Feverero

Uupuxeriwaka ni Muluku, Yakobo aalempe so: “Vano nthiti nla [ovilela] nimalelihiwe ni miteko sorera, wira mukhalé òmalelene ni òhittheka wa inamuna sothene”. (Yak. 1:4) Ovilela onrowa omaliherya sai ‘muteko’ mookumini mwahu? Okathi nneehereriwa ahu, ninnoona wira nohaana opixa murima, oxukhurela ni ophenta. Vaavo vanivilela ahu mixankiho, nnimwiixutta moota ninrowa ahu wooniheryaka saana mikhalelo iya, ni nnoolokiherya omutthu ahu, ntoko muKristau. Okhala wira ovilela onninikhaliherya okhala maKristau ooloka, nto khanimphavela opaka etthu yaarowa otthekela malamulo a Muluku, niphavelaka omaliha muxankiho ahu paahi. Mwa ntakiheryo, akhala wira munniwanana miyuupuwelo soohiloka, mwiimananihe wira muhipake etampi. Munvekeleke Yehova wira ookhaliheryeni okhootta muupuwelo woohiloka. Niireke ookhala mmusi anyu onoolupatthani? Muhitthikele ottuli. Nvikaniheke omurumeela Yehova. Muupuweleke wira Muluku oniweemererya paahi ale anivilela.—aRom. 5:3-5; Yak. 1:12. w16.04 2:15, 16

Ninniwiiwa atthu anceene yiittottopaka mwaha wa nikhuli naya, nihimo, makhalelo, muttetthe wala elapo aya. Masi Yehova khonuupuwela wira mutthu wala egrupu emosa ya atthu ti yootepexa otthuneya ovikana ekina. Otheene ahu nnoolikana vamaithoni vawe. Yehova oonivaha makhalelo anivirikana wa khula mutthu, nto eyo etthu yoohakalaliha. Owo khoniphavela wira nihiye makhalelo a elapo ahu. Nave khoniphavela-tho wira nuupuweleke wira hiyo na atthu ootthuneyexa waavikana akina. (aRom. 10:12) Nihiixinnuuheke mwaha wa elapo ahu, nto khiyuupuwela wira elapo ahu ti yoolokexa ovikana ilapo sotheene. Akhala wira ninnipacerya wuupuwela siiso, vanoovila ovikaniha ohiirela mpantta myaha sa elapo. Eyo ti etthu yiiraneyale eseekulu yoopacerya. Anna akina yaari aHeeberi, khiyaathokorerya mwa xariya anaamukhweli aGriki. (Mit. 6:1) Ninrowa osuwela sai wira noopacerya wiixinnuuha moota owo? Akhala wira munna wala murokora onikhuma opuro mukina onnoovahani miruku, niireke wira munnaakuvela wuupuwela so: ‘Nno, hiyo ninnisuwela opaka itthu saana’, nto nuumala-vo khiyakhootta miruku sivahiwe anyu? Akhala wira ti siiso, muhaana wuupuwela miruku iya sootthuneya sa yoolepa ya olelo. w16.04 4:12, 13

Yesu aanilaleya “ehapari yorera y’omwene wa Muluku”, ni onilipelela wira awiixutti awe apakeke etthu emosaru. Egrupu xeeni enilaleya ehapari eyo wa “maloko othene”? (Math. 28:19) Anamoona a Yehova paahi. Paatiri mmosa aari misionaario, aahimuleela Namoona mmosa wira yena aahikhala ilapo sinceene soovirikana, nto khula elapo, aahaakoha Anamoona a Yehova muhupi xeeni yaalaleya aya. Anamoona awo yaakhula sai? Paatiri owo aahimmye so: “Otheene aya yaari alolo, maana yaakhunle moota mmosa, yiiraka: ‘Ihapari sooreera sa Omwene’”. Moolumo a paatiri ole, anooniherya wira hiyo khanihiyo “alolo”, masi nihiiraana ntoko maKristau eekeekhai. (1 aKor. 1:10) Anna awo yaalavula moovariha ni muru wa erevista ahu Owehaweha Elaleyaka Omwene wa Yehova. Erevista ela enniphwanyaneya mattaava 254, ni sinnipakiwa irevista 59 imilyau sene, nto eyo enniiriha erevista ela okhala yootepexa okaiwa olumwenku wotheene. w16.05 2:6

