MWAHA ONTHOKORORIWA 42
ETXIPO 103 Axitokweene: Yoovaha ya Yehova
Moonihere oxukurela wa “atthu” enhoolela muloko
“Awelaka wirimu . . . , àhàvaha atthu sovaha.” — AEF. 4:8.
ELE NINKELA AHU OXUTTERA
Ninkela woona moota arumeyi ookhavihera, asitokweene a mmulokoni ni asitokweene a esirkwiitu ennikhaviheraaya, ni moota ninrowaahu woonihera oxukurela wahu itthu sootheene alopwana ala oororomeleya empakaaya.
1. Asinna heeni eri soovaha Yesu onivanhaawe?
KHAAVO mutthu ori oovaha ompwaha Yesu. Emaara aaraawe elapo ya vathi, aavarihela mootaphuwa owera wawe woopaka miiriira weera aakhavihere atthu akina. (Luka 9:12-17) Owo oovaha etthu yootepa otthuneya wa atthu ootheene, oovaha ekumi awe wa hiyo. (Yoh. 15:13) Avinyererihiwakaru, Yesu aavirelela okhala oovaha. Ntoko owo olaihenraawe, aahinvekela Yehova weera anivahe munepa awe wootteela weera onxuttiheke ni onimaaliheke. (Yoh. 14:16, 17, enoota; 16:13) Ni moorweela mwa mithukumano sa mmulokoni, Yesu onnavirelela onikhavihera weera naapakeke atthareli a elapo yootheene. — Math. 28:18-20.
2. “Atthu” heeni enhoolela muloko enhimmwa va Aefeso 4:7, 8?
2 Moone etthu ekina Yesu onivanhaawe. Murummwa Paulo ohimme weera, Yesu arowakaru wiirimu, ‘oonivaha atthu.’ (Mmusome Aefeso 4:7, 8.) Paulo ohiiwanyeiha weera Yesu oonivaha atthu awo weera ekhavihereke muloko mwa mikhalelo soovirikana. (Aef. 1:22, 23; 4:11-13) Olelo, “atthu” awo enaahela mpuwa arumeyi ookhavihera, asitokweene a mmulokoni ni asitokweene a esirkwiitu.a Ekhaikhai weera asinna ala toohimalela, nto ikwaha ikina ennattheka. (Yak. 3:2) Mene Pwiya ahu Yesu Kristu onnaavarihela muteko weera enikhavihere, awo soovaha wa hiyo.
3. Nvahe ntakihero na moota ootheene hiyo ninrowaahu waakhavihera “atthu” enhoolela muloko.
3 Yesu ohaathanla “atthu” ala weera elipiheke muloko. (Aef. 4:12) Mene ootheene hiyo nnoowera waakhavihera okwanihera miritti saya. Mwa ntakihero, akina a hiyo envara muteko wooteka Empa ya Omwene. Akina ennaakhavihera ale envara muteko ni ennaawiihera yootxa ni itthu enhaawelaaya. Naari ennaakhavihera mwa mikhalelo mikina. Mwa mukhalelo mmoharu, hiyo nnoowera okhavihera wiilipihera wa arumeyi ookhavihera, asitokweene a mmulokoni ni asitokweene a esirkwiitu moorweela mwa ele nnuulumaahu ni nimpakaahu. Ni moota ninrowaahu woonihera waaxukurela wahu ni omuxukurela wahu Yesu onivanhe “atthu” ala nnaasivelaahu.
ARUMEYI OOKHAVIHERA YAAWO ENVARA ‘MUTEKO’
4. ‘Miteko’ heeni arumeyi ookhavihera a eseekulu yoopatxera yaavaraaya?
4 Eseekulu yoopatxera, asinna akina yaathanliwa ntoko arumeyi ookhavihera. (1 Tim. 3:8) Onooneya weera yaari asinna ene yaawo yaavara ‘miteko’ seiyo Paulo ohimmaawe. (1 Akor. 12:28) Arumeyi ookhavihera yannakosoopa nyaha ikina weera asitokweene a mmulokoni ewehexexeke oxuttiha waya ni waaxekura asinna. Mwa ntakihero, Pooti weeraka arumeyi ookhavihera yannakhavihera opakiwa ikoopiya sa soolepa naari othuma itthu saahaaweleya weera sipakiwe ikoopiya.
