Korneliu aahaakhela munepa wootteela

Esidade ya oKesareya aakhalawo mutokweene aanakhotto a oRoma iitthaniwa Korneliu. Owo khaiyene aari muyuda, mene annattittimihiwa ni ayuda. Korneliu aari mutthu oovaha ni wannamusivela waakhavihera atthu oohaawa. Owo annamuroromela Yehova ni ikwaha sootheene annanvekela owo. Nihiku nimoha, nlaika naamukhumelela Korneliu ni naamweerela: ‘Muluku ohiiwa mavekelo aa. Vano waarume asilopwana akina erowe esidade ya oYope, weera yamukuxe Pedru.’

Moowaakuveya, Korneliu aahaaruma alopwana araru orowa oYope. Mwa yeeyo, oYope iwe Pedru aakhalano yooloha. Owo aahoona inama seiyo ayuda yeeraaya ehikhuureke, avinyaka, owo aahiiwa nsu nenno naamuleela weera akhuureke inama iye. Mene Pedru khaatthunne. Ni owo aaheera: ‘Miyo nkintonko ohimwiiwelela Muluku kikhuuraka inama seiyo nlamulo ninkhoottihaaya.’ Nsu nne naaheera: ‘Ohuupuwele weera inama iyo khaiyene ti sootteela. Muluku ookhaliha sootteela.’ Avinyaka Muluku aamuleela Pedru: ‘Alopwana araru ari va mulako ewaasaka weyo. Orowe naawo.’ Pedru aarowa ohula mulako ni aahaakoha alopwana ale, weera mwaha wa heeni yaaraaya vale. Awo yaahaakhula: ‘Korneliu mutokweene aanakhotto a oRoma tonirumme owa nno. Owo ovekenle weera nookuxe mpaka owannyawe oKesareya.’ Nto alopwana ale yaakhala iwe aaraawewo Pedru mpaka nihiku naattharelana. Oxaakaru, Pedru ni asilopwana ale araru, ni asinna akina yaakhala oYope yaarowa oKesareya.

Pedru aphiyakaru, Korneliu aakokhora ohoolo wawe. Mene Pedru aaheera: ‘Ovinye! Miyo ka mutthu-tho ntoko weyo. Nnaamweera ayuda ehivolowaka empa ya atthu ehikhanle ayuda, mene Muluku ookiruma owa owannyaa nno. Txontte nkakileela, mwaha wa heeni weyo waarummaawe alopwana ale weera ekiweele?’

Korneliu aahaakhula: ‘Mahiku 4 a muttuli, miyo kanvekela Muluku ni nlaika nimoha naahoowa wa miyo. Owo aakileela weera wannatthuneya owiitthana weyo. Txontte, onxuttihe itthu sootheene Yehova ontthunaawe weera onleele.’ Pedru aaheera: ‘Vanonto koosuwela weera Muluku khampwattha mutthu aareene muyuda naari hooye. Owo onnaakhulela weera mutthu ori poothe amukokhoreleke.’ Pedru aapatxera oxuttiha itthu sintxipale woohima sa Yesu. Mene Korneliu ni atthu akina yaari iwe, yaahaakhela munepa wootteela ni ootheene yaapatisiwa.