Nsivelo na Muluku ti noohimala

1-2. Maxupo heeni akristu antxipale envirihaaya?

NKAMUUPUWELENI paarku oneetta variyari va maahi vaavo enoopaaya epheyo etokotoko, muteku-teku wa maahi onnamuttikinya omuroihaka osulu ni vathi. Aahivareliwa muteko nankura, paarku owo onrowa weiwo muteku-teku wa maahi onamuroihaayawo. Nankura onnamweeriha baarku okhala oovareleleya ni ohittikinyeya vaavo epheyo etokotoko enoopaaya.

² Vaavo nyuwo munvirihaanyu etthu yooxupa, nyuwo pooti wiisoona okhala ntoko paarku ole, muupuwelo anyu pooti okhala nnene naari hooye. Ikwaha ikina nyuwo pooti ororomela nsivelo ni nikhavihero na Yehova; ikwaha ikina nyuwo pooti wiikoha wakhala weera owo onnoona itthu munvirihaanyu. (Nsal. 10:1; 13:2, [13:1, Tradução do Novo Mundo]) Apaale nthamwene anyu pooti woomaalihani, ni nyuwo pooti wiisoona okhala nnene mpuwa mwa etempu vakhaanini. (Mir. 17:17; 25:11) Mene moovira etempu nyuwo munnatthikela ohovela. Nyuwo pooti wiikoha waari weera Yehova ohoohiyani. Moota heeni nyuwo munrowaanyu onvarihela muteko nankura, vaavo munvirihaanyu maxupo? Ni masu makina, moota heeni nyuwo munrowaanyu ovirelela ororomela nsivelo ni nikhavihero na Yehova?

3. Ontaphulela eheeni “nsivelo noororomeleya”, ntoko ohimmwalaaya va Nsalmu 31:8 [31:7, NM] ni 136:1, ni mwaha wa heeni nintthuneyaahu ohima weera Yehova ntakihero ntokweene na nsivelo nno? (Nwehe-tho efootu.)

³ Mukhalelo mmoha wonvarihela muteko nankura mpuwa wa maxupo, ori wuupuwelela nsivelo neekhaikhai na Yehova. (Musome Nsalmu 31:8 [31:7, NM]; 136:1.) Masu ooweera ‘nsivelo noororomeleya’ nintthuna ohima nsivelo noowiixera ni noohimala mutthu oraaweno ni mutthu mukina. Yehova ntakihero ntokweene na nsivelo noororomeleya. Mweekhaikhai, Biblya onnamuhima owo ntoko: “òsareya [nsivelo] ni ororomeleya.” (Ott. 34:6, 7) Biblya-tho onnamuhima Yehova eeraka: “[Nyuwo mwa] òsareya ikharari wa yale anawìtthanani.” (Nsal. 86:5) Nkuupuwelani etthu entaphulelaaya eyo: Yehova khankhala-khala aanyanyalaka arumeyi awe oororomeleya! Wuupuwelela weera Yehova toororomeleya pooti onilipihaka vaavo ninvirihaahu maxupo. — Nsal. 23:4.

MUUPUWELEKE WEERA NSIVELO NA YEHOVA NNEERELA EPARTE SOOXUTTIHA SOOPATXERA SA MBIBLYANI

4. Nvahe matakihero a sooxuttiha soopatxera sa mBiblyani ni muthalihe mwaha wa heeni nnaakhulelaahu.

⁴ Mukhalelo mukina woolipa emaara yeeyo ninvirihaahu maxupo, ori wuupuwelela nsivelo na Yehova ntoko yooxuttiha yoopatxera ya Biblyani. Masu ooweera “sooxuttiha soopatxera sa mBiblyani” entthuna ohima eheeni wa nyuwo? Apaale nyuwo pooti wuupuwelela ikhaikhai muxuttenraanyu sa masu a Muluku. Mwa ntakihero, nyuwo mooxuttera weera nsina na Muluku Yehova, weera Yesu mwaana mmoharu a Muluku, ni weera atthu ookhwa khensuwela etthu ni-tho enookhala eparaiso valaponi mwemmo atthu enrowaaya okhalano ekumi yoohimala. (Nsal. 83:19 [83:18, NM]; Koh. 9:5; Yoh. 3:16; Apok. 21:3, 4) Emaara yeeyo mwaakhulenlaanyu sooxuttiha iyo, nyuwo mwaakhootta owiiwelela atthu yaatthuna woohiihani sooxuttiha iyo. Mwaha wa heeni? Mwaha wooweera moosuwela weera sooxuttiha iyo ti seekhaikhai. Nrowe noone moota ovarexexa nsivelo na Yehova ntoko yooxuttiha yoopatxera ya mBiblyani enrowaaya wookhaviherani osepa muupuwelo wooweera owo khanoopwatthani ni itthu munvirihaanyu.