5. Miteko heeni arumeyi ookhavihera envaraaya olelo va?
5 Moone miteko seiyo arumeyi ookhavihera empakaaya mmulokoni mwaya. (1 Ped. 4:10) Awo pooti othanliwa weera ekosoopeke sooveleela sa mmulokoni naari muttetthe onlaleeriwa, waakhelela irevista ni waakawela anamalaleera, oreherera ikaruma sa itxipo (audio e vídeo), okhala anamaweha-weha naari okhavihera oreherera Empa ya Omwene. Miteko sootheene iya, ti sootthuneya weera muloko okhaleke nnene. (1 Akor. 14:40) Opwaha mwa yeeyo, arumeyi ookhavihera akina, ennapaka iparte sa muthukumano wa Ekumi ni mutekwaahu wa makristu ni ennapaka nyaha. Nave-tho murumeyi ookhavihera, pooti othanliwa weera amukhavihereke munna onhoolela ekhurupu. Ikwaha ikina, arumeyi ookhavihera ennakhala vamoha ni asitokweene a mmulokoni vaavo enaaxekuraaya asinna.
6. Itthu heeni sinneeriha waaxukurela arumeyi ookhavihera?
6 Moota heeni muloko onttottelaaya mureerelo ni muteko wa arumeyi ookhavihera? Beberly,b murokora onkhala oBolívia ohimme ha, “Mwaha wa arumeyi ookhavihera, okisivela mithukumano. Mwaha wa muteko aya, kinneepa, okomentari, wiiwa nyaha ni oxuttera ni iviidiyu ni ifootu. Awo ennanikosoopa ni ale enoonela mithukumano envarihelaka telefooni (vídeoconferência). Samala mithukumano, awo ennakhavihera muteko wompaka limpeza, oweha sooveleela sa mmulokoni ni ennanikhavihera waakhela irevista ninhaawelaahu. Kinnaxukurela mwaha wa muteko aya!” Leslie onkhala oColômbia, yoowo aiyawe eri mutokweene a mmulokoni, ohimme ha: “Aiyaka enkhaviheriwa ni arumeyi ookhavihera weera ekosoopeke miritti saya. Yahaakhaviheriwa ni arumeyi ookhavihera, awo yaamwaatteliwa vantxipale, mwa yeeyo, kinnaxukurela mwaha wa okhavihera waya.” Moohihovela, nyuwo-tho munoonela hiiho. — 1 Tim. 3:13.
7. Moota heeni ninrowaahu woonihera waaxukurela wahu arumeyi ookhavihera? (Nwehe efootu.)
7 Nnaamweera hiyo nooniheraka oxukurela mwaha wa arumeyi ookhavihera, Biblya onnanooperera eeraka: “Ni mukhale atthu òthamala.” (Akol. 3:15) Cristóvão mutokweene mmoha a mmulokoni onkhala oFinlândia, onnoonihera oxukurela wawe eeraka, “Kinnalepa ekaarta naari emensagem kimulepelaka murumeyi ookhavihera, yeeyo kinlepaakavo yoolepa naari kinhimaaka mwa mukhalelo woowiiwanyeya moota owo okilipinhaawe ni moota kinxukurelaaka muteko onvaraawe.” Pascal ni Jael, yaawo enkhala oNova Caledônia, ennaavekelela arumeyi ookhavihera. Pascal ohimme ha, “Ikwaha sintxipale hiyo ninnapaka nivekelo naavekelelaka asinna ala ethanlinwe mmulokoni mwahu.” Yehova onniiwa mavekelo ntoko awo, ni muloko wootheene onnattottela mureerelo. — 2 Akor. 1:11.
