Mutakiheke moota Yehova ni Yesu enuupuwelaaya

1-2. Eheeni enhela mpuwa omusivela Yehova, ni Yesu oonihenre moota heeni eyo?

“OMUSIVELE Yehova Muluku aa, ni murima aa wootheene, ni ekumi aa yootheene, ikuru saa sootheene ni muupuwelo aa wootheene.” (Luka 10:27) Yesu aasuwela nlamulo nno okhala nootepa otthuneya mu nlamulo na Mose. Moone weera omusivela Yehova onhela mpuwa murima ahu, yoowo onoonihera sootthuna sahu, miyuupuwelo sahu ni moota nniisoonelaahu. Nave-tho omusivela wahu onhela mpuwa ekumi ahu yootheene ni ikuru sahu, weiwo onhela mpuwa wiilipihera wahu. Mene-tho, omusivela Yehova onhela mpuwa muupuwelo ahu, yoowo onoonihera moota nnuupuwelaahu woohima sa nyaha. Pooti weeraka hiyo khaninrowa wiiwexexa moomalela moota Yehova onuupuwelaawe, menento nnoowera wiiwexexa nnene sene moota Yehova onuupuwelaawe nxutteraka woohima sa ‘muupuwelo wa Kristu’ mwaha wooweera Yesu onnoonihera moomalela mikhalelo sa Atiithi awe. — 1 Akor. 2:16 ni enoota ya yoosoma “vanonto hiyo nòkhalano [muupuwelo wa] Kristu.”

² Yesu annamusivela Yehova ni muupuwelo awe wootheene. Owo aasuwela yootthuna ya Yehova wa yoowo ni aari oolikaneene opaka itthu moovarihana ni yootthuna eyo, nnaamweera eyo yaahela mpuwa ohaawa mwaha woopaka etthu yooreera. Awehexexaka opaka yootthuna ya Atiithi awe, Yesu khaakhulenle etthu weera emootxeelihe opaka eyo.

3. Eheeni Murummwa Pedru aaxuttenraawe ni Yesu, ni aawooperenre akristu opaka eheeni? (1 Pedru 4:1)

³ Murummwa Pedru ni arummwa akina, yaakhalano eparakha yooviriha etempu ereene ni Yesu ni oxuttera moota owo onuupuwelaawe. Vaavo Pedru aalempaawe ekaarta awe yoopatxera, owo aawooperera makristu weera yaatthuneya wiilipiha ni muupuwelo mmoha wa Kristu.a (Mmusome 1 Pedru 4:1.) Pedru aavarihela muteko masu a anakhotto vaavo aalempaawe ha: “Mwìlipihe.” Mwa yeeyo, wakhala weera akristu enootakiha moota Yesu onuupuwelaawe, enoorowa okhala oolikaneene ntoko ekaruma yoowera vaavo enwanaayano yootthuna ya ohimalela ni elapo ela enlamuleliwa ni Satana. — 2 Akor. 10:3-5; Aef. 6:12.

4. Eheeni ninrowaahu woona mwa yoosoma ene yeela?

⁴ Mwa yoosoma ene yeela, nnoorowa woona moota Yesu onuupuwelaawe ni moota ninrowaahu otakiha. Nnimoona moota ninrowaahu (1) otakiha moota Yehova onuupuwelaawe ni moota eyo enrowaaya onikhavihera wuupuwelaka ntoko owo, (2) okhala oowiiyeviha ni (3) okhala amiruku nimuroromelaka Yehova moorweela mwa nivekelo.

MUTAKIHE MOOTA YEHOVA ONUUPUWELAAWE

5. Mwa emaara heeni Pedru ahuupuwenlaawe ntoko Yehova?

⁵ Moone ekwaha emoha yeeyo Pedru ahoonihenraawe muupuwelo wa Yehova. Yesu aahaaleela arummwa awe weera annatthuneya orowa oYerusalemu weera aveleeliwe mmatatani mwa ahooleli a ettiini, ohaaxiwa ni muhoolo mwaya wiiviwa. (Math. 16:21) Pooti weera Pedru waamuxupa waakhulela weera Yehova ammuhiya Yesu iiviwaka, yoowo aari yooweherera ya ana a Israeli ni Mesiya aalaiherinwe. (Math. 16:16) Mwa yeeyo, Pedru aamwiitthana Yesu okhwipi anamweerela: “Mwiimorele ikharari Pwiya, eyo khenkela oweereelani.” (Math. 16:22) Okhala weera Pedru khoonihenre muupuwelo wa Yehova woohima sa mwaha ole, owo khuupuwela ntoko Yesu uupuwelaawe.

