Silempwale ni Luka
18 Yesu aahaaleela awiixutti awe nlikanyiho nimosa, ophavelaka owooniherya wiira ahaana ovekelaka okathi wootheene, ahooceyaka.+ 2 Owo aahimmye so: “Epooma emosa, aahikhala mulipa-oophuka ahaamoova Muluku, ni ahaamuttittimiha mutthu. 3 Nave, epooma yeeyo aahikhala muthiyana naamukhweli, aamakela onvekela mulipa-oophuka owo, oriki: ‘Mukiirele exariya mulattu kirina aka ni nwanani aka’. 4 Waahivira okathi mulipa-oophuka owo omukhoottelaka. Nto, aahuupuwela vamurimani vawe, oriki: ‘Miyo nkinimoova Muluku, nnakhala nkinimuttittimiha mutthu, 5 masi okhala wiira muthiyana ole naamukhweli onnikinyoonyiha, kinoomwiirela exariya, wiira ohitthikele-tho orwa okinyoonyiha mpakha miyo ophweeleya’”.+ 6 Vano Pwiya aahihimya wiira: “Niireke muhoona etthu mulipa-oophuka ole aahimmye awe, nnaamwi aari mutthu ootakhala? 7 Nto, niireke Muluku khonrowa waakhaliherya ale aathanlale awe, yaawo animukhuwelela othana ni ohiyu+ wiira yiireliwe exariya? Muluku onnaakhapelela awo aapixeryaka murima.+ 8 Kinooleelani wiira, owo khonrowa opisa owiirela exariya. Nto, okathi Mwaana a Mutthu onrwa awe, niireke tthiri onimwaaphwanya atthu oowaamini* vathi-va?”
9 Nave-tho, aahilavula nlikanyiho nimosa, aahimyaka atthu yaixoona okhala a xariya ni yahaathokorerya akina oriki: 10 “Alopwana anli yaahirowa ovekela mutemplo. Mmosa aari nfarisi, mukina aari mulipa-ooliviha mpoosito. 11 Nfarisi owo, aaheemela, onapacerya ovekela, oriki: ‘Khoo Muluku, kinnooxukhurelani okhala wiira miyo nkinlikana ni atthu akina, yaawo ari alatarau, oohiroromeleya, anamararuwa, hata nkinlikana ni mulipa-ooliviha mpoosito ola. 12 Kinnitthukwa ikwaha piili khula esumana. Nave kinnivaha epantta ya namuloko ya itthu sootheene siniphwanya aka’.+ 13 Mulipa-ooliviha mpoosito, eemenle ene ottaiwene, khaaphavela hata oweha osulu, masi aanimana vapeeto vawe, oriki: ‘Khoo Muluku, mukimorele ikharari,* miyo ka natampi’.+ 14 Kinooleelani wiira, mulopwana ole, aahirowa owannyawe, oonihenrye ene okhala naxariya, onvikana nfarisi ole.+ Okhala wiira, ole oniixinnuwiha, onooyevihiwa, nave ole oniiyeviha, onimwinnuwihiwa”.+
15 Vano, atthu yaanimuruuhela Yesu anamwane wiira owo aakwate. Masi okathi awiixutti yaawehale aya etthu ele, yaahipacerya waapwapwela atthu awo.+ 16 Nto, Yesu aahiwiihaniha anamwane awo, oriki: “Mwaahiye anamwane akirweeleke miyo. Muhaakhoottiherye, maana Omwene wa Muluku ti wawaya.+ 17 Kinooleelani ekeekhai wiira, ole ohinaakhela Omwene wa Muluku ntoko mwanamwane, tthiri khonikela Moomweneni-mmo”.+
