Yooweerera yaapakinwe omwaako Karmeli

Omwene wa mahimo 10 waakhalano mamwene ootepa onanara murima, mene omwene waatempe waari omwene wa Akhabi. Owo aathelana ni muthiyana yoowo aari ootepa onanara murima iitthaniwa Yezabeli. Yezabeli ni Akhabi yaaheeriha weera atthu ootheene yaakhala wIsraeli emukokhoreleke muluku eethiru iitthaniwa Bayali. Awo-tho yaalamula weera yiiviwe maprofeta mantxipale a Yehova. Eheeni-nto Yehova aapankaawe? Owo aamurumiha profeta Eliya weera uulume ni Akhabi.

Eliya aahiiwa weera, mwaha woonanara murima wa Akhabi, khiyaarowa orupa tho epula veeli wIsraeli. Mwa yeeyo, saamala iyaakha tthaaru epula ehirumpe. Nto, yaakhala etala ni atthu khiiyoona yootxa. Muhoolo mwaya, Yehova amuruma Eliya weera uulume veeli ni Akhabi. Emaara Akhabi aamonnaawe Eliya, owo aamweerela: ‘Sootheene iya sineereya, nthowa ti nawaa Eliya! Nthowa ti nawaka? Ti weyo pwiya oweerinhe atthu ootheene omukokhorela Bayali. Nrowe nipake yooweerera weera nimoone taani ari Muluku ekhaikhai. Mwaathukumanye atthu ootheene ni maprofeta ootheene a Bayali, omwaako Karmeli.’

Atthu yaarowa omwaako Karmeli ni iwe Eliya aaheera: ‘Nyuwo munkela omuthanla munkelanyu omukokhorela Yehova naari Bayali. Ninkela opaka yooweerera emoha weera noone taani ari Muluku ekhaikhai.’ Maprofeta 450 a Bayali enkela oreherera mukuttho wa muluku aya. Miyo kinrowa oreherera mukutho wa Yehova. Muluku onkela oruma mooro wiirimu ni ohisa mukuttho, owo Muluku eekhaikhai.

Maprofeta a Bayali yaareherera mukuttho aya. Awo yaakhala nihiku nootheene ekhuwelaka, menento Bayali khaawaakhunle. Mwa yeeyo, Eliya aapatxera waatheya maprofeta ale, ni annaweerela: ‘Kinoona weera Bayali anookona. Onnatthuneya weera nyuwo mukhuwele vantxipale noone wakhala weera owo onoovinya.’

Waapatxeera wiila ni maprofeta a Bayali yannavirelela okhuwela. Menento khiyaavo yeereya. Nto, Eliya aahihela mukuttho awe va altaareni ni aayeehera maahi muxerexere. Avinyaka owo aavekela: ‘Txontte Yehova. Nwoonihere atthu ootheene weera nyuwo pwiya mwa Muluku eekhaikhai.’ Emaarene yeele, Yehova aaheeriha mooro omorela vasulu va altaare. Vano ana Israeli yannaroromela weera Yehova aari Muluku eekhaikhai. Nto nihiku nne, maprofeta 450 a Bayali yaahiiviwa.

Nto Eliya, aahoona nihutte nikhaaniini naattamelaka. Owo aamweerela Akhabi: ‘Epula ya ikuru enoorupa. Waakuveke! Oreherere ekaaro aa ya ekhotto ni oroweke owannyaa ehinaakuveene orupa.’ Mahutte ooriipa yaasareya wiirimu, epheyo yaapatxera woopa ni epula yaapatxera orupa yoowaatta. Akhabi aaheettiha ekaaro awe moowaakuveya moota owo aawerelaawe. Akhaviheriwaka ni Yehova, Eliya aatthimaka moowaakuveya opwaha ekaaro ya Akhabi. Yaatthikela orupa epula wIsraeli. Nlelo Eliya aamurowa oviriha maxupo makina.