6. Moota heeni Yesu oonihenraawe weera annatakiha muupuwelo wa Yehova?

⁶ Muupuwelo wa Yesu wannavarihana nnene sene ni muupuwelo wa Tiithi awe a wiirimu. Yesu aamweerenle ha Pedru: “Okhale ottayi ni miyo Satana! Mwaha wooweera nyuwo nluku ninkikwattuliha mwaha wooweera khamwaano minyuupuwelo sa Muluku, menento sa atthu.” (Math. 16:23) Pooti weera Pedru aatthuna mureerelo wa Yesu, mene Yesu khaakhulenle miruku sa Pedru. Yookhala etthu ninxutteraahu. Mwa emaara ene yeele, omukosoopa Yesu khaiyene yaari yootthuna ya Yehova. Mwa yeeyo, Pedru aaxuttera etthu yootthuneya, weera aatthuneya wuupuwelaka ntoko Muluku.

7. Moota heeni muhoolo mwaya Pedru oonihenraawe weera aakhalano muupuwelo wa Yehova? (Nwehe efootu ya.)

⁷ Okhwipi waya, Pedru aahoonihera weera aatthuna okhala moovarihana ni muupuwelo wa Yehova. Vano, yaaphiya etempu weera atthu ale yahaakhanle ayuda, yeereleke eparte emusi ya Yehova. Pedru aathanliwa weera amulaleere Korneliu yoowo ahaakhanle muyuda, yoowo aarowa weerelaka eparte ekhurupu ya akristu oopatxera. Okhala weera ayuda khiyaavarihana ni ale yahaakhanle ayuda, onooneya weera Pedru annahaawela nikhavihero weera iireherere wa yoothanleliwa ele. Vaavo Pedru uupuwelenlaawe yootthuna ya Muluku woohima sa mwaha ole, owo aatxentxa moonelo awe. Yookhumelela aya, Pedru iitthaniwakaru aarowa “vohilekela.” (Mit. 10:28, 29) Owo aamulaleera Korneliu ni emusi awe, ni ootheene yaapatisiwa. — Mit. 10:21-23, 34, 35, 44-48.

8. Moota heeni ninrowaahu woonihera weera muupuwelo ahu onnavarihana ni muupuwelo wa Yehova? (1 Pedru 3:8 ni enoota)

⁸ Sivinreene iyaakha, Pedru aawooperera akristu weera ‘ekhaleno muupuwelo mmoharu.’ (Mmusome 1 Pedru 3:8 ni enoota.) Ntoko atthu a Yehova, hiyo pooti okhalano muupuwelo mmoharu vaavo nnuupuwelaahu ntoko Yehova onuupuwelaawe ntoko enhimmwaaya mBiblyani. Mwa ntakihero, Yesu aawooperera arummwa awe ohela nipuro noopatxera mweekumini mwaya Omwene wa Muluku. (Math. 6:33) Nuupuwelaka eyo, wakhala weera namalaleera mmoha mmulokoni mwanyu oolakela onvarela Yehova mwa etempu yootheene, ohiya wuuluma masu ookhulumula, nintthuneya wuuluma mooreerela woohima sa sooluluwanya sawe ni omukhavihera.

MUKHALE OOWIIYEVIHA

9-10. Moota heeni Yesu oonihenraawe wiiyeviha otokweene?

⁹ Ohiyu Yesu ahaakunveene wiiviwa, owo aamuxuttiha Pedru ni arummwa awe akina etthu yootepa otthuneya woohima sa wiiyeviha. Woopatxerani, Yesu aamuruma Pedru ni Yohani weera yareherere yootxa yoomalihera yeeyo Yesu aarowaawe otxa naawo ahaakunveene wiiviwa. Oreherera iwo, waahela mpuwa oreherera epasiya ya maahi ni itowaaliya, weera ale yaarowa otxa erapiheke manaani ehinaaye otxa. Vanonto, yaphiya ewoora eyo, taani aarowa ovara muteko ole waatthuneya wiiyeviha?

