MWAHA ONTHOKORORIWA 40
ETXIPO 30 Muluku Aka, Moopoli Aka, ni Tiithi Aka
Yehova “onnapenuxa mirima [soovoreyeya]”
“Onnapenuxa mirima [soovoreyeya] ni onnatthuka makhwatta.” — NSAL. 147:3.
ELE NINKELA AHU OXUTTERA
Ninrowa woona weera Yehova onnaapwattha vantxipale ale erinono maxupo a mmuupuweloni. Yoosoma ene yeela, enoorowa woonihera moota Yehova onnimaalihaawe ni onikhavihera waalipiha atthu akina.
1. Yehova oniisoonela hayi vaavo onaawehaawe arumeyi awe?
ETTHU heeni Yehova onoonaawe vaavo onaawehaawe arumeyi awe elapo ya vathi? Owo onnaweha ohakalala wahu ni maxupo ahu. (Nsal. 37:18) Emaara owo onnoonaawe niilipiheraka weera nimukokhoreleke mwa mukhalelo wooreerela nnaamweera nivirihaka maxupo, owo onnahakalala vantxipale! Mene ohiya paahi eyo, owo onnatthuna vantxipale onikhavihera ni onimaaliha.
2. Etthu heeni Yehova onaapakelaawe ale evoreyeñye murima, ni moota heeni ninrowaahu ottottela mureerelo okosoopa wawe?
2 Yoolepa ya Nsalmu 147:3, enhima weera Yehova “onnatthuka makhwatta” a atthu erinono murima woovoreyeya. Eversu ela ennamuhima Yehova weera onnaakosoopa mwa nsivelo ale erinono maxupo a mmuupuweloni. Etthu heeni nintthuneyaahu opaka weera nttottele mureerelo okosoopa wa Yehova? Moone ntakihero nna. Meediku pooti omukhavihera mutthu ovola nikhwatta nawe. Weera attottele mureerelo, mutthu owo avulanle onnatthuneya otthara nnene sene miruku sa meediku owo. Mwa yoosoma ene yeela, nnoorowa woona etthu Yehova onaaleelaawe moorweela mwa Biblya ale erino maxupo a mmuupuweloni, nave nnoorowa woona moota woovarihela muteko miruku sawe sa nsivelo.
YEHOVA ONNANIVAHA MWIITTI
3. Mwaha wa heeni atthu akina enuupuwelaaya weera khiyaanoono mwiitti?
3 Ninkhala elapo ehinooniheraniwa nsivelo, nto mooriipiha murima, atthu antxipale ennakhalano muupuwelo wooweera khiyaanoono mwiitti. Murokora mmoha oneeriwa Helena ohimme ha: “Kinnunwe emusi yoohoonihera nsivelo. Apapa aka yaari oowali ni mahiku ootheene yannanleela weera khaninvareleya muteko.” Pooti weeraka, ntoko Helen, nyuwo moothokororiwa moohireerela, wuulumeliwa masu oohireerela naari moopakeliwa etthu eweerinheni nyuwo wiisoona ohisiveleya. Wakhala weera ti hiiho, pooti wooxupani ororomela weera ookhala mutthu anoopwatthani nyuwo.
4. Moovarihana ni Nsalmu 34:19 [34:18, NM], Yehova onanroromeliha eheeni?
4 Nnaamweera atthu akina yoothokoronreeneni nyuwo moohireerela, muroromeleke weera Yehova annoosivelani ni annoovahani mwiitti. Owo “ori vakhiviru ni yale a murima [woovoreyeya].” (Musome Nsalmu 34:19 [34:18, Tradução do Novo Mundo].) Wakhala weera nyuwo munniisoona ‘ohivareleya muteko’, muupuweleke weera Yehova ohoona itthu sooreera vamurimani vanyu nave ohoopurulelani wa yoowo. (Yoh. 6:44) Owo ikwaha sootheene ori oolikaneene weera ookhavihereni, mwaha wooweera nyuwo tootthuneya wa yoowo.
