MURUU WA NEETHANU

Otaphuwa Orina Aya Ale Animukokhorela Yehova

1, 2. (a) Mukhalelo xeeni wa otaphuwa Muluku anvanhe awe mulopwana ni muthiyana oopacerya? (b) Muhimye malamulo yaawo yaalamulela miteko sa Adamu ni Eva.

OKATHI Yehova vampattunxe awe mulopwana ni muthiyana oopacerya, awo yaahikhalana otaphuwa wuulupale onivikana otaphuwa orina apinaatamu olelo va. Etthoko aya yaari Eparayiisu, Ejardim yooreera ya wEedeni. Khiivo eretta yaakhoottiherya ohakalala wa okumi aya, okhala wira muupuwelelo aya ni irutthu saya saari soomalela. Awo khiyaalipelela okhwa, moovirikana ni olelo va atthu otheene anlipelela aya okhwa. Nave-tho, awo khahiyo yaari ntoko maakina, yaawo anipaka etthu epakeliwe aya paahi, masi yaahikhalana eparakha yooreera ya othanla mootaphuwa, eyo piiyo, owerya wa opaka soothanla saya. Nto, wira avikanihe okhala ootaphuwa, awo yaahaana ottittimiha malamulo a Muluku.

² Mwa ntakiheryo, nkahaya muthokorerye malamulo eephattu aneettiha itthu sipattuxiwe ni Muluku moolumwenkuni. Owehasa wene, malamulo awo khiyaalempwale, masi Adamu ni Eva yaapakiwe mmukhalelo waarowa aya wiiwelelaka malamulo awo mweephattu. Ovoliwa waya etala waasuweliha ophavela olya; ovoliwa ntthona waawooniherya ophavela owurya; wiila waawooniherya otthuneya waya orupa. Nave-tho Yehova aahaavaha muteko woovara. Mwekeekhai, muteko owo waari ntoko nlamulo, okhala wira waarowa olamulelaka mweettelo wa ikumi saya. Awo yaahaana waayaraka anamwane, weettiha mikhalelo sinceene sa okumi valaponi, ni wuncererya mikano sa mapuro yaakhala aya wira elapo yotheene ekhalee Eparayiisu. (Maphattuwelo 1:28; 2:15) Nto moota nlamulo nno naakumiherya aya mureerelo! Nlamulo nna naahaavaha muteko woohakalaliha vanceene, niwiirihaka orumeela osuwela waya moomalela mmikhalelo sooloka. Nave-tho, awo yaahikhalana otaphuwa wuulupale wira apakeke soothanla vamosaa ni moota saarowa aya waakhwaniheryaka muteko aya. Niireke wira yookhala etthu yahaarina aya toko?

3. Adamu ni Eva yaarowa wiixutta sai ovarihela muteko mwa miruku otaphuwa waya wa opaka soothanla?

³ Tthiri, nnaamwi Adamu ni Eva yaarina eparakha ya opakaka soothanla, ela khiyaataphulela wira soothanla sotheene saarowa aya opakaka saarowa okumiheryaka mireerelo sooloka. Otaphuwa waya wa opaka soothanla waahaana okhala muhina mwa malamulo ni ikano sa Muluku. Nto awo yaarowa wiixutta sai malamulo awo ni ikano iyo sa Muluku? Orweela mwa onwiriyana Mpattuxa aya ni wiixutta miteko sawe. Muluku aahaavaha Adamu ni Eva osuwela waatthuneya wira avariheleke muteko itthu siixuntte aya. Okhala wira yaapattuxiwe oomalela, muupuwelo aya weephattu waahaana wooniheryaka mikhalelo sa Muluku okathi wa opaka soothanla. Aayo, okathi wa opaka soothanla awo yaahaana wooniherya ephoole, akhala wira tthiri yaanixukhurela itthu sotheene yaavahiwe aya ni Muluku ni akhala wira yaaniphavela omuhakalaliha.​—Maphattuwelo 1:26, 27; Yohani 8:29.

4. (a) Niireke wira yooruma yaavahiwe Adamu ni Eva ya ohilya muhokorokho wa mwirii mmosaa yanaakhoottiherya okhala ootaphuwa? (b) Nthowa xeeni yoovekela ela yaary’aya yoophwanelela?

