Murettele Wa iyaakha Ekonto emosa Ni Muhoolo mwaya
‘Siiso Muluku onomaliherya oruma sothene’.—1 aKor. 15:28.
MUNNIWERYA OTTHOKIHERYA?
Waakhwanihereya wa soolepa iya sintaphulela exeeni wa nyuwo?
1. Mareeliho xeeni ankela aya waakhela atthu a “muttitthi mulupale”?
NKUUPUWELANI itthu iya sotheene sooloka sinrowa okumiheriwa ni owerya wa olamulelo wa mwene a xariya oniwoonela othunku atthu awe, etthu yowiiraka iyaakha ekonto emosa alamulelaka! Nuumala ovira “maxakha malupale”, ni omalihiwa olumwenku ola wootakhala, atthu anceene a “muttitthi mulupale” yaawo ankela woopowa, tanrowa opuhaka.—Wis. 7:9, 14.
2. Iyaakha 6.000 sivinre exeeni enoonihereya voohimya sa ekuvernu ya apinaatamu?
2 Iyaakha soowiiraka 6.000 sa olamulelo wa opinaatamu, vanniweheya wira olamulelo aya ti woosareya nrima ni onnikumiherya maxakha manceene wa apinaatamu. Biibiliya aahihimya khalai wira: ‘Àkhala akina arina owerya akina annihawa epuheriwaka n’awo’. (Mus. 8:9) Exeeni olelo va eniweha ahu yiiraneyaka? Ohiya paahi ikhotto wala ohiiwanana sookhala-tho mixankiho sikina soohonona, ntoko omasikhini, ikwerere, ohononiwa wa mukhalelo wa elapo, ni orukunuwa wa makhalelo a etthaya ni itthu sikina. Makhulupale a iguvernu anihimya so: akhala wira khannirukunuxa makhalelo a nakoso ahu, miteko sahu sinookumiherya mixankiho suulupale.
3. Exeeni Olamulelo wa Yesu wa Iyaakha Ekonto Emosa onkela aya oruuha?
3 Orweela mwa olamulelo wa Mwene Mesiya, Yesu Kristu ni ale a 144.000 onrowa awe olamulelano Moomweneni mwa Muluku, anrowa orukunuxa mikhalelo iya soohiloka wira apinaatamu ekhaleke saana valaponi. Olamulelo wa Iyaakha Ekonto Emosa wa Kristu, onrowa okumiherya oceeliwa murima vaavo vanrowa aya wiiraneya yoolaiherya ya Yehova Muluku yoowi: “Miyo kinrowa opattuxa irimu isyá n’ilapo esyá: itthu sa khalai khasinupuweliwa-tho, itthu sivinre sinoliyaliwa khuluwi”. (Yes. 65:17) Tthiri iya iparakha suulupale siniwehererya ahu! Nikhaliheriwaka ni iprofesia sa mBiibiliyani, nrowe niwehe iparakha iyo suulupale “sihinoneya”.—2 aKor. 4:18.
‘ANOTEKA IPA SAYA NI OPHATTEYA MIRI SA EVIDERA’
4. Xeeni varya aya vooxankiha olelo-va okhalana empa?
4 Tani ohimphavela okhalana empa awe, ni okhalana murettele vamosa ni emusi awe? Mahiku ahu ala okhalana empa yoophwanelela muxankiho muulupale. Atthu anceene annuukelana musidade. Anamunceene ahaana wiimananiha wira aphwanye nipuro nookhala ni itthu soorumeela osidade. Wuupuwela wira vanihikuni anookhalana empa aya onkhala ntoko oloha ohinimala.
5, 6. (a) Sinrowa waakhwanihereya sai soolepa iya: Yesaya 65:21 ni Mikeya 4:4? (b) Ninrowa waakhela sai mareeliho awo?