¹⁰ Yesu ahoonaka wuuliha muru, aahoonihera wiiyeviha otokweene. Arummwa awe yaatikhiniheya vantxipale vaavo yaamonnaaya Yesu apakaka etthu yeeyo yaapakiwa ni akaporo. Yesu aarula ekuwo awe ya vasulu aaphitaanyalaawe ni aahiitthukela etowaaliya muyuununi, aahiitthela maahi mpasiyani ni aapatxera orapiha manaani aarummwa awe. (Yoh. 13:4, 5) Pooti weera yaavira etempu yintxipale arapihaka manaani aarummwa awe ale 12, omuhela mpuwa Yuda yoowo aarowa onvariha Yesu. Nnaamweera vareene hiiho, moowiiyeviha, Yesu aamaliha ele aavaraawe. Nto Yesu aahaaleela moopixa murima eeraka: “Moowera wiiwexexa etthu koopakenlaakani? Nyuwosa munnakiitthana ‘Muhusiha’ ni ‘Apwiya’, munnapaka nnene, woona weera miyo Muhusiha ni Apwiya. Vanonto, waareene weera miyo Apwiya anyu ni Muhusiha anyu, koorapiha manaani anyu, nyuwo tho murapiheke manaani a mukina ni mukhwaawe.” — Yoh. 13:12-14.

11. Moota heeni Pedru oonihenraawe weera aaxuttera okhala oowiiyeviha? (1 Pedru 5:5) (Nwehe efootu.)

¹¹ Pedru aaxuttera ni wiiyeviha wa Yesu. Yesu atthikelakaru wiirimu, Pedru aapaka mwiiriira amulamihaka mulopwana mmoha aayarinwe oorakala ene. (Mit. 1:8, 9; 3:2, 6-8) Onooneya weera atthu antxipale yaatikhiniheya ni ele Pedru aapankaawe. (Mit. 3:11) Menento Pedru khaatthuna wiivuwiha mwaneene awe, nnaamweera owo aahuuwale elapo yeeyo atthu antxipale yiivuwihaaya. Pedru moowiiyeviha, aakhootta ovuwihiwa ni aahinvaha ovuwa wootheene Yehova ni Yesu, eeraka: “Vano ìwelelaka nsina na Yesu, mulopwana ola munamònanyu ni munamusuwelanyu, òlipihiwa niwoko na nsina nene nle.” (Mit. 3:12-16) Masu Pedru aavarihenlaawe muteko vaavo aalepelaawe ekaarta awe akristu woohima sa woonihera wiiyeviha, pooti onuupuxera emaara Yesu iitthukenlaawe etowaaliya muyuununi ni anarapiha manaani aarummwa awe. — Mmusome 1 Pedru 5:5.

12. Hiihaale ntoko Pedru, moota heeni hiyo ninrowaahu wunnuwihera wiiyeviha?

¹² Hiyo pooti otthara ntakihero na Pedru ni wunnuwihera wiiyeviha. Mene muupuweleke weera wiiyeviha weekhaikhai, khaiyene paahi wuuluma masu ooreera. Pedru oovarihela muteko masu ooweera ‘wiiyeviha wa mmuupuweloni’ yeeyo enoonihera weera, wiiyeviha weekhaikhai onhela mpuwa miyuupuwelo sahu sa mpuwa. Hiyo ninnaapakela itthu sooreera atthu akina mwaha wooweera ninnamusivela Yehova ni atthu, ohiya weera nintthuna ottottopeliwaka. Hiyo ninnoonihera weera ninniiyeviha mweekhaikhai vaavo nnanvarelaahu Yehova ni asinna moohakalala nnaamweera atthu akina ehoonaka wiilipihera wahu. — Math. 6:1-4.