⁴ Nto, moophwanelela, Muluku aahithanla weehererya omwiiwelela waya ntoko Ole aavanhe okumi ni ophavela waya ohitupha mikano sa otaphuwa waavanha awe. Yehova aahaavaha Adamu yooruma ela: “Munowerya olya mihokorokho sothene siri mmatta-mu: muhilyé pahi mihokorokho sa mwirí onsuweliha oreriwa n’utakhaliwa. Mwalyá vale mihokorokho iya, tthiri munimokhwa”. (Maphattuwelo 2:16, 17) Nave-tho, nuumala opattuxiwa Eva, Eva owo aahileeliwa nlamulo nna. (Maphattuwelo 3:2, 3) Niireke wira nlamulo nna nanaakhoottiherya okhala ootaphuwa? Nnaari. Ohiya muhokorokho wa mwirii waakhoottihiwe, awo yaahikhalana yoolya yinceene yoosiva ya mikhalelo soovirikana. (Maphattuwelo 2:8, 9) Paahi vaari vootthuneya osuwela wira elapo ya vathii ti ya Muluku, okhala wira owo topattunxe. Tivonto Muluku ookhalana ehakhi ya opaka malamulo anivarihana ni yoolakela awe ni yaawo anaakumiherya mureerelo apinaatamu.​—Esalimo 24:1, 10.

5. (a) Adamu ni Eva ayelenle sai otaphuwa wuulupale waarina aya? (b) Exeeni yaaranttelinhe otaphuwa weiwo Adamu ni Eva waarina aya, ni moota xeeni eyo enivanre aya?

⁵ Masi exeeni yiiranen’ye? Mwaha wa nrima, nlaikha nimosaa naahirumeela moohiloka otaphuwa waya, nto nlaikha nno naahikhala Satana, nuulumo nintaphulela “Munyokhani”. Nlaikha nno naahinwoka Eva nimuleelaka etthu yaavirikanya otthuna wa Muluku. (Maphattuwelo 3:4, 5) Adamu aahimukhaliherya Eva otthekela nlamulo na Muluku. Mwaha wa weererya okuxa etthu yoohikhala yawaya, awo yaahiyeleela otaphuwa waya wuulupale. Nto awo yaahipakeya epottha ya yoottheka. Ntoko Muluku saahimenrye awe, moovira wa okathi awo yaahikhwa. Yoottheka ti etthu Adamu ni Eva yaahiyenrye aya anaaya, yeeyo enooneya ni yoophavela yeephattu ya opaka itthu soohiloka. Nto yoottheka yooruuha otteettheya weiwo onikumiherya iretta, wuuluvala, ni okhwa. Yoophavela ya opaka itthu soohiloka, yeeyo etepihiwe ni soohapuwela sa Satana, yookumiherya mulokiheryo wa apinaatamu woosareya sowiiraneya sinooniherya onyokhana, icrime, ohaaxana, ni ikhotto seiyo siwiivale atthu imilyau sinceene. Tthiri mukhalelo owo ti woovirikana ni otaphuwa weiwo Muluku aavanhe awe apinaatamu wanipacerya!​—Otumererya 32:4, 5; Yobi 14:1, 2; aRoma 5:12; Wisupulula 12:9.

Opuro Oniphwanyaneya Aya Otaphuwa

6. (a) Otaphuwa wekeekhai oniphwanyaneya woowi? (b) Muthinto xeeni wa otaphuwa Yesu aahimya awe?

⁶ Mwaha wa mikhalelo sootakhala sinooneya mapuro otheene olelo va, khahiyo vootikiniha waaweha atthu yinlelaka otaphuwa wekeekhai. Masi otaphuwa wekeekhai oniphwanyaneya woowi? Yesu aahimmye so: “Nyuwo, mwakhalela nthiti molumo aka, vekekhai munokhala awixutti aka; munosuwela ekekhai, vano ekekhai yeyo enimokhalihani òtaphuwa”. (Yohani 8:31, 32) Otaphuwa nno onihimya Yesu, khahiyo muthinto wa otaphuwa weiwo apinaatamu anlipelela aya vaavo vanimukhootta aya namalamulela aahiiso muthinto mukina wa eguvernu, nto khiyamuthanla mukina onimphavela aya. Moovirikana ni vo, otaphuwa nno yoophavela aya orii omaliha mixankiho sa apinaatamu. Yesu aalavula sa otaphuwa okhala epottha ya yoottheka. (Yohani 8:24, 34-36) Tthiri, vaavo mutthu vanikhala awe mwiixutti eekeekhai a Yesu Kristu, mutthu owo onnipaka mirukunuxo suulupale mookumini mwawe, eyo piiyo, onnikhala ootaphuwa!

