Moota heeni woowiivaha etempu ni opaka mavekelo enkhuma vathi va murimani vanyu

1. Yehova ontthuna weera arumeyaawe epakeke eheeni? (Nwehe efootu.)

NYUWO mwaahaawelaka nikhavihero ni miruku munaasaka nikhavihero nawani? Hiyo noosuwela waakhula wa nikoho nna, hiyo pooti waasaasa nikhavihero na Yehova moorweela munivekeloni ni tiyeeyo Yehova onnivekelawe weera nipakeke ni owo ontthuna weera ‘ninvekeleke voohihiyerereya’ naari neere, ikwaha sintxipale. (1 Ates. 5:17) Hiyo nookhalano otaphuwa woonvekela Yehova ni onvekela miruku sooweettela mweekumini mwahu. (Mir. 3:5, 6) Yehova Muluku oovaha. Etthu enoonihera weera Muluku toovaha mwaha wooweera oonivaha eparakha yoovekela ikwaha sintxipale hiyo nintthunelaahu.

2. Eheeni ninkelaahu woona mwa yoosomeene yeela?

² Nivekelo yoovaha yootepa othanleya wa hiyo, menento mwaha woowaatteliwa miteko pooti okhala wooxupa ophwanya etempu weera nivekele ni pooti weera hiyo nintthuneya oreherera mavekelo nnanpakelaahu Yehova. Moohakalaliha, Biblya onnanikhavihera wa mukhalelo ene yoola. Mwa yoosomeene yeela, nnimoona moota nneeraahu niihiyereke etempu nittharaka ntakihero na Yesu nave tho nnimoona itthu sinku sootthuneya nikhanlaahu oohela mpuwa vaavo nimpakaahu mavekelo ahu weera nreherere mavekelo nnanpakelaahu Yehova.

YESU ANNIIVAHA ETEMPU WEERA AVEKELEKE

3. Eheeni Yesu aasuwelaawe woohima sa mavekelo?

³ Yesu aasuwela weera mavekelo etthu yootepa otthuneya wa Yehova,ahinaaye owa elapo ela ya vathi, Yesu aahoona moota aPapawe yaakhunlaaya mavekelo aalopwana ni athiyana oororomeleya. Mwa ntakihero, Yesu aari vamoha vaavo aPapawe yaakhunlaaya mavekelo yaakhuma vathi va murima va a Hana, Eliya, Davidi ni arumeyi akina oororomeleya. (1 Sam. 1:10, 11, 20; 1 Mam. 19:4-6; Nsal. 32:5) Khohiyono vasiyoni vene Yesu aaxuttinhaawe attharelaawe weera evekeleke voohihiyerereya eroromelaka weera Yehova aamwaakhula mavekelo aya!—Math. 7:7-11.

4. Ntakihero heeni Yesu onihiyenraawe?

⁴ Moorweela wa mavekelo Yesu ampakenlaawe Yehova owo oonihiyera ntakihero nootthara. Mpuwa wa muteko awe, Yesu annavekela voohihiyerereya. Owo aatthuneya wiihiyera etempu weera avekele mwaha wooweera owo annarukureriwa ni atthu antxipale. (Mar. 6:31, 45, 46) Owo annavenya oxeexelo weera akhale meekhaawe ni yootthuna weera avekele. (Mar. 1:35) Ekwaha emoha owo aavekela ohiyu wootheene ahinaaye opaka yoothanla yootepa otthuneya. (Luka 6:12, 13) Ohiyu aarowaawe okhwa, asuwelaka weera aakela oviriha maxupo ootepaxa ovila a yoothanleliwaawe, Yesu aavekela ikwaha sintxipale.—Math. 26:39, 42, 44.

5. Nttharaka ntakihero na Yesu, etthu heeni nintthuneyaahu opaka woohima sa mavekelo?

⁵ Ntakihero na Yesu ninnanixuttiha weera hiyo pooti nreene atthu oowaatteliwa ninnatthuneya wiihiyera etempu weera nivekele. Hihaale ntoko Yesu, hiyo nintthuneya ompaka programa weera nivekele, apaale nivinyaka woixelo naari nirooka okona. Vaavo nimpakaahu eyo, ninnamoonihera Yehova weera ninnavaha mwiitti ovekela. Murokora mmoha oneeriwa Lynne onnuupuwela moota owo oonenlaawe axutterakaru woohima sa mavekelo, owo ohimme ha: “Koonelelakaru weera miyo pooti onvekela Yehova ewoora eri yootheene, kaapatxera omoona Yehova ntoko nthamwenaaka, eyo yaakeeriha miyo otthuna wiireherera ni opaka mavekelo avamurimani!” Moohihovela antxipale a hiyo ninniisoonela ntoko murokora Lynne. Vano nrowe noone itthu sinku sootthuneya nikhanlaahu oohela mpuwa vaavo nimpakaahu mavekelo ahu.

