EZEKIYELI

1 Eyaakha ya namiloko miraru, mweeri wa neexexe, nihiku na neethanu na mweeri yoowo, okathi kaari aka ni atthu yaaroihiwe weepotthani+ waattamela muro Kebari,+ erimu yaahihuleya ni kaahipacerya wooniheriwa itthu ni Muluku. 2 Nihiku na neethanu na mweeri owo, eyaakha ya neethanu, okhuma vaavale mwene Yoyakiini+ aari awe weepotthani, 3 Ezekiyeli* mwaana a namukuttho Buzi, aahisuwelihiwa moolumo a Yehova waattamela omuro Kebari, elapo ya atthu a oKhaldeya.+ Weiwo, owerya wa* Yehova waahikhala nuuwo.+

4 Okathi kaaweha aka, kaahoona epheyo yuulupale+ ekhumaka onorti, nave naahikhala neeku nuulupale ni mooro waapatta,*+ nenno naarukureriwe ni waarya wuulupale. Nto eriyari ya mooro owo, yaahikhala etthu yaalikana ni eyuuma yoowaarya.*+ 5 Muhina mwa mooro owo, yaahikhala etthu yaalikana ni soopattuxiwa ixexe sikumi,+ nto khula yoopattuxiwa yaalikana ni mutthu. 6 Khula emosa yaarina ithoi* ixexe ni mapupha maxexe.+ 7 Inawu saya saari sooweemela, iyo saalikana ni itthottopwa* sa epooyi yaamukhaani, nave saanaarya ntoko ekoopiri yooreerihiwa.+ 8 Vathi va mapupha aya saahikhalana matata a apinaatamu ipantte sooxeexe, nave ipantte iyo sooxeexe saahikhalana ithoi ni mapupha. 9 Mapupha aya yaanikwatana. Okathi soopattuxiwa iyo seetta aya, khisaarukunuwa, khula emosa yaarowa ohoolo.+

10 Owiitho waya waari so: Ohoolo yaarina owiitho wa mutthu, moono woolopwana yaarina owiitho wa kharamu,+ moono woothiyana yaarina owiitho wa epooyi,+ nave ottuli yaarina owiitho+ wa murumaasi.+ 11 Siiso ti saari aya owiitho waya. Mapupha aya yaanaataleleya vasulu vaya. Khula yoopattuxiwa yaahikhalana mapupha manli yaakwatana, nave mapupha manli yaakhuneela erutthu aya.+

12 Khula emosa yaanirowa ohoolo, weiwo ikuru sa Muluku saaroiha aya.+ Okathi seetta aya, khisaarukunuwa. 13 Soopattuxiwa iyo sikumi saalikana ni makhala a mooro. Iyo saalikana ni mithuko sa mooro waavarela, weetta ninno-ninno eriyari ya soopattuxiwa sikumi. Nto vamooroni-vo+ yaanikhuma etari. 14 Okathi soopattuxiwa iyo sikumi saarowa aya ni saatthika aya, saaneetta ntoko etari.

15 Okathi kaaweha aka soopattuxiwa iyo sikumi, kaahiweha nroota vathi, mpantta wa khula soopattuxiwa sikumi, saarina ithoi xexe.+ 16 Maroota ni mukhalelo aya waanaarya ntoko nluku nniihaniwa krisoolito, nave ooxeexe aya yaamulikana. Mukhalelo wa maroota awo ni moota yaapakiwe aya, waari ntoko nroota nri muhina mwa nroota nikhwaaya.* 17 Okathi yeetta aya, yaaniwerya orowa ipantta ixexe, ahirukununwe. 18 Aaruku* aya yaari oorakamela musulu ni ootikiniha. Aaruku awo ooxeexe yaahisareya maitho.+ 19 Khula okathi soopattuxiwa iyo sikumi seetta aya, nave maroota yaaneetta vamosa niiyo. Okathi soopattuxiwa iyo saavenya aya vathi, nave maroota yaanivenya.+ 20 Soopattuxiwa* iyo saanirowa opuro ikuru sa Muluku saaphavela aya wiira sirowe, aayo, khula opuro ikuru sa Muluku saarowa aya. Nave-tho maroota yaanivenya vamosa ni soopattuxiwa iyo, okhala wiira ikuru sa Muluku seettiha soopattuxiwa iyo, nave-tho saahikhala mmarootani. 21 Okathi soopattuxiwa iyo seetta aya, maroota yaaneetta, okathi seemela aya, nave maroota yaaneemela. Okathi saavenya aya vathi, nave-tho maroota yaanivenya vamosa ni soopattuxiwa iyo, okhala wiira ikuru sa Muluku seettiha soopattuxiwa iyo, nave-tho saahikhala mmarootani.

22 Vasulu va+ soopattuxiwa iyo sikumi, yaahikhala etthu yaalikana ni exeelu. Eyo yaari yootikiniha. 23 Vathi va exeelu eyo, mapupha aya yaari oowookololowa,* khula nipupha niwenhe ene mpantta mukina. Khula yoopattuxiwa yaarina mapupha manli wiira akhuneeleke mpantta mukina wa erutthu, nave manli wiira akhuneeleke mpantta mukina. 24 Okathi kaiwale aka oruma wa mapupha aya, waalikana ni onyakula wa maasi ootupa ni nsu na Muluku Oowerya Sootheene.+ Okathi yeetta aya, oruma waya waalikana ni wa anakhotto. Okathi seemela aya, iyo saanikhuna mapupha aya.

25 Naaniiwanyeya nsu vasulu va exeelu eyo yuulupale yaari vasulu va soopattuxiwa iyo. (Okathi iyo seemela aya, saanikhuna mapupha aya.) 26 Vano exeelu eyo yuulupale yaari vasulu va soopattuxiwa iyo, yaahikhala etthu yaalikana ni nluku noowaarya nniihaniwa safira,+ yaalikana ni ehice.+ Vasulu va ehice eyo, ookhala aakilanthi aalikana ni mutthu.+ 27 Okhuma muyuununi mwawe orowa osulu, kaahiweha etthu yaarya yaalikana ni eyuuma yoowaarya,+ yeeyo yaakhala ntoko mooro waavarela. Nave okhuma muyuununi mwawe orowa vathi, kaahiweha etthu yaalikana ni mooro.+ Waarya waahimurukurerya, 28 ntoko ekhweyi+ enikhumelela mmeekuni, nihiku na epula. Ti siiso saari aya waarya waamurukurenrye. Waarya iwo waalikana ni ovuwa wa Yehova.+ Okathi kaawehale aka eyo, kaahuuramela vathi, kinapacerya owiriyana nsu na mutthu aalavula.

2 Vano owo aahikihimeerya wiira: “Nyuwo mwaana a mutthu,* mweemele wiira kilavule ni nyuwo”.+ 2 Okathi Muluku aalavula awe ni miyo, owo aahikivaha ikuru sawe ni aahikeemexa+ wiira kiwerye omwiiwa olavulaka ni miyo.

3 Owo aahitthikela olavula ni miyo oriki: “Nyuwo mwaana a mutthu, miyo kinnoorumani wiira murowe wa atthu a Isarayeli,+ maloko yaawo oohiiwelela ni akirukunuwenle.+ Awo ni amuhavinre aya, annikitthekela mpakha olelo-va.+ 4 Miyo kinnoorumani wa anamwane oothipelela ni oohiiwelela,+ nto nyuwo muhaana waaleela wiira: ‘Ela ti etthu onihimya awe Pwiya Muulupalexa Yehova’. 5 Masi awo, hata awiriyanaka aahiiso akhoottaka owiriyana, mwaha wookhala atthu a etthoko yoohiiwelela,+ anoosuwela wiira ookhala profeta eriyari aya.+

6 Masi nyuwo, mwaana a mutthu, muhiwoove,+ nave muhoove moolumo aya, nnaamwi murukureriwe ene ni miiwa*+ ni mukhalaka eriyari ya makharanace.* Muhoove moolumo aya,+ nave muhithukumele mwaha wa owiitho waya,+ okhala wiira awo atthu a etthoko yoohiiwelela. 7 Nyuwo muhaana waaleela moolumo aka, hata yoowiriyanakani aahiiso ahoowiriyanakani, maana awo atthu oohiiwelela.+

8 “Masi nyuwo, mwaana a mutthu, nwiriyane ele kinooleelaakani. Muhikhale oohiiwelela ntoko atthu ala oohiiwelela. Muhule eyano anyu ni mukhuure etthu kinoovahaakani”.+

9 Okathi kaatthukunle aka maitho, kaahoona kookoleliwe ene ntata,+ nave ntata nlo naahikuxa eroolu yaalempwale.+ 10 Okathi aatapurunxe awe eroolu eyo ohoolo waka, kaahoona wiira eroolu eyo yaahilempwa ipantta soopiili, ohoolo ni ottuli.+ Murooluni-mmo yaahilempwa masipo a masikho, a wunla ni a wiikhupanyerya.+

3 Nuumala-vo owo aahikileela wiira: “Nyuwo mwaana a mutthu, mukhuure etthu ela eri ohoolo wanyu.* Mukhuure eroolu ela, muroweke, mwalavule ni atthu a Isarayeli”.+

2 Nto miyo kaahihula eyano aka, vano owo aahikikhuuriha eroolu eyo. 3 Owo aahitthikela olavula ni miyo oriki: “Nyuwo mwaana a mutthu, mukhuure eroolu ela kinoovahaakani, nave musarihe nipwiipwi* nanyu ni eroolu ela”. Nto miyo kaahipacerya okhuura, vano mwaano mwaka yaari yoonaya ntoko oravo.+

4 Owo aahikihimeerya wiira: “Nyuwo mwaana a mutthu, murowe wa atthu a nloko na Isarayeli ni mwaaleele moolumo aka. 5 Tthiri nyuwo khahiyo munirummwa wa atthu anlavula nttaava nooxankiha aahiiso nihinisuweliwa, masi munirummwa wa atthu a nloko na Isarayeli. 6 Nyuwo khahiyo munirummwa orowa wa atthu anceene anilavula nttaava nooxankiha aahiiso nihinisuweliwa, yaawo moolumo aya muhinwerya anyu wiiwexexa. Vaakhanle wiira kinoorumani wa atthu awo, awo yaamoowiriyanani.+ 7 Masi atthu a etthoko ya Isarayeli khanrowa woowiriyanani, okhala wiira awo khaniphavela okiwiriyana.+ Atthu ootheene a nloko na Isarayeli toolipa muru ni toowuumiha murima.+ 8 Mwiiwe! Miyo kihiiriha owiitho wanyu okhala woolipa ntoko owiitho waya, nave kihiiriha eyuuci anyu okhala yoolipa ntoko iyuuci saya.+ 9 Miyo kihiiriha eyuuci anyu okhala ntoko etiyamanti,* nave okhala yoolipexa ovikana nluku nootepa olipa.+ Muhiwoove atthu awo nnakhala muhithukumele mwaha wa owiitho waya,+ okhala wiira awo atthu a etthoko yoohiiwelela”.

10 Owo aahikihimeerya-tho wiira: “Nyuwo mwaana a mutthu, muhele vamurimani vanyu ni nwiriyane moolumo aka ootheene kinoohimeeryaakani. 11 Murowe wa atthu anyu*+ akhalihiwe ipottha ni mwalavule naawo. Mwaaleele wiira: ‘Ela ti etthu onihimya awe Pwiya Muulupalexa Yehova’, hata awiriyanaka aahiiso akhoottaka owiriyana”.+

12 Vano ikuru sa Muluku saahikikuxa,+ nto kaahiiwa nsu nuulupale ottuli waka naahimya wiira: “Ottottopeliwe ovuwa wa Yehova opuro awe”. 13 Kaahiiwa oruma wa mapupha a soopattuxiwa sikumi akwatanaka,+ oruma wa maroota yaattamenle aya+ ni onyakula wuulupale. 14 Vano ikuru sa Muluku saahikivenxa ni saahikikumiha opuro ole, nto miyo kaahiriipiwa murima ni kaahinanariwa, vano owerya wa Yehova waahikikhaliherya. 15 Vano kaahirowa wa atthu yaakhalihiwe ipottha oTeli-Avivi, yaawo yaakhala waattamela muro Kebari,+ nto kaahikhala weiwo ni atthu awo.+ Kaahikhala mahiku 7 ni atthu awo, kitikinihiwe ene.

16 Nuuvira mahiku 7, kaahisuwelihiwa moolumo a Yehova yaahimya wiira:

17 “Nyuwo mwaana a mutthu, miyo kihoothanlani wiira mukhale mulipa-oowehaweha a atthu a nloko na Isareyeli.+ Okathi munrowa anyu wiiwa moolumo anikhuma mwaano mwaka, muhaana waaleela etthu kinaalopola aka.+ 18 Kamuleela mutthu ootakhala wiira: ‘Tthiri nyuwo munimookhwa’, masi nyuwo muhimulopola, nave mwaahimuleele etthu mutthu owo ootakhala wiira ottharuwe mweettelo awe wootakhala ni okhale mukumi,+ owo onimookhwa mwaha wa etampi awe okhala wiira tootakhala.+ Masi miyo kinimoohimyani okhalana mulattu mwaha wa okhwa wawe.+ 19 Masi mwamulopola mutthu ootakhala, nto okhootta ohiya otakhala wawe ni mweettelo awe wootakhala, owo onimookhwa mwaha etampi awe, vano nyuwo munimoopola okumi anyu.+ 20 Masi akhala wiira naxariya onoohiya weettela exariya, onapaka itthu soohiloka,* miyo kinoomwiiriha omora. Nave owo onimookhwa.+ Vakhala wiira nyuwo khamunimulopola, owo onimookhwa mwaha wa etampi awe ni miteko sawe sa xariya khasinrowa wuupuweliwa, masi kinimoohimyani nyuwo okhalana mulattu mwaha wa okhwa wawe.+ 21 Masi mwamulopola naxariya wiira ohittheke, nto owo ohittheka, tthiri owo onookhala mukumi mwaha woowi oolopoliwa.+ Nave nyuwo munimoopola okumi anyu”.

22 Weiwo owerya wa Yehova waahikirweela, nto owo aahilavula ni miyo oriki: “Nvenye, murowe opuro woowaataleya, nto miyo kinoolavula ni nyuwo weiwo”. 23 Vano miyo kaahivenya ni kaahirowa opuro woowaataleya, weiwo kaahiweha ovuwa wa Yehova+ waalikana ni ovuwa koonale aka omuro Kebari,+ nto kaahuurama mpakha vathi. 24 Nuumala-vo, saahikiphwanya ikuru sa Muluku ni saahikiiriha weemela,+ nto owo aahilavula ni miyo okihimeerya wiira:

“Murowe, mwaiwalele mpaani mwanyu. 25 Vano nyuwo, mwaana a mutthu, awo animootthukwani ni mikhoyi wiira muhirowe eriyari aya. 26 Miyo kinimwiiriha nlumi nanyu ophara osulu wa mwaano mwanyu, nto nyuwo khamunrowa owerya olavulaka, nave khamunrowa owerya waapwapwela, okhala wiira awo atthu a etthoko yoohiiwelela. 27 Masi okathi kinrowa aka olavula ni nyuwo, kinoohula eyano anyu, nto nyuwo muhaana waaleela atthu awo wiira:+ ‘Ela ti etthu onihimya awe Pwiya Muulupalexa Yehova’. Ole oniphavela owiriyana owiriyaneke,+ nave ole onikhootta owiriyana ohiwiriyaneke, okhala wiira awo atthu a etthoko yoohiiwelela.+

4 “Vano nyuwo, mwaana a mutthu, mukuxe etixolu mpwehe ohoolo wanyu. Mutesenyari vatixoluni-vo, epooma ya oYerusalemu. 2 Mwiipithele epooma eyo,+ muteke exiri enirukurerya epooma eyo,+ muteke opuro woorakamela osulu yoowo onirukureriha epooma eyo,+ mukerekhere mwa epooma eyo muteke maxaxa. Nave anakhotto arukurerye+ epooma eyo akunxe ene ikaruma saya sa ekhotto. 3 Mmukuxe asateera a eyuuma, mumpwehe ntoko exiri ya eyuuma eriyari anyu ni epooma eyo. Nuumala-vo, nwehexexeke epooma eyo, nto eyo enoorukureriwa, maana ti nyuwo munirukurerya. Ela ti ethoonyeryo para atthu a nloko na Isarayeli.+

4 Nuumala-vo, mumpaathi ni moono anyu woothiyana, mpwehe vasulu vanyu* mulattu wa atthu a Isarayeli.+ Nyuwo munookuxa mulattu aya mahiku ootheene munrowa anyu wumpaathi. 5 Nto miyo kinimoophimelani mahiku 390, yaawo anithoonyerya iyaakha sa mulattu aya,+ vano nyuwo munookuxa mulattu wa atthu a nloko na Isarayeli. 6 Nto nyuwo muhaana omaleliha mahiku awo.

“Nuumala-vo, mwampaathi ekwaha ya nenli, mwampaathele moono anyu woolopwana, wiira mukuxe mulattu wa atthu a oYuda+ mahiku 40. Khula nihiku ninthoonyerya eyaakha emosa, eyo ti etthu kinoorumaakani. 7 Nto nyuwo nweheke oYerusalemu+ orukureriwe ene mukhunne ene moono anyu, nave mulaleyeke eprofesia nvirikanyaka epooma eyo.

8 “Vano, miyo kinimootthukwani ni mikhoyi wiira muhiwerye orukunuwela mpantta mukina mpakha omaleliha mahiku a orukurerya wanyu.

9 “Vano nyuwo muhaana okuxa etiriku, esevaata, namakotto, lentiilya,* epyo enlikana ni nantti* ni espelta,* mutakaahe sootheene mutixelani, mpake ephaawu anyu. Mahiku ootheene munrowa anyu wumpaathi mpantta mmosa, eyo piiyo, mahiku 390, munrowa okhuuraka yeeyo.+ 10 Nyuwo munoophima ni khula nihiku munrowa olyaaka ixeekele* 20 sa yoolya. Nyuwo munrowa olyaaka okathi othanliwe.

11 “Nave nyuwo munrowa owuryaka maasi mphimeliwaka ikoopho piili* khula nihiku. Munrowa owuryaka okathi othanliwe.

12 “Nyuwo munrowa okhuuraka ephaawu eyo, ntoko siisaale enikhuuriwa aya ephaawu yoovilikeya ya esevaata. Muhaana wooxa ephaawu eyo murumeelaka mavi oowuuma a apinaatamu ntoko ikhuni, mooniwaka naawo”. 13 Yehova aahincererya oriki: “Mwa enamuna emosa-ru, aisarayeli anookhuura ephaawu yoohiloka, eriyari ya maloko kinrowa aka waamwara-mwarya”.+

14 Nto miyo kaahihimya wiira: “Nnaari, Pwiya Muulupalexa Yehova! Okhuma omiravo aka mpakha vano, nkinakhale oohiloka mwaha wookhuura enama yoowiikhwela aahiiso enama yiiviwe ni enama ya mutakhwani,+ nave mwaano mwaka+ khamunakhale moohiloka mwaha wa enama yoohiloka”.

15 Nto owo aahikileela wiira: “Kihiiwa, kinimoohiyani wiira murumeele mavi a ipooyi ohiya mavi a apinaatamu, wiira mooxe ephaawu anyu”. 16 Nuumala-vo, owo aahikileela wiira: “Nyuwo mwaana a mutthu, kinoovukula yoolya* oYerusalemu,+ atthu ariipiwe ene murima, anoolyaaka yoolya aphimeliwaka,+ nave maasi anrowa aya ophimeliwaka, anrowa owuryaka yoovaka.+ 17 Eyo enimwiiraneya wiira ahihalane yoolya nnakhala maasi. Awo anrowa owehanaka axankale ene, mwaha wa itampi saya.

5 Nyuwo mwaana a mutthu, mukuxe espaata yoononiwa, ni murumeele* ntoko mwaalo mwaamukhaani* wa mulipa-oomettha. Mmetthe ikharari sanyu ni ereru anyu, nuumala-vo mphime vapalansani ikharari iyo ni sa ereru, ni mukawanye ipantta tthaaru. 2 Yamala mahiku a orukurerya,+ munoopaha vamooroni epantta yoopacerya ya ikharari iyo, mpooma. Nto munookuxa mpantta wa nenli muthikilase ni espaata, murukureryaka epooma yootheene.+ Vano, mpantta wa neeraru munoovaviha ni epheyo, nto miyo kinimoomola ni espaata.+

3 “Nave-tho, mukuxe ikharari vakhaani mutthukwe vaniveruni va ekuwo anyu. 4 Mukuxe ikharari vakhaani, murihele vamooroni ni mpahe. Mooro owo onoomwara-mwareya nloko nootheene na Isarayeli.+

5 “Etthu onihimya awe Pwiya Muulupalexa Yehova, tiila: ‘Ola Yerusalemu. Miyo kompweha eriyari ya maloko, orukureriwe ene ni ilapo sikina. 6 Masi, owo oovirikanya moolumo aka oophukela ni sooruma saka, opakaka itthu sootepa otakhala ovikana maloko ni ilapo sootheene simurukurenrye.+ Tthiri awo aakhootta moolumo aka oophukela ni khiyeettenle sooruma saka’.

7 “Tivonto, etthu onihimya awe Pwiya Muulupalexa Yehova, tiila: ‘Nyuwo mootepa okhala oohiiwelela ovikana maloko ootheene yoorukurenryeni, nave khamweettenle sooruma saka ni khamwiiwelenle moolumo aka oophukela. Ohiya-vo, muhiiwelela moolumo oophukela a maloko ootheene yorukurenryeni.+ 8 Tivo, etthu onihimya awe Pwiya Muulupalexa Yehova, tiila: “Nyuwo epooma,+ miyo kinnoovirikanyani, nave kinimoophukelani eriyari anyu, ohoolo wa maloko.+ 9 Kinoowiirelani etthu kihitonko aka opaka, nnakhala kihinrowa aka otthikela opaka, mwaha wa itthu sootheene sootepa onanara mpanke anyu.+

10 “‘“Axipaapa ari eriyari anyu, animwaakhuura anaaya,+ nave anamwane animwaakhuura axipapaya. Miyo kinimoophukelani, nave itthu sinrowa ohala kinoomwaraxela ipantta sootheene”’.+

11 “Pwiya Muulupalexa Yehova, onihimya wiira: ‘Tivonto, kinnilaphela okumi aka wiira, okhala wiira moonanariha opuro aka woowaarya ni ilatarato sanyu sootheene soohiirya, ni itthu sootheene sootepa onanara mpanke anyu,+ miyo kinimookhoottani, nkinrowa-tho woomorelani ikharari nnakhala owoonelani othunku.+ 12 Ekurupu emosa ya atthu ari mpooma animookhwa eretta, aahiiso anoomala-mala mwaha wa etala. Ekurupu ekina enimwiiviwa ni espaata.+ Nave ale anrowa ohala kinimwaamwara-mwarya ipantta sootheene, nave kinookumiherya espaata wiira ewoomole.+ 13 Onanariwa waka onoomala, waaviruwela waka onoomala-mala, nto kinoohakalala.+ Okathi kinrowa aka omaliha onanariwa waka naawo, awo anoosuwela wiira miyo Yehova, koothipelela olavula siiso, okhala wiira kiniphavela wiira kikokhoreliweke miyo paahi.+

14 “‘Kinimookhalihani opuro woothaamiwa ni etthu enithanyiwa eriyari ya maloko yoorukurenryeni, ni vamaithoni va atthu ootheene anivira.+ 15 Nyuwo munrowa okhala etthu enithanyiwa ni eniveehiwa,+ nave ntakiheryo nanyu ninrowa orumeeliwa ntoko etthu enlopola, maloko anrowa woorukureryani anrowa woovaka, okathi kinrowa aka woophukelani ni woohukhumuni, kinanariwe ene ni kivirunwe ene. Ti miyo Yehova kilavunle.

16 “‘Kinimookumiheryani etala yeeyo enrowa woopwetexani ntoko mattheere.*+ Kinimuncererya etala, kihitthunihaka okela eyoolya*+ mpooma. 17 Kinimookumiheryani etala ni axinama oowoopiha,+ yaawo anrowa woohiyani muhirina anamwane. Eretta ni espaata sinoowiivani.+ Ti miyo Yehova kilavunle’”.

6 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, nweheke miyaako sa wIsarayeli ni mulaleye eprofesia enihimya miyaako iyo. 3 Muhimye wiira: ‘Nyuwo miyaako sa wIsarayeli, nwiriyane moolumo a Pwiya Muulupalexa Yehova: Etthu onihimya awe Pwiya Muulupalexa Yehova, ohimyaka miyaako, mattumuxa, miro ni mapuro oowaataleya, tiila: “Moone! Kinimooruuhelani espaata* ni kinrowa opwetexa mapuro anyu oottukhuwa. 4 Altaari anyu anoopwexakasiwa, altaari anyu a nsenso* anoomala-malihiwa,+ nave kinoorihela mirutthu sanyu ohoolo wa ilatarato sanyu soohiirya.*+ 5 Kinoorihela mirutthu sa atthu a Isarayeli ohoolo wa ilatarato saya sootepa onanara, nave kinoomwara-mwarya makhuva anyu mukerekhere mootheene mwa altaari anyu.+ 6 Mapuro ootheene munikhala anyu, ipooma sinrowa okhala milepe,*+ nave mapuro oorakamela osulu anoopwexakasiwa ni anrowa okhala milepe.+ Altaari anyu anoomoroxiwa ni anoopwexakasiwa, nave ilatarato sanyu sootepa onanara sinoopwetexiwa, altaari anyu onipahiwa nsenso* onoopwexakasiwa. Nave miteko sanyu sootheene sinoomala-malihiwa. 7 Atthu anceene anookhwela eriyari anyu,+ nto nyuwo munoosuwela wiira miyo ka Yehova.+

8 “‘“Okathi munrowa anyu omwara-mwariwa mulaponi,+ miyo kinimwaahiya akina a nyuwo ahinrowa wiiviwa ni espaata eriyari ya maloko. 9 Nto ale anrowa woopowa anoorowa okuupuwelela eriyari ya maloko weiwo anrowa aya okhalihiwa ipottha.+ Awo anoosuwela moota kiriipiwe aka murima mwaha wa murima aya woohiroromeleya, yoowo waahapunxe wa miyo+ ni mwaha wa maitho aya aniphavela vanceene ilatarato saya soohiirya.+ Awo animuuliwa muru nave murima onooweetta mwaha wa itthu sootheene sootakhala ni soohiirya apanke aya.+ 10 Awo anoosuwela wiira miyo ka Yehova ni wiira okathi kaaleihenrye aka waakumiherya ehasara ela khahiyo yaari moolumo eethiru”’.+

11 Etthu onihimya awe Pwiya Muulupalexa Yehova, tiila: ‘Moope makuphi, mmane vathi ni inawu sanyu mwiikhupanyerye mwaha wa itthu sootheene sootakhala ni soohiirya sipakiwe nloko na Isarayeli, okhala wiira awo animookhwa espaata, etala ni eretta.+ 12 Ale anrowa okhala ottaiwene animookhwa eretta, ale anrowa okhala vakhiviru animookhwa espaata, ootheene yaale anrowa woopowa itthu iya ni anrowa ohala animookhwa etala. Kinoomaliha onanariwa waka wootheene naawo.+ 13 Nyuwo munoosuwela wiira miyo ka Yehova,+ okathi atthu anyu anceene anrowa aya okhwela eriyari ya ilatarato saya soohiirya, mukerekhere mootheene mwa altaari aya,+ mmattumuxani mootheene, mukerekhere mwa miyaako sootheene, vathi va miri sootheene suulupale ni vathi va iritta sa miri suulupale, vaavo anivaha aya mikuttho soowunkhela wiira asiveliweke ilatarato saya sootheene soohiirya.+ 14 Kinoowookolela ntata naka kaavirikanyaka ni kinimwiiriha elapo ohikhaliwa. Mapuro ootheene anikhala aya anootepa okhala milepe ovikana othako ori waattamela muttetthe wa oDibla. Nto awo anoosuwela wiira miyo ka Yehova’”.

7 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, etthu onihimya awe Pwiya Muulupalexa Yehova, ohimyaka elapo ya Isarayeli, tiila: ‘Woophiya okathi! Woophiya okathi wiira elapo yootheene emale. 3 Vano woophiya okathi wiira mmala-male. Kinimooniherya onanariwa waka ni nyuwo, kinimoophukelani kittharaka iphiro sanyu, nave munimwaakhula mwaha wa miteko sanyu sootheene soohiirya. 4 Miyo nkinrowa woomorelani ikharari nnakhala owoonelani othunku,+ okhala wiira kinimoolivani kittharaka miteko sanyu, nave munoohaawa mwaha wa miteko sanyu soohiirya.+ Nto nyuwo munoosuwela wiira miyo ka Yehova’.+

5 “Etthu onihimya awe Pwiya Muulupalexa Yehova, tiila: ‘Mwiiwe! Ennaattamela ehasara, ehasara yuulupale.+ 6 Onnaattamela okathi, woophiya okathi! Okathi owo onimoophwanyani vootutuxerya. Mwiiwe! Okathi onnaattamela! 7 Nyuwo munikhala mulaponi, mahiku anyu aamala. Onoophiya okathi, nihiku nri vakhiviru.+ Omiyaakoni atthu annoova, ohiya okhuwela vootteeliwa murima.

8 “‘Moohipisa, kinimooviruwelani vanceene+ ni kinimooniherya onanariwa waka ni nyuwo.+ Kinimoophukelani kittharaka iphiro sanyu, nave munimwaakhula mwaha wa miteko sanyu sootheene soohiirya. 9 Miyo nkinrowa woomorelani ikharari nnakhala owoonelani othunku.+ Kinimoolivani kittharaka miteko sanyu, nave munoohaawa mwaha wa miteko sanyu soohiirya. Nto nyuwo munoosuwela wiira miyo ka Yehova, nave ti miyo kinoohukhumuni.+

10 “‘Ninnaattamela nihiku!+ Nlo noophiya! Mahiku anyu aamala, ekopo yoophuwa, nave wiixinnuwiha wa awanani ohincerereya. 11 Otakhala ohincerereya nave woopakeya ekopo ya otakhala.+ Awo khanrowa woopowa, aahiiso mihakhu saya, nnakhala muttitthi aya, wala ovuwa waya, khonrowa woopowa. 12 Onoophiya okathi, nave nnoophiya nihiku. Mulipa-oothuma ohihakalaleke, nave mulipa-ootumiha ohiikhupanyerye, okhala wiira onanariwa waka onimwaaphwanya atthu* ootheene.+ 13 Mulipa-ootumiha, khonrowa otthikela etthu otuminhe awe, hata oopowaka, okhala wiira itthu ooniheriwe awe moolohani, sinimwaaphwanyiha mureerelo atthu ootheene. Khuuvo onrowa otthika. Khuuvo onrowa woopola okumi awe, mwaha wa etampi awe.*

14 “‘Awo ahoopa malope,+ nave atthu ootheene ahiilokiherya, masi khuuvo onrowa okhottoni, okhala wiira kooviruwela muttitthi wootheene wa atthu.+ 15 Vate yookhala espaata,*+ nave muhina yookhala eretta ni etala. Ale anrowa okhala ota wa epooma animookhwa espaata, nave ale anrowa okhala muhina mwa epooma animookhwa etala ni eretta.+ 16 Ale anrowa woopowa yaawo anrowa ophavelaka otthyawa, anoorowa omiyaakoni. Nave awo anrowa olikanaka ni ipompa siri opuro woowaataleya, khula mmosa onrowa othukumelaka mwaha wa itampi sawe.+ 17 Matata aya ootheene anoomora, nave makutha ootheene anrowa ottonyaka maasi.+ 18 Awo aawara isaakho,+ nave annithukumela. Ootheene aya animuulihihiwa muru ni anoomettha mputu.*+

19 “‘Awo anoorihela eparatha aya mustaraatani, nave anoothanyaka eweero aya. Eparatha aya ni eweero aya khenrowa owerya owoopola nihiku na oviruwa wa Yehova.+ Awo khanrowa ophiyeriwa, nnakhala khanrowa ovona, okhala wiira eparatha aya ni eweero aya enrowa okhala nluku nnaamoroxa, niwiirihaka ottheka. 20 Awo ahiittottopa mwaha wa oreera wa itthu sinaaphwaneliha, nave arumeelaka itthu seiyo aapaka ilatarato saya soopatthiwa, ilatarato seiyo soohiirya.+ Tivo kinrowa aka owiiriha othanyaka eparatha aya ni eweero aya. 21 Miyo kinimwiiriha eparatha eyo ni eweero eyo okuxiwa ni atthu a elapo ekina, nave atakhali a mulaponi anookuxa, nto awo anoonanariha itthu iyo.

22 “‘Miyo nkinrowa waawehaka,+ vano awo anoonanariha opuro aka woowiipitheya.* Alatarau anookela memmo ni anoonanariha opuro owo.+

23 “‘Mpake ikwirinti,*+ okhala wiira elapo ela yoosareya ephome ya atthu alamuliwe wiiviwa voohixariya,+ nave yoosareya otakhala.+ 24 Miyo kinooruuha maloko ootepexa otakhala,+ nto atthu a maloko awo anookuxa ipa saya.+ Miyo kinoomala-maliha wiixinnuwiha wa atthu oowerya, nave mapuro aya oowaarya anoonanarihiwa.+ 25 Okathi anrowa aya oriipiwa murima, awo anrowa ophavelaka murettele, masi khanrowa ophwanya.+ 26 Sinookhumelela ihasara voohihiyererya, nave sinoolaleiwaka ihapari voohihiyererya. Atthu anrowa ophavelaka wooniheriwa itthu ni profeta,+ masi anamukuttho khanrowa ohalana nlamulo,* nave makhulupale khanrowa okhalana miruku.+ 27 Mwene onimunla,+ nave makhulupale anoovela-vela. Matata a atthu a mulaponi anoothukumela mwaha wa woova. Miyo kinimwaathokorerya kittharaka iphiro saya, nave kinimwaaphukela ntoko yaaphukenle aya akina. Nto awo anoosuwela wiira miyo ka Yehova’”.+

8 Eyaakha na neethanu namosa ya mweeri wa neethanu namosa, nihiku na neethanu na mweeri owo, okathi kaakilanthi aka owannyaka, nave makhulupale a oYuda yaakilanthi aya ohoolo waka, owerya* wa Pwiya Muulupalexa Yehova, waahikikhumelela. 2 Okathi kaaweha aka, kaahoona etthu yaalikana ni mooro. Okhuma muyuununi mpakha vathi waahikhala mooro,+ nave okhuma muyuununi mpakha osulu yaalikana ni etthu yoowaarya, ntoko eyuuma yoowaaryexa.*+ 3 Nto owo aahikookolela etthu yaalikana ni ntata, okivara ikharari. Nave, ikuru sa Muluku saahikikuxa sikivirihaka eriyari ya elapo ni erimu, sikiroiha oYerusalemu, orumeelaka itthu sooniheriwa ni Muluku, mpakha vamukhora wa muhina+ yoowo waaweha onorti, opuro waari aya elatarato enimwiiriha Muluku onanariwa.+ 4 Opuro ole, kaahiweha ovuwa wa Muluku a Isarayeli,+ waalikana ni ole kaawenhe aka opuro woowaataleya.+

5 Nuumala-vo, owo aahikileela wiira: “Nyuwo mwaana a mutthu, xontte, mutthukule maitho nweheke onorti”. Nto miyo kaahitthukula maitho kinaweha onorti, weiwo waari aya mukhora wa altaari, waari aya elatarato yaamwiiriha Muluku onanariwa. 6 Owo aahikileela wiira: “Nyuwo mwaana a mutthu, niireke munniweha itthu iya sootepa ohiirya atthu a nloko na Isarayeli sinipaka aya,+ seiyo sinikiiriha orakamela opuro aka woowaarya?+ Masi nyuwo munooweha itthu sootepaxa ohiirya ovikana iya”.

7 Nuumala-vo, owo aahikiroiha vamukhora wa nivate. Okathi kaawenhe aka, kaahiweha ephaka* vaxirini. 8 Owo aahikihimeerya wiira:” Nyuwo mwaana a mutthu, xontte, muncererye ephaka eyo vaxirini”. Nto miyo kaahincererya ephaka eyo kiweha opuro waaviriwa. 9 Owo aahikileela wiira: “Mukele ni nwehe itthu sootakhala ni soohiirya sinipakiwa opuro ola”. 10 Siiso miyo kaahikela ni kaahoona ilatarato soovirikana sa inama sa mutakhwani, inama soohiirya+ ni ilatarato sootheene soohiirya* sa atthu a nloko na Isarayeli,+ seiyo saatesenyariwe exiri yootheene. 11 Nave makhulupale 70 a nloko na atthu a Isarayeli, yeemenle ohoolo waya. Eriyari aya aahikhala Yaazaniya mwaana a Xafani.+ Khula mmosa aahikuxa mmatatani mwawe etthu yaapahaniwa nsenso,* nave mwiixi wa nsenso waanirowa osulu.+ 12 Owo aahikihimeerya wiira: “Nyuwo mwaana a mutthu, kiireke munniweha etthu makhulupale a atthu a nloko na Isarayeli anipaka aya wiiphiini, khula mmosa okilaathale ene esaala awe ya muhina weiwo siri aya ilatarato saya? Awo anihimya wiira: ‘Yehova khonniweha. Yehova oohiya elapo ahu’”.+

13 Owo aahincererya oriki: “Nlelo nyuwo munooweha itthu sootepaxa ohiirya sinipaka aya”. 14 Siiso owo aahikikuxa mpakha vamukhora wa onorti wa empa ya Yehova, nto weiwo kaahaaweha axithiyana akilaathale ene, amunlelaka muluku aya Tamuzi.

15 Owo aahikileela-tho wiira: “Nyuwo mwaana a mutthu, kiireke munniweha etthu ela? Munooweha itthu soohiirya, seiyo siri sootakhala ovikana iya”.+ 16 Siiso, owo aahikikuxa mpakha vanivateni na muhina na empa ya Yehova.+ Weiwo, vamukhora va etemplo ya Yehova, eriyari ya mukhora ni altaari, yaahikhala alopwana oowiiraka 25 yaarenrye ettuli etemplo ya Yehova, owiitho waya awenhe ene mpantta onikhuma nsuwa. Awo yaakokhorela nsuwa, awehaka mpantta onikhuma nsuwa.+

17 Owo aahikihimeerya wiira: “Nyuwo mwaana a mutthu, kiireke munniweha etthu ela? Kiireke khivaniphiyerya atthu a etthoko ya Yuda opaka itthu iya soohiirya ni osariha elapo ela ni otakhala+ ni othipelelaka okiveeha? Awo annihela eritta* mphulani mwaka. 18 Miyo kinooviruwa. Miyo nkinrowa woomorelani ikharari nnakhala owoonelani othunku.+ Hata yinlaka vanceene owaruni waka, nkinrowa waawiriyana”.+

9 Vano owo aahikikhuwelela owaruni ni nsu noowiiwanyeya, oriki: “Nwiihane ootheene ale anrowa ohukhumu epooma ela, khula mmosa okuxe ikaruma sawe soopwetexa!”

2 Miyo kaahiwoona alopwana 6 arwaaka. Awo yaakhuma mpantta wa mukhora muulupale+ waaweha onorti, khula mmosa okunxe ene ikaruma sawe soopwetexa. Eriyari aya aahikhala mulopwana mmosa aawanre ekuwo ya eliinyu, okunxe ene murupa* wa sekretaario* muyuununi mwawe. Vano awo yaahirwa, yeemela waattamela altaari a ekoopiri.+

3 Moottharelana, ovuwa wa Muluku a Isarayeli+ waahivenya waari awe, vasulu wa makerubi, onarowa vamukhora wa empa.+ Nto Muluku aahipacerya omukhuwelela mulopwana aawanre ekuwo ya eliinyu, yoowo aakunxe murupa wa mulipa-oolepa muyuununi. 4 Yehova aahimuhimeerya wiira: “Mweetteette opooma, mweetteette oYerusalemu. Mwaahele esinaale vayuuci alopwana yaale aniittha iphumu ni anithukumela+ mwaha wa itthu sootheene soohiirya sinipakiwa opooma”.+

5 Vano kaahimwiiwa aaleelaka alopwana ale akina, oriki: “Mweetteette opooma mmuttharaka yoowo, nave nwiivakase atthu. Niitho nanyu nihimoriwe ikharari, nnakhala nihoone othunku.+ 6 Nwiivakase atthu oowuuluvala, amiravo, athiyana ahitonko orupa ni alopwana, anamwane ni athiyana akina.+ Masi muhiwaattamele ale aheliwe esinaale.+ Nyuwo muhaana opacerya opaka eyo opuro aka woowaarya”.+ Siiso awo yaahaapacerya makhulupale yeemenle ohoolo wa etemplo.+ 7 Nuumala-vo, owo aahaaleela wiira: “Munanarihe etemplo ni musarihe vate va etemplo eyo ni mirutthu sa atthu ookhwa.+ Muroweke!” Nto awo yaahirowa ni yaahiwiivakasa atthu yaakhala mpooma.