5. Etthu heeni ninxutteraahu ni moota Yesu aakosompaawe atthu ale yahaapwatthiwa ni atthu akina?
5 Hiyo pooti oxuttera miyuupuwelo sa Yehova nthokororaka ntakihero na Yesu. Yesu areene elapo ya vathi, aahaasuwela atthu yahaapwatthiwa ni atthu akina, ni aahaakosoopa mooreera murima. (Math. 9:9-12) Vaavo muthiyana mmoha aatthuna olamihiwa eretta awe aatanvaawe ikuwo sa Yesu weera alame, Yesu aahimmaaliha ni aamuttottopela mwaha wa nroromelo nawe. (Mar. 5:25-34) Yesu onnoonihera moomalela mikhalelo sa Tiithi awe. (Yoh. 14:9) Mwa yeeyo, nyuwo pooti ororomelaka weera Yehova onnoopwatthani ni onnaweha mikhalelo sanyu sooreera, ohela mpuwa nroromelo nanyu ni nsivelo mummooniheraanyu.
6. Moota heeni mutthu onrowaawe owina miyuupuwelo soohiivaha mwiitti?
6 Etthu heeni muntthuneyaanyu opaka wakhala weera munnavirelela wuupuwela weera khamunvareleya muteko? Musomeke iversu sa mBiblyani seiyo sinoonihera weera nyuwo tootthuneya wa Yehova ni mphimeleleke eyo.b (Nsal. 94:19) Wakhala weera nyuwo khanwenre okwanihera etthu naari khamunwera opaka itthu ntoko atthu akina, muhiivaheke mathowa. Yehova khanoovekelani opaka itthu muhinweraanyu opaka. (Nsal. 103:13, 14) Wakhala weera khalayi nyuwo mwaahithokororiwa moohixariya, muhiivaheke mathowa mwaha wa mutthu oopakenleni etthu eyo. Nyuwo khamwaaphwanela othokororiwa moota ene yoowo! Musuweleke weera Yehova onnaathoriha atthu ale empaka itthu soonanara ohiya ale empakeliwa. (1 Ped. 3:12) Sandra yoowo aathokororinwe moohixariya areene mwaana, ohimme ha, “Miyo kinnanvekela Yehova weera akikhavihere wiisoona ntoko owo onkoonelaawe.”
7. Moota heeni itthu nikumannaahuno khalayi mweekumini sinrowaaya onikhavihera mmutekoni mwa Yehova?
7 Musuweleke weera Yehova pooti woovarihelani muteko weera mwaakhavihere atthu akina. Owo ohoovahani eparakha yoovara muteko awe woolaleera. (1 Akor. 3:9) Sookumanano sa mweekumini mwanyu, pooti weera simmookhaviherani woonelela moota atthu akina eniisoonelaaya. Nyuwo pooti opaka etthu weera mwaakhavihere. Helen ohimmwale woopatxerani, aakhaviheriwa ni vano ori oolikaneene weera aakhavihere atthu akina. Owo ohimme ha: “Yehova oomukhaliha mutthu ‘oohivareleya’ muteko akhala mutthu oosiveleya ni oovareleya muteko.” Helen onnahakalala avaraka ntoko pioneira anthiti.
YEHOVA ONTTHUNA WEERA NAAKHULELEKE NLEVELELO NAWE
8. Yesaya 1:18 onanroromeliha eheeni?
8 Arumeyi akina a Yehova ennaxupeya mwaha wa soottheka epankaaya khalayi, ehinaaye naari noomala opatisiwa. Mene ti wooreera wuupuwela weera Yehova oonivaha yoowoopola mwaha wooweera owo onnansivela hiyo. Moohihovela, owo ontthuna weera hiyo naakhuleleke nlevelelo nawe. Yehova onnanroromeliha weera vaavo ‘ninrehereraahu itthu’c nuuwo, owo khanuupuwelela veeli soottheka sahu. (Mmusome Yesaya 1:18.) Tthiri nna nsivelo nimmweeriha Yehova ohuupuwelela soottheka sahu sa khalayi! Mene emaara emoharu, owo khanttuwala itthu sooreera nimpakenlaahu. — Nsal. 103:9, 12; Aheb. 6:10.
