Ekeekhai Voohimya sa Tiithi, Mwaana, ni Munepa Wootteela

ATTHU yaawo anikupali yowiixuttiha ya Oraru anihimya wira aakhala atthu araruu mwa Muluku mmosaa: Tiithi, Mwaana, ni Munepa Wootteela. Anihimya wira khuta mmosaa a atthu ala araruu, toolikana mukina ni mukhw’awe, toowerya sotheene, ni toohikhalana mapacereryo. Yowiixuttiha eyo ya Oraru enihimya wira, Tiithi orii Muluku, Mwaana orii Muluku, ni Munepa Wootteela orii Muluku, mwa sotheene orii Muluku mmosaa paahi.

Atthu anceene yaawo anikupali Oraru annaakhulela wira khanwerya otthokiherya saana yowiixuttiha ela. Hataa vari siiso, pooti wi awo anuupuwela wira yowiixuttiha eyo enikhuma mBiibiliyani. Mwekeekhai nsuu noowi “Oraru” nnakhala mBiibiliyani khanimphwanyaneya. Masi niireke wira muupuwelo a Oraru onniphwanyaneya mBiibiliyani? Wira naakhule nikoho nna, nrowee nthokorerye yoolepa yeeyo ikwaha sinceene atthu anihimya aya okhaliherya muupuwelo wa Oraru.

“NSU NENLO MULUKÚ”

Yohani 1:1 onihimya so: “Olumwenku ohinatthi opattuxiwa, Nsu nira nikhanlene. Nsu nlo nari wa Muluku: Nsu nenlo Mulukú”. Ohoolo waya, ekapitulu emosaru eyo, murummwa Yohani yoowo olempe masuu ala ohooniherya saana wira “Nsu” nno, ti Yesu. (Yohani 1:14) Okhala wira Nsuu nno nniitthaniwa Muluku, atthu akina anuupuwela wira: Mwaana ni Tiithi ti Muluku mmosaa.

Musuweleke wira wanipacerya masuu ala ari mBiibiliya yaalempwale erumeeliwaka elavulelo ya eKriki. Valokenle ene, yaahitaphuleliwa sirumeeliwaka ilavulelo sikina. Hataa vari siiso, anamataphulela anceene a Biibiliya, kharumenle masuu oowi “Nsu nenlo Mulukú”. Nthowa xeeni vahirumenly’aya masuu awo? Arumeelaka osuwela waya wa eKriki, elavulelo yaarumeeliwe olempwaka Biibiliya, anamataphulela ale yuupuwenle wira masuu oowi “Nsu nenlo Mulukú” yaahaana otaphuleliwa moovirikana. Nto moota xeeni? Ala anittharelana matakiheryo makina, yaawo anooniherya moota sitaphuleliwa aya mmukhalelo woovirikana: “Logos [Nsuu] naarina mikhalelo somuluku”. (A New Translation of the Bible) “Nsuu naari ni Muluku ni naahikhalana mikhalelo soolikana ni Muluku”. Biibiliya a The Translator’s New Testament (Wataana wa Naanano wa Namataphulela) Moovarihana ni aBiibiliya ala, Nsuu khahiyo Muluku mwaneene.a Moovirikana ni vo, mwaha wa okhulupale awe eriyari ya soopattuxiwa sa Yehova, Nsuu ninniihaniwa okhala “muluku”. Nsuu noowi “muluku” nintaphulela okhala “oowerya”, ohiya okhala oowerya sotheene.

MPHAVELE SOOLELIWA SIKINA SEKEEKHAI

Atthu anceene khanisuwela elavulelo ya eKriki yaarumeeliwe olempwaka Biibiliya. Nto munrowa osuwelexa sai ele tthiri murummwa Yohani yaaphavela awe ohimya? Muupuwele ntakiheryo nna: Prisoori oniwiixuttiha anaxikola awe mwaha mmosaa. Wanikisa waya anaxikola awo anikhalana muupuwelelo woovirikana mmoota yiiwale aya mwaha ole. Anaxikola anrowa ophuka sai mwaha ole? Awo anoowerya onvekela prisoori ole wira otthikele waatthokiherya. Moohaaniherya, ophavela osuwela soohimmwa sikina onimwaakhaliherya anaxikola ale wiiwexexa saana mwaha ole. Moolikanasa, wira musuwele yootaphulela ya masuu a Yohani 1:1, muhaana otokosa Ehapari ya Yohani wira mphwanye sooleliwa sa makhalelo a Yesu. Ophavela osuwela soohimmwa sikina mmwaha ola, onrowa wookhaliheryani osuwela ekeekhai.