8 Okathi yaawiivakasa aya atthu, miyo kaahanle mekhaka, nto kaahuurama mpakha vathi kinakhuwela kiiraka: “Pwiya Muulupalexa Yehova! Kiireke munrowa waapwetexa atthu ootheene ahanle a wIsarayeli, nlelo nviruwenle ene oYerusalemu?”+

9 Siiso owo aahikileela wiira: “Itampi sa atthu a nloko na Isarayeli ni a oYuda khasireere, sootepa waatta.+ Elapo ela yoosareya atthu yiiviwe,+ nave epooma ela yootepa ohononiwa.+ Awo anihimya wiira: ‘Yehova oohiya elapo ela, nave Yehova khonoona etthu’.+ 10 Masi, miyo nkinrowa woomorelani ikharari nnakhala owoonelani othunku.+ Miyo kinimwaaliva mwaha wa mweettelo aya, nave awo anoohaawa mwaha wa itthu soohiloka anipaka aya.

11 Nuumala-vo, kaahimoona mulopwana yoole aawanre ekuwo ya eliinyu ni aakunxe murupa wa mulipa-oolepa muyuununi, otthikaka, ohimyaka wiira: “Koopaka itthu sootheene mwaakirumme anyu”.

10 Okathi kaaweha aka, kaahoona etthu yaalikana ni nluku noowaarya nniihaniwa safira yaari vasulu va makerubi, eri ene osulu wa etthu yaalikana ni exeelu yeeyo yaari vasulu wa makerubi. Etthu eyo yaalikana ni ehice.+ 2 Nuumala-vo, owo aahimuleela mulopwana aawanre ekuwo ya eliinyu+ wiira: “Mukele eriyari ya maroota,+ vathi va makerubi, nave musarihe matata anyu oomanli ni makhala a mooro+ akumihiwe eriyari ya makerubi ni murihele opooma”.+ Siiso owo aahirowa kinwehaka.

3 Makerubi yiira yeemenle ene moono woolopwana wa etemplo okathi mulopwana owo aakenle awe, nave nivate na muhina naahisareya meeku. 4 Ovuwa wa Yehova+ waahikhuma vasulu va makerubi, khurowa vamukhora wa etemplo. Vano, vakhaani-vakhaani meeku yaahisareya mutemplo,+ nto waarya wa ovuwa wa Yehova waahisareya vanivateni. 5 Onyakula wa mapupha a makerubi vaaniweryaneya wiiwanyeya vanivateni na ota. Onyakula iwo waalikana ni nsu na Muluku Oowerya Sootheene aalavulaka.+

6 Moottharelana owo aahimuruma mulopwana aawanre ekuwo ya eliinyu wiira: “Mukumihe mooro eriyari ya maroota, eriyari ya makerubi”. Owo aahikela, eemela vakhiviru va maroota. 7 Nuumala-vo, kerubi mmosa aahookolela ntata nawe vamooroni waari eriyari wa makerubi,+ ohavula mooro vakhaani onvahererya mmatatani mwa mulopwana ole aawanre ekuwo ya eliinyu.+ Mulopwana owo aahaakhelela, onakhuma. 8 Vathi va mapupha a makerubi yaahikhala etthu yaalikana ni matata a apinaatamu.+

9 Okathi kaaweha aka, kaahiweha maroota maxexe yaawo yaari vakhiviru va makerubi, khula nroota nimwaattamenle ene kerubi mmosa. Maroota awo yaanaarya ntoko nluku noowaarya nniihaniwa krisoolito.+ 10 Maroota awo maxexe, yaamulikana, yaari ntoko nroota nri muhina mwa nroota nikhwaaya. 11 Okathi yeetta aya, maroota awo yaaniwerya orowa khula mpantta wa ipantte iyo ixexe, ahirukununwe, okhala wiira yaaniwerya orowa mpantta makerubi awo yaaweha aya ahirukununwe. 12 Erutthu aya yootheene, eyo piiyo, ottuli waya, matata aya, mapupha aya ni maroota ootheene oomaxexe, yaahisareya maitho.+ 13 Miyo kaahiiwa nsu naakhuwelela maroota ale niiraka: “Mweetteke!”

14 Khula mmosa* aarina ithoi* ixexe. Ethoi yoopacerya yaari ya kerubi, ethoi ya nenli yaari ya mutthu, ethoi ya neeraru yaari ya kharamu, nave ethoi ya neexexe yaari ya murumaasi.+

15 Makerubi awo yaanirowa osulu. Iyo saari soopattuxiwa seiyo sikumi kaawenhe aka waattamela omuro Kebari.+ 16 Okathi makerubi awo yeetta aya, nave-tho maroota yaaneetta vamosa naawo, okathi makerubi awo yaataphula aya mapupha aya wiira arowe osulu, maroota awo khiyaarukunuwa nnakhala khiyaahiyana naawo.+ 17 Okathi makerubi awo yeemela aya, maroota awo yaaneemela, okathi makerubi awo yaavenya aya, nave-tho maroota awo yaanivenya vamosa naawo, okhala wiira ikuru sa Muluku seettiha soopattuxiwa iyo, nave-tho saahikhala mmarootani-mmo.

18 Vano, ovuwa wa Yehova+ waahikhuma vasulu, vamukhora wa etemplo, weemela vasulu va makerubi.+ 19 Kiwehaka siisaale, makerubi awo yaahitapuruxa mapupha, anavavela osulu. Maroota yaahirowa vamosa ni makerubi awo, okathi yaavennye aya. Awo yaaheemela vamukhora waari mpantta onikhuma nsuwa wa etemplo ya Yehova. Ovuwa wa Muluku a Isarayeli waari vasulu va makerubi awo.+

20 Iyo saari soopattuxiwa seiyo sikumi kaawehale aka vathi va ehice ya Muluku a Isarayeli, omuro Kebari.+ Nto kaahisuwela wiira yaari makerubi. 21 Soopattuxiwa iyo ixexe saarina ithoi ixexe, mapupha maxexe, nave vathi va mapupha aya yaahikhala etthu yaalikana ni matata a apinaatamu.+ 22 Owiitho waya waalikana ni owiitho kaawehale aka omuro Kebari.+ Khula emosa yaanirowa ohoolo.+

11 Ikuru sa Muluku saahikikuxa sikiroiha vamukhora, yoowo waari mpantta onikhuma nsuwa wa etemplo ya Yehova, mukhora yoowo oniweha mpantta onikhuma nsuwa.+ Kiri ene vamukhora vaavo, kaahaaweha alopwana 25, eriyari ya alopwana awo aahikhala Yaazaniya mwaana a Azuri, Pelatiya mwaana a Benaya, makhulupale a atthu.+ 2 Owo aahikileela wiira: “Nyuwo mwaana a mutthu, ala alopwana yaale anuupuwela opaka itthu sootakhala ni anvaha miruku sootakhala epooma ela.* 3 Awo anihimya wiira: ‘Niireke ola khahiyo okathi wooteka ipa?+ Epooma ela* enlikana ni mwaapu onaapeeliwa,+ nave hiyo nri ntoko enama eri mmwaapuni-mmo’.

4 “Nyuwo mwaana a mutthu, mulaleyeke eprofesia mwaahimyaka yaawo, mulaleyeke eprofesia”.+

5 Moottharelana, Yehova aahikivaha ikuru+ onakileela wiira: “Muhimye wiira: ‘Etthu onihimya awe Yehova, tiila: “Nyuwo atthu a nloko na Isarayeli, etthu munihimya anyu ti yookhalela. Miyo koosuwela etthu munuupuwela anyu. 6 Nyuwo moowiiva atthu anceene epooma ela, nave istaraata sa epooma ela muhaasariha atthu ookhwa”’”.+ 7 “Tivonto, etthu onihimya awe Pwiya Muulupalexa Yehova, tiila: ‘Enama ti mirutthu simwara-mwanre anyu mpooma, nave epooma eyo ti epanela.+ Masi nyuwo munookumihiwa-mo’”.

8 “Etthu onihimya awe Pwiya Muulupalexa Yehova, tiila: ‘Nyuwo munoova wiiviwa ni espaata,*+ masi espaata yeeyo kinrowa aka orumeela wiira kiwiiveeni. 9 Miyo kinimookumihani opooma wiira koovahereryeni mmatatani mwa anamurwa, nto kinimoohukhumuni.+ 10 Nyuwo munimwiiviwa ni espaata.+ Kinimoohukhumuni waattamela omukanoni wa muttetthe wa Isarayeli,+ nto munoosuwela wiira miyo ka Yehova.+ 11 Nyuwo khamunrowa ophwanya opuro wootthyawela epooma ela, opuro yoowo onlikana ni epanela enaapeeliwa. Muhuupuweleke wiira nyuwo muri ntoko enama eri mpanelani-mmo. Miyo kinimoophukelani waattamela omukanoni wa muttetthe wa Isarayeli. 12 Nto munoosuwela wiira miyo ka Yehova. Nyuwo khamweettenle malamulo aka nnakhala khamwiiwelenle moolumo aka oophukela,+ masi muhiiwelela moolumo oophukela a maloko yaawo yoorukurenryeni’”.+

13 Kimalihaka-ru olaleya eprofesia, Pelatiya mwaana a Benaya aahikhwa. Nto miyo kaahikokhora mpakha vathi, kinakhuwela ni nsu noowiiwanyeya kiiraka: “Pwiya Muulupalexa Yehova, miyo kootakhaliwa! Kiireke munimwaamala-maliha atthu ahanle a Isarayeli?”+

14 Kaahisuwelihiwa-tho moolumo a Yehova yaahimya wiira: 15 “Nyuwo mwaana a mutthu, axinninyu, yaawo arina etireitu yoohalana elapo ni atthu ootheene a nloko na Isarayeli, yaahileeliwa ni atthu anikhala oYerusalemu wiira: ‘Muhimwaattamele Yehova. Ela elapo ahu, nroovahiwa ntoko etthu yoohiyeriwa’. 16 Tivonto, mwaahimeerye wiira: ‘Etthu onihimya awe Pwiya Muulupalexa Yehova, tiila: “Nnaamwi miyo kaakuminhe ene kaaroihaka eriyari ya maloko, nave kaamwara-mwarenle ene mulaponi,+ moohipisa-va, kinrowa okhala ntoko opuro aya woowaarya elapo yeeyo aronwe aya”’.+

17 “Tivonto, mwaahimeerye wiira: ‘Etthu onihimya awe Pwiya Muulupalexa Yehova, tiila: “kinimoothukumanyani eriyari ya atthu, nave kinimoothukumanyani eriyari ya ilapo seiye mwaamwara-mwareliwe anyu, nto kinrowa woovahani elapo ya Isarayeli.+ 18 Awo anootthikela weiwo ni anoomala-maliha itthu sootheene soohiirya ni itthu sootheene soohiloka anipaka aya.+ 19 Miyo kinimwaavaha murima mmosa-ru,+ nave kinoowiiriha okhalana muupuwelo musya.+ Mweerutthuni mwaya kinookumiha murima woolipa ntoko nluku,+ nave kinimwaavaha murima woowoolowa,*+ 20 wiira yeetteleke sooruma saka, asukeke moolumo aka oophukela ni yiiweleleke. Siiso, awo anookhala atthu aka, nto miyo kinookhala Muluku aya”’.

21 “Etthu onihimya awe Pwiya Muulupalexa Yehova, tiila: ‘“Masi ale anithipelela vamurimani vaya opaka itthu soohiirya ni ovara miteko soohiloka, miyo kinimwaakumiherya mixankiho, kiwiirihaka waamorela vamuru vaya’”.

22 Makerubi yaahitapuruxa mapupha aya, nave maroota yaari vakhiviru vaya,+ nto vasulu vaya waahikhala ovuwa wa Muluku a Isarayeli.+ 23 Ovuwa wa Yehova+ waahivenya opooma, weemela vasulu va mwaako onikhala mpantta onikhuma nsuwa wa epooma.+ 24 Ikuru sa Muluku saahikivenxa moolohani koonihiwe aka ni ikuru sa Muluku, nave saahikiroiha opuro yaari atthu yaaroihiwe weepotthani oKhaldeya. Nuumala-vo, etthu kooniheriwe aka ni Muluku yaahimala. 25 Kaahipacerya waaleela atthu yaaroihiwe weepotthani, itthu sootheene Yehova aakoonihenrye awe.

12 Kaahisuwelihiwa-tho moolumo a Yehova, yaahimya wiira: 2 “Nyuwo mwaana a mutthu, munikhala etthoko ya atthu oohiiwelela. Awo aakhalana maitho para oweha, masi khanoona. Aakhalana maaru para wiiwa, masi khaniiwa,+ okhala wiira awo atthu a etthoko yoohiiwelela.+ 3 Nyuwo mwaana a mutthu, mulokiherye muritti anyu wiira murowe weepotthani. Murowe weepotthani vooneyaka, nlelo awo yoowehakani. Mukhume owannyinyu murowaka opuro mukina ntoko mutthu onrowa weepotthani, nlelo awo yoowehakani. Woonasa wene, awo anoovaha ephoole, nnaamwi ari ene atthu a etthoko yoohiiwelela. 4 Vooneyaka, nlelo awo yoowehakani, mukumiherye ota muritti anyu, wiira murowe weepotthani. Nuumala-vo, ohiyu, okathi awo anrowa aya woowehakani, muhaana okhuma ntoko mutthu oniroihiwa weepotthani.+

5 “Nlelo awo yoowehakani, muthorole ephaka* vaxirini, nvirihe vaavo mireerelo sanyu mukumiheryaka ota.+ 6 Nlelo yoowehakani, mukuxe mireerelo sanyu vanikhatani ni mukumiherye ota opuro wooriipela. Mukhuneele owiitho wanyu wiira muhiweheke etthaya, okhala wiira kinoowiirihani okhala ethoonyeryo ya atthu a nloko na Isarayeli”.+

7 Miyo kaahiira siisaale ntoko kaarummwale aka. Vooneyaka kaahikumiherya ota muritti aka, ntoko muritti wa mutthu onrowa weepotthani. Makaaripi kaahithorola ephaka* vaxirini ni ntata naka. Okathi waapacenrye aya oriipela, kaahikumiherya ota mireerelo saka kikunxe ene vanikhatani, kooniwaka naawo.

8 Voosiisu, kaahisuwelihiwa-tho moolumo a Yehova yaahimya wiira: 9 “Nyuwo mwaana a mutthu, kiira atthu a nloko na Isarayeli, yaawo ari atthu a nloko noohiiwelela, ahookohani wiira: ‘Exeeni ela munipaka anyu?’ 10 Mwaaleele wiira: ‘Etthu onihimya awe Pwiya Muulupalexa Yehova, tiila: “Moolumo ala anaahimya makhulupale+ a oYerusalemu ni atthu ootheene a nloko na Isarayeli ari opooma”’.

11 “Muhimye wiira: ‘Miyo ka ethoonyeryo anyu.+ Ntoko siisaale kipanke aka, ti siiso anrowa aya wiirihiwa. Awo anookuxiwa ni anooroihiwa weepotthani.+ 12 Mukhulupale ori eriyari aya, onookuxa mireerelo vanikhatani ni onoohiya opuro wooriipela. Onoothorola ephaka vaxirini ni onooviriha mireerelo sawe vaxirini vaavo.+ Onookhuneela owiitho wawe wiira ohiweheke etthaya’. 13 Miyo kinoomurihela ntthavi naka, nto owo onoovariwa ni ntthavi naka nooxayana.+ Nuumala-vo kinoomuroiha oBabiloonia, elapo ya atthu a oKhaldeya, masi owo khonrowa oweha elapo eyo. Nave onookhwela weiwo.+ 14 Ootheene ale amurukurenrye, ale animukhaliherya ni atoropa awe, kinimwaamwara-mwarya ipantta sootheene.+ Kinookumiherya espaata* wiira owoomoleke.+ 15 Nto awo anoosuwela wiira miyo ka Yehova, okathi kinrowa aka owoomolela mmalokoni ni waamwara-mwarya mulaponi. 16 Masi kinimwaahiya atthu vakhaani wiira ahiiviwe ni espaata, etala ni eretta, wiira yalavuleke itthu sootepa onanara apanke aya, maloko ankela aya orowa. Siiso awo anoosuwela wiira miyo ka Yehova”.

17 Nave kaahisuwelihiwa-tho moolumo a Yehova yaahimya wiira: 18 “Nyuwo mwaana a mutthu, mukhuureke ephaawu anyu muthukumelaka, nave nwuryeke maasi anyu nvelavenle ene ni muxankale ene.+ 19 Mwaaleele atthu a elapo ela wiira: ‘Etthu onihimya awe Pwiya Muulupalexa Yehova, aaleelaka atthu anikhala oYerusalemu, ari elapo ya wIsarayeli, tiila: “Awo anookhuura ephaawu aya axankale ene ni anoowurya maasi aya yoovaka, okhala wiira elapo aya enoohononiwa yootheene+ mwaha wa otakhala wa atthu ootheene anikhala memmo.+ 20 Ipooma sinikhaliwa sinoopwetexiwa, nave elapo ela khenrowa okhaliwaka.+ Nto nyuwo munoosuwela wiira miyo ka Yehova”’”.+

21 Vano kaahisuwelihiwa-tho moolumo a Yehova yaahimya wiira: 22 “Nyuwo mwaana a mutthu, muhapo xeeni ola onilavuliwa wIsarayeli onihimya wiira: ‘Mahiku annivira, masi itthu sinooniheriwa ni Muluku khasiniiraneya’?+ 23 Vano mwaaleele wiira: ‘Etthu onihimya awe Pwiya Muulupalexa Yehova, tiila: “Miyo kinoomaliha muhapo ola, nave khontthikela-tho olavuliwa wIsarayeli”’. Masi mwaahimeerye atthu awo wiira: ‘Mahiku awo annaattamela,+ nave itthu sootheene sinooniheriwa ni Muluku sinimwiiraneya’. 24 Tthiri nloko na atthu a Isarayeli khonrowa-tho okhala profeta oowootha nnakhala nahako oowoototha.+ 25 ‘Pwiya Muulupalexa Yehova onihimya wiira: “Tthiri ti miyo, Yehova, kinrowa olavula. Khula moolumo kinrowa aka olavula animwiiraneya voohipisa.+ Mahiku anyu,+ nyuwo atthu a etthoko yoohiiwelela, miyo kinoolavula moolumo ni kinimwiiriha moolumo awo wiiraneya’”.

26 Vano kaahisuwelihiwa-tho moolumo a Yehova yaahimya wiira: 27 “Nyuwo mwaana a mutthu, etthu anihimya aya atthu a Isarayeli tiila: ‘Itthu munooniheriwa anyu ni Muluku sinoovira okathi munceene sihinatthi wiiraneya, nave iprofesia munlaleya anyu sinrowa wiiraneya muhoolo’.+ 28 Masi mwaaleele wiira: ‘Etthu onihimya awe Pwiya Muulupalexa Yehova, tiila: “‘Khanivo nuulumo naka ninrowa opisa. Moolumo ootheene kinilavula aka animwiiraneya’. Pwiya Muulupalexa Yehova tonihimya”’”.

13 Vano, kaahisuwelihiwa moolumo a Yehova yaahimya wiira: 2 “Nyuwo mwaana a mutthu, mulaleye eprofesia mwaavirikanyaka maprofeta a wIsarayeli,+ nave mwaaleele ale anipakelela iprofesia saya,+ wiira: ‘Mwiiwe moolumo a Yehova. 3 Etthu onihimya awe Pwiya Muulupalexa Yehova, tiila: “Aatakhaliwa maprofeta alolo, yaawo anitthara muupuwelo aya, ahinatthi woona etthu!+ 4 Nyuwo Isarayeli, maprofeta anyu ahiikhaliha ntoko akhwatte ari opuro ohinkhaliwa. 5 Nyuwo khamunwerya orowa mapuro apwexakasiwe a ixiri sa maluku wiira mutthikele oteka empa ya Isarayeli,+ wiira Isarayeli ohimala-malihiwe okhottoni nihiku na Yehova”.+ 6 Awo ahooniheriwa itthu soowoothiwa ni aahimya itthu soowootha. Awo annihimya wiira: ‘Ale moolumo a Yehova’, nnaamwi Yehova mwaneene ohaarumme, nave alipelelaka wiira moolumo aya animwiiraneya.+ 7 Kiira itthu munooniheriwa anyu ti soowoothiwa ni itthu munihimya anyu ti soowootha? Nyuwo munihimya wiira: ‘Ala moolumo a Yehova’, variki miyo kihihimmye etthu”’.

8 “‘Masi etthu onihimya awe Pwiya Muulupalexa Yehova, tiila: “‘Miyo kinnoovirikanyani mwaha woolavula itthu soowoothiwa ni mwaha wa itthu sinooniheriwa anyu soowoothiwa’. Pwiya Muulupalexa Yehova tonihimya”.+ 9 Miyo kinoorumeela ntata naka noowerya wiira kaahukhumu maprofeta anooniheriwa itthu soowoothiwa ni anilaleya itthu soowootha.+ Awo khanrowa okhala eriyari ya atthu aka oororomeleya, khanrowa olempwa muliivuruni mwa atthu a nloko na Isarayeli, nnakhala khantthikela elapo ya wIsarayeli. Nto nyuwo munoosuwela wiira miyo ka Pwiya Muulupalexa, Yehova.+ 10 Sootheene iya mwaha woowi awo annaahapuxa atthu aka, ariki: “Wookhala murettele!” variki vahikhanle murettele.+ Okathi aniteka aya ixiri soohilipa, awo annisirikela ekaali’.*+

11 “Mwaaleele ale anipintari exiri ni ekaali, wiira exiri eyo enoomora. Enoorupa epula yuulupale, anoomora maluku a maralala,* nave epheyo yootupa enoomoroxa exiri eyo.+ 12 Vano, okathi ixiri iyo sinrowa aya omora munookohiwa wiira: ‘Eri vai ekaali mwaasirikenle anyu?’+

13 “Etthu onihimya awe Pwiya Muulupalexa Yehova, tiila: ‘Miyo kinookumiherya epheyo yootupa kinanariwe ene, kinoomoroxa epula yuulupale kivirunwe ene. Kinanariwe ene vanceene kinoomoroxa maluku a maralala wiira ekomoole exiri eyo. 14 Kinoopwexakasa ixiri musirikenle anyu ekaali ni kinoomoroxela vathi. Kinimwaahiya alisenso aya yooneyaka. Okathi epooma ela enrowa aya omora, nyuwo munoomala-mala mpooma-mmo. Nto munoosuwela wiira miyo ka Yehova’.

15 “‘Okathi kinrowa aka omaliha oviruwela waka exiri eyo ni waaviruwela waka ale asirikenle ekaali exiri eyo, kinimoohimeeryani wiira: “Exiri eyo khekhanle-tho, nave ale yaasirikenle ekaali aamala-mala.+ 16 Maprofeta a wIsarayeli aamala-mala, yaawo yaalaleya iprofesia oYerusalemu ni yooniheriwa itthu sa murettele wiira saamwiiraneya oYerusalemu, variki vahaakhanle murettele”’.+ Pwiya Muulupalexa Yehova tonihimya.

17 Vano nyuwo, mwaana a mutthu, mwaaweheke anamwane axithiyana a atthu anyu yaawo anikhala ntoko maprofeta, nave mulaleye eprofesia mwaahimyaka yaawo. 18 Mwaaleele wiira: ‘Etthu onihimya awe Pwiya Muulupalexa Yehova, tiila: “Aatakhaliwa athiyana anipaka misako* wiira siwariweke mmoononi ni atthu ootheene ni anipaka iveewu wiira siwariweke mmuru ni atthu ootheene oottittimiheya, yiirelaka waakumiherya maxakha atthu. Niireke munoona wiira munoowerya waakumiherya maxakha atthu aka, nto nyuwo nlelo munahala mukumi? 19 Nyuwo munnikiveeha eriyari ya atthu aka mphavelaka esevaata vakhaani ni itathela sa ephaawu.+ Nwiivaka ale yahaareerela wiiviwa ni mwaahiyaka akumi ale yahaareerela okhala akumi. Mwaawokaka atthu aka, yaawo aniwiriyana itthu soowoothiwa munihimya anyu!”’+

20 Masi etthu onihimya awe Pwiya Muulupalexa Yehova, tiila: ‘Miyo kinninyokha misako sanyu, nyuwo athiyana, seiyo munirumeela anyu wiira mwaavare atthu okhalaka ntoko axipalame. Kinookwasa mikhoyi iyo mmoononi mwanyu, nave kinimwaataphula ale mwaavanre anyu ntoko axipalame. 21 Miyo kinookumiha eveewu anyu ni kinoowoopola atthu aka mmatatani mwanyu, vano awo khantthikela-tho okhala etthu muniphavela anyu ovara. Nto nyuwo munoosuwela wiira miyo ka Yehova.+ 22 Nyuwo moomukhulumula naxariya ni moolumo anyu oowootha+ okathi mwaamwiiriha anyu oxanka,* nave moolipiha matata a mutthu ootakhala,+ wiira ohihiye mweettelo awe wootakhala para okhala mukumi.+ 23 Tivo, nyuwo athiyana khamunrowa-tho wooniheriwa itthu soowootha, nnakhala waaxerya ehako.+ Miyo kinoowoopola atthu aka mmatatani mwanyu, nto nyuwo munoosuwela wiira miyo ka Yehova’”.

14 Vano makhulupale makina a wIsarayeli yaahirwa, akilaathi ohoolo waka.+ 2 Nto kaahisuwelihiwa moolumo a Yehova, yaahimya wiira: 3 “Nyuwo mwaana a mutthu, atthu ala aalakela otthara ilatarato saya soohiirya,* nave aapweha maluku wiira yaamoroxe atthu, awiirihaka ottheka. Kiireke kihaana oweemererya okikoha etthu?+ 4 Vano, mwaahimeerye wiira: ‘Etthu onihimya awe Pwiya Muulupalexa Yehova, tiila: “Akhala mwIsarayeli onilakela otthara ilatarato sawe soohiirya ni opweha ohoolo wa atthu nluku nnaamoroxa, owiirihaka ottheka, nuumala-vo onarowa omukoha profeta, miyo Yehova kinoomwaakhula ntoko simphwanela awe, moovarihana ni ilatarato sawe sinceene soohiirya. 5 Kinoowiiriha atthu a nloko na Isarayeli woova vanceene vamurimani vaya, okhala wiira ootheene aya aakihiya anatthara ilatarato saya soohiirya”’.+

6 “Mwaaleele atthu a nloko na Isarayeli wiira: ‘Etthu onihimya awe Pwiya Muulupalexa Yehova, tiila: ‘Mutthike, muhiye ilatarato sanyu soohiirya ni mukhootte miteko sanyu sootheene sootakhala.+ 7 Akhala mwIsarayeli aahiiso namurwa onikhala wIsarayeli oniivalaanya ni miyo, onalakela otthara ilatarato sawe soonanara ni opweha ohoolo wa atthu etthu eniwiiriha ottheka, nuumala-vo onarowa omukoha profeta aka,+ miyo Yehova kinoomwaakhula mwaneene aka. 8 Miyo kinoomurukunuwela mulopwana owo, nave kinoomwiiriha okhala esinaale enlopola ni moolumo a muhapo. Miyo kinommala-maliha mulopwana owo eriyari ya atthu aka,+ nto nyuwo munoosuwela wiira miyo ka Yehova”’.

9 “‘Masi akhala wiira profeta owo onoowokiwa ni onaakhula, weeso ti miyo Yehova kinwonke profeta owo.+ Nto, miyo kinoomookolela ntata naka profeta owo ni kinommala-maliha eriyari ya atthu aka aisarayeli. 10 Awo anoohaawa mwaha wa itampi saya. Ole onikoha etthu onookhalana mulattu ntoko wa profeta. 11 Siiso atthu a nloko na Isarayeli khanrowa okihiya ni anoohiya wiinanariha ni soottheka saya sootheene. Awo anookhala atthu aka, nto miyo kinookhala Muluku aya’.+ Pwiya Muulupalexa Yehova tonihimya”.

12 Vano kaahisuwelihiwa-tho moolumo a Yehova yaahimya wiira: 13 “Nyuwo mwaana a mutthu, vakhala wiira atthu a elapo ela anookitthekela apakaka itthu voohiroromeleya, miyo kinoowookolela ntata naka ni kinoohonona yoolya* aya.+ Vano miyo kinooruuha etala elapo ela+ ni kinimwaamala-maliha atthu ni kinoomaliha inama”.+ 14 “‘Hata alopwana ala araru, eyo piiyo, Nowe,+ Daniyeli+ ni Yoobi,+ yaari elapo ela, awo paahi ti yaarowa owerya wiisoopola mmansaya, mwaha wa okhala anaxariya’.+ Pwiya Muulupalexa Yehova tonihimya”.

15 “‘Nkahaya muupuwele wiira miyo kaamuroiha inama sa mutakhwani elapo eyo, inama iyo sinawiiva atthu ni siniiriha elapo eyo ohikhaliwa, nto ohinakhala mutthu onivira elapo eyo mwaha wa inama iyo sa mutakhwani.+ 16 Kinnilaphela okumi aka wiira, hata alopwana ala araru yaari mulaponi-mmo, awo khiyaarowa owerya owoopola nnakhala anaaya axilopwana aahiiso anaaya axithiyana. Awo yaarowa owerya wiisoopola mmansaya paahi, nave elapo ela khiyaarowa okhaliwaka’. Pwiya Muulupalexa Yehova tonihimya”.

17 “‘Aahiiso muupuwele wiira miyo kinookumiherya espaata* elapo ela,+ nave kinoohimya wiira: “Espaata eyo evira-vire mulaponi”, nto yaamala-malihe atthu ni inama.+ 18 Kinnilaphela okumi aka wiira, hata alopwana awo araru yaari mulaponi-mmo, khiyaarowa owerya owoopola nnakhala anaaya axilopwana aahiiso anaaya axithiyana. Awo yaarowa owerya wiisoopola mmansaya paahi’. Pwiya Muulupalexa Yehova tonihimya”.

19 “‘Aahiiso muupuwele wiira miyo kinookumiherya etala mulaponi-mmo,+ nave kinimunla ikuhu mwaha wa atthu yiiviwe kaamala-malihaka atthu ni inama. 20 Kinnilaphela okumi aka wiira, hata aakhanle Nowe,+ Daniyeli+ ni Yoobi+ mulaponi-mmo, khiyaarowa owerya owoopola nnakhala anaaya axilopwana aahiiso anaaya axithiyana. Awo yaarowa owerya wiisoopola mmansaya paahi mwaha wookhala anaxariya’. Pwiya Muulupalexa Yehova tonihimya”.+

21 “Etthu onihimya awe Pwiya Muulupalexa Yehova, tiila: ‘Ela ti etthu enrowa wiiraneya okathi kinrowa aka okumiherya ihukhumu xexe,+ eyo piiyo, espaata, etala, inama sinceene sa mutakhwani ni ekwerere,+ kikumiheryaka elapo ya oYerusalemu wiira kaamala-malihe atthu ni inama.+ 22 Masi, akina a yaawo anrowa ohala elapo eyo animoopowa ni anookhuma-wo,+ akhale anamwane axilopwana ni anamwane axithiyana. Awo annoorwa wa nyuwo, nto okathi munrowa anyu oweha mweettelo aya ni miteko saya, nyuwo munoomaalihiwa mwaha wa ehasara kikumihenrye aka oYerusalemu, mwaha wa itthu sootheene kiirinhe aka elapo eyo’”.

23 “‘Awo animoomaalihani okathi munrowa anyu oweha mweettelo aya ni miteko saya, nto nyuwo munoosuwela wiira miyo nkikumihenrye mahala ehasara eyo’.+ Pwiya Muulupalexa Yehova tonihimya”.

15 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, vaniweryaneya sai olikanyiha matera a mwiri wa ewuuva ni miri sikina aahiiso iritta sa miri sa mutakhwani? 3 Niireke ethaapwa ya mwiri wa ewuuva ennivareliwa muteko? Aahiiso niireke atthu annirumeela epetaaso ya mwiri owo wiira athomeye itthu? 4 Mwiri owo onniriheliwa vaikho ntoko ikhuni. Mooro onnilaliha ipantta soopiili opahaka eriyari ya mwiri owo. Nto niireke nuumala-vo onnivareliwa-tho muteko? 5 Hata okathi wahaapahiwe awe, mwiri owo khiwaavareliwa muteko. Nuumala opahiwa, vannitepa-tho ohivareliwa muteko!”

6 Tivonto, etthu onihimya awe Pwiya Muulupalexa Yehova, tiila: ‘Ntoko siisaale ethaapwa ya mwiri wa ewuuva ori eriyari ya miri sa mutakhwani, yoowo kivaherenrye aka wiira orumeeliweke ntoko ikhuni vamooroni, ti siiso kinrowa aka owiiriha atthu anikhala oYerusalemu.+ 7 Miyo kihaarukunuwela atthu awo. Awo ahoopowa vamooroni, masi mooro owo onimwaapaha. Nto okathi kinrowa aka waarukunuwela, nyuwo munoosuwela wiira miyo ka Yehova’”.+

8 “‘Vano, miyo kinimwiiriha elapo aya ohikhaliwa+ mwaha wa ohiroromeleya waya’.+ Pwiya Muulupalexa Yehova tonihimya”.

16 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mmusuwelihe Yerusalemu itthu soohiirya onipaka awe.+ 3 Muhimye wiira: ‘Etthu onihimya awe Pwiya Muulupalexa Yehova, omuleelaka Yerusalemu, tiila: “Amuhavinre anyu ni elapo muyariwe anyu, yaari elapo ya akanaani. Paapa anyu ari a wAmori,+ nave maama anyu aari muhiti.+ 4 Vano nlavulaka sa oyariwa wanyu, nihiku mwaayariwe anyu, mutekhu anyu khiwaathikiliwe, nyuwo khimwaarapihiwe ni maasi wiira mureerihiwe, nyuwo khimwaakutthiwe ni maakha, nave khimwaavitikeleliwe ni ikuwo. 5 Khuuvo aawoonenleni othunku wiira oopakeleni itthu iya. Khuuvo oomorenleni ikharari. Ohiya-vo, mwaahiriheliwa mmatta okhala wiira mwaaninyokhiwa nihiku mwaayariwe anyu.

6 “‘“Okathi kaavira aka, kaahiwoonani mootorowaka mphomeni mwanyu, nave mumpaathenle ene ephome anyu, nto kahihimya wiira: ‘Nyuwo munookhala mukumi!’ Aayo, miyo kaahooleelani nlelo mumpaathale ene mphomeni mwanyu wiira: ‘Nyuwo munookhala mukumi!’ 7 Miyo kihookhalihani muttitthi muulupale, ntoko miri siniphuwa mmatta. Vano nyuwo mwaahinnuwa, mwaahilipa ni mwaahipacerya owara itthu sooreerexa. Mapele anyu yaaheemela, nave ikharari sanyu saahinnuwa, masi nlelo nyuwo khimwaawanre etthu”’.

8 “Pwiya Muulupalexa Yehova onihimya wiira: ‘Okathi kaavira aka, koowehani, kaahoona wiira mwaahinnuwa wiira mooniheryeke ophenta. Nto kaahookola nlaya naka, kookhuneelani+ wiira muhikhale muhiwanre etthu, kaahilapha ni kaahipaka nivarihano ni nyuwo, nto mwaahikhala awaka’. 9 Nave-tho, kaahoorapihani ni maasi, kiwuukutthani ephome anyu ni koohelani makhura.+ 10 Nuumala-vo, kaahoowarihani nlaya nootthaviwa, kaahoovahani isantaalya sooreerexa sa esapala, kaahoovitikeelelani ni ekuwo ya eliinyu yooreerexa, nave kaahoowarihani ikuwo sa musurukhu munceene. 11 Kaahoowarihani itthu simphwaneliha, kaahoowarihani ipulseera mmoononi mwanyu ni ikolaari muxikoni mwanyu. 12 Nave-tho miyo kaahoowarihani ekharawa* mphulani mwanyu, kaahoowarihani ipirinku mmaaruni mwanyu ni ekhara yooreerexa mmuru mwanyu. 13 Nyuwo mwaamakela wiireeriha ni eweero ni eparatha, ni ikuwo sanyu saari sa eliinyu yooreerexa, sa musurukhu munceene, nave saari sa malaxi ootthaviwa. Nyuwo mwaalya otthu* wooreerexa, oravo ni makhura. Vano mwaahikhala ootepa oreera,+ munaphwanela okhala pwiyamwene’”.

14 “Pwiya Muulupalexa Yehova onihimya wiira: ‘Ovuwa wanyu waahipacerya omwareela eriyari ya maloko+ mwaha wa oreera wanyu, okhala wiira mwaha wa oreera wanyu miyo kihoovahani ovuwa* waka’”.+

15 “‘Masi nyuwo mwaahipacerya ororomela oreera wanyu,+ nave mwaahiikhaliha namararuwa mwaha wa ovuwa wanyu.+ Nyuwo mwaaniraruwa vanceene ni atthu ootheene yaavira,+ nave mwaahiivahererya wa atthu awo. 16 Nyuwo mwaahikuxa ikuwo sanyu sikina ni mwaahipakana mapuro oottukhuwa ooreera weiwo mwaararuwa anyu.+ Itthu iyo khisaareerela opakiwa, nnakhala khisaareerela okhumelela. 17 Nave nyuwo mwaahikuxa mireerelo sanyu sooreerexa saapakiwe ni eweero ni eparatha seiyo koovanhaakani, mwaahipakela ilatarato soolopwana soopatthiwa, ni mwaahiraruwa ni ilatarato iyo.+ 18 Nave nyuwo mwaahikuxa malaya aka ootthaviwa ni mwaahikhuneela ilatarato iyo.* Nyuwo mwaahivaha makhura aka ni nsenso naka.*+ 19 Nave ephaawu koovanhaakani, yeeyo yaapakiwe ni otthu wooreerexa, makhura ni oravo, yeeyo koovanhaakani wiira mukhuureke, nave-tho nyuwo moovaha ilatarato iyo ntoko mukuttho woowunkhela.+ Tthiri eyo ti etthu eniiraneya’. Pwiya Muulupalexa Yehova tonihimya”.

