Silempwale ni Marko
1 Opacerya wa ihapari sooreera sa Yesu Kristu, Mwaana a Muluku. 2 Profeta Yesaya oolepa wiira: “(Mwiiwe! Kinnimuruma namitthaka* aka ohoolo wanyu* wiira oolokiheryeni ephiro).+ 3 Ninniiwanyeya nsu na mutthu onikhuwela moothakoni, ohimyaka wiira: ‘Mulokiherye ephiro ya Yehova!* Mookolole istaraata sawe’”.+ 4 Yohani Mpatisa aari moothakoni, aalaleeryaka atthu wiira opatiso ti ethoonyeryo ya orukunuxa murima, wiira mutthu oleveleliwe itampi.+ 5 Nto, atthu a muttetthe wootheene wa oYudeya ni atthu ootheene yaakhala oYerusalemu, yaanirowa wa Yohani. Awo yaanipatisiwa* ni Yohani mmuro Yordani. Nave yaanihimya itampi saya ohoolo wa atthu ootheene.+ 6 Yohani aawara nlaya na manri a ekamelo ni esintu ya esapala muyuununi mwawe.+ Owo aalya isoope ni oravo wa* mutakhwani.+ 7 Yohani aanaalaleerya atthu oriki: “Ottuli waka, onnoorwa mutthu mukina oowerya okivikana miyo, yoowo kihimphwanela aka wuurama wiira kitaphule mikhoyi sa isantaalya sawe.+ 8 Miyo kihoopatisani ni maasi, masi owo onrowa woopatisani ni ikuru soowaarya”.+
9 Mahiku ene yaawo, Yesu aahikhuma oNazarethi wa oGalileya ni aahipatisiwa ni Yohani mmuro Yordani.+ 10 Nto okhumaka-ru mmaasini, aahiweha erimu ehuleyaka. Vano Yesu aahoona ikuru sa Muluku sikhuruwaka ntoko epompa,* simurweelaka yoowo.+ 11 Nave-tho, naahiiwanyeya nsu naakhuma wiirimu, nriki: “Nyuwo mwa Mwanaka, kinimphentexa aka, onikihakalaliha vanceene”.+
12 Niinaano-ru, ikuru soowaarya saahimwiiriha orowa moothakoni. 13 Nto, aahikhala weiwo mahiku 40, eehereriwaka ni Satana.+ Nave-tho moothakoni-mmo saahikhala inama sa mutakhwani. Masi malaikha yaanimukhaliherya.+
14 Nuumala Yohani ovariwa, Yesu aahirowa oGalileya+ onaalaleerya atthu ihapari sooreera sa Muluku,+ 15 iiraka: “Okathi waathanliwe woophiya, nave Omwene wa Muluku ori vakhiviru. Murukunuxe mirima sanyu+ ni mwaamini ihapari sooreera”.
16 Yesu eettaka okerekhere wa ephareya ya oGalileya, aahinweha Simoni ni Andreya,+ muhima awe Simoni, arihelaka matthavi aya mphareya,+ okhala wiira yaari atothi a ihopa.+ 17 Nto Yesu aahaahimeerya wiira: “Mukitthareke, miyo kinimookhalihani atothi a atthu”.+ 18 Okathi ene yoowo, awo yaahihiya matthavi aya, anamutthara Yesu.+ 19 Avikanaka vakhaani, aahinweha Yakobo ni muhima awe, aihaniwa Yohani, yaawo yaari anamwane a Zebedeyo. Awo yaari mukalawani, alokiheryaka matthavi aya.+ 20 Nto okathi ene yoowo, Yesu aahiwiihana. Vano yaahimuhiya paapa aya, Zebedeyo, ori ene mukalawani ni anamuteko, anamutthara Yesu. 21 Nuumala-vo, yaahirowasa oKafarnawu nuuwo.