5 Olamulelo wa Yesu, khuta mutthu onookhalana empa awe, mwaha woowi eprofesia ya Yesaya enihimya wira: “Atthu awo anrowa oteka ipa saya, ekhaleke memmo: anrowa ophatteya mirii s’evidera, elyeke mihokorokho saya”. (Yes. 65:21) Masi, okhalana empa, khahiyo tumalela wa mareeliho awo. Ekeekhai wira atthu akina wala anceene olelo-va, aakhalana ipa saya. Masi nlelo ale arina ipa annixanka mwaha wa woova oyeleela ipa saya okathi wa othoiwa musurukhu, anawiiye, anamatuphela, atakhali anipwexa empa wira ekele-mo. Olamulelo wa Kristu, itthu iyo khasinrowa okhala! Profeta Mikeya onihimya so: “Khula mutthu onokhala ni murettele vamuttutthini wa mimanka sawe, mukhitte mwa mikhaju sawe: khavo onrowa wavelaveliha”.—Mik. 4:4.
6 Moovarihana ni nlipelelo nna, exeeni enireerela ahu opaka? Tthiri khula mmosa a hiyo onitthuneya okhalana empa yooloka. Nto, ohiya oxankiheya vano wira nikhalane empa yooloka mmoota owo, etthu yeeyo yaarowa oniiriha okopha musurukhu munceene wala onikhumelela mixankiho sikina, nto, ti vamiruku vanceene ovarexexa soolaiherya sa Yehova! Nkuupuwelani masu Yesu aalavunle awe wira: “Akhwatté àkhalana mittupha saya, axipalame a misulu àkhalana ipuru saya: nto Mwana a Mutthu kharina nipuro n’omumula”. (Luka 9:58) Yesu aahikhalana owerya oteka wala okhalana empa waaniheryasa mutthu mukina ahaarowa awe owerya okhalana. Masi nthowa xeeni owo ahiirale awe siiso? Moohihova, Yesu aahisyaka wiixaattiherya itthu seiyo saarowa omooceeliha opweha nipuro noopacerya itthu sa Omwene wa Muluku. Nto khivaarowa nave oloka wira nitthare ntakiheryo nawe nisyakaka wiixaattiherya itthu seiyo saarowa oniiriha weehereriwa ni ophenta mihakhu?—Math. 6:33, 34.
‘MWIJI NI MWAPWITTIPWITTHI ANIMOLYAKA VAMOSÁ’
7. Wataana xeeni okhanle eriyari ya axinama ni apinaatamu ntoko Yehova aahimmye awe wanipacerya?
7 Wa soopattuxa sookiserya sa Yehova, apinaatamu tari soopattuxiwa suulupale valaponi. Yesu yoowo ori Mwaana oopacerya a Yehova ni Funti a Muteko, aahivahiwa muteko ola Yehova aahimmye awe so: “Nimùpe mutthu onlattanahu, onlikana ni hiyo. Akhalé mwanene ihopa sa mphareya n’ipalame sa musulu n’inama sa vaté n’inama sowali sa mutakhwani n’iye sothene sinìpurula vathí”. (Maph. 1:26) Adamu ni Eva, ni apinaatamu otheene yaahirummwa okhapelela inama sotheene.
8. Olelo-va, mukhalelo xeeni axinama anooniherya aya?
8 Niireke vanniweryaneya tthiri apinaatamu okhalana murettele ni axinama? Atthu anceene annipatthana saana ni axinama aya, ntoko alapwa, wala akwaatu. Ankhi axinama oowali a mutakhwani? Erelatoorio emosa enihimya so: “Masientista yaawo muteko aya ori otokosa inama oratteene ni khiyakhala vamosa ni axinama a mutakhwani, ahoona wira axinama othene yaale epakeliwa aya anaamwa, awo aakhalana muupuwelo wa othunku”. Ekeekhai wira ninnaaweha axinama yoovaka wala okhalana owali okathi anoopopihiwa aya wala ohaaxiwa; masi niireke wira axinama awo anniwerya okhalana othunku? Erelatoorio eyo ennivikaniha olavula wira: “Okathi axinama awo anaahuwa aya axaana aya, sinniweheya mikhalelo saya suulupale, ntoko owerya waya wooniherya niphento”.