7. (a) Nniwerya sai otaphuwa mu yoottheka olelo va? (b) Etthu xeeni enitthuneya ahu opaka wira nikhalee atthu ootaphuwa?

⁷ Ela khentaphulela wira olelo va maKristau eekeekhai khanixankiheya-tho ni yoophavela yeephattu ya opaka itthu soohiloka. Okhala wira awo aahiyeriwa yoottheka, nlelo anniwanana yoottheka eyo. (aRoma 7:21-25) Tthiri, akhala wira mutthu onikhala moovarihana ni sowiixuttiha sa Yesu, owo khonrowa-tho okhala epottha ya yoottheka. Yoottheka khenrowa-tho ovikaniha omulamulelaka, emwiirihaka wiiwelela khuta etthu otthuna-noohitthuna. Mutthu owo khonrowa omorela muraakho wa okuxa mweettelo wa okumi ohirina yoolakela aya ni yoowo onrowa omuhiya ni yowuupuxerya ya vamurimani yoohiloka. Owo onrowa okhalana yowuupuxerya ya vamurimani yooloka ohoolo wa Muluku, mwaha wa oleveleliwa soottheka sawe sa khalai orweela mwa waamini wawe mukuttho wa Kristu. Owehasa wene, soohapuwela sa yoottheka sinrowa weereryaka omulamulela, masi vaavo vanikhootta awe mwaha wa wuupuwela sowiixuttiha soowiiwanyeya sa Kristu, owo onooniherya wira khahiyo-tho epottha ya yoottheka.​—aRoma 6:12-17.

8. (a) EKristau yekeekhai ennivaha otaphuwa moota xeeni? (b) Niwooneleke sai akhulupale aneettiha elapo?

⁸ Muthokorerye otaphuwa orina ahu ntoko maKristau. Hiyo nootaphuliwa mu sowiixuttiha soowoka, okhala epottha ya woova ethiru, ni okhala epottha ya yoottheka. Ikeekhai suulupale voohimya sa mukhalelo wa alipa-ookhwa ni ohihimuwa soonitaphula woova okhwa moohikhalela. Osuwela wira moohipisa iguvernu sa apinaatamu oottheka sinrowa oranttelihiwa ni Omwene wa xariya wa Muluku, wooniiriha okhalana nlipelelo. (Daniyeli 2:44; Matheyo 6:10) Hataa vari siiso, otaphuwa iwo khonniiriha ohaattittimiha akhulupale aneettiha elapo ni malamulo aya.—Tito 3:1, 2; 1 Pedru 2:16, 17.

9. (a) Yehova onnikhaliherya sai moophenta ophwanya otaphuwa wuulupale weiwo apinaatamu aniwerya aya okhalana olelo va? (b) Ninrowa owerya sai opaka soothanla sa miruku?

⁹ Yehova khonrowa onihiya mekhihu neereryaka osuwela mweettelo wooloka wa okumi. Owo oosuwela moota nipakiwe ahu, etthu enniiriha ohakalala mwekeekhai, ni ele enniphwanyiha mureerelo woohimala. Owo onnisuwela muupuwelo ni mweettelo wa mutthu oniwerya ohonona wataana wawe ni Muluku vamosaa ni apinaatamu akhw’awe. Waaniheryasa pooti omwiiriha mutthu owo oyeleela okela mu elapo esyaa. Moophenta, Yehova onninleela itthu iya sotheene orweela mwa Biibiliya vamosaa ni mulokiheryo awe wowooneya. (Marko 13:10; aGalasia 5:19-23; 1 Timótheyo 1:12, 13) Nto muritti ahu orii wooniherya moota onrowa ahu orumeela othanla wahu wootaphuwa nivahiwe ahu ni Muluku. Moovirikana ni Adamu, akhala wira nnimwiiwelela ele Biibiliya ennileela awe, hiyo ninrowa opaka soothanla sa miruku. Hiyo ninrowa wooniherya wira wataana wooloka ni Yehova tokhanle wootthuneyexa mookumini mwahu.

