SOOWEEREYA SA MWEEKUMINI
“Vano onnakisivela olaleera”
MIYO KIYARIWE wIlha oSul wa oNova Zelândia ecidade ya mpuwa eniitthaniwa oBalclutha. Kireene mukhaanene, kaniisoona omwattamela Yehova ni wannakisivela okhala mweekhaikhaini. Miyo wannakisivela orowela woonela mithukumano, omulokoni naari nipuro kaakhalaaka oovareleleya ni kaakhalaaka oohakalala. Naari kaari oohitheela ni atthu, miyo wannakisivela olaleera isemana soothesene. Nkoova waalaleera anaxikola akhwaaka ni atthu akina. Miyo kannaiteexa mwaha wookhala namoona a Yehova, kikwanihakaru iyaakha 11, kaavaherera ekumi aka wa Yehova.
KAAYELEELA OHAKALALA WAKA
Mooripiha murima, kikwanihakaru iyaakha soomwali omusivelawaka Yehova waapatxera ovukuwa. Koona weera asinkhwaaka ooxikola, yaakhalano otaphuwa wookwanela, ni koona weera kaamuyeleela itthu. Koona weera malamulo aasitithaka ni a Yehova yaamukikhoottihera itthu sooreera, ni miteko soomunepani sannakiiyera ehuhu. Nkaahovela weera Yehova ookhala, mene nkaamwatthamela.
Naamwi vaareene hiiho kaavirelela olaleera. Kaalaleya vakhaanene weera kihikhale inativo. Emaara kaarowaaka olaleera, miyo nkaairehera, wannakixupa opatxeriha wuuluma ni mutthu weera kimulaleere. Mwa yeeyo, nkaakhumela nnene, ni khawaakisivela muteko woolaleera. Miyo kannaikoha, ‘mutthu onwera hayi opaka itthu iya isemana sootheene ni nyeeri sootheene?’
Kikwanihakaru iyaakha 17, nkaatthuna okhala ni asitithaka. Nto kaarehera itthu saka sootheene, kinakela okhala wAustrália. Eyo yaahaxupa vantxipale asitithaka. Nave awo yaathanana, naamwi vareene hiiho, yuupuwela weera miyo kanvirelela onvarela muteko Yehova.
wAustrália, miyo kaavirelela ottettheya mwa omunepani. Mene kannarowa omuthukumanoni emaara ekina. Wannakisivela weetta ni asimwali yaari ntoko miyo, mahiku makina yarowa omuthukumanoni, mahiku makina yaarowa mapuro makina yaainaaya ni owura. Kuupuwelaka sa muttuli, miyo kinnoona weera, keemenle mwetto mmoha mweekhaikhaini ni mukina waari mulaponi. Nto miyo khaavo yaakisivela mulaponi naari mweekhaikhaini.
ETTHU KAHAWEHERERAAKA, MENE YOOTTHUNEYA
Sivirakaru iyaakha piili muhoolo mwaya kamusuwela murokora mmoha kihisuwelaka, yoowo aakerenle kuupuwele sa ekumi aka. Miyo kaakhala ni asirokora athanu attiye, ni nanwopa mutokweene a esirkwiitu ni amwarawe Tamara, weera elukamele owanyihu esemana emoha. Emaara munna arehereraawe itthu soomulokoni, murokora Tamara eera anitheihaka. Eyo yannanisivela , mwaha wooweera Tamara ari oowiyeviha ni annakhweya otthekulano. Kaahona weera owo annatthuna omusuwela mutthu oomunepani ootheleyano.
Tamara wannamusivela ovaha ni otumiha. Omusivela wawe ekhaikhai ni orowa olaleera, wannaweeriha akina omutakiha. Owo wannamusivela ompakela Yehova etthu ti etthu aaweraawe, naamwi miyo kahaahakalala mwaha wooweera nkaahakalala ni itthu sa omunepani. Mukhaleelo awe ni ohakalala wawe, wahikikhavihera mweekumini mwaka. Ntakihero nawe naakikhavihera wuupuwela etthu yootthuneya: Mene kaahoona weera Yehova ontthuna weera atthu ootheene envareleke muteko “ni otteliwa murima” nave-tho “ni itxipo sohakalala.”—Nsal. 100:2.