Waaniheryasa hiyo pooti ophavela okhala pioneero ookilaatheya. Wira niwerye okhala pioneero, ninnipacerya okhweiherya okumi ahu. Nave, waaniheryasa ninnuupuwela akhala wira nnoowerya ohakalala ni itthu vakhaani sa werutthuni. Tthiri khinikhanle nlamulo na Biibiliya nnihimya wira nikhale pioneero; hiyo pooti ovikaniha omurumeela Yehova moororomeleya hata nihikhanle pioneero. Masi, Yesu aahihimya wira ale aniivahererya mwaha wa Omwene, anrowa waakhela mareeliho manceene. (Luka 18:29, 30) Ohiya-vo, Biibiliya onnooniherya wira Yehova onnisiveliwa vaavo ‘vaninvaha ahu murima onittelalene’ ni okhaliherya okokhorela wekeekhai ni murima ahu wotheene. (Esal. 119:108) Niireke vanniweryaneya ophavela osuwela muupuwelo wa Yehova nimurumeelaka Biibiliya ni mavekelo? Omurumeela Biibiliya ni mavekelo onoonikhaliherya opaka soothanla sookhalela nreelihiwaka ni Tiithi ihu a wiirimu. w16.05 3:13

Mixankiho sinceene sinlepeliwa amiravo, nave-tho sinnaaphwanya maKristau otheene. Mwa ntakiheryo, otheene ahu nohaana waakiherya waamini wahu, wiikasoopa, osyaka opatthani ni itthekulelo soohiloka. Myaha iya, ni myaha sikina sinnithokoreriwa ni iliivuru silepeliwe amiravo. Tivonto, maKristau oowunnuwa ahiixooneke wira khaniphwanela osoma iliivuru silepeliwe amiravo. Nto, nnaamwi myaha iyo silepeliwe ene amiravo, miruku saya sinikhuma mBiibiliyani, tivo, otheene ahu nnoottottela mureerelo soovaha iyo somunepani. Myaha sinlepeliwa amiravo sinnaakhaliherya olipiha ompatthani aya ni Yehova, ohiya paahi osuwela weettiherya mixankiho saya. Nave atthu aalupale anoowerya ottottela mureerelo myaha iyo.​—Mus. 12:13. w16.05 5:15, 16

“Apwiya [Yehova] ti Muluku ahu: awo t’Apwiya mekhaya”. Masu ala tootthuneya vanceene! Moolumo ala yaahaalipiha aIsarayeli wira avilele mixankiho saarowa okhumelela okathi yaarowa aya okela Elapo Yooleiheriwa. Moolumo ala anoowerya onlipiha hiyo-tho, wira niwerye ovilela maxakha maalupale ni wira nakhaliherye okhaliha eParayiisu. Nivikanihe omukokhorela Yehova paahi nave, nihaana omphenta ni omurumeela owo ni murima, muupuwelo, ni ikuru sahu sotheene. Nihaana-tho wiimananiha wira wiiraana ni murettele orina ahu ovikaniheke. Navikaniha opaka itthu iyo, Yesu onoonithokorerya ntoko ipwittipwitthi ni nnooweha wiiraneya wa masu ala: “Rwakani, nyuwo murerihiwe n’Atithi. Mwakhele omwene olokiheriwanyu okhuma opattuxiwa w’olumwenku”.​—Math. 25:34. w16.06 3:2, 20