5. Muhime moota, mutthu onhiyaawe sooxuttiha soowootha.

⁵ Vaavo mwaamusomma anyu Biblya ekwaha yoopatxera, etthu heeni yookhavihenreni ohiya sooxuttiha soowootha? Pooti weeraka nyuwo mwannalikanxera ele mwaaxuttenraanyu ettiini anyu ni ele Biblya onxuttihaawe. Moone ntakihero nimoha: Apaale nyuwo mwaaroromela weera Yesu Muluku Nanwera Sootheene. Menento vaavo nyuwo mwaamusomaanyu Biblya, apaale mwaahikoha: Neereke yooxuttiha ela ekhaikhai? Mmusomakaru Biblya, nyuwo mohoonelela weera yooxuttiha eyo tiyeethiru. Muhoolo mwaya, nyuwo mootxentxa yooxuttiha eyo yoowootha ni ekhaikhai ya Biblyani yeeyo enhima weera: Yesu “Mwaana òpatxera a sopattuxiwa sothene,” “Mwaana mmoha ene a Muluku.” (Akol. 1:15; Yoh. 3:18) Ekhaikhai weera sooxuttiha iyo soowootha pooti okhala ntoko “ikwartelo solipaxa” sooxupa onyaanya. (2 Akor. 10:4, 5) Mene vaavo mpankaanyu eyo, nyuwo khamutthikenle waakhulela sooxuttiha iyo soowootha. — Afil. 3:13.

6. Mwaha wa heeni nyuwo muntthuneyaanyu ororomelaka weera ‘nsivelo noororomeleya na Yehova khanimmala’?

⁶ Nyuwo pooti opaka etthu emoha-moharu wa ele Biblya onxuttihaawe woohima sa nsivelo na Yehova. Vaavo nyuwo munvirihaanyu maxupo, ni munapatxera ohovela nsivelo na Yehova, mwiikoheke ha, ‘neereke etthu kinuupuwelaaka ti yeekhaikhai?’ Mulikanxere ohovela wanyu woohima sa nsivelo na Yehova ni masu emphwanyeya va Nsalmu 136:1 — yeeyo eri yoolepa ya mwaha ola. Mwaha wa heeni Yehova onhimaawe weera nsivelo nawe ti ‘noororomeleya’? Mwaha wa heeni masu eneera ‘nsivelo nawe noororomeleya khanimmala’ etthikelinwaaya ikwaha 26 va nsalmu nna? Ntoko nonnaahu, nsivelo noororomeleya wa atthu awe yooxuttiha yoopatxera ya mBiblyani, nno nnoolikana vantxipale ni sooxuttiha ikina soopatxera sa Biblyani mwaakhulenlaanyu. Muupuwelo wooweera Yehova khanwoonani okhala ootthuneya, naari khanoosivelani khaiyene ti weekhaikhai. Mukhootte yooxuttiha eyo, hiihaale ntoko mukhoonttaanyu sooxuttiha ikina soowootha!

7. Nvahe matakihero makina a soolepa seiyo sinniroromeliha nsivelo na Yehova.

⁷ MBiblyani sookhalamo soororomeliha sintxipale sinoonihera weera Yehova onnanisivela. Mwa ntakihero, Yesu aaleenle ha atthareli awe: “Nyuwo tootthuneyaaxa opwaha iphera sintxipale.” (Math. 10:31) Yehova mwaneene aaleenle ha atthu awe: “Kinnòlipiha, kinnòkhavihera, kinnòvarela ni ntata naka noloka.” (Yes. 41:10) Moone moota soolepa iya siraaya seekhaikhai. Yesu khenre ‘Nyuwo pooti okhala ootthuneya,’ ni Yehova khenre ‘Miyo pooti wookhaviherani.’ Opwaha mwa yeeyo, awo yenre ha: “Nyuwo tootthuneyaaxa” ni “Miyo kinnòkhavihera.” Wakhala weera munnahovela nsivelo na Yehova vaavo nyuwo munvirihaanyu maxupo, soolepa iya ohiya paahi sinrowa oweerihani wiisoona weera Owo onnoosivelani, mene iyo pooti woororomelihani osuwela weera Owo onnoosivelani. Soolepa iya ti seekhaikhai. Wakhala weera nyuwo munonvekela Yehova woohima sa soohovela sanyu ni wuupuwelela soolepa iya, munoowera ohima masu eri va 1 Yohani 4:16: “Nòsuwela [ni noororomela] osivela iwo Muluku oraiyeno ni hiyo.”a

