boni de gaver coraio? Noantri no deventaremo coraiosi sol parché el nostro pare e mare i ga coraio. Invesse, ghemo de sforsarse compagno femo quando ne ocore imparar a far qualcossa. Podemo imparar con quei che i ga belche coraio e proar ndar drio al so esémpio. Compagno a Daniel, ghemo de sempre studiar la Bìblia, pregar a Geovà, fidarse del tuto in lu e esser sicuri che lu el ndarà giutarne. Cossita, quando vien fora una dificoltà, saremo boni de mostrar coraio. Se mostremo coraio, sarà pi fàcile che le persone le ne rispete, e pol esser che le volerà fin cognosser a Geovà. Sicuro che volemo esser coraiosi anca noantri. w23.08 p. 2 § 2; p. 4 §§ 8, 9

La spression greca “esaminar tute le cose” la era doperada par parlar del laoro che le persone le fea par saver se el oro o el argento i era pròpio puri. Alora, quando scoltemo o ledemo qualcossa, ne ocore sempre veder se l’è pròpio vera Questo l’è ancora pi importante par noantri parché semo pròpio darente dela granda tribolassion. Come che podemo farlo? Invesse de far come i stupidoti e sol acetar quel che i altri i dise, noantri ghemo de veder se quel che ledemo o scoltemo l’è pròpio compagno a quel che la Bìblia e la organisassion de Geovà le dise. Cossita, no ndaremo mia assarse imbroiar par le busie dei demoni. (Pro. 14:15; 1 Tim. 4:1) I servi de Geovà i seitarà vivi dopo dela granda tribolassion. Magari, no ghen’è come saver cossa che ndarà suceder con cada un de noantri. (Tia. 4:14) Pol esser che arquanti i morirà vanti che la scomìnsie. Ancora cossita, podemo esser sicuri che gavaremo la vita eterna se seitemo leai a Geovà. Ghemo de tegnerse ben in mente questa bela speransa che Dio el ne dà e seitar pronti par el giorno de Geovà! w23.06 p. 13 §§15, 16

Noantri no savemo mia come che tute le professie dela Bìblia le ndarà suceder. (Dan. 12:8, 9) Ma no l’è par quela che no le ze vere. Invesse, podemo esser sicuri che Geovà el ndarà giutarne a capir queste professie nela ora giusta, compagno lu el ga belche fato nel passà. Suito scoltaremo le persone dir: “Vivemo in pace e sensa paura.” (1 Tes. 5:3) Dopo, i governanti del mondo i ndarà finir fora con tute le religion false e i ndarà contra i servi de Dio. (Eze. 38:18, 19; Apo. 17:16, 17) Cossita, scominsiarà la guera del Armagedon. (Apo. 16:14, 16) Noantri podemo esser sicuri che presto queste robe le ndarà suceder. Ma, par intanto, seita a darghe valor ale professie dela Bìblia e giuta i altri a scoltar quel che Geovà el ne ga contà! w23.08 p. 13 §§ 19, 20

Quando el apòstolo Paolo el ga parlà sora la fede, la speransa e el amor, lu el ga dito che la qualità “pi importante l’è el amor”. (1 Cor. 13:13) Parché? Parché in Paradiso, no ne ocorerà pi gaver una speransa gnanca fede nele promesse de Dio parché le sarà belche sucedeste. Ma sempre ne ocorerà gaver un forte amor par Geovà e par i fradei. Alora, noantri ghemo de seitar a far cada volta pi forte el nostro amor par lori. Quando amemo i nostri fradei, mostremo che amemo anca a Geovà. El apòstolo Gioani el ga dito: “Quei che i ama a Dio i ga de amar anca ai so fradei.” (1 Gio. 4:21) Mostremo anca che semo veri dissìpoli de Gesù. Lu el ga dito che ‘tuti i saveria che semo so dissìpoli par causa del amor che ghen saria intrà de noantri’. (Gio. 13:35) Nantra roba la ze che restemo pi unidi coi nostri fradei. Paolo el ga dito che “el amor el une de maniera perfeta”. — Col. 3:14. w23.11 p. 8 §§ 1, 3