9. Voohimya sa axinama, mirukunuxo xeeni siniwehererya ahu wiiraneya?
9 Nto nihitikhineke naasomaka mBiibiliyani khiyaiwa wira onookhala murettele eriyari ya axinama ni atthu. (Mmusome Yesaya 11:6-9; 65:25.) Nthowa xeeni? Muupuwele wira okathi Nowe aakhumme awe mpakitini nuumala epula ya Mutaaseke, Yehova ahaalela wira: “Inama sothene sa vathi n’ipalame sothene s’osulu sinimohuhumakani, siwovakani”. Etthu ela yahiiraneya wira vaweryaneye inama okhapeleleya wira sihimale. (Maph. 9:2, 3) Niireke wira Yehova khaniwerya okumiha muupuwelo owo wa otuthuwana ni woovanana wira yootthuna awe yiiraneye ntoko aaphavenle awe wanipacerya? (Hos. 2:18) Tthiri owo onrowa okhala okathi woohakalaliha wa yaale ankela woopowa!
OWO ONOPUPUTTHA MAITHORI AYA OTHENE
10. Vanceenexa exeeni eniwiiriha apinaatamu omoroxa maithori wala wunla?
10 Okathi Salomoni aawenhe awe “sotakhala sothene sinìriwa molumwenkuni”, owo aahiikhupanyerya ariki: “Kowona atthu anjene epuheriwaka n’uhaxiwa. Awo anninla, nto khavo onakhaliherya”. (Mus. 4:1) Mahiku ale anoolikana ni vano, wala niire aatepexa. Tani a hiyo ori va ohitonko wunla mwaha wa mixankiho? Ekeekhai wira okathi mukina wookhala omoroxa maithori mwaha wa otteeliwa murima. Masi vanceenexa, omoroxa maithori, wala wunla onithoonyerya oxanka wuulupale mwaha wa oriipiwa murima.
11. Yowiiraneya xeeni ya mBiibiliyani enivara murima anyu?
11 Nkuupuwelani yowiiraneya emosa yoothananiha yeeyo enilavuliwa mBiibiliyani. Okathi Sara aakhwiiye awe arineene iyaakha 127, ‘Abrahamu aahirowa onvitha Sara ni omunlela’. (Maph. 23:1, 2) Okathi Nowemi aalaxerya awe axaara a anaawe anli, “nto awo yahipacerya wunla n’ukhuwela”, nuumala vo, “athiyan’awo yahikhuwela-tho yinlaka vanjene”. (Ruth. 1:9, 14) Okathi Mwene Ezekiya wamphwannya aya oretta wuulupale, ni khiweha wira aarowa okhwa, owo aahinvekela Muluku ni “wunla vanjene”; nto tthiri Yehova aahimoonela othunku. (2 Mam. 20:1-5) Nave, tani ohinikuxeya murima ni yowiiraneya ya Pedru vaavale aamukhontte awe Yesu? Okathi aamwiiwale awe muthupi iipaka, Pedru “ahikhumela ota, khunla aripiwene murima vanjene”.—Math. 26:75.
12. Omwene wa Kristu onkela waakhaliherya sai ni waakhapelela apinaatamu?
12 Mwaha wa mixankiho sinikhumelela, pooti saamukhaani wala suulupale, sinniwiiriha atthu ophavelaka omaalihiwa ni ovahiwa nikhaliheryo. Nto ti yeeyo Olamulelo wa Iyaakha Ekonto Emosa onkela aya opaka. “[Muluku] owo onopuputtha maithori aya othene: khonrowa okhala-tho okhwa, nnakhala oripiwa murima, walá ikuttho nnákhala ohawa. Tthiri olumwenku wa khalai wovira”. (Wis. 21:4) Ti voohakalaliha osuwela wira ikuttho, wunla, ni owereiwa khonikhala-tho; nave Muluku oolaiherya ommalamaliha nwanani muulupale aapinaatamu—naakhwa. Vankela oweryaneya sai?