Ephiyaka-ru esaabadu, Yesu aahikela musinagoga,* onapacerya wiixuttiha.+ 22 Vano atthu yaahitikinihiwa vanceene ni moota aixuttiha awe, maana itthu aixuttiha awe saakhuma wa Muluku, ohiya ntoko alipa-oowiixuttiha nlamulo.+ 23 Okathi ene yoowo, aahikhala mulopwana mmosa musinagoga-mmo,* aavariwe ni nlaikha nootakhala. Nto mulopwana owo aahikhuwela, oriki: 24 “Exeeni erina anyu ni hiyo, nyuwo Yesu munazarethi?+ Murwenle onipwetexa? Kinnoosuwelani saana. Nyuwo murummwale ni Muluku!”+ 25 Vano Yesu aahipwapwela nlaikha nle nootakhala, oriki: “Mmaale! Mmukhume mutthu owo!” 26 Nlaikha nlo nootakhala, naahimurihela vathi mulopwana owo, nnamuthukumeliha, nikhuwelaka ni nsu noorunya. Nuumala-vo, naahimuhiya. 27 Nto, atthu ootheene yaahitikinihiwa vanceene, anakohana yaawo-ru, ariki: “Exeeni ela? Ola mwiixuttiho wa niinaano! Owo ookhalana owerya wa woomola malaikha ootakhala, nto malaikha awo annimwiiwelela”. 28 Siiso, itthu sootheene Yesu aapaka awe, saahisuweliwa moowaakuveya mapuro ootheene a elapo ya oGalileya.
29 Vano, Yesu aahikhuma musinagoga,* onarowa owannyawe Simoni ni Andreya, ori ene ni Yakobo ni Yohani.+ 30 Amaathi awe Simoni,+ yaarimummaathi, ewereiwaka efeepere.* Niinaano-ru, awosa yaahimuleela Yesu. 31 Nto, Yesu aahiwaattamela, aahaavarela ntata ni aahiweemexa. Vano, efeepere* yaahaavira, enapacerya owaapeela yoolya.
32 Nsuwa nikelaka-ru, atthu yaahipacerya omuruuhela Yesu aretta ootheene ni ale yaavariwe ni malaikha ootakhala.+ 33 Vano, atthu ootheene a epooma ele, yaahithukumana vamukhora wa empa ele aari awe Yesu. 34 Owo aahaapenuxa atthu anceene yaawereiwa iretta soovirikana+ ni aahoomola malaikha ootakhala manceene. Masi kheemererya wiira malaikha awo elavuleke, maana yaanimusuwela okhala Kristu.*
35 Vahalaka oxa, nsuwa nihinatthi okhuma, Yesu aahivenya onarowa opuro wahaakhanle atthu, onapacerya ovekela.+ 36 Masi, Simoni ni ale aarina awe, yaahirowa omphavela Yesu. 37 Nuumala omphwanya, yaahimuhimeerya wiira: “Atthu ootheene animoophavelani”. 38 Nto Yesu aahiwaakhula oriki: “Nrowe opuro mukina, mittetthe siri vakhiviru, wiira nave kaalaleerye atthu a weiwo, maana eyo ti etthu kirwenle aka”.+ 39 Vano, Yesu aaheetteetta, aalaaleeryaka atthu musinagoga* mwaya, muttetthe wootheene wa oGalileya, nave-tho aanoomola malaikha ootakhala.+
40 Weiwo, namakokho* mmosa aahimwaattamela Yesu, onamuxonttela okhoromme ene, ohimyaka wiira: “Mwaphavela-ru, munoowerya okipenuxa”.+ 41 Nto, Yesu aahimmorela ikharari namakokho* ole, aahookola ntata nawe, aahimukwata, onahimya wiira: “Kinniphavela! Mpenuwe”.+ 42 Niinaano-ru, makokho* awe yaahimmalela, nto owo aahikhala saana. 43 Vano, Yesu aahimuhiya orowaka, ni aahimuleela saana, 44 oriki: “Phoole, muhimuleele mutthu, masi murowe mwaixooniherye wa namukuttho. Nave, mwavahe mukuttho onivekeliwa ni nlamulo na Moise mwaha wa openuxiwa wanyu,+ wiira vasuweliwe wiira mookhalihiwa saana tthiri”.+ 45 Akhumaka-ru vale, mulopwana ole aahipacerya olaleya mapuro ootheene. Tivonto, Yesu khaawerya okela mpooma ooniwaka. Nto aanikhala mapuro yahaattela oviriwa. Hata vari siiso, atthu yaanirwa, akhumaka ipantta sootheene.+