ASITOKWEENE A MMULOKONI YAAWO “ANAVARA MUTEKO VARIYARI VANYU”
8. Mwaha wa heeni Paulo aalempaawe weera asitokweene a eseekulu yoopatxera ‘yannavara moowiilipihera’? (1 Atesalonika 5:12, 13)
8 Asitokweene a mmulokoni a eseekulu yoopatxera, yanniilipihera vantxipale weera ekhavihere muloko. (Mmusome 1 Atesalonika 5:12, 13; 1 Tim. 5:17) Awo ‘yannahoolela’ muloko, ehoolelaka mithukumano ni epakaka soothanla ntoko ekhurupu ya asitokweene a mmulokoni. Awo ‘yannaalaka’ asinna ni asirokora, yaavahaka miruku soowiiwanyeya mene sa nsivelo weera ekosoope muloko. (1 Ates. 2:11, 12; 2 Tim. 4:2) Ekhaikhai weera alopwana ala yanniilipihera vantxipale weera etxihe imusi saya ni evirelele olipa moomunepani. — 1 Tim. 3:2, 4; Tito 1:6-9.
9. Miritti heeni asitokweene a mmulokoni enkosoopaaya olelo va?
9 Olelo va, asitokweene a mmulokoni toowaatteliwa vantxipale. Awo ennavara muteko woolaleera. (2 Tim. 4:5) Awo ennahoolela moowiilipihera muteko woolaleera, ennareherera muttetthe woolaleera nave ennanxuttiha weera nlaleyeke ni nxuttiheke mooreerela. Nave-tho awo ennavara ntoko aphuki oomoriwa ikharari ni oohikhala nthalu. Emaara mukristu ompakaawe yoottheka etokweene, asitokweene a mmulokoni ennamukhavihera otthikihera onthamwene awe ni Yehova. Emaara emoharu, awo enniilipihera weera ereherere muloko. (1 Akor. 5:12, 13; Agal. 6:1) Woopatxerani, asitokweene a mmulokoni ensuweliwa ntoko akukhuli. (1 Ped. 5:1-3) Awo ennapaka nyaha sooreera seiyo sinkhuma mBiblyani, enniilipihera weera yaasuwele asinna ootheene a mmulokoni nave ennaaxekura asinna. Asitokweene a mmulokoni akina, ennakhavihera muteko wooteka, oreherera Empa ya Omwene, oreherera mithukumano, nave ennaakhavihera asinna enkosoopa nyaha sa ospitaale (Comissão de Ligação com Hospitais) ni ikhurupu sa asinna enaaxekura aretta nihihimaka miritti mikina eraayano. Asitokweene a mmulokoni ennavara vantxipale weera enikhavihere!
10. Itthu heeni sinneeriha waaxukurela asitokweene a mmulokoni?
10 Yehova aahima weera asitokweene a mmulokoni yaamurowa onikosoopa nnene ni weera ‘nihoove etthu naari nihoopopihiwe.’ (Yer. 23:4) Johanna murokora mmoha a oFinlândia, ohoonelela weera masu ala teekhaikhai vaavo ameyawe yaavoreiwaaya. Owo ohimme ha: “Nnaamweera waakixupa waaleela atthu akina miyuupuwelo saka, mutokweene mmoha a mmulokoni kahaamusuwelaaka nnene, aakipixera murima, aavekela vamoha ni miyo ni aakiroromeliha nsivelo na Yehova. Nkinuupuwela masu uulummaawe, mene kinnuupuwela moota kiisonnaaka okhala oovareleleya. Kinnaroromela weera Yehova aamuruma mutokweene a mmulokoni ole weera akikhavihere etempu yooreerela.” Moota heeni asitokweene a muloko anyu yookhavihenraayani?
11. Moota heeni ninrowaahu woonihera waaxukurela wahu asitokweene a mmulokoni? (Nwehe efootu.)
11 Yehova ontthuna weera naaxukureleke mwa nsivelo asitokweene a mmulokoni ‘mwaha wa muteko envaraaya.’ (1 Ates. 5:12, 13) Henrietta yoowo onkhala oFinlândia, ohimme ha: “Asitokweene a mmulokoni ennaakhavihera atthu akina moohakalala, mene eyo khentthuna ohima weera awo aakhalano etempu ni ikuru sintxipale, naari weera awo khenviriha maxupo a mweekumini. Ikwaha ikina miyo kinweerela ha paahi: ‘Moosuwela? Nyuwo mutokweene a mmulokoni ooreera murima. Kintthuna weera musuweleke eyo.’” Murokora mmoha a oTürkiyec oneeriwa Sera, ohimme ha: “Asitokweene a mmulokoni ennatthuneya ‘olipihiwa’ weera evirelele ovara muteko aya. Nto hiyo pooti waalepela ekaarta, waawopa weera natxe vamoha naari okhuma vamoha naawo mmutekoni woolaleera.” Neereke ookhala mutokweene mmoha a mmulokoni yoowo wiilipihera wawe munxukurelaanyu? Mwaasaasereke mikhalelo soowoonihera oxukurela iwo. — 1 Akor. 16:18.