Nto eyo yiiraneya, hiyo khanin-khala-tho ntoko oloko wowoolowa. Niireke mootoko otthekeliwa ni munna mmulokoni wala opweteiwa iparakha sanyu? Exeeni mwaapanke anyu? Niireke mwahooniherya wiixinnuuha? Wala mwaahoona wira etthu yootthuneya ti okhalana murettele ni anninyu ni ovikaniha okhala oororomeleya wa Yehova? (Esal. 119:165; aKol. 3:13) Mutthu onimakela opaka itampi ni oniipithiha itampi iyo, pooti onvila weemererya miruku onivahiwa awe ni Muluku. Nto, eyo enoomwiiriha woona ovila ohiya opaka itampi. (Mus. 8:11) Munna mmosa, yoowo aarina yoolema ya oweha epornografia, aaheemererya oriki: “Kaahipacerya okhalana yoolema ya owaapa axitokweene a mmulokoni”. Yoolema awe yaanihonona mukhalelo awe womunepani. Muhoolo mwaha, anna yaahisuwela yoolema awe ele, nto aahikhaliheriwa. Otheene ahu na alipa oottheka. Masi napacerya owaapa anna wala wiipithiha mweettelo woohiloka, ohiya ophavela nikhaliheryo na Muluku, murima ahu pooti opacerya okhala woolipa. w16.06 2:5, 6

Okhala wira Yesu aahisuwela wira awiixutti awe yaarowa oxankaka mwaha wa yoolya, yoowurya, yoowara, aahaaleela moolumo ala okathi aalavula awe Mwaha awe Vamwaako, oriki: “Murima ohovaveni”. Maana aahisuwela wira oxankiheya vanceene ni itthu iyo, saamwaaliyaliha itthu sootepa otthuneya mookumini. Tivonto, okhala wira Yesu aanaathokorerya vanceene awiixutti awe, owo aahiviriha okathi munceene owooniheryaka woopiha waya oxankiheya ni itthu iyo, okathi aalavula awe mwaha awe. (Math. 6:27, 28, 31, 34) Yesu aanisuwela soophavela sa apinaatamu. Aahisuwela wira “okathi wokiserya”, atthareli awe yaarowa oxankaka vanceene. (2 Tim. 3:1) Tthiri, olelo-va atthu anceene vannaavila ophwanya muteko, ni itthu sinootepa owela epereso. Mapuro manceene atthu toohaawa vanceene, ni arina yoolya vakhaani aahiiso kharina. Masi Yesu aahisuwela-tho wira okumi wa mutthu ti wootepa otthuneya ovikana ‘yolya ni yowara’. w16.07 1:8, 9

Okhala wira omwiiwelela wahu Yehova khahiyo woomalela, hiyo khannireerela waakhela iparakha sinikhuma wa Muluku. Tthiri, naaphwanela okhwa paahi. Mwene Salomoni aahimmye so: “Mulaponi khavo onìra sa xariya mahiku othene, ahiweryaka ovonya”. (Mus. 7:20) Muhoolo mwaha murummwa Paulo aalavunle so: “Othene aya àttheka, àthoiwa ovuwa wa Muluku” ni “ale anvarela muteko etampi anniliviwa n’ukhwa”. (aRom. 3:23; 6:23a) Tthiri eyo ti etthu naaphwanela ahu. Okhala wira Yehova onnaaphenta apinaatamu vanceene, oonivaha “Mwan’awe mmosene” wira onikhwele. Ela ethoonyeryo yuulupale ya oreera murima wa Yehova. (Yoh. 3:16) Paulo aahimmye wira “Yes’uwo ahiyevihiwa, khukhala mukhani ovikana malaikha, wira àkhwele atthu othene, vomoriwa ikharari ni Muluku. Nto vano ninnimona awarihiwe ovuwa ni nttittimiho mwaha w’ohawa n’ukhwa wawe”. (aHéb. 2:9) Tthiri, “eparakha Muluku ennivahawe mahala enniphwanyiha ekumi ehinimala, mwa Yesu Kristu Pwiy’ahu”.​—aRom. 6:23b. w16.07 3:3, 4