OTHENE ARI MMAHIYE . . . ANOKHUMA MMAHIYE
13. Nuumala Adamu ottheka, exeeni naakhwa onikumiherya awe?
13 Okhuma okathi yoole Adamu otthenke awe, naakhwa onnaalamulela apinaatamu. Hata ohooneyaka apinaatamu oottheka khaniwerya omutthyawa; masi owo onnikumiherya ehasara ni othunku muulupale. (aRom. 5:12, 14) Tthiri, “wova okhwa” onnaaphwanya imilyau sinceene sa atthu nto ‘khiyalikana ni ipottha okumi aya wothene’.—aHéb. 2:15.
14. Exeeni enrowa wiiraneya okathi onkela awe omala-malihiwa naakhwa?
14 Biibiliya onnihimya okathi ‘nwanani [owo] okiserya onrowa awe opwetexiwa’. (1 aKor. 15:26) Nto, ikrupu piili sinoottottela mureerelo. Atthu a “muttitthi mulupale” yaawo anikhala vano, anoowerya woopowa wira yaakhele elapo esya ni okumi woohimala. Nave ale imilyau sinceene ari mmahiye, anrowa ohihimuxiwa. Nto munniweha ohakalala onrowa okhala vaavo atthu anrowa aya owaakhelaka atthu yaale yaakhwiiye khalai? Oweha oratteene sowiiraneya sa khalai voohimya sa ohihimuwa onilavuliwa mBiibiliyani, onoonikhaliherya osuwela moota onkela aya wiiraneya.—Mmusome Marko 5:38-42, 43; Luka 7:11-17.
15. Nyuwo munrowa okhala sai okathi onkela anyu waaweha ehihimuxiwaka ale yaaphenta anyu yaakhwiiye?
15 Nkuupuwelani masu oowi: “atthu yahituthuwa khutikinihiwa vanjene” ni “enanvuwiha Muluku”. Vaakhanle wira nyuwo muri vaavo, tthiri mwaarowa otikinihiwa vanceene. Aayo, waaweha ale yaaphenta ahu ehihimuwaka, enrowa okhala etthu yootikiniha ni onihakalaliha vanceene. Yesu aalavunle wira: “Onophiya okathi onìraya atthu othene ari mmahiye, yiwe nsu na Mwana a Mutthu, ekhume mmahiye”. (Yoh. 5:28, 29) Okhala wira khuuvo a hiyo otonko oweha itthu iyo, tthiri iya sinrowa okhala sowiiraneya suulupale nihitonko ahu ‘oweha’.
‘MULUKU ONOMALIHERYA ORUMA SOTHENE’
16. (a) Nthowa xeeni vaniloka aya olavula moohakalala mareeliho a muhoolo nlelo ahinooneya? (b) Masu xeeni olavunle awe Paulo wira aalipihe maKristau oKorinto?
16 Nto, sookhala itthu soohakalaliha siniwehererya aya arumeyi oororomeleya a Yehova mahiku ala ooxankiha! Akhala wira ninnihela mmuupuweloni mareeliho ala maalupale nlelo ahinooneya, eyo enoonikhaliherya osyaka ohapuxiwa ni itthu sa elapo ela yoohiloka. (Luka 21:34; 1 Tim. 6:17-19) Eyo enrowa onikhaliherya olipiha muupuwelo ni murima ahu. Nto eyo ti etthu murummwa Paulo aapaka awe wira aalipihe axinnawe. Ahaatthokiherya voohimya sa waattamela wa Olamulela wa Kristu wa Iyaakha Ekonto Emosa. Nkuupuwelani yootaphulela ya masu a Paulo ari yoolepa ya 1 aKorinto 15:24, 25, 28.—Mmusome.