ITTHU SINKU SOOTTHUNEYA NIKHANLAAHU OOHELA MPUWA NAAVEKELAKA

6. Moovarihana ni Apokalise 4:10, 11, Yehova omphwanela waakhela eheeni?

⁶ Munvuwihe Yehova. Murummwa Yohani moolohani mwawe aahoona etthu yootikiniha, owo aawoona asitokweene 24 wiirimu emukokhorelaka Yehova. Awo yannanvuwiha Muluku yeeraka: “Onapwanela ovuwa ni nttittimiho ni owerya.” (Mmusome Apokalise 4:10, 11.) Malaika oororomeleya tho aakhalano mathowa mantxipale enweeriha onvuwiha ni omuttittimiha Yehova. Awosa aamusuwela ni enkhala vamoha ni amusuwela nnenesene Yehova ni tho malaika ala ennasuwela mikhalelo sa Yehova ni itthu sootheene owo opankaawe, vaavo awosa enwehaya itthu sootheene owo opankaawe ennakhalano nthuno nonvuwiha.—Yobi 38:4-7.

7. Mathowa heeni nraahuno onvuwiha Yehova?

⁷ Hiyo tho ninnatthuneya onvuwiha Yehova moorweela mwa mavekelo ahu, nimuleelaka mwaha wa heeni nimmutikhinaahu nave nimmuttittimihaahu. Mwarowa omusoma Biblya, mweerere wiiwexexa mikhalelo heeni sa Yehova nyuwo sinoosivelanixa. (Yobi 37:23; Arom. 11:33) Avinyaka, mmuleele Yehova mwaha wa heeni nyuwo sinoosivelayanixa mikhalelo sene seiya. Moota woonvuwiha Yehova, ori omuxukurela mwaha wa itthu sootheene onnipakelaawe ni onaapakelaawe asinnihu. Yehova onnanikosoopa ni onnanaakiha.—1 Sam. 1:27; 2:1, 2.

8. Mathowa heeni nraahuno enneeriha omuxukurela Yehova? (1 Atesalonika 5:18)

⁸ Mmuxukureleke Yehova. Hiyo nookhalano mathowa mantxipale enneeriha omuxukurela Yehova mmavekeloni mwahu. (Mmusome 1 Atesalonika 5:18.) Hiyo pooti omuxukurela Yehova mwaha wa itthu sootheene sooreera nraahuno, mwaha wooweera, yoovaha eri yootheene yoomalela enakhuma wa Yehova. (Yak. 1:17) Mwa ntakihero, hiyo pooti omuxukurela Yehova mwaha wa itthu sootheene sooreera owo opattunxaawe. Hiyo pooti omuxukurela Yehova nimuleelaka moota ninxukurelaahu mwaha wa ekumi ahu, amusi ahu, asinthamwenaahu ni yooweherera ahu ya muhoolo nave tho ninnatthuneya omuxukurela Yehova mwaha wa eparakha onivanhaawe yookhala asinthamwene awe.

9. Mwaha wa heeni nihintthuneyaahu ottiwala omuxukurela Yehova?

⁹ Apaale ontthuneya wiilipihera weera nuupuwelele mathowa nraahuno oomuxukurela Yehova. Mwaha wooweera atthu antxipale mahukwaano toohixukururela. Awosa ennaviriha etempu yintxipale weera ephwanye itthu entthunaaya, ehiyaka woonihera oxukurela itthu eraayano. Nahiya mukhalelo owo onivoleelaka pooti opatxera mavekelo ahu okhala elista ya ovekela itthu paahi. Menento weera eyo eheereye, nintthuneya omuxukurela Yehova mwaha wa itthu sootheene owo onipakenlaawe.—Luka 6:45.

10. Oxukurela waamukhavihenre moota heeni murokora ole oviriha maxupo avirihaawe? (Nwehe efootu.)

¹⁰ Okhala atthu ooxukurela onooneeriha ovilela maxupo. Moone ntakihero na murokora mmoha Kyung-sook va Owehaweha a 15 a Janeiro a 2015. Mameediku yaamulela weera owo ookhalano câncer nave aamwaramwareya. Owo ohimme weera: “Osuwela weera kookhalano eretta waakhala ntoko kaarimweera ohommwa ni waakhala nto ekumi aka yaaroomala nave kannova vantxipale.” Eheeni yaamukhavihenre murokora ola ovilela maxupo ale? Owo ohimme weera ohiyu wootheene ahinaakuve orowa okona, owo annawela mpithela mwa eprediyu aakhalaawe annapatxera onvekela Yehova moowiiwanyeya amuxukurelaka mwaha wa itthu sinku seereñye nihiku nene nenne, avinyaka owo annakhala oomaaleleya ni annamulela Yehova moota ommusivelaawe. Murokora ole aahoonelela weera Yehova onnaakhavihera arumeyi awe oororomeleya vaavo anvirihaaya maxupo ni weera tho nookhalano mareeliho mantxipale mweekumini opwaha maxupo. Hihaale ntoko murokora Kyung-sook, hiyo tho nookhalano mathowa mantxipale enneeriha omuxukurela Yehova nnaamweera nivirihaka maxupo viinaano va. Onvekela Yehova ni omuleela moota nimmuxukurelaahu pooti onikhavihera ovilela ni okhalano muupuwelo wa eriyari-neeriyari.

