Silempwale ni Marko
10 Yesu aahikhuma vale, onarowa omukanoni wa oYudeya, ekhopela ekina ya muro Yordani. Nave-tho, mittitthi sa atthu saahimuthukumanela. Nto aahipacerya owiixuttiha atthu awo,+ ntoko aalimalenle awe. 2 Nave, afarisi yaahimwaattamela Yesu aphavelaka omweehererya, anamukoha vakhala wiira vaaneemereriwa mulopwana omwalana ni mwaarawe.+ 3 Yesu aahiwaakhula wiira: “Moise oorummeni exeeni?” 4 Awo yaahihimya wiira: “Moise, oheemererya wiira mulopwana onvaheke mwaarawe etukumento ya omwalana ni omoomoleke”.+ 5 Nto, Yesu aahiwaakhula oriki: “Owo oovaha yooruma eyo,+ mwaha wa ohiphavela wanyu wiiwa.+ 6 Masi, okhuma woopaceryani, ‘Muluku ampattunxe mulopwana ni muthiyana.+ 7 Tivo, mulopwana onimwaahiya apapawe ni amamawe,+ 8 nto oowanli aya anrowa okhala erutthu emosa’.+ Siiso, awo khahiyo-tho atthu anli, masi ari erutthu emosa. 9 Nto, ele Muluku okhalinhe awe emosa, ohikhale mutthu onivalaanya”.+ 10 Okathi yaari aya mpaani, awiixutti yaahipacerya omukoha Yesu mwaha ene yoola. 11 Yesu aahaaleela wiira: “Ole onimwalana ni mwaarawe, onamuthela muthiyana mukina, mutthu owo onimuraruwela mwaarawe.+ 12 Nave, akhala muthiyana onimwalana ni iyawe, onatheliwa ni mulopwana mukina, muthiyana owo onooraruwa”.+
13 Atthu yaahipacerya omuruuhela Yesu anamwane acikhaani wiira owo aakwate, masi awiixutti yaanaapwapwela axipapaya ni aximamaya.+ 14 Nuumala oweha ele, Yesu khivaamusivenle. Nto aahaaleela awiixutti wiira: “Mwaahiye anamwane akirweeleke miyo. Muhaakhoottiherye, maana Omwene wa Muluku ti wawaya.+ 15 Kinooleelani ekeekhai wiira, ole ohinaakhela Omwene wa Muluku ntoko mwanamwane, tthiri khonikela Moomweneni-mmo”.+ 16 Yesu aahaakuxa anamwane mmatatani mwawe, onaareeliha, owiixaatheryaka matata awe.+
17 Okathi Yesu aakhuma awe opuro ole, mulopwana mmosa aahimutthimakela, okokhora ohoolo wawe, onamukoha wiira: “Mwiixuttihi ooloka, kipake exeeni wiira kiphwanye okumi woohimala?”+ 18 Yesu aahimwaakhula, oriki: “Xeeni munikiirela anyu ooloka? Ooloka ti Muluku paahi, khaavo-tho mukina.+ 19 Nyuwo munnisuwela sooruma sinihimya wiira: ‘Muhimwiive mutthu,+ muhiraruwe,+ muhiiye,+ muhimootherye mukhwiinyu,+ muhimootothe mukhwiinyu,+ mwaattittimiheke apapinyu ni amaminyu’”.+ 20 Mulopwana owo aahimwaakhula wiira: “Mwiixuttihi, miyo kinneettela itthu iya sootheene okhuma omiravo aka”. 21 Yesu aahinweha mulopwana ole, nto okhala wiira aanimphenta, aahimuhimeerya wiira: “Ennihala etthu emosa: Murowe mwatumihe mireerelo sanyu. Nto musurukhu ene mwaavahe alipa-oohaawa. Siiso, munookhalana muhakhu wiirimu. Nuumala-vo, murwe mukhale mwiixutti aka”.+ 22 Vaiwale awe moolumo ale, aahirowa oriipiwe ene murima, okhala wiira aahikhalana mihakhu sinceene.+
23 Yesu aahaaweha atthu yaari vaavale, nto onaaleela awiixutti awe wiira: “Vanoovila atthu arina musurukhu munceene okela Moomweneni mwa Muluku!”+ 24 Masi awiixutti yaahitikinihiwa ni moolumo awe. Nto Yesu aahaahimeerya-tho, oriki: “Anaaka, ovila okela Moomweneni mwa Muluku! 25 Vanookhweya ekamelo ovira vamwiitheni va akulya, ovikana thaaciri okela Moomweneni mwa Muluku”.+ 26 Awiixutti yaahitepa oxankiheya, anahimya* wiira: “Khino ti pani oniwerya woopowa?”+ 27 Yesu aahaawehexexa, onahimya so: “Moonelo wa atthu, etthu ela kheniweryaneya. Masi moonelo wa Muluku khahiyo siiso, maana Muluku onniwerya opaka itthu sootheene”.+ 28 Vano, Pedru aahimuleela Yesu wiira: “Hiyo-va, noohiya itthu sootheene nnoottharani”.+ 29 Yesu aahihimya wiira: “Kinooleelani ekeekhai wiira, ole ohiyale empa awe, aahiyale axinnawe, axirokorawe, amamawe, apapawe, anaawe, aahiiso ohiyale imatta mwaha wookhala mwiixutti aka ni mwaha wa ihapari sooreera,+ 30 okathi ola, onimwaakhela voowaatta, ipa, axinna, axirokora, aximaama, anamwane, imatta, hata olupatthiwaka.+ Nave olumwenku* onirwa, onoophwanya okumi woohimala. 31 Anceene ari oopacerya, anrowa okhala ookiserya. Nave anceene ari ookiserya, anrowa okhala oopacerya”.+
