Silempwale ni Marko
9 Yesu aahaahimeerya-tho wiira: “Kinooleelani ekeekhai wiira, aakhala ari vaava ahinrowa okhwa, ahoonale toko Omwene wa Muluku orwaaka ni owerya”.+ 2 Nuuvira mahiku 6, Yesu aahimukuxa Pedru, Yakobo ni Yohani, khurowa ni yaawo paahi vamwaako woorekama. Nto Yesu aahithatuwa ohoolo waya.+ 3 Malaya awe a ota yaanaarya vanceene ni yaahitteela vanceene. Nto olumwenku wootheene, khuuvo mulipa-ookattha ikuwo aarowa otteeliha siiso. 4 Nave, Eliya ni Moise yaahikhumelela, enavaanela ni Yesu. 5 Nto, Pedru aahimuleela Yesu wiira: “Rabi,* vaareera hiyo okhala vaava. Nrowe nteke itenta* tthaaru, emosa yawinyu, ekina ya Moise, nave-tho ekina ya Eliya”. 6 Tthiri Pedru khaasuwela yoohimya, maana awo yaamoova. 7 Nave naahikhumelela neeku, naakhuneela. Vano, naahiiwanyeya nsu+ nikhumaka muneekuni-mmo, naahimya wiira: “Ola Mwanaka, kinimphentexa aka.+ Mmwiiweleleke yoowo”.+ 8 Niinaano-ru, awiixutti yaahiwehaweha, masi khiyaamoonale mutthu mukina ohikhanle Yesu paahi.
9 Okathi yaakhuruwa aya vamwaako, Yesu aahaalopola oratteene awiixutti ale, wiira ahimuleele mutthu itthu iye yoonale aya,+ Mwaana a Mutthu ohinatthi ohihimuxiwa mookhwaani.+ 10 Awo yaahiiwelela* moolumo a Yesu, masi nlelo yaanikohana ele Yesu aaphavela awe ohimya ni moolumo oowi ohihimuxiwa mookhwaani. 11 Nto, yaahipacerya omukoha Yesu ariki: “Xeeni alipa-oowiixuttiha nlamulo anihimya aya wiira Eliya+ ohaana opacerya orwa ohinatthi Kristu?”+ 12 Yesu aahiwaakhula oriki: “Tthiri, Eliya tonrowa opacerya orwa wiira olokiherye itthu sootheene.+ Nto, vanikhala sai olempwa wiira Mwaana a Mutthu ohaana ohaaxiwa vanceene+ ni onyoholiwa?+ 13 Masi kinooleelani wiira Eliya+ ohoorwa tthiri. Nave ntoko silempwale aya ni nuulumo na Muluku, awo aamwiiriha sootheene saaphavela aya”.+
14 Nuumala ophiya waari awiixutti akina, yaahiphwanya muttitthi muulupale wa atthu waarukurenrye ene, vamosa ni alipa-oowiixuttiha nlamulo, avaanyihanaka ni awiixutti ale.+ 15 Muttitthi ole wa atthu omoonaka-ru Yesu, waahitikinihiwa vanceene, onamutthimakela wiira omukohe ihaali. 16 Siiso, Yesu aahaakoha iiraka: “Exeeni munivaanyihana anyu?” 17 Nto mutthu mmosa aari ni muttitthi owo, aahimwaakhula wiira: “Mwiixuttihi, kihooruuhelani mwanaka mwaamulopwana okhala wiira ovariwe ni nlaikha nootakhala nimmwiiriha ohilavula ni ohiiwa.+ 18 Nlaikha nlo nuumala onvara, ninnimurihela vathi, onakhuma nipheru mwaano ni onalumanyiha maino, nave khonikhalana ikuru. Kihaavekela awiixutti anyu wiira yoomole, masi awo khawenrye”. 19 Yesu aahaakhula oriki: “Nyuwo atthu oohaamini!+ Kinrowa okhala ni nyuwo mpakha silini? Kinrowa woovilelani mpakha silini? Mukiruuhele-va”.+ 20 Tivonto, yaahimuroihela Yesu mwammiravo owo. Okathi nlaikha naamoonale aya Yesu, naahimurihela vathi mwaana ole. Nuumala omorela vathi, aanuupuruwa okhumaka nipheru mwaano. 21 Nto Yesu aahimukoha paapa awe mwaana ole, oriki: “Opacenrye silini wiira siisa?” Paapa awe aahaakhula wiira: “Opacenrye ori ene mwaamukhaani. 22 Nave ikwaha sinceene, nlaikha nlo ninnimurihela vaikho ni mmaasini, niphavelaka omwiiva. Masi vakhala wiira munniwerya ompenuxa, munimorele ikharari ni munikhaliherye”. 23 Yesu aahimuhimeerya oriki: “Xeeni ohimyaka wiira: ‘Vakhala wiira munniwerya’? Wa ale arina waamini, itthu sootheene sinniweryaneya”.+ 24 Niinaano-ru, paapa awe mwaana ole aahikhuwela, iiraka: “Miyo kinnaamini! Mukikhaliherye wuncererya waamini waka!”+
25 Okathi Yesu aawenhe awe muttitthi ole omutthimakelaka, aahipwapwela nlaikha nle nootakhala, oriki: “Weyo nlaikha nootakhala, nihiniiwa ni nihinlavula, ti miyo kinooruma wiira omukhume mwammiravo ola, ni ohimutthikele-tho!”+ 26 Nuumala okhuwela vanceene ni omuthukumeliha vaalupale, nlaikha nle naahimukhuma. Vano mwaana ole aakhala ntoko orimookhwa. Nto atthu anceene yaahimya wiira: “Ohookhwa!” 27 Yesu aahinvarela ntata, khunvenxa. Nto owo aaheemela. 28 Nuumala Yesu ophiya vatthokoni, awiixutti awe yaahimukoha wiiphiini, ariki: “Xeeni nihiwenrye ahu woomola nlaikha nle nootakhala?”+ 29 Yesu aahiwaakhula wiira: “Muthinto ola wa nlaikha nootakhala, khuuvo oniwerya woomola, ohipanke nivekelo”.
