Yesaya
14 Yehova onommorela ikharari Yakobe,+ ni onootthikela omuthanla Isarayeli.+ Owo onoowiiriha okhala* mulaponi mwaya,+ nto anamurwa anootakaahana naawo, akhaleke vamosa ni etthoko ya Yakobe.+ 2 Nto anamurwa awo, animwaakuxa* yaattikixerye owannyeya. Vano, aisarayeli anoowiiriha anamurwa awo okhala arumeyi aya alopwana ni athiyana,+ mulaponi Yehova aavahale awe. Nto aisarayeli animwaavara atthu yaale yaavanre. Nave ale khalai yaakhanyererya ovara muteko,* vano anrowa owiiwelelaka.
3 Nihiku Yehova onrowa awe woomumulihani ohaawa ni oxanka wanyu ni muteko woolipa mwaavarihiwa anyu ntoko ipottha,+ 4 nyuwo munoomutheya mwene a oBabiloonia, ni moolumo ala:
“Ole aakhanyererya atthu akina ovara muteko,* vano oomora!
Opuheriwa woomala!+
5 Yehova ohintakasa ekopo ya atakhali,
Ohintakasa ekopo ya anamalamulela,+
6 Yaawo yaamana atthu voohihiyererya ni ananariwe ene,+
Yaawo yaalupattha atthu yaalamulela aya, ananariwe ene ni voohihiyererya.+
7 Vano, elapo yootheene eri ni murettele, yootaphuwa.
Atthu annitthapa atteeliwe ene murima.+
8 Hata miri siniitthaniwa xuniiperu, sootteeliwa murima mwaha wa nyuwo,
Vamosa ni miri sa oLiibano siniitthaniwa seeturu.
Iyo sinihimya wiira: ‘Okhuma okathi mmonre anyu,
Khuuvo mutthu oniikittha miri, onirwa oniikittha’.
9 Okathi mwaaronwe anyu Mmahiye,*
Yaahikhumelela manyaku-nyaku manceene mwaha wa nyuwo.
Mwaha wa nyuwo, ale ari mmahiye annivenya,
Aayo, makhulupale* ootheene oohaaxa a mulaponi.
Eyo enniwiiriha mamwene ootheene a maloko, ovenya veehiceni vaya.
10 Ootheene aya annipacerya olavula ahimyaka wiira:
‘Nyuwo mootteettheya ntoko hiyo,
Vano munoolikana ni hiyo.
Nyuwo munimpaathela miyunku,
Nave muniikhuneela miyunku’.
12 Nyuwo oowaarya, mwaana a nivoroxa,*
Nyuwo moomora wiirimu!
Vaweryaneyale sai omoroxeliwa vathi,
Nyuwo mwaaxintta maloko?+
13 Moohimya vamurimani vanyu wiira: ‘Miyo kinoowela wiirimu.+
Miyo kinooweliha ehice aka ovikana itheneeri sa Muluku,+
Kinookilaathi vasulu va mwaako onikokhoreliwa Muluku,*
Mapuro ootepa orekama a onorti.+
14 Kinoowela vasulu va meeku;
Kinimwiikhaliha ntoko Muluku Muulupalexa’.
15 Masi, nyuwo munooriheliwa Mmahiye,*
Munooriheliwa nlitti nootepa wiixa.
16 Ale aniwoonani, anrowa woowehexexakani;
Awo animoowehani oratteene, ahimyeke wiira:
‘Ola khahiyo mulopwana yoole aaxekexa elapo?
Yoole aattettemeliha ilapo?+
17 Yoole iirinhe elapo okhala ntoko othako,
Yoole opwexakanse ipooma,+
Ni aakhootta waahiya aperesu awe otthikela owaani?’+
18 Mamwene ootheene a mulaponi,
Aayo, ootheene aya, yaahivithiwa mwa nttittimiho,
Khula mmosa aahivithiwa mmahiye* mwawe.
19 Masi nyuwo khamunvithiwa mmahiye,
Ntoko eritta yoothanyiwa,
Ekhuneeliwe ni mirutthu sa atthu yiiviwe ni espaata,*
Yaawo anriheliwa nlitti noosareya maluku.
Nyuwo munilikana ni murutthu oninyakeliwa.
20 Khamunrowa ovithiwa vamosa ni mamwene,
Okhala wiira moohonona elapo anyu,
Moowiiva atthu anyu.
Masina a osuulu anyu, khanrowa-tho wuupuweliwa.
21 Mulokiherye opuro wiira yiivakasiwe anaawe,
Mwaha wa mulattu wa amuhavinre awe.
Siiso, awo khanrowa ovenya wiira akuxe elapo,
Ni asarye ipooma saya moolumwenkuni mootheene”.
22 Yehova a anakhotto onihimya wiira: “Miyo kinrowa waatuphela”.+
Nave-tho, Yehova onihimya wiira: “OBabiloonia kinoomala-maliha nsina naya, kinimwaamala-maliha ale ahanle, kinoomaliha osuulu aya vamosa ni ale anrowa oyariwa ohoolo”.+
23 Yehova a anakhotto onihimya wiira: “Kinimwiiriha elapo ela okhala ya anamunyoma* ni okhala maratta. Nave kinoopwetexa voomalela”.*+
24 Yehova a anakhotto olapha wiira:
“Eyo enimwiiraneya ntoko kiniphavela aka,
Nave enimwiiraneya ntoko kilakenke aka.
25 Kinimwaanyaanya asiiria mulaponi mwaka,
Nave kinimwaanyakelasa vasulu va miyaako saka.+
Kinookumiha mwiri oniteexaniwa miritti, ahenle aya mmakhatani mwa atthu aka,
Kinimwaarula atthu aka muritti ori mmakhatani mwaya”.+
26 Ela ti etthu elakeliwe wiirihiwa elapo yootheene ya vathi,
Nave iya ti ikuru sa Muluku onrowa awe orumeela wiira ohukhumu maloko ootheene.
27 Yehova a anakhotto oolakela wiira yiireye siiso,
Nto ti pani onrowa okhoottiherya eyo wiiraneya?+
Owo ohookola ntata nawe,
Ti pani oniwerya ottikiha?+
28 Mwaakha mwene Akhazi aakhwiiye awe,+ vaahilaleiwa wiira:
29 “Nyuwo atthu a oFilistia, muhitteeliwe murima,
Mwaha woowi ehintiwa ekopo ya mutthu ole oomanani,
Okhala wiira maace* a enowa,+ annitothola enowa yootakhala,+
Nave osuulu aya onrowa okhala inowa sootakhala ni soowaakuva weetta.
30 Mwaana oopacerya oyariwa a mutthu oowiiyeviha,
Onrowa olyaaka mpakha ovona,
Nave mutthu oohaawa onrowa wummaathiki ohoovaka etthu,
Masi amusi anyu kinoowiiva ni etala, nave ale anrowa ohala mweemusini mwanyu, animwiiviwa.+
31 Mwiikhupanyeryeke vamukhora! Mukhuweleke mpooma!
Nyuwo muttetthe wa oFilisti, atthu anyu ootheene anooriipiwa murima,
Okhala wiira onnoorwa mwiixi okhumaka onorti,
Nave anakhotto aya khanivalaana”.
32 Anrowa owaakhula exeeni anamitthaka a mulaponi?
Awo animwaakhula wiira Yehova oomuteka alisenso a oSiyoni,+
Nave atthu awe oowiiyeviha, anrowa otthyawelaka weiwo.