Silempwale ni Yohani
5 Nuumala itthu iya, yaahikhala efesta+ ya ayuda, nave Yesu aahirowa oYerusalemu. 2 Vano, oYerusalemu, waattamela Mukhora wa Ipwittipwitthi,+ nookhala ntthiya nimosa nenno nttaava na eheeperi, nniihaniwa Betizatha. Ntthiya nlo nrukureriwe ni maphiryo mathanu. 3 Maphiryo awo, yaahimmaathi aretta anceene, alipa-oohoona, alipa-ootuthunya ni alipa-oorakala. 4* —— 5 Nave aahikhala weiwo, mulopwana mmosa aavirinhe iyaakha 38 owereiwaka. 6 Nuumala onweha mulopwana ole ommaathale ene ni osuwela wiira aahiviriha iyaakha sinceene owereiwaka, Yesu aahimukoha wiira: “Munniphavela okhala saana?”+ 7 Mulopwana ole aawereiwa, aahimwaakhula oriki: “Pwiya, nkirina mutthu ookirihela vatthiyani vale okathi maasi anittikinyeya aya. Nave, okathi oniipurulelaka mmaasini, mukina onnirowa ohoolo waka”. 8 Yesu aahimuhimeerya wiira: “Mweemele, mukuxe ettheere* anyu, mweetteke”.+ 9 Niinaano-ru, mulopwana ole aahikhala saana, aahikuxa ettheere* awe onapacerya weetta.
Nihiku nle, naari esaabadu. 10 Siiso, ayuda yaahipacerya omuhimeerya mulopwana ole aapenuxiwe, wiira: “Olelo esaabadu, nto nyuwo khamuneemereriwa okuxa ettheere”.*+ 11 Masi mulopwana ole aahiwaakhula wiira: “Ole okikhalinhe saana, tokilenle wiira: ‘Mukuxe ettheere* anyu, mweetteke’”. 12 Awo yaahimukoha ariki: “Mulopwana owo ti pani oohimenryeni wiira: ‘Mukuxe ettheere,* mweetteke’?” 13 Masi mulopwana ole aapenuxiwe, khaamusuwela mutthu ene, okhala wiira Yesu aahirimeelela* eriyari ya muttitthi wa atthu waari vaavale.
14 Nuumala-vo, Yesu aahimphwanya mulopwana ole mutemplo, onamuleela wiira: “Moone wiira mookhala saana. Nto muhitthikele-tho opaka etampi, wiira ehookhumeleleni etthu ekina yootepa otakhala”. 15 Mulopwana ole aahirowa waaleela ayuda wiira aari Yesu aamukhalinhe saana. 16 Mwaha wa yeeyo, ayuda yaanimulupattha Yesu, okhala wiira aanipaka itthu iya esaabadu. 17 Masi Yesu aahaaleela wiira: “Tiithi aka khohiyerenrye ovara muteko mpakha vano, tivo miyo kinivara aka muteko”.+ 18 Okathi ayuda yaiwale aya eyo, yaahipacerya ophavelasa inamuna sootheene wiira amwiive Yesu, maana yuupuwela wiira owo aanihonona esaabadu. Nave aaphavela wiira atthu yuupuweleke wiira onlikana ni Muluku,+ okhala wiira aanimuhimya Muluku okhala Tiithi awe.+
19 Tivonto, Yesu aahiwaakhula oriki: “Kinooleelani ekeekhai wiira, Mwaana khonivara etthu voowiikuxererya, masi onivara itthu onimoona awe Tiithi ovaraka.+ Tthiri, itthu sootheene Tiithi onivara awe, nave-tho Mwaana, onivara seiyo. 20 Tiithi onnimphenta Mwaana+ ni onnimooniherya itthu sootheene onivara awe. Nave, onrowa omooniherya miteko suulupale ovikana iya, wiira nyuwo mutikinihiwe.+ 21 Siisaale Tiithi onaahihimuxa awe alipa-ookhwa,+ siiso-tho Mwaana onnaahihimuxa ale onaaphavela awe.+ 22 Tiithi khonimphukela mutthu, masi oomuroromela Mwanawe muteko owo wa ophukela,+ 23 wiira atthu ootheene amuttittimiheke Mwaana ntoko animuttittimiha aya Tiithi. Ole ohinimuttittimiha Mwaana, khonimuttittimiha Tiithi, yoowo omurumme Mwaana owo.+ 24 Kinooleelani ekeekhai wiira, ole oniiwa masu aka ni onamukupali Ole okirumme, onoophwanya okumi woohimala.+ Nave khonrowa ophukeliwa, masi owo oovira mookhwaani, khuphwanya okumi.+