11. Yesu atthikelakaru wiirimu mwaha wa heeni oohuseraawe yaatthuneyaaya olipa murima weera evirelele oleleera?

¹¹ Munvekeleke Yehova olipa murima weera nwere olaleera. Ahalelaka vakhaaneene Yesu otthikela wiirimu owo aawuupuxera oohuseraawe weera yaatthuneya ovaha onamoona, “o Yerusalemu ni o Yudeya wothene ni o Samariya mpaka mukhwipi mwa elapo.” (Mit. 1:8; Luka 24:46-48) Evirakaru etempu vakhaaneene asitokweene aYuda yaamutthuka murummwa Pedru ni Yohani nave yaahaakuxera osinedriu, ephiyakaru wu yaahaakhoottihera olaleera ni yaawopopiha. (Mit. 4:18, 21) Pedru ni Yohani yoonenle hayi?

12. Moovarihana ni Miteko 4:29, 31 eheeni oohusera yaapankaaya?

¹² Pedru ni Yohani yoopopihiwakaru naahooleli aYuda awo yaahimme ha: “Varerá vamaithoni va Muluku owìwelelani nyuwo ompwaha Muluku, muthorihe yenyu ene, wona wi hiyo khannawerya ohiya wuluma seiyo nònnahu ni nìwalahu.” (Mit. 4:19, 20) Pedru ni Yohani etaphuliwakaru, arummwa yaapaka nivekelo envekelaka Yehova weera aakhavihere ovirelela opaka yootthunaawe, awo yaavekenle ha: “Pwiya, owehe sowopopiha saya ni wàvahe akapora á wi elaleye nsu ná n’owerya wothene.” Yehova ahakhula nivekelo nna na ohusera ale.—Musome Miteko 4:29, 31.

13. Eheeni ninxutteraahu ni ntakihero na munna Jin-hyuk?

¹³ Wakhala weera guvernu ookhoottiha olaleera, hiyo nintthuneya otthara ntakihero na arummwa nivirelelaka olaleera. Tiyeeyo apankaawe munna mmoha oneeriwa Jin-hyuk owo aatthukiwa mwaha wooheerela eparte epoliitika, areene okadeya owo annaakosoopa maperesu makina yaari iseela ikhaanene owo eerelinwe weera atthekuleke ni maperesu makina wakhala weera awo anhaawela etthu. Owo aakhoottiheriwa wuuluma yeele eri etthu ohela mpuwa nyaha sa mBiblyani, owo anvekela Yehova weera anvahe olipa murima ni oomaaleleya weera awere olaleera ikwaha sootheene eraawe akhalekeno eparakha. (Mit. 5:29) Jin-hyuk ohimme ha: “Yehova aahakhula mavekelo aka akivahaka olipa murima ni osuwela. Miyo kaapatxera opakiha soosoma sa Biblya mpuwa mwa iminutu 5 va mulako va iseela, ohiyu miyo kannalepa ikarta seiyo keeraaka kawinnyerere maperesu nihiku naattharelana.” Hiyo tho nroromeleke weera Yehova onoonikhavihera ovara muteko olaleera. Hiiho ntoko Jin-hyuk, hiyo tho pooti ovekela nivekelaka olipa murima ni miruku.

14. Etthu heeni enkela onikhavihera ovilela maxupo? (1 Pedru 5:6, 7)

¹⁴ Munvekele nikhavihero Yehova weera nwere oviriha maxupo. Antxipale a hiyo ninnaviriha maxupo, ohiya paahi oothoiwa itthu sa weerutthuni mene nto maxupo ammuupuweloni tho. Antxipale ahaayeleela yaale yaasivelaaya mookhwaani akina ennaviriha maxupo veemusini, oottharatthariwa naari maxupo makina. Iretta ni ikhotto sinnantxeerera maxupo awo. Mmuhuleleke murimaanyu Yehova mmuleelaka itthu sootheene munvirihaanyu ntoko hiihaale mummulelaanyu nthamwene anyu, nyuwo muroromeleke weera Yehova “onosamaryani.”—Mmusome 1 Pedru 5:6, 7.

