Yesu Kristu, Mesiya Aaleiheriwe

WIRA onikhaliherye omusuwela Mesiya, Yehova Muluku aahiwiiriha maprofeta manceene a mBiibiliya, ohimya itthu kamosa-kamosa sa oyariwa, muteko, ni okhwa wa Moopoli aaleiheriwe. Iprofecia iya sotheene sa mBiibiliya sihaakhwanela mwa Yesu Kristu. Iyo sihaakhwanela oratteene ni vootikiniha-vo. Wira ntakiherye, nrowee nthokorerye iprofecia sikina saahimya sa oyariwa ni okathi wa onamwane wa Mesiya.

Mprofeta Yesaya aahihimya vahinatthi wira Mesiya aarowa oyariwa emusi ya Mwene Davidi. (Yesaya 9:6) Tthiri Yesu aayariwe emusi ya Davidi.—Matheyo 1:1, 6-17.

Mikeya, mprofeta mukina a Muluku, aahihimya vahinatthi wira mwaana ola aarowa okhala namalamulela, ni wira aarowa oyariwa “oBethelehemu wa wÉfrata”. (Mikeya 5:1) Okathi waayariwe Yesu, saahikhala mittetthe miili wIsarayeli siihaniwa Bethelehemu. Muttetthe mmosaa aari waattamela oNazarethi ekuluttu ya onikela nsuwa, muttetthe mukina aari waattamela oYerusalemu, oYudeya. Bethelehemu, oowaattamela oYerusalemu, khalai iihaniwa Efrata. Nto, Yesu aayariwe muttetthe ene yoole, ntoko saahimmye aya eprofecia!—Matheyo 2:1.

Eprofecia ekina ya mBiibiliyani yaahihimya vahinatthi wira Mwaana a Muluku aarowa wiihaniwa “wEjitu”. Oryeene mwaana, Yesu aahiroihiwa wEjiitu. Masi owo aahittikihiwa nuumala okhwa Herodi, eyo yahaakhwaniherya eprofecia.—Hoseya 11:1; Matheyo 2:15.

Etabela eri epaaxina 200, vathii va muruu onii “Eprofecia”, sookhala soolepa sinihimya itthu kamosa-kamosa sa Mesiya. Xontte mulikanyihe iprofecia iyo ni soolepa sa Biibiliya siri vathii va muruu onii “Waakhwanela”. Tthiri opaka eyo enrowa olipiha saana waamini wanyu wira Nuulumo na Muluku ti neekeekhai.

Vaavo vanithokorerya anyu soolepa iya, muupuweleke wira iprofecia iyo sotheene saalempwale iyaakha imiya sinceene Yesu ohinatthi oyariwa. Yesu aahimmye so: “Yari yophaveleya wira sìraneye sothene silempwe sikàsaka miyo, mulivuruni mwa Moise ni mwa maprofeta ni mmasalmoni”. (Luka 24:44) Ntoko siniwerya anyu woona mBiibiliyani mwanyu, tthiri iprofecia iyo sihaakhwanela, hataa mu itthu saamukhaani!

[Chart on page 200]

IPROFECIA VOOHIMYA SA MESIYA

YOWIIRANEYA EPROFECIA WAAKHWANELA

Oyariwa munlokoni na Yuda Maphattuwelo 49:10 Luka 3:23-33

Osuulu wa Mwene Davidi Yesaya 9:6 Matheyo 1:1, 6-17

Atthu anceene khiyaamukupali Yesaya 53:1 Yohani 12:37, 38

Makhuva awe khiyaapwexiwe Esalimo 34:21 Yohani 19:33, 36

Aahivithiwa ni thaaciri Yesaya 53:9,NM Matheyo 27:57-60