Yesaya
65 “Miyo kaahiphavela vanceene waakhaliherya atthu yaale yahaaphavela okisuwela.
Kaahihiya wiira ale yahaakaavya, akiphwanye.+
Nloko nahaaromonle nsina naka,+ kaahihimeerya wiira: ‘Miyo kiri va!’
2 Nihiku nootheene, kinniwookolela matata aka atthu oohiiwelela,+
Yaale aneetta ephiro yootakhala,+
Attharaka itthu siniphavela aya.+
3 Atthu awo animakela okiveeha ohoolo waka,+
Annipaha mikuttho muxarti+ ni annitthuwiha mwiixi vatixoluni.
4 Awo annikilaathi omahiye,+
Nave anniviriha ohiyu ari ene mapuro oowiipitheya,*
Akhuuraka enama ya ekuluwe.+
Nave-tho mmuhasani mwaya, wookhala muhusi wa itthu soonanara.+
5 Awo anihimya wiira: ‘Mukhale vaavo, muhikaattamele,
Miyo kootepexa waarya woovikanani nyuwo’.*
Awo annikiiriha onanariwa,* ntoko mooro onipatta nihiku nootheene.
6 Moone! Voolempwa ohoolo waka;
Nkinrowa omaala,
Masi kinimwaaliverya ootheene aya,+
Kinimwaaliverya ni kinimwaahukhumu mwaha wa itthu sootheene apanke aya.
7 Nave kinimwaaliverya mwaha wa itampi saya ni sa amuhavinre aya”.+ Yehova tonihimya siiso.
Owo onnihimya-tho wiira: “Okhala wiira aapaha mikuttho vasulu va miyaako,
Nave aakiveeha vasulu va mattumuxa,+
Etthu yoopacerya kinrowa aka owiirela, ori waaliva etthu aniphwanela aya”.
8 Etthu onihimya awe Yehova, tiila:
“Siisaale mutthu oniphwanya awe ewuuva yooreera, yeeyo enireerela opaka eviinyu ya niinaano,
Nto mutthu onahimya wiira: ‘Muhihonone, okhala wiira yookhalana etthu yooreera’,
Siiso-tho, miyo kinimwiira etthu emosa-ru mwaha wa arumeyi aka,
Nkinrowa waapwetexa ootheene.+
9 Eriyari ya atthu a Yakobe, kinookumiherya osuulu,
Eriyari ya atthu a Yuda, kinoomukumiherya ole onrowa ohalana miyaako saka.+
Ale kaathanlale aka, anoohalana elapo eyo,
Nave arumeyi aka, anookhalaka memmo.+
10 Para atthu aka anikaavya,
OSaroni,+ onrowa okhala nipuro ninrowa aya olyaaka ipwittipwitthi,
Nave nxepa* na wAkori,+ ninrowa okhala nipuro ninrowa aya omumulaka ipooyi.
11 Nyuwo mwa atthu yaale akinyanyanle miyo, Yehova,+
Yaale aliyanle mwaako aka woowaarya,+
Yaale anilokiherya meesa, para muluku a esoorti,
Nave anisariha mukoophoni eviinyu yootakaaheriwa, para muluku yoole atthu animukupali aya okhala muluku a oreeriwa ni otakhaliwa.
12 Nto, miyo kinimoovahereryani wiira mwiiviwe ni espaata,*+
Nave ootheene anyu munimuurama wiira muhitiwe,+
Okhala wiira kihiihana, masi nyuwo khimwaakhunle,
Koolavula, masi nyuwo khamukiwiriyanne;+
Munnithipelela opaka itthu sootakhala vamaithoni vaka,
Nave moothanla opaka itthu sihinikisivela”.+
13 Tivonto, etthu onihimya awe Pwiya Muulupalexa Yehova, tiila:
“Mwiiwe! Arumeyi aka anrowa olyaaka, masi nyuwo munrowa ovoliwaka etala.+
Arumeyi aka anrowa owuryaka,+ masi nyuwo munrowa ovoliwaka ntthona.
Arumeyi aka anrowa otteeliwaka murima,+ masi nyuwo munrowa wuuliwaka muru.+
14 Arumeyi aka anootthapa atteeliwe ene murima, mwaha wa okhala saana,
Masi nyuwo munookhuwela mwaha wa woowereyani murima,
Nave munimunla mwaha wa oriipiwa murima vanceene.
15 Nyuwo mwarowa, atthu kaathanlale aka anrowa orumeelaka nsina nanyu ntoko etthu para otakhaliha,
Nave Pwiya Muulupalexa Yehova, onoomwiiva khula mmosa a nyuwo.
Masi arumeyi awe, onoowiihanela nsina nikina.+
16 Siiso, khula mutthu onaavya oreelihiwa mulaponi,
Onooreelihiwa ni Muluku eekeekhai,*
Nave khula mutthu onilapha mulaponi,
Mixankiho sa khalai sinooliyaliwa,
Iyo sinimwiipithihiwa vamaithoni vaka.+
17 Moone, miyo kinnipattuxa erimu esya ni elapo esya,+
Nave itthu sa khalai, sinooliyaliwa,
Nnakhala khasinrowa ohala vamurimani.+
18 Tivonto, mutteeliweke murima mahiku ootheene ni mutthapeke mwaha wa itthu kinrowa aka opattuxa.
Miyo kinoomwiiriha Yerusalemu okhala etthu enaatteeliha murima atthu,
Nave atthu a oYerusalemu, anoowiiriha atthu akina otteeliwaka murima.+
19 Kinootteeliwa murima mwaha wa Yerusalemu, kinootthapa mwaha wa atthu aka;+
OYerusalemu iwo, khonrowa-tho wiiwanyeya ikuttho, nnakhala wunla mwaha wa oxanka”.+
20 “Opuro owo, khonrowa-tho okhala mwaana onrowa okhalaka mahiku vakhaani.
Atthu oowuuluvala, anrowa okhalaka mpakha omaleliha mahiku aya.
Mutthu onrowa okhwa orina ene iyaakha 100, onrowa wooniwaka wiira okhwiiye ori ene mmiravo,
Nave natampi onootakhalihiwa, hata orina ene iyaakha 100.*
21 Awo anrowa otekaka ipa saya, akhaleke memmo,+
Nave anrowa waalaka miri saya sa ewuuva, alyeeke mihokorokho sene.+
22 Khanrowa otekaka ipa, masi sikhaliweke ni atthu akina,
Nnakhala khanrowa waalaka, masi elyiweke ni atthu akina,
Okhala wiira atthu aka anrowa okhalaka mahiku manceene ntoko mwiri.+
Nave, atthu aka kaathanlale aka, anoopuhaka muteko anrowa aya ovaraka ni matata aya.
23 Awo khanrowa ovaraka muteko* mahala ene,+
Nnakhala khanrowa waayaraka anamwane, yaayarelaka ohaawa,
Okhala wiira awo ni osuulu aya,+
Anrowa okhala atthu anrowa oreelihiwa ni Yehova.+
24 Ahinatthi okiihana, miyo kinoowaakhula;
Nlelo ahinatthi omaliha olavula, miyo kinoowaakhula.
25 Mwiici ni epwittipwitthi, sinrowa olyaaka vamosa,
Kharamu onrowa olyaaka malaxi, ntoko eniira aya epooyi,+
Nave enowa enrowa olyaaka etthaya.
Khasinrowa ohonona itthu nnakhala khasinrowa wiira etthu yootakhala vamwaako vaka vootheene voowaarya”.+ Yehova tonihimya siiso.