Soowooniheriwa sa Yohani

Murummwa Yohani aatthukiwa eilya ya oPatmo. Areene weiwe owo aahoona soowooniheriwa 16 sa itthu saarowa okhumelela muhoolo. Mwa soowooniheriwa iye, Yesu aamoonihera Yohani moota nsina na Yehova neeraaya ntteelihiwe, moota Omwene wa Muluku onkelaaya owa ni moota yootthuna ya Muluku yeeraaya epakiwe valaponi ni wiirimu.

Mwa yoowooniheriwa emoha, Yohani aahoona ehitxe ya Yehova yootepa oreera wiirimu. Veehitxeni, yaaphattuwavo etari ni okukutteya. Mukhwipi mwa ehitxe, Yohani aawoona asitokweene 24. Awo yaawanre ikuwo sootteela ni yaawara ekorowa ya ewooru. Asitokweene ale 24 yaahuurama ni enamukokhorela Yehova. Mwa yoowoonihera ekina, Yohani aahoona muloko mutokweene wa atthu elapo yootheene emukokhorelaka Yehova. Avinyaka, mwaaputtiputthi aahaakuxa atthu ale aaroihaka va ehime ya maahi a ekumi. Mwaaputtiputthi owo Yesu. Mwa yoowoonihera awe ekina, Yesu onnapatxera olamulela vamoha ni asitokweene 24. Yoowoonihera yaattharelana, Yohani aamoona Yesu awanaka ni edragoni ni mademoniyu. Edragoni eyo Satana. Yesu aahoomola edragoni ni mademoniyu wiirimu, ni awosa yaawa okhala elapo ya vathi.

Avinyaka, Yohani aahoona yoowoonihera emoha yootepa oreera. Owo aamoona mwaaputtiputthi ni atthu 144.000 yeemenleene va mwaako Siyoni. Yohani aahoona-tho nlaika nimoha nivavaka valaponi vootheene. Nlaika nno nannaaleela atthu neeraka: ‘Mmukokhoreleke Muluku! Munvuwiheke yoowo!’

Mwa yoowooniheriwa ekina, Yohani aahoona ekhotto ya Armagedoni. Mpuwa mwa ekhotto eyo, Yesu ni anakhotto awe yaawana ni atthu a elapo ela ya Satana ni yaahaawina. Avinyaka, yoowoonihera yoomalihera, Yohani aahoona murettele ni wiiwanana wiirimu ni elapo ya vathi. Satana ni atthu akina yaanyaanyiwa. Okhwipi waya, atthu ootheene wiirimu ni elapo ya vathi yaattittimiha nsina na Yehova ni omukokhorela yoowo paahi.