Okhala wene apinaatamu annipha-vela othela aahiiso otheliwa. Masi ekasamento epacenrye sai ni tiivi eri yoolakela aya? Osuwela eyo onrowa onikhaliherya okhalana moonelo wooloka voohimya sa ekasamento ni mareeliho aya. Muluku aahimpattuxa mulopwana oopacerya, Adamu ni khunvaha muteko woovaha masina inama sotheene. Adamu aahoona wira inama iye seetta piili-piili, masi owo khaarina “mukhaliheryo wamphwanenle”. Tivonto, Muluku aahimwiiriha Adamu ophwanya ikhove sinceene, aahikumiha niparari nimosa khumpaka muthiyana. Nuumala-vo, Yehova aahimukuxa muthiyana khunvaha Adamu, vano muthiyana owo khukhala mwaarawe Adamu. (Maph. 2:20-24) Tthiri ekasamento yoovaha enikhuma wa Yehova. Nuuvira iyaakha sinceene, Yesu aahiromola ele Yehova aahimmye awe oJardim ya wEedeni oriki: “Mulopwana onimwahiya atithi awe n’ame awe, wira aphitane ni mwar’awe: òwanli aya enakhala mutthu mmosá pahi”. (Math. 19:4, 5) Okhala wira Muluku aakunxe niparari na Adamu wira ompake muthiyana oopacerya, nto anamathelana ahaana osuwela wira ari erutthu emosaru. Yehova khomphavela wira mulopwana ni muthiyana amwalaneke aahiiso waatteya. w16.08 1:1, 2

Khahiyo wira okathi wotheene Yesu aalavula ni muttitthi wa atthu paahi. Ikwaha sikina, owo aahilavula ni khula mutthu moopatthaneya. Mwa ntakiheryo, Yesu aahivaanela mookuxa murima ni muthiyana ole aarwiiye orika maasi ehime yaari waattamela epooma ya oSikari. (Yoh. 4:5-30) Nave-tho, Yesu aahilavula ni Matheyo yoowo iihaniwa-tho Levi, mulipa-ooliviha mpoosito, ni aahimwiirela wira okhale naxikola awe. Matheyo aaheemererya nto muhoolo mwaya aahimulattula Yesu ni akina orowa olya owannyawe. Opuro ole, Yesu aahilavula ni atthu anceene. (Math. 9:9; Luka 5:27-39) Nave-tho, Yesu aahilavula moopatthaneya ni Natanayeli, hata Natanayeli aalavunle itthu soohiloka voohimya sa atthu a oNazarethi. Okhala wira Yesu aahilavula moopatthaneya, Natanayeli aahirukunuxa muupuwelo awe voohimya sa Yesu, yoowo aakhumme elapo ya oNazarethi. Nto Natanayeli aaniphavela ovikaniha wiixuttihiwa ni Yesu. (Yoh. 1:46-51) Ntakiheryo na Yesu, ninniniixuttiha wira okathi onilavula ahu ni atthu moopatthaneya ni waareerela murima, atthu awo anoophavelaka owiriyana ele enihimya ahu. Vaavo vaniwiixuttiha ahu ale a niinano olavula moota owo, anrowa otepaka osiveliwa olaleerya. w16.08 4:7-9

Vaavo anamathelana ahiniphuka aya mixankiho saya, akina annithanla ovalaana aahiiso omwalana. Anamathelana akina pooti wuupuwelaka wira mixankiho saya sootepa wunnuwa, nto anoona wira ahaana ovalaana. Masi Yesu aahooniherya wira ovalaana khahiyo etthu yaamukhaani. Maana nuumala oromola malakiheryo a Muluku voohimya sa ekasamento, owo aahincererya oriki: “Yeyo Muluku ephitanyalyawe mutthu ahimwalanyihé-tho”. (Math. 19:3-6; Maph. 2:24) Tivonto Yehova oniphavela awe wira mulopwana ni mwaarawe akhaleke vamosa. (1 aKor. 7:39) Otheene ahu nihaana osuwela wira nnookohiwa ni Yehova mwaha wa miteko sahu. Osuwela eyo enoonikhaliherya ophuka mixankiho sahu moohipisa aahiiso sihinatthi otepa. w16.08 2:10, 11