15. Mavekelo enrowa onikhavihera moota heeni ovilela maxupo? Nvahe ntakihero

¹⁵ Etthu enkela onikhavihera ovilela maxupo ori, ‘ohihiya ovekela.’ (Arom. 12:12) Yehova oosuwela itthu arumeyi awe envirihaaya, Yehova “onnìwa sowikhupanyera saya ni onnàvuluxa.” (Nsal. 145:18, 19) Kristie, piyoneira mmoha a iyaakha 29, onnaakhulela eyo. Owo aapatxera ovoreiwa ni eyo yannamweeriha weera ariipiweke murima, noovira etempu owo ahoonelela weera ameyawe yaakhalano eretta yeeyo yaakela owiiva moohipisa. Kristie ohimme ha: “Miyo kannavekela voohihiyerereya kinvekela Yehova weera okivahe ikuru wa nenne nri nihiku, opwaha mwa yeeyo, miyo kaavirelela woonela mithukumano isemana sootheene ni opaka yoosomaaka ya omeekha. Nivekelo naakikhavihenre oviriha etempu ele yooxupa. Miyo nkaahovela weera Yehova annakikhavihera wuupuwelela weera Yehova annakikhavihera yannakikhavihera okhala oomaaleleya, ninlelo erettaaka kheyaalamme mene nto osuwela weera Yehova annaakhula mavekelo aka eyo yannakivaha murettele ni omaaleleya.” Nintthuneya wuupuweleleke weera Yehova onnawera “wàvuluxa atthu òrera murima.”—2 Ped. 2:9.

16. Mwaha wa heeni nintthuneyaahu okhaviheriwa ni Yehova weera niwere ovilela sooweereriwa?

¹⁶ Munvekeleke Yehova nikhavihero weera nwere ovilelela weereriwa. Mwaha wookhala atthu oohimalela hiyo nintthuneya wiilipihera weera nihipake etthu yoonanara. Menento Satana oneereke opaka ele onweraawe weera hiyo nimorele mmuraakhoni mmo woopaka itthu soonanara. Etthu emoha onvarelaawe muteko weera animorihele mmuraakhoni mmo, ori otthekula woohirerela. Matthekulelo moota awo pooti osariha mmuupuweloni mwahu itthu soonanara, minyuupuwelo sene ti seiya sinkhenle oonipakiha soottheka itokotoko ni oniyeleeliha onthamwene nraahuno ni Yehova.—Mar. 7:21-23; Yak. 1:14, 15.

17. Nanvekela vale etthu Yehova etthu heeni nintthuneyaahu opaka? (Nwehe efootu.)

¹⁷ Naatthunaka owina yooweereriwa yoopaka etthu yoonanara nintthuneya okhaviheriwa ni Yehova. Yesu aahela mpuwa munivekeloni mwaha owo eeraka: “Ohinihiye wuwela mowokiwani, mene onivuluxe mwa sotakhala.” (Math. 6:13) Yehova ontthuna onikhavihera, mene hiyo nintthuneya ovekela nikhavihero nawe nave tho nintthuneya opaka itthu moovarihana ni mavekelo ahu. Nintthuneya opaka ele ninweraahu weera nisepe minyuupuwelelo ni miruku soonanara sa elapo ela ya Satana. (Nsal. 97:10) Vaavo nimmusomaahu Biblya, ninnasariha muupuwelo ahu miruku sooreera. Orowela mithukumano ni ovara muteko woolaleera onoonikhavihera tho okosoopa miyuupuwelo sahu avinyaka Yehova onookwanihera yoolaihera awe ya ohinihiya neereriwaka opwaha ikuru nraahuno.—1 Akor. 10:12, 13.

18. Etthu heeni mutthu ti mutthu a hiyo ontthuneyaawe ovirelela opaka?

¹⁸ Mahikwaahu ala ootheene hiyo nintthuneya ovekela weera nivirelele okhala oororomeleya mpuwa mwa mahiku ala oomalihera ooxupa okhala. Mwiihiyereke etempu nenne nixiiye weera mpake mavekelo ni murima anyu wootheene. Mmuxukureleke ni munvuwihe Yehova mwaha wa itthu sootheene opankaawe. Yehova ontthuna weera hiyo ‘nimuleeleke itthu sootheene siri va murimani vahu’ moorweela mwa nivekelo. (Nsal. 62:9 [62:8, NM]) Munvekeleke nikhavihero weera oovaheeni olipa murima mwaalaleeraka. Munvekeleke ikwaha sootheene weera ookhavihereni ovilela maxupo ni weereriwa ori poothe muneeraanyu mukumanekeno. Muhimuhiye mutthu naari etthu ewootxeelihakani onvekela Yehova. Vanto Yehova onaakhula moota heeni mavekelo ahu? Nnoorowa woona waakhuliwa wa nikoho nno nootthuneya yoosoma enttharelana.