MUKHALE “A MIRUKU”

13. Muhime etthu enhela mpuwa okhala “a miruku.”

¹³ Okhala “a miruku” onhela mpuwa eheeni? (1 Ped. 4:7) Mukristu amiruku onnapaka ele onweraawe weera apake soothanla sooreera sinoonihera moota Yehova onuupuwelaawe. Mukristu ntoko owo, onnasuwela weera khiyaavo etthu yootepa otthuneya mweekumini mwawe opwaha onthamwene awe ni Yehova. Owo onnakhalano moonelo weeriyari-neeriyari woohima sa mwaneene, asuwelaka weera khasuwenle itthu sootheene. Nave-tho owo onnoonihera omuroromela wawe Muluku amwaattamelaka ikwaha sintxipale moorweela mwa nivekelo avekaka miruku.b

14. Moota heeni ekwaha emoha Pedru aahiñyaawe omuroromela Yehova?

¹⁴ Ohiyu woomalihera Yesu ahinaaye wiiviwa, owo aahaaleela arummwa awe eeraka: “Ohiyu ola, ootheene nyuwo munookihiya.” Pedru aahaakhula ahihovelaka etthu eeraka: “Nnaamweera atthu ootheene ala yoohiyakani, miyo nkiwa koohiyani!” Ohiyu ene yoole, Yesu aahaaleela arummwa awe eeraka: “Mukhale oowehaweha ni nvirelele ovekela.” (Math. 26:31, 33, 41) Waakhanle weera Pedru aatthara miruku iye, pooti weera aamulipa murima weera aakhulele weera aari murummwa a Yesu. Mene owo aamukhootta Pwiyawe ni muhoolo mwaya, aaxupeya mwaha wa etthu ele aapankaawe. — Math. 26:69-75.

15. Moota heeni Yesu aavirelenlaawe okhala amiruku ohiyu woomalihera ahinaaye wiiviwa?

¹⁵ Yesu annamuroromela Yehova ni murima awe wootheene. Nnaamweera Yesu aari oomalela, owo annavekela voohihiyerereya. Eyo yaahinvaha olipa murima weera apake itthu moovarihana ni yootthuna ya Yehova wa yoowo. (Math. 26:39, 42, 44; Yoh. 18:4, 5) Pedru aatikhiniheya vaavo aamoonaawe Yesu apakaka mavekelo emaara ele yooxupa.

16. Moota heeni Pedru oonihenraawe weera aakhalano miruku? (1 Pedru 4:7)

¹⁶ Moovira etempu, Pedru annamuroromela Yehova moorweela mwa nivekelo. Yesu avinyererihiwakaru, aamuroromeliha Pedru ni arummwa akina weera awo yaamwaakhela munepa wootteela weera ewereke okwanihera muteko woolaleera. Menento Yesu aahaavekela weera yaweherereke oYerusalemu mpaka eyo weereya. (Luka 24:49; Mit. 1:4, 5) Etthu heeni Pedru aapakaawe vaavo aawehereraawe? Pedru ni akristu akina “yànavekela ni nthiti.” (Mit. 1:13, 14) Muhoolo mwaya, mwa ekaarta awe yoopatxera, Pedru aawooperera akristu okhala amiruku ni omuroromela Yehova moorweela mwa nivekelo. (Mmusome 1 Pedru 4:7.) Pedru aaxuttera omuroromela Yehova ni aari nikhavihero na mmulokoni. — Agal. 2:9.

17. Nihipwatthaka itthu ninweraahu opaka naari nraahuno, nintthuneya ovirelela opaka eheeni? (Nwehe efootu.)

¹⁷ Weera nikhale amiruku, nintthuneya omwaattamelaka ikwaha sintxipale Yehova moorweela mwa nivekelo. Nintthuneya ovirelela onvekela Yehova nihipwatthaka itthu ninweraahu opaka. Vaavo nintthunaahu opaka soothanla sootthuneya, ninvekeleke Yehova nivekaka miruku, nroromelaka weera owo oosuwela etthu yooreera wa hiyo.

18. Moota heeni ninrowaahu otakiha wuupuwela wa Yehova?

¹⁸ Hiyo ninnamuxukurela Yehova mwaha woonipaka mwa mukhalelo yoowo nnooniheraahu mikhalelo sawe. (Eph. 1:26) Ekhaikhai weera khaninwera omutakiha Yehova moomalela. (Yes. 55:9) Mene, hiihaale ntoko Pedru, hiyo nintthuneya ovirelela otakiha moota Yehova onuupuwelaawe nikhalaka oowiiyeviha ni amiruku.