Awanani ihu pooti ontuphela okathi nihinlipelela ahu aahiiso okathi onitteettheya ahu. Akhala wira nnoovikaniha owanana sootakhala, nnoowerya oxintta! Masi, nooceya nnahiya owana, Satana, olumwenku awe ni otteettheya wahu, onrowa onixintta. Nto, nihooceye. Tivonto, muhikhulumuwe ni muhoolowihe miyoono sanyu! (1 Ped. 5:9) Wira naaxintte awanani ihu, nihaana wuupuwelaka nthowa ninniiriha owana. Hiyo ninniwana maana nimphavela weemereriwa ni Muluku ni ophwanya mareeliho. AHéberi 11:6, onihimya so: “Ole onimwattamela Muluku ohana wamini wira Muluku òkhala ni wira onnatthuvela ale animphavela”. Omphavela Yehova ontaphulela wiimananiha vanceene, akhala wira nimphavela weemereriwa ni yena.​—Mit. 15:17. w16.09 2:4, 5

Biibiliya, onninivaha malakiheryo ooloka aniwerya onikhaliherya opaka soothanla sooloka wira ninvuwihe Muluku. Hata vari siiso, mawarelo ahu annooniherya ele ennisivela. Mawarelo ni ikuwo sinithuma ahu sinnivirikana ni atthu akina. Masi ikuwo sahu sihaana okhala sooloka, sookatthiwa, sinooniherya wiiyeviha, sinireerela okathi owo, ni opuro aahiiso elapo ahu. Khivanikhweya ophwanya ikuwo sooloka ni sooreerela. Ilooxa sinceene sinitumiha ikuwo sihinreerela owara maKristau. Tivonto, onireerela aya okathi ni wiimananiha wira niphwanye ikuwo sooreerela ntoko, ikamisa, ivestido, ipulusa, afaato, aahiiso othanla ikaalasa soohitita ni sohooneela. Masi anna ni arokora anoosiveliwa ni oxukhurela wiimananiha wahu niwaraka ikuwo sooloka ni sookhalela. Ohakalala oniphwanya ahu wira ninvuwihe Tiithi ihu ori wiirimu, onnivikana wiimananiha onipaka ahu wira niphwanye ikuwo sininvuwiha Muluku. w16.09 3:15, 16

Anamwane waasivela wuupuwelela etthu wira yoone yaari yekeekhai. Nto anamuyari ahaana orumeela malikanyiho wira awiixuttihe. Nyuwo pooti orumeela malikanyiho wira nwiixuttihe aniinyu okupali wira ele Biibiliya enihimya awe ekeekhai. Mwa ntakiheryo, nyuwo pooti omusoma. Nto muhaaleeleke paahi wira moolumo ari eversiikulu ela anikhuma wa Yehova. Masi, mwaakhaliherye waarumeela ankhili aya. Nyuwo pooti omuleela wira okathi wa Yobi atthu khiyaakupali wira elapo khevareleliwe ni etthu. Awo yaanisuwela wira khula etthu, ntoko boola aahiiso nluku nookhala nipuro nneemela aya. Okathi ole, khuuvo aawerya wooniherya wira elapo kherina yoovareleya aya, okhala wira khiyaakhanle maakina aniitthaniwa telescópio ni nave espacial. Etthu eniixutta ahu tiila: Hata Biibiliya olempwale ene khalai, okathi wotheene onilavula ekeekhai okhala wira onikhuma wa Yehova.​—Neh. 9:6. w16.09 5:9, 12

Omwaamini Yehova ni Yesu, khontaphulela osuwela ele epanke aya ni enrowa aya opaka mmureerelo ahu paahi. Masi-tho, ontaphulela ophavela vanceene okhala moovarihana ni ele eniixuttihale aya. Nave ontaphulela waakhaliherya atthu akina omusuwela Yehova ni Yesu. Wira niphwanye okumi woohimala elapo esya ya Muluku, nihaana okhalana ni ovikaniha olipiha waamini wahu. Waamini onlikana ni mwiri. Hiyo nihaana ovikaniha okhuwari mwiri wira ohikhwe ni ovikaniheke wunnuwa. Nto, akhala wira khannikhuwari, mwiri owo pooti onyaala ni okhwa. (Luka 22:32; aHéb. 3:12) Moolikanasa, nihaana oweha akhala wira waamini wahu ti ‘wolipa’ ni onnivikaniha ‘wunnuwa’.​—2 aTes. 1:3; Tito 2:2. w16.10 4:4, 5