20 “‘Nyuwo mwaahaakuxa aniinyu axilopwana ni aniinyu axithiyana yaawo mwaakiyarenle anyu,+ nave mwaahaavahererya ntoko mukuttho ilatarato sanyu wiira saakhuure.+ Kiireke miteko sanyu sooraruwa kisaaphiyerya? 21 Nyuwo mwaahiwiiva anaaka, nave mwaahaavaha ntoko mukuttho mwaapahaka vamooroni.+ 22 Okathi mwaapaka anyu itthu iya sootheene soohiirya ni mwaararuwa anyu, nyuwo khamuupuwenle mahiku a omiravo anyu okathi yoowo mwahaawanre anyu etthu mootorowaka mphomeni mwanyu. 23 Nuumala opaka itthu iya sootheene sootakhala, mootakhaliwa, nyuwo mootakhaliwa’.+ Pwiya Muulupalexa Yehova tonihimya. 24 ‘Nyuwo muhiipakela opuro woorakamela osulu onikokhoreliwa amuluku eethiru, ni mapuro oottukhuwa mapuro ootheene oowaatta atthu. 25 Nyuwo mooteka mapuro oottukhuwa mapuro ootheene oottittimiheya a khula estaraata, nave muhiiriha oreera wanyu okhala etthu yoohiirya mwiivahereryaka* wa atthu ootheene anivira.+ Nave muhincererya oraruwa wanyu.+ 26 Nyuwo mooraruwa ni atthu a wExiitu,+ anamwaattamanani anyu yaawo oowunnuwa erutthu. Nave mookiveeha ni miteko sanyu sihinkontareya sa oraruwa. 27 Vano miyo kinoowookolelani ntata naka wiira koohukhumuni, kinoohonona yoolya anyu.+ Nave kinimoovahereryani mmatatani mwa athiyana yaawo anoonyokhani,+ anamwane axithiyana a afilisti, yaawo atikinihiwe ni mweettelo anyu woohiloka.+

28 “‘Mwaha woohiphiyeriwa, nyuwo mwaahiraruwa ni atthu a wAsiiria,+ masi hata nuumala oraruwa ni atthu awo, nyuwo nlelo khimwaaphiyeriwe. 29 Nto nyuwo mwaahincererya oraruwa wanyu murowaka elapo ya alipa a nakoso* ni atthu a oKhaldeya,+ masi hata vari siiso nlelo khimwaaphiyeriwe. 30 Tthiri murima anyu khiwaareere owereiwa,* okathi mwaapaka anyu itthu iya sootheene, mpakaka itthu ntoko muthiyana namararuwa ohinuuliwa muru!’+ Pwiya Muulupalexa Yehova tonihimya. 31 ‘Masi okathi mwaatenke anyu mapuro oottukhuwa anikokhoreliwa amuluku eethiru, mapuro oottittimiheya a khula estaraata ni mwaapanke anyu mapuro oottukhuwa, mapuro ootheene oowaatta atthu, nyuwo khimwaakhala ntoko namararuwa, okhala wiira mwaanikhootta oliviwa. 32 Nyuwo mwa muthiyana namararuwa yoowo oniweemererya atthu ohinaasuwela awe omuhiyaka iyawe!+ 33 Atthu annaavaha etthu anamararuwa ootheene,+ masi nyuwo munnaavaha etthu ootheene ale anoophavelani.+ Nave munnaakunyari wiira arwe akhumaka ipantta sootheene para oraruwa ni nyuwo.+ 34 Nyuwo munnivirikana ni athiyana akina aniraruwa. Khuuvo oniraruwa ntoko nyuwo muniira anyu! Nyuwo munnaaliva atthu akina, nto awo khanoolivani. Enamuna muniraruwa anyu ti yoovirikana’.

35 “Nyuwo namararuwa,+ mwiiwe moolumo a Yehova. 36 Etthu onihimya awe Pwiya Muulupalexa Yehova, tiila: ‘Nyuwo moovikaniha mphimo mwaha wa osiveliwa wanyu vanceene ni muhooniherya ohiwara wanyu etthu okathi mwaararuwa anyu ni ale mwaaphenta anyu ni ilatarato sanyu soohiloka ni soohiirya,*+ seiyo mwaavaha anyu ephome ya aniinyu ntoko mikuttho.+ 37 Tivo, miyo kinimwaathukumanya ootheene ale mwaaphenta anyu, yaawo mwaararuwana anyu, ootheene ale mwaaphenta anyu ni mwaanyokha anyu. Kinimwaathukumanya wiira yoovirikanyeni mapuro ootheene. Nave kinoowooniherya ohiwara wanyu etthu, nto awo animoowehani tthiri muhiwanre etthu.+

38 “‘Miyo kinimoohukhumuni ntoko siniphwanela aya ophukeliwa anamararuwa+ ni athiyana aniwiiva atthu.+ Nave kinoowiivihani kivirunwe ene ni kiwunlelakani ehace.+ 39 Miyo kinimoovahereryani mmatatani mwaya, vano awo anoomala-maliha mapuro anyu oottukhuwa ni anoopwexakasa mapuro awo anikokhoreliwa amuluku eethiru.+ Awo animoorulani ikuwo sanyu+ ni anookuxa itthu sinooreerihani,+ nto animoohiyani muhiwanre etthu. 40 Awo animooruuhelani muttitthi wa atthu,+ nto animoovonyani maluku+ ni anoowiivahi ni ispaata saya.+ 41 Awo anoopaha ipa sanyu ni mooro+ ni animoophukelani ohoolo wa athiyana anceene. Vano miyo kinoomaliha oraruwa wanyu,+ nto nyuwo munoohiya waaliva ale munaaphenta anyu. 42 Wooviruwelani waka onoomala,+ kinoohiya onanariwa ni nyuwo.+ Siiso kinookhala oomaaleleya ni nkintthikela-tho onanariwa’.

43 “Etthu onihimya awe Pwiya Muulupalexa Yehova, tiila: ‘Mwaha woohuupuwela mahiku a omiravo anyu+ ni okiiriha onanariwa mpakaka itthu iya sootheene, miyo kinoowiirihani ohaawa mwaha wa mweettelo anyu, nave khamuntthikela-tho wooniherya mweettelo anyu woowuuliha muru ni opaka itthu sootheene soohiirya.

44 “‘Mwiiwe! Atthu ootheene anirumeela muhapo, anoolavula muhapo ola yoohimyakani nyuwo: “Ntoko siisaale siri awe maama, ti siiso siri awe mwanawe mwaamuthiyana!”+ 45 Nyuwo mwa mwaana mwaamuthiyana a maama anyu, yoowo aamuthanya iyawe ni anaawe. Nave nyuwo mwa munna a axinninyu, yaawo yaathanya axiiyaya ni anaaya. Maama anyu aari muhiti, nave paapa anyu aari a wAmori’”.+

46 “‘Muulupale anyu ti Samariya,+ yoowo onikhala mpantta anyu wa onorti* vamosa ni anaawe axithiyana.+ Nave muhima anyu, yoowo onikhala mpantta anyu wa osuuli,* ti Sodoma+ vamosa ni anaawe axithiyana.*+ 47 Nyuwo khahiyo paahi mutthanre iphiro saya ni itthu soohiloka yaapaka aya, masi mwa okathi vakhaani mweettelo anyu waahitepa okhala woonanara waavikana awo.+ 48 Kinnilaphela okumi aka wiira muhima anyu Sodoma ni anaawe axithiyana, khatonko opaka etthu nyuwo ni aniinyu axithiyana mpanke anyu’. Pwiya Muulupalexa Yehova tonihimya. 49 Owo oohimya-tho wiira: ‘Mwiiwe! Etampi ya muhima anyu Sodoma, yaari ela: Owo ni anaawe axithiyana+ yaari oowiixinnuwiha+ ni yaahikhalana yoolya yinceene+ ni khiivo etthu yaaxankiha,+ masi awo khiyaakhaliherya atthu ooxanka ni alipa-oohaawa.+ 50 Awo yaahithipelela okhala oowiixinnuwiha+ ni opaka itthu sootakhala ohoolo waka,+ tivo koonale aka oreerela waamala-maliha.+

51 “‘Hata Samariya+ khopanke nimeya na itampi sinceene mpanke anyu. Nyuwo mwaamakela opaka itthu sinceene soohiloka waavikana awo, mpakha axinninyu wooniwa okhala anaxariya mwaha wa itthu sootheene soohiloka mpanke anyu.+ 52 Nyuwo muhaana weemererya wuuliwa muru mwaha wa waakiherya mweettelo wa* axinninyu. Mwaha wa etampi mpanke anyu okhala yootepa otakhala waavikana awo, awo aatepa okhala anaxariya woovikanani nyuwo. Tivo mooneke ehaaya ni mweemereryeke wuuliwa muru mwaha woowiiriha axinninyu wooniwaka okhala anaxariya’.

53 “‘Vano miyo kinimwathukumanya atthu aya aroihiwe weepotthani, eyo piiyo, atthu aroihiwe weepotthani a oSodoma ni anaaya axithiyana vamosa ni atthu aroihiwe weepotthani a oSamariya ni anaaya axithiyana. Nave kinimwaathukumanya atthu anyu aroihiwe weepotthani vamosa naawo,+ 54 wiira mooniherye wuuliwa wanyu muru. Nto nyuwo munimuulihihiwa muru mwaha wa etthu mpanke anyu wiira mwaamaalihe. 55 Axinninyu, Sodoma ni anaawe axithiyana, anootthikela ntoko yaari aya khalai. Nave Samariya ni anaawe axithiyana anootthikela okhala ntoko yaari aya khalai. Nave-tho, nyuwo vamosa ni aniinyu axithiyana munootthikela ntoko mwaari anyu khalai.+ 56 Muhima anyu Sodoma khaareerela oromoliwa ni nyuwo okathi mwaixinnuwiha anyu, 57 otakhala wanyu ohinatthi wooniheriwa.+ Vano anamwane axithiyana a oSiiria ni ale yaattamanne aya annooveehani, nave anamwane axithiyana a afilisti,+ yaawo yoorukurenryeni, annoothanyani. 58 Nyuwo munoohaawa mwaha wa mweettelo anyu woowuuliha muru ni itthu sootakhala mpanke anyu’. Yehova tonihimya”.

59 “Etthu onihimya awe Pwiya Muulupalexa Yehova, tiila: ‘Miyo kinoowiirelani etthu emosa-ru mpanke anyu,+ okhala wiira nyuwo moothanya etthu mwaalamphe anyu muhononaka nivarihano naka.+ 60 Masi miyo kinimuupuwela nivarihano kaapanke aka ni nyuwo mahiku a omiravo anyu, nave kinoopaka ni nyuwo nivarihano nihinimala.+ 61 Nyuwo munimuupuwela mweettelo anyu ni munimuuliwa muru+ okathi munrowa anyu owaakhela axinninyu, akhale axuulupale anyu ni axihima anyu. Vano miyo kinimoovahereryani wiira awo akhale ntoko aniinyu axithiyana, masi ohiya mwaha wa nivarihano mpanke anyu’.

62 “‘Miyo kinoopaka nivarihano naka ni nyuwo, nto nyuwo munoosuwela wiira miyo ka Yehova. 63 Okathi kinrowa aka ovaha mukuttho wiira muleveleliwe itampi, hata mpanke ene itthu sootheene,+ nyuwo munimuupuwela itthu iya sootheene ni munimoona ehaaya mpakha ohiwerya ohula eyano anyu, mwaha wa wuuliwa wanyu muru’.+ Pwiya Muulupalexa Yehova tonihimya”.

17 Vano, kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mwaalele ethale ni mulavule muhapo waahimyaka atthu a Isarayeli.+ 3 Muhimye wiira: ‘Etthu onihimya awe Pwiya Muulupalexa Yehova, tiila: “Murumaasi* muulupale,+ orina mapupha maalupale, orina mapururu oorakama ni oowaatta, orina malepa manceene oophiya oLiibano,+ okumiha eponta ya mwiri wa eseeturu.+ 4 Owo aahikumiha eritta yoorakamexa ya mwiri owo, oroiha elapo ya alipa a nakoso,* nave aahaala eritta eyo epooma ya alipa a nakoso.+ 5 Nuumala-vo, owo aahikuxa epyo emosa ya elapo eyo,+ aala ematta yoowunttelana. Owo aahaala epyo eyo ntoko onaaliwa aya mwiri oniihaniwa salgueiro waattamela opuro ori maasi manceene. 6 Siiso, epyo eyo yaahimela nave waahipakeya mwiri wa ewuuva wookhuveya ni wootikana,+ nave makukhu aya yaaweha muhina. Nto mitathaari saya saaninnuwa vathi wa mwiri owo. Siiso epyo eyo yaahipakeya mwiri wa ewuuva ni waahikumiherya iritta.+

7 “‘“Aahikhumelela-tho murumaasi mukina muulupale,+ yoowo aarina mapupha maalupale ni mapururu oorakama.+ Mwiri owo wa ewuuva waahimookolela mitathaari sawe murumaasi owo, sikhumaka mmatta moowunttelana mwaaliwe aya, nave aahimookolela makukhu awe, wiira ophwanyeke maasi manceene.+ 8 Mwiri owo waahaaliwa ematta yooloka, waattamela opuro yaari aya maasi manceene wiira okumiheryeke iritta, iimeke mihokorokho ni okhale mwiri muulupale wa ewuuva”’.+

9 “Muhimye wiira: ‘Etthu onihimya awe Pwiya Muulupalexa Yehova, tiila: “Kiireke mwiri owo onoowerya wunnuwa? Kiireke mitathaari saya khasinrowa opheliwa,+ nave mihokorokho saya khasinrowa wuntta? Kiireke iritta saya khasinrowa onyaala?+ Mwiri owo onimuuma vahinrowa aya opirisariki mutthu oowerya nnakhala atthu anceene wiira aphele mitathaari saya. 10 Nnaamwi owo opheliwe ene ni waaliwa opuro mukina, kiireke onimunnuwa? Kiira onimuuma voomalela okathi onrowa awe woopeliwa epheyo ya mpantta onikhuma nsuwa? Owo onimuuma ematta yeeyo aamenle awe”’”.

11 Vano kaahisuwelihiwa-tho moolumo a Yehova yaahimya wiira: 12 “Xontte, mwaaleele atthu a etthoko yoohiiwelela wiira: ‘Kiireke nlelo khamunsuwela ele enitaphulela aya itthu iya?’ Muhimye wiira: ‘Mwiiwe! Mwene a oBabiloonia ohoorwa oYerusalemu, omukuxa mwene ni makhulupale awe, aaroiha oBabiloonia.+ 13 Nave-tho, aahimukuxa mutthu a emusi ya mamwene,+ opaka nivarihano nuuwo ni omwiiriha olapha wiira aarowa okhala oororomeleya wa yena.+ Nuumala-vo, aahaakuxa alopwana akina oottittimiheya a elapo ele,+ 14 wiira omwene omala-malihiwe, ohinnuwe ni ohihonone nivarihano naapanke aya.+ 15 Masi mwene a oYuda aahimurukunuwela mwene a oBabiloonia,+ aarumaka anamitthaka awe orowa wExiitu, ovekela ikhavalo+ ni anakhotto anceene.+ Kiireke itthu sinoomweettela saana? Kiireke mutthu onipaka itthu iya onoowerya otthyawa ehukhumu? Kiireke owo onoowerya ohonona nivarihano ni woopowa?’+

16 “Pwiya Muulupalexa Yehova onihimya wiira: ‘“Kinnilaphela okumi aka wiira, owo onimookhwa oBabiloonia. Mwene Sedekiya yoowo eemereriwe ni mwene a oBabiloonia okhala mwene, onimookhwa mwaha woothanya etthu aamulaphenle awe mwene Nabukodonosori ni mwaha woohonona nivarihano nawe.+ 17 Anakhotto anceene ni atoropa oowaatta a Farawo khanrowa omukhaliherya okhottoni,+ okathi anrowa aya otekiwa mapuro oorakamela osulu wiira arukureriwe ni otekiwa ixiri wiira arukureriwe ni apwetexiwe atthu anceene. 18 Owo oothanya etthu aalamphe awe ni oohonona nivarihano. Nnaamwi aaleihenrye etthu, owo oopaka itthu iya sootheene, tivo khonrowa woopowa”’.

19 “‘Tivo, etthu onihimya awe Pwiya Muulupalexa Yehova, tiila: “Miyo kinnilaphela okumi aka wiira kinoowiiriha ohaawa, mwaha woothanya etthu kilamphe aka+ ni mwaha woohonona nivarihano naka. 20 Kinoomurihela ntthavi naka, nave owo onoovariwa muntthavini mwaka nooxaya.+ Kinoomuroiha oBabiloonia, nto owo onophukeliwa weiwo mwaha wa ohiroromeleya wawe okiirenle awe.+ 21 Atoropa awe ootheene atthyanwe animwiiviwa ni espaata,* nto ale anrowa ohala anoomwara-mwariwa ipantta sootheene.+ Vano nyuwo munoosuwela wiira ti miyo Yehova kilavunle”’.+

22 “‘Etthu onihimya awe Pwiya Muulupalexa Yehova, tiila: “Miyo kinookuxa eritta ephunwe vasulu wa mwiri wa eseeturu,+ nave kinimwaala eritta eyo. Kinookuxa eritta yaamukhaani ni yoowoolowa eri vasulu va eritta eyo,+ nto miyo mmansaka kinimwaala eritta eyo vasulu va mwaako woottukhuwa.+ 23 Eritta eyo kinrowa waala vamwaako woottukhuwa wa wIsarayeli. Iritta saya sinimunnuwa, onimwiima mihokorokho ni onookhala mwiri muulupale wa eseeturu. Mithinto sootheene sa axipalame sinrowa okhalaka vathi vaya, nave anrowa okhalaka vamuuttutthini va makukhu aya. 24 Miri sootheene sa mutakhwani sinoosuwela wiira miyo Yehova, koomoroxa miri soorakama ni kihinnuwiha miri sookhuveya.+ Kihuumiha miri sooripelela ni kihiiriha ophuwa ithutu iye saari soowuuma.+ Ti miyo Yehova, kilavunle ni kipanke eyo”’”.

18 Vano, kaahisuwelihiwa-tho moolumo a Yehova, yaahimya wiira: 2 “Ontaphulela-ni muhapo ola onilavuliwa elapo ya wIsarayeli, oni: ‘Axipaapa takhuurale iwuuva soohittokottha, masi anamwane tanisusumeriwa maino’?+

3 “Pwiya Muulupalexa Yehova onihimya wiira: ‘Kinnilaphela okumi aka wiira, nyuwo khamuntthikela-tho ohimya muhapo ola wIsarayeli. 4 Ikumi sootheene ti sawaka. Okumi wa paapa vamosa ni okumi wa mwaana ti wawaka. Mutthu onittheka, yoowo tonrowa okhwa.

5 “‘Nkahaya nuupuwele wiira mutthu mmosa naxariya. Owo onnipaka itthu sa xariya ni sooloka. 6 Khonilya mikuttho sinivahiwa amuluku eethiru omiyaakoni.+ Khontthukula maitho awe owehaka ilatarato sootepa onanara sa atthu a nloko na Isarayeli. Khoniraruwa ni muthiyana a mulopwana mukina,+ nnakhala khonirupa ni muthiyana ori mmweerini.+ 7 Owo khonimuhaaxa mutthu,+ masi onnittikiha itthu sootheene aakunxe awe ntoko neemexeryo.+ Khonimwiiyerya mutthu,+ masi onnaavaha yoolya awe ale ahirina,+ nave onnaavaha ikuwo ale ahirina yoowara.+ 8 Mutthu owo khonikophiha ni ixuuru, nnakhala khoneemererya okunyariwa.+ Nave onnikhootta ovara etthu moohixariya,+ masi onniphuka milattu sa atthu anli mwa xariya.+ 9 Khula okathi, onneettela malamulo aka ni onniiwelela moolumo aka oophukela, wiira opakeke itthu moororomeleya. Mutthu siiso ta xariya, nave khonrowa ohiya okhala mukumi’.+ Pwiya Muulupalexa Yehova tonihimya.

10 “‘Masi vakhala wiira owo ookhalana mwaana ori latarau,+ nawiive,+ aahiiso onipaka itthu sikina, 11 (nnaamwi paapa awe ohitonko opaka itthu iyo), owo onnoolya mikuttho sinivahiwa amuluku eethiru omiyaakoni, onniraruwa ni muthiyana a mulopwana mukina, 12 onnaahaaxa ale oothoiwa ni oohaawa,+ onniiya, khonittikiha itthu okunxe awe ntoko neemexeryo, onnitthukula maitho owehaka ilatarato soohiirya,+ onnivara itthu soohiloka,+ 13 onniliviwa ni ixuuru ni onneemererya okunyariwa.+ Mwaana owo khonrowa okhala mukumi. Mwaha wa itthu sootheene soohiirya opanke awe, tthiri onimookhwa. Nave onookhalana mulattu mwaha wa okhwa wawe.

14 “‘Masi nkahaya nuupuwele wiira paapa ookhalana mwaana oniweha itampi sootheene paapa awe onipaka awe, masi hata vari siiso mwaana owo khonipaka itthu iyo. 15 Owo khonilya mikuttho anivahiwa amuluku eethiru omiyaakoni, khonitthukula maitho awe owehaka ilatarato soohiirya sa atthu a nloko na Isarayeli, khoniraruwa ni muthiyana a mulopwana mukina, 16 khonimuhaaxa mutthu, khonikuxa itthu ovikana iye okunxe awe ntoko neemexero, khoniiya, onnaavaha yoolya ale avoliwe etala nave onnaavaha etthu yoowara ale ahirina ikuwo, 17 owo khonaahaaxa alipa-oohaawa, khoniliviwa exuuru nnakhala khoneemererya okunyariwa, onniiwelela moolumo aka oophukela ni onneettela sooruma saka. Mutthu siisa, khonrowa okhwa mwaha wa etampi ya paapa awe. Tthiri owo onookhala mukumi. 18 Masi okhala wiira paapa awe ohootha, oomwiiyerya munnawe ni oopaka etthu yoohiloka munlokoni mwawe, owo onimookhwa mwaha wa etampi awe.

19 “‘Masi nyuwo munookoha wiira: “Xeeni mwaana ohinkhalana awe mulattu mwaha wa etampi ya paapa awe?” Okhala wiira mwaana oopaka etthu ya xariya ni yooloka, oheettela sooruma saka ni ohiiwelela. Tthiri nlelo onookhala mukumi.+ 20 Mutthu onittheka yoowo tonrowa okhwa.+ Mwaana khonrowa ohukhummwa mwaha wa etampi ya paapa awe. Nave paapa khonrowa ohukhummwa mwaha wa etampi ya mwanawe. Miteko sa naxariya sinrowa omukumiherya mureerelo yoowo paahi. Nave mutakhali onoohukhummwa mwaha wa otakhala wawe.+

21 “‘Vano, akhala wiira mutakhali onoottharuwa itampi sootheene opanke awe ni oneettela sooruma saka sootheene ni onapaka itthu sa xariya ni sooloka, tthiri, owo nlelo onookhala mukumi. Khonrowa okhwa.+ 22 Owo khonrowa waakhula mwaha wa itampi opanke awe.+ Owo onookhala mukumi mwaha woopaka etthu ya xariya’.+

23 “Pwiya Muulupalexa Yehova onikoha wiira: ‘Kiireke vannikisivela onweha mutakhali okhwaaka?+ Kiira kiniphavela wiira orukunuxe mweettelo awe wiira okhaleke mukumi?’+

24 “‘Masi akhala wiira naxariya onoohiya weettela exariya, onapaka itthu soohiloka, opakaka itthu sootheene soohiirya seiyo atakhali anipaka aya, kiireke onookhala mukumi? Khasivo miteko sawe sa xariya sinrowa wuupuweliwa.+ Mwaha wa ohiroromeleya wawe ni etampi opanke awe, owo onimookhwa.+

25 “‘Masi nyuwo munoohimya wiira: “Ephiro ya Yehova khahiyo ya xariya”.+ Nyuwo atthu a nloko na Isarayeli xontte nwiriyane! Kiireke ephiro aka khahiyo ya xariya?+ Kiira iphiro sanyu sihikhanle sa xariya?+

26 “‘Akhala wiira naxariya onoohiya weettela exariya, onapaka itthu soohiloka ni onakhwa mwaha wa yeeyo, owo onimookhwa mwaha wa etampi awe.

27 “‘Nave akhala wiira mutakhali onoohiya otakhala wawe onapacerya opaka itthu sa xariya ni sooloka, owo onimoopola okumi awe.+ 28 Owo asuwela itampi sootheene opanke awe ni onattharuwa, tthiri, owo onookhala mukumi. Khonrowa okhwa.

29 “‘Masi atthu a nloko na Isarayeli anoohimya wiira: “Ephiro ya Yehova khahiyo ya xariya”. Nyuwo atthu a nloko na Isarayeli, kiireke iphiro saka khahiyo sa xariya?+ Kiira iphiro sanyu sihikhanle sa xariya?’

30 “‘Tivonto, kinomphukela khula mutthu kittharaka iphiro sawe,+ nyuwo atthu a nloko na Isarayeli’. Pwiya Muulupalexa Yehova tonihimya. ‘Muttharuwe, aayo, muttharuwe voomalela miteko sanyu sootheene, wiira iyo sihikhale nluku nnoomoroxani, sookumiheryakani mulattu. 31 Muttharuwe itampi sanyu sootheene munipaka anyu,+ mukhalane murima wooloka ni muupuwelo wooloka.+ Nyuwo atthu a nloko na Isarayeli, xeeni muniphavela anyu ookhwa?’+

32 “‘Nkinsiveliwa ni okhwa wa mutthu’.+ Pwiya Muulupalexa Yehova tonihimya. ‘Tivonto, mutthikele wa miyo wiira mukhale mukumi’”.+

19 “Mwiipe nsipo na wiikhupanyerya, nnaahimya makhulupale a wIsarayeli, 2 mwiiraka:

‘Maama anyu aari aani? Owo aari kharamu oothiyana yoowo eetta ni akharamu akina.

Owo aanimpaathi eriyari ya akharamu acikhaani ni oowerya, nave aanaahuwa axaana awe.

 3 Owo aahaahuwa axaana awe mpakha okhala akharamu oowerya.+

 5 Owo aanilipelela wiira aamutthika, nto aahoona wiira khaarowa otthika.

Tivonto, aahimukuxa mwaaxaana mukina, omukhaliha kharamu oowerya.

 6 Nave-tho, owo aaheetta eriyari ya akharamu ni aahipakeya kharamu oowerya.

Owo aahiixutta moota wookhuura enama ni aahaakhuura atthu.+

 7 Owo aahimoroxa ipa saya soorakamela osulu soolipihiwa ni aahipwexakasa ipooma saya.

Nto woopawa wawe murukulu waahisareya elapo ele yahaakhaliwa.+

 9 Arumeelaka ikweeceryo, yaahimuhela mweekeeloni amuroiha wa mwene a oBabiloonia.

Yaahimutthukwela weiwo wiira nihitthikele wiiwanyeya nsu nawe miyaako sa wIsarayeli.

10 Maama anyu aari ntoko mwiri wa ewuuva+ mphomeni mwanyu,* yoowo waaliwe mukerekhere mwa maasi.

Mwiri owo waahiima mihokorokho ni waahisareya iritta mwaha wa maasi manceene.

11 Mwiri owo waahikumiherya iritta soolipa,* saareerela opakeliwa ekopo ya anamalamulela.

Saahinnuwa ni saahikhala sootepa orakama ovikana miri sikina.

Nto vaaniweryaneya wooniwa ottaiwene mwaha wa orakama wawe ni mwaha wa makukhu awe oowaatta.

12 Masi, Muluku onanariwe ene, owo aahiphela mutatthaari+ ni aahirihela vathi.

Vano epheyo ya mpantta onikhuma nsuwa yaahuumiha mihokorokho sawe.

Mitathaari sawe soolipa saahipheliwa ni saahuuma,+ nave mooro waahipaha.+

14 Mooro woomwareela mweerittani mwawe, nave woopaha iritta vamosa ni mihokorokho sawe.

Khehanle nnakhala eritta yoolipa, nnakhala ekopo ya olamulela.+

“‘Nla nsipo na wiikhupanyerya, nave ninrowa orumeeliwaka ntoko wiikhupanyerya’”.

20 Vano, eyaakha ya neethanu nenli, mweeri wa neethanu, nihiku na namuloko na mweeri ene yoowo, makhulupale makina a Isarayeli, yaahirwa akilaathi ohoolo waka wiira asuwele akhala wiira Yehova, aahikhalana etthu yoowaahimeerya. 2 Nto, kaahisuwelihiwa moolumo a Yehova yaahimya wiira: 3 “Nyuwo mwaana a mutthu, mwaahimeerye makhulupale a Isarayeli wiira: ‘Etthu onihimya awe Pwiya Muulupalexa Yehova, tiila: “Mwaarwenle osuwela akhala wiira kookhalana etthu yoowooleelani? ‘Kinnilaphela okumi aka wiira, nkinrowa owaakhulani’.+ Pwiya Muulupalexa Yehova tonihimya”.

4 “Niireke moolikana wiira mwaaphukele? Nyuwo mwaana a mutthu, niireke wiira moolikana wiira mwaaphukele? Mwaasuwelihe itthu sootepa onanara amuhavinre aya apanke aya.+ 5 Mwaahimeerye wiira: ‘Etthu onihimya awe Pwiya Muulupalexa Yehova, tiila: “Nihiku kimuthanlale aka Isarayeli,+ kaahilaphela osuulu wa etthoko ya Yakobe, nave kaahiisuweliha wa yaawo mulaponi mwa wExiitu.+ Aayo, kaahaalaphela kiiraka: ‘Miyo ka Yehova, Muluku anyu’. 6 Nihiku nle, kaahilapha wiira kaamwaakumiha elapo ya wExiitu kaaroihaka elapo yaaphavela aya,* elapo yoowaatta eleeti ni oravo,+ eyo yaari elapo yootepa oreera eriyari ya ilapo sootheene. 7 Miyo kaahaahimeerya wiira: ‘Khula mmosa a nyuwo orihele ota itthu sootepa onanara siri ohoolo wanyu. Muhiinanarihe ni ilatarato soohiirya* sa wExiitu.+ Miyo ka Yehova, Muluku anyu’.+

8 “‘“Masi, awo aakivirikanya nave khaphavenle okiwiriyana. Awo kharihenle ota itthu soohiirya saari ohoolo waya, nnakhala khanyanyanle ilatarato saya soohiirya sa wExiitu.+ Tivonto, kooleiherya waaviruwela ni omala-maliha waaviruwela waka wootheene elapo ya wExiitu. 9 Masi, kihiira siiso mwaha wa nsina naka, wiira nihinanarihiwe ohoolo wa maloko yaawo yaakhala aya.+ Miyo kihiisuweliha wa yaawo,* ohoolo wa maloko ala, okathi kaakuminhe aka* elapo ya wExiitu.+ 10 Siiso, kaahaakumiha elapo ya wExiitu, nave kaahiweettiha kaaroihaka woothakoni.+

11 “‘“Miyo kaahaavaha sooruma saka, nave kaahaasuweliha moolumo aka oophukela,+ wiira atthu yaakela weettelaka akhale akumi mwaha wa moolumo awo.+ 12 Nave-tho kaahaavaha isaabadu saka+ ntoko esinaale ya miyo naawo,+ wiira asuwele wiira miyo, Yehova, ti yoole onaareeriha.

13 “‘“Masi, atthu a nloko na Isarayeli aakivirikanya woothakoni.+ Awo khiyeettenle sooruma saka, nave aakhootta moolumo aka oophukela, yaawo mutthu onikhala awe mukumi eettelaka vale. Aananariha moomalela isaabadu saka. Tivonto, kooleiherya wiira kinimwaaviruwela woothakoni wiira kaamala-malihe.+ 14 Masi miyo kihiira siiso mwaha wa nsina naka, wiira nihinanarihiwe ohoolo wa maloko yaawo koomonle aka ohoolo waya.*+ 15 Nave-tho miyo kihaalaphela woothakoni wiira nkaarowa waaroiha elapo kaavanhe aka,+ eyo piiyo, elapo yoowaatta eleeti ni oravo,+ elapo yootepa oreera eriyari ya ilapo sootheene, 16 okhala wiira aakhootta moolumo aka oophukela, khiyeettenle sooruma saka, nave aananariha isaabadu saka, mwaha wa murima aya otthara ilatarato saya soohiirya.+

17 “‘“Masi miyo kaahiwoonela othunku, nkaapwetenxe. Miyo* nkaamala-malinhe woothakoni. 18 Miyo kaahaahimeerya anaaya moothakoni+ kiiraka: ‘Muheetteleke ikano sa amuhavinre anyu+ nnakhala moolumo aya oophukela aahiiso muhiinanarihe ni ilatarato saya soohiirya. 19 Miyo ka Yehova Muluku anyu. Mutthareke malamulo aka, mwiiweleleke moolumo aka oophukela, nave mweetteleke seiyo.+ 20 Mureerihe isaabadu saka,+ vano iyo sinrowa okhala esinaale para nyuwo ni miyo, nto nyuwo munoosuwela wiira miyo ka Yehova, Muluku anyu’.+

21 “‘“Masi anaaya yaahipacerya okirukunuwela.+ Awo khiyaatthara malamulo aka, nave khiyeettela ni wiiwelela moolumo aka oophukela, yaawo animwiiriha mutthu okhala mukumi akhala wiira onimweettela. Awo yaahinanariha isaabadu saka. Tivonto, miyo kooleiherya waamwarexela onanariwa waka ni waaviruwela woothakoni.+ 22 Masi miyo nkiirale siiso+ mwaha wa nsina naka,+ wiira atthu a maloko kiwoomonle aka ohoolo wa atthu a Isarayeli, ahiveehe nsina nlo. 23 Nave, miyo kaahaalaphela moothakoni wiira kaamwamwara-mwarya eriyari ya maloko ni kaamwamwara-mwarya mulaponi,+ 24 mwaha wa ohiiwelela moolumo aka oophukela ni okhootta malamulo aka.+ Awo aananariha isaabadu saka, nave aatthara ilatarato soohiirya sa amuhavinre aya.+ 25 Nave miyo kaahiweemererya otthara malamulo oohiloka ni moolumo oophukela yahaarowa waaphwanyiha okumi.+ 26 Miyo kaahiweemererya okhala oohiloka mwaha wa mikuttho saya, okathi yaapaha aya anaaya oopacerya oyariwa vamooroni,+ wiira kaamala-malihe. Nto awo yaamusuwela wiira miyo ka Yehova”’.

27 “Nyuwo mwaana a mutthu, mulavule ni atthu a nloko na Isarayeli ni mwaaleele wiira: ‘Etthu onihimya awe Pwiya Muulupalexa Yehova, tiila: “Ti siiso amuhavinre anyu yaakiveehale aya ahiroromeleyaka wa miyo. 28 Miyo kaahaakeliha elapo kaaleihenrye aka wiira kaamwaavaha.+ Okathi yoonale aya mapuro ootheene oottukhuwa ni miri sootheene suulupale,+ awo yaahipacerya ovaha mikuttho saya ni soovaha saya wiira akiveehe. Awo yaanivaha weiwo mikuttho saya soowunkhela* ni soovaha saya siniwuriwa. 29 Nto miyo kaahaakoha wiira: ‘Opuro ola woottukhuwa munirowa anyu, onithoonyerya-ni? (Tivo oniihaniwa aya Opuro Woottukhuwa mpakha olelo-va.)’”’+

30 “Vano mwaaleele atthu a etthoko ya Isarayeli wiira: ‘Etthu onihimya awe Pwiya Muulupalexa Yehova, tiila: “Kiira munipaka etthu emosa-ru yeeyo yaapaka aya amuhavinre anyu, muttharaka ilatarato saya soohiirya ni mukokhorelaka seiyo?+ 31 Kiira munipaka yeeyo mpakha olelo-va, nvahaka mikuttho soopahiwa ilatarato sanyu sootheene soohiirya, mwaapahaka aniinyu vamooroni?+ Nto vano, kiireke kihaana weemererya wiira mukikohererye, nyuwo atthu a nloko na Isarayeli?”’+

“Pwiya Muulupalexa Yehova onihimya wiira: ‘Kinnilaphela okumi aka wiira, nkinrowa owaakhulani.+ 32 Khentthikela wiiraneya etthu munuupuwela anyu mwiiraka: “Nikhaleke ntoko maloko, ntoko atthu a ilapo sikina, yaawo anikokhorela matera ni maluku”’”.+

33 “Pwiya Muulupalexa Yehova onihimya wiira: ‘Kinnilaphela okumi aka wiira, kinimoolamulelani ni ntata naka noowerya ni owerya wa moono aka, kinanariwe ene vanceene ni nyuwo.+ 34 Miyo kinrowa wookumihani eriyari ya atthu ni woothukumanyani eriyari ya ilapo seiyo koomwara-mwanraakani, kirumeelaka ntata naka noowerya, owerya waka ni kinanariwe ene ni nyuwo.+ 35 Kinimooroihani moothakoni mwa atthu, nto weiwo kinimoophukelani niwehanaka owiitho.+

36 “Pwiya Muulupalexa Yehova onihimya wiira: ‘Ntoko siisaale kaaphukenle aka amuhavinre anyu woothakoni elapo ya wExiitu, siiso, miyo kinimoophukelani. 37 Miyo kinoowiirihani ntoko siisaale makampusi oniviriha awe ipwittipwitthi vathi va ekopo.+ Nave kinimookhanyereryani weettela nivarihano. 38 Masi miyo kinrowa waamala-maliha ale ahiniiwelela ni ale anikivirikanya.+ Miyo kinimwaakumiha elapo eyo anikhala aya ntoko anamurwa, masi awo khanrowa okela elapo ya Isarayeli.+ Nto nyuwo munoosuwela wiira miyo ka Yehova’.

39 “Masi nyuwo, atthu a nloko na Isarayeli, etthu onihimya awe Pwiya Muulupalexa Yehova, tiila: ‘Khula mmosa oroweke akokhoreleke ilatarato sawe sootepa onanara.+ Nto nyuwo mwaahikiwiriyane, khamuntthikela-tho onanariha nsina naka noowaarya, murumeelaka mikuttho sanyu, vamosa ni ilatarato sanyu sootepa onanara’.+

40 “Etthu onihimya awe Pwiya Muulupalexa Yehova, tiila: ‘Vamwaako vaka woowaarya, mwaako woottukhuwa wa Isarayeli,+ ti weiwo atthu ootheene a nloko na Isarayeli, anrowa aya okikokhorelaka.+ Weiwo kinoosiveliwaka naawo, kinimoovekelakani soovaha sanyu, soovaha sanyu sootepa oloka ni itthu sanyu sootheene soowaarya.+ 41 Mwaha wa wunkhela* wa mikuttho, miyo kinrowa osiveliwa ni nyuwo okathi kinrowa aka wookumihani eriyari ya atthu ni woothukumanyani ilapo mmwara-mwariwe anyu.+ Nto miyo kinrowa oreerihiwa eriyari anyu ohoolo wa maloko’.+

42 ‘“Nto nyuwo munoosuwela wiira miyo ka Yehova,+ okathi kinrowa aka wookuxani kooroihakani elapo ya Isarayeli,+ elapo yeeyo kaaleihenrye aka waavaha amuhavinre anyu. 43 Weiwo munimuupuwelela mweettelo anyu ni miteko sanyu sootheene seiyo saawiirinheni okhala oohiloka.+ Nave mwaha wa itthu sootheene sootakhala mpanke anyu sinooweettihani murima.+ 44 Nto nyuwo munoosuwela wiira miyo ka Yehova, okathi kinrowa aka opaka etthu ela mwaha wa nsina naka,+ ohiya mwaha wa mweettelo anyu wootakhala aahiiso miteko sanyu sootakhala, nyuwo atthu a nloko na Isarayeli’. Pwiya Muulupalexa Yehova tonihimya”.

45 Kaahisuwelihiwa-tho moolumo a Yehova yaahimya wiira: 46 “Nyuwo mwaana a mutthu, nweheke muttetthe wa osuuli ni mulaleerye osuuli. Mulavule eprofesia muhimyaka etakhwa ya elapo ya osuuli. 47 Etakhwa ya osuuli muhimeerye wiira: ‘Mwiiwe moolumo a Yehova. Etthu onihimya awe Pwiya Muulupalexa Yehova, tiila: “Kinimoopattiheryani mooro+ yoowo onrowa opaha miri sanyu sootheene, iye sikithi ni iye soowuuma. Malumi aya khanrowa ottipha.+ Nnoopaha ipantta sootheene sa osuuli ni onorti. 48 Nto atthu ootheene animoona wiira ti miyo, Yehova, kipattinhe mooro owo okhala wiira mooro owo khonrowa oweryaneyaka ottipihiwa”’”.+

49 Nto miyo kaahihimya wiira: “Kootakhaliwa, Pwiya Muulupalexa Yehova! Etthu kinihimyaniwa aka, tiila: ‘Okathi wootheene owo onaalela ithale’”.