KITTHIKELAKA OSIVELIWA OLALEERA
Miyo kaatthuna ohakalala ntoko Tamara, nto weera ekhumelele eyo miyo kannatthuneya opaka matxentxo mweekumini mwaka. Kaapisa opaka matxentxo, nto muhoolo mwaya kaapatxera opaka vakhaani-vakhaani. Kaapatxera wiireherera kaarowaka olaleera imaara soothesene, ni kaavara ntoko piyoneira ookhavihera. Eyo yaakikhavihera okhala ohinyonyiwa ni waatxerera nroromelo naka. Mwaha woonvarela muteko Biblya kaalaleeraka, waakiphwaninya ohakalala emaara kalaleeraka. Avinyaka miyo kaavara ntoko piyoneira ookhavihera mweeri wootheene.
Kaapatxera waapaka onthamwene atthu ootheene yaawo yaamusivela Yehova ni muteko awe. Ntakihero nooreera na asinthamwene awo, naakikhavihera okhalano sooluluwanya sooreera ni okhalano mukhalelo wooreera wa omunepani. Waapatxera okisivela muteko woolaleera, nto kaakhala piyoneira anthiti. Evirakaru ehuhu yintxipale kireene piyoneira, kaapatxera ohakalala ni osiveliwa orowela woonela mithukumano omulokoni.
KOMPHWANYA MUKWAAKA KINVARAAKANO MUTEKO EKUMAKA YOOTHENE
Evirakaru eyaakha emoha, miyo kaamusuwela Alex, mulopwana ooreera murima aamusivela Yehova ni muteko woolaleera. Owo aari murumeyi oorumeleela ni aari piyoneiru anthiti mwa iyaakha 6. Alex eera atonko ene ovara muteko muttetthe woothowa anamalaleera oMalawi. oMalawi owo ahaasuwela mamissionario yoonihera ntakihero nooreera, ni yaamulipiha weera avireleleke ohela nipuro noopatxera Omwene wa Muluku.
Eyaakha ya 2003, hiyo naathelana ni naavirelela ovara omuteko wa ehuhu yootheene. Naaxuttera itthu sintxipale soothuneya ni Yehova aanireeliha vantxipale.
ETTHU YAANIPHWANYINHE MAREELIHO MANTXIPALE
Avaraka muteko ematta ya Gleno, oTimor-Leste
Eyaakha ya 2009 naawompwa okhala mamissionario oTimor-Leste, elapo ekhaanene waattamela wIndonésia. Waanisivela ni naanyoonyiwa emaara emoharu. Ivirakaru minyeeri miraru muhoolo mwaya, naaphiya oDili ekapitale ya oTimor-Leste.
Weera nivare muteko elapo ele, wannatthuneya opaka matxentxo mantxipale. Itthu sootheene saavirikana. Sookhovelela, nuulumo, yootxa ni makhalelo a ekumi. Mene waatthuneya wiikhoveleliha. Naalaleeraka nuuluma ni atthu oohawa, oohisoma ni yaari oohasuwa. Atthu akina mwa yaawo yaakhalano maparima mweerutthuni ni mmupuweloni mwaha mwa ekhotto ni itthu ikina soonanara.a
Olaleera waari wootikiniha! Mwa ntakihero, kaamusuwela mwamwali mmoha aarino iyaakha 13 itthaniwa Maria.b Ekumi awe yaari yoomoriha ikharari. Ameyawe yahokhwa iyaakha sa muttuli ni khaasuwenle apapawe. Nto asikhwaawe Maria, khayaakhanleno yoolakela ya ekumi. Miyo kinnuupuwela nihiku nimoha owo anliyaawe ahimaka etthu yaamuxupa. Miyo nkaawenre wiiwa etthu aahimaawe, mwaha wooweera miyo nkawera wuuluma nuulumo nawe. Nto kanvekela Yehova, kinvekela weera akikhavihere omuhakalaliha mwaamwali ole, mene kaapatxera omusomela soolepa soolipiha, seiyo saamulipihe. Iyaakha sattharelana, vanooneya weera ekhaikhai, yannatxentxa mukhalelo awe, ethoni awe ni ekumi ya Maria. Vano owo oobatiziwa ni onneriha soosoma sawe sa Biblya. Olelo Maria ookhalano emusi yoororomela ni onnoona weera oophwanya nipuro noororomeleya.
