MWAHA ONTHOKORORIWA 23
ETXIPO 2 Nsina Nanyu ti Yehova
Nsina na Yehova — etthu nintaphulelaaya wa hiyo
“Nyuwo mwà anamon’aka, ehako ya Yahvéh.” — YES. 43:10.
ELE NINKELA AHU OXUTTERA
Ninrowa woona muritti nraahuno wootteeliha ni waakihera nsina na Yehova.
1-2. Ninsuwela moota heeni weera nsina na Yehova ti nootepa otthuneya wa Yesu?
NSINA na Yehova etthu yootepa otthuneya wa Yesu. Owo mutthu mutokweene onaakihera nsina na Atiithi awe. Ntoko yoosoma evinre yoonihenraaya, Yesu aari oolikaneene okhwa mwaha wa nsina na Yehova ni itthu sootheene nsina nno ninthoonyeraaya. (Mar. 14:36; Aheb. 10:7-9) Ni vaavo olamulelo awe wa iyaakha 1.000 onrowaaya ophiya okhwipi, Yesu onoorowa okhala oolikaneene omutthikihera Tiithi awe Omwene weera ovuwa wootheene avahiweke Yehova. (1 Akor. 15:26-28) Nsivelo Yesu araaweno ni nsina na Muluku, ninnoonihera woohima sa onthamwene awe ni Atiithi awe. Eyo ennoonihera weera Yesu onnamusivela vantxipale Yehova.
2 Yesu aawa elapo ya vathi mwa nsina na Atiithi awe. (Yoh. 5:43; 12:13) Owo aahaasuweliha atthareli awe nsina na Atiithi awe. (Yoh. 17:6, 26) Owo annaxuttiha mwa nsina na Yehova ni aapaka miiriira mwa nsina nno. (Yoh. 10:25) Mpaka Yesu anvekela Yehova weera aaweha-weheke atthareli awe “mwaha wa nsina [nawe].” (Yoh. 17:11) Mwa yeeyo, wakhala weera Yesu annavaha mwiitti nsina na Yehova, moota heeni mutthu aarowaawe ohimaka weera mutthareli a Kristu ahisuwelaka naari ahivarihelaka muteko nsina na Yehova?
3. Etthu heeni ninrowaahu woona mwa yoosoma ene yeela?
3 Ntoko akristu entthara ntakihero na Yesu, ninnavaha mwiitti nsina na Tiithi awe. (1 Ped. 2:21) Mwa yoosoma ene yeela, nnoorowa woona moota nsina na Muluku nnaasuwanyeihaaya ale enlaleya “mitthenka sooreera sa Omwene” olelo. (Math. 24:14) Nnoorowa woona-tho etthu nsina na Yehova nintaphulelaaya wa mutthu ti mutthu a hiyo.
“MULOKO NTHOWA NA NSINA NAWE”
4. (a) Yesu ahaakunveene otthikela wiirimu, muteko heeni aavanhaawe atthareli awe? (b) Nikoho heeni ninkhumelela mwaha wa muteko owo?
4 Yesu ahalelaka vakhaani otthikela wiirimu, aahaaleela atthareli awe eeraka: “Koma muni mwàkhele ikuru vowokhuruwelani nyuwo Munepa Wottela ni muni mukhale anamona [aka] o Yerusalemu ni o Yudeya wothene ni o Samariya ni mpaka mukhwipi mwa elapo.” (Mit. 1:8) Mwa yeeyo, mitthenka sooreera khasaarowa olaleiwa paahi wIsraeli. Noovira etempu, atthu a maloko ootheene yaamurowa okhalano eparakha yookhala atthareli a Yesu. (Math. 28:19, 20) Mene Yesu enre: “Muni mukhale anamona [aka].” Neereke atthareli ale anyowani a Yesu yannatthuneya osuwela nsina na Yehova, naari yaarowa okhala paahi anamoona a Yesu? Sooweereya silempwale va eliivuru ya Miteko ekapiitulu 15, sinoorowa onikhavihera ophwanya waakhula wa nikoho nna.
5. Moota heeni arummwa ni asitokweene oYerusalemu yoonihenraaya weera atthu ootheene ennatthuneya osuwela nsina na Yehova? (Nwehe efootu.)
5 Eyaakha ya 49 Kristu awiiyeene, arummwa ni asitokweene oYerusalemu, yaathukumana weera ethokorore etthu ale yahaakhanle ayuda yaatthuneyaaya opaka weera yaakhuleliwe ntoko akristu. Yakobe munnawe Yesu vaavo aamalihaawe mwaha awe, aahuuluma masu eneera: “[Pedru] òtaphulela toko ekhalelo Muluku ùpuwenlaiye othanla variyari va amalapo muloko awe nthowa na nsina nawe.” Nsina heeni Yakobe aatthunaawe ohima? Uulumaka woohima sa profeta Amosi, aahaatxeerera eeraka: “Wera atthu yale ehanle, ewàse Apwiya vamosá ni amalapo othene tho, yawo nsina naka nivekeliwaya: t’iya anèraya Apwiya. (Mit. 15:14-18) Atthareli ale anyowani, ohiya paahi yaatthuneya oxuttera woohima sa Yehova, nave-tho yaamurowa ‘wiitthaneliwa nsina nawe.’ Eyo entaphulela weera yaamurowa waasuweliha atthu akina nsina na Muluku, ni atthu awo yaamurowa waasuwela ntoko anamathoonyera a nsina nno.
Vamuthukumanoni wa mukuttula woolamulela wa eseekulu yoopatxera, alopwana ale oororomeleya yaahoonihera nnene sene weera akristu ontthuneya okhala atthu envarela muteko nsina na Muluku (Nwehe eparagrafu 5)
6-7. (a) Yesu aawenle heeni elapo ya vathi? (b) Nthowa heeni nikina nootepa otthuneya naamweerinhe Yesu owa elapo ya vathi?
6 Nsina na Yesu nintaphulela “Yehova Nvuluxa.” Ni Yesu ohoonihera weera Yehova onnanvarihela weera aavuluxe ale erinono nroromelo. Yesu aawa elapo ela ya vathi weera avahe ekumi awe weera atthu ettottele mureerelo. (Math. 20:28) Mwaha woovaha ekumi awe, owo oheeriha weera atthu evuluxiwe ni ekhaleno ekumi yoohimala. — Yoh. 3:16.
7 Mene mwaha wa heeni atthu yaatthuneyaaya ovuluxiwa? Mwaha wa etthu yeereñye oJardim wEdeni. Ntoko nonnaahu yoosoma evinre, makholo ahu oopatxera, Adamu ni Eva, yaamurukunuwela Yehova ni mwaha wa yeeyo, aayeleela eparakha yookhalano ekumi yoohimala. (Eph. 3:6, 24) Menento yaakhala-tho etthu ekina etokweene, ohiya paahi ovuluxiwa wa atthu oottheka. Nsina na Yehova noonanarihiwa. (Eph. 3:4, 5) Mwa yeeyo, ovuluxiwa wa osuulu wa Adamu ni Eva, wannavarihana ni etthu eyo etokweene, otteelihiwa wa nsina na Yehova. Okhala weera Yesu aamuthoonyera Yehova ni aakuxa nsina na Atiithi awe, owo ohiilipihera vantxipale weera atteelihe nsina na Yehova.
Moota heeni mutthu aarowaawe ohimaka weera mutthareli a Kristu ahisuwelaka naari ahivarihelaka muteko nsina na Yehova?
8. Etthu heeni atthareli ootheene a Yesu entthuneyaaya osuwela?
8 Atthu ootheene yaamuroromela Yesu, ayuda naari ale yahaakhanle ayuda, wannatthuneya waakhulela etthu yaavuluxa, omusuwela Tiithi awe Yesu, Yehova Muluku. (Yoh. 17:3) Opwaha mwa yeeyo, hiihaale ntoko Yesu, yaamurowa wiitthaneliwa nsina na Yehova. Awo-tho yannatthuneya waakhulela otthuneya waya otteeliha nsina nno. Mwaha wooweera ovuluxiwa waya waalipa ni yeeyo. (Mit. 2:21, 22) Mwa yeeyo, atthareli ootheene oororomeleya a Yesu, yannatthuneya oxuttera woohima sa Yehova ni woohima sa Yesu. Hiyo khanintikhina mwaha wa heeni Yesu aamalinhaawe nivekelo nawe nenno nlempwale va Yohani 17 eeraka: “Miyo kohaasuweliha nsina nanyu, ni kinimwaasuweliha, weera nsivelo munkisivelaanyuno miyo nikhale naawo, ni miyo vamoha naawosa.” — Yoh. 17:26.
“NYUWO MWÀ ANAMON’AKA”
9. Moota heeni ninrowaahu woonihera weera nsina na Yehova etthu yootepa otthuneya wa hiyo?
9 Nto atthareli ootheene eekhaikhai a Yesu, entthuneya okhalano ntthuno nootteeliha nsina na Yehova. (Math. 6:9, 10) Awo ennatthuneya ottittimiha nsina na Yehova opwaha etthu eri poothe. Eyo enhela mpuwa opakavo etthu. Nto etthu heeni nintthuneyaahu opaka weera ntteelihe nsina na Yehova nenno Satana onanarinhaawe?
10. Etthu heeni Yehova onaavekelaawe atthu ale ehinanvarela weera epake ntoko enhimmwaaya va Yesaya 42-44? (Yesaya 43:9; 44:7-9) (Nwehe efootu.)
10 Otthuneya waya otteeliha nsina na Yehova, onnaiwanyeihiwa va Yesaya ekapiitulu 42-44. Ikapiitulu iya Yehova onnaavekela atthu ale ehimmukokhorela weera yoonihere waari weera amuluku aya teekhaikhai. Owo-tho onnaavekela anamoona aya weera ewaakihe amuluku aya awo. Mene khaavo onwera! — Mmusome Yesaya 43:9; 44:7-9.
Mwa itthu sootheene nnuulumaahu ni nimpakaahu, ninnoonihera weera khokhanle Muluku mukina ahikhanle Yehova (Nwehe eparagrafu 10-11)
11. Etthu heeni Yehova onaaleelaawe atthu awe ntoko elempwalaaya va Yesaya 43:10-12?
11 Mmusome Yesaya 43:10-12. Yehova aahaaleela atthu awe eeraka: “Nyuwo mwà anamona aka, . . . miyo kà Muluku.” Yehova aahaavekela weera yaakhule nikoho nna: “Kapena òkhala Muluku mukina okihiya yomi?” (Yes. 44:8) Hiyo nookhalano eparakha yoowaakhula nikoho nna. Moorweela mwa masu ahu ni itthu nimpakaahu, hiyo ninnoonihera weera Yehova Muluku mmoha paahi eekhaikhai. Nsina nawe ti na vasuluxa opwaha masina ootheene. Hiyo ninnoonihera weera ninnamusivela Yehova ni ninnaroromeleya wa yoowo mwa itthu sootheene nimpakaahu, nihipwatthaka etthu Satana onrowaawe onipakela. Mwa yeeyo, hiyo nookhalano eparakha yookhavihera otteeliha nsina na Yehova.
12. Moota heeni eprofesiya emphwanyeya va Yesaya 40:3, 5 ekwanenlaaya?
12 Vaavo ninkhaviheraahu otteeliha nsina na Yehova, nimmutakiha Yesu Kristu. Yesaya aahima-tho weera ookhala mutthu aarowa ‘oreherera ephiro ya Yehova.’ (Yes. 40:3) Eyo ekwanenle moota heeni? Yohani Mpatisa aareherera ephiro ya Yesu yoowo aawiiye mwa nsina na Yehova ni uulumme mwa nsina nno. (Math. 3:3; Mar. 1:2-4; Luka 3:3-6) Eprofesiya ene yeela, yaahimme-tho weera: “Onimwìsoneiha ovuwa wa Yahvéh.” (Yes. 40:5) Moota heeni eyo ekwanenlaaya? Emaara Yesu aawiiyaawe elapo ya vathi, owo aamuthoonyera Yehova moomalela onkhala ntoko Yehova mwaneene taakhuruwenle elapo ya vathi. — Yoh. 12:45.
13. Moota heeni ninrowaahu omutakiha Yesu?
13 Hiihaale ntoko Yesu, hiyo Anamoona a Yehova. Ninnakuxa nsina na Yehova ni ninnaaleela atthu ootheene miteko sawe sootikiniha. Mene weera nipake eyo nnene sene, onnatthuneya-tho waasuweliha atthu etthu Yesu opankaawe weera atteelihe nsina na Yehova. (Mit. 1:8) Yesu Namoona mutokweene a Yehova ni owo tonnihoolela. (Apok. 1:5) Vano, nsina na Yehova nintaphulela eheeni wa mutthu ti mutthu a hiyo?
ETTHU NSINA NA YEHOVA NINTAPHULELAAYA WA HIYO
14. Ntoko ehimmwalaaya va Nsalmu 105:3, nniisoonela hayi moovarihana ni nsina na Yehova?
14 Hiyo ninniiteexa mwaha wa nsina na Yehova. (Musome Nsalmu 105:3.) Yehova onnahakalala vaavo nniiteexaahu mwaha wa nsina nawe. (Yer. 9:23, 24; 1 Akor. 1:31; 2 Akor. 10:17) ‘Wiiteexa mwa Yehova,’ ontaphulela ohakalala mwaha wa Yehova okhala Muluku ahu. Eparakha wa hiyo ovuwiha nsina na Yehova ni waakihera omutthu awe. Hiyo khontthuneya woona wuuliha muru waaleela makoleeka ahu oomutekoni, ooskola, mavizinho ahu naari atthu akina weera hiyo Anamoona a Yehova! Satana ontthuna weera nihaaleeleke atthu akina nsina na Yehova. (Yer. 11:21; Apok. 12:17) Ohima ekhaikhai, Satana ni maprofeta awe oowootha, entthuna weera atthu ettiwale nsina na Yehova. (Yer. 23:26, 27) Mene mwaha wa nsivelo nraahuno ni nsina na Yehova, hiyo ninnahakalala ‘mahiku ootheene.’ — Nsal. 5:12 [5:11, Tradução do Novo Mundo]; 89:17 [89:16, NM].
15. Ontaphulela eheeni ovuwiha nsina na Yehova?
15 Hiyo ninnavirelela ovuwiha nsina na Yehova. (Yow. 2:32; Arom. 10:13, 14) Ovuwiha nsina na Yehova, onhela mpuwa ohiya paahi osuwela ni ovarihela muteko nsina na Muluku, mene hiyo ninnamusuwela nnene sene, ninnamuroromela nave ninnaasa nikhavihero nawe ni miruku sawe. (Nsal. 20:8 [20:7, NM]; 99:6; 116:4; 145:18) Nave-tho ninnaaleela atthu akina nsina na Yehova ni mikhalelo sawe, niwoopereraka atthu awo ottharuwa ni opaka itthu sinrowa oweeriha waakhuleliwa ni Yehova. — Yes. 12:4; Mit. 2:21, 38.
16. Moota heeni ninrowaahu woonihera weera Satana namootha?
16 Hiyo nri oolikaneene oviriha maxupo mwaha wa nsina na Yehova. (Yak. 5:10, 11) Vaavo ninvirelelaahu okhala oororomeleya wa Yehova naavirihaka maxupo, ninnoonihera weera Satana namootha. Mahiku a Yobi, Satana aawoothera atthu ale enanvarela Yehova eeraka: “Mutthu onaleva sothesene oraiyeno nthowa na ekum’awe!” (Yobi 2:4) Satana-tho oohima weera atthu ennanvarela Yehova vaavo ehinvirihaaya maxupo, mene wakhala weera enooviriha maxupo, enoomuhiya Yehova. Yobi yoowo aari oororomeleya, ohoonihera weera eyo khaiyene ekhaikhai. Moolikana niiyo, hiyo nookhalano eparakha yoowoonihera weera nihipwatthaka ele Satana onrowaawe onikumihera, hiyo khaninrowa omuhiya Yehova. Nroromeleke ni murima ahu wootheene weera Yehova onoonikhavihera mwaha wa nsina nawe. — Yoh. 17:11.
17. Mwa mukhalelo heeni mukina ninrowaahu ovuwiha nsina na Yehova ntoko enhimmwaaya va 1 Pedru 2:12?
17 Hiyo ninnattittimiha nsina na Yehova. (Mir. 30:9; Yer. 7:8-11) Okhala weera nimmuthoonyera Yehova ni ninnakuxa nsina nawe, hiyo pooti ovuwiha nsina nno naari oveehiha. (Mmusome 1 Pedru 2:12.) Mwa yeeyo, hiyo nintthuneya opaka sootheene ninweraahu weera ninvuwihe Yehova moorweela mwa ele nnuulumaahu ni mukhalelo ahu. Mwa mukhalelo ene yoowo, nnoovuwiha nsina nawe nnaamweera nreene oohimalela.
18. Mwa mukhalelo heeni mukina ninrowaahu woonihera weera nsina na Yehova etthu yootepa otthuneya wa hiyo? (Nwehe enoota.)
18 Nsina na Yehova ti nootepa otthuneya wa hiyo opwaha ele atthu enrowaaya wuupuwelelaka woohima sa hiyo. (Nsal. 138:2) Mwaha wa heeni eyo eraaya yootthuneya? Mwaha wooweera vaavo nimpakaahu itthu seiyo simmuhakalaliha Yehova, ikwaha ikina, atthu akina khensiveliwa ni awo pooti wuulumaka itthu soonanara woohima sa hiyo.a Yesu aari oolikaneene wiiviwa moowuuliha muru ntoko nakirime weera avuwihe nsina na Yehova. Owo ‘khoona wuuliha muru’ mwaha wooweera khaaxupeya ni ele atthu yaakelaaya wuupuwelaka woohima sa yoowo. (Aheb. 12:2-4) Yootthuna awe waari opaka yootthuna ya Muluku. — Math. 26:39.
19. Munoonela hayi nsina na Yehova ni mwaha wa heeni?
19 Hiyo ninniiteexa mwaha wa nsina na Yehova, nave ninniisoona okhala oottittimiheya vaavo nniitthaniwaahu okhala Anamoona a Yehova. Mwaha wa yeeyo, hiyo nri oolikaneene oviriha maxupo eri poothe enrowa okhumelela. Nsina na Yehova etthu yootepa otthuneya wa hiyo opwaha mukhalelo ahu. Mwa yeeyo, nikhale oolikaneene ovirelela ovuwiha nsina na Yehova nihipwatthaka ele Satana onrowaawe onipakela. Napaka eyo, nnoorowa woonihera weera nsina na Yehova etthu yootepa otthuneya wa hiyo hiihaale ntoko nraaya nootepa otthuneya wa Yesu Kristu.
ETXIPO 10 Ninvuwihe Yehova, Muluku Ahu!
a Mpaka Yobi yoowo aari oororomeleya, aaxupeya ni mukhalelo awe vaavo ootherinwaawe ni asinthamwene awe araru. Woopatxerani, vaavo aayelenlaawe anamwane awe ni mireerelo sawe sootheene, “Yobi khapahunle etthu, anyi, khapankiye etthu yonvirikanyiha Muluku.” (Yobi 1:22; 2:10) Menento vaavo Yobi ootherinwaawe opaka etthu yoonanara, owo aahiivoleihera ni ‘masu oohireerela.’ Owo aahela nipuro noopatxera waakiha mukhalelo awe ohiya otteeliha naari waakiha nsina naari waakiha mukhalelo wa Muluku. — Yobi 6:3; 13:4, 5; 32:2; 34:5.