21 Vano kaahisuwelihiwa moolumo a Yehova, yaahimya wiira: 2 “Nyuwo mwaana a mutthu, nweheke oYerusalemu, mulaleye muhimyaka nipuro noowaarya ni mulaleye eprofesia muhimyaka elapo ya Isarayeli. 3 Muhimeerye elapo ya Isarayeli wiira: ‘Etthu onihimya awe Yehova, tiila: “Miyo kinoowana ni nyuwo, kinookumiha espaata* aka opuro onikhala aya+ wiira kaamala-malihe eriyari anyu anaxariya vamosa ni atakhali. 4 Okhala wiira kinimwaamala-maliha eriyari anyu anaxariya vamosa ni atakhali, kinookumiha espaata aka opuro onikhala aya kaakumiheryaka atthu ootheene, eyo piiyo, a osuuli ni a onorti. 5 Atthu ootheene anoosuwela wiira miyo Yehova, kookumiha espaata aka opuro onikhala aya. Eyo khentthikela-tho opuro onikhala aya”’.+

6 “Nyuwo mwaana a mutthu, mwiittheke iphumu okathi munithukumela anyu mwaha wa woova, aayo, mwiittheke iphumu muriipiwe ene murima ohoolo waya.+ 7 Awo yookohani wiira: ‘Xeeni muniittha anyu iphumu?’ Nyuwo muhaana owaakhula wiira: ‘Mwaha wa ihapari sinrwa’. Tthiri iyo sinimoorwa, mirima sootheene sinootothowa mwaha woowoova, matata ootheene anoomora, atthu ootheene anooriipiwa murima nave makutha ootheene anoottonya maasi.*+ ‘Mwiiwe! Ihapari iyo sinimoorwa tthiri; iyo sinimwiiraneya’. Pwiya Muulupalexa Yehova tonihimya”.

8 Kaahisuwelihiwa-tho moolumo a Yehova yaahimya wiira: 9 “Nyuwo mwaana a mutthu, mulaleye eprofesia mwiiraka: ‘Etthu onihimya awe Yehova, tiila: “Muhimye so: ‘Espaata! Espaata+ yoononiwa ni yooreerihiwa. 10 Eyo yoononiwa wiira ewiive atthu anceene; yooreerihiwa wiira yaaryeke ntoko etari’”’”.

“Niireke khanikhanle ootteeliwa murima?”

“‘Niireke eyo* enookhootta ekopo ya mwanaka,+ ntoko enikhootta aya miri sootheene?

11 “‘Espaata ela yookumiheriwa wiira ereerihiwe ni erumeeliweke. Ela yoononiwa ni yooreerihiwa, wiira evahereriwe mmatatani mwa mulipa-oowiva.+

12 “‘Nyuwo mwaana a mutthu, munleke ni mwiikhupanyeryeke,+ okhala wiira eyo ehaarweela atthu aka; eyo ehaarweela makhulupale ootheene a Isarayeli.+ Awo animwiiviwa ni espaata vamosa ni atthu aka. Tivonto mmane etara anyu mooniheryaka oriipiwa murima. 13 Kiireke yootokosiwa+ ele enrowa wiiraneya akhala wiira espaata enookhootta ekopo? Eyo* enoohiya okhala’.+ Pwiya Muulupalexa Yehova tonihimya.

14 “Vano nyuwo mwaana a mutthu, mulaleye eprofesia, mmane makuphi, muhimye ikwaha tthaaru mwiiraka: ‘Espaata!’ Ela espaata eniiva, espaata eniwiiva atthu anceene, ni enaarukurerya.+ 15 Mirima saya saanoova vanceene,+ nave atthu anceene animwiiviwa vamikhora sa ipooma saya, kinoowiiva atthu anceene ni espaata. Aayo, eyo ennaarya ntoko etari nave yooreerihiwa para wiiva! 16 Nyuwo espaata yoononiwa, mwiikitthe mpantta woolopwana! Mpwetexe mpantta woothiyana! Murowe khula opuro munrowa anyu wooniheriwa! 17 Miyo kinimoopa makuphi ni kinoomaliha onanariwa waka.+ Ti miyo Yehova, kilavunle”.

18 Kaahisuwelihiwa-tho moolumo a Yehova yaahimya wiira: 19 “Vano nyuwo mwaana a mutthu, mulepele iphiro piili wiira evire espaata ya mwene a oBabiloonia. Iphiro soopiili sihaana opacerya elapo emosa-ru, nave muhaana ohela esinaale opuro sinipacerya aya iphiro iyo enooniherya ipooma soopiili sinrowa aya. 20 Muhaana olepela ephiro enrowa aya ovira espaata erowaka waRaba+ wa wAmoni, nave muhaana olepela ephiro ekina enrowa epooma yoolipihiwa ya oYerusalemu,+ oYuda. 21 Tthiri, mwene a oBabiloonia onneemela mapuro sinikumana aya iphiro iyo soopiili wiira aaxerye ehako. Owo onnixekexa mavaka awe. Onnikohererya ilatarato sawe,* nave onnaaxerya ehako omurumeelaka hapa a mwaamunama. 22 Ehako aaxenrye awe moono awe woolopwana enithoonya oYerusalemu, wiira seemexiwe ikaruma para opwetexiwa epooma, orume wiiviva atthu, wiiwanyeye okhuwela wa ekhotto, wiira seemexiwe ikaruma sa ekhotto para ohonona mikhora, wiira atekiwe mapuro oottukhuwa anrukurerya epooma, ni wiira etekiwe exiri enrukurerya epooma.+ 23 Masi atthu a oYerusalemu yaawo aleihenrye okhala oororomeleya wa atthu a oBabiloonia, anrowa woonaka wiira ehako eyo ti yeethiru.+ Masi, mwene a oBabiloonia onimuupuwela mulattu aya ni onimwaavara.+

24 “Etthu onihimya awe Pwiya Muulupalexa Yehova, tiila: ‘Nyuwo muhiiriha mulattu anyu wuupuweliwa mooniheryaka soottheka sanyu ni musuwelihaka itampi sanyu ni itthu sootheene munipaka anyu. Nto vano muupuweliwe anyu, munookuxiwa vookhanyereriwa’.

25 Vano nyuwo, mukhulupale ootakhala a wIsarayeli, munlikana ni mutthu ovulalihiwe ni onihala okhwa.+ Nihiku nanyu na ohukhummwa noophiya. 26 Etthu onihimya awe Pwiya Muulupalexa Yehova, tiila: ‘Murule nleeso,* nave murule ekhara.+ Itthu khasintthikela ntoko saari aya khalai.+ Mutthu oottittimihiwa onooyevihiwa,+ nave mutthu ohinooneliwa vatthu onoovuwihiwa.+ 27 Miyo kinimwiiriha ekhara eyo okhala milepe. Aayo, kinookhaliha milepe!* Nave khuuvo onrowa ohalana ekhara eyo, mpakha ophiya ole orina etireitu yoohalana.+ Vano, miyo kinonvahererya yoowo’.+

28 Vano nyuwo mwaana a mutthu, mulaleye eprofesia mwiiraka: ‘Ela ti etthu onihimya awe Pwiya Muulupalexa Yehova, aahimyaka atthu a wAmoni ni oveeha waya’. Muhimye wiira: ‘Espaata! Espaata yookumihiwa opuro onikhala aya wiira ewiive atthu, yoononiwa wiira yiive ni yaaryeke ntoko etari. 29 Nnaamwi mooniheriwe ene etthu yoowoothiwa ni ehako yeethiru enoohimyani nyuwo, nyuwo munimuukeliwa vamosa ni atthu yiiviwe, alopwana yaawo ootakhala niphiyale nihiku naya, okathi wa ohukhummwa waya wookiserya. 30 Muttikiherye espaata opuro onikhala aya. Miyo kinimoophukelani opuro muhuuwale anyu, elapo yeeyo muyariwe anyu. 31 Miyo kinoonanariwa ni nyuwo. Nave kinoowiiseelelani mooro wa oviruwa waka ni kinimoovahereryani mmatatani mwa atthu ootakhala, yaawo anisuwela saana opwetexa.+ 32 Nyuwo munrowa olikanaka ni ikhuni sintetheeriwa vaikho.+ Ephome anyu enoomwarexeliwa vathi, nto khamuntthikela-tho wuupuweliwa, okhala wiira ti miyo Yehova kilavunle’”.

22 Vano, kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, niireke muhiilokiherya wiira mulaleye ophukeliwa* wa epooma erina mulattu, mwaha woowiiva atthu+ ni wooniherya itthu saya sootheene soohiirya?+ 3 Nyuwo muhaana ohimya wiira: ‘Etthu onihimya awe Pwiya Muulupalexa Yehova, tiila: “Nyuwo epooma eniwiiva atthu anceene,+ nave enipaka ilatarato soohiirya wiira mwiiravihe,+ okathi anyu woophiya.+ 4 Atthu nwiivale anyu ahoophwanyihani mulattu,+ nave ilatarato sanyu soohiirya sihookhalihani oohiloka.+ Vano, nyuwo munoohukhummwa, nto eyo enimwiiraneya moohipisa. Tivonto kinrowa aka owiirihani okhala etthu eniveehiwa ni maloko, etthu enithanyiwa ni ilapo sootheene.+ 5 Ilapo saattamenle ni iye sirakamenle, sinrowa wootheyakani,+ okhala wiira nsina nanyu ni epooma anyu yootakhala, yoosareya onyakulihana. 6 Mwiiwe! Makhulupale ootheene a wIsarayeli ari eriyari anyu, annirumeela okhulupale aya wiira awiive atthu.+ 7 Eriyari anyu, axipaapa ni aximaama annithanyiwa,+ namurwa onniiyeriwa, naamukhweli ni mwaana ohirina apapawe,* annihaaxiwa”’”.+

8 “‘Munnithanya mapuro aka oowaarya, nave munninanariha isaabadu saka.+ 9 Eriyari anyu, aakhala ale anilakela wiiva.+ Awo annoolya mikuttho sinivahiwa amuluku eethiru omiyaakoni, nave annipaka itthu soohiloka.+ 10 Eriyari anyu, awo annuulihiha muru ekhaama ya paapa aya.+ Nave annimurupiha muthiyana mahiku onikhala awe mmweerini.+ 11 Eriyari anyu, mutthu onnipaka itthu soohiirya ni muthiyana a mulopwana mukina,+ nave akina annimuulihiha muru maathi aya ni mweettelo woohiloka onooniherya ohuuliwa muru.+ Akina annimutuphela mwaana mwaamuthiyana a paapa aya.+ 12 Eriyari anyu, awo anneemererya okunyariwa wiira amwiive mutthu.+ Munniliviwa ixuuru, nave munniphwanya iluukuru+ okathi munooliha anyu musurukhu. Nave-tho munniwiiyerya musurukhu anamwaattamanani anyu.+ Aayo, mookiliyala moomalela’. Pwiya Muulupalexa Yehova tonihimya.

13 “‘Mwiiwe! Kinnoopa makuphi kooniheryaka esinaale eniliva mihakhu sanyu soohiroromeleya ni wiiviwa wa atthu eriyari anyu. 14 Kiireke nlelo munookhalana olipa murima, nave matata anyu nlelo anookhala oolipa okathi kinrowa aka woohukhumuni?+ Miyo Yehova koolavula, nave kinoopaka eyo. 15 Miyo kinrowa woomwara-mwaryani eriyari ya maloko, nave kinimoothanyani mulaponi.+ Nto kinoomala-maliha mweettelo anyu woohiloka.+ 16 Vano nyuwo munimuulihihiwa muru ohoolo wa maloko, nto munoosuwela wiira miyo ka Yehova’”.+

17 Kaahisuwelihiwa-tho moolumo a Yehova yaahimya wiira: 18 “Nyuwo mwaana a mutthu, atthu a nloko na Isarayeli aapakeya etthu yoohiloka para miyo ntoko ikokhola. Ootheene aya ari ntoko ekoopiri, estaanyu, eyuuma, ni exumpu, eri muhina mwa efornu enipatta. Awo aapakeya ikokhola sa eparatha.+

19 “Tivonto, etthu onihimya awe Pwiya Muulupalexa Yehova, tiila: ‘Okhala wiira ootheene anyu muhiikhaliha oohiloka ntoko ikokhola,+ miyo kinrowa woothukumanyani muhina mwa oYerusalemu. 20 Ntoko siisaale sinthukumanyiwa aya eparatha, ekoopiri, eyuuma, exumpu ni estaanyu nfornuni enipatta wiira etotoxiwe ni mooro, siiso-tho kinimoothukumanyani ni onanariwa waka ni oviruwa waka, nto kinoowiiseelelani onanariwa waka wiira mutothowe ntoko eyuuma.+ 21 Miyo kinrowa woothukumanyani wiira kiwiiseeleleni mooro wa oviruwa waka,+ nto nyuwo munootothowa muhina mwa oYerusalemu.+ 22 Ntoko siisaale eparatha enitothowa aya muhina mwa efornu enipatta, ti siiso nyuwo munrowa nyu otothowa muhina mwa oYerusalemu. Nto nyuwo munoosuwela wiira miyo Yehova, kihoomwarexelani oviruwa waka’”.

23 Vano kaahisuwelihiwa-tho moolumo a Yehova yaahimya wiira: 24 “Nyuwo mwaana a mutthu, muhimeerye elapo wiira: ‘Nyuwo mwa elapo ehinrowa oreerihiwa, nnakhala ehinrowa orupeliwa epula nihiku na onanariwa waka. 25 Maprofeta aya ahaarukunuwela+ ntoko kharamu yoowo onoopa murukulu ni onikhuura enama ovanre awe.+ Awo anniwiiva atthu. Annikuxa mihakhu ni itthu sa faita. Nave anniwiiriha atthu anceene okhala anaamukhweli mulaponi mwaya. 26 Anamukuttho aya aahonona nlamulo naka,+ nave anniveeha mapuro aka oowaarya.+ Awo khaniwerya ohivirikanyiha+ etthu yoohiloka ni yooloka.+ Annikhootta weettela isaabadu saka ni annikiveeha eriyari aya. 27 Makhulupale aya anikhala eriyari aya anlikana ni miici sinikhuura inama sivanre aya. Awo annaatuphela ni anniwiiva atthu, wiira aphwanye musurukhu.+ 28 Masi maprofeta aya annikhuneela itthu sootakhala anipaka aya ntoko mutthu onisirikeela ekaali vaxirini. Awo annooniheriwa itthu soowoothiwa ni annilavula moolumo oowoothiwa,+ ahimyaka wiira Pwiya Muulupalexa Yehova tohimmye, nnaamwi Yehova ohilavunle etthu. 29 Atthu a elapo ela annaawoka atthu ni anniwiiyerya,+ annaahaaxa amasikhini naale oohaawa, annimwiiyerya namurwa ni annikhootta omwiirela exariya’.

30 ‘“Kaahimwaavya mulopwana aarowa owerya olokiherya exiri ya maluku aahiiso aarowa weemela ohoolo waka, vaxirini yaakhapelela epooma, wiira eyo ehipwetexiwe,+ masi nkamphwannye nnakhala mulopwana mmosa. 31 Kinimwaahukhumu mwaha woowi koonanariwa, nave kinimwaapwetexa ni onanariwa waka weiwo onlikana ni mooro. Kinoowiiriha ohaawa mwaha wa mweettelo aya’. Pwiya Muulupalexa Yehova tonihimya”.

23 Kaahisuwelihiwa-tho moolumo a Yehova, yaahimya wiira: 2 “Nyuwo mwaana a mutthu, yaahikhala athiyana anli yaawo yaayariwe ni maama mmosa-ru.+ 3 Athiyana awo yaahipacerya oraruwa wExiitu+ okhuma omiravo aya. Weiwo awo yaaniraruwa ni yaahihonona ottittimihiwa waya. 4 Masina aya yaari ala: Muulupale aihaniwa Ohola,* vano mwaamukhaani aihaniwa Oholiba.* Awo yaahikhala awaka, nave yaahaayara anamwane axilopwana ni axithiyana. Vano nsina noowi Ohola ninthoonyerya Samariya,+ nave nsina noowi Oholiba ninthoonyerya Yerusalemu.

5 “Ohola aahipacerya oraruwa+ nlelo ori ene awaka. Owo aahaaphavela axihawala awe,+ eyo piiyo, anamwaattamanani awe atthu a wAsiiria.+ 6 Awo yaari makuvernatoro yaawara ikuwo sa ekoore yooriipelela ni yaari makhulupale. Ootheene aya yaari amiravo oovara murima, yeettiha ikhavalo saya. 7 Owo khaahiyale oraruwa ni anamwane ootheene ootepexa okhalana efaita a wAsiiria, nave aahiinanariha+ ni ilatarato soohiirya* sa atthu awo aaphavela awe. 8 Owo khaahiyale mweettelo awe wooraruwa aarina awe wExiitu, okhala wiira atthu yaahirupa nuuwo okhuma omiravo awe, nave awo yaahihonona omwali awe ni yaahinanariha ottittimiheya wawe.+ 9 Siiso miyo kaahinvahererya mmatatani mwa axihawala awe, anamwane axilopwana a wAsiiria,+ yaawo aaphavela awe. 10 Awo yaahooniherya ohiwara wawe etthu,+ yaahaavara anaawe axilopwana ni axithiyana,+ awiiva ni espaata.* Vano owo aanilavuliwa voohiloka eriyari ya axithiyana, nto aahiphukeliwa.

11 “Okathi muhima awe Oholiba aasuwenle awe eyo, osiveliwa wawe waahikhala wootepa otakhala, nave oraruwa wawe waari wootepa otakhala onvikana muulupale awe.+ 12 Owo aanaaphavela anamwaattamanani awe anamwane a wAsiiria,+ makuvernatoro ni makhulupale yaawo yaawara ikuwo soowaarya ni yeettiha ikhavalo. Ootheene aya yaari amiravo oovara murima. 13 Okathi aikhalinhe awe oohiloka, kaahiweha wiira oowanli aya yaahitthara mweettelo mmosa-ru.+ 14 Masi owo aamutepa wuncererya miteko sawe sa oraruwa. Owo aahoona ilatarato sa alopwana oKhaldeya, seiyo saapatthiwe vaxirini ni saapintariwe ni ekoore yooxeerya. 15 Iyo saahiwarihiwa misakho muyuununi mwaya, maleeso mmuru mwaya, ni yaakhala ntoko anakhotto. Ilatarato iyo sootheene saathoonyerya atthu a oBabiloonia, ayariwe elapo ya atthu a oKhaldeya. 16 Omalaka-ru waaweha owo aahipacerya waaphavela, nto aahaaruma anamitthaka orowa oKhaldeya.+ 17 Vano anamwane axilopwana a oBabiloonia yaanirwa orupa nuuwo vakhaamani vawe, nto awo yaahimunanariha ni yaahimukhaliha oohiloka. Nuumala onanarihiwa naawo, owo aahaahiya, onaanyokha.

18 “Okathi owo aathipelela awe oraruwa ohuuliwaka muru, ni aixooniherya awe ohiwanre etthu,+ miyo kaahimuhiya kimunyokhaka, ntoko kaamuhiyale aka muulupale awe kimunyokhaka.+ 19 Nto owo aamutepa wuncererya miteko sawe sa oraruwa,+ uupuwelaka mahiku a omiravo awe, okathi aararuwa awe elapo ya wExiitu.+ 20 Owo aahaaphavela vanceene atthu awo ntoko axihawala awe alopwana yaawo elopwana aya enlikana ni ya puuru, nave enlikana ni ya khavalo. 21 Nyuwo mwaahinkheliwa mweettelo anyu woowuuliha muru wa omiravo anyu, okathi atthu a wExiitu+ yaavarakasa aya mapele anyu macikhaani.+

22 “Tivo, nyuwo Oholiba, etthu onihimya awe Pwiya Muulupalexa Yehova, tiila: ‘Miyo kinoowiiriha axihawala anyu+ yaawo mwaahiya anyu mwaha wa waanyokha. Kinoowiiriha woorweelani, akhumaka ipantta sootheene,+ 23 anamwane a oBabiloonia,+ anamwane ootheene a oKhaldeya,+ alopwana a oPekodi,+ a oXowa, a oKowa, vamosa ni anamwane ootheene a wAsiiria. Ootheene aya amiravo oovara murima, makuvernatoro, makhulupale, anakhotto ni atthu oottittimihiwa,* ootheene aya anirwa awenle ene ikhavalo saya. 24 Awo animootuphelani ni ikaaro saya suulupale sa ekhotto, maroota aya, atoropa aya anceene, makula oowiixaakihana maalupale ni macikhaani* vamosa ni ikapaseeti. Awo animoorukureryani ipantta sootheene. Nto miyo kinimwaaruma woophukelani, awo animoophukelani ntoko anrowa aya woona oreerela.+ 25 Kinimooviruwelani, nave awo anoonanariwa ni nyuwo. Kinoothikila iphula sanyu ni maaru anyu, nave ale anrowa ohala animwiiviwa ni espaata. Awo animwaakuxa aniinyu axilopwana ni aniinyu axithiyana, nto ale anrowa ohala anoopahiwa ni mooro.+ 26 Awo anowaakhani ikuwo sanyu,+ nave anookuxa mireerelo sanyu sooreerexa.+ 27 Kinoomaliha mweettelo anyu woohiloka ni oraruwa wanyu,+ opacenrye anyu elapo ya wExiitu.+ Munoottharuwa waaweha, nave khamuntthikela-tho wuupuwela wExiitu’.

28 Etthu onihimya awe Pwiya Muulupalexa Yehova, tiila: ‘Kihanle woovahereryani mmatatani mwa ale anoonyokhani, yaawo nyuwo mwaahapunwe anyu.+ 29 Awo animoonyokhani, anookuxa mihokorokho sootheene sa muteko anyu,+ nave animoohiyani muhiwanre etthu. Animooniherya ohiwara wanyu etthu, mweettelo anyu woohiloka onooniherya ohuuliwa muru ni oraruwa wanyu.+ 30 Itthu iyo sinoowiiraneelani mwaha woowoomola maloko ntoko namararuwa,+ mwaha woowiinanariha ni ilatarato saya soohiirya.+ 31 Nyuwo mootthara iphiro sa muhima anyu,+ nto miyo kinoohela mmatatani mwanyu ekaalisi enithoonyerya onanariwa waka’.+

32 “Etthu onihimya awe Pwiya Muulupalexa Yehova, tiila:

34 Nyuwo munoowurya mpakha omaliha,+ nave munookhuura ipetaaso sa ekaalisi eyo.

Nuumala-vo, munimwiithikilasa vapeeto muriipiwe ene murima.

“Tthiri ti miyo kilavunle”. Pwiya Muulupalexa Yehova tonihimya’.

35 “Tivo etthu onihimya awe Pwiya Muulupalexa Yehova, tiila: ‘Okhala wiira mookiliyala ni mookikhootta,*+ nyuwo munoohaawa mwaha wa mweettelo anyu woohiloka ni oraruwa wanyu’”.

36 Vano Yehova aahikileela wiira: “Nyuwo mwaana a mutthu, kiireke moolikana wiira mumphukele Ohola ni Oholiba+ ni waahimeerya itthu soohiirya anipaka aya? 37 Awo aararuwa,+ nave matata aya aasareya ephome. Awo khahiyo paahi arookokhorela ilatarato saya soohiirya, masi-tho ahaapaha anaaya vamooroni, yaawo yaakiyarenle aya. Awo aapaka eyo wiira yaavahe anamwane awo, ntoko mikuttho para ilatarato saya.+ 38 Nave-tho, awo aakiirela etthu ela: Nihiku nle aananariha opuro aka woowaarya, nave aahonona isaabadu saka. 39 Nuumala owiiva anaaya wiira yaavahe ntoko mikuttho ilatarato saya soohiirya,+ awo yaahirwa opuro aka woowaarya wiira ananarihe opuro owo+ nihiku nenle. Ela ti etthu yaapanke aya mpaani mwaka. 40 Nave awo yaahaaruma anamitthaka orowa owiihana atthu yaakhuma ottaiwene.+ Okathi awo yaarwa aya, nyuwo mwaahiirapiha, mwaahipintari maitho anyu ni mwaahiphwaneliha ni itthu sinireeriha.+ 41 Nave nyuwo mwaahikilaathela ekhatera yooreera ya musurukhu munceene,+ yeeyo yaapwehiwe meesa ohoolo waya,+ nto vameesa-vo mwaahiphweha nsenso naka*+ ni makhura aka.+ 42 Weiwo waaniiwanyeya onyakula wa muttitthi wa alopwana oohixanka. Eriyari aya yaahikhala alopwana anamuhapaliwa yaawo yaakumihiwe woothakoni. Awo yaahaawariha athiyana ipulseera mmoononi ni ikhara sooreera mmuru.

43 Nto, miyo kaahilavula kimuhimyaka ole aatempe oraruwa kiiraka: ‘Vano, owo onrowa otepaka oraruwa’. 44 Vano awo yaanimurowela, ntoko siisaale mutthu onimurowela awe namararuwa. Ti siiso awo yaarowa aya wa Ohola ni Oholiba, athiyana yaawo yaarina mweettelo woohiloka onooniherya ohuuliwa muru. 45 Masi anaxariya anoomulamula ntoko siniphwanela awe olamuliwa namararuwa+ ni ole omwiivale mutthu.+ Tthiri, awo athiyana anamararuwa, nave matata aya aasareya ephome.+

46 “Etthu onihimya awe Pwiya Muulupalexa Yehova, tiila: ‘Anooruuheliwa anakhotto wiira amukhalihe etthu yoowoopiha ni etthu ekuxiwe.+ 47 Anakhotto awo anonvonyerya maluku+ ni anoomuthikilasa ni ispaata saya. Awo anoowiiva anaaya axilopwana ni anaaya axithiyana,+ nave anoopaha ipa saya ni mooro.+ 48 Miyo kinoomala-maliha mulaponi mweettelo woohiloka onooniherya ohuuliwa muru, nto athiyana ootheene animwiixutta etthu ni khanrowa otakiha mweettelo anyu woohiloka onooniherya ohuuliwa muru.+ 49 Awo anoowiirihani ohaawa mwaha wa mweettelo anyu woohiloka onooniherya ohuuliwa muru, ni mwaha wa itampi sanyu mpanke anyu mwaha wa okokhorela ilatarato sanyu sootepa onanara. Vano nyuwo munoosuwela wiira miyo ka Pwiya Muulupalexa Yehova’”.+

24 Nihiku 10 na mweeri wa namuloko, eyaakha ya neethanu neexexe, kaahisuwelihiwa moolumo a Yehova yaahimya wiira: 2 “Nyuwo mwaana a mutthu, mulepe nihiku* na olelo. Nihiku nla na olelo,+ mwene a oBabiloonia oopacerya otuphela oYerusalemu. 3 Mulaleye muhapo onaahimya atthu a etthoko yoohiiwelela. Mwaaleele wiira:

‘“Etthu onihimya awe Pwiya Muulupalexa Yehova, tiila:

“Mweexe epanela vaikho, nave muhele maasi mpanelani-mmo.+

 5 Mukuxe epwittipwitthi yootepa oloka munikotoni,+ mpwehe ikhuni murukurerihaka epanela eyo.

Mukaphulihe ipetaaso saya ni mwaapeye makhuva awo mpanelani-mmo”’.

6 “Etthu onihimya awe Pwiya Muulupalexa Yehova, tiila:

‘Yootakhaliwa epooma eniwiiva atthu,+ yootakhaliwa epanela erina mukwitha,* yeeyo mukwitha aya ohirapihiwe.

Mukumihe ipetaaso mpanelani-mmo, emosa-emosa.+ Muhithanle enrowa anyu okuxa.

9 Tivonto, etthu onihimya awe Pwiya Muulupalexa Yehova, tiila:

‘Yootakhaliwa epooma eniwiiva atthu!+

Miyo kinoopattiha mooro munceene.

Ohiloka waya onootothowa muhina mwaya,+ nave mukwitha aya onoomala-mala.

Murihele vaikho epanela eyo vamosa ni mukwitha aya!’

13 “‘Muhiikhaliha oohiloka mwaha wa mweettelo anyu woohiloka onooniherya ohuuliwa muru.+ Miyo koomananiha wooreerihani, masi khamunreeriheya. Khamunrowa okhala ooloka mpakha omala-mala onanariwa waka ni nyuwo.+ 14 Ti miyo Yehova kilavunle. Eyo enimwiiraneya. Kinimwiira ntoko kihimmye aka kihiwoonelakani othunku nnakhala kihitthikelaka ottuli.+ Awo animoophukelani attharaka iphiro sanyu ni miteko sanyu’. Pwiya Muulupalexa Yehova tonihimya”.

15 Kaahisuwelihiwa-tho moolumo a Yehova yaahimya wiira: 16 “Nyuwo mwaana a mutthu, kinoomwiiriha mwaarinyu munimphenta anyu okhwa mootutuxerya.+ Muhiikhupanyerye, muhinle, aahiiso muhimoroxe maithori. 17 Munleke vathi-vathi ni muhinle ntoko aninleliwa aya atthu ookhwa.+ Nware nleeso+ ni nware isantaalya.+ Muhiwale eyano anyu,+ nave muhikhuure ephaawu muniruuheliwa anyu ni atthu akina”.+

18 Miyo kaahilavula ni atthu voosiisu, nto ohiyu amwaaraka yaahikhwa. Mmeeloni mwaya voosiisu, kaahipaka etthu kaarummwale aka. 19 Atthu yaanikikoha wiira: “Nkanihimeeryeni: Itthu iya munipaka anyu sinivarihana sai ni hiyo?” 20 Kaahiwaakhula wiira: “Koosuwelihiwa moolumo a Yehova anihimya wiira: 21 ‘Mwaaleele atthu a nloko na Isarayeli wiira: “Etthu onihimya awe Pwiya Muulupalexa Yehova, tiila: ‘Kihanle onanariha opuro aka woowaarya,+ opuro yoowo oniwiirihani wiixinnuwiha, yoowo onoosivelani ni oniphavela murima anyu. Aniinyu axilopwana ni axithiyana yaawo mwaahiyale anyu ottuli, animwiiviwa ni espaata.*+ 22 Nyuwo munrowa wiira siisaale kiirale aka. Nyuwo khamunrowa owala eyano anyu, nnakhala khamunrowa okhuura ephaawu munrowa anyu oruuheliwa ni atthu akina.+ 23 Nyuwo munoowara nleeso mmuru ni munoowara isantaalya munawuni mwanyu. Nyuwo khamunrowa wunla nnakhala wiikhupanyerya. Ohiya-vo, munoohaawa mwaha wa itampi sanyu,+ nave munimunlelana vathi-vathi mukina ni mukhwaawe. 24 Ezekiyeli onimookhalelani ethoonyeryo.+ Nto nyuwo munimwiira siisaale iirale awe. Okathi eyo enrowa aya wiiraneya, nyuwo munoosuwela wiira miyo ka Pwiya Muulupalexa Yehova’”’”.

25 “Masi nyuwo mwaana a mutthu, nnoophiya nihiku kinrowa aka owaakha opuro aya woolipihiwa, eyo piiyo, opuro oniwiiriha ohakalala, onaasivela ni oniphavela murima aya. Nave nihiku nenlo kinoowaakha anaaya axilopwana ni anaaya axithiyana.+ 26 Nihiku nlo naphiya munooleeliwa ni mutthu onrowa woopowa.+ 27 Nihiku nlo munootthukula eyano anyu, nave munoolavula naale yooponwe, khamunrowa okhala-tho mutthu ohinilavula.+ Munrowa okhala ethoonyeryo aya, nto anoosuwela wiira miyo ka Yehova”.

25 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mwaaweheke atthu a wAmoni,+ nave mulaleye eprofesia enaahimya yaawo.+ 3 Mwaaleele atthu a wAmoni wiira: ‘Mwiiwe moolumo a Pwiya Muulupalexa Yehova. Etthu onihimya awe Pwiya Muulupalexa Yehova, tiila: “Mwaha woohimya wiira: ‘Khwaa!’ mwiirelaka opuro aka woowaarya okathi waahononiwe aya, nave mwiirelaka elapo ya atthu a Isarayeli okathi yahaakhaliwa aya ni nwiirelaka atthu a etthoko ya Yuda okathi yaaroihiwe aya weepotthani, 4 miyo kinimoovahereryani mmatatani mwa atthu a epantte enikhuma nsuwa wiira yookuxeeni. Awo anoomaka eriyari anyu ni animweemexa itenta* saya eriyari anyu. Animoolya mihokorokho sanyu ni anoowurya eleeti anyu. 5 Miyo kinimwiiriha oRaba+ okhala opuro onilyihiwa aya ikamelo, nave kinimwiiriha elapo ya atthu a wAmoni okhala opuro sinimumula aya ipwittipwitthi. Nto nyuwo munoosuwela wiira miyo ka Yehova”’”.

6 “Etthu onihimya awe Pwiya Muulupalexa Yehova, tiila: ‘Nyuwo moomana makuphi,+ moomanela vathi inawu sanyu, mootteeliwa murima mwaha wa elapo ya atthu a Isarayeli ni muhaatheya.+ 7 Mwaha woopaka eyo miyo kinoowookolelani ntata naka ni kinimoovahereryani mmatatani mwa maloko wiira yookuxeeni. Kinimoomala-malihani eriyari ya atthu ni kinimoopwetexani mulaponi.+ Miyo kinimoomala-malihani, nto nyuwo munoosuwela wiira miyo ka Yehova’.

8 “Etthu onihimya awe Pwiya Muulupalexa Yehova, tiila: ‘Mwaha wa Mowabi+ ni Seyiri+ ohimya wiira: “Mooneke! Atthu a etthoko ya Yuda anlikana ni maloko makina”, 9 miyo kinimooniherya ettuli ya Mowabi mapuro sinikhala aya mikano sa ipooma sawe, seiyo siri ipooma sooreera sa elapo awe, eyo piiyo, oBethi-Yeximothi, oBayali-Mewoni, mpakha oKiriyatayimimi.+ 10 Miyo kinonvahererya vamosa ni atthu a wAmoni wiira okuxiwe ni atthu a mpantta onikhuma nsuwa,+ siiso atthu a wAmoni anooliyaliwa ni maloko makina.+ 11 Vano miyo kinimwaaphukela atthu a oMowabi,+ nto awo anoosuwela wiira miyo ka Yehova’.

12 “Etthu onihimya awe Pwiya Muulupalexa Yehova, tiila: ‘Edomi oowunlela ikuhu atthu a etthoko ya Yuda, nave ookhalana mulattu muulupale mwaha woowunlela ikuhu atthu awo.+ 13 Tivonto, etthu onihimya awe Pwiya Muulupalexa Yehova, tiila: “Miyo kinoomookolela ntata Edomi, nave kinimwaamala-maliha atthu ni inama, kiirihaka elapo eyo ohikhaliwa.+ Awo animwiiviwa ni espaata,* okhuma oTemaani mpakha oDedani.+ 14 ‘Miyo kinoomunlela ikuhu Edomi kaarumeelaka atthu aka aisarayeli.+ Awo anoomuroihela Edomi onanariwa waka ni oviruwa waka, siiso Edomi onimoona wunla waka ikuhu’.+ Pwiya Muulupalexa Yehova tonihimya”’.

15 “Etthu onihimya awe Pwiya Muulupalexa Yehova, tiila: ‘Mwaha wa owali, afilisti yaahiphavela owunlela ikuhu ni waapwetexa,+ awiirelaka itthu sootepa otakhala. 16 Tivonto, etthu onihimya awe Pwiya Muulupalexa Yehova, tiila: “Miyo kinimookola ntata naka kaavirikanyaka afilisti,+ nave kinimwaamala-maliha akereti+ ni kinimwaapwetexa atthu anikhala mpantta wa ophareya anrowa ohala.+ 17 Miyo kinimwaahukhumu vaalupale, kinoowunlela ikuhu kivirunwe ene, nto awo anoosuwela wiira miyo ka Yehova okathi kinrowa aka owunlela ikuhu”’”.

26 Nihiku noopacerya na mweeri, eyaakha ya namuloko namosa, kaahisuwelihiwa moolumo a Yehova yaahimya wiira: 2 “Nyuwo mwaana a mutthu, mwaha wa Tiiro ni Yerusalemu ohimya+ wiira: ‘Khwaa! Mukhora wa atthu woopwexiwa!+ Vano owo opwetexiwe awe, itthu sootheene sinrowa okhala sawaka, nto kinoothaaciri’, 3 okhala wiira etthu onihimya awe Pwiya Muulupalexa Yehova, tiila: ‘Miyo kinnoovirikanyani, nyuwo Tiiro, nave miyo kinimooruuhelani atthu a maloko manceene, ntoko siisaale ephareya enikumiherya aya mawimpi. 4 Awo anoopwexakasa ixiri sa oTiiro ni anoomoroxa ipa saya soorakamela osulu.+ Vano miyo kinookumiha etthaya ya elapo eyo yootheene, nto elapo eyo enrowa waaryaka ntoko mwala. 5 Elapo eyo enrowa okhala opuro para waaneya matthavi anirumeeliwa mphareya’.+

“Pwiya Muulupalexa Yehova onihimya wiira: ‘Okhala wiira miyo koolavula, nto eyo enookuxiwa ni maloko. 6 Atthu anikhala mittetthe saya saamukhaani siri mmuttettheni mwaya, animwiiviwa ni espaata.* Nto atthu anoosuwela wiira miyo ka Yehova’.

7 “Etthu onihimya awe Pwiya Muulupalexa Yehova, tiila: ‘Kinnimuruuha mwene Nabukodonosori* a oBabiloonia, okhumaka onorti wiira otuphele oTiiro,+ owo mwene a mamwene,+ ookhalana ikhavalo,+ ikaaro sa ekhotto,+ anakhavalo ni anakhotto anceene.* 8 Owo onoowiiva ni espaata atthu anikhala mittetthe saamukhaani siri mmuttettheni mwanyu, onooteka exiri wiira yoorukureryeni, onooteka mapuro oottukhuwa wiira ootupheleni ni makula maalupale a wiixaakihana.* 9 Owo onoomoroxa ixiri sanyu orumeelaka ikaruma sa ekhotto, nave onoopwexakasa ipa sanyu soorakamela osulu ni amaxatto.* 10 Ikhavalo sawe sinrowa okhala sinceene, nto ntthupi naya nnoorowa wookhuneelani. Oruma wa anakhavalo awe, maroota ni ikaaro sawe sa ekhotto sinoothukumeliha ixiri sanyu, okathi owo onrowa awe okela oviraka mikhora sanyu, ntoko alopwana yaawo anituphela epooma, ni ixiri seiyo sirina ephaka.* 11 Itthottopwa* sa ikhavalo sawe sinoothukumeliha istaraata sanyu sootheene.+ Owo onoowiiva atthu anyu ni espaata, nave ipilaari sanyu sootepa olipa sinoomoroxeliwa vathi. 12 Awo anookuxa itthu sanyu, anookuxa mireerelo sanyu,+ anoomoroxa ixiri sanyu ni anoopwexakasa ipa sanyu sooreera. Nave anoorihela mmaasini maluku anyu, matera anyu ni anoorihela mphareya etthaya anyu’.

13 “‘Miyo kinoomaliha oruma wa masipo anyu, nto khontthikeliwa-tho owiriyaniwa oruma wa aviola anyu.+ 14 Miyo kinimookhalihani mwala woowaataleya, kinimookhalihani opuro para waaneya matthavi anirumeeliwa mphareya.+ Khamuntthikela-tho otekiwa, okhala wiira ti miyo Yehova kilavunle’. Pwiya Muulupalexa Yehova tonihimya.

15 “Etthu onihimya awe Pwiya Muulupalexa Yehova, omuhimyaka Tiiro, tiila: ‘Kiireke isisiro* khasinrowa othukumela okathi sinrowa aya wiiwa oruma wa opwetexiwa wanyu? Nave kiireke khasinrowa othukumela okathi ale yiivakasiwe* anrowa aya wunla ni okathi onrowa aya wiiwanyeya okhuwela eriyari anyu?+ 16 Makhulupale ootheene a ophareya anookhuruwa veehiceni vaya, anoorula nlaya naya nihirina miyoono, vamosa ni nlaya nootthaviwa,* nave anoothukumela ni woova. Awo anookilaathi vathi ethukumelaka voohihiyererya ni anrowa woowehakani etikinihiwe ene.+ 17 Awo anoowiipelani nsipo na wiikhupanyerya+ ariki:

“Mmooneke moota opwetexiwe awe,+ nyuwo mwaakhaliwa ni atthu a ophareya, epooma yoottottopeliwa.