32 Vano, Yesu ni awiixutti awe yeetta ephiro enrowa oYerusalemu. Yesu aari ohoolo, nto awiixutti yaahitikinihiwa vanceene. Nave ale yaatthara, yaahipacerya woova. Yesu aahitthikela waakuxa arummwa 12, aaroiha opuro mukina, onaaleela itthu saarowa omwiiraneela,+ oriki: 33 “Mwiiwe! Ninrowa oYerusalemu, nto Mwaana a Mutthu onrowa ovahereriwa mmatatani mwa makhulupale a anamukuttho ni alipa-oowiixuttiha nlamulo. Awo anrowa omulamula wiira iiviwe ni anonvahererya mmatatani mwa amalapo. 34 Nave anrowa onveeha ni omusenela ni onwaxula ni omwiiva. Masi nihiku na neeraru, onoohihimuxiwa”.+
35 Yakobo ni Yohani, anamwane a Zebedeyo,+ yaahimwaattamela Yesu, anamuhimeerya wiira: “Mwiixuttihi, muniirele etthu eniphavela ahu woovekelani”.+ 36 Owo aahaakoha, oriki: “Muniphavela kiwiireleni exeeni?” 37 Awo yaahimwaakhula wiira: “Muneemererye okilaathi ni nyuwo, okathi munrowa anyu olamulelaka moomweneni mwanyu.+ Mmosa akilaathi moono anyu woolopwana, mukina moono anyu woothiyana”. 38 Yesu aahaaleela wiira: “Nyuwo khamunsuwela eniveka anyu. Niireke munoowerya owurya ele eniwurya aka, aahiiso opatisiwa ni opatiso kinipatisaniwa aka?”+ 39 Awo yaahimwaakhula, ariki: “Nnoowerya”. Nto Yesu aahaahimeerya wiira: “Nyuwo munoowerya owurya ele eniwurya aka, nave munoopasitiwa ni opatiso kinipatisaniwa aka.+ 40 Masi okilaathi moono aka woolopwana aahiiso woothiyana, khahiyo miyo kinivaha, maana ale aneemereriwa okilaathi mapuro awo, taale anithanliwa ni Tiithi aka”.
41 Nuumala awiixutti ale akina 10 wiiwa mwaha ole, yaahinanariwa ni Yakobo ni Yohani.+ 42 Vano, Yesu aahaathukumanya awiixutti awe ootheene, onaahimeerya wiira: “Nyuwo munnisuwela wiira ale anooniwa okhala anamalamulela a mulaponi, annaapuherya atthu aya. Nave makhulupale annaawerya atthu awo.+ 43 Nto nyuwosa muhiireke siiso. Masi ole oniphavela okhala mukhulupale eriyari anyu, ohaana okhala murumeyi anyu.+ 44 Nave ole oniphavela okhala oopacerya eriyari anyu, ohaana okhala epottha anyu. 45 Hata Mwaana a Mutthu khorwenle orumeeliwa, masi orwenle orumeela+ ni ovaha okumi awe, wiira owoopole* atthu anceene”.+
46 Yesu ni awiixutti awe yaahiphiya oYeriko. Masi okathi Yesu ni awiixutti awe ni muttitthi muulupale wa atthu yaakhuma aya oYeriko, yaahimphwanya nasimola mmosa ahoona, aihaniwa Baritimeyo (mwaana a Timeyo), okilanthi ene mukerekhere mwa estaraata.+ 47 Okathi aiwale awe wiira Yesu munazarethi taavira, aahipacerya okhuwela, oriki: “Yesu, Mwaana a Davidi,+ mukimorele ikharari!”+ 48 Tivo, atthu anceene yaahipacerya ompwapwela, amuleelaka wiira omaale. Masi owo aamutepa okhuwela, oriki: “Mwaana a Davidi, mukimorele ikharari!” 49 Nto Yesu aaheemela, onahimya wiira: “Mmwiihane, orwe-va”. Vano awo yaahimwiihana mulopwana ole ahoona, anamuhimeerya wiira: “Mulipihe murima! Mweemele, Yesu onoowiihanani”. 50 Aahiriha nlaya nawe na ota, aahitupha, eemela, onarowa vaari Yesu. 51 Yesu aahimuhimeerya wiira: “Muniphavela kiwiiriheni exeeni?” Mulopwana ole ahoona, aahimwaakhula Yesu, oriki: “Raboni,* kiniphavela otthikela woona”. 52 Nto, Yesu aahimwiirela: “Muroweke. Waamini wanyu ohookhalihani saana”.+ Niinaano-ru, mulopwana ole aahitthikela woona,+ onapacerya omutthara Yesu estaraata aarowa awe.