Atthu Akina Aniphavela Muthinto Mukina wa Otaphuwa

10. Muthinto xeeni wa otaphuwa oniphavela aya ophwanya atthu akina yaawo ari Anamoona a Yehova?

¹⁰ Ikwaha sikina amiravo vamosaa ni atthu aalupale yaawo ari Anamoona a Yehova, pooti wuupuwelaka wira vaaniphaveleya okhalana muthinto mukina wa otaphuwa. Olumwenku pooti wooneyaka okhala ntoko wookuxa murima. Nto vaavo vanitepa aya wuupuwela itthu sa moolumwenkuni, ophavela waya opaka etthu ehinvarihana ni eKristau masi eri yoolema mulaponi, onrowa otepaka wunnuwa. Atthu awo waaniheryasa khanuupuwela olya moohiloka mirette sinihapala, ohapaliwa, aahiiso oraruwa. Masi anipacerya wataana ni ale ahikhanle maKristau eekeekhai, aphavelaka weemereriwa n’awo. Waaniheryasa, awo pooti opacerya otakiha ilavulelo saya ni mweettelo aya.​—3 Yohani 11.

11. Ikwaha sikina yoweeha ya opaka etthu yoohiloka enikhuma woowi?

¹¹ Ikwaha sikina, yoweeha eniwerya omwiiriha mutthu okuxa mweettelo ohinivarihana ni eKristau enikumiheriwa ni yoole onihimya omurumeela Yehova. Eyo ti etthu yaakhumelenle maKristau oopacerya, nto etthu emosaru eyo pooti oniiraneela olelo va. Atthu awo ikwaha sinceene aniphavela opaka itthu seiyo anoona aya wira sinimwaaruuhela ohakalala, masi itthu iya khisinivarihana ni malamulo a Muluku. Awo annaatumererya atthu akina wira “apuheke”. Awo “annahimerya atthu awo wira t’òtaphuwa, nto axinene t’ipottha sa solimalela saya sotakhala”.​—2 Pedru 2:19.

12. Itthu xeeni sooriipiha murima sinikhumelela mwaha wa mweettelo ohinivarihana ni malamulo a Muluku?

¹² Okathi wotheene, yookhumelela ya mweettelo owo onihimmwa okhala otaphuwa ti yoohiloka, okhala wira mweettelo owo onitaphulela ohiiwelela malamulo a Muluku. Mwa ntakiheryo, orupihana woohiloka onniruuha oxankiheya muupuwelo, eretta, okhwa, orupala woohitthuna, ni owehasa wene omwalana. (1 aKorinto 6:18; 1 aTesalonika 4:3-8) Olya moohiloka mirette sinihapala pooti okumiherya isaraa, olwaanya, evaasi, naaruuryu, ohimumula saana, onepa, ni okhwa. Ela pooti opakeya yoolimalela, emwiirihaka mutthu owo opaka ecrime wira ophwanye mirette iyo. Ohapaliwa onnikumiherya-tho mixankiho soolikana. (Miruku 23:29-35) Atthu yaale aneettiha okumi aya mmukhalelo owo, pooti wuupuwelaka wira tootaphuwa, masi vaavo vanisuwela aya wira aapakeya epottha ya yoottheka, oniira ovinre ene okathi munceene. Tthiri yoottheka pwiya ootakhala! Vano wuupuwelela mwaha ola, onoowerya onikhaliherya ni onikhapelela wira itthu iyo sihinikhumelele.​—aGalasia 6:7, 8.

Opuro Sinipacerya Aya Mixankiho

13. (a) Ikwaha sinceene, oninnuwa sai wunlela onikumiherya mixankiho? (b) Wira niiwexexe yootaphulela ya “wetta n’alavilavi”, nohaana okhalana moonelo wawani? (c) Vaavo vanaakhula anyu makoho ari ettima 13, muttittimiherye moonelo wa Yehova.