Nyuwo pooti “waalipiha” asinna ethanlinwe weera ehooleleke muloko weera evirelele ni muteko aya (Nwehe eparagrafu 7, 11, 15)
ASITOKWEENE A ESIRKWIITU YAAWO ENLIPIHA
12. Miloko sa eseekulu yoopatxera saapanke mareherero heeni? (1 Atesalonika 2:7, 8)
12 Yesu Kristu oovaha muloko “atthu” envara mwa mukhalelo mukina. Owo aahaavarihela asitokweene a mmulokoni a oYerusalemu weera emurumihe Paulo, Barnaba ni atthu akina ntoko asitokweene a esirkwiitu. (Mit. 11:22) Mwaha wa heeni? Weera yapake etthu arumeyi ookhavihera ni asitokweene a mmulokoni ethanlelinwaaya, olipiha miloko. (Mit. 15:40, 41) Asilopwana ala yaahiya mapuro yaakhalaaya nnene ni yaahela ekumi aya veerisani weera yaaxuttihe ni waalipiha akina. — Mmusome 1 Atesalonika 2:7, 8.
13. Miritti heeni asitokweene a esirkwiitu enkosoopaaya?
13 Asitokweene a esirkwiitu enneetteetta vantxipale. Akina enneetta ikiloomeetru sintxipale ni miloko enxekuraaya. Yeele eri esemana, mutokweene a esirkwiitu onnapaka nyaha sintxipale, onnaaxekura asinna, nave onnahoolela muthukumano wa mapioneiru, muthukumano wa asitokweene a mmulokoni, nave-tho mithukumano sa muteko woolaleera. Onnareherera nyaha ni-tho onnaareherera assembleya ni akongresu. Owo onnaxuttiha ixikola sa mapioneiru, onnareherera muthukumano woothanleya ni mapioneiru a osirkwiitu, nave onnatthuneya okosoopa nyaha ikina seiyo ikwaha ikina ontthuneya opakiwa moowaakuveya anthanleliwaawe ni efiliyaale.
14. Itthu heeni sinneeriha waaxukurela asitokweene a esirkwiitu?
14 Moota heeni miloko sinttottelaaya mureerelo oxekura wa asitokweene a esirkwiitu? Ahimaka woohima sa oxekuriwa ni asitokweene a esirkwiitu, munna mmoha a oTürkiye ohimme ha: “Imaara sootheene ninxekuriwaahu, ninnaatxeerereya ntthuno naka noowaakhavihera asinna ni asirokora. Kohaasuwela asitokweene a esirkwiitu antxipale, menento khaavo a yaawo iisoonihera weera toowaatteliwa mpaka ohiwera wuuluma ni miyo.” Johanna ohimmwale woopatxerani, aakhuma vamoha ni mutokweene mmoha a esirkwiitu mmutekoni moolaleera, mene khayaaphwanya asineene vaate. Owo ohimme ha, “Nnaamweera oreene hiiho, nkinttuwala nihiku nne. Asirokoraka eeli yaathaama ni yaakinkhela vantxipale. Mene mutokweene a esirkwiitu aakilipiha mwa nsivelo ni aakikhavihera woona weera mmutekoni mwa Yehova, orakamelana ti wa etempu vakhaani, elapo enyowani nnookhalano eparakha yookhala vamoha.” Asitokweene a esirkwiitu ennoonihera mukhalelo mmoha wa asinna enaavarelaaya. — Mit. 20:37–21:1.
15. (a) Moovarihana ni 3 Yohani 5-8, moota heeni ninrowaahu woonihera waaxukurela wahu asitokweene a esirkwiitu? (Nwehe efootu.) (b) Mwaha wa heeni nintthuneyaahu waapwatthaka asaaraya atthu ale enhoolela muloko, ni moota heeni ninrowaahu opaka eyo? (Nwehe ekwaadru “Nwuupuweleke asaaraya.”)