30 Yesu ni awiixutti awe yaahikhuma vale, anavira oGalileya. Masi owo khaaphavela wiira atthu asuwele vaari awe. 31 Yesu iira owiixuttihaka awiixutti awe, ni aaleelaka wiira: “Mwaana a Mutthu onrowa ovarihiwa ni ovahereriwa mmatatani mwa atthu, awo anrowa omwiiva.+ Hata amwiivaka, onrowa ohihimuxiwa nihiku na neeraru”.+ 32 Nnaamwi vari siiso, awo khiyaiwexenxe moolumo awe ni yaanoova omukoha.
33 Vano yaahiphiya muttetthe wa oKafarnawu. Okathi aari awe mpaani, Yesu aahaakoha awiixutti awe wiira: “Exeeni mwaanyakulihana anyu mustaraatani?”+ 34 Nto awo yaaroomaala, maana mustaraatani yaaninyakulihana aphavelaka osuwela ti pani aari mukhulupale. 35 Yesu aahikilaathi, owiihana arummwa 12, onaahimeerya wiira: “Ole oniphavela okhala oopacerya eriyari anyu, ohaana okhala ookiserya ni ohaana okhala murumeyi anyu”.+ 36 Vano Yesu aahimukuxa mwanamwane mmosa, omweemexa eriyari aya. Nuumala-vo, aahimukhupaarela, onaahimeerya awiixutti awe wiira: 37 “Ole onimwaakhela mwanamwane ntoko ola,+ mwaha wa nsina naka, onikaakhela miyo. Nave, ole onikaakhela, khonikaakhela miyo paahi, masi-tho onimwaakhela Ole okirumme”.+
38 Yohani aahimuhimeerya Yesu wiira: “Mwiixuttihi, nonweha mutthu oomolaka malaikha ootakhala mwa nsina nanyu. Nto hiyo niheererya omukhoottiherya, maana kheetta ni hiyo”.+ 39 Masi Yesu aahihimya wiira: “Muheererye omukhoottiherya, okhala wiira khuuvo onivara miteko sootikiniha mwa nsina naka, nuumala-vo onakihimyana itthu sootakhala. 40 Tthiri, ole ohinnivirikanya, ori ni hiyo.+ 41 Nave, kinooleelani ekeekhai wiira, ole onoovahani maasi oowurya mwaha wookhala awiixutti a Kristu,+ tthiri khonrowa wooceela waakhela etthuvo awe.+ 42 Masi, ole onimwiiriha mmosa a acikhaani ala anikaamini, ohiya waamini, fataari aatthukweleliwe muxikoni nxilo, oriheliwa mphareya.+
43 “Akhala wiira ntata nanyu ninnootthekihani,* mwiikitthe. Fataari ophwanya okumi murakanle ene, ohikhanle oriheliwa ni matata oomanli oGehena,* weiwo mooro ohinttipihiwa aya.+ 44* —— 45 Akhala wiira nnawu nanyu ninnootthekihani,* mwiikitthe. Fataari ophwanya okumi mututhunyaka, ohikhanle oriheliwa ni inawu soopiili oGehena.*+ 46* —— 47 Nave-tho, akhala wiira niitho nanyu ninnootthekihani,* murihele ottaiwene.+ Fataari okela Moomweneni mwa Muluku murina ene niitho nimosa, ohikhanle oriheliwa oGehena,*+ murina ene maitho oomanli, 48 weiwo miyunku sihinikhwa aya ni mooro ohinttipihiwa aya.+
49 “Tthiri atthu ootheene ahaana weeleeliwa ni mooro.+ 50 Maakha etthu yooreera. Masi, maakha yahiya osiva waya, munrowa owerya sai ottikiherya osiva waya maakha awo?+ Mukhalaneke maakha mookumini mwanyu+ ni mukhalaneke murettele mukina ni mukhwaawe”.+