9. Mwaha wa heeni nintthuneyaahu wiilipihera weera niwehexexeke itthu sa viinaano ni sa muhoolo ohiya sa khalayi?
9 Wakhala weera nyuwo munnaxupeya mwaha wa soottheka mpankaanyu khalayi, mpake ele munweraanyu weera nwehexexeke mukhalelo anyu wa viinaano, ni wa muhoolo ohiya owehexexa mukhalelo anyu wa khalayi. Moone ntakihero na murummwa Paulo. Owo aattharuwa mwaha woowaatthara-tthara akristu, mene aasuwela weera Yehova oomulevelela. (1 Tim. 1:12-15) Neereke owo aavirelela wuupuwelela soottheka aapankaawe khalayi? Owo khaapanke eyo, hiihaale ntoko ahuupuwelelaawe itthu aapankaawe areene ettiini ya aYuda. (Afil. 3:4-8, 13-15) Opwaha mwa yeeyo, Paulo annawehexexa muhoolo ni muteko awe woolaleera. Ntoko Paulo, nyuwo khamunwera otxentxa itthu mpankaanyu khalayi. Mene munoowera onvuwiha Yehova ni makhalelo anyu a viinaano, ni nwehexexaka itthu sooreera olaihenraawe sa muhoolo.
10. Etthu heeni nintthuneyaahu opaka wakhala weera itthu naapankaahu khalayi saahaanyoonyiha atthu akina?
10 Nyuwo pooti oxupeya mwaha wa itthu mwaapankaanyu khalayi seiyo saanyoonyinhe atthu akina. Eheeni muntthuneyaanyu opaka? Mpake ele munweraanyu weera moone itthu iyo mwaapankaanyu, muhelaka mpuwa ovekela nlevelelo. (2 Akor. 7:11) Munvekeleke Yehova weera aakhavihere atthu awo mwaanyoonyinhaanyu. Owo pooti wookhaviherani nyuwo ni ale mwaanyoonyinhaanyu ovilela ni otthikela okhalano murettele.
11. Etthu heeni ninxutteraahu ni ntakihero na mprofeti Yona? (Nwehe efootu ya .)
11 Muxuttereke ni soottheka sanyu sa khalayi, nave mmuhiyeke Yehova oovarihelekeni muteko mwa mukhalelo owo ontthunaawe. Moone ntakihero na mprofeti Yona. Ohiya orowa oNinive ntoko Muluku aamurummaawe, Yona aatthawela nipuro nikina. Yehova aamuttaruxa Yona ni owo aaxuttera etthu ni etthu ele aapankaawe. (Yona 1:1-4, 15-17; 2:7-10) Yehova khaamunyanyanle Yona. Muluku aahinvaha-tho veeli eparakha yoorowa oNinive, ni ekwaha ela, Yona aahiiwelela. Owo khaahiñye weera oxupeya wawe mwaha wa soottheka sa khalayi omootxeelihe waakhulela yoothanleliwa awe ni Yehova. — Yona 3:1-3.
Mprofeti Yona avuluwakaru mmirimani mwa ehopa etokweene, Yehova aamuruma-tho veeli weera arowe oNinive weera alaleye mitthenka sawe (Nwehe eparagrafu 11)
YEHOVA ONNANLIPIHA MOORWEELA MWA MUNEPA AWE WOOTTEELA
12. Moota heeni Yehova onnivahaawe murettele vaavo ninvirihaahu maxupo? (Afilipi 4:6, 7)
12 Yehova onnavarihela muteko munepa awe wootteela weera animaalihe vaavo ninvirihaahu maxupo. Moone yooweereya ya Ron ni Carol. Mooriipiha murima, mwanaya aahiisiiva. Awo ehimme ha: “Naaviriha maxupo khalayi, menento ala yaari ooxupa vantxipale. Khinaawera okona ohiyu ni nannapaka mavekelo, ni mweekhaikhai naaphwanya murettele yoowo onhimmwa va Afilipi 4:6, 7.” (Mmusome.) Wakhala weera nyuwo munnaviriha maxupo ooriipiha murima, nyuwo pooti omuhulela murima anyu Yehova moorweela mwa nivekelo imaara sootheene muntthunaanyu ni etempu eri poothe. (Nsal. 86:3; 88:2 [88:1, NM]) Munvekeleke voohihiyerereya Yehova munepa awe wootteela. Owo onoorowa waakhula mavekelo anyu. — Luka 11:9-13.