La Bìblia la dise che quei che i serve a Geovà i ze drio corer come che nte una carera e che quei che i ze boni de finirla i guadagnarà la vita eterna. (2 Tim. 4:7, 8) Par quela, volemo sforsarse par seitar a corer parché savemo che semo pròpio darente de finir questa carera. El apòstolo Paolo el ga mostrà che sol saremo boni de finirla anca noantri se ‘butemo distante tuto el peso e coremo con perseveransa’. Sarà che Paolo l’era drio dir che no ne ocore preocuparse de far gnente e che ghemo de molar tuti i pesi? Nò! Invesse, lu l’era drio dir che, se portemo pesi che no ne ocore mia, restaremo desanimadi e strachi. Par quela, ne ocore veder se semo drio portar pesi che no ghemo de bisogno e molarli. Ma ghemo de star atenti de no molar i pesi che ne ocore portar par seitar a corer nela carera par la vita. — 2 Tim. 2:5. w23.08 p. 26 §§ 1, 2

Invesse de voler sempre gaver la rason, ghemo de rispetar la maniera de pensar dei altri. Par esémpio, ghen’è tante sorele che ghe piase pintarse, ma altre nò. Arquanti i beve un pochetin, ma ghen’è altri che i pensa che l’è meio no bever gnente. E savemo che tuti noantri volemo gaver una bona salute, ma ghen’è diverse maniere de tenderla. Magari, se sempre volemo gaver la rason e spetemo che i altri i pense come noantri, podemo far i fradei strabucarse e finir cola union intrà de noantri. (1 Cor. 8:9; 10:23, 24) Geovà no’l ne dise mia la maniera che ghemo de vestirse. Ma, lu el ne ga dato prinsipi che i ne giuta a vestirse de una maniera che ghe dae onor, che mostre modèstia, bon giudìssio e sensa esser massa duri. (1 Tim. 2:9, 10) Par quela, no volemo mia vestirse par farse veder. I prinsipi dela Bìblia anca i ndarà giutar i ansiani a no crear règole sora come i fradei i ga de vestirse o rangiarse i cavei. w23.07 p. 23, 24 §§ 13, 14

Geovà el ne insegna cossa ghemo de far par esser felici. Quei che i ghe va drio la “dona stùpida” i va in serca dela imoralità par esser felici. Le so brute dessision le ndarà portarli ‘nel Sepolcro’. (Pro. 9:13, 17, 18) Invesse, le persone che le va drio el convite dela “vera sabedoria” le gavarà un futuro tanto difarente! (Pro. 9:1) Se acetemo so convite, ndaremo imparar a amar quel che Geovà el ama e odiar quel che lu el òdia. (Sal. 97:10) E restemo contenti de convidar anca altre persone par imparar dela “vera sabedoria”. L’è come se fùssino “nel posto pi alto dela cità par dir cossita: ‘Che i vegna qua tuti quei che no i ga speriensa!’” Se acetemo questo convite, riceveremo benedission adesso e par sempre parché saremo drio ndar “avanti nela strada de quei che i ga sabedoria”. — Pro. 9:3, 4, 6. w23.06 p. 24 §§ 17, 18

Pol esser che qualchedun nela scola o nel laoro el ne fae domande sora quel che credemo. L’è vera che restemo ansiosi se una roba cossita sucede. Ma queste domande le pol giutarne a saver quel che la persona la pensa e podemo parlarghe qualcossa dela Bìblia. Ma ghemo de ricordarse che semo drio viver “nei ùltimi giorni” e che le persone no ‘le saria disposte a far acordi e le saria crudele’. (2 Tim. 3:1, 3) Par quela, tante persone le crede in busie sora noantri, e fursi lore le ne fà domande sol par vegnerne contra o dirne su. (Ati 28:22) Alora, fursi te te domandi: ‘Cossa che pol giutarme a restar calmo quando qualchedun el parla robe brute sora quel che mi credo?’ La brandura la pol giutarte tanto. Ma, cossa che vol dir mostrar brandura? Una persona che la ga questa qualità la ze calma, la ze bona de controlarse e no la resta suito cativa quando qualchedun ghe dise su o no la sa cossa risponder. w23.09 p. 14 §§ 1, 2

I consili che ricevemo dela organisassion de Geovà i pol anca protegerne. Par esémpio, dele volte, el schiavo fedele el ne ricorda che ghemo de star atenti de no amar i soldi gnanca far robe che ndarà disgustar a Geovà. (Isa. 48:17, 18; 1 Tim. 6:9, 10) Semo sicuri che Geovà seitarà a doperar òmini fedeli par tender dei so servi nela granda tribolassion e nel Governo de Mila Ani de Cristo. Sarà che seitaremo a ndar drio a queste orientassion? Sarà pi fàcile meter in pràtica i consili de Geovà nel futuro se belche adesso imparemo a obedirghe del tuto. Alora, femo el nostro meio par meter in pràtica tuti i boni consili che ricevemo par meso dei òmini che Geovà el ga scoliesto. (Isa. 32:1, 2; Ebr. 13:17) Quando scoltemo a Geovà, podemo fidarse che lu el ndarà protegerne de tute le brute robe che pol suceder e seitaremo a esser so amighi par sempre. w24.02 p. 25 §§ 17, 18