25 “Kinooleelani ekeekhai wiira, enoophiya ewoora, tthiri ewoora ene ti yeela, alipa-ookhwa anrowa aya wiiwa nsu na Mwaana a Muluku, nto ale avanhe ephoole, anookhala akumi. 26 Mweekeekhai, Tiithi ti maphattuwelo a okumi.+ Nave, owo oomweemererya Mwaana okhala maphattuwelo a okumi.+ 27 Nto Muluku onvaha Mwaana owerya wa ophukela,+ okhala wiira ti Mwaana a Mutthu.+ 28 Muhitikinihiwe vanceene ni etthu ela, okhala wiira enoophiya ewoora atthu ootheene ari mmahiye* anrowa aya wiiwa nsu nawe,+ 29 akhume mmahiye. Ale avanre miteko sooreera, anoohihimuxiwa wiira yaakhele okumi woohimala, masi ale avanre miteko sootakhala, anoohihimuxiwa wiira aphukeliwe.+ 30 Miyo nkinivara etthu voowiikuxererya. Masi kinaaphukela atthu kittharaka ele Tiithi onikileela awe. Nave kinnaaphukela mwa xariya,+ okhala wiira nkinipaka ele eniphavela aka, masi kinipaka ele oniphavela awe Tiithi, yoowo okirumme.+
31 “Akhala wiira kinniikhalela onamoona mmensaka, onamoona aka khahiyo weekeekhai.+ 32 Masi ohaavo mutthu mukina onikikhalela onamoona. Nto koosuwela wiira onamoona onikikhalela awe, ti weekeekhai.+ 33 Nyuwo muhaaruma atthu orowa wa Yohani, nto owo oovaha onamoona weekeekhai okihimyaka miyo.+ 34 Miyo nkineemererya onamoona wa mutthu, masi kinnilavula itthu iya wiira moopoliwe. 35 Mulopwana owo, aari muthuko waapatta ni waarya, nave nyuwo mwaahitteeliwa murima vanceene mwa okathi vakhaani ni omwaleya wawe.+ 36 Nto miyo kookhalana onamoona wuulupale ovikana wa Yohani, okhala wiira miteko Tiithi okirumme awe ovara, seiyo kinivara aka, sinnikikhalela onamoona wiira Tiithi tokirumme.+ 37 Tiithi yoowo okirumme, onnikikhalela onamoona.+ Nyuwo khamutonko wiiwa nsu nawe, nnakhala onweha owiitho wawe.+ 38 Nave moolumo awe khankhala mwa nyuwo, maana khanimukupali ole omurumme awe.
39 “Nyuwo munnitokosa Soolempwa+ muupuwelaka wiira munoophwanya memmo okumi woohimala. Nave ti seiyo* sinikikhalela onamoona.+ 40 Nto nyuwo khamuniphavela orwa wa miyo+ wiira mphwanye okumi. 41 Miyo nkineemererya ovuwihiwa ni atthu, 42 masi koosuwela oratteene wiira nyuwo khamunimphenta Muluku. 43 Miyo kihoorwa mwa nsina na Tiithi aka, masi nyuwo khamukaakhenle. Vaakhanle wiira mutthu mukina ohoorwa mwa nsina nawe, nyuwo mwammwaakhela. 44 Munrowa owerya sai okikupali, mweemereryaka ovuwihana yeenyu-ru, ohiya ophavela ovuwihiwa ni Muluku mmoseene?+ 45 Muhuupuwele wiira ti miyo kinrowa woohimyani wa Tiithi. Masi, onoohimyani ti Moise,+ yoowo munimuroromela anyu. 46 Tthiri, mwaamukupali Moise, mwaamukikupali miyo, okhala wiira Moise oolepa okihimyaka miyo.+ 47 Nto akhala wiira khamunikupali itthu olempe awe, munrowa okupali sai ele enihimya aka?”