Mwa ntakiheryo, muthokorerye-tho ele Yohani elempe awe mu ekapitulu 1, eversiikulu 18 oriki: “Khavo otonko omona Muluku [Oowerya Sotheene]”. Masi, apinaatamu aamoona Yesu, Mwaana a Muluku, okhala wira Yohani onihimya wira: “Vano Nsu [Yesu] nihìpaka mutthu ntoko hiyo, khukhala ni hiyo. Hiyo nihona ovuwa wawe”. (Yohani 1:14) Nto, vanweryaneya sai Mwaana okhala Muluku Oowerya Sotheene? Yohani onihimya-tho wira Nsuu naari “wa Muluku”. Masi vanweryaneya sai mutthu mmosaa okhala ni mutthu mukina nto okathi omosaru owo khiyakhala mutthu yoole orina awe? Ohiya vo, ntoko silempwale aya mu Yohani 17:3, Yesu aahiiwanyeeha wira owo ni Tiithi awe a wirimu atthu oovirikana. Yesu aahihimya wira Tiithi awe tokhanle “Muluku mmosáru èkekhai”. Nto wanikisa wa Ehapari awe, Yohani onimaliha ohimyaka so: “Vano itthu iya silempwé wira mwaminiki wi Yesu ti Kristu, Mwana a Muluku”. (Yohani 20:31) Moone wi Yesu, khonihimmwa okhala Muluku, masi Mwaana a Muluku. Soohimmwa sikina siri mu Ehapari ya Yohani sinnooniherya moota woomwiiwexexa Yohani 1:1. Yesu, aahiiso Nsuu, ‘mulukú’, okhala wira ookhalana opuro wa vasuluu masi khahiyo moolikana ni Muluku Oowerya Sotheene.

MUTTITTIMIHERYE EKEEKHAI YA SOOHIMMWA IYO

Nkahaya muupuwele-tho sa ntakiheryo na prisoori ni anaxikola. Niire wira anaxikola akina nlelo khayiiwexenxe, hataa prisoori ole otthikenle ene waatthokiherya. Nto anaxikola ale anitthuneya opaka exeeni? Awo pooti orowa wa prisoori mukina wira aphwanye sooleliwa sikina sa mwaha ole. Akhala wira otthokiherya wa prisoori a nenli onnilikana ni otthokiherya wa prisoori oopacerya, ohiiwexexa wa anaxikola anceene pooti omala. Moolikanasa, akhala wira khamuniiwexexa yootaphulela aya tthiri ya masuu yaawo Yohani alempe awe mBiibiliya voohimya sa ikhalelo sa Yesu ni Muluku Oowerya Sotheene, pooti ophavelasa yoolepa ya namalepa mukina a Biibiliya wira mwiiwexexe saana. Mwa ntakiheryo, muthokorerye ele elempwale ni Matheyo. Voohimya sa wanikisa wa mukhalelo ola wa itthu, Matheyo aahiromola masuu a Yesu oriki: “Vano nihiku walá okathi sinrowaya okhumelela itthu iya, khavo onsuwela: nnákhala malaikha a wirimu, nnákhala Mwana. Atithi pahi t’asuwenle”. (Matheyo 24:36) Masuu ala anaakhulela sai wira Yesu khahiyo Muluku Oowerya Sotheene?

Yesu onihimya wira Tiithi awe onnisuwela itthu sinceene onvikana Mwaana. Nto, vaakhanleke wira Yesu ti Muluku Oowerya Sotheene, owo aamusuwelaka itthu sotheene sinisuwela Tiithi awe. Tivonto, Mwaana ni Tiithi khanlikana owerya waya. Mwa sotheene, atthu akina pooti ohimya so: ‘Yesu aahikhala wirimu ni aahikhala-tho valaponi-va. Mmasuu awo Yesu onilavula ntoko pinaatamu’. Masi hataa vaari siiso, sai voohimya sa munepa wootteela? Akhala wira munepa wootteela onoolikana ni Muluku ntoko Tiithi, nthowa xeeni Yesu vahinihimya awe wira munepa wootteela onnisuwela ele Tiithi enisuwela awe?

Vaavo vanivikaniha anyu omwiixutta Biibiliya, nyuwo munrowa wiiwexexa soolepa sinceene sa Biibiliya sinilavula mwaha ola. Soolepa iyo sinnittittimiherya ekeekhai voohimya sa Tiithi, Mwaana, ni munepa wootteela.—Esalimo 90:2; Miteko s’Arummwa 7:55; aKolosi 1:15.

[Footnote]