El apòstolo Paolo el ga bio tanta alegria de servir a Geovà. Ma, lu el ga infrontà tante dificoltà. Par esémpio, in quela època, no l’era mia fàcile far un viaio, e ghe tochea viaiar tanto e a posti pròpio distanti. In questi viai, Paolo el infrontea ‘perìcoli de rii, perìcoli de ladroni’ e tante persone le ndea contra lu e ghe dea bote. (2 Cor. 11:23-27) Fin altri dissìpoli de Gesù, dele volte, no i ghe dea valor a tuto quel che Paolo el gavea fato par giutarli. (2 Cor. 10:10; Fil. 4:15) Alora, parché che Paolo l’è stà bon de seitar a servir a Dio? Parché el amea tanto a Geovà. Par via de quel che ga sucedesto nela so vita e de quel che el gavea studià nele Scriture, Paolo l’è stà bon de cognosserlo tanto ben. Cossita, lu l’era sicuro che Dio lo amea tanto. (Rom. 8:38, 39; Efe. 2:4, 5) Par quela, lu el ga volesto mostrar el so amor a Geovà par ‘servir i santi e continuar a servirli’. — Ebr. 6:10. w23.07 p. 9 §§ 5, 6

Tante persone le sa che ghemo bisogno dei governi e che le gavaria de obedir al manco arquante dele so lege. Magari, queste persone no le vol obedir ale lege che no ghe piase o che no ghe par mia giuste. La Bìblia la mostra che i governi i fà le persone sofrir, i ze soto el poder del Diaol e suito i sarà finidi fora. (Sal. 110:5, 6; Ecl. 8:9; Luc. 4:5, 6) Ma par intanto, Geovà el assa che ghen sìpie i governi par mantegner le robe un poco pi organisade. Alora, ghemo de obedir e rispetar ale autorità e pagar i imposti. La Bìblia la dise che quei ‘che i se mete contra la autorità i se mete contra la òrdine de Dio’. (Rom. 13:1-7) Dele volte, pol esser che pensemo che una lege la ze massa fadiga de obedir o che no la ze mia giusta. Ma, se no la va contra la lege de Dio, ghemo de obedirla. Cossita, saremo drio obedir anca a Geovà. — Ati 5:29. w23.10 p. 8 §§ 9, 10

Quando Sanson l’è nassesto, i filistei i governea el posto ndove i israeliti i era de star e li fea sofria tanto. (Giui. 13:1) Alora, Geovà el ga scoliesto Sanson par salvarli. (Giui. 13:5) Sicuro che Sanson ghe ga tocà fidarse del tuto in Geovà par esser bon de far quel grando laoro e giutar i israeliti. Una volta, i òmini de Giudà i ze restadi tanto spauradi che i lo ga ligà con due soghe e i lo ga dato ai so nemighi. (Giui. 15:9-13) Ma, Sanson el se fidea in Geovà e el savea che lu lo giutaria. Alora, cossa che ga sucedesto? “El spìrito de Geovà el ghe ga dato poder”, e lu le stà bon de liberarse dele soghe. Dopo, Sanson “el ga catà el osso dela ganassa de un mul” e lo ga doperà par copar mila soldadi filistei! — Giui. 15:14-16. w23.09 p. 2 §§ 3, 4

Geovà el ne ga contà la so ‘volontà eterna’ par meso dela Bìblia. E parché che podemo dir che la so volontà la ze eterna? Parché Geovà el ndarà far tuto quel che el ga prometesto e quel che el farà restarà par sempre. (Pro. 16:4) Ma cossa che lu el farà nel futuro e cossa che ghe ga tocà cambiar fin adesso? Geovà el ga dito a Adon e Eva quala che la era la so volontà: “Gàpie tanti fioi. Gavé de impienir la tera e gavé de esser paroni dela tera.” (Gén. 1:28) Ancora dopo che Adon e Eva i ga desobedio a Geovà e tuti i ze deventadi pecadori, la so volontà no la ga cambià. Invesse, lu el ga cambià quel che ghe ocorea par far la so volontà. Come? Pena dopo de quel che ga sucedesto, lu el ga dito che el doperaria el so Regno par far tuto quel che el vol qua nela Tera. — Mat. 25:34. w23.10 p. 20 §§ 6, 7