19 Etthu onihimya awe Pwiya Muulupalexa Yehova, tiila: ‘Okathi miyo kinrowa aka woopwetexani, kiwiirihakani olikana ni ipooma seiyo sihinikhaliwa ni okathi miyo kinrowa aka wooruuhelani maasi ootupa wiira yookhuneeleni,+ 20 kinimookuxani nyuwo ni ale anikhuruwela mulittini* ni nyuwo, arowaka opuro yoowo ori aya atthu a okathi wa khalai. Miyo kinoowiirihani wiira mukhaleke mapuro ootepexa wiixa, ntoko mapuro a khalai yaawo athaamiwe, vamosa ni ale anikhuruwela mulittini,+ wiira nyuwo muhikhaliweke ni atthu. Nto miyo kinrowa ovuwiha elapo ya atthu akumi.

21 “Pwiya Muulupalexa Yehova onihimya wiira: ‘Kinimookumiheryani ehasara yootutuxerya, nto munoohiya okhala.+ Munimwaaviwa, masi khamunrowa-tho ophwanyiwa’”.

27 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mmwiipele Tiiro nsipo na wiikhupanyerya.+ 3 Mmuhimeerye Tiiro wiira:

“Nyuwo Tiiro, moohimya mmansinyu wiira ti mooreera voomalela.+

 8 Atthu a oSiidoni ni a wAribadi,+ ti yeettiha ireemo* sanyu.

Nyuwo Tiiro, alopwana anyu oosuwelexa, ti yaamweettiha pakiti anyu.+

 9 Alopwana anyu oosuwela* ni ooratta,+ ti yaareherya iphaka sa apakiti.+

Apakiti ootheene a ophareya ni anahota aya, yaanirwa wa nyuwo wiira amweetteke nakoso.

10 Alopwana a oPersia, a oLudi ni a oPuthi,+ yaari anakhotto anyu, yaawo yaarowa okhottoni.

Awo yaanithomeya vaxirini vanyu, makula aya oowiixaakihana* ni ikapaseeti saya, nave yaanoovuwihani.

12 “‘“Taarisi+ aahimweetta nakoso ni nyuwo mwaha wa mireerelo sanyu soowaatta.+ Owo aahoovahani eparatha, eyuuma, estaanyu ni exumpu, oturukaka ni mireerelo sanyu.+ 13 Atthu a oYavani, a oTubali+ ni a oMexeki,+ yaahimweetta nakoso ni nyuwo, aruuhaka ipottha+ ni mireerelo sa ekoopiri, wiira aturuke ni mireerelo sanyu. 14 Atthu a etthoko ya Togarma,+ yaaniruuha ikhavalo saateexa miritti, ikhavalo sa ekhotto ni axinama aniihaniwa muula,* wiira aturuke ni mireerelo sanyu. 15 Atthu a oDedani,+ yaanimweetta nakoso ni nyuwo. Nyuwo mwaahikhalana alipa a nakoso isisiro sinceene. Awo yaanooruuhelani maino a etthepo+ ni matera a mwiri oniihaniwa eepano, wiira yooliveeni mpoosito. 16 Atthu a wEdomi yaahimweetta nakoso ni nyuwo mwaha wa mireerelo sanyu soowaatta. Awo yaanoovahani maluku aniihaniwa turkeesa, ekuwo ya ekoore violeeta, ikuwo sootthaviwa sooreerexa, ikuwo sa musurukhu munceene, maluku oowaarya vanceene ni maluku aniihaniwa rupi, wiira aturuke ni mireerelo sanyu.

17 “‘“Atthu a oYuda ni a elapo ya wIsarayeli, yaahimweetta nakoso ni nyuwo, yoovahakani etiriku ya oMinithi,+ yoolya yoothanliwa saana, oravo,+ makhura ni baalsamu,+ wiira aturuke ni mireerelo sanyu.+

18 “‘“Atthu a oDamaasiko+ yaahimweetta nakoso ni nyuwo mwaha wa mireerelo sanyu soowaatta ni othaaciri wanyu wootheene. Awo yaahooruuhelani eviinyu ya oHeliboni ni ikuwo sa manri a ipwittipwitthi sa oZarahi. 19 Atthu a oVedani ni a oYavani, muttetthe wa Uzali, yaahoovahani eyuuma yooreerihiwa, kaasiya,* ni mutathi woowunkhela wiira aturuke ni mireerelo sanyu. 20 Atthu a oDedani+ yaahoovahani ikuwo sinipwehiwa vasulu wa inama wiira sikilaatheliwe, aturukaka ni mireerelo sanyu. 21 Atthu a wArabia ni makhulupale ootheene a oKedari,+ yaanoovarelani muteko. Awo yaanitumiha ipwittipwitthi soolopwana, ipwittipwitthi saamukhaani ni ipuri.+ 22 Alipa a nakoso a oXeeba ni a oRayema,+ yaanimweetta nakoso ni nyuwo. Awo yaanoovahani mithinto sootheene sa eperfuume yoowunkhela, maluku oowaarya ni eweero, wiira aturuke ni mireerelo sanyu.+ 23 Atthu a oHarani,+ oKane, wEedeni,+ alipa a nakoso a oXeeba,+ a wAsuri+ ni oKilimadi, yaanimweetta nakoso ni nyuwo. 24 Omerkaatu wanyu, awo yaanitumiha malaya ooreerexa, manta yaapakiwe ni ekuwo* ya ekoore yooriipelela ni yootthaveleliwa ni itapeti soowaatta ikoore. Itthu iyo sootheene, saahitthukiwa ni saahilipihiwa ni mikhoyi.

25 Apakiti a oTaarisi+ ti yaalovola mireerelo sanyu.

Tivonto, nyuwo mwaahikhalana mihakhu sinceene* mphareya.

26 Alipa-ooweettiha ireemo* sanyu, ahooroihani opuro ori mawimpi ootupa.

Epheyo enirwa mpantta onikhuma nsuwa, ehoohononani eriyari ya ephareya.

28 Okathi ale aniweettiha apakiti anyu anrowa aya wunla, ilapo sa ophareya sinoothukumela.

32 Yiikhupanyeryaka siiso, anoowiipelani nsipo na wiikhupanyerya, yiiraka:

‘Ti pani onlikana ni Tiiro, yoowo vano omaalale eriyari ya ephareya?+

33 Okathi mireerelo sanyu saarwa aya sikhumaka ophareya, atthu anceene yaanivona.+

Mihakhu sanyu ni marotta anyu, yaaniwiiriha mamwene a mulaponi othaaciri.+

35 Atthu ootheene anikhala musisironi, animoowehani atikinihiwe ene.+

Mamwene aya anoothukumela mwaha wa woova.+ Nto owiitho waya onimooneyaka wiira annoova.

36 Ale animwiira nakoso eriyari ya maloko, anoowoopelani muturi atikinihiwe ene, mwaha wa etthu ewiiranenleni.

28 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mmuleele muhooleli a oTiiro wiira: ‘Etthu onihimya awe Pwiya Muulupalexa Yehova, tiila:

“Mwaha wa wiixinnuwiha vamurimani vanyu,+ nyuwo munnihimya wiira: ‘Miyo ka muluku.

Kikilanthi veehiceni va muluku, eriyari ya ephareya’.+

 3 Kiireke nyuwo mwa mutthu oosuwelexa onvikana Daniyeli?+

Kiireke khiivo esiiri ekhanle anyu oovitheriwa?

6 “‘Tivonto, etthu onihimya awe Pwiya Muulupalexa Yehova, tiila:

Nto awo anootholola ispaata saya,* anoopwetexa itthu sanyu sootepexa oreera, seiyo mphwanye anyu ni osuwela wanyu.

Nave-tho anoonanariha oreera wanyu.+

 9 Niireke munoowerya omuhimeerya ole oniwiivani, wiira nyuwo mwa muluku?

Mmatatani mwa ale anooveehani, nyuwo munrowa okhala mutthu paahi, ohiya muluku”’.

11 Kaahisuwelihiwa-tho moolumo a Yehova yaahimya wiira: 12 “Nyuwo mwaana a mutthu, mwiipe nsipo na wiikhupanyerya, mmuhimyaka mwene a oTiiro. Mmuhimeerye wiira: ‘Etthu onihimya awe Pwiya Muulupalexa Yehova, tiila:

13 Nyuwo mwaari wEedeni, exarti ya Muluku.

Maluku awo yaahireerihiwa ni eweero.

Awo yaahilokiheriwa nihiku mwaapattuxiwe anyu.

14 Miyo kaahoothanlani wiira mukhale kerubi onikhapelela, yoowo othanliwe.

Nyuwo mwaari vamwaako woowaarya wa Muluku,+ nave mwaaneetta eriyari ya maluku a mooro.

Tivo, kinoowoomolani vamwaako wa Muluku, ntoko mutthu oohiloka ni kinimoopwetexani.+

Nyuwo kerubi onikhapelela, kinoowoomolani opuro anyu, eriyari ya maluku a mooro.

17 Murima anyu waahipacerya wiixinnuwiha mwaha wa oreera wanyu.+

Muhaahonona ankhili anyu mwaha wa owerya wanyu wuulupale.+

Kinimoorihelani vathi.+

Kinimoopwehani ohoolo wa mamwene, wiira aweheke etthu ewiiranenleni.

18 Mwaha wa mulattu anyu muulupale ni anakoso anyu oohiroromeleya, moonanariha mapuro anyu oowaarya.

Kinoopattiha mooro eriyari anyu, yoowo onrowa woopahani.+

Kinimookhalihani ettuurwa enikhala vathi, ohoolo wa atthu ootheene anoowehani.

19 Atthu ootheene a maloko makina yaawo yoosuwelani, animoowehakani etikinihiwe ene.+

20 Kaahisuwelihiwa-tho moolumo a Yehova yaahimya wiira: 21 “Nyuwo mwaana a mutthu, nweheke oSiidoni,+ nave mulaleye eprofesia muhimyaka weiwo. 22 Muhimye wiira: ‘Etthu onihimya awe Pwiya Muulupalexa Yehova, tiila:

“Nyuwo muttetthe wa oSiidoni, miyo kinoowana ni nyuwo, nave kinoovuwihiwa eriyari anyu.

Atthu anoosuwela wiira miyo ka Yehova, okathi kinrowa aka woophukelani, ni okathi kinrowa aka oreerihiwa eriyari anyu.

23 Kinimookumiheryani ekwerere, nave mustaraatani mwanyu enoomwareela ephome.

Atthu ookhwa anoomorela eriyari anyu, okathi muttetthe anyu onrowa aya otupheliwa ni espaata* ipantta sootheene.

Nto atthu anoosuwela wiira miyo ka Yehova.+

24 “‘“Atthu a nloko na Isarayeli khanttikela-tho orukureriwa ni itthu soohaaxa, nnakhala ni miiwa soowereya,+ eyo piiyo, ale anaathanya. Nto atthu anoosuwela wiira miyo ka Pwiya Muulupalexa Yehova”’.

25 “‘Etthu onihimya awe Pwiya Muulupalexa Yehova, tiila: “Okathi kinrowa aka otthikela waathukumanya atthu a nloko na Isarayeli, kaakumihaka maloko yaamwara-mwariwe aya,+ awo anookireeriha ohoolo wa maloko.+ Nto awo anookhalaka mulaponi mwaya,+ kanvahale aka murumeyi aka Yakobe.+ 26 Anrowa okhalaka ni murettele,+ anrowa otekaka ipa saya ni anrowa waalaka miri saya sa ewuuva.+ Aayo, awo anrowa okhalaka ni murettele okathi kinrowa aka waaphukela atthu ootheene yaarukurenrye, yaawo anaathanya.+ Nto awo anoosuwela wiira miyo ka Yehova, Muluku aya”’”.

29 Eyaakha ya na muloko, mweeri wa namuloko, nihiku 12 na mweeri owo, kaahisuwelihiwa moolumo a Yehova yaahimya wiira: 2 “Nyuwo mwaana a mutthu, munweheke Farawo, mwene a wExiitu. Mulaleye eprofesia mmuhimyaka owo ni muhimyaka wExiitu wootheene.+ 3 Muhimye moolumo ala: ‘Etthu onihimya awe Pwiya Muulupalexa Yehova, tiila:

“Miyo kinoowana ni nyuwo Farawo, mwene a wExiitu.+

Nyuwo munlikana ni enama yuulupale ya mphareya, yeeyo yimpaathale mmuro Niilo.*+

 4 Masi miyo kinimoohelani acoolo mwaano mwanyu ni kinimwiiriha ihopa sa muro anyu Niilo, opharelela mmaapaliweni* mwanyu.

Miyo kinimookumihani mmuro mwanyu Niilo, vamosa ni ihopa sootheene sa muro Niilo sipharelenle mmaapaliweni mwanyu.

 5 Miyo kinimoohiyani moothakoni, vamosa ni ihopa sootheene sa muro anyu Niilo.

Nyuwo munoomorela vanlakani, nto khamunrowa ottottiwa wiira nvithiwe.+

Kinimwaavaha murutthu anyu axinama a mutakhwani ni axipalame a musulu wiira akhuure.+

Okathi yaalipana aya ni nyuwo, mwaahinteya.

Nave mwaahiiriha metto saya otteettheya”.+

8 “‘Tivo, etthu onihimya awe Pwiya Muulupalexa Yehova, tiila: “Miyo kinimooruuhelani espaata,*+ nto eyo enimwaamala-maliha atthu ni inama. 9 Elapo ya wExiitu enoothammwa ni khenrowa okhaliwaka.+ Nto awo anoosuwela wiira miyo ka Yehova, mwaha woowi moohimya* wiira: ‘Muro Niilo ti waawaka. Ti miyo kipanke’.+ 10 Nto kinniwana ni nyuwo, nave kinniwana ni muro anyu Niilo. Kinimwiiriha elapo ya wExiitu ohikhaliwa ni wuuma. Kinimwiiriha okhala othako woothaamiwa,+ okhuma oMigdoli+ orowa oSiyene,+ mpakha omukanoni wa wEthiyopia. 11 Khuuvo mutthu nnakhala inama sinrowa oviraka weiwo,+ nave elapo eyo khenrowa okhaliwaka mpakha iyaakha 40. 12 Miyo kinimwiiriha elapo ya wExiitu okhala elapo yootepa ohikhaliwa eriyari ya ilapo, nave kinimwiiriha ipooma saya ohikhaliwaka mpakha iyaakha 40.+ Nave kinoowoomolela atthu a wExiitu maloko makina ni kinimwaamwara-mwarya mulaponi”.+

13 “‘Etthu onihimya awe Pwiya Muulupalexa Yehova, tiila: “Nuumala iyaakha 40, kinimwaattikiha atthu a wExiitu, maloko amwara-mwariwe aya.+ 14 Kinimwaattikiha atthu a wExiitu weepotthani kaaroihaka elapo ya oPathiro,+ weiwo ayariwe aya. Nto weiwo anrowa okhala omwene ohinooneliwa vatthu. 15 Omwene wa wExiitu onrowa okhala mwaamukhaanixa ovikana omwene mukina. Nave khontthikela-tho owerya olamulela maloko makina.+ Miyo kinoomwiiriha okhala ootepexa oyeva vahinrowa awe owerya maloko makina.+ 16 Atthu a Isarayeli khantthikela-tho ororomela wExiitu.+ Etthu yiiraneyale elapo ya wExiitu, enrowa owuupuxeryaka atthu a Isarayeli etampi aya, mwaha woovekela okhaliheriwa ni atthu a wExiitu. Nto awo anoosuwela wiira miyo ka Pwiya Muulupalexa Yehova”’”.

17 Vano, eyaakha ya namuloko miili ni thanu na piili, mweeri woopacerya, nihiku noopacerya na mweeri owo, kaahisuwelihiwa moolumo a Yehova, yaahimya wiira: 18 “Nyuwo mwaana a mutthu, mwene Nabukodonosori*+ a oBabiloonia, aahiwiiriha anakhotto awe orowa owana ni atthu a oTiiro.+ Anakhotto awe, miru saya saahikhalana matari, nave makhata aya yaahisurupuwa.* Masi owo vamosa ni anakhotto awe, khiyaakhenle etthu mwaha wa orowa owana ni atthu a oTiiro.

19 “Tivonto, etthu onihimya awe Pwiya Muulupalexa Yehova, tiila: ‘Miyo kinonvahererya Nabukodonosori* mwene a oBabiloonia, elapo ya wExiitu.+ Nto owo onookuxa mihakhu saya, onoowaakha atthu itthu saya sootheene, ni onootuphela elapo eyo. Vano eyo tenrowa okhala esalaario ya anakhotto awe’.

20 “‘Nave miyo kinonvaha mwene owo elapo ya wExiitu wiira kimulive, okhala wiira aahirowa owaana ni oTiiro. Tthiri owo ookivarela muteko’.+ Pwiya Muulupalexa Yehova tonihimya.

21 “Nihiku nlo, kinoomukumiherya mutthu oowerya* nloko na Isarayeli,+ nto kinimoovahani eparakha yoolavula naawo. Vano awo anoosuwela wiira miyo ka Yehova”.

30 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mulaleye eprofesia mwiiraka: ‘Etthu onihimya awe Pwiya Muulupalexa Yehova, tiila:

“Mwiikhupanyeryeke muhimyaka wiira: ‘Nootakhaliwa, ninnaattamela nihiku!’

 3 Ninnaattamela nihiku, aayo, nihiku na Yehova nri vakhiviru.+

Nihiku nlo ninrowa okhala nihiku na meeku,+ okathi othanleliwe maloko.+

 4 Atthu a wExiitu animwiiviwa ni espaata,* vano atthu a wEthiyopia, animoova okathi atthu a wExiitu anrowa aya okhwa.

Mihakhu sa wExiitu sinookuxiwa, nave alisenso aya anoopwexakasiwa.+

 6 Etthu onihimya awe Yehova, tiila:

Awo animwiiviwa ni espaata elapo yeeyo, okhuma oMigdoli+ mpakha oSiyene’.+ Pwiya Muulupalexa Yehova tonihimya. 7 ‘Ilapo iyo sinrowa okhala sootepa othaamiwa ovikana ilapo sikina. Nave ipooma saya sinrowa okhala sootepa ohononiwa ovikana ipooma sikina.+ 8 Awo anoosuwela wiira miyo ka Yehova, okathi kinrowa aka okumiherya mooro wExiitu ni okathi anrowa aya onyakattiwa atthu ootheene anikhaliherya wExiitu. 9 Nihiku nlo, kinimwaaruma anamitthaka aka yaawo ankela orwa, wiira yaathukumelihe atthu oowiiroromela a wEthiyopia. Nihiku nlo, atthu a wExiitu animoova, okhala wiira nihiku nlo nnoophiya tthiri’.

10 “Etthu onihimya awe Pwiya Muulupalexa Yehova, tiila: ‘Kinoomala-maliha muttitthi wa atthu a wExiitu, kimurumeelaka Nabukodonosori, mwene a oBabiloonia.+ 11 Owo ni atoropa awe, yaawo ari maloko ootepexa otakhala,+ anooruuhiwa wiira apwetexe elapo eyo. Awo anookumiha ispaata saya wiira awane ni Exiitu, nto animwaasariha atthu ookhwa mulaponi-mmo.+ 12 Kinimwiiriha miro sa Niilo+ wuuma ni kinoovahererya* elapo eyo mmatatani mwa atthu ootakhala. Kinoowiiriha anamurwa omala-maliha elapo eyo, vamosa ni itthu sootheene siri memmo.+ Ti miyo Yehova kilavunle’.

13 “Etthu onihimya awe Pwiya Muulupalexa Yehova, tiila: ‘Miyo kinoomala-maliha ilatarato saya soohiirya* ni kinimwaamaliha amuluku a oNofi,*+ yaawo ahimpaka etthu. Nave khuuvo mukhulupale aahiiso mutthu onrowa ohala elapo ya wExiitu. Kinoowiiriha atthu woovaka elapo ya wExiitu.+ 14 Kinimwiiriha oPathiro ohikhaliwa,+ kinoopattiha mooro oSowani, nave kinoophukela muttetthe wa oNo.*+ 15 Kinoviruwela muttetthe wa oSini, yoowo ori opuro woolipihiwa wa wExiitu. Nave kinimwaapwetexa atthu a oNo. 16 Kinoopattiha mooro wExiitu, kinoowiiriha atthu a oSini woova, ni kinoopwetexa oNo. Nave oNofi* onootupheliwa othana eriyari! 17 Amiravo a wOni* ni a oPibesethi, animwiiviwa ni espaata. Nave atthu anikhala mpooma anooroihiwa weepotthani. 18 Nihiku nlo, oDafne onooriipela, okathi kinrowa aka wuntakasa miri siniteexaniwa miritti soolemela wExiitu.+ Owerya wootakhala wa Exiitu onoomala.+ Owo onookhuneeliwa ni meeku, nave atthu anikhala mittetthe saya saamukhaani, anooroihiwa weepotthani.+ 19 Kinoophukela wExiitu, nto awo anoosuwela wiira miyo ka Yehova’”.

20 Eyaakha ya namuloko nimosa, mweeri woopacerya, nihiku na neethanu nenli na mweeri owo, kaahisuwelihiwa moolumo a Yehova yaahimya wiira: 21 “Nyuwo mwaana a mutthu, miyo kihinta moono wa Farawo, mwene a wExiitu. Owo khonrowa-tho okhapeleliwa wiira openuwe, aahiiso khonrowa otthukiwa ni alikatura, wiira olipe vaniwerya awe orumeela espaata”.

22 “Tivonto, etthu onihimya awe Pwiya Muulupalexa Yehova, tiila: ‘Miyo kinoowana ni Farawo, mwene a wExiitu.+ Kinimunta miyoono sawe, eyo piiyo, ole woolipa ni woohilipa.+ Nave kinimwiiriha espaata wiikittha ntata nawe.+ 23 Kinoowoomolela atthu a wExiitu maloko makina, nave kinimwaamwarya-mwarya mulaponi.+ 24 Kinoolipiha miyoono* sa mwene a oBabiloonia,+ nave kinoohela espaata aka mmatatani mwawe.+ Kinimunta miyoono sa Farawo, nto owo onimunla vanceene ohoolo wawe,* ntoko mutthu ohanle okhwa. 25 Kinoolipiha miyoono sa mwene a oBabiloonia, masi miyoono sa Farawo sinimooceya. Okathi kinrowa aka onvahererya espaata aka mwene a oBabiloonia, awo anoosuwela wiira miyo ka Yehova. Nto owo onoorumeela espaata eyo, wiira otuphele elapo ya wExiitu.+ 26 Kinoowoomolela atthu a wExiitu maloko makina, nave kinimwaamwarya-mwarya mulaponi.+ Vano awo anoosuwela wiira miyo ka Yehova’”.

31 Eyaakha ya namuloko nimosa, mweeri wa neeraru, nihiku noopacerya na mweeri owo, kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mmuhimeerye Farawo mwene a wExiitu, ni muttitthi awe wa atthu,+ wiira:

‘Ti pani ori muulupale onlikana ni nyuwo?

 4 Maasi yaahiiriha mwiri owo wunnuwa vanceene, maasi oowiixerya yaahiiriha mwiri owo okhala woorakama.

Mapuro aniphattuwa maasi, yaahirukurerya opuro waaliwe aya mwiri owo.

Nave maasi yaanikhuwari miri sootheene sa mmatta.

 5 Tivonto, mwiri owo waari aya woorakama, ovikana miri sootheene sa mmatta.

 8 Khuuvo mwiri mukina wa eseeturu ori muxarti ya Muluku,+ waakhanle oolikanyihiwa ni mwiri owo.

Khuuvo mwiri mukina muxarti ya Muluku, waakhanle oolikanyihiwa ni oreera waya.

10 “Etthu onihimya awe Pwiya Muulupalexa Yehova, tiila: ‘Okhala wiira mwiri owo ti woorakama ni makukhu awe anniphiya mmeekuni, nave onniisoona mwaha wa orakama wawe, 11 miyo kinonvahererya mmatatani mwa namalamulela oowerya a maloko.+ Tthiri owo onoomuhukhumu, nave miyo kinoomukhootta mwaha wa otakhala wawe. 12 Anamurwa, atthu ootepa otakhala a maloko, animwiikittha mwiri owo, nave anoohiya omiyaakoni. Nto makukhu awe anoomorela moothakoni mootheene, nave iritta sawe sinimuntakaseya mapuro ootheene aniphattuwa maasi a mulaponi.+ Atthu ootheene a mulaponi anookhuma vathi va muuttutthi awe, ni anoohiya mwiri owo. 13 Axipalame ootheene a musulu anrowa okhalaka mweexaani mwawe. Nave inama sootheene sa mutakhwani sinrowa okhalaka mwiirittani mwaya simonre.+ 14 Eyo enimwiiraneya wiira ohikhale mwiri ori waattamela maasi, onrowa okhala woorakama aahiiso onrowa ophiya mmeekuni, ni wiira ohikhale mwiri onikhuwariwa saana, onrowa okhala woorakama ovikana meeku awo. Tthiri iyo sinimwiiviwa, sinoomoroxeliwa vathi, nave sinoovithiwa ntoko aniirihiwa aya atthu ookhwa’.

15 “Etthu onihimya awe Pwiya Muulupalexa Yehova, tiila: ‘Nihiku kinrowa aka wiiriha mwiri owo okhuruwela Mmahiye,* kinoowiiriha atthu oriipiwa murima. Tivo, kinookhuneela maasi oowiixa nave kinoottiyela mapuro aniphattuwa maasi, wiira ahikhumeke maasi manceene. Kinimwiiriha oLiibano oriipela mwaha wa mwiri owo, nave miri sootheene sa mutakhwani sinoonyaala. 16 Kinimwiiriha maloko othukumela mwaha wa onyakula onrowa okhumelela okathi mwiri owo onrowa awe omora, okathi yoowo kinrowa aka wiiriha okhuruwela Mmahiye* vamosa ni atthu ootheene anikhuruwela mulittini.* Nave miri sootheene siri mulittini moowiixa sirina maasi, sinookurunuxiwa murima, eyo piiyo, miri sootheene sa wEedeni,+ miri sooreera ni sootepa oloka sa oLiibano. 17 Iyo sookhuruwela Mmahiye* vamosa nuuwo, weiwo ari aya ale yiiviwe ni espaata,*+ vamosa ni ale yaamukhaliherya* yaawo yaakhala vathi va muuttutthi awe, eriyari ya maloko’.+

18 “‘Miri xeeni sa wEedeni saalikana ni ovuwa wanyu ni wunnuwa wanyu?+ Masi nyuwo munoomoroxeliwa vathi ni miri sa wEedeni. Nyuwo munrowa wummaathi ni atthu oohinnuwihiwa, yaawo yiiviwe ni espaata. Ela ti etthu enrowa omwiiraneela Farawo ni muttitthi awe wootheene wa atthu ari wExiitu’. Pwiya Muulupalexa Yehova tonihimya”.

32 Eyaakha ya namuloko nenli, mweeri wa namuloko nenli, nihiku noopacerya na mweeri owo, kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mwiipe nsipo na wiikhupanyerya nimmuhimya Farawo, mwene a wExiitu, mwiiraka:

 3 Etthu onihimya awe Pwiya Muulupalexa Yehova, tiila:

 7 Okathi munrowa anyu opwetexiwa, miyo kinookhuneela erimu, nave kinimwiiriha itheneeri oriipela.

11 Etthu onihimya awe Pwiya Muulupalexa Yehova, tiila:

‘Espaata ya mwene a oBabiloonia enimootuphelani.+

Awo anoomala-maliha wiixinnuwiha wa atthu a wExiitu, nave anoomala-maliha+ muttitthi wootheene wa atthu a wExiitu.

Awo animwiipa ahimyaka elapo ya wExiitu ni muttitthi wa atthu a weiwo’. Pwiya Muulupalexa Yehova tonihimya”.

17 Eyaakha ya namuloko nenli, nihiku na namuloko neethanu na mweeri ene yoowo,* kaahisuwelihiwa moolumo a Yehova yaahimya wiira: 18 “Nyuwo mwaana a mutthu, mukhupanyerye muttitthi wa atthu ori wExiitu, nave mwaaroihe vathi, opuro woowiixa wa elapo, akhale awo, anamwane axithiyana a maloko oowerya, vamosa ni ale anikhuruwela mulittini.*

19 “‘Nyuwo munuupuwela wiira mwa mutthu oolokexa waavikana akina? Nyuwo munimookhwa, nave munrowa wumpaathi ni atthu oohinnuwihiwa!’

20 “‘Awo anoomorela eriyari ya atthu yiiviwe ni espaata.+ Owo* oovahereriwa espaata. Mmukuxe ni muttitthi awe wa atthu ootheene ari wExiitu.

21 “‘Mmahiye* moowiixa, anakhotto ootupexa anoolavula nuuwo vamosa ni ale animukhaliherya. Tthiri awo anookhuruwela mmahiye-mmo, animumpaathi ni ale oohinnuwihiwa, yaawo yiiviwe ni espaata. 22 Asiiria ari weiwo vamosa ni muttitthi aya wootheene. Mahiye a asiiria aamurukurerya mwene aya, ootheene aya akhwiiye espaata.+ 23 Mahiye awe ari mulittini* moowiixa, nave muttitthi wootheene wa atthu wiiviwe ni espaata, ori mukerekhere mwa mahiye awe, okhala wiira okathi yaari aya akumi, yaaniwiiriha atthu woova.

24 Elami+ ori weiwo vamosa ni muttitthi awe wootheene, orukurenrye ene mahiye awe, ootheene aya akhwiiye espaata. Awo anoorowa ni ale oohinnuwihiwa vathi va elapo, eyo piiyo, ale yaawiriha atthu woova, okathi yaari aya akumi. Vano, awo animuuliwa muru ni ale anikhuruwela mmahiye. 25 Atthu a wElami ahookhwa* vamosa ni atthu akina yiiviwe, ohela muhina mittitthi sootheene sa atthu a wElami sirukuryenrye mahiye aya. Ootheene aya toohinnuwihiwa, ni ahiiviwa ni espaata, okhala wiira okathi yaari aya akumi, yaaniwiiriha atthu woova. Awo animuuliwa muru vamosa ni ale anikhuruwela mmahiye. Elami oopwehiwa eriyari ya atthu ookhwa.

26 “‘Weiwo ookhala Mexeki ni Tubali,+ vamosa ni mittitthi saya sa atthu. Mahiye aya* aroomurukurerya. Ootheene aya toohinnuwihiwa ni ahiiviwa ni espaata, okhala wiira okathi yaari aya akumi, yaaniwiiriha atthu woova. 27 Kiireke awo khanrowa wummaathi ni anakhotto ootupa oohinnuwihiwa, yaawo yiiviwe akhuruwela Mmahiye* vamosa ni ikaruma saya sa ekhotto? Ispaata saya sinoopwehiwa vathi va miru saya,* nave itampi saya sinoopwehiwa vathi va makhuva aya, okhala wiira anakhotto ala ootupa, yaaniwiiriha atthu woova, okathi yaari aya akumi. 28 Masi nyuwo, munoonyakattiwa eriyari ya ale oohinnuwihiwa, nave munrowa wummaathi vamosa ni ale akhwiiye espaata.

29 “‘Edomi+ ori weiwo, vamosa ni mamwene awe ni makhulupale awe ootheene. Nnaamwi ari ene oowerya, awo aariheliwa eriyari ya atthu yiiviwe ni espaata. Nave-tho, awo animummaathi vamosa ni ale oohinnuwihiwa,+ ale anirowa mulittini.

30 “‘Makhulupale ootheene a onorti ari weiwo, ni atthu ootheene a oSiidoni,+ yaawo akhurunwe yuuliwe ene muru vamosa ni ale yiiviwe, nnaamwi yaawoopopiha atthu ni owerya waya. Awo anrowa wummaathi ni ale oohinnuwihiwa, yaawo akhwiiye espaata. Animuuliwa muru vamosa ni ale anikhuruwela mmahiye.

31 “‘Farawo onimoona itthu iya sootheene ni onoomaaliheya mwaha wa ele ewiiranenle atthu a muttitthi awe.+ Farawo ni anakhotto awe ootheene, animwiiviwa ni espaata’. Pwiya Muulupalexa Yehova tonihimya.

32 “Pwiya Muulupalexa Yehova onihimya wiira: ‘Farawo ni atthu a muttitthi awe wootheene anoovithiwa vamosa ni atthu oohinnuwihiwa, ni ale akhwiiye espaata, okhala wiira okathi aari awe mukumi, aaniwiiriha atthu woova’”.

33 Vano kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mwaaleele atthu anyu+ wiira:

“‘Nkahaya muupuwele vaakhanle wiira miyo kaamuruuha espaata* elapo eyo,+ nto atthu ootheene anikhala elapo eyo anamuthanla mutthu wiira okhale mulipa-oowehaweha, 3 vano owo owehaka-ru espaata eyo erwaaka, onnoopa nlope wiira aalopole atthu.+ 4 Akhala mutthu oniiwa oruma wa nlope, masi ohinacala ele onilopoliwa awe,+ espaata enarwa enamwiiva, owo mmansawe onookhalana mulattu mwaha wa okhwa wawe.+ 5 Mutthu owo aahiiwa oruma wa nlope, masi khaavarihenle muteko ele aalopoliwe awe. Nto onookhalana mulattu mwaha wa okhwa wawe. Vaakhanle wiira aahiiwelela ele aalopoliwe awe, aamoopola okumi awe.

6 “‘Masi, vakhala wiira mulipa-oowehaweha onooweha espaata erwaaka, ohinarumiha nlope,+ mpakha atthu ohilopoliwa, nto espaata eyo enamwiiva mutthu, mutthu owo onimookhwa mwaha wa etampi awe. Masi mulipa-oowehaweha onookhalana mulattu mwaha wa mutthu ole okhwiiye’.*+

7 “Vano nyuwo mwaana a mutthu, miyo kihoothanlani wiira mukhale mulipa-oowehaweha a atthu a nloko na Isarayeli. Okathi munrowa anyu wiiwa moolumo anikhuma mwaano mwaka, muhaana waaleela etthu kinaalopola aka.+ 8 Kamuleela mutthu ootakhala wiira: ‘Nyuwo mutakhali, tthiri munimookhwa!’+ masi nyuwo muhimulopola wiira ottharuwe mweettelo awe wootakhala, owo onimookhwa ntoko mutakhali mwaha wa etampi awe.+ Masi miyo kinimoohimyani okhalana mulattu mwaha wa okhwa wawe. 9 Masi, mwamulopola mutthu owo ootakhala wiira ottharuwe mweettelo awe, nto onakhootta ottharuwa, owo onimookhwa mwaha wa etampi awe.+ Nto nyuwo munimoopola okumi anyu.+

10 “Vano nyuwo mwaana a mutthu, mwaahimeerye atthu a nloko na Isarayeli wiira: ‘Nyuwo munihimya wiira: “Ohiiwelela wahu ni itampi sahu sinninlemela, nave sinniniiriha wootta.+ Niireke nlelo nnookhala akumi?”’+ 11 Mwaahimeerye wiira: ‘Etthu onihimya awe Pwiya Muulupalexa Yehova, tiila: “Kinnilaphela okumi aka wiira, khonikisivela onweha mutakhali okhwaaka,+ masi onikisivela onweha mutakhali ohiyaka mweettelo awe woohiloka+ wiira okhaleke mukumi.+ Nyuwo atthu a nloko na Isarayeli, muttharuwe, muttharuwe mweettelo anyu wootakhala.+ Muntthuna okhwela-ni?”’+

12 “Nyuwo mwaana a mutthu, mwaaleele atthu wiira: ‘Naxariya attheka, miteko sawe sa xariya khasinrowa omoopola.+ Nave otakhala wa mutakhali, khonrowa ommoroxa okathi owo onrowa awe ohiya otakhala wawe.+ Nihiku naxariya onrowa awe opaka etampi,+ khonrowa okhala mukumi mwaha wa exariya awe. 13 Miyo kamuhimeerya naxariya wiira: “Tthiri nyuwo munookhalaka mukumi”, nto owo onaroromela exariya awe ni onapaka etthu yoohiloka,+ khasivo miteko sawe sa xariya sinrowa wuupuweliwa. Masi owo onimookhwa mwaha wa etthu yoohiloka opanke awe.+

14 “‘Kamuhimeerya mutakhali wiira: “Tthiri nyuwo munimookhwa”, nto owo onattharuwa etampi awe, onapaka etthu ya xariya ni yooloka,+ 15 onahokoloxa etthu eemexeriwe awe,+ onattikiha ele yiiyale awe+ ni oneettela sooruma saka siniphwanyiha okumi, ohinapaka etthu yoohiloka, tthiri onookhalaka mukumi.+ Owo khonrowa okhwa. 16 Khonrowa waakhula mwaha wa itampi opanke awe.+ Mwaha woopaka etthu ya xariya ni yooloka, tthiri onookhalaka mukumi’.+

17 “Masi, atthu anyu anihimya wiira: ‘Ephiro ya Yehova khahiyo ya xariya’, variki iphiro saya ti sihikhanle sa xariya.

18 “Akhala wiira naxariya onoohiya weettela exariya, onapaka etthu yoohiloka, owo ohaana okhwa mwaha wa yeeyo.+ 19 Masi, akhala wiira mutakhali onoohiya otakhala wawe, nto onapaka etthu yooloka ni ya xariya, owo onookhala mukumi.+

20 “Masi nyuwo moohimya wiira: ‘Ephiro ya Yehova khahiyo ya xariya’.+ Nyuwo atthu a nloko na Isarayeli, miyo kinomphukela khula mmosa a nyuwo, kittharaka miteko sawe”.

21 Eyaakha ya namuloko nenli niri ene weepotthani, mweeri wa namuloko, nihiku na neethanu na mweeri owo, mulopwana mmosa ooponwe oYerusalemu, aahirwa olavula ni miyo,+ onakileela wiira: “Epooma yookuxiwa!”+

22 Ohiyu waavinre, mulopwana ole ooponwe ohinatthi ophiya, ntata na Yehova naahikirweela. Muluku aahihula eyano aka ohinatthi mulopwana ole ophiya voosiisu. Siiso eyano aka yaahihuleya, nto miyo kaahipacerya olavula.+

23 Kaahisuwelihiwa moolumo a Yehova yaahimya wiira: 24 “Nyuwo mwaana a mutthu, atthu anikhala epooma ele epwetexiwe,+ annilavula etthu ahimyaka elapo ya wIsarayeli, yiiraka: ‘Abrahamu aari mekhawe, hata vari siiso, aahikuxa elapo ela.+ Hiyo khanireere, tthiri elapo ela noovahiwa ntoko etthu nihiyeriwe ahu’.