Vaavo Daniyeli ni apatthani awe yaaroihiwe aya oBabilonia, atthu a oBabilonia yaaheererya waakhanyererya weemererya soolema ni etiini aya. Moota xeeni? Awo yaahiwiixuttiha “elavulelo y’oBabilonia” ni yaahaavaha masina a oBabilonia. (Dan. 1:3-7) Nsina nsya na Daniyeli noowi Bel, naamuhimya muluku a oBabilonia. Tivonto, eyo yahiiraneya maana Mwene Nabukhodonosori, aaphavela wira Daniyeli okupaliki wira muluku ooBabilonia, tooweryexa onvikana Yehova, Muluku a Daniyeli. (Dan. 4:5) OBabilonia, Daniyeli aahivahiwa soolya soosiva sa mwene. Masi, Daniyeli “khatthunne orava mwikho” waarowa omwiiriha ohiiwelela nlamulo na Muluku. (Dan. 1:8) Okhala wira aahivikaniha wiixutta itthu sa “mulivuruni mwa Muluku”, seiyo saalempwale ni eHeeberi, owo aahivikaniha olipiha wataana wawe ni Yehova, nnaamwi aakhala elapo ekina. (Dan. 9:2) Tthiri, nnaamwi aavirinhe iyaakha 70 oryeene oBabilonia, nlelo atthu khiyaaliyanle nsina nawe na eHeeberi, noowi Daniyeli.​—Dan. 5:13. w16.10 2:7, 8

Yesu onnimurumeela “murumeyi òroromeleya ni ànkhili” wira okumiheryeke yoolya yooomunepani. (Math. 24:45-47) Nto okhuma 1919, Yesu onnimurumeela wira aakhaliheryeke atthu a Muluku omwiiwexexa Biibiliya ni otthara ele onihimya awe. Weettela sowiixuttiha sa Biibiliya, onookhaliherya muloko ovikaniha okhala wooloka, wa murettele ni wowiiraana. Mwiikoheke so: ‘Kinniroromeleya wa Yesu ni kinnitthara malakiheryo a murumeyi oororomeleya?’ Biibiliya onninikhaliherya osuwela wira arumeyi a Yehova ari wiirimu tootthokiheya. Mwa ntakiheryo, Ezekiyeli aahimoona Yehova moolohani owenle ene ekaaro awe yeeyo yeetta mowaakuveya erowaka khula opuro Yehova oniphavela awe. (Ezek. 1:4-28) Vaavo Kristu ni malaikha ooloka anrowa aya onyaanya olumwenku ola, ekaaro ya Yehova enimweetta mowaakuveya wira evuwihe okhulupale wa Yehova ni otteeliha nsina nawe! w16.11 3:9, 10

Ntoko atthareli a eseekulu yoopacerya a Yesu, hiyo ninnitthukuma wira niixuttihiwe ni olipihana mukina ni mukhwaawe. (1 aKor. 14:31) Hata anna yaale apacenrye khalai omurumeela Yehova anniphavela olipihiwa. Nkahaya mmuupuwele Yoxuwa. Vaavo aIsarayeli yaahanle aya vakhaani okela Elapo Yooleiheriwa, Yehova aahimuthanla Yoxuwa wira aahooleleke. Masi, Yehova aahimuleela Moise wira omulipihe nnaamwi Yoxuwa aamurumeela Yehova mwa iyaakha sinceene. Yehova aahimmye wira: “Munvahe soruma sanyu Yoxuwa, mmulipihe murima wira akhalane nthiti: tthiri ti yowo onrowa olapuwa [muro] Yordani, àholelaka atthu ala; ti yowo-tho onrowa wakilathiha mulaponi munònanyu”. (Otum. 3:27, 28) Yoxuwa aahaana olipihiwa maana muhoolo mwaya nloko nne naarowa owana ikhotto sinceene, masi naamuxinttiwa