Pol esser pròpio fadiga se fà tanto tempo che semo drio sforsarse de no far una roba sbaliada. Fursi pensemo che le dificoltà che semo drio infrontar le ze pedo de quele del apòstolo Piero. Ma, col aiuto de Geovà, no ndaremo mai desister. (Sal. 94:18, 19) Varda el esémpio de un fradel che, vanti de imparar la verità sora la Bìblia, l’era omossessual fea tanti ani. Lu l’è stà bon de meter in pràtica quel che el ga imparà dela Bìblia e la so vita la ga cambià del tuto. Ancora cossita, dele volte, lu el ga voia de far quel che l’è sbalià. Cossa che lo giuta a no desister? Questo fradel el ga dito: “Geovà el me dà forsa. E go visto che, col so aiuto, son bon de far quel che l’è giusto. Ancora che son imperfeto, Geovà el seita a doperarme e a darme forsa.” w23.09 p. 23 § 12

Se te sì un gióveno, te tocarà sforsarte tanto par deventar un bravo servo de Geovà. Alora, impara de boni esempi, pensa ben vanti de far qualcossa, sìpia una persona de fidarse, impara a far arquante robe e sìpia parecià par le responsabilità che te gavarè. Pol esser che te par massa fadiga far tuto quel che te ocore. Ma no stà gaver paura. Te sarè bon dàrghene fora parché Geovà el ndarà giutarte. (Isa. 41:10, 13) Ricòrdate che anca i fradei e sorele dela congregassion i ndarà giutarte. Se te deventi un bravo servo de Geovà, te gavarè tanta alegria. Ve amemo tanto gióveni fradei, e volemo che Geovà el seite a benedirve! Podé esser sicuri che ndaré deventar bravi servi de Dio. w23.12 p. 29 §§ 19, 20

Metemo dir che te sì ndato a spasso insieme de altri fradei e sorele. Te sì restà tanto contento e te fè ritrati de tuti insieme. Magari, dopo te te nicordi che un fradel l’è vegnesto fora cola fàcia mesa bruta nte un dei ritrati. Alora, te fè de manco doperarlo. Te lo buti via e te doperi quel che tuti i ze restadi bei. Sicuro che se ricordemo de bele robe che ghemo fato insieme dei nostri fradei. Ma cossa che te ghè de far se un fradel o una sorela el ga parlà o el ga fato qualcossa che te ga disgustà? Sfòrsate de desmentegarte, o butar via, cossita come te farissi con quel ritrato. (Efe. 4:32) Noantri volemo tégnerse in mente i bei ricordi de quel che i ga fato. w23.11 p. 12, 13 §§ 16, 17

Le parole greche che Paolo el ga doperà in questo versìcolo le vol dir che le sorele le gavea de mostrar rispeto ai altri e domandarse cossa che i ndaria pensar de come le era drio vestirse. Sicuro che restemo contenti de gaver sorele che le mete in pràtica questo bel consìlio! Una brava dona anca la ga de imparar a capir quel che l’è giusto o sbalià e a far bone dessision. Varda quel che te pol imparar col esémpio de Abigail. Par causa de una bruta dessision del so omo, tuti dela so fameia e so servi i podaria esser copadi. Alora, cossa che Abigail la ga fato? Suito la ga capio come che la podea salvar a tuti. Par causa de quel che la ga fato, nissun l’è morto. (1 Sam. 25:14-23, 32-35) Se noantri semo boni de capir quel che l’è giusto o sbalià, saveremo la ora giusta de parlar e de taser. Noantri anca mostraremo che se preocupemo coi altri sensa sgionfarli. — 1 Tes. 4:11. w23.12 p. 20 §§ 8, 9

I fradei e sorele in Roma i gavea imparà sora Geovà e Gesù, i gavea mostrà fede e i era deventadi dissìpoli. Par quela, el apòstolo Paolo el ga dito che ‘lori i era giusti par causa dela so fede’ e che Dio li gavea untadi col spìrito santo. (Rom. 5:1) Eco, lori i gavea una bela speransa par el futuro. Varda altre robe che Paolo el ga parlà sora la speransa che i untadi i ga. Lu el ga dito ai fradei efesi che lori i gavea ricevesto ‘una eransa par i santi’. (Efe. 1:18) E lu anca el ga dito ai colossensi che quei che i gavesse questa speransa i viveria “nel cielo”. (Col. 1:4, 5) Cossita, capimo che la speransa che i untadi i ga la ze ressussitar par viver nel cielo e governar insieme a Gesù. — 1 Tes. 4:13-17; Apo. 20:6. w23.12 p. 9 §§ 4, 5