¹³ Nkahaya muupuwele opuro ikwaha sinceene mixankiho sinipacerya aya. Biibiliya onitthokiherya so: “Khula mutthu onnehereriwa ni wunlela wawe sotakhala, weiwo onimototha, onamukuxa. Vano, wunlela iwo sotakhala wavahiwa ikuru, onnikumiherya etampi: etampi yeyo, yinnuwaka vomalela enniphwanyiha okhwa”. (Yakobo 1:14, 15) Wunlela iwo oninnuwa sai? Orweela mwa itthu sinkela mmuupuweleloni. Ikwaha sinceene eyo enikhumelela mwaha wa wataana ni atthu ahinivarihela muteko malamulo a mBiibiliyani. Mwekeekhai, otheene ahu noosuwela wira nohaana osyaka “wetta n’alavilavi”. (1 aKorinto 15:33) Masi wataana xeeni ori woohiloka? Yehova onoonela sai mwaha owo? Wuupuwelela makoho anittharelana ni oweha soolepa siromoliwe masi khuhilempwa masuu aya, ohaana onikhaliherya waakhula moophwanelela makoho awo.

Niireke wira mwaha wa atthu akina wooneyaka ntoko oottittimiheya, eyo enitaphulela wira ti vooloka wataana n’awo? (Maphattuwelo 34:1, 2, 18, 19)

Niireke wira ovaanela waya, waaniheryasa moolumo aya eelolo, pooti wooniherya akhala wi vannireerela wataana n’awo? (aÉfeso 5:3, 4)

Yehova onoonela sai akhala wira ninthanla wataana ni atthu yaale ahinimphenta? (2 Wahala a Mamwene 19:1, 2)

Hataa nivaraka muteko poromosa aahiiso nrowaka hoothe oxikola ni atthu ahinkupali ele enikupali ahu, nthowa xeeni vary’aya vootthuneya okhalana ephoole? (1 Pedru 4:3, 4)

Omoona televisau ni ifilme, orumeela Internet, ni osoma iliivuru, irevista ni ijornale, sirii inamuna sa wataana ni atthu akina. Miyaha xeeni kamosa-kamosa sinireerela ahu osyaka vaavo vanirumeela ahu ikaruma iyo? (Miruku 3:31; Yesaya 8:19; aÉfeso 4:17-19)

Muthinto wa apatthani anaathanla ahu, onimuleela exeeni Yehova voohimya sa omutthu ahu? (Esalimo 26:1, 4, 5; 97:10)

14. Otaphuwa xeeni wuulupale onlipelela aya atthu yaale anivarihela muteko moororomeleya soolakiherya sa Nuulumo na Muluku olelo va?

¹⁴ Elapo esyaa ya Muluku eri vakhiviru vahu. Orweela mwa eguvernu ya wirimu ya Omwene wa Muluku, apinaatamu anrowa otaphuliwa mu soohapuwela sa Satana ni mukhalelo awe wotheene wa itthu sootakhala. Vakhaani-vakhaani, soohapuwela sotheene sa yoottheka sinrowa okumihiwa wa apinaatamu oowiiwelela, eyo enrowa otaphulela okhala ooloka muupuwelo ni erutthu. Vano nto hiyo nnoowerya okhalana okumi woohimala mParayiisu. Mu okathi aya, soopattuxiwa sotheene sinrowa okhalana otaphuwa, weiwo onivarihana oratteene ni munepa wa Yehova. (2 aKorinto 3:17) Niireke wira vaarowa okhala va miruku oyeleela itthu iya sotheene mwaha wa ohicalela soolakiherya sa Nuulumo na Muluku olelo va? Nto otheene ahu nrowee nooniherye wira nimphavela “otaphuwa n’uvuwa w’àna a Muluku”, orweela mwa ovarihela muteko mwa miruku otaphuwa wahu wa eKristau olelo va.​—aRoma 8:21.

Makoho Oowuuluula

• Muthinto xeeni wa otaphuwa waarina awe mulopwana ni muthiyana oopacerya? Niireke wira otaphuwa iwo onnilikana ni otaphuwa wa apinaatamu olelo va?

• Mukhalelo xeeni wa otaphuwa orina aya maKristau eekeekhai? Moota xeeni otaphuwa nno onivirikana aya ni otaphuwa moovarihana ni elapo?

• Nthowa xeeni vary’aya vootthuneya osyaka wataana woohiloka? Moovirikana ni Adamu, tanii onitthuneya onleelaka wira ela etthu yoohiloka?

[Ilatarato siri epaaxina 46]

Nuulumo na Muluku ninlopola wira: “Muhihiye motothiwaka: ‘Wetta n’alavilavi, opwetexa makhalelo òrera’”