25 “Mwaaleele wiira: ‘Etthu onihimya awe Pwiya Muulupalexa Yehova, tiila: “Nyuwo munnikhuura enama ni ephome aya.+ Mweemexe muru, nwehe ilatarato sanyu soohiirya.* Nyuwo nlelo munnithipelela owiiva atthu.+ Xeeni mukhanle anyu ookuxa elapo ela? 26 Nyuwo munniroromela espaata* anyu,+ munnipaka itthu sootepa onanara, nave khula mmosa a nyuwo onnirupa ni muthiyana a mulopwana mukina.+ Tivonto, xeeni mukhanle anyu ookuxa elapo ela?”’+

27 “Mwaaleele wiira: ‘Etthu onihimya awe Pwiya Muulupalexa Yehova, tiila: “Kinnilaphela okumi aka wiira, ale anikhala ipooma soothaamiwa, animwiiviwa ni espaata. Ale anikhala opuro woowaataleya, anookhuuriwa ni inama sa mutakhwani, nave ale anikhala mapuro oolipihiwa ni anikhala mukhukuni, animookhwa eretta.+ 28 Kinimwiiriha elapo ela okhala othako ohinikhaliwa,+ nave wiixinnuwiha waya onoomala. Miyaako sa Isarayeli sinoothaamiwa,+ nto khuuvo onrowa oviraka weiwo. 29 Awo anoosuwela wiira miyo ka Yehova, okathi kinrowa aka wiiriha elapo ela okhala othako woothaamiwa,+ mwaha wa itthu sootheene sootepa onanara apanke aya”’.+

30 Vano nyuwo mwaana a mutthu, atthu anyu annivaanela yoohimyakani nyuwo, mukerekhere mwa ixiri ni mwa mikhora sa ipa.+ Awo annileelana yaawo-ru, khula mmosa ni munnawe, yiiraka: ‘Murwe, niwiriyane moolumo anikhuma wa Yehova’. 31 Awo anoothukumana ohoolo wanyu, ntoko atthu aka. Animwiiwa moolumo anyu, masi khanrowa ovarihela muteko.+ Annilavula asiveliwe ene,* masi vamurimani vaya aniphavela ophwanya musurukhu voohiroromeleya. 32 Nyuwo mwa nsipo na ophentana para awo, nenno niipiwe ni nsu nooreera, nittharihiwaka ni ekaruma ya isipo erina mikhoyi. Awo animwiiwa moolumo anyu, masi khuuvo onrowa opaka etthu. 33 Okathi itthu iyo sinrowa aya wiiraneya, anoosuwela wiira aahikhala profeta eriyari aya. Itthu iyo sinimwiiraneya tthiri”.+

34 Kaahisuwelihiwa-tho moolumo a Yehova, yaahimya wiira: 2 “Nyuwo mwaana a mutthu, mulaleye eprofesia mwaahimyaka amakampusi a wIsarayeli. Mulaleye muhimyaka wiira: ‘Etthu onihimya awe Pwiya Muulupalexa Yehova, tiila: “Mootakhaliwa nyuwo amakampusi a Isarayeli,+ muniikhapelela mmansinyu paahi! Nyuwo mwaahaana okhapelelaka ipwittipwitthi, seiyo amakampusi anireerela aya okhapelelaka.+ 3 Munnikhuura ekortuura, munniwara ikuwo sootthaviwa, nave munnihita enama yootepa oneneva,+ munakhuura. Masi khamunikhapelela ipwittipwitthi.+ 4 Khamwaalipinhe iye saatteettheyale, nnakhala khamwaathokorenrye iye saawereiwa. Nave iye saavulalihiwe, khamwaatthunkwe makhwatta aya, khimwaahokolonxe iye saahapunwe, khamwaavyale iye saarimenle.+ Ohiya-vo, nyuwo mwaahikhapelela ni owali, nave mwaanipuherya.+ 5 Iyo saahimwara-mwareya mwaha woohikhala makampusi.+ Saahimwara-mwareya, nave saahikhala eyoolya ya inama sootheene sa mutakhwani. 6 Ipwittipwitthi saka saahimwareela mmiyaakoni mootheene ni mmattumuxani mootheene. Iyo saahimwara-mwareya mulaponi mootheene. Nto khuuvo mutthu onaavya nnakhala onirowela.

7 “‘“Tivonto, nyuwo amakampusi, mwiiwe moolumo a Yehova, ani: 8 ‘Pwiya Muulupalexa Yehova, onihimya wiira: “Kinnilaphela okumi aka wiira, okhala wiira ipwittipwitthi saka soovariwa, sikhala eyoolya sa inama sootheene sa mutakhwani, mwaha woohikhala makampusi, ni okhala wiira amakampusi aka khiyaavyale ipwittipwitthi saka, ohiya-vo, awo yaikhapelela mekhaya ni khiyaalyiha ipwittipwitthi saka”’, 9 tivonto nyuwo amakampusi, mwiiwe moolumo a Yehova. 10 Etthu onihimya awe Pwiya Muulupalexa Yehova, tiila: ‘Miyo kinoowana ni amakampusi, ni animwaakhula mwaha wa moota anikhapelela aya ipwittipwitthi saka.* Kinoowoomola wiira ahilyiheke* ipwittipwitthi saka,+ nave amakampusi awo khanrowa-tho wiikhapelelaka mmansaya. Kinimoopola ipwittipwitthi saka wiira sihikhuuriweke naawo’”.

11 ‘“Tivonto, etthu onihimya awe Pwiya Muulupalexa Yehova, tiila: “Miyo kiri va! Miyo mmansaka kinimwaavya ni kinookhapelela ipwittipwitthi saka.+ 12 Kinookhapelela ipwittipwitthi saka ntoko oniira awe makampusi, yoowo ophwanyale ipwittipwitthi sawe saamwareyale, nto onalyiha.+ Kinimoopola ipwittipwitthi iyo mapuro ootheene saamwarenle aya, nihiku na meeku ni meeku ooriipela.+ 13 Kinookumiha ipwittipwitthi saka eriyari ya atthu, kinoothukumanya kikumihaka ilapo sikina, kiroihaka mulaponi mwaya. Kinrowa olyihaka mmiyaakoni sa wIsarayeli,+ mukerekhere mwa miro ni waattamela mapuro ootheene anikhaliwa a elapo eyo. 14 Kinrowa olyihaka mapuro ari malaxi ooripelela, nave sinrowa olyaaka mmiyaakoni soorekama sa wIsarayeli.+ Weiwo, iyo sinrowa wumpaathiki mapuro ari malaxi ooripelela.+ Nave sinrowa olyaaka mapuro ooreerexa ari miyaako sa wIsarayeli”.

15 “‘Pwiya Muulupalexa Yehova onihimya wiira: “Miyo mmansaka kinoolyiha ipwittipwitthi saka,+ nave kinimwiiriha ophumurya.+ 16 Kinimwaavya iye sirimenle,+ kinoohokoloxa iye sihapunwe, kinootthukwa iye sivulanle, kinoolipiha iye sitteettheyale. Masi kinoopwetexa iye sooneneva ni iye soolipa. Miyo kinoophukela seiyo ni kinoovaha ehukhumu eniphwanelela”.

17 “‘Masi nyuwo ipwittipwitthi saka, etthu kinihimya aka miyo, Pwiya Muulupalexa Yehova, tiila: “Kinoophukela ipwittipwitthi saka, ohela muhina ipwittipwitthi saka soolopwana. Nave-tho kinoophukela ipuri soolopwana.+ 18 Niireke khivanoophiyeryani olya mapuro ari malaxi ooripelela? Kiireke mwaahaana onyakelasa malaxi awo yaahanle? Nave nuumala owurya maasi ooreera, niireke mwaahaana onyakela maasi awo wiira muutuwanyerye? 19 Niireke ipwittipwitthi saka sihaana olya malaxi munyakelanse anyu ni owurya maasi muutuwanyenrye anyu?”

20 ‘“Tivonto, etthu Pwiya Muulupalexa Yehova onihimeerya awe ipwittipwitthi iyo, tiila: “Miyo kiri va! Miyo mmansaka kinoophukela epwittipwitthi yooneneva ni yoowootta, 21 okhala wiira nyuwo mwaanithipelela okakha ni erutthu anyu, ni mwaanithipelela okhumula ni manyaka anyu ipwittipwitthi sootheene saawereiwa, ni mwaahimwarya-mwarya ilapo sikina. 22 Kinimoopola ipwittipwitthi saka, nto khasinrowa okhuuriwa ni inama sikina.+ Kinoophukela ipwittipwitthi saka sootheene. 23 Miyo kinoomukumiherya makampusi aka mmosa, yoowo onrowa okhapelelaka ipwittipwitthi iyo,+ eyo piiyo, murumeyi aka Davidi,+ yoowo onrowa olyihaka. Owo tonrowa olyihaka ni tonrowa okhala makampusi aya.+ 24 Miyo Yehova, kinrowa okhala Muluku aya,+ nave murumeyi aka Davidi, onrowa okhala muhooleli aya.+ Ti miyo Yehova, kinilavula.

25 “‘“Miyo kinoopaka nivarihano na murettele ni ipwittipwitthi iyo.+ Kinimoomola mulaponi-mmo inama soowali sa mutakhwani,+ wiira ipwittipwitthi iyo sikhaleke ni murettele moothakoni, ni simmaathiki mutakhwani.+ 26 Kinimwiiriha ipwittipwitthi iyo vamosa ni opuro orukurenrye nttumuxa naka, waakhela mareeliho.*+ Kinimwiiriha epula orupa okathi wooreerela. Kinimoomwarexelani mareeliho ntoko epula.+ 27 Miri sa mutakhwani sinimwiima mihokorokho, etthaya enooruwerya,+ nave atthu aka anookhalaka ni murettele mulaponi. Awo anoosuwela wiira miyo ka Yehova, okathi kinrowa aka wuntaka miri siniteexaniwa miritti soolemela+ ni okathi kinrowa aka owoopola mmatatani mwa ale yaakhaliha ipottha. 28 Awo khanrowa-tho otupheliwaka ni maloko makina, nave inama soowali sa mutakhwani, khasinrowa waakhuura. Anookhalaka ni murettele, khuuvo onrowa owoopopihaka.+

29 “‘“Kinimwaavaha opuro onrowa osuweliwa vanceene mwaha wa itthu siniruweriwa opuro owo. Nave khanrowa okhwaaka etala mulaponi,+ nnakhala khanrowa wuulihihiwa muru ni maloko makina.+ 30 Etthu onihimya awe Pwiya Muulupalexa Yehova, tiila: ‘Vano awo anoosuwela wiira miyo, Yehova Muluku aya, kiri ni yaawo. Nave, anoosuwela wiira awo, eyo piiyo, atthu a nloko na Isarayeli, tawaka”’.+

31 “Pwiya Muulupalexa Yehova onihimya wiira: ‘Nyuwo mwa ipwittipwitthi saka+ kinikhapelela aka. Miyo ka Muluku anyu, nave nyuwo mwa apinaatamu paahi’”.

35 Kaahisuwelihiwa-tho moolumo a Yehova, yaahimya wiira: 2 “Nyuwo mwaana a mutthu, murukunuwe nweheke mpantta wa omiyaakoni wa oSeyiri,+ mulaleye eprofesia enihimya muttetthe owo.+ 3 Muhimeerye muttetthe owo wiira: ‘Etthu onihimya awe Pwiya Muulupalexa Yehova, tiila: “Nyuwo muttetthe wa omiyaakoni wa oSeyiri, miyo kinniwana ni nyuwo. Kinimookola ntata naka wiira kiwane ni nyuwo, nave kinoowiirihani okhala muttetthe ohinikhaliwa.+ 4 Kinimwiiriha ipooma sanyu okhala milepe,* nave nyuwo munoothatuwa muttetthe ohinikhaliwa.+ Nto munoosuwela wiira miyo ka Yehova. 5 Nyuwo mwaahaanyokha vanceene+ aisarayeli, mwaahaavahererya wiira yiiviwe ni espaata* nihiku yaakhumelenle aya ehasara, aayo, nihiku yaavahiwe aya ehukhumu yookiserya”’.+

6 “Pwiya Muulupalexa Yehova, onihimya wiira: ‘Kinnilaphela okumi aka wiira, kihoothanlelani okhwa, nave nyuwo khamunrowa woopowa.+ Okhala wiira mwaahiwiiriha okhwa ale mwaanyokha anyu, nave-tho nyuwo munrowa okhwa.+ 7 Kinimwiiriha muttetthe wa omiyaakoni wa oSeyiri okhala nipuro nihinikhaliwa.+ Nave kinoowiiva atthu ootheene anivira muttetthe owo. 8 Kinoosariha mmiyaakoni mwa muttetthe owo mirutthu sa atthu yiiviwe. Ale anrowa wiiviwa ni espaata anoosareya mmattumuxani mwanyu, mmaxepani mwanyu ni mmiro sanyu sootheene. 9 Miyo kinoowiirihani ohikhaliwaka mahiku ootheene. Nave ipooma sanyu khasinrowa okhaliwaka.+ Nto nyuwo munoosuwela wiira miyo ka Yehova’.

10 “Nyuwo moohimya wiira: ‘Maloko ala manli ni ilapo iya piili,+ sinrowa okhala sawaka, nave nnookuxa soopiili iya’, hata Yehova ori ene weiwo. 11 Vano etthu onihimya awe Pwiya Muulupalexa Yehova, tiila: ‘Kinnilaphela okumi aka wiira, kinimoottikiheryani etthu emosa-ru, mwaha wa onanariwa wanyu naawo,+ mwaha wa owunlela wanyu ehace ni waanyokha wanyu. Nto kinimwiisuweliha wa awo, okathi kinrowa aka woophukelani. 12 Nyuwo munoosuwela wiira miyo Yehova, kihiiwa itthu sootheene sooveeha mulavunle anyu muhimyaka miyaako sa wIsarayeli, okathi mwaahimmye anyu wiira: “Miyaako iya khasinrowa okhaliwaka, nave noovahereriwa wiira nipwetexe”. 13 Mookilavulela moolumo ootakhaliha mwiisoonaka. Nave muhincererya moolumo anyu ooruwana mukihimyaka miyo.+ Nto kihiiwa itthu sootheene’.

14 “Etthu onihimya awe Pwiya Muulupalexa Yehova, tiila: ‘Atthu ootheene a elapo ela anootteeliwa murima okathi kinrowa aka owiirihani okhala elapo ehinikhaliwa, 15 siisaale ntoko mwaatteeliwe anyu murima, okathi nloko naka Isarayeli naapwetexiwe aya. Ti siiso kinrowa aka owiirelani.+ Nyuwo muttetthe wa omiyaakoni wa oSeyiri, aayo, elapo yootheene ya wEdomi,+ munrowa okhala milepe. Vano munoosuwela wiira miyo ka Yehova’”.

36 “Nyuwo mwaana a mutthu, mulaleye eprofesia muhimyaka miyaako sa wIsarayeli, wiira: ‘Nyuwo miyaako sa wIsarayeli, mwiiwe moolumo a Yehova. 2 Etthu onihimya awe Pwiya Muulupalexa Yehova, tiila: “Awanani annilavula, yoohimyakani nyuwo wiira: ‘Ahee! Hata mapuro oottukhuwa a khalai, tawihu!’”’+

3 “Tivo, mulaleye eprofesia, mwiiraka: ‘Etthu onihimya awe Pwiya Muulupalexa Yehova, tiila: “Okhala wiira awo ahootuphelani ipantta sootheene ni aawiirihani okhala muttetthe ohinikhaliwa, atthu yooponwe* a maloko makina aniphavela wiira mukhale awaya. Awo annoolavulani ni anniwootheryani.+ 4 Tivo, nyuwo miyaako sa wIsarayeli, mwiiwe moolumo a Pwiya Muulupalexa Yehova. Ela ti etthu onihimya awe Pwiya Muulupalexa Yehova, ohimyaka miyaako, mattumuxa, mapuro aniphattuwa maasi, maxepa, mapuro ahinikhaliwa,+ ipooma sinyanyaliwe, seiyo sikuxiwe ni siveehiwe ni maloko a atthu yooponwe, yaawo yoorukurenryeni.+ 5 Etthu onihimya awe Pwiya Muulupalexa Yehova, ohimyaka itthu iyo, tiila: ‘Miyo kinimwaalamula atthu a maloko yooponwe ni atthu ootheene a wEdomi ni oviruwa waka ompatta ntoko mooro.+ Awo annitteeliwa murima vanceene ni anninyohola+ ahimyaka wiira elapo aka ti yaawaya, yiirelaka otuphela mapuro anilyihiwa inama ni okuxa mapuro awo’”’.+

6 “Nto mulaleye eprofesia muhimyaka elapo ya wIsarayeli, muhimyaka miyaako ni mattumuxa, muhimyaka mapuro aniphattuwa maasi ni maxepa, wiira: ‘Etthu onihimya awe Pwiya Muulupalexa Yehova, tiila: “Mwiiwe! Kinimwaaleela etthu enrowa owiiraneela kinanariwe ene vanceene”’.+

7 “Etthu onihimya awe Pwiya Muulupalexa Yehova, tiila: ‘Miyo kinnivenxa ntata naka ni kinnilapha wiira maloko yoorukurenryeni animwiixuulihiha muru.+ 8 Masi nyuwo, miyaako sa wIsarayeli, munookhalana miri sirina iritta sinceene ni siimale mihokorokho sinceene para atthu aka aisarayeli,+ okhala wiira anootthika voohipisa. 9 Miyo kiri ni nyuwo, nave kinootthikela woowehani. Nyuwo munootthikela olimmwa ni waaliwa ipyo. 10 Miyo kinoowuncererya atthu anyu, eyo piiyo, atthu ootheene a nloko na Isarayeli, aayo, ootheene aya. Ipooma sinootthikela okhaliwa,+ nave milepe sinootthikela* otekiwa etthu.+ 11 Tthiri, miyo kinoowuncererya atthu anyu ni inama sanyu.+ Awo animuncerereya ni anookhala oowaatta. Vano kinimwiiriha elapo anyu okhaliwaka ntoko yaari aya khalai,+ nave kinoowiirihani otepaka okhala saana ovikana khalai.+ Nto nyuwo munoosuwela wiira miyo ka Yehova.+ 12 Miyo kinoowiiriha atthu aka, eyo piiyo, atthu aka aisarayeli, okhalaka mulaponi mwanyu. Nto awo anookuxa elapo anyu.+ Nyuwo munrowa okhala etthu ehiyeriwe aya, nave anaaya khantthikela-tho okhwa mwaha wa nyuwo’”.+

13 “Etthu onihimya awe Pwiya Muulupalexa Yehova, tiila: ‘Nyuwo munnihimeeriwa wiira: “Nyuwo mwa elapo enaakhuura atthu ni eniiriha maloko ohaayara anamwane”’. 14 ‘Tivo, nyuwo khamuntthikela-tho waakhuura atthu nnakhala wiiriha maloko ohikhalana anamwane’. Pwiya Muulupalexa Yehova tonihimya. 15 ‘Miyo nkinoohiyani-tho nveehiwaka ni maloko, aahiiso mutheiwaka ni atthu.+ Nave khamuntthikela-tho owiiriha atthu a maloko anyu omora’. Pwiya Muulupalexa Yehova tonihimya”.

16 Kaahisuwelihiwa-tho moolumo a Yehova, yaahimya wiira: 17 “Nyuwo mwaana a mutthu, okathi atthu a nloko na Isarayeli yaakhala aya elapo aya, awo yaahiiriha elapo eyo okhala yoohiloka mwaha wa mweettelo aya ni itthu yaapaka aya.+ Vamaithoni vaka, mweettelo aya waari woohiloka ntoko ephome enimukhuma muthiyana ori mmweerini.+ 18 Nto miyo kaahaaviruwela vanceene mwaha wa atthu yaawiivale aya mulaponi mme,+ nave mwaha wa onanariha elapo ele ni ilatarato saya soohiirya.*+ 19 Vano miyo kaahiwoomolela maloko makina ni kaahaamwarya-mwarya mulaponi.+ Nave kaahaaphukela kittharaka mweettelo aya ni itthu yaapaka aya. 20 Okathi yaaroihiwe aya maloko awo, atthu yaaniveeha nsina naka noowaarya+ yaahimyaka yaawo, ariki: ‘Ala atthu a Yehova, masi aahiya elapo aya’. 21 Tivonto, miyo kinoothokorerya nsina naka noowaarya, nenno atthu a nloko na Isarayeli aveehale aya, maloko aroihiwe aya”.+

22 “Tivo mwaaleele atthu a nloko na Isarayeli wiira: ‘Etthu onihimya awe Pwiya Muulupalexa Yehova, tiila: “Nyuwo atthu a nloko na Isarayeli, miyo nkinipaka eyo mwaha wa nyuwo, masi kinipaka eyo mwaha wa nsina naka noowaarya, nenno nveehale anyu, maloko muroihiwe anyu”’.+ 23 ‘Tthiri miyo kinooreeriha nsina naka nuulupale,+ nenno ninanarihiwe ni maloko, nave-tho nenno munanarinhe anyu. Nto atthu a maloko anoosuwela wiira miyo ka Yehova,+ okathi kinrowa aka owooniherya koorumeelakani nyuwo, wiira miyo ka Muluku oowaarya’. Pwiya Muulupalexa Yehova tonihimya. 24 Kinimookumihani mmalokoni muri anyu, kinimoottikihani ilapo sootheene, nto kinimoottikiheryani elapo anyu.+ 25 Kinimootathelani maasi ooreera, nto nyuwo munookhala ooloka.+ Kinimooreerihani ni kinoomala-maliha+ ilatarato sanyu sootheene soonanara.+ 26 Miyo kinimoovahani murima musya,+ nave kinoowiirihani okhalana muupuwelo musya.+ Mweerutthuni mwanyu kinookumiha murima woolipa ntoko nluku,+ nave kinimoovahani murima woowoolowa.* 27 Kinoorumeela ikuru saka wiira kituruke muupuwelo anyu, nave kinoowiirihani weettela malamulo aka.+ Nyuwo munimwiiwelela ni weettela moolumo aka oophukela. 28 Nto nyuwo munrowa okhalaka elapo kaavanhe aka amuhavinre anyu. Nyuwo munrowa okhala atthu aka, nave miyo kinrowa okhala Muluku anyu’.+

29 ‘“Kinimookhaliheryani wiira muhitthikele-tho ovara itthu soohiloka. Kinimwiiriha ipyo wunnuwa ni waatta. Nave nkinrowa wookumiheryani etala.+ 30 Kinimwiiriha miri wiima mihokorokho sinceene, nave kinimwiiriha imatta oruwerya vanceene maloko makina, wiira nyuwo muhuuliwe muru mwaha wa ovoliwa etala.+ 31 Nto nyuwo munimuupuwela mweettelo anyu wootakhala, ni miteko sanyu soonanara. Nyuwo munimwiithanyaka mwaha wa itampi sanyu ni miteko sanyu soonanara.+ 32 Masi musuwele wiira: Miyo nkinipaka etthu ela mwaha wa nyuwo.+ Masi nyuwo atthu a nloko na Isarayeli, muuliweke muru ni mooneke ehaaya mwaha wa mweettelo anyu’. Pwiya Muulupalexa Yehova tonihimya.

33 “Etthu onihimya awe Pwiya Muulupalexa Yehova, tiila: ‘Nihiku kinrowa aka omaliha itampi sanyu sootheene, kinimwiiriha ipooma sanyu okhaliwa,+ nave milepe sanyu sinootthikela otekiwa etthu.+ 34 Elapo yahaakhaliwa, yeeyo yaawehiwa ni atthu ootheene yaavira, enoolimmwaka. 35 Atthu anrowa ohimyaka wiira: “Elapo yeele yahaakhaliwa, vano enlikana ni exarti ya wEedeni.+ Nave ipooma seiye saakhalihiwe milepe, sahaakhaliwa ni saapwexakasiwe, vano ti soolipihiwa ni sinnikhaliwa”.+ 36 Nave maloko ahanle yaawo yoorukurenryeni, anoosuwela wiira miyo, Yehova, kooteka ipooma saapwexakasiwe, nave kihaala miri elapo yahaakhaliwa. Ti miyo Yehova, kilavunle ni kipanke etthu eyo’.+

37 “Etthu onihimya awe Pwiya Muulupalexa Yehova, tiila: ‘Kinooweemererya atthu a nloko na Isarayeli okivekela wiira kiwiirihe okhala oowaatta ntoko nikoto na inama . 38 Mittitthi sa atthu sinirwa mpooma, sinlikana ni mittitthi sa ale oowaarya ni mittitthi sa oYerusalemu* okathi wa ifesta saya.+ Ipooma saahanle milepe-ru, sinoosareya atthu.+ Nto awo anoosuwela wiira miyo ka Yehova’”.

37 Owerya wa Yehova waahikirweela. Nto orumeelaka ikuru sawe, Yehova aahikikuxa okeemexa eriyari ya nxepa,+ nenlo naasareyale makhuva. 2 Owo aahikiiriha weetta mukerekhere, nto kaahiweha makhuva oowaatta muxepani-mmo, naawo yaari oowuuma vanceene.+ 3 Owo aahikikoha wiira: “Nyuwo mwaana a mutthu, niireke makhuva ala anoowerya otthikela okhala akumi?” Nto miyo kaahaakhula wiira: “Ti nyuwo Pwiya Muulupalexa Yehova, munisuwela eyo”.+ 4 Vano owo aahikileela wiira: “Mulaleye eprofesia muhimyaka makhuva ala, ni muhimeerye wiira: ‘Nyuwo makhuva oowuuma, mwiiwe moolumo a Yehova:

5 “‘Etthu Pwiya Muulupalexa Yehova onihimeerya awe makhuva ala, tiila: “Miyo kinoowiirihani okhalana iphumu, nto nyuwo munookhalana okumi.+ 6 Miyo kinimoohelani mitika* ni kinimoohelani erutthu. Nave-tho, kinimoohelani nrapala ni kinimoovahani iphumu, nto nyuwo munookhalana okumi. Vano nyuwo, munoosuwela wiira miyo ka Yehova”’”.

7 Vano kaahilaleya eprofesia ntoko kaarummwale aka. Kimalaka-ru olaleya eprofesia, kaahiiwa oruma, eyo piiyo, oruma wa makhuva yaamanana. Nto makhuva yaahipacerya olupana,* nimosa-nimosa. 8 Nuumala-vo, kaahiweha makhuva awo akhalanaka mitika ni erutthu, nave yaahikhalana nrapala. Masi nlelo khiyaarina iphumu.

9 Vano owo aahikileela wiira: “Mulaleye eprofesia muhimyaka iphumu. Nyuwo mwaana a mutthu, mulaleye eprofesia ni muhimeerye iphumu wiira: ‘Etthu onihimya awe Pwiya Muulupalexa Yehova, tiila: “Nyuwo iphumu munikhuma ipantta ixexe sa elapo, murwe ni mwiiseelele mirutthu iya, wiira sikhalane okumi”’”.

10 Siiso, kaahilaleya eprofesia ntoko aakirumme awe. Vano iphumu saahikela mirutthu iyo, nto mirutthu iyo saahikhalana okumi, seemela,+ sikhala anakhotto ootepa waatta.

11 Vano owo aahikileela wiira: “Nyuwo mwaana a mutthu, makhuva ala ti nloko nootheene na Isarayeli.+ Awo annihimya wiira: ‘Makhuva ahu ahuuma, nave nlipelelo nahu noomala.+ Hiyo noomala-malihiwa’. 12 Tivo, mulaleye eprofesia ni mwaahimeerye wiira: ‘Etthu onihimya awe Pwiya Muulupalexa Yehova, tiila: “Nyuwo atthu aka, miyo kinoohula mahiye anyu+ ni kinimookumihani mmahiye-mmo, kooroiheni elapo ya wIsarayeli.+ 13 Nyuwo atthu aka,+ munoosuwela wiira miyo ka Yehova, okathi kinrowa aka ohula mahiye anyu ni wookumihani mmahiye-mmo”’. 14 Yehova onihimya wiira: ‘Miyo kinimoovahani ikuru saka soowaarya ni munookhalana okumi.+ Nave kinimoopwehani mulaponi mwanyu. Nto nyuwo munoosuwela wiira ti miyo, Yehova, kilavunle ni kipanke eyo’”.

15 Kaahisuwelihiwa-tho moolumo a Yehova, yaahimya wiira: 16 “Vano nyuwo mwaana a mutthu, mukuxe ekopo ni mulepe-vo wiira: ‘Para Yuda ni atthu a wIsarayeli yaawo ari nuuwo’.*+ Nuumala-vo, mukuxe ekopo ekina, mulepe-vo wiira: ‘Para Yosefe, eyo piiyo, ekopo ya Efrayimi, ni atthu ootheene a nloko na Isarayeli, yaawo ari nuuwo’.*+ 17 Vano mphitaanye ikopo iyo soopiili, wiira sikhale emosa mmatatani mwanyu.+ 18 Okathi atthu anyu anrowa aya wookohani wiira: ‘Niireke khamunrowa onileela etthu enitaphulela aya itthu iya?’ 19 Nwaakhule wiira: ‘Etthu onihimya awe Pwiya Muulupalexa Yehova, tiila: “Miyo kinookuxa ekopo ya Yosefe, yeeyo eri mmatatani mwa Efrayimi, vamosa ni atthu a mahimo a Isarayeli yaawo ari nuuwo, kaaphitaanye ni ekopo ya Yuda. Kinimwaakhaliha ekopo emosa.+ Nto awo anrowa okhala ekopo emosa mmatatani mwaka”’. 20 Ikopo iyo munrowa anyu olepa, sihaana okhala mmatatani mwanyu wiira awo yooneke.

21 “Nuumala-vo, mwaaleele wiira: ‘Etthu onihimya awe Pwiya Muulupalexa Yehova, tiila: “Kinimwaakumiha aisarayeli ilapo aroihiwe aya, kinimwaathukumanya mapuro ootheene, kaattikiherye elapo aya.+ 22 Miyo kinoowiiriha okhala nloko nimosa mulaponi-mu,+ ni anrowa okhalaka mmiyaakoni sa wIsarayeli. Mwene mmosa tonrowa waalamulelaka ootheene aya,+ nave khantthikela-tho okhala maloko manli, nnakhala khanrowa okawanyeya wiira akhale omwene miili.+ 23 Awo khantthikela-tho wiinanariha ni ilatarato saya soohiirya,* itthu soohiloka anipaka aya ni itampi saya sootheene.+ Miyo kinoowoopola mwaha wa itthu sootheene sootakhala apanke aya, nave kinimwaareeriha. Awo anrowa okhala atthu aka, vano miyo kinrowa okhala Muluku aya.+

24 “‘“Murumeyi aka Davidi, tonrowa okhala mwene aya,+ nave awo anrowa okhalana makampusi mmosa.+ Anrowa weettelaka moolumo aka oophukela, ni anrowa ottharaka oratteene malamulo aka.+ 25 Anrowa okhalaka elapo kanvahale aka murumeyi aka, Yakobe, weiwo yaakhala aya amuhavinre anyu.+ Nto awo, anaaya ni axisulu aya,+ anrowa okhalaka elapo eyo mahiku ootheene.+ Vano murumeyi aka Davidi, tonrowa okhala muhooleli* aya mahiku ootheene.+

26 “‘“Vano kinoopaka nivarihano na murettele naawo.+ Nivarihano nno ninrowa okhala na mahiku ootheene. Miyo kinimwaalipiha, kinoowiiriha okhala oowaatta+ ni kinoopweha etemplo aka eriyari aya mahiku ootheene. 27 Empa aka enrowa okhala naawo, nto miyo kinrowa okhala Muluku aya, vano awo anrowa okhala atthu aka.+ 28 Okathi etemplo aka enrowa aya okhalaka eriyari ya aisarayeli mahiku ootheene, atthu a maloko makina anoosuwela wiira miyo, Yehova, kinnaareeriha aisarayeli”’”.+

38 Kaahisuwelihiwa-tho moolumo a Yehova, yaahimya wiira: 2 “Nyuwo mwaana a mutthu, munwehe Kooki a elapo ya oMakooki,+ muhooleli muulupale a Mexeki ni Tubali.+ Mulaleye eprofesia enimuhimya yoowo.+ 3 Mmuhimeerye wiira: ‘Etthu onihimya awe Pwiya Muulupalexa Yehova, tiila: “Nyuwo Kooki, muhooleli muulupale a Mexeki ni Tubali, miyo kinoowana ni nyuwo. 4 Kinimoohapuxani, kooheleeni coolo mwaano mwanyu,+ ni kooruuheni ni anakhotto anyu ootheene,+ vamosa ni ikhavalo ni anakhavalo, ootheene aya awanre ene ikuwo sooreerexa. Anrowa okhala anakhotto anceene akunxe ene makula oowiixaakihana maalupale ni makula macikhaani,* ootheene aya akunxe ene ispaata.* 5 Nave, atoropa a oPersia, a wEthiyopia ni oPuthi,+ animoorwa, ootheene aya akunxe ene makula macikhaani oowiixaakihana ni awanre ene ikapaseeti. 6 Atthu a oGoomeri ni atoropa aya ootheene, vamosa ni osuulu wa Togarma,+ yoowo onikhala mpantta woorakamexa wa onorti, animoorwa vamosa ni atoropa awe ootheene. Tthiri atthu anceene ari ni nyuwo.+

7 “‘“Mwiilokiherye, ni mukhale oolikana ene owana ekhotto, nyuwo vamosa ni anakhotto ootheene athukumanne ni nyuwo. Nto nyuwo munrowa okhala kumantanti* aya.

8 “‘“Nuuvira mahiku manceene, nyuwo munoolattuliwa. Vano nuumala iyaakha sinceene, nyuwo munootuphela elapo yeeyo atthu aya attikihiwe nuumala opwetexiwa ni espaata.* Atthu awo anrowa okumihiwa maloko manceene, yathukumanyiwe miyaako sa wIsarayeli, seiyo saahononiwe okhuma khalai. Atthu anikhala elapo ela, akumihinwe maloko makina, nave ootheene aya annikhala ni murettele.+ 9 Nyuwo munimoorwa waatuphela ntoko epheyo yuulupale, nave munookhuneela elapo ntoko meeku. Munimoorwa vamosa ni atoropa anyu ni atthu anyu ootheene”’.

10 “Etthu onihimya awe Pwiya Muulupalexa Yehova, tiila: ‘Nihiku nlo, munimuupuwela itthu sootakhala vamurimani vanyu, nave munoophavela opaka itthu iyo sootakhala. 11 Nyuwo munoohimya wiira: “Kinootuphela elapo erina mittetthe soohivareleleya.+ Nave kinimwaatuphela ale anikhala mittetthe soovareleleya, yaawo ahinixanka ni anikhala mittetthe sihirina ixiri nnakhala itaranka aahiiso mikhora”. 12 Munrowa ophavelaka okuxa mireerelo, otuphela mittetthe seiye sahaakhaliwa, masi vano sinikhaliwa.+ Nave munrowa ophavelaka waakuxa atthu athukumanyiwe maloko makina,+ yaawo anithukumanya mihakhu ni mireerelo,+ yaawo anikhala eriyari ya elapo.

13 “‘Xeeba+ ni Dedani,+ alipa a nakoso a oTaarisi+ ni anakhotto aya ootheene,* animoohimeeryani wiira: “Kiireke munrowa otuphela elapo eyo wiira mukuxe mireerelo? Kiireke mwaathukumannye anakhotto wiira akuxe eparatha ni eweero, nave wiira mukuxe mihakhu ni mireerelo, mwiirelaka okuxa mireerelo sinceene?”’

14 “Tivonto, nyuwo mwaana a mutthu, mulaleye eprofesia mmuhimeeryaka Kooki wiira: ‘Etthu onihimya awe Pwiya Muulupalexa Yehova, tiila: “Nihiku nno, okathi atthu aka aisarayeli anrowa aya okhalaka ni murettele, nyuwo munoosuwela.+ 15 Nyuwo munimoorwa mukhumaka opuro anyu, mukhumaka ipantte soorakamexa sa onorti,+ nyuwo munimoorwa vamosa ni atthu anceene ari ni nyuwo, ootheene awenle ene ikhavalo, eyo piiyo, muttitthi muulupale wa atthu, anakhotto anceene.+ 16 Nyuwo Kooki,+ munimoorwa waatuphela atthu aka aisarayeli, ntoko meeku anikhuneela elapo. Mahiku ookiserya kinimooruuhani wiira mutuphele elapo aka,+ wiira maloko akisuwele okathi kinrowa aka woorumeelani, kiphavelaka wooniherya wiira miyo ka Muluku oowaarya.

17 “Etthu onihimya awe Pwiya Muulupalexa Yehova, tiila: ‘Kiira kaahilavula khalai koohimyakani nyuwo, kaarumeelaka arumeyi aka, eyo piiyo, maprofeta a wIsarayeli? Awo yaahilaleya iprofesia iyaakha sinceene ahimyaka wiira nyuwo mwaamoorwa waatuphela atthu aka’.

18 “Etthu onihimya awe Pwiya Muulupalexa Yehova, tiila: ‘Nihiku nlo, nihiku Kooki onrowa awe otuphela elapo ya wIsarayeli, kinoonanariwa vanceene.+ 19 Miyo kinrowa olavula kinanariwe ene ni kivirunwe ene vanceene. Nave nihiku nlo enookhumelela etetere yuulupale elapo ya wIsarayeli. 20 Mwaha wa miyo, ihopa sa mphareya, axipalame a musulu, inama sa mutakhwani, inama sootheene siniipurula vathi, ni atthu ootheene anikhala mulaponi, anoottettemela. Miyaako sinoophweeya,+ mattumuxa anoomora, nave ixiri sootheene sinoomorela vathi’.

21 “Etthu onihimya awe Pwiya Muulupalexa Yehova, tiila: ‘Omiyaakoni waka wootheene, miyo kinoomukumiherya ekhotto Kooki. Nto khula mutthu onoomwiiva munnawe ni espaata.+ 22 Miyo kinoomuhukhumu Kooki owo ni ekwerere+ ni okhwa. Kinimwaarupihela epula yinceene atoropa awe ni atthu ootheene ari nuuwo.+ Nave-tho, kinimwaamoroxela maluku a maralala,+ mooro+ ni enxoofere.+ 23 Mweekeekhai, miyo kinimwiivuwiha, kinimwiireeriha, ni kinimwiisuweliha ohoolo wa maloko manceene. Nto awo anoosuwela wiira miyo ka Yehova’.

39 “Vano nyuwo mwaana a mutthu, mulaleye eprofesia enimuhimya Kooki,+ mmuleele wiira: ‘Etthu onihimya awe Pwiya Muulupalexa Yehova, tiila: “Miyo kinniwana ni nyuwo Kooki, muhooleli a makhulupale a oMexeki ni a oTubali.+ 2 Miyo kinimoohapuxani ni kinooweettihani, kiwiirihakani okhuma ipantta sa ottaiwene sa onorti,+ mpakha ophiya miyaako sa wIsarayeli. 3 Kinooriha muura mukunxe anyu ntata nanyu noothiyana ni kinoomoroxa mattheere* mukunxe anyu ntata nanyu noolopwana. 4 Nyuwo ni atoropa anyu ootheene vamosa ni atthu anrowa okhala ni nyuwo, munookhwela omiyaakoni sa wIsarayeli.+ Kinoovahererya mirutthu sanyu wiira sikhuuriweke ni mithinto sootheene sa axipalame anikhuura enama ni inama. Nave kinoovahererya mirutthu iyo inama sa mutakhwani”’.+

5 “‘Nyuwo munookhwela mutakhwani,+ okhala wiira ti miyo kilavunle’. Pwiya Muulupalexa Yehova tonihimya.

6 “‘Vano miyo kinoomuroihela mooro Makooki, vamosa ni ootheene ale anikhala musisironi ni murettele.+ Nto awo anoosuwela wiira miyo ka Yehova. 7 Kinimwiiriha nsina naka noowaarya osuweliwa ni atthu aka aisarayeli, nave nkinrowa weemererya-tho wiira nsina naka noowaarya ninanarihiwe. Vano maloko anoosuwela wiira miyo ka Yehova,+ Muluku Oowaarya a wIsarayeli’.+

8 “Etthu onihimya awe Pwiya Muulupalexa Yehova, tiila: ‘Mwiiwe! Eprofesia elaleiwale, enimwiiraneya ni enoomaliheriwa. Nihiku nlo, ti nenlo kihimmye aka. 9 Atthu anikhala ipooma sa wIsarayeli, anookhuma ni anoopaha ikaruma saya sa ekhotto. Awo anoopaha makula oowiixaakihana maalupale ni macikhaani,* anoopaha miyuura, mattheere,* ikopo saarumeeliwa okhottoni* ni mavaka. Anoorumelaka ikaruma iyo wiira apattiheke mooro+ mwa iyaakha 7. 10 Khanrowa-tho wiikittha miri otakhwani nnakhala ottottela ikhuni otakhwani, okhala wiira anrowa orumeelaka ikaruma sa ekhotto wiira apattiheke mooro’.

“‘Awo anookuxa mihakhu sa atthu yaakunxe mihakhu saya, nave anoowaakha mireerelo ale yaawaakhale mireerelo saya’. Pwiya Muulupalexa Yehova tonihimya.

11 “‘Nihiku nlo, kinonvaha Kooki+ mahiye wIsarayeli, oxepani wa alipa aneetta mukwaha, mpantta onikhuma nsuwa wa ephareya. Nto nxepa nno nnoottiya ephiro eniviriwa. Vano, ti weiwo onrowa awe ovithiwa Kooki ni muttitthi wootheene wa atthu awe. Nave opuro owo onoovahiwa nsina noowi nxepa na Hamoni-Kooki.*+ 12 Nloko na Isarayeli nnoomaliha miyeeri 7 naavithaka atthu awo, wiira areerihe elapo.+ 13 Atthu ootheene a elapo ela, anoovara muteko owo woowaavitha atthu. Nto eyo enoowiiriha okhalana efaama nihiku kinrowa aka wiivuwiha.+ Pwiya Muulupalexa Yehova tonihimya.