La parola greca doperada par “proteger” in questo testo la era doperada par parlar dei soldadi che protegea una cità dei so nemighi. Quei che i era de star rento la cità i restea tranquili parché i savea che i soldadi i ndaria protégerli. La medèsima roba la sucede quando Geovà el ne dà la so pace, parché se sentimo calmi e protegesti. (Sal. 4:8) E quando restemo pi tranquili, anca semo boni de pensar dela maniera giusta e far bone dessision. Alora, ghemo pace ancora che semo drio tribolar, compagno ga sucedesto con Ana, la so mare de Samuel. (1 Sam. 1:16-18) Cossa che podemo far? Quando te sì drio tribolar, seita a pregar a Geovà fin che te te senti in pace. (Luc. 11:9; 1 Tes. 5:17) Alora, se ti te seiti a pregar a Geovà, lu el ndarà darte la pace che la protegerà el to cuor e la to mente. — Rom. 12:12. w24.01 p. 21 §§ 5, 6

Sàtana el ga doperà i momenti pi bruti dela vita de Gesù par farlo desobedir a Geovà. (Luc. 22:2-4; 23:33, 34) Ma Gesù el fea de tuto par santificar el nome de so Pare. Par quela, le persone le contea busie sora lu, le ghe disea su e lo fea tribolar tanto. Ma Gesù el savea che no’l gavea fato gnente de sbalià. (Ebr. 12:2) Lu el ga seità leal a Geovà. Cossita, lu el ga mostrà che Sàtana l’è rugno e un busier, e che i servi leai de Geovà i seitarà a obedirghe, anca se i infronta dificoltà. Vuto contentar el to Rè, Gesù? Alora, seita a lodar el nome de Geovà e a giutar i altri a cognosser le so bele qualità. Cossita, te ndarè drio el bel esémpio de Gesù. (1 Pie. 2:21) Compagno a lu, te assarè Geovà contento e te ndarè mostrar che Sàtana l’è un busier. w24.02 p. 11, 12 §§ 11-13

Nei ùltimi sinque ani, de pi de un milion de persone le ze state batesade come Testimònie de Geovà. Quando una persona la se dedica a Geovà, ela la desside ndar drio al esémpio de Gesù. Cossita, far la volontà de Geovà la deventa la roba pi importante dela so vita. E cossa vol dir far la volontà de Geovà? Gesù el ga dito: “Se qualchedun el vol esser me dissìpolo, lu no’l ga de contentar a lu stesso.” (Mat. 16:24) In greco, le parole “lu no’l ga de contentar a lu stesso” le pol esser traduside come “dir nò a lu stesso”. Alora, quando una persona la ze dedicada a Geovà, ela sempre la ga de dir nò a tuto quel che assa Dio disgustà, come par esémpio, la “imoralità sessual”. (Gàl. 5:19-21; 1 Cor. 6:18; 2 Cor. 5:14, 15) Ma sarà che questo vol dir che la so vita no la ze mia bona? Nò, parché quei che i ama a Geovà i sa che le so lege le ne protege. — Sal. 119:97; Isa. 48:17, 18. w24.03 p. 2 § 1; p. 3 § 4

Geovà el dà spìrito santo a quei che el ghe vol ben. (Mat. 12:18) Par giutarte a capir se te ghè valor par Geovà, domàndate: ‘Son bon de mostrar le qualità del fruto del spìrito santo de Dio nela me vita? Son bon de mostrar de pi passiensa adesso de quando go cognossesto la verità?’ Se te sì bon de mostrar cada volta de pi le qualità del spìrito santo, te pol esser sicuro che Geovà el te dà valor. Geovà el ga dato el sacrifìssio del so Fiol par salvar a quei che lu el ghe dà valor. (1 Tim. 2:5, 6) Ma pol esser che anca se ghemo fede nel sacrifìssio de Gesù e semo batesadi, no semo boni creder che Geovà el ne dà valor. Alora, cossa che pol giutarne? Ghemo de ricordarse che no podemo mia fidarse nei nostri sentimenti. Invesse, ghemo de fidarse in Geovà. Lu el dise che quei che i ga fede nel sacrifìssio de Gesù i ze giusti par lu e Geovà el promete benedirli. — Sal. 5:12; Rom. 3:26. w24.03 p. 30 § 15; p. 31 § 17