Silempwale ni Yohani
12 Mahiku 6 ohinatthi Paasikha, Yesu aahiphiya oBethania, weiwo aari awe Laazaro,+ yoowo Yesu aamuhihimunxe awe mookhwaani. 2 Awo yaahimwaapeela yoolya. Nto Marta taarumeela.+ Masi Laazaro, aari mmosa wa atthu ale yaalya* ni Yesu. 3 Maria aahikuxa makhura oowunkhela, etthu yoowiiraka nimeya na eliituru, yaawo yaapakiwe ni narto* oohitakaaheriwa etthu ni a musurukhu munceene. Maria owo, aahikuxa makhura awo onahela inawu sa Yesu, onapuputtha ni ikharari sawe. Vano empa yootheene yaahisareya wunkhela wa makhura awo.+ 4 Masi, mmosa a awiixutti a Yesu, aihaniwa Yuda Isikariyoti,+ yoowo aarowa onvariha Yesu, aahihimya wiira: 5 “Xeeni makhura ala oowunkhela yahaatumihiwa aya itenaario* 300, vano musurukhu ene akaweliwa alipa-oohaawa?” 6 Yuda owo aalavunle siiso, ohiya mwaha wa waathokorerya alipa-oohaawa, masi mwaha woowi aari latarau. Owo taasuka musurukhu waarumeeliwa ni awiixutti, nto aamakela wiiya. 7 Yesu aahihimya wiira: “Mmuhiye muthiyana ola opake etthu ela niinaano-va, wiira olokiherye ovithiwa waka.+ 8 Okathi wootheene munrowa okhalaka ni alipa-oohaawa,+ masi khamunrowa okhalaka ni miyo imaara sootheene”.+
9 Muttitthi muulupale wa ayuda waahisuwela wiira Yesu aari oBethania, khurowa weiwo. Muttitthi owo, khiwaaronwe onweha Yesu paahi, masi-tho waaronwe onweha Laazaro, yoowo Yesu aamuhihimunxe awe mookhwaani.+ 10 Vano makhulupale a anamukuttho yaahivarihana omwiiva-tho Laazaro, 11 mwaha woowi okathi ayuda anceene yaaronwe aya oBethania, aweha ele yaamwiiranenle Laazaro, yaanimwaamini Yesu.+
12 Mmeeloni mwaya, muttitthi muulupale wa atthu waarwenle niira, waahiiwa wiira Yesu aanirwa oYerusalemu. 13 Awo yaahikuxa makukhu a mikole, anarowa okumana ni Yesu. Vano yaanikhuwela ariki: “Khoo Muluku, ninnoovekelani, mmoopole! Ooreelihiwa tuule onirwa mwa nsina na Yehova,*+ mwene a Isarayeli!”+ 14 Okathi Yesu amphwannye awe mwaaxaana a puuru, aahimukilaathela,+ ntoko silempwale aya wiira: 15 “Muhoove, nyuwo mwaana mwaamuthiyana a oSiyoni. Mwiiwe! Mwene anyu onnoorwa onwenle ene mwaaxaana a puuru”.+ 16 Woopaceryani, awiixutti khiyaiwexenxe oratteene itthu iya, masi okathi Yesu aavuwihiwe awe,+ yaahuupuwela wiira itthu yaapanke aya, ti seiyo tthiri saalempwale simuhimyaka Yesu.+
17 Vano, muttitthi wa atthu waamoonale Yesu omwiihanaka Laazaro wiira okhume mmahiye,+ ni omuhihimuxaka mookhwaani, waanaaleela atthu akina ele yaakhumelenle.+ 18 Tivonto muttitthi wa atthu waaronwe aya okumana ni Yesu, okhala wiira atthu awo yaahiiwa wiira aahipaka mwiiriirya ole. 19 Nto afarisi yaanihimeeryana wiira: “Mooweha? Khanimpaka etthu. Mooneke! Atthu ootheene annimutthara yoowo”.+
20 Nave-tho, yaahikhala akereku akina, yaawo yaarwiiye omukokhorela Muluku okathi wa niira. 21 Nto awo yaahimwaattamela Filipe,+ yoowo aari a oBethisaida, muttetthe wa oGalileya, ananvekela wiira: “Atokweene, nimphavela onweha Yesu”. 22 Filipe aahirowa omuleela Andreya. Vano Andreya ni Filipe yaahirowa omuleela Yesu.