17, 18. (a) Moota xeeni Yehova aaruma awe sotheene woopaceryani wa Adamu ni Eva? (b) Exeeni Yesu enkela awe opaka wira attikiherye wataana?
17 Tthiri khaavo masu oophwanelela anooniherya omaliheriwa wa itthu anilikana ni ala: “Siso Muluku onomaliherya oruma itthu sothene”. Nto masu ala antaphulelani? Nkahaya muupuwele okathi wa wEdeni vaavo Adamu ni Eva yaari aya oomalela; awosa yiirela mpantta emusi ya murettele ni yowiiraana ya Yehova. Yehova, Mukhulupale a Olumwenku wotheene, taalamulela soopattuxiwa sawe sotheene ohela muhina malaikha awe ni apinaatamu. Awo yaaniwerya ovaanela nuuwo, ni omukokhorela ni oreelihiwa. Nto Yehova ‘taruma itthu sothene’.
18 Wataana iwo waahimala okathi yoole Satana aawonke awe apinaatamu wira ehiye wiiwelela okhulupale wa Yehova. Okhuma eyaakha ya 1914, nto, Omwene wa oMesiya onnivara muteko muulupale wira ottikiherye wataana iwo waakhanle. (aÉf. 1:9, 10) Okathi wa Olamulela wa Iyaakha Ekonto Emosa, itthu sootikiniha ‘sihinooneya’, sinrowa wiiraneya wira siweheye. Nuumala vo, ophiyeke ‘wanikisa’ wa emalelo wa Olamulelo wa Kristu wa Iyaakha Ekonto Emosa. Nuumala-vo exeeni enrowa okhumelela? Nnaamwi Yesu avahiwe ene, “owerya wothene wirimu ni vathí”, owo khatonko okhalela nrima itthu. Khatonko ni kharina yoophavela ya omwaakha okhulupale Yehova. Masi, mowiiyeviha ‘ononvahererya’ omwene Muluku yoowo ori Tiithi awe. Yesu onkela orumeela okhulupale awe wira ‘anvuwihe Muluku’.—Math. 28:18; aFil. 2:9-11.
19, 20. (a) Moota xeeni atthu Oomwene anrowa aya wooniherya wira anneemererya okhulupale wa Yehova? (b) Nlipelelo xeeni nuulupale nniwehererya ahu?
19 Nuumala-vo, atthu Oomwene owiiwelela, anrowa otthikela okhala oomalela. Anrowa omutakihaka Yesu okhala oowiiyeviha, wiiwelela ni okupaleela okhulupale wa Yehova. Nave animooniherya wiiwelela iwo vaavo anrowa aya oxintta weehereriwa wookiserya. (Wis. 20:7-10) Nto, atthu otheene ahiniiwelela vamosa ni minepa sootakhala anoopwetexiwa. Tthiri onrowa okhala okathi woohakalaliha! Nto emusi ya olumwenku wotheene, enrowa onvuwihaka Yehova, yoowo onrowa ‘orumaka itthu sothene’.—Musome Esalimo 99:1-3.
20 Niireke wira itthu iya sa Omwene siniwehererya ahu wiiraneya, sinnivara murima anyu wira mwiimananiheke vanceene opaka yootthuna ya Muluku? Niireke munnikhootta owokiwa ni sooleiherya sa olumwenku ola wa Satana? Munoovikaniha olipiha yoolakela anyu wira mukhaliheryeke ni ororomela okhulupale wa Yehova? Nto, miteko sanyu sooniheryeke wira tthiri muniphavela wira yootthuna ya Muluku okathi wotheene. Opaka eyo enimoophwanyihani eparakha, ohakalala, murettele ni opuha okathi wa olamulelo wa iyaakha ekonto emosa, ni muhoolo mwaya!
[Elatarato epaaxina 16]
Yesu nuumala omaliherya muteko awe ntoko Mwene, mowiiyeviha owo ononvahererya omwene Tiithi awe.