13. Moota heeni munepa wootteela wa Yehova onrowaaya onikhavihera ovirelela omukokhorela Yehova moororomeleya? (Aefeso 3:16)
13 Neereke yookhala yooweerera yooxupa yookhulumunleni? Munepa wootteela pooti woovahani ikuru weera nvirelele onvarela Yehova moororomeleya. (Mmusome Aefeso 3:16.) Moone yooweereya emoha ya murokora oneeriwa Flora. Owo ni aiyawe yaavara vamoha ntoko mamisiyonaariyu vaavo aiyawe yaamuraruwenlaaya ni awo yaamwalana. Owo ohimme ha: “Oxupeya kenraaka mwaha wa aiyaka okiraruwela, wannakikhulumula. Kaahinvekela Yehova munepa awe wootteela weera kiwere ovilela. Yehova aakivaha etthu miyo kaahaawelaaka weera kivilele etthu ele woopatxerani waakhala ntoko ti woohiwereya.” Flora ohoona weera Yehova oomukhavihera okhala oororomeleya ni weera onoorowa omukhavihera mwa sooweereriwa sawe sootheene. Owo onnaatxeerera eeraka: “Masu eri va Nsalmu 119:32, ennavareleya muteko wa miyo: ‘Kinootthimakela ephiro ya malamulo anyu niwoko mohunnuwiha murim’aka.’”
14. Moota heeni ninkelaahu weeriha munepa wa Muluku okhala ni hiyo?
14 Moota heeni munrowaanyu opakaka itthu moovarihana ni yoovekela anyu ya munepa wootteela? Mpakeke itthu sinrowa weeriha munepa wa Muluku okhala ni nyuwo. Eyo enhela mpuwa woonela mithukumano ni ovara muteko woolaleera. Mphimeleleke miyuupuwelo sa Yehova mmusomaka Biblya mahiku ootheene. (Afil. 4:8, 9) Vaavo munsomaanyu, moone etthu munxutteraanyu ni matakihero a mBiblyani a atthu yaavirinhe maxupo, ni mphimelele moota Yehova aakhavihenraawe ovilela. Sandra nimuhimmaahu muttuli, aaviriha maxupo mantxipale. Owo ohimme ha: “Yooweereya ya Yosefe yookivara murima. Owo khaahiñye maxupo ni ohixariya aavirihaawe etteettheihaka onthamwene awe ni Yehova.” — Eph. 39:21-23.
YEHOVA ONNANIMAALIHA MOORWEELA MWA ASINNA
15. Ntoko ehimmwalaaya va Akolosi 4:11, nimaaliho heeni na asinna ninrowaahu waakhela? (Nwehe efootu.)
15 Emaara hiyo ninvirihaahu maxupo, asinna pooti okhala ‘nimaaliho ntokweene.’ (Akol. 4:11) Asinna ni asirokora, etthu emoha Yehova onooniheraawe weera onnansivela. Asinna pooti onimaaliha eniiwelelaka moomaaleleya, naari onikhavihera enxekuraka. Awo pooti onsomela eversu ya mBiblyani naari opaka nivekelo vamoha ni hiyo.d (Arom. 15:4) Ikwaha ikina, munna pooti onuupuxera moota Yehova onuupuwelaawe ni onikhavihera okhalano moonelo wa eriyari-neeriyari. Nave-tho asinna pooti onikhavihera mwa mukhalelo wa weerutthuni, mwa ntakihero, enivahaka yootxa emaara ya maxupo.