8. Etthu heeni nyuwo muntthuneyaanyu opaka wakhala weera ikwaha ikina munnahovela weera Yehova onnoosivelani?

⁸ Menento etthu heeni nyuwo muntthuneyaanyu opaka wakhala weera ikwaha ikina nlelo munnahovela nsivelo na Yehova? Mulikanxere ele munuupuwelaanyu ni ele nyuwo musuwenlaanyu. Itthu nnuupuwelaahu pooti ohikhala seekhaikhai, mene nsivelo na Yehova, ntoko onxuttihaawe Biblya ti neekhaikhai. Wakhala weera khaninroromela weera Yehova onnanisivela nto nnoohiya mukhalelo awe wootepa otthuneya, nsivelo nawe. — 1 Yoh. 4:8.

MUUPUWELELEKE WEERA YEHOVA ‘ONNOOSIVELANI’

9-10. Etthu heeni Yesu aatthunaawe ohima ni masu “Atiithi ennoosivelani,” ntoko elempwalaaya va Yohani 16:26, 27? (Nwehe-tho efootu.)

⁹ Hiyo pooti oxuttera woohima sa nsivelo na Yehova nithokororaka etthu Yesu aalenlaawe atthareli awe: “Atiithi ennoosivelani.” (Mmusome Yohani 16:26, 27.) Yesu khahimme masu ala weera atthareli awe yiisooneke okhala nnene paahi. Mweekhaikhai, vaavo ninsomaahu soolepa soopatxera, ninnoonelela weera Yesu khaiyene aahima miyuupuwelo sa atthareli awe. Opwaha mwa yeeyo, owo aahima mwaha mukina woovirikana ni owo, yoowo ori nivekelo.

¹⁰ Yesu aahaaleela atthareli awe weera ehinvekeleke owo, mene evekeleke mwa nsina nawe. (Yoh. 16:23, 24) Waari wootthuneya awo osuwela eyo. Avinyererihiwakaru, pooti weeraka atthareli awe yaakhalano ntthuno noopaka nivekelo wa Yesu. Mwaha wooweera awo yaamusuwela ntoko nthamwene aya. Pooti weeraka awo yaamuupuwela weera mwaha wa onthamwene yaaraayano nuuwo, aamwiiwa mavekelo aya ni waaroihela Atithi awe. Menento, Yesu aahaaleela weera awo khayaatthuneya wuupuwela hiiho. Mwaha wa heeni? Mwaha wooweera owo aaleenle ha: “Atiithi ennoosivelani.” Ekhaikhai ele eneerela eparte sa sooxuttiha soopatxera sa Biblya woohima sa mavekelo. Muupuwele etthu entaphulelaaya eyo wa nyuwo: Moorweela mwa soosoma ya Biblya, nyuwo moomusuwela ni munnamusivela Yesu. (Yoh. 14:21) Mene hiihaale ntoko atthareli a eseekulu yoopatxera, nyuwo pooti ovekela ni nroromelo wa Muluku, musuwelaka weera “Owo ookhalano nsivelo wa nyuwo.” Nyuwo munnoonihera nroromelo wa masu ala emaara yootheene munanvekelaanyu Yehova. — 1 Yoh. 5:14.

MUSUWELEKE ONKHUMAAYAWO OHOVELA

11. Mwaha wa heeni Satana aarowaawe ohakalala waakhanle weera ninnahovela nsivelo na Yehova?

¹¹ Ohovela woohima sa nsivelo na Yehova onkhuma woowi? Nyuwo pooti waakhula weera ohovela iwo onkhuma wa Satana, ni eyo ekhaikhai. Diabo ‘ori anaasaka weera anikhuure’ ni owo aamuhakalala waakhanle weera ninnahovela nsivelo na Yehova. (1 Ped. 5:8) Mene nsivelo na Yehova noomweeriha onivaha nlivo, etthu yeeyo Satana ontthunaawe weera nuupuweleke weera khaninphwanela. (Aheb. 2:9) Mene taani aakela ohakalala waakhanle weera ninnahovela nsivelo na Yehova? Satana. Ni taani aakela ohakalala wakhala weera hiyo nookhulumuwa ni nnahiya onvarela Yehova? Ti Satana. Satana ontthuna weera nuupuweleke weera Yehova khannisivela. Menento, Satana ti yoole oyelenle nsivelo na Yehova. Menento, mwa soopaka sawe “sowarala,” owo onneerera onuupuweliha weera hiyo khaninsiveliwa ni Yehova ni weera Owo onnanittaruxa. (Aef. 6:11) Vaavo nnoonelelaahu etthu mwiittani ahu oneereraawe opaka, hiyo pooti olipiha nroromelo nahu ‘ninvirikanyihaka Diabo.’ — Yak. 4:7.