14 “‘Anoothanliwa alopwana wiira yeetteetteke mulaponi ni avitheke mirutthu sihivithiwe, wiira areerihe elapo eyo. Awo anoovaraka muteko owo mpakha miyeeri 7. 15 Okathi atthu anivira-vira mulaponi anrowa aya oweha nikhuva na mutthu, anoohela esinaale waattamela nikhuva nlo. Nuumala-vo, ale athanleliwe ovara muteko owo woovitha, anoovitha nikhuva nlo oxepani wa Hamoni-Kooki.+ 16 Nave-tho, opuro owo enookhala epooma enrowa wiihaniwaka Hamona.* Nto awo anooreeriha elapo’.+

17 “Vano, nyuwo mwaana a mutthu, etthu onihimya awe Pwiya Muulupalexa Yehova, tiila: ‘Muhimeerye mithinto sootheene sa axipalame ni inama sootheene sa mutakhwani, wiira: “Muthukumane, murwe. Ootheene anyu muthukumanele mukuttho aka koolokihenryaakani, aayo, mukuttho munceene koolokihenryaakani omiyaakoni wa Isarayeli.+ Nyuwo munookhuura enama ni munoowurya ephome.+ 18 Munookhuura enama ya atthu oowerya ni munoowurya ephome ya makhulupale a mulaponi, eyo piiyo, ipwittipwitthi soolopwana, ipwittipwitthi saamukhaani, ipuri ni ipooyi, niire so, inama sootheene sooneneva sa oBaxani. 19 Nyuwo munookhuura ekortuura mpakha wiipeliwa, nave munoohapaliwa ni ephome ya mukuttho kinrowa aka woolokiheryani”’.

20 “‘Vameesa vaka, munookhuura enama ya ikhavalo ni enama ya alipa aneettiha ikaaro sa ekhotto sinipuruliwa ni inama. Nave munookhuura enama ya atthu oowerya ni ya anakhotto, mpakha ovona.+ Pwiya Muulupalexa Yehova tonihimya.

21 “‘Miyo kinoowooniherya ovuwa waka atthu a maloko makina. Nto maloko ootheene animoona ophukela waka kikumihenrye aka, nave animoona owerya* waka.+ 22 Okhuma nihiku nlo orowa ohoolo, atthu a nloko na Isarayeli anoosuwela wiira miyo ka Yehova, Muluku aya. 23 Nave maloko anoosuwela wiira atthu a nloko na Isarayeli yaahiroihiwa weepotthani mwaha wa etampi aya, mwaha wa ohiroromeleya waya.+ Tivo, miyo kaahihiya waaweha+ ni kaahaavahererya mmatatani mwa awanani aya,+ nto awo yaahiiviwa ni espaata.* 24 Miyo kaahaathokorerya ntoko yaaphwanela aya mwaha wa ohiloka waya ni itampi saya. Nave kaahihiya waaweha’.

25 Tivo, etthu onihimya awe Pwiya Muulupalexa Yehova, tiila: ‘Kinimwaattikiha atthu a Yakobe+ yaaroihiwe weepotthani, nave kinimwaamorela ikharari atthu ootheene a nloko na Isarayeli.+ Nto, kinookhalela nthiti waakiherya nsina naka noowaarya.+ 26 Nuumala awo wuulihihiwa muru mwaha wa ohiroromeleya waya,+ anootthikela okhala mulaponi mwaya ni murettele. Nto, khuuvo onrowa owoopopihaka.+ 27 Okathi kinrowa aka waattikiha atthu aka maloko yaari aya ni waathukumanya, kaakumihaka ilapo sa awanani aya,+ koorumeelakani nyuwo, kinoowooniherya atthu a maloko makina wiira miyo ka Muluku oowaarya’.+

28 “‘Okathi kinrowa aka waaroiha ilapo sikina wiira yakhalihiwe ipottha, nave okathi kinrowa aka waattikiherya mulaponi mwaya, kihimuhiyaka nnakhala mutthu mmosa, awo anoosuwela wiira miyo ka Yehova, Muluku aya.+ 29 Miyo nkinitthikela-tho ohaaweha,+ okhala wiira kinimwaavaha ikuru saka atthu a nloko na Isarayeli’.+ Pwiya Muulupalexa Yehova tonihimya”.

40 Nihiku 10 na mweeri woopacerya, eyaakha ya namiloko miili ni ithanu, okhuma vaavale naroihiwe ahu weepotthani,+ owerya wa Yehova waahikikuxa, okiroiha opooma,+ nihiku nene nenlo. Yaari eyaakha ya namuloko neexexe, nuumala epooma ya oYerusalemu otupheliwa.+ 2 Nto weiwo kaahooniheriwa itthu ni Muluku. Owo aahikiroiha elapo ya wIsarayeli, okihiya vasulu va mwaako woorakamexa,+ weiwo kaawenhe aka epantta ya osuuli etthu yaatekiwe yaalikana ni epooma.

3 Okathi kaaphiyale aka opuro owo, kaahimoona mulopwana aarina mukhalelo ntoko wa ekoopiri.+ Owo aahikuxa mmatatani mwawe mukhoyi wa eliinyu ni ekopo yoophimana.*+ Nave mulopwana owo eemenle vamukhora. 4 Mulopwana owo aahikihimeerya wiira: “Nyuwo mwaana a mutthu, nwehe saana, nwiriyane oratteene ni nvahe ephoole itthu sootheene kinrowa aka owooniheryani, okhala wiira ti etthu muruuheliwe anyu va. Mwaaleele atthu a nloko na Isarayeli itthu sootheene muniweha anyu”.+

5 Vano, kaahiweha exiri yaarukurerya ota wa etemplo.* Nave-tho kaahinweha mulopwana okunxe ene ekopo yoophimana yaarina etthu yoowiiraka imeeturu tthaaru.* Owo aahipacerya ophima exiri eyo, nto mwiitti wa exiri eyo waari etthu yoowiiraka imeeturu tthaaru. Nave orakamela waya osulu waari wa etthu yoowiiraka imeeturu tthaaru.

6 Nuumala-vo, mulopwana owo aahirowa vamukhora ori mpantta onikhuma nsuwa,+ owela ixikatta saya. Okathi aaphimme awe opuro wa mukhora owo, mpantta mmosa waari wa etthu yoowiiraka imeeturu tthaaru, nave mpantta mukina waari wa etthu yoowiiraka imeeturu tthaaru. 7 Khula esaala ya makwarta, orakama waya waari wa etthu yoowiiraka imeeturu tthaaru, nave okhuveya waya waari wa etthu yoowiiraka imeeturu tthaaru. Orakamelana wa isaala sa makwarta waari wa etthu yoowiiraka imeeturu piili nnimeya.*+ Opuro wa mukhora waari mpantta wa mpaani, waari wa etthu yoowiiraka imeeturu tthaaru.

8 Owo aahiphima opuro wa mukhora mpantta wa mpaani, nave waari etthu yoowiiraka imeeturu tthaaru. 9 Nuumala-vo, owo aahiphima evaranta ya mukhora, yeeyo yaarina etthu yoowiiraka imeeturu xexe.* Nave-tho, aahiphima ipilaari saari mukerekhere mwa mukhora owo, seiyo saarina etthu yoowiiraka emeeturu emosa.* Evaranta ya mukhora owo, yaawehana ni etemplo.

10 Khula mpantta wa mukhora owo waari mpantta onikhuma nsuwa, saahikhala isaala tthaaru sa makwarta. Isaala iyo sootthaaru saamulikana. Nave ipilaari saari ipantta soopiili saamulikana.

11 Nuumala-vo, aahiphima opuro waari mukhora owo. Okhuveya waya waari etthu yoowiiraka imeeturu ithanu,* nave orakama waya waari etthu yoowiiraka imeeturu 6 nnimeya.*

12 Opuro waattiyeleliwe ni exiri yookhuveya, ohoolo wa isaala sa makwarta, waarina etthu yoowiiraka nimeya na emeeturu* khula mpantta. Isaala sa makwarta saarina etthu yoowiiraka imeeturu tthaaru,* ipantta soopiili.

13 Nuumala-vo, owo aahiphima mukhora okhuma vasulu va esaala emosa ya makwarta* mpakha vasulu va esaala ekina ya makwarta. Nto waari wa etthu yoowiiraka imeeturu 13.* Mukhora mmosa waawehana ni mukhora mukina.+ 14 Aahiphima-tho ipilaari saari mukerekhere, seiyo orakamela waya osulu waari etthu yoowiiraka imeeturu 32.* Nave-tho aahiphima ipilaari saari mukerekhere mwa mikhora sootheene saarukurenrye nivate. 15 Okhuma ohoolo wa mukhora orowa ohoolo wa evaranta yaari muhina wa mukhora, waari etthu yoowiiraka imeeturu 26.*

16 Isaala sa makwarta ni ipilaari saari mukerekhere, saahikhalana ixanela saamukhaani.+ Ipilaari iyo saari ipantta soopiili sa evaranta ya muhina ya mukhora. Muhina mwa ivaranta iyo, saahikhala ixanela ipantta soopiili. Nave ipilaari saari mukerekhere, saahikhalana iteseenyu saalikana ni mukole.+

17 Nuumala-vo, owo aahikiroiha ota, vanivateni. Nto kaahiweha isaala yaalya aya atthu+ ni alukamasa a maluku yaarukurenrye nivate. Vate-vo, yaataliwe alukamasa, saahikhala isaala 30 yaalya aya atthu. 18 Alukamasa yaari mukerekhere mwa mukhora, munnuwelo aya waamulikana ni mikhora iyo. Alukamasa awo yaari vathi, naalikanyiha ni alukamasa a nivate na muhina.

19 Nuumala-vo, aahiphima okhuma mukhora mwaamukhaani mpakha waattamela nivate na muhina. Orakamelana* waya waari etthu yoowiiraka imeeturu 52,* mpantta onikhuma nsuwa ni mpantta wa onorti.

20 Nivate na ota naahikhalana mukhora waaweha onorti. Nto owo aahiphima orakama waya ni okhuveya waya. 21 Ipantta soopiili sa mukhora owo, saahikhala isaala tthaaru sa makwarta. Munnuwelo wa ipilaari saari mukerekhere wa mukhora owo ni evaranta aya, waamulikana ni iye saari mukhora woopacerya. Orakama waya waari etthu yoowiiraka imeeturu 26,* nave okhuveya waya waari etthu yoowiiraka imeeturu 13.* 22 Ixanela saya, evaranta aya, ni ilatarato saalikana ni mikole,+ saarina munnuwelo mmosa-ru ni iye sa mukhora waari mpantta onikhuma nsuwa. Atthu yaaniphiya vamukhora-vo awelaka exikatta yaarina mavalo 7, nave evaranta aya yaari vasulu va exikatta vaavo.

23 Nivate na muhina, waahikhala mukhora waawehana ni mukhora wa onorti, nave waahikhala mukhora mukina waawehana ni mukhora wa mpantta onikhuma nsuwa. Owo aahiphima okhuma mukhora mmosa orowaka mukhora mukina, nto orakamelana waya waari etthu yoowiiraka imeeturu 52.*

24 Vano, owo aahikiroiha mpantta wa osuuli,+ nto kaahiweha mukhora waari weiwo. Aahiphima ipilaari saari mukerekhere mwa mukhora owo ni evaranta aya. Munnuwelo aya waamulikana ni iye sa mikhora sikina. 25 Ipantta soopiili sa mukhora owo ni evaranta aya, saahikhala ixanela, seiyo saalikana ni ixanela sikina. Orakama waya waari wa etthu yoowiiraka imeeturu 26,* nave okhuveya waya waari etthu yoowiiraka imeeturu 13.* 26 Yaahikhala exikatta yaarina mavalo 7 yaaroiha vamukhora-vo,+ nave evaranta aya yaari vasulu va exikatta eyo. Ipilaari iyo saari mukerekhere mwa mukhora, saahikhalana iteseenyu saalikana ni mukole. Khula mpantta wa ipilaari iyo, yaahikhalana eteseenyu emosa.

27 Nivate na muhina waahikhala mukhora waaweha osuuli. Owo aahiphima orowaka osuuli okhuma mukhora mmosa orowaka mukhora mukina, nto orakamelana waya waari wa etthu yoowiiraka imeeturu 52.* 28 Nuumala-vo, owo aahikiroiha nivate na muhina okivirihaka mukhora wa osuuli. Okathi aaphimale awe mukhora wa osuuli, waarina munnuwelo mmosa-ru ni mikhora sikina. 29 Isaala saya sa makwarta, ipilaari saya sa mukerekhere, ni evaranta aya, saarina munnuwelo mmosa-ru ni iye sa mikhora sikina. Ipantta soopiili sa mukhora owo ni evaranta aya, saahikhala ixanela, seiyo saalikana ni ixanela sikina. Orakama waya waari etthu yoowiiraka imeeturu 26,* nave okhuveya waya waari etthu yoowiiraka imeeturu 13.*+ 30 Mikhora sootheene saaroiha nivate na muhina, saahikhalana ivaranta. Orakama wa ivaranta iyo waari etthu yoowiiraka imeeturu 13,* nave okhuveya waya waari etthu yoowiiraka imeeturu piili nnimeya.* 31 Evaranta ya mukhora wa osuuli, yaawehana ni nivate na ota. Nave ipilaari saari mukerekhere wa mukhora owo,+ saahikhalana ilatarato saalikana ni mukole. Mukhora owo waahikhalana exikatta yaarina mavalo 8.+

32 Okathi aakiroihale awe nivate na muhina mpantta onikhuma nsuwa, aahiphima mukhora owo, nto munnuwelo aya waamulikana ni mikhora sikina. 33 Isaala saya sa makwarta, ipilaari saya sa mukerekhere, ni evaranta aya, saarina munnuwelo mmosa-ru ni iye sa mikhora sikina. Ipantta soopiili sa mukhora owo ni evaranta aya, saahikhala ixanela, seiyo saalikana ni ixanela sikina. Orakama waya waari etthu yoowiiraka imeeturu 26,* nave okhuveya waya waari etthu yoowiiraka imeeturu 13.* 34 Evaranta ya mukhora wa mpantta onikhuma nsuwa, yaawehana ni nivate na ota. Nave ipilaari saari mukerekhere mwa mukhora owo, saahikhalana ilatarato saalikana ni mukole. Mukhora owo waahikhalana exikatta yaarina mavalo 8.

35 Nuumala-vo, owo aahikiroiha mukhora wa onorti,+ nave aahiphima mukhora owo. Munnuwelo aya waamulikana ni mikhora sikina. 36 Isaala saya sa makwarta, ipilaari saya sa mukerekhere, ni evaranta aya, saarina munnuwelo mmosa-ru ni iye sa mikhora sikina. Ipantta soopiili sa mukhora owo saahikhala ixanela. Orakama waya waari etthu yoowiiraka imeeturu 26,* nave okhuveya waya waari etthu yoowiiraka imeeturu 13.* 37 Ipilaari saari mukerekhere mwa mukhora wa mpantta wa onorti, saawehana ni nivate na ota. Nave ipilaari iyo, saahikhalana ilatarato saalikana ni mukole. Mukhora owo waahikhalana exikatta yaarina mavalo 8.

38 Mukerekhere mwa ipilaari iyo saari vamukhora, saahikhala isaala yaalya aya atthu, seiyo saarina mukhora mmosa. Ti memmo saarapihiwa aya soovaha para opahiwa.+

39 Ipantta soopiili sa evaranta ya mukhora owo,* yaahikhala meesa manli saahitiwa aya inama saavahiwa ntoko soovaha para opahiwa,+ nave saalokiheriwa aya soovaha para oleveleliwa itampi+ ni soovaha mwaha wa okhalana mulattu.+ 40 Opuro waaweliwa para mukhora wa onorti, yaahikhala meesa manli ota wa mukhora. Nave-tho, yaahikhala meesa manli mpantta mukina wa evaranta ya mukhora owo. 41 Ipantta soopiili sa mukhora owo, yaahikhala meesa maxexe, vaavo saahitiwa aya mikuttho. Meesa ootheene yaari 8. 42 Meesa maxexe a yoovaha para opahiwa, yaapakiwe ni maluku oothikiliwa. Meesa awo, orakama waya waanivikana nimeya na emeeturu,* okhuveya waya waanivikana nimeya na emeeturu,* nave orakamela waya osulu waari etthu yoowiiraka nimeya na emeeturu.* Vameesa-vo, saanipwehiwa ikaruma saarumeeliwa para ohitiwa inama saavahiwa ntoko soovaha para opahiwa ni mikuttho. 43 Yaahikhala mapuro saapwehiwa itthu, yaarukurenrye ixiri sootheene sa muhina. Munnuwelo aya waari wa ntata nimosa. Nave enama yaavahiwa yaapwehiwa vameesa.

44 Ota wa mukhora wa muhina saahikhala isaala yaalya aya alipa-oowiipa.+ Isaala iyo saari vanivateni na muhina, waattamela mukhora wa onorti, owehanaka ni osuuli. Esaala ekina yaari waattamela mukhora wa mpantta onikhuma nsuwa, owehanaka ni onorti.

45 Mulopwana owo aahikileela wiira: “Esaala ela eniweha osuuli, ti ya anamukuttho athanleliwe ovara miteko mutemplo.+ 46 Esaala eniweha onorti, ti ya anamukuttho athanleliwe ovara muteko valtaari.+ Awo ta osuulu wa Sadoki.+ Nave awo alevi athanleliwe omwaattamela Yehova wiira anvareleke muteko”.+

47 Nuumala-vo, owo aahiphima nivate na muhina. Orakama waya ni okhuveya waya waamulikana. Orakama waya waari etthu yoowiiraka imeeturu 52,* nave okhuveya waya waari etthu yoowiiraka imeeturu 52. Ohoolo wa etemplo yaahikhala altaari.

48 Nuumala-vo, owo aahikiroiha evaranta ya etemplo,+ ni aahiphima ipilaari saari mukerekhere mwa evaranta eyo. Khula epilaari mpantta mmosa yaari etthu yoowiiraka imeeturu piili nnimeya,* nave mpantta mukina yaari etthu yoowiiraka emeeturu emosa nnimeya.* Epilaari emosa yaari moono woothiyana, nave epilaari ekina yaari moono woolopwana.

49 Evaranta eyo orakama waya waari etthu yoowiiraka imeeturu 10,* nave okhuveya waya waari etthu yoowiiraka imeeturu 6.* Atthu yaaniphiya vavarantani-vo, awelaka ixikatta. Nave, waattamela ipilaari, saahikhala ipilaari sikina soovilikeya, khula epilaari mpantta mmosa.+

41 Nto owo aahikiroiha opuro woowaarya wa vate,* nave aahiphima ipilaari saari mukerekhere mwa opuro owo. Emosa yaari moono woothiyana, ekina yaari moono woolopwana. Khula epilaari yaarina etthu yoowiiraka imeeturu tthaaru.* Owo ti waari munnuwelo wa khula epilaari. 2 Munnuwelo wa mpantta mukina wa khula epilaari, waari etthu yoowiiraka imeeturu tthaaru.* Nave munnuwelo wa mukhora wa opuro owo, waari etthu yoowiiraka imeeturu thanu.* Owo aahiphima orakama waya, oona wiira waari etthu yoowiiraka imeeturu 21,* nave okhuveya waya waari etthu yoowiiraka imeeturu 10.*

3 Owo aahikela mpaani,* aahiphima ipilaari saari mukerekhere mwa mukhora. Mwiitti aya waari etthu yoowiiraka emeeturu emosa,* nave mukhora owo waarina etthu yoowiiraka imeeturu tthaaru. Ixiri sa mukhora owo, saari etthu yoowiiraka imeeturu tthaaru nnimeya.* 4 Nuumala-vo, aahiphima esaala yaawehana ni nipuro noowaarya na vate. Mpantta mmosa, waari etthu yoowiiraka imeeturu 10, nave mpantta mukina, waari etthu yoowiiraka imeeturu 10.+ Nto owo aahikihimeerya wiira: “Nna ti Nipuro Noowaaryexa”.+

5 Vano, aahiphima exiri ya etemplo. Mwiitti aya waari etthu yoowiiraka imeeturu tthaaru. Isaala saarukurenrye etemplo eyo, saari etthu yoowiiraka imeeturu piili.*+ 6 Isaala iyo saahiilaanyeriwa ikwaha tthaaru: Isaala 30 vathi, isaala 30 eriyari ni isaala sikina 30 osulu. Exiri ya etemplo, yaapakiwe mwa enamuna vaaweryaneya aya isaala ovareleleya vaxirini-vo, vahipirisariki othoroliwa exiri.+ 7 Isaala sa osulu saari suulupale ovikana sa eriyari. Nave isaala sa eriyari saari suulupale ovikana sa vathi.+ Ipantta soopiili sa etemplo, saahikhala ixikatta soorukurerya, seiyo saakhuma vathi mpakha osulu.

8 Kaahiweha evaranta yoorakamela osulu yaarukurerya etemplo. Evaranta eyo orakamela waya osulu waari etthu yoowiiraka imeeturu tthaaru. 9 Mwiitti wa exiri ya ota ya isaala, waari etthu yoowiiraka imeeturu piili nnimeya. Waahikhala opuro waaviriwa* waarukurerya isaala, yoowo wiirela mpantta etemplo.

10 Ipantte soopiili sa etemplo, waahikhala opuro waari etthu yoowiiraka imeeturu 10. Opuro owo waari eriyari ya etemplo ni isaala atthu yaalya aya.+ 11 Mutthu aaniwerya okhuma mpantta mwaamukhaani waaviriwa, okelaka mmasaalani, oviraka mikhora miili. Mukhora mmosa waari mpantta wa onorti, nave mukina waari mpantta wa osuuli wa etemplo. Munnuwelo wa mikhora iyo waari etthu yoowiiraka imeeturu piili nnimeya.

12 Yaahikhala empa yaari mpantta onikela nsuwa wa etemplo, yaawehana ni opuro wahaatekiwe etthu. Okhuveya waya, waari etthu yoowiiraka imeeturu 36,* nave orakama waya waari etthu yoowiiraka imeeturu 46 nnimeya.* Mwiitti wa exiri yaarukurenrye empa eyo, waari etthu yoowiiraka imeeturu piili nnimeya.

13 Owo aahiphima etemplo, orakama waya waari etthu yoowiiraka imeeturu 52.* Okhuma waamalenle etemplo, mpakha waamalenle empa, ohela muhina opuro wahaatekiwe etthu ni ixiri sa empa* eyo, orakama waya waari etthu yoowiiraka imeeturu 52. 14 Nivate naari ohoolo wa etemplo, nenno naaweha mpantta onikhuma nsuwa, wunnuwa waya waari etthu yoowiiraka imeeturu 52.

15 Owo aahiphima munnuwelo wa empa yaawehana ni opuro wahaatekiwe etthu, ottuli wa etemplo, vamosa ni mapuro yaaviriwa ipantta soopiili. Wunnuwa waya waari etthu yoowiiraka imeeturu 52.

Nave aahiphima-tho nipuro noowaarya na vate, nipuro noowaarya na muhina+ ni isaala saari vanivateni. 16 Aahiphima-tho ivaranta, ixanela saamukhaani,+ mapuro yaaviriwa a mapuro ale mararu. Waattamela nvaranta, saahikhala ipaineeli sa matera,+ okhuma vathi mpakha saari aya ixanela. Nave ixanela iyo saari soottiyeliwa. 17 Vasulu va mukhora, mpantta wa muhina ni wa ota wa etemplo, vamosa ni exiri yootheene yaarukurenrye, saahiphimmwa. 18 Yaahihotthiwa makerubi+ ni saahipakiwa iteseenyu saalikana ni mukole.+ Mukole mmosa waakhala eriyari ya makerubi manli, nave khula kerubi aarina ithoi* piili. 19 Ethoi ya pinaatamu yaaniweha mukole waari mpantta mmosa. Nave ethoi ya kharamu yaaniweha mukole waari mpantta mukina.+ Itthu iyo saahotthiwe siiso mutemplo mootheene. 20 Ixiri sa etemplo, yaahihotthiwa makerubi ni iteseenyu saalikana ni mikole, okhuma vathi mpakha vasulu va mukhora.

21 Aaro a mukhora wa etemplo, yaarina ipantta ixexe.+ Ohoolo wa nipuro noowaarya, yaahikhala etthu yaalikana ni 22 altaari a matera,+ yoowo aarakamenle osulu etthu yoowiiraka emeeturu emosa nnimeya,* nave okhuveya wawe waari etthu yoowiiraka emeeturu emosa.* Owo aahikhalana maripu mukantu mwawe. Vathi wawe ni iparari sawe altaari owo, saari sa matera. Nto mulopwana owo aahikihimeerya wiira: “Ala ti meesa ari ohoolo wa Yehova”.+

23 Nipuro noowaarya ni nipuro noowaaryexa na etemplo, khula emosa yaahikhalana mikhora miili.+ 24 Mikhora iyo saahikhalana masele manli yaakhuneya eriyari. Khula mukhora waahikhalana masele manli. 25 Mikhora sa nipuro noowaarya, yaahihotthiwa makerubi ni iteseenyu saalikana ni mikole, siisaale ntoko seiye saari vaxirini.+ Vate va mukhora, yaahikhala etthu ya matera yaakhuneela niphiryo.* 26 Ipantta soopiili sa evaranta, isaala sa mutemplo, ipantta saakhunela niphiryo, saahikhalana ixanela saamukhaani+ ni iteseenyu saalikana ni mukole.

42 Nuumala-vo, owo aahikiroiha nivate na ota, nenlo naari mpantta wa onorti.+ Nave aahikiroiha opuro waatekiwe isaala atthu yaalya aya, yoowo waakhala waattamela opuro wahaatekiwe etthu,+ onorti wa empa yaatekiwe ottuli wa etemplo.*+ 2 Orakama wa opuro waakhala aya mukhora wa onorti, waari wa etthu yoowiiraka imeeturu 52,* nave okhuveya waya waari etthu yoowiiraka imeeturu 26.* 3 Nivate na muhina naarina etthu yoowiiraka imeeturu 10.+ Nave isaala atthu yaalya aya, saari eriyari ya nivate na muhina ni alukamasa a maluku yaari nivate na ota. Isaala iyo sa muhina, saari ipa tthaaru soowiilaanyeriwa. Nto ipa iyo soowiilaanyeriwa sanwehana. 4 Ohoolo wa isaala atthu yaalya aya waahikhala opuro wa muhina waaviriwa,+ okhuveya waya waari etthu yoowiiraka imeeturu thanu,* nave orakama waya waari etthu yoowiiraka imeeturu 52.* Mikhora sa isaala iyo saaweha onorti. 5 Isaala sa osulu atthu yaalya aya, saari sootepa ophunyeya ovikana iye sa vathi ni sa eriyari, okhala wiira niphiryo naya naari nootepa* wunnuwa. 6 Isaala iyo atthu yaalya aya, saari ipa tthaaru soowiilaanyeriwa, masi khisaarina ipilaari ntoko ipilaari saari vanivateni. Tivo isaala sa osulu, saari saamukhaani ovikana iye sa vathi ni sa eriyari.

7 Exiri ya maluku yaari ota waattamela isaala atthu yaalya aya, seiyo saattamenle nivate na ota ni saawehana ni isaala sikina atthu yaalya aya, orakama waya waari wa etthu yoowiiraka imeeturu 26. 8 Orakama wa isaala atthu yaalya aya, seiyo saakhala waattamela nivate na ota, waari etthu yoowiiraka imeeturu 26. Masi orakama wa isaala saakhala mpantta wa nipuro noowaarya, waari etthu yoowiiraka imeeturu 52. 9 Isaala iyo saahikhalana mukhora waari mpantta onikhuma nsuwa, yoowo yaavira aya atthu yaakhuma nivate na ota, wiira akele isaala iyo.

10 Ottuli wa exiri ya maluku ya nivate, saahikhala-tho isaala sikina atthu yaalya aya, saaweha mpantta onikhuma nsuwa, waattamela opuro wahaatekiwe etthu ni empa.+ 11 Mukhalelo wa opuro waaviriwa waari ohoolo wa isaala sa osuuli, waamulikana ni wa isaala sa onorti.+ Isaala sa ipantta soopiili, saarina munnuwelo mmosa-ru, eyo piiyo, orakama waya ni okhuveya waya. 12 Mikhora saya saamulikana ni mikhora sa isaala saaweha mpantta wa osuuli. Waapacerya aya opuro waaviriwa, waahikhala mukhora waaviriwa.+ Mukhora owo waawehana ni exiri ya maluku, mpantta onikhuma nsuwa.

13 Nuumala-vo, owo aahikileela wiira: “Isaala siri onorti ni isaala siri osuuli, waattamela opuro ohitekiwe etthu,+ ti soowaarya, memmo anamukuttho animwaattamela Yehova, anilya aya soovaha soowaaryexa.+ Owo ti opuro anipweha aya soovaha soowaaryexa, yoovaha ya ipyo, ni yoovaha para oleveleliwa etampi, ni yoovaha yaavahiwa mwaha wa okhalana mulattu, okhala wiira opuro owo ti woowaarya.+ 14 Okathi anamukuttho anikela aya nipuro noowaarya, ahikhumele nivate na ota, ahipacenrye toko orula malaya yaawanre aya okathi yanvarela aya muteko Muluku,+ okhala wiira malaya awo toowaarya. Awo ahaana owara malaya makina wiira yaattamele opuro aneemereriwa aya ophiya atthu”.

15 Okathi aamalinhe awe ophima mpantta wa muhina wa etemplo,* aahikiviriha mukhora waaweha mpantta onikhuma nsuwa,+ nave aahiphima mpantta owo wootheene.

16 Owo aahiphima mpantta onikhuma nsuwa orumeelaka ekopo yoophimana,* nto waari etthu yoowiiraka imeeturu 1.555,* okhuma mpantta mmosa mpakha mpantta mukina.

17 Owo aahiphima mpantta wa onorti orumeelaka ekopo yoophimana, nto yaari etthu yoowiiraka imeeturu 1.555.

18 Owo aahiphima mpantta wa osuuli orumeelaka ekopo yoophimana, nto yaari etthu yoowiiraka imeeturu 1.555.

19 Nuumala-vo, aahirowa mpantta onikela nsuwa. Aahiphima orumeelaka ekopo yoophimana, nto yaari etthu yoowiiraka imeeturu 1.555.

20 Owo aahiphima ipantta sooxeexe. Yaahikhala exiri yaarukurerya+ yeeyo yaarina etthu yoowiiraka imeeturu 1.555 ipantta sootheene.+ Exiri eyo yaanivalaanya nipuro noowaarya ni opuro waarumeeliwa ni atthu ootheene.+

43 Nuumala-vo, owo aahikiroiha mukhora waaweha mpantta onikhuma nsuwa.+ 2 Weiwo kaahoona ovuwa wa Muluku a Isarayeli okhumaka mpantta onikhuma nsuwa.+ Nsu nawe naalikana ni onyakula wa maasi ootupa.+ Vano elapo yaahimwaleeliwa ni ovuwa wawe.+ 3 Etthu koonale aka, yaalikana ni etthu koonihiwe aka ni Muluku, okathi kaaruuye aka* opwetexa epooma. Nave etthu eyo yaalikana ni etthu koonale aka, waattamela muro Kebari.+ Nto kaahikokhora, kuurama mpakha vathi.

4 Vano, ovuwa wa Yehova waahikela mutemplo,* oviraka mukhora waaweha mpantta onikhuma nsuwa.+ 5 Ikuru sa Muluku* saahikikuxa, sikiroiha vanivateni na muhina. Nto weiwo kaahiweha ovuwa wa Yehova+ osareyale ene mutemplo. 6 Nuumala-vo, kaahimwiiwa mutthu okilavulihaka, ori ene mutemplo. Nto aahirwa mulopwana ole,* eemela vakhiviru vaka.+ 7 Owo aahikileela wiira:

“Nyuwo mwaana a mutthu, ola ti opuro wa ehice aka+ ni ti opuro kinipweherya aka inawu saka,+ weiwo kinrowa aka okhalaka ni atthu a Isarayeli mahiku ootheene.+ Atthu a nloko na Isarayeli ni mamwene aya, khantthikela-tho onanariha nsina naka noowaarya,+ mwaha wa oraruwa ni amuluku akina,* ni mwaha wa mirutthu sa mamwene aya akhwiiye. 8 Awo yaahihela mukhora wa etemplo aya, waattamela mukhora wa etemplo aka. Nave, yaahaahela aaro a mukhora wa etemplo aya waattamela aaro a mukhora wa etemplo aka, evalaanyihaka paahi ni exiri.+ Okathi ene yoowo, awo yaahipaka itthu sootheene sootepa onanara, yooniheryaka wiira khanittittimiha nsina naka noowaarya. Tivo, miyo kaahaamala-maliha kinanariwe ene.+ 9 Vano ahaana ohiya oraruwa ni amuluku* aya ni okumiha ohoolo waka mirutthu sa mamwene aya. Siiso miyo kinookhalaka naawo mahiku ootheene.+

10 “Vano nyuwo mwaana a mutthu, mwaatthokiherye atthu a Isarayeli,+ moota eri aya etemplo, wiira yuuliwe muru mwaha wa itampi saya.+ Nave-tho, awo ahaana osuwela saana makhalelo a* etemplo. 11 Akhala wiira awo animuuliwa muru mwaha wa itthu sootheene apanke aya, nyuwo muhaana waasuweliha makhalelo a* etemplo, moota etekiwe aya, mikhora atthu anikela aya ni mikhora atthu anikhuma aya.+ Nwooniherye makhalelo ootheene a* etemplo ni sooruma saya ni malamulo aya. Nave mulepe itthu iya ohoolo waya, wiira atthareke makhalelo ootheene* ni yiiweleleke sooruma saya.+ 12 Nla ti nlamulo na etemplo: Muttetthe wootheene orukurenrye vasulu va mwaako otekiwe aya etemplo, ti woowaaryexa.+ Aayo, nna ti nlamulo na etemplo.

13 “Vano ola munnuwelo wa altaari.*+ Epantta ya vathi, orakama waya waari etthu yoowiiraka nimeya na emeeturu,* nave okhuveya waya waari etthu yoowiiraka nimeya na emeeturu. Epantta eyo yaahirukureriwa ni mukala, mwiitti aya waarina etthu yoowiiraka ntata* nimosa. Ela ti epantta ya vathi ya altaari. 14 Epantta ya nenli, okhuma vathi orowaka osulu, orakama waya waari etthu yoowiiraka emeeturu emosa,* nave okhuveya waya waari etthu yoowiiraka nimeya na emeeturu. Epantte ya neeraru, orakamela waya osulu yaari etthu yoowiiraka imeeturu piili,* nave okhuveya waya waari etthu yoowiiraka nimeya na emeeturu. 15 Epantta ya osulu ya altaari owo, ti epantte yaapattihiwa aya mooro. Vano orakamela waya osulu waari etthu yoowiiraka imeeturu piili. Nave ikantu ixexe sa altaari owo yaahikhala manyaka.+ 16 Epantta eyo ya osulu, munnuwelo aya waamulikana. Orakama waya waari etthu yoowiiraka imeeturu 6, nave okhuveya waya waari etthu yoowiiraka imeeturu 6.*+ 17 Ipantta sooxeexe sa vathi valtaari, saamulikana. Orakama waya waari etthu yoowiiraka imeeturu 7,* nave okhuveya waya waari etthu yoowiiraka imeeturu 7. Exiri yaamukhaani yaarukurenrye ipantta sootheene, yaari etthu yoowiiraka isentiimeturu 26.* Nave mwiitti wa mpantta wa vathi waari etthu yoowiiraka nimeya na emeeturu ipantte sootheene.

“Exikatta ya altaari owo, yaaweha mpantta onikhuma nsuwa”.

18 Nto, owo aahikileela wiira: “Nyuwo mwaana a mutthu, etthu onihimya awe Pwiya Muulupalexa Yehova, tiila: ‘Ala ti malakiheryo anrowa otthariwaka okathi onrowa awe otekiwaka altaari owo, wiira sipahiweke-vo soovaha ni etatheliweke ephome’.+

19 “Pwiya Muulupalexa Yehova, onihimya wiira: ‘Nyuwo muhaana ovaha epooyi yaamukhaani ntoko yoovaha para oleveleliwa etampi+ wiira aleveleliwe itampi anamukuttho alevi, a osuulu wa Sadoki,+ yaawo anikaattamela wiira akivarele muteko. 20 Mukuxe ephome vakhaani ya epooyi eyo, muhele vamanyakani va altaari, yaawo ari ikantu xexe sa altaari. Nave-tho, muhele ephome eyo mukerekhere mwa altaari ootheene, wiira mmureerihe altaari owo.*+ 21 Nuumala-vo, mukuxe epooyi yaamukhaani, yoovaha para oleveleliwa etampi, wiira mpahe opuro othanleliwe aya mutemplo, ota wa opuro woowaarya.+ 22 Nihiku na nenli, muhaana ovaha epuri yoolopwana yooloka ntoko yoovaha para oleveleliwa etampi. Nto altaari awo onooreerihiwa,* ntoko siisaale oreerihiwe awe ni yoovaha ya epooyi yaamukhaani’.

23 “‘Mwamaliha omureeriha altaari owo mwaha wa etampi, muhaana ovaha epooyi yaamukhaani yoolopwana ni yooreera. Nave-tho, muhaana ovaha epwittipwitthi yoolopwana yooreera. Inama iyo muhaana okumiha munikotoni mwanyu. 24 Inama iyo muhaana onvaha Yehova. Anamukuttho ahaana weeleela inama iyo+ ni onvaha Yehova ntero nene, ntoko yoovaha para opahiwa. 25 Khula nihiku, muhaana ovaha epuri yoolopwana, epooyi yaamukhaani yoolopwana ni epwittipwitthi yoolopwana, mpakha mahiku 7.+ Inama iyo sihaana okhala sooloka. 26 Awo ahaana omureeriha altaari mahiku 7, ni omulikanyiha wiira opaceryeke ovareliwa muteko. 27 Yamala mahiku awo, okhuma nihiku na neethanu neeraru+ orowa ohoolo, anamukuttho ahaana ovaha valtaari, soovaha sanyu* para opahiwa ni mikuttho sa opatthani. Nto miyo kinoohakalala ni nyuwo’.+ Pwiya Muulupalexa Yehova tonihimya”.

44 Owo aahikiroiha mukhora wa ota wa nipuro noowaarya, yoowo waaweha mpantta onikhuma nsuwa.+ Mukhora owo waari woowaleya ene.+ 2 Vano Yehova aahikihimeerya wiira: “Mukhora ola ohaana okhala woowaleya ene. Ohitthukuliweke, nave ohikhale mutthu onrowa ovira mukhora ola. Tthiri, Yehova, Muluku a Isarayeli, oovira mukhora yoola.+ Tivonto, ohaana okhala woowaleya ene. 3 Masi, mukhulupale onookilaathi vaavo, wiira olye itthu sinivahiwa Yehova,+ okhala wiira owo mukhulupale. Owo onookela ni onookhuma nvaranta wa mukhora owo”.+

4 Nuumala-vo, owo aahikiviriha mukhora wa onorti, okiroiha ohoolo wa etemplo. Okathi kaawenhe aka, kaahoona wiira ovuwa wa Yehova waahisareya mutemplo mwa Yehova.+ Tivo, kaahikokhora, kuurama mpakha vathi.+ 5 Nto, Yehova aahikileela wiira: “Nyuwo mwaana a mutthu, nvahe ephoole, nwehe ni nwiriyane oratteene itthu sootheene kinooleelaakani, sinivarihana ni sooruma ni malamulo a etemplo ya Yehova. Nwehe oratteene mikhora anivira aya atthu yaakelaka mutemplo, ni mikhora sootheene anivira aya yaakhumaka nipuro noowaarya.+ 6 Muhaana waaleela atthu oohiiwelela a wIsarayeli wiira: ‘Etthu onihimya awe Pwiya Muulupalexa Yehova, tiila: “Nyuwo atthu a nloko na Isarayeli, itthu sootheene sootepa onanara muniira anyu, khasireere waatta. 7 Okathi munaaruuha anyu anamurwa mutemplo mwaka, nlelo mirima saya siri ene sootakhala, nave nlelo ahinnuwihiwe, awo anninanariha etemplo eyo. Nyuwo munnikivaha eyoolya aka, ekortuura ya enama ni ephome, variki nlelo nivarihano naka nihononiwaka mwaha wa miteko sanyu sootheene sootepa onanara. 8 Nyuwo khamunikhapelela itthu saka soowaarya.+ Ohiya-vo, munnaathanla atthu akina wiira avareke miteko nipuro naka noowaarya”’.