15 Murummwa Yohani aamooperera Gaio owaakhela asinna ooweetteetta, ni “wàrehererelaka yawo mukwaha aya enamuna enamusiveliha Muluku.” (Mmusome 3 Yohani 5-8.) Mukhalelo mmoha woopaka eyo, ori waawopa asitokweene a esirkwiitu weera etxe vamoha ni hiyo. Mukhalelo mukina, ori okhavihera mareherero empakaaya wa muteko woolaleera mpuwa mwa oxekura waya. Leslie ohimmwale woopatxerani, onnoonihera oxukurela wawe mwa mukhalelo mukina. Owo ohimme ha, “Miyo kinnanvekela Yehova weera akosoope soohaawela saya. Miyo ni aiyaka ninnaalepela ekaarta naaleelaka moota onxekura waya onnikhaviheraaya.” Musuweleke-tho weera asitokweene a esirkwiitu ennaviriha maxupo ntoko hiyo. Ikwaha ikina awo ennahaawa mwaha wa iretta, maxupo naari okhulumuwa. Pooti weeraka masu anyu ooreera naari yoovaha, pooti okhala waakhuliwa wa nivekelo na mutokweene anyu a esirkwiitu aapankaawe avekaka nikhavihero! — Mir. 12:25.
NINNAAHAAWELA ‘ATTHU’ ENHOOLELA MULOKO
16. Moovarihana ni Miruku 3:27, makoho heeni asinna ekhanlaaya oowiipakela?
16 Elapo yootheene ninnaahaawela asinna naari neere, ‘atthu eri soovaha’ weera ehooleleke muloko. Wakhala weera nyuwo munna oopatisiwa, munoowera ‘okhavihera’? (Musome Miruku 3:27.) Nyuwo muri oolikaneene ovara ntoko murumeyi ookhavihera? Nyuwo munnatthuna okosoopa soohaawela sa asinna nvaraka ntoko mutokweene a mmulokoni?d Nyuwo munoowera oreherera mikhalelo sanyu weera murowele Exikola ya anamalaleera a Omwene? Exikola eyo enimookhaviherani wiireherera weera nvareliwe vantxipale ni Yesu. Wakhala weera nyuwo munniisoona ohiphwanelela, munvekeleke Yehova. Munvekeleke munepa awe wootteela weera wookhavihereni okhumela nnene mwa soothanleliwa sootheene munvahiwaanyu. — Luka 11:13; Mit. 20:28.
17. Etthu heeni ‘asinna’ enhoolela muloko enooniheraaya woohima sa Mwene ahu, Yesu Kristu?
17 Asinna Yesu aathanliyaawe ntoko “atthu” enhoolela muloko, yoowoonihera weera owo onnaneettiha mahiku ala oomalihera. (Math. 28:20) Neereke nyuwo khamunxukurela mwaha wookhalano Mwene yoowo ori ansivelo, oovaha, onaapwattha atthu ni yoowo onivanhe asinna oolikaneene weera ekosoopeke soohaawela sahu? Tivawonto, mwaasaasereke iparakha soowoonihera oxukurela wanyu mwaha wa alopwana ala oovara muteko. Nave muhittuwaleke omuxukurela Yehova yoowo ori naapwiipwi mutokweene a “eparakha eri yothene ni yovaha eri yothene yomalela.” — Yak. 1:17.
ETXIPO 99 Nookhalana Anna Imilyau Sinceene
a Asitokweene a mmulokoni envara ntoko Mukuttula Woolamulela, anamakhavihera a Mukuttula Woolamulela, asitokweene a ekomisau ni ale enkosoopa soothanleliwa ikina, awo-tho “atthu” enkhavihera muloko.
b Masina makina aatxentxiwa.
c Khalayi yeeriwa oTurquia.
d Weera mphwanye soohimmwa ikina woohima sa moota woowiireherera weera nvareke ntoko murumeyi ookhavihera naari mutokweene a mmulokoni, nwehe nyaha sineera “Asinna — Neereke nyuwo muri oolikaneene ovara ntoko murumeyi ookhavihera?” ni “Asinna — Neereke nyuwo muri oolikaneene ovara ntoko mutokweene a mmulokoni?” va Nwehereri a Novembro a 2024.