18 Mukhulupale mmosa a ayuda, aahimukoha Yesu, oriki: “Mwiixuttihi ooloka, kipake exeeni wiira kiphwanye okumi woohimala?”+ 19 Yesu aahimwaakhula, oriki: “Xeeni munikiirela anyu ooloka? Ooloka ti Muluku paahi, khaavo-tho mukina.+ 20 Nyuwo munnisuwela sooruma sinihimya wiira: ‘Muhiraruwe,+ muhimwiive mutthu,+ muhiiye,+ muhimootherye mukhwiinyu,+ mwaattittimiheke apapinyu ni amaminyu’”.+ 21 Mukhulupale ole aahaakhula wiira: “Miyo kinneettela itthu iya sootheene okhuma omiravo aka”. 22 Nuumala Yesu wiiwa eyo, aahimuleela wiira: “Ennihala etthu emosa: Murowe mwatumihe mireerelo sanyu sootheene, nto musurukhu ene mwaakawele alipa-oohaawa. Siiso, munookhalana muhakhu wiirimu. Nuumala-vo, murwe mukhale mwiixutti aka”.+ 23 Okathi aiwale awe moolumo ala, aahiriipiwa murima vanceene, okhala wiira khaareere othaaciri.+
24 Yesu aahinweha mukhulupale owo, onahimya wiira: “Vanoovila ale arina musurukhu munceene okela Moomweneni mwa Muluku!+ 25 Vanookhweya ekamelo ovira vamwiitheni va akulya, ovikana thaaciri okela Moomweneni mwa Muluku”.+ 26 Nto ale yaiwale moolumo ala, yaahihimya wiira: “Khino ti pani oniwerya woopowa?”+ 27 Yesu aahilavula wiira: “Itthu apinaatamu ahinwerya aya opaka, Muluku onniwerya”.+ 28 Vano, Pedru aahihimya wiira: “Hiyo-va, noohiya itthu naarina ahu, nnoottharani”.+ 29 Yesu aahaahimeerya wiira: “Kinooleelani ekeekhai wiira, khuuvo ohiyale empa aahiiso aahiyale amwaarawe, axinnawe, apapawe ni amamawe, anaawe, mwaha wa Omwene wa Muluku,+ 30 ohinrowa waakhela voowaatta okathi ola. Nave olumwenku* onirwa, onoophwanya okumi woohimala”.+
31 Vano, Yesu aahaakuxa arummwa 12, aaroiha opuro mukina, onaaleela wiira: “Mwiiwe! Ninrowa oYerusalemu, nto itthu sootheene saalempwale ni maprofeta simuhimyaka Mwaana a Mutthu, sinrowa wiiraneya.*+ 32 Mwa ntakiheryo, owo onrowa ovahereriwa mmatatani mwa amalapo,+ nto awo anrowa onveeha,+ omuhaaxa ni omusenela.+ 33 Nuumala onwaxula, awo anoomwiiva.+ Masi nihiku na neeraru, onoohihimuxiwa”.+ 34 Vano, arummwa khiyaiwexenxe itthu iye, maana yootaphulela aya yaahiipithihiwa wiira awo ahisuwele.
35 Okathi Yesu aattamela awe oYeriko, aahikhala mulopwana mmosa ahoona, aakilanthi mukerekhere mwa estaraata,+ ovekaka esimola. 36 Okhala wiira aaniiwa muttitthi wa atthu oviraka, owo aahikoha etthu yiiraneya. 37 Atthu awo, yaahimuleela wiira: “Yesu munazarethi, tonivira!” 38 Nto mulopwana owo aahikhuwela oriki: “Yesu, Mwaana a Davidi, mukimorele ikharari!” 39 Tivo, atthu yaari ohoolo, yaahipacerya ompwapwela, amuleelaka wiira omaale. Masi owo aamutepa okhuwela, oriki: “Mwaana a Davidi, mukimorele ikharari!” 40 Nto Yesu aaheemela, omwiihaniha mulopwana owo. Vaamwaattamenle awe, Yesu aahimukoha wiira: 41 “Muniphavela kiwiiriheni exeeni?” Mulopwana ole ahoona, aahimwaakhula Yesu, oriki: “Pwiya, kiniphavela otthikela woona”. 42 Tivonto, Yesu aahimuhimeerya wiira: “Mooneke, waamini wanyu ohookhalihani saana”.+ 43 Niinaano-ru, mulopwana ole aahitthikela woona, onapacerya omutthara Yesu,+ onvuwihaka Muluku. Nave-tho, nuumala oweha etthu ele, atthu ootheene yaahipacerya omuttottopela Muluku.+