Yehova onnareeliha muteko oTimor-Leste. Anamalaleera antxipale a elapo ele axuttenre ekhaikhai mpuwa mwa iyaakha muloko soomalihera. Naamwi vareene hiiho, antxipale mapiyoneiru ni arumeyi oorumeela ni akina tho asitokweene a mmulokoni. Aakhala akina anvara muteko mapuro ootaphulela, ekhaviheraka oreherera yootxa ya omunepani enuulummwa na elapo ele. Kaatteliwa vantxi owiiwa yiipaka omuthukumanoni ni woona otteliwa waya ni wunnuuwa waya woomunepani.
Ni Alex erowaka muttetthe woohilaleiwaru erowaka omukawela nwopelo
NKINWERA WUUPUWELA EKUMI ELE YOOHAKALALIHA
Yoothanleliwa ahu oTimor-Leste yaavirikana ni ekumi naarahuno wAustrália, mene miyo nkinwera wuupuwelela ekumi yohakalaliha naarahuno. Emaara ekina naalaleera mapuro makhaanene anweliwa ikaaro oowattiwa atthu, ontumihiwa ihopa soowuma ni nipuro nintumihiwaya nipontta. Mahiku makina nanasomiha empa ekhaanene yooviha ni yoohimariwa vathi ni alakhu etthimakaka. Naamwi naaviriha maxupo ootheene awo, miyo kannupuwela: ‘ela etthu yooreera!’
Mphiro wa muttetthe woothanleliwa wahu
Kuupuwelaka sa muttuli, miyo kinnamuxukurela Muluku mwaha wa asitithaka woopaka ele yaaweraaya weera ekixuttihe ekhaikhai ya Yehova ni okikhavihera oviriha ehuhu yooxupa ya omiravo aka. Miyo ntakihero noowooneya mwa ele onhimaawe Miruku 22:6. Ovinyera ameyaka mpakana apapaka, anniiteexa mwaha wa miyo ni Alex, awo annahakalala yoonaka moota ninvareliwaahu muteko ni Yehova. Okhuma eyaakha ya 2016 ninvara muteko wooxekura miloko, wAustrália ni oNova Zelândia.
Awooniheraka anamwane eviidiyu ya Caleb ni Sofia
Neereke nyuwo mwaamwaakhulela weera khawaakisivela muteko woolaleera? Vano miyo onnakisivela olaleera! Kohoona weera, naari sikhanleene itthu sintxipale mulaponi khasinniphwanyiha ohakalala. Hiyo ninrowa owera ophwanya ohakalala weekhaikhai wakhala weera, ninnavarela muteko Yehova ni murima wootheene. Moohihovela iyaakha iya 18 kinvarenlaka muteko Yehova kireene ni Alex, annikhala mahiku oohakalaliha mweekumini mwaka. Vano kinnawexexa ele mulipa oolepa Nsalmu Davidi weera aahima ekhaikhai vaavo amweerenlaawe Yehova “ vano othene yale anatthawela wa nyuwo, ehakalale, ettakale mahiku othene, niwoko nyuwo munnàkhunela yawo. Siso etteliwe murima mwa nyuwo yale antthuna nsina nanyu.”—Nsal. 5:12. [5:11 Tradução do Novo Mundo]
Yiyoohakalaliha Oomusoma Biblya ni mutthu oowiiyeviha!
a Okhuma eyaakha ya 1975, oTimor-Leste yaapatxera owaniwa ekhotto ya independência política. Yookhumelelaaya waari owaniwa ekhotto iyaakha 20.
b Nsina nootxentxiwa.