Paulo ni Timotheyo

Timotheyo aari mmiravo a muloko wa oListra. Apapawe yaari mukereku, ni ameyawe yaari muyuda. Ameyawe yiitthaniwa Eunice, ni avovo awe yiitthaniwa Loide. Awosa yaamuxuttiha Timotheyo malamulo a Yehova, ovinyera areene mwaana.

Paulo avirakaru oListra mwa mukwaha awe wanaaveeli woolaleera, owo aamoona Timotheyo weera aari ansivelo ni wannamusivela waakhavihera asinna. Nto, Paulo anwopa Timotheyo weetta mukwaha nuuwo. Akhaviheriwaka ni Paulo, Timotheyo aaxuttera olaleera ni oxuttiha nnene.

Muluku aavarihela munepa awe wootteela weera amoonihere Paulo ni Timotheyo, yeeraaya erowewo. Ohiyu omoha, Paulo aaloha. Mwa yooloha eyo, mulopwana mmoha aamweerela Paulo: ‘Owe oMasedonia onikhavihere!’ Avinyaka, Paulo, Timotheyo, Sila, ni Luka, yaarowa oMasedonia olaleera ni yaapaka miloko.

Otesalonika, esidade emoha yiitthaniwa Masedonia, atthu antxipale yaakhala akristu. Menento ayuda akina khayaasiveliwa ni Paulo ni asinthamwene awe. Nto, awo yaapaka ekhurupu etokotoko yanvara Paulo ni asinthamwene awe, emuroihaka wa anamalamulela a esidade, ni yannakhuwela yeeraka: ‘Asilopwana ala amwiittani a olamulelo wa oRoma!’ Ovirelela okhala iwe waarowa okhala woowoopiha wa Paulo ni Timotheyo. Nto, awo yaatthawa ohiyu erowaka oBereya.

Atthu yaakhala oBereya, yaakhalano ntthuno noosuwela mitthenka sooreera. Ohiya paahi ayuda, mene akereku-tho, yaakhala akristu. Emaara ayuda yaakhala oTesalonika yaaronwaaya oBereya otannyera manyaku-nyaku, Paulo annatthuneya orowa wAtena. Menento Timotheyo ni Sila, yaavirelela okhala oBereya weera elipiheke nroromelo na asinna. Evinreene etempu, Paulo anvekela Timotheyo otthikela oTesalonika, weera aakhavihere asinna ovilela otthara-tthariwa yaavirihaaya. Moottharelana, Paulo anvekela Timotheyo oxekura miloko mikina ni olipiha.

Nto, Paulo aamweerela Timotheyo: ‘Mutthu ontthuna omwiiwelela Muluku aneereke otthara-tthariwa ni ohasuliwa.’ Timotheyo aatthara-tthariwa, aatthukeliwa mukateya, mwaha wookhala mukristu. Mene owo annahakalala mwaha wooweera, eyo yoonihera weera aari ororomeleya wa Yehova.

Paulo aaweerela aFilipi: ‘Miyo konvekela Timotheyo owa mpaka iwo. Owo onooxuttiha etthu entaphulelaaya weetta mweekhaikhaini, ni onimooxuttihani moota woovara muteko woolaleera.’ Paulo aasuwela weera aaheereke omuroromela Timotheyo. Ni awo yaavara vamoha mwa iyaakha sintxipale ni yaakhalano onthamwene woolipa.