Yehova aamukosoopa Eliya

Yezabeli aahisuwela etthu yeereñye ni maprofeta a Bayali, ni khayaamusivenle etthu ele. Nto owo aahima weera ammwiiva Eliya hiihaale ntoko owo aawiinvaawe maprofeta a Bayali. Eliya aahoova ni aatthawela onikareni. Owo aavekela: ‘Yehova, miyo nkinwera ovilela-tho, txontte mukihiye kikhwe.’ Eliya aakhulumuwa vantxipale aakilaathi ni aakona vathi va mwiri.

Avinyaka, Yehova aaruma nlaika. Nlaika nanvenxa Eliya ni naamweerela: ‘Eliya, kookhalano etthu emoha weera otxe. Ovinye.’ Eliya aahoona ephawu yoovilikeya ni yooviha ni exaaru ya maahi. Owo aahootxa, aawura ni aatthikela okona. Nto, nlaika nne nanvenxa Eliya veeli: ‘Otxe veeli. Weyo onnatthuneya okhale a ikuru weera weette ekwaha.’ Atxaakaru, Eliya aaheetta ekwaha ya mahiku 40 mpaka ophiya omwaako Horebi. Aphiyakaru, owo aavolowa munikhukuni ni aakona. Mene Yehova aaxupeya ni Eliya ni aamukoha mwaha wa heeni owo aariipinwaawe murima ni mwaha wa heeni owo aatthanwaawe. Nto Eliya aahaakhula weera: ‘Pwiyaka Yehova, ana Israeli yaahilaihera wookokhorelani, mene awo khempaka yeeyo. Awosa aawiiva maprofeta anyu ni vano entthuna-tho okiiva miyo.’

Nto Yehova anvekela Eliya weera akhume munikhukuni ni eemele vasulu va mwaako. Iwe Yehova aamoonihera owera wawe. Yoopatxera, owo aaheeriha woopa epheyo ya ikuru munikhukuni. Avinyaka aarumiha etetere ni mooro. Okhwipi waya, Eliya aahiiwa nsu na vathi-vathi noomaaleleya. Owo aakhuneela owiitho ni aakhuma munikhukuni. Yehova aamukoha: ‘Eliya mwaha wa heeni weyo otthanwaawe?’ Eliya aahaakhula: ‘Miyo kitthanwe mwaha wooweera khaavo onookokhorelani nyuwo pwiya. Kihikhanle miyo paahi.’ Mene Yehova aaheera: ‘Hooye, weyo khokhanle meekhaa, nlelo aakhala atthu 7.000 wIsraeli enkikokhorela.’ Nto, Yehova aamuleela Eliya weera amwiitthane Eliseyo weera akhale profeta nipuro nawe. Moohipisa moowaakuveya, Eliya aarowa opaka etthu Yehova aamurummaawe. Etthu heeni hiyo ninxutterahu ni sootheene saamukhumelenle Eliya? Ikwaha sootheene naapakaka etthu Yehova onnirumaawe, owo onorowa onikosoopa. Vano, nrowe nitthikele ottuli vakhaani weera noone etthu Eliya aapankaawe mwa iyaakha sa mutthuli.