Asinthamwene oororomeleya ni oolipa moomunepani, pooti onimaaliha ni onikhavihera (Nwehe eparagrafu 15)
16. Etthu heeni nintthuneyaahu opaka weera naakhele nikhavihero na atthu akina?
16 Weera naakhele nikhavihero na atthu akina, apaale onootthuneyaka hiyo waavekela atthu awo. Asinna ni asirokora ennansivela nave ennatthuna onikhavihera. (Mir. 17:17) Mene pooti weeraka awo khensuwela moota nniisoonelaahu naari etthu ninvirihaahu. (Mir. 14:10) Wakhala weera nyuwo mookhalano maxupo a mmuupuweloni, mukhaleke oolikaneene waaleela asinthamwene anyu oolipa moomunepani miyuupuwelo iyo. Mwaaleeleke etthu yaarowa wookhaviherani. Nyuwo pooti wuuluma ni mutokweene mmoha a mmulokoni naari eeli yaawo munoonaanyu okhweya wuulumano. Asirokora akina ahoona okhala wooreera wuuluma ni murokora mukina oolipa moomunepani.
17. Maxupo heeni yaarowa onootxeeliha waakhela nikhavihero ninhaawelaahu, ni moota heeni ninrowaahu owina?
17 Musepeke okhala meekhaanyu. Mwaha wa maxupo oovoreya nvirinhaanyu, nyuwo pooti ohitthuna okhala vamoha ni atthu akina. Emaara ekina, asinna ni asirokora pooti ohiwiiwexexani naari pooti wuuluma masu oohireerela. (Yak. 3:2) Muhihiye itthu iyo siwootxeelihakani waakhela nikhavihero munhaawelaanyu. Mutokweene mmoha a mmulokoni oneeriwa Gavin yoowo onviriha maxupo a mmuupuweloni, ohimme ha: “Ikwaha sintxipale nkintthuna okhala ni asinthamwene aka.” Menento Gavin, onniilipihera owina miyuupuwelo iyo, ni onnattottela mureerelo okhala vamoha ni asinna. Murokora mmoha oneeriwa Amy ohimme ha: “Mwaha wa maxupo kivirinhaaka khalayi, onnakixupa waaroromela atthu akina. Menento kinnaxuttera waaroromela asinna ni asirokora ntoko Yehova ompakaawe. Miyo koosuwela weera eyo ennamuhakalaliha Yehova ni ennakihakalaliha miyo-tho.”
MPHWANYE NIMAALIHO NI SOOLAIHERA SA YEHOVA SA MUHOOLO
18. Niweherereke eheeni muhoolo, ni viinaano nipakeke eheeni?
18 Hiyo pooti oweha ohoolo ni nroromelo, nroromelaka weera moohipisa Yehova onoorowa omaliha ovoreya wootheene wa weerutthuni ni wa mmuupuweloni. (Apok. 21:3, 4) Emaara ene yeeyo, itthu sootheene sooxupa ninvirihaahu, ‘khasinrowa wuupuweleliwa.’ (Yes. 65:17) Ntoko nonnaahu, olelo va, Yehova “onnatthuka makhwatta [ahu].” Muttottele mureerelo itthu sootheene sa nsivelo Yehova onoovahaaweni weera oomaaliheni. Muroromeleke weera owo ‘annoopwatthani.’ — 1 Ped. 5:7.
ETXIPO 7 Yehova ti Ikuru Sahu
a Masina makina aatxentxiwa.
b Nwehe ekwaadru “Yehova onnoovahani mwiitti nyuwo.”
c Weera ‘nreherere itthu’ ni Yehova, nintthuneya woonihera weera noottharuwa ninvekelaka weera anlevelele mwaha wa soottheka nipankaahu ni otxentxa mikhalelo sahu. Wakhala weera noopaka yoottheka etokweene, nintthuneya waasa nikhavihero na asitokweene a mmulokoni. — Yak. 5:14, 15.