Moolamuleloni mwa Muluku soopattuxiwa sootheene sa Muluku saari nimurettele
Mwaha wa heeni Omwene wa Muluku oraaya wootthuneya wa hiyo?
Okhuma woopatxerani wa atthu, mpattuxa ahu, yoowo oneeriwa Yehova, yoowo paahi sika ori mwene. Owo annilamulela nave tori mwene ooreera murima. Owo ahaavaha nipuro nootepa oreera ematta ya wEdeni weera ekhaleke atthu. Nave aapaka nipuro nenno naaphwanela yaawo nave ahaavaha yootxa yaatthuna aya. Owo-tho ahaavaha muteko woovara. (Ephattuwelo 1:28, 29; 2:8, 15) Yeera aya atthu ale ekhale oowiiwelela, yaamukhalano murettele mahiku ootheene.
Attthu oopatxera yaathanya olamuleliwa ni Muluku
Biblya onnahima nlaika nenno noottiya maaru, Satana eyo tiiyo nanrima, orukunuwenle olamulelo wa Muluku. Owo aweriha wuupuwela weera yaamuhakalala wakhala weera khanrowa olamuleliwa ni Muluku. Mooripiha murima makholo ahu Adamu ni Heva yaatthara miruku sa Satana soohimwiiwelela Muluku. — Ephattuwelo 3:1-6; Apokalise 12:9.
Mwaha wooweera Adamu ni Heva yakhootta omwiiwelela Muluku, ahootxela okhala mparadiso ni ekumi yoohimala. (Ephattuwelo 3:17-19) Yoothanlaaya yoohaahasula anamwane yaayanraya muhoolo. Biblya onahima weera “mwaha wa mutthu mmosaru yottheka yovolowa mwelaponi mumu”. (Aroma 5:12) Nave mwaha wa yoottheka, yooruhela maxupo makina “vavale mutthu onamulamulaiye mukhw’awe wera amuhoxe”. (Koheleti 8:9) Eyo tiiyo emaara atthu aneereraya olamulelana, maxupo anoovira etepaka.
MAHOOXO ANAAPHWANYA AATTHU ANOOTEPA
Nemurodi aamurera ettuli Yehova
Mwaha woopatxera onthalihiwa mBiblyani wa Nemurodi, owo arukunuwela olamulela wa Yehova. Nto okhuma ehuhu ya Nemurodi, atthu yaarinono oweera woowalamulela akina yannitepa wiikuxerera. Mwa iyaakha 3.000 sivinre, mwene Salomoni alepa eeraka “Kòhòna maithori àtthu òhoxiwa, ahikhanleno namahakalaliha aya, niwoko owerya wothene ori mmatatani mwa anamahox’aya.” Koheleti 4:1.
Nave mahuku ahu ala khavirikanne. Eyaakha ya 2009, Nações Unidas aalaleya weera, Olamulelo onoovira oriki mutepa onanara, “nave onnooneya onanara eriyari ya atthu.”
EHUHU YOOPHIYA, NTO NIIREHERERE!
Elapo ennitthuneya weera elamuleliweke mwa exariya iguvernu silamuleleke nnene. Nto tiyeeyo mpattuxa ahu olaihenraiye!
Naamwi ekhanleene anamalamulela oophwanelela, mene khenwera omaliha mahooxo aatthu
Muluku oopaka Omwene, naari eguvernu eneera eranttelihe imwene sa atthu, ni omwene ene yoowo “okhalaka wa mahiku othene”. (Daniyeli 2: 44) Omwene owo, ti yoowo atthu antxipale aniilipihera aya ovekela nenne nxiiye. (Matheyo 6:9, 10) Nto khaiyono weera muneene Muluku taneera alamuleleke. Opwaha mwa yeeyo, Owo oomuthanla mwene yoowo aakhala ni atthu ni asuwenle makhalelo aathu. Taani nto athanliwe weera akhale mwene?