23 Siiso, Yesu aahiwaakhula oriki: “Yoophiya ewoora wiira Mwaana a Mutthu ovuwihiwe.+ 24 Tthiri, kinooleelani ekeekhai wiira, epyo ya etiriku yaahimorele vathi, khintta,* enikhala epyo emosa paahi. Masi yintta* vale,+ eyo ennikumiherya ipyo sinceene. 25 Akhala mutthu oniphenta okumi awe, eyo enoomwiiriha opweteiwa okumi owo,+ masi ole oninyokha okumi awe vano, onookhapelela wiira ophwanye okumi woohimala.+ 26 Akhala mutthu oniphavela okhala murumeyi aka, okitthareke. Weiwo kinrowa aka okhala, ti weiwo-tho onrowa awe okhala murumeyi aka.+ Akhala mutthu oniphavela okhala murumeyi aka, Atiithi anrowa omuttittimiha. 27 Vano miyo kooxanka.+ Nto kihimye exeeni? Tiithi, mukoopole okathi ola wooxankiha.+ Masi okathi ola wooxankiha ohaana okiphwanya, maana ti etthu kirwenle aka. 28 Tiithi, nvuwihe nsina nanyu”. Vano, naahiiwanyeya nsu+ nikhumaka wiirimu, nriki: “Miyo koovuwiha, nave kinrowa ovuwiha-tho”.+
29 Muttitthi wa atthu weemenle vaavale waahiiwa nsu nne, nto akina anahimya wiira osulu waahikukutteya. Vano, akina yaahimya wiira: “Nlaikha ti nimulavulinhe”. 30 Yesu aahihimya wiira: “Nsu nna nihiiwanyeya mwaha wa nyuwo, ohiya mwaha wa miyo. 31 Vano, yoophiya ewoora ya ophukeliwa olumwenku ola,+ nave namalamulela a olumwenku ola onrowa woomoliwa.+ 32 Masi miyo, keemexiwa* valaponi,+ kinimwiiruuhela atthu a makhalelo ootheene”. 33 Yesu aahilavula eyo, ophavelaka ohimya moota aarowa awe okhwa.+ 34 Vano, muttitthi wa atthu waahihimya wiira: “Nlamulo nnihimya wiira Kristu onikhala mahiku ootheene.+ Nto munihimya sai wiira Mwaana a Mutthu ohaana weemexiwa?*+ Mwaana a Mutthu ti pani?” 35 Tivo, Yesu aahaahimeerya wiira: “Muthuko onookhala ni nyuwo okathi vakhaani. Mweetteke murina ene muthuko owo, wiira epiphi ehoophwanyeni. Ole oneetta mweepiphini, khonisuwela onrowa awe.+ 36 Mooniheryeke wiira munnaamini muthuko owo, nlelo murina ene, wiira mukhale anamwane a muthuko”.+
Nuumala Yesu ohimya itthu iya, aahikhuma opuro ole ni aahiipitha. 37 Nnaamwi Yesu aapanke miiriirya sinceene ohoolo waya, awo khiyaamwaamini, 38 wiira yiiraneye ele aahimyale awe profeta Yesaya, oriki: “Yehova,* ti pani okupanli itthu aniiwale aya nilavulaka?+ Nave ti pani Yehova omusuwelinhe awe owerya* wawe?”+ 39 Yesaya aahihimya-tho etthu yaawiiriha ohikupali, oriki: 40 “Miyo koowiiriha ohoona ni kihuumiha mirima saya. Koopaka eyo wiira ahooneke ni maitho aya ni ahiiwexexeke itthu sirina aya opaka ni wiira akitthikele ni kaapenuxe”.+ 41 Yesaya aahilavula itthu iya omuhimyaka Kristu,+ okhala wiira aahiweha ovuwa wawe. 42 Hata vari siiso, anamalamulela anceene yaanimwaamini Yesu,+ masi khiyooniherya wiira yaanimukupali, mwaha wa afarisi, wiira ahoomoliwe musinagoga.*+ 43 Tthiri, atthu awo vaanitepa waasivela ovuwihiwa ni atthu, ovikana ovuwihiwa ni Muluku.+
44 Yesu aahihimya voowiiwanyeya, oriki: “Ole onikaamini, khonikaamini miyo paahi, masi-tho onimwaamini Ole okirumme.+ 45 Nave ole onikiweha, onninweha-tho Ole okirumme.+ 46 Miyo kihoorwa moolumwenkuni ntoko muthuko,+ wiira ole onikaamini ohikhaleke mweepiphini.+ 47 Masi ole oniiwa moolumo aka, ohineettela, nkinimphukela, maana nkirwenle ophukela olumwenku, masi kirwenle woopola olumwenku.+ 48 Ole onikikhootta ni ohinaakhela moolumo aka, ehaavo etthu enrowa omphukela. Moolumo kilavunle aka, tanrowa omphukela nihiku nookiserya. 49 Mweekeekhai, nkilavunle etthu kikumihaka mmuru mwaka, masi Tiithi, yoowo okirumme, tokihimenrye etthu yoohimya ni etthu yoowiixuttiha.+ 50 Nave kinnisuwela wiira otthara ele okirumme awe enniphwanyiha okumi woohimala.+ Tivo, khula etthu kinilavula aka, kinilavula siisaale Tiithi okihimenrye awe”.+