9 “‘Etthu onihimya awe Pwiya Muulupalexa Yehova, tiila: “Khuuvo namurwa onikhala wIsarayeli, yoowo onipaka itthu sootakhala vamurimani vawe ni ohinnuwihiwe, okhanle ookela nipuro naka noowaarya”’.

10 “‘Masi alevi, yaawo yaakihiyale+ okathi aisarayeli yaakihiyale aya wiira atthareke ilatarato saya soohiirya,* anoohaawa mwaha wa itampi saya. 11 Nto anrowa okhala anamuteko a opuro aka woowaarya, wiira awehaweheke mikhora sa otemplo+ ni avareke muteko mutemplo. Awo anrowa ohitaka inama sinivahiwa ntoko yoovaha para opahiwa ni mukuttho, wiira atthu aleveleliwe itampi. Anrowa weemelaka ohoolo wa atthu, wiira yaavareleke muteko. 12 Miyo koolapha kiteexale ene ntata naka wiira kaavirikanye. Kihiira siiso, mwaha woowaavarela muteko atthu, okathi atthu awo yaakokhorela aya ilatarato saya soohiirya ni mwaha woowiiriha atthu a Isarayeli ottheka.+ Tivo, awo anoohaawa mwaha wa itampi saya’. Pwiya Muulupalexa Yehova tonihimya. 13 Awo khanrowa okaattamela wiira akivarele muteko ntoko anamukuttho aka, nnakhala khanrowa waattamela itthu saka soowaarya aahiiso soowaaryaxa. Animuuliwa muru mwaha wa itthu sootepa onanara apanke aya. 14 Masi kinimwaavaha muritti wa okhapelela etemplo, wiira awehaweheke miteko sootheene sinivariwa mutemplo ni itthu sootheene sikhanle oovariwa memmo’.+

15 “Pwiya Muulupalexa Yehova, onihimya wiira: ‘Masi, anamukuttho alevi, anamwane a Sadoki,+ yaawo yaarina muritti wa okhapelela etemplo aka okathi aisarayeli yaahiyale aya okitthara,+ anookaattamela wiira akivareleke muteko. Awo animweemela ohoolo waka, wiira akivaheke ekortuura+ ni ephome ya inama.+ 16 Ti yaawo anrowa okela mutemplo mwaka. Awo animwaattamela vameesa vaka wiira akivareleke muteko.+ Nave anrowa okhapelelaka miteko saya akivarelaka miyo.+

17 “‘Okathi anrowa aya okela mikhora sa nivate na muhina, ahaana owara malaya a eliinyu.+ Awo ahiware ekuwo epakiwe ni manri a ipwittipwitthi okathi anivara aya muteko, waattamela vamukhora wa nivate na muhina aahiiso mpaani. 18 Ahaana owara maleeso a eliinyu, ni akaputtula oorakama a eliinyu.+ Ahiware etthu enrowa owiiriha orettheela. 19 Ahinatthi okhumela nivate na ota, eyo piiyo, nivate anikhala aya atthu, awo ahaana orula malaya yaawanre aya okathi yaavara aya muteko,+ nave ahaana opweha esaala yoowaarya anamukuttho anilya aya.+ Nuumala-vo, ahaana owara malaya makina, wiira ahiwiirihe atthu okhala oowaarya, mwaha wa malaya yaawanre aya. 20 Awo ahimettheke mputu+ nnakhala ahihiyeke ikharari saya sinnuwaka vanceene. Ahaana ovukula ikharari saya vakhaani. 21 Anamukuttho ahiwuryeke eviinyu okathi anikela aya nivate na muhina.+ 22 Awo ahimutheleke muthiyana naamukhweli aahiiso muthiyana omwalaniwe.+ Masi, ahaana omuthela muthiyana a osuulu wa Isarayeli, yoowo ohitonko orupa ni mulopwana, aahiiso omuthela muthiyana naamukhweli a namukuttho’.+

23 “‘Awo ahaana waaleela atthu aka moota onivirikana aya etthu yoowaarya ni etthu ehikhanle yoowaarya. Nave ahaana owiixuttiha atthu awo moota onivirikana aya etthu yoohiloka ni etthu yooloka.+ 24 Ahaana okhala alipa-oophuka milattu okathi onikhumelela aya mulattu.+ Ahaana ophuka attharaka moolumo aka oophukela.+ Awo ahaana otthara malamulo aka ni malakiheryo aka a moota woopaka ifesta saka sootheene.+ Nave, ahaana oreeriha isaabadu saka. 25 Awo ahaattameleke murutthu wiira ahiinanarihe. Masi vakhala wiira murutthu owo ti wa paapa aya, maama aya, mwanaya mwaamulopwana, mwanaya mwaamuthiyana, munnaya, aahiiso murokoraya ohitheliwe, pooti wiinanariha.+ 26 Nuumala namukuttho wiireeriha, ohaana olipelela mpakha mahiku 7. 27 Nihiku namukuttho onrowa awe okela nipuro noowaarya, vanivateni na muhina, wiira ovare muteko nipuro nno noowaarya, ohaana ovaha yoovaha awe wiira oleveleliwe etampi awe’.+ Pwiya Muulupalexa Yehova tonihimya.

28 “‘Etthu anrowa aya ohiyeriwa, tiila: Miyo kiri etthu ahiyeriwe aya.+ Muhaavahe mathala wIsarayeli, okhala wiira etthu ahiyeriwe aya ti miyo. 29 Ti yaawo anrowa olyaaka yoovaha ya ipyo,+ yoovaha para oleveleliwa etampi ni yoovaha mwaha wa okhalana mulattu.+ Nave, itthu sootheene sa wIsarayeli sinivahiwa Muluku, sinrowa okhala sawaya.+ 30 Mihokorokho sootheene sooreerexa sinipacerya ottokottha ni itthu sootheene munivaha anyu, sinrowa okhala sa anamukuttho.+ Muhaana onvaha namukuttho, otthu* woopacerya wa ipyo soopacerya ohempwa.+ Siiso, itthoko sanyu sinooreelihiwa.+ 31 Anamukuttho ahimukhuureke mwaapalame nnakhala ahikhuureke enama yiikhwenle aahiiso enyaanyiwe ni mwaamunama mukina’.+

45 “‘Okathi munrowa anyu okawanaka elapo ntoko etthu muhiyeriwe anyu,+ muhaana onvaha Yehova mpantta mmosa wa elapo eyo.+ Mpantta owo onrowa okhala woowaarya. Orakama waya ohaana okhala etthu yoowiiraka ikiloomo 13,* nave okhuveya waya ohaana okhala etthu yoowiiraka ikiloomo thanu.*+ Mpantta owo wootheene onrowa okhala woowaarya. 2 Muhina wa mpantta owo wa elapo, ahaana okhala mathala a nipuro noowaarya, anlikana ipantta sootheene. Orakama waya onrowa okhala etthu yoowiiraka imeeturu 259,* nave okhuveya waya onrowa okhala etthu yoowiiraka imeeturu 259.+ Mathala awo anookhalana opuro onilyihiwa inama, aniphiyerya etthu yoowiiraka imeeturu 26.*+ 3 Muhina wa mpantta owo, muhaana ophima mpantta oniphiyerya etthu yoowiiraka ikiloomo 13 orakama waya, ni ikiloomo thanu okhuveya waya. Weiwo tonrowa aya okhala nipuro noowaarya. Nipuro nlo ninrowa okhala etthu yoowaaryexa. 4 Mpantta owo wa elapo, onrowa okhala wa anamukuttho,+ yaawo anivara muteko mutemplo ni animwaattamela Yehova wiira anvareleke muteko.+ Epantta eyo ya elapo, anamukuttho tanrowa aya oteka ipa saya ni onrowa okhala nipuro noowaarya enrowa aya okhala etemplo.

5 “‘Para alevi yaawo anivara muteko mutemplo, onookhala mpantta wa elapo oniphiyerya etthu yoowiiraka ikiloomo 13 orakama waya, ni etthu yoowiiraka ikiloomo thanu okhuveya waya.+ Awo anoovahiwa isaala 20 anilya aya atthu+ wiira sikhale sawaya.

6 “‘Muhaana ovaha mpantta wa elapo eyo, wiira ekhale epooma. Orakama waya onrowa okhala etthu yoowiiraka ikiloomo 13, ni okhuveya waya onrowa okhala etthu yoowiiraka ikiloomo piili nnimeya.* Mpantta owo onrowa olikanaka ni mpantta wa elapo ovahiwe Muluku, ntoko mpantta woowaarya.+ Mpantta owo, onrowa okhala wa atthu ootheene a nloko na Isarayeli.

7 “‘Mukhulupale onookaweliwa elapo awe. Elapo eyo enrowa okhala ipantta soopiili: Nipuro noowaarya ovahiwe Muluku ni opuro othanleliwe okhala epooma. Elapo eyo enrowa waattamela nipuro noowaarya ovahiwe Muluku ni opuro othanleliwe okhala epooma. Eyo enrowa okhala mpantta onikhuma nsuwa ni mpantta onikela nsuwa. Wunnuwa waya onrowa okhuma omukanoni wa mpantta onikela nsuwa mpakha omukanoni wa mpantta onikhuma nsuwa, eluluwanyaka ilapo sa mahimo a Isarayeli.+ 8 Ela enrowa okhala elapo ya mukhulupale a wIsarayeli. Makhulupale aka khantthikela-tho waahaaxa atthu aka,+ nave awo animwaavaha elapo atthu a nloko na Isarayeli, attharaka mahimo aya’.+

9 “Etthu onihimya awe Pwiya Muulupalexa Yehova, tiila: ‘Nyuwo makhulupale a wIsarayeli, itthu soohiloka mpanke anyu khasireere waatta!’

“‘Muhiye otakhala wanyu ni waahaaxa wanyu atthu, mpakeke itthu sa xariya ni sooloka.+ Muhiye owaakha atthu aka elapo aya’.+ Pwiya Muulupalexa Yehova tonihimya. 10 ‘Muhaana orumeela epalansa yeekeekhai, orumeela mphimo wa eefa weekeekhai* ni mphimo wa epaathu weekeekhai.*+ 11 Ohaana okhala mphimo mmosa para eefa ni mphimo mmosa para epaathu. Epaathu emosa ehaana okhala iliituru 22, otthariwaka mphimo wa ehoomeri.* Vano eefa emosa ehaana okhala iliituru 22, otthariwaka mphimo wa ehoomeri. Nto ehoomeri tenrowa orumeeliwaka para ophima itthu sootheene. 12 Exeekele emosa+ ehaana okhala ikheera* 20. Vano ixeekele* 20 otakaaha ni ixeekele 25 ni otakaaha-tho ni ixeekele 15, ehaana okhala emane* emosa.

13 “‘Etthu mukhanle anyu oovaha, tiila: Ikiilu 160* sa esevaata, muhaana okumiha etthu yoowiiraka ikiilu tthaaru* wiira nvahe. Ikiilu 130* sa esevaata, muhaana okumiha etthu yoowiiraka ikiilu piili* wiira nvahe. 14 Makhura munrowa anyu ophimaka, muhaana ophima murumeelaka epaathu. Epaathu emosa enikhala iliituru 22.* Ipaathu 10 sinikhala ehoomeri emosa, okhala wiira ipaathu 10 sinlikana ni ehoomeri emosa. 15 Eriyari ya ipwittipwitthi 200 sa nikoto na ipwittipwitthi sa aisarayeli, muhaana ovaha epwittipwitthi emosa yoolopwana. Sootheene iyo sinrowa orumeeliwaka ntoko yoovaha ya ipyo,+ yoovaha para opahiwa+ ni mikuttho sa opatthani,+ wiira atthu aleveleliwe itampi saya’.+ Pwiya Muulupalexa Yehova tonihimya.

16 “‘Atthu ootheene a elapo eyo, anrowa onvahaka itthu iyo+ mukhulupale a wIsarayeli. 17 Masi mukhulupale tonrowa okhalana muritti wa ovaha soovaha para opahiwa+ ni yoovaha ya ipyo.+ Nave-tho, tonrowa okhalana muritti wa ovaha yoovaha eniwuriwa okathi wa efesta,+ khula mweeri musya, isaabadu+ ni ifesta sootheene sa atthu a nloko na Isarayeli.+ Owo tonrowa ovahaka yoovaha para oleveleliwa etampi, yoovaha ya ipyo, yoovaha enipahiwa ntero nene ni mikuttho sa opatthani, wiira atthu a nloko na Isarayeli aleveleliwe itampi saya’.

18 “Etthu onihimya awe Pwiya Muulupalexa Yehova, tiila: ‘Nihiku noopacerya na mweeri woopacerya, muhite epooyi yaamukhaani yooreera ya munikotoni mwanyu, wiira mureerihe etemplo mwaha wa itampi.+ 19 Namukuttho onoohavula ephome vakhaani ya yoovaha para oleveleliwa etampi, aattikitthele aaro a mukhora wa etemplo.+ Nave ohaana ottikitthela ikantu ixexe sa epantta ya vathi enimurukurerya altaari ni waattikitthela aaro a mukhora wa nivate na muhina. 20 Muhaana wiira siiso nihiku na neethanu nenli na mweeri owo, nwiirelaka ale anittheka ahilakenle aahiiso ahisuwenle.+ Siiso, munooreeriha etemplo mwaha wa itampi.+

21 “‘Nihiku 14 na mweeri woopacerya, muhaana omutthapela Paasikha.+ Mpakha mahiku 7, sihaana okhuuriwaka iphaawu soohiheliwa eferemento.+ 22 Nihiku nlo, mukhulupale onoovaha epooyi yaamukhaani ntoko yoovaha para oleveleliwa etampi awe ni itampi sa atthu ootheene a mulaponi.+ 23 Mahiku awo 7 a efesta, khula nihiku, mukhulupale owo ohaana onvaha Yehova yoovaha para opahiwa ya ipooyi 7 saamukhaani ni sooreera ni ipwittipwitthi soolopwana 7 sooreera.+ Nave-tho, khula nihiku ohaana ovaha epuri yoolopwana ntoko yoovaha para oleveleliwa etampi. 24 Khula epooyi yaamukhaani onivaha awe, ohaana-tho ovaha eefa emosa ya ipyo. Nave khula epwittipwitthi yoolopwana onivaha awe, ohaana-tho ovaha eefa emosa ya ipyo. Khula eefa emosa onivaha awe, ohaana-tho ovaha ehiini* emosa ya makhura.

25 “‘Okhuma nihiku 15 na mweeri owo wa neethanu nenli mpakha vanimalela aya efesta ya mahiku 7,+ mukhulupale owo ohaana ovaha itthu simosa-ru para oleveleliwa etampi, yoovaha para opahiwa, yoovaha ya ipyo ni makhura’”.

46 “Etthu onihimya awe Pwiya Muulupalexa Yehova, tiila: ‘Mukhora wa nivate na muhina, yoowo oniweha mpantta onikhuma nsuwa,+ ohaana owaliwa+ mahiku 6 a muteko.+ Masi nihiku na saabadu ni nihiku na mweeri musya, ohaana ohuliwa. 2 Mukhulupale ohaana okela nvaranta wa mukhora owo,+ nave ohaana weemela waattamela vamukhora vaavo. Anamukuttho anoovaha yoovaha para opahiwa ni mikuttho sa opatthani anrowa aya oruuha. Nave anookokhora mukerekhere mwa mukhora owo, nuumala-vo akhumeke. Masi, mukhora owo ohiwaliweke mpakha makaaripi. 3 Nave-tho, atthu a elapo eyo anookokhora ohoolo wa Yehova vamukhora, mahiku a esaabadu ni mahiku a khula mweeri musya.+

4 ‘“Yoovaha para opahiwa mukhulupale onrowa awe onvaha Yehova nihiku na saabadu, ehaana okhala ya ipwittipwitthi 6 soolopwana saamukhaani ni sooreera ni epwittipwitthi emosa yoolopwana yuulupale.+ 5 Vamosa ni epwittipwitthi emosa yoolopwana yuulupale, ohaana ovaha eefa* emosa ya ipyo. Vamosa ni ipwittipwitthi 6 saamukhaani soolopwana, owo ohaana ovaha khula etthu oniwerya awe. Vano, khula eefa ya ipyo, ohaana ovaha vamosa ni ehiini* emosa ya makhura.+ 6 Nihiku onooneya aya mweeri musya, yoovaha enrowa ovahiwa ehaana okhala ya epooyi yaamukhaani yooloka, ipwittipwitthi 6 saamukhaani soolopwana ni epwittipwitthi emosa yuulupale yoolopwana. Sootheene iyo sihaana okhala sooloka.+ 7 Vamosa ni epooyi emosa yaamukhaani, ohaana ovaha eefa emosa ya ipyo. Vamosa ni epwittipwitthi emosa yuulupale yoolopwana, ohaana ovaha eefa emosa ya ipyo. Nave vamosa ni ipwittipwitthi 6 soolopwana, ohaana ovaha khula etthu oniwerya awe. Nave-tho, khula eefa ya ipyo, ohaana ovaha vamosa ni ehiini emosa ya makhura.

8 “‘Okathi mukhulupale onikela awe mpaani, ohaana okela oviraka nvaranta wa mukhora owo, nave ohaana okhuma oviraka opuro ene yoowo.+ 9 Atthu a elapo ela yaarwaaka ohoolo wa Yehova okathi wa efesta,+ ale anrowa okelaka mpaani wiira amukokhorele Muluku aviraka mukhora wa onorti,+ yaakhumaka ahaana ovira mukhora wa osuuli.+ Nave ale anrowa okela mpaani wiira amukokhorele aviraka mukhora wa osuuli, yaakhumaka ahaana ovira mukhora wa onorti. Khuuvo okhanle ootthikela ovira mukhora yoole ovinre awe okelaka, okhala wiira ahaana okhuma mukhora ori mpantta mukina. 10 Vano mukhulupale ori naawo, ohaana okela mpaani okathi awo anikela aya, nave ohaana okhuma okathi awo anikhuma aya. 11 Okathi wa ifesta,* ohaana ovaha eefa emosa ya ipyo vamosa ni epooyi emosa yaamukhaani. Vamosa ni epwittipwitthi emosa yuulupale yoolopwana, ohaana ovaha eefa emosa ya ipyo. Nave vamosa ni ipwittipwitthi 6 soolopwana, ohaana ovaha khula etthu oniwerya awe. Nave-tho, khula eefa ya ipyo, ohaana ovaha vamosa ni ehiini emosa ya makhura.+

12 “‘Akhala wiira mukhulupale onoovaha yoovaha para opahiwa+ aahiiso mikuttho sa opatthani ntoko etthu eninvaha awe Yehova voohikhanyereriwa, ohaana ohuleliwa mukhora ori mpantta onikhuma nsuwa. Nto owo ohaana ovaha yoovaha awe para opahiwa ni mikuttho sawe sa opatthani, ntoko oniira awe nihiku na saabadu.+ Nuumala mukhulupale owo okhumela ota, mukhora owo ohaana owaliwa.+

13 “‘Khula nihiku, Yehova ohaana ovahiwa yoovaha para opahiwa, ya epwittipwitthi emosa yaamukhaani yoolopwana ni yooloka, erina eyaakha emosa.+ Ehaana opakiwa eyo khula voosiisu. 14 Vamosa ni epwittipwitthi eyo, khula voosiisu muhaana ovaha epantta ya neethanu namosa ya eefa* ntoko yoovaha ya ipyo. Nave-tho, ehaana ovahiwa epantta ya neeraru ya ehiini ya makhura wiira etatheliweke otthu wooreerexa onivahiwa Yehova, ntoko yoovaha ya ipyo ya khula nihiku. Nla nlamulo na mahiku ootheene. 15 Khula voosiisu, ehaana ovahiwa epwittipwitthi yaamukhaani yoolopwana, yoovaha ya ipyo ni makhura, ntoko yoovaha para opahiwa’.

16 “Etthu onihimya awe Pwiya Muulupalexa Yehova, tiila: ‘Akhala wiira mukhulupale onimwaakawela mathala anaawe ntoko etthu ahiyeriwe aya, mathala awo anrowa okhala awaya. Mathala awo anrowa okhala etthu ehiyeriwe aya. 17 Akhala wiira mukhulupale onookuxa etthu ohiyeriwe awe onavaha epottha awe, etthu eyo enrowa okhala ya epottha eyo mpakha eyaakha enitaphuliwa aya.+ Nuumala-vo, etthu eyo onoottikiheriwa mukhulupale owo. Anaawe mukhulupale paahi, takhanle oohalana mahiku ootheene, etthu ehiyeriwe aya. 18 Mukhulupale ohikuxe etthu ahiyeriwe aya atthu aka, owoomolaka mmathalani mwaya. Owo ohaana waakawela anaawe mathala ohiyeriwe awe, wiira ohikhale mutthu a nloko naka onrowa woomoliwa mmathalani mwawe’”.

19 Nuumala-vo, owo aahikikeliha mpaani, okivirihaka mukhora+ waari waattamela mukhora waaroiha isaala yaalya aya anamukuttho, seiyo saaweha onorti.+ Weiwo kaahiweha opuro waari ottuli, mpantta onikela nsuwa. 20 Mulopwana owo aahikileela wiira: “Ola ti opuro anamukuttho anrowa aya waapeyaka enama ya yoovaha mwaha wa okhalana mulattu ni yoovaha para oleveleliwa etampi. Nave opuro yoowo anrowa aya wooxaka yoovaha ya ipyo,+ wiira ahikumiherye vanivateni na ota, etthu yaarowa owiiriha atthu okhala oowaarya”.+

21 Owo aahikikumiherya vate, okiroiha nivate na ota, okivirihaka ikantu sooxeexe sa nivate nno. Nto khula ekantu ya nivate nlo, kaahiweha nivate nikina. 22 Ikantu sooxeexe sa nivate nlo, yaahikhala mavate macikhaani, orakama waya waari etthu yoowiiraka imeeturu 21,* nave okhuveya waya waari etthu yoowiiraka imeeturu 15 nnimeya.* Munnuwelo wa mavate awo maxexe, waamulikana. 23 Yaahikhala exiri yaamukhaani yaarukurerya ikantu iyo sooxeexe, vano vathi vaya, yaahikhala mapuro yaapeiwa aya enama ya soovaha iyo. 24 Nuumala-vo, mulopwana owo aahikileela wiira: “Ala mapuro yaale atthu anivara muteko mutemplo, anaapeya aya enama ya mukuttho oniruuhiwa ni atthu”.+

47 Owo aahikikuxa okihokoloxerya vamukhora wa etemplo.+ Nto weiwo kaahiweha maasi yaakhuma vathi wa etemplo,+ yaawo yaarowa mpantta onikhuma nsuwa, okhala wiira epantta ya ohoolo ya etemplo yaaweha mpantta onikhuma nsuwa. Maasi awo yaakhuma vathi, moono woolopwana wa etemplo, arowaka mpantta wa osuuli wa altaari.

2 Nuumala-vo, aahikikumiherya vate okivirihaka mukhora wa onorti.+ Nave aahikirukureriha vate, mpakha mukhora wa vate waaweha mpantta onikhuma nsuwa.+ Nto weiwo kaahoona maasi yaavira akhumaka moono woolopwana.

3 Okathi mulopwana owo aaronwe awe mpantta onikhuma nsuwa, okunxe ene mmatatani mwawe mukhoyi woophimana,+ aahiphima etthu yoowiiraka imeeturu 518,* okiviriha mmaasini-mmo. Nto maasi awo yaakikotela* mukosani.

4 Nuumala-vo, mulopwana owo aahiphima-tho etthu yoowiiraka imeeturu 518, okiviriha mmaasini-mmo. Nto maasi awo yaakimalela mmakuthani.

Aahiphima-tho etthu yoowiiraka imeeturu 518, okiviriha mmaasini-mmo. Vano maasi awo yaakimalela muyuununi.

5 Okathi aatthikenle awe ophima etthu yoowiiraka imeeturu 518, nto waari muro wootupa, vahaaweryaneya olapuwa. Nto wiira mutthu olapuwe aahaana okata, okhala wiira maasi awo khiyaareere wiixa. Muro owo khivaaweryaneya olapuwa mwentto.

6 Owo aahikikoha wiira: “Nyuwo mwaana a mutthu, mooweha etthu ela?”

Nuumala-vo, aahikeettiha ni aahikittikiherya mukerekhere mwa muro owo. 7 Okathi kaatthinke aka, kaahoona wiira mukerekhere mwa muro owo saahikhala miri soovirikana mipantta soomiili.+ 8 Vano, owo aahikileela wiira: “Maasi ala anitthimakela mpantta onikhuma nsuwa, anavira wAraba,*+ nuumala-vo ankela mphareya.+ Okathi anrowa aya okela mphareya, maasi a mphareya anrowa okhala oosiva. 9 Mapuro ootheene maasi awo anrowa aya oviraka, sinookhalaka soopattuxiwa sikumi. Sinookhala ihopa soowaatta, okhala wiira maasi awo anrowa oviraka weiwo. Maasi a mphareya anookhala oosiva, nave mapuro maasi awo anivira aya, itthu sootheene sinookhalaka sikumi.

10 “Alipa-anitotha ihopa, animweemela mukerekhere wa muro owo, okhuma wEni-Gedi,+ mpakha wEni-Eglayimi, weiwo onrowa aya okhala opuro woowuumiha matthavi anitothaniwa ihopa. Opuro owo sinookhala mithinto sinceene sa ihopa, ntoko ihopa sa Ephareya Yuulupale.*+

11 “Anookhala maratta ni makuwa, nto maasi aya khanrowa osivaka. Awo anrowa okhala maakha-ru.+

12 “Mipantta soomiili sa muro owo, sinimunnuwaka miri sa mithinto sootheene, sirina mihokorokho sinilyiwa. Makukhu aya khanrowa onyaalaka, nnakhala khasinrowa wooceelaka wiima mihokorokho. Khula mweeri sinrowa wiimaka mihokorokho, okhala wiira miri iyo siniwurya maasi anikhuma nipuro noowaarya.+ Mihokorokho saya sinrowa olyiwaka, nave makukhu aya anrowa orumeeliwaka para waapenuxa atthu”.+

13 Etthu onihimya awe Pwiya Muulupalexa Yehova, tiila: “Ola ti muttetthe munrowa anyu okawela mahimo 12 a Isarayeli, wiira okhale opuro ahiyeriwe aya. Vano osuulu wa Yosefe onrowa waakhela ipantte piili.+ 14 Nyuwo munoohiyeriwa elapo ela ni munimwaakhela ipantte soolikana. Miyo kooleiherya waavaha elapo ela amuhavinre anyu.+ Nto vano nyuwo mookaweliwa wiira ekhale etthu muhiyeriwe anyu.

15 “Mukano wa mpantta wa onorti wa elapo eyo, tuula: Onipacerya Ephareya Yuulupale, onavira oHetiloni,+ onarowa mpakha oSedadi,+ 16 oHamati,+ oBerotayi+ ni oSibirayimi, weiwo ori eriyari ya oDamaasiko ni muttetthe wa oHamati. Onnivikana orowaka oHaseri-Hatikoni, weiwo onivahana mukano ni oHawurani.+ 17 Mukano owo, onipacerya ephareya ya oHasari-Enoni+ ottharaka mukano wa onorti wa oDamaasiko ni mukano wa oHamati.+ Ola tori mukano wa onorti.

18 “Mpantta onikhuma nsuwa wa elapo eyo, onivira eriyari ya oHawurani ni oDamaasiko, onatthara muro Yordani, eriyari ya oXileyaadi+ ni elapo ya wIsarayeli. Muhaana ophima okhuma mukano wa onorti, mpakha ephareya eri mpantta onikhuma nsuwa.* Ola tori mukano wa mpantta onikhuma nsuwa.

19 “Mukano wa osuuli onrowa opacerya oTamari, mpakha maasi a oMeriba-Kadexi,+ onavira oMuro mpakha Ephareya Yuulupale.+ Ola tori mukano wa osuuli.

20 “Mpantta onikela nsuwa, yookhala Ephareya Yuulupale, okhuma mukano wa osuuli mpakha nipuro nimosa nri ohoolo wa oLebo-Hamati.*+ Ola tori mukano wa mpantta onikela nsuwa”.

21 “Nyuwosa muhaana okawelana elapo eyo. Mukawelane eriyari ya mahimo 12 a Isarayeli. 22 Muhaana okawelana elapo ela ntoko etthu muhiyeriwe anyu. Nave-tho, muhaana waakawela anamurwa anikhala ni nyuwo, yaawo yaayanre anaaya akhalaka ni nyuwo. Awo anrowa okhalaka ntoko aisarayeli, ayariwe elapo yeela. Eriyari ya mahimo a Isarayeli, awo animwaakhela opuro vamosa ni nyuwo, ntoko etthu ahiyeriwe aya. 23 Muhaana onvaha opuro namurwa mulaponi mwa nihimo omanke awe wiira okhale wawawe”. Pwiya Muulupalexa Yehova tonihimya.

48 “Iya ti mittetthe sa mahimo a aisarayeli, moovarihana ni masina aya, opaceryaka epantta ya onorti: Epantta ya Dani,+ enivira estaraata ya oHetiloni erowaka oLepo-Hamati,*+ mpakha oHasari-Enani mmukanoni wa oDamaasiko owehaka onorti, ottuli wa oHamati.+ Nave, onikhuma omukanoni wa mpantta onikhuma nsuwa mpakha omukanoni wa mpantta onikela nsuwa. 2 Epantta ya Axeri,+ enivahana mukano ni epantta ya Dani, okhuma mmukanoni wa mpantta onikhuma nsuwa mpakha omukanoni wa mpantta onikela nsuwa. 3 Epantta ya Nefetali,+ enivahana mukano ni epantta ya Axeri, okhuma omukanoni wa mpantta onikhuma nsuwa mpakha omukanoni wa mpantta onikela nsuwa. 4 Epantta ya Manase,+ enivahana mukano ni epantta ya Nefetali, okhuma omukanoni wa mpantta onikhuma nsuwa mpakha omukanoni wa mpantta onikela nsuwa. 5 Epantta ya Efrayimi, enivahana mukano ni epantta ya Manase,+ okhuma omukanoni wa mpantta onikhuma nsuwa mpakha omukanoni wa mpantta onikela nsuwa. 6 Epantta ya Rubeni, enivahana mukano ni epantta ya Efrayimi,+ okhuma omukanoni wa mpantta onikhuma nsuwa mpakha omukanoni wa mpantta onikela nsuwa. 7 Epantta ya Yuda, enivahana mukano ni epantta ya Rubeni,+ okhuma omukanoni wa mpantta onikhuma nsuwa mpakha omukanoni wa mpantta onikela nsuwa. 8 Omukanoni wa Yuda, okhuma mukano wa mpantta onikhuma nsuwa mpakha mukano wa mpantta onikela nsuwa, muhaana osuka epantta emosa wiira nvahe. Orakama wa epantta eyo, ohaana okhala etthu yoowiiraka ikiloomo 13,*+ nave okhuveya waya ohaana olikanaka ni munnuwelo wa ipantte sa mahimo makina, okhumaka omukanoni wa mpantta onikhuma nsuwa mpakha omukanoni wa mpantta onikela nsuwa. Vano, etemplo enrowa okhala eriyari ya epantta eyo.

9 “Epantta munrowa anyu onvaha Yehova, orakama waya ohaana okhala etthu yoowiiraka ikiloomo 13, nave okhuveya waya ohaana okhala etthu yoowiiraka ikiloomo thanu.* 10 Nlo ninrowa okhala nipuro noowaarya na anamukuttho.+ Orakama waya mpantta wa onorti, onrowa okhala etthu yoowiiraka ikiloomo 13. Okhuveya waya mpantta onikela nsuwa, onrowa okhala etthu yoowiiraka ikiloomo thanu. Nave okhuveya waya mpantta onikhuma nsuwa, onrowa okhalaka etthu yoowiiraka ikiloomo thanu. Vano orakama waya mpantta wa osuuli, onrowa okhala etthu yoowiiraka ikiloomo 13. Nto etemplo ya Yehova enrowa okhala eriyari ya epantta eyo. 11 Opuro owo, onrowa okhala wa anamukuttho ooreerihiwa, anamwane a Sadoki,+ yaawo yaakivarela muteko ni yahaakihiyale, okathi aisarayeli ni alevi yaakihiyale aya.+ 12 Awo anoovahiwa opuro yoowo osukiwe, wiira okhale ntoko etthu yoowaaryexa. Opuro owo onivahana mukano ni alevi.

13 “Omalaka-ru muttetthe wa anamukuttho, alevi anoovahiwa mpantta mmosa, orakama waya ori etthu yoowiiraka ikiloomo 13, nave okhuveya waya ori etthu yoowiiraka ikiloomo thanu. (Munnuwelo wa mpantta wootheene, orakama waya onrowa okhala etthu yoowiiraka ikiloomo 13, nave okhuveya waya onrowa okhala etthu yoowiiraka ikiloomo thanu.) 14 Awo khakhanle ootumiha, oturukana, nnakhala onvaha mutthu mukina mpantta mwaamukhaani wa elapo eyo, okhala wiira elapo eyo ti yoowaarya para Yehova.

15 “Vano, opuro onrowa ohala, yoowo ori etthu yoowiiraka ikiloomo piili nnimeya* okhuveya waya, nave orakama waya ori etthu yoowiiraka ikiloomo13, onrowa orumeeliwaka ni atthu a opooma,+ wiira atekeke ipa saya ni alyiheke inama saya. Epooma enrowa okhala eriyari ya opuro owo.+ 16 Munnuwelo wa ixiri sa epooma, tuula: Mpantta wa onorti, orakama waya ti wa etthu yoowiiraka ikiloomo piili nnimeya.* Mpantta wa osuuli, orakama waya ti wa etthu yoowiiraka ikiloomo piili nnimeya. Mpantta onikhuma nsuwa, orakama waya ti wa etthu yoowiiraka ikiloomo piili nnimeya. Vano mpantta onikela nsuwa, orakama waya ti wa etthu yoowiiraka ikiloomo piili nnimeya. 17 Mapuro a epooma eyo sinilyihiwa aya inama, mpantta wa onorti, orakama waya onrowa okhala etthu yoowiiraka imeeturu 130.* Mpantta wa osuuli, orakama waya onrowa okhala etthu yoowiiraka imeeturu 130. Nave mpantta onikhuma nsuwa, orakama waya onrowa okhala etthu yoowiiraka imeeturu 130. Vano mpantta onikela nsuwa, orakama waya onrowa okhala etthu yoowiiraka imeeturu 130.

18 “Epantta enrowa ohala, enrowa olikanaka ni epantta ekhalihiwe yoowaarya.+ Wunnuwa waya onrowa okhala etthu yoowiiraka ikiloomo thanu mpantta onikhuma nsuwa, nave mpantta onikela nsuwa onrowa okhala etthu yoowiiraka ikiloomo thanu. Epantta eyo enrowa olikanaka ni opuro okhalihiwe woowaarya. Nave ale anivara muteko opooma, anrowa olimaka memmo wiira aphwanye eyoolya. 19 Epantta eyo enrowa olimmwaka ni atthu a mahimo ootheene a Isarayeli, yaawo anivara muteko opooma.+

20 “Munnuwelo wa epantta osukeriwe awe Muluku, ipantta sootheene sihaana olikana. Ipantta sootheene munnuwelo aya ohaana okhala etthu yoowiiraka ikiloomo 13. Nyuwo muhaana osuka epantta eyo vamosa ni epooma, wiira sikhale etthu yoowaarya ovahiwe awe Muluku.

21 “Nto, mpantta onrowa ohala wa ipantte iye piili, eyo piiyo, epantta ele evahiwe Muluku ni epooma, onrowa okhala wa mukhulupale.+ Onrowa okhala mmukanoni wa epantta ele evahiwe Muluku, yeeyo erina etthu yoowiiraka ikiloomo 13, mpantta onikhuma nsuwa ni mpantta onikela nsuwa. Orakama wa mukano wa epantta ya mukhulupale ni mukano wa ipantte sa mahimo manli yaattamanne, onoolikana. Epantta eyo enrowa ovahiwa Muluku ni etemplo, sinrowa okhala eriyari ya epantta ya mukhulupale.

22 “Epantta ya alevi ni epantta ya epooma, enrowa okhala eriyari ya epantta ya mukhulupale. Epantta ya mukhulupale, enrowa okhala eriyari ya epantta ya Yuda+ ni epantta ya Beniyamini.

23 “Vano, para mahimo makina ahanle, epantta ya nihimo na Beniyamini, enikhuma omukanoni wa mpantta onikhuma nsuwa mpakha omukanoni wa mpantta onikela nsuwa.+ 24 Epantta ya Simeyoni, enivahana mukano ni epantta ya Beniyamini,+ okhuma omukanoni wa mpantta onikhuma nsuwa mpakha omukanoni wa mpantta onikela nsuwa. 25 Epantta ya Isakari,+ enivahana mukano ni epantta ya Simeyoni, okhuma omukanoni wa mpantta onikhuma nsuwa mpakha omukanoni wa mpantta onikela nsuwa. 26 Epantta ya Zabuloni, enivahana mukano ni epantta ya Isakari,+ okhuma omukanoni wa mpantta onikhuma nsuwa mpakha omukanoni wa mpantta onikela nsuwa.+ 27 Epantta ya Gadi, enivahana mukano ni epantta ya Zabuloni,+ okhuma omukanoni wa mpantta onikhuma nsuwa mpakha omukanoni wa mpantta onikela nsuwa. 28 Mukano wa epantta ya osuuli, yoowo onivahana mukano ni Gadi, onikhuma oTamari,+ onarowa maasi a oMeriba-Kadexi,+ onavira oMuro*+ mpakha Ephareya Yuulupale.*

29 “Ela ti elapo munrowa anyu okawela mahimo a Isarayeli,+ wiira ekhale etthu ahiyeriwe aya. Nave iya ti sinrowa okhala ipantte saya”.+ Pwiya Muulupalexa Yehova tonihimya.

30 “Iya ti siri mikhora sa epooma anrowa aya okhumaka atthu: Epantta ya onorti, orakama waya ori etthu yoowiiraka ikiloomo piili nnimeya.+

31 “Mikhora sa epooma eyo sinrowa ovahiwa masina atthariwaka mahimo a Isarayeli. Sinookhala mikhora miraru onorti. Masina aya anrowa okhala ala: Mukhora wa Rubeni, mukhora wa Yuda ni mukhora wa Levi.

32 “Mpantta onikhuma nsuwa, orakama waya onrowa okhala etthu yoowiiraka ikiloomo piili nnimeya. Nave sinookhala mikhora miraru: Mukhora wa Yosefe, mukhora wa Beniyamini ni mukhora wa Dani.

33 “Mpantta wa osuuli, orakama waya onrowa okhala etthu yoowiiraka ikiloomo piili nnimeya. Nave sinookhala mikhora miraru: Mukhora wa Simeyoni, mukhora wa Isakari ni mukhora wa Zabuloni.

34 “Mpantta onikela nsuwa, orakama waya onrowa okhala etthu yoowiiraka ikiloomo piili nnimeya. Nave sinookhala mikhora miraru: Mukhora wa Gadi, mukhora wa Axeri ni mukhora wa Nefetali.

35 “Nto, orakama wa exiri yootheene enirukurerya epooma eyo, onrowa okhala etthu yoowiiraka ikiloomo 9 nnimeya.* Okhuma nihiku nlo orowa ohoolo, nsina na epooma eyo ninrowa okhala nna: Yehova Ori Weiwo”.+