12-13. Moota heeni mukhalelo ahu woottheka nivanlaahu onneerihaaya ohovela nsivelo na Yehova?

¹² Yookhala etthu ekina ekhanle yooneeriha ohovela nsivelo na Yehova. Etthu heeni? Mukhalelo ahu woottheka nivanlaahu. (Nsal. 51:7 [51:5, NM]; Arom. 5:12) Yoottheka yoonirakameliha ni Mpattuxa ahu. Nave-tho yoonanariha muupuwelo ahu, murima ahu ni erutthu ahu.

¹³ Yoottheka ennaneeriha ohuupuwela nnene, eneerihaka wiivaha nthowa, oxupeya mmuupuweloni, ohivareleleya ni wuuliwa muru. Hiyo pooti okhalano miyuupuwelo iyo vaavo nimpakaahu yoottheka. Menento, miyuupuwelo iyo pooti okhumelela mwaha wa mukhalelo ahu woottheka yoowo ohinvarihana ni moota napattuxinwaahu woopatxerani. (Arom. 8:20, 21) Hiihaale ntoko ekaaro erino epenewu yoophuleya ehiineettaaya nnene, hiyo-tho ntoko atthu oohimalela, khanikhanle ntoko naapattuxinwaahu woopatxerani. Mwa yeeyo, khanintikhiniheya vaavo ikwaha ikina ninhovelaahu nsivelo na Yehova. Wakhala weera eyo enimweereya, nintthuneya wuupuwelela weera Yehova,“Muluku mutokwene ni òwopiha, [yoowo] . . . onawèrela sorera yale anòpola ni anatthimakela malamulo [awe].” — Neh. 1:5.

14. Moota heeni wuupuwelela nlivo onnikhaviheraaya osepa muupuwelo wooweera Yehova khannisivela? (Aroma 5:8) (Nwehe-tho ekuaadru “Mwiikosoopeke ‘ni oweera oraayano yoottheka.’”)

¹⁴ Ekhaikhai weera ikwaha ikina, hiyo ninniisoona weera khanimphwanela nsivelo na Yehova. Ni ohima ekhaikhai, hiyo khanaaphwanela nsivelo na Yehova, ni eyo enneeriha nsivelo nawe okhala noothanleya. Hiyo khannaakhela nsivelo na Yehova mwaha wa itthu nimpakaahu. Naari vareene hiiho, nlivo ninnakhuneela soottheka sahu, ni Yehova oonivaha nlivo nno mwaha wooweera onnanisivela. (1 Yoh. 4:10) Muupuweleke-tho weera Yesu aawenle waavuluxa anamattheka, ohiya atthu oomalela. (Mmusome Aroma 5:8.) Khaavo mutthu a hiyo onwera opaka itthu moomalela, ni Yehova khanweherera weera nipakeke itthu mwa mukhalelo owo. Vaavo nniiwexexaahu weera mukhalelo ahu woottheka pooti oneeriha ohovela nsivelo na Yehova, hiyo nnookhala oolikana ene okhootta muupuwelo owo woohovela nsivelo nawe. — Arom. 7:24, 25.

MUTHANLE OVIRELELA OKHALA OOROROMELEYA

15-16. Wakhala weera nnoovirelela okhala oororomeleya wa Yehova, etthu heeni nintthuneyaahu ororomelaka, ni mwaha wa heeni? (2 Samuel 22:26)

¹⁵ Yehova ontthuna weera nipakeke yoothanla yooreera ‘niiphiteerihaka wa yooworu.’ (Ola. 30:19, 20) Wakhala weera nnoopaka eyo nroromeleke weera Owo onoovirelela okhala oororomeleya wa hiyo. (Mmusome 2 Samuel 22:26.) Wakhala weera nnoovirelela okhala oororomeleleya wa Yehova, nroromeleke weera Owo onoonikhavihera ovilela maxupo eri poothe ninkumanaahuno mweekumini mwahu.

¹⁶ Ntoko nonnaahu, nookhalano mathowa ootheene weera nivirelele okhala oolipa emaara yeeyo ninkumanaahuno maxupo. Noosuwela weera Yehova onnanisivela ni onoorowa onikhavihera. Ti yeeyo Biblya onxuttihaawe. Wakhala weera ikwaha ikina ninnahovela nsivelo nawe, hiyo pooti wuupuwelela woohima sa ele ninsuwelaahu okhala ekhaikhai, ohiya woohima sa ele nnuupuwelaahu okhala ekhaikhai. Nivireleleke ororomela ekhaikhai ya mBiblyani weera nsivelo noororomeleya na Yehova ti noohimala.