Yesu aaxuttiha moota woopaka nivekelo

Afarisi yaapaka itthu sooreera weera yooniwe ni atthu akina. Awo wannaasivela opaka mavekelo mapuro oowaatta atthu, weera atthu ootheene ewooneke. Awo-tho wannaasivela opaka mavekelo oorakama. Avinyaka, awo yannarowa musinakooka mphironi ni yannatthikela mavekelo veeli-veeli ekhuwelaka, weera atthu ootheene yiiweke. Yesu aahaaxuttiha atthareli awe ovekela moovirikana naawo. Owo enre: ‘Muhivekeleke ntoko Afarisi, awo enuupuwela weera Muluku ennamusivela mavekelo aya oorakama, menento Muluku khemmusivela. Nivekelo ori otthekula nyuwo ni Yehova. Muhitthikeleke itthu imoharu nivekelo nootheene. Yehova ontthuna weera muhimeke itthu sootheene munoonaanyu.’

Avinyaka Yesu enre: ‘Nyuwo ontthuneya weera nvekeleke ha: “Tiithi muri wiirimu, nsina nanyu ntteelihiwe. Omwene anyu owe. Yeereye yootthunaanyu elapo ela ya vathi, ntoko yeereñyaaya wiirimu.”’ Yesu aahaaleela-tho atthareli awe weera yaatthuneya ovekelaka weera ekhaleno yootxa ya va nihikuni, weera aalevelele soottheka saya ni etthu eri poothe yootthuneya wa yaawo.

Menento Yesu aahaaleela: ‘Muhihiyerere ovekela. Nvireleleke ovekela itthu sooreera wa Yehova. Owo tiithi ahu, tiithi ori poothe onnatthuna onvaha mwanawe itthu sooreera. Wakhala weera mwaana ohaavekela apapawe epaawu, neereke paapa owo onrowa onvaha nluku? Nave-tho wakhala weera mwaana ohaavekela apapawe ehopa, neereke paapa owo onrowa onvaha enowa?’

Wakhala weera asitiithi ennawera waavaha anamwane aya itthu sooreera, nto Yehova orootepa! Owo ontthuna woovahani munepa wootteela. Menento ontthuneya onvekela. Nyuwo munnavekela ntoko Yesu oxuttinhaawe? Munuuluma eheeni mmavekeloni mwanyu?