Paulo aaheetta ekwaha akelaka oRoma

Ekwaha yanaararu ya muteko woolaleera wa Paulo, waakotenle oYerusalemu. Iwe aawaleliwa ni aavonyeriwa mukateya. Ohiyu omoha, Yesu aamukhumelela Paulo moolohani ni aamweerela: ‘Weyo onoorowa oRoma ni onrowa olaleeraka weiwo.’ Paulo aakuxiwa oYerusalemu aroihiwaka oKesareya ni aawaleliwa iwe mwa iyaakha piili. Emaara aathorihiwaawe ni kovernatore Festo, Paulo aahinvekela: ‘Miyo kintthuna othorihiwa ni Sesare oRoma.’ Festo aahaakhulela, ni Paulo aaheliwa munaviyuni ni aarowa oRoma. Asinthamwene akina eeli a Paulo, yiitthaniwa Luka ni Aristarko, yaarowa nuuwo.

Mpuwa mwa ekwaha, yaahoopa epheyo ya ikuru yeeyo yaamalinhe mahiku mantxipale. Atthu ootheene a munaviyuni yuupuwela weera yaamukhwa! Mene Paulo aaweerela: ‘Alopwana, mulipe murima! Hiyo khaninrowa okhwa! Nlaika nimoha nookileela moolohani neeraka: “Ohoove Paulo. Weyo onoophiya oRoma, ni atthu ootheene ari munaviyuni enoophiya vamoha ni weyo ni enoovuluwa.”’

Epheyo ele ya ikuruxa yaavirelela woopa mahiku 14. Avinyaka, alopwana yaari munaviyuni yaawera woona eilya emoha ni yaalakela orowa weiwo. Yaari eilya ya oMalta. Ephiyakaru ophareya, naviyu ole aapittuwa ni aanyaanyeya, mene atthu ookwanaka 276 yaavuluwa. Akina yannarapela mpaka ophiya oiIya, ni akina yaahiphiya iwe evarenleene ipetaasu sa naviyu. Emaara ootheene yaaphiñyaaya, atthu yaakhala oMalta yaahaakosoopa awo ni yaapattiha mooro weera awo yooreke.

Sivirakaru miyeeri miraru, anakhotto yaamukuxera Paulo oRoma ni naviyu mukina. Emaara Paulo aaphiñyaawe oRoma, asinnawe yaarowa okumana ni owo. Awoonakaru asinnawe ewaaka, Paulo annamuxukurela vantxipale Yehova ni aalipa murima vantxipale. Nnaamweera aawalelinwe, Paulo aamurowa okhalaka empa yoowaalukariwa, mene ni nakhotto mmoha weera anweha-weheke. Owo aahikhala iwe mwa iyaakha piili. Emaara atthu yaarowaaya omoona Paulo, owo annaalaleera woohima sa Omwene wa Muluku ni woohima sa Yesu. Owo-tho aalepela ikaarta miloko saakhala wAsia menor ni oYudeya. Yooweereya ya Paulo ennixuttiha weera Yehova anvarihela muteko weera aalaleere atthu a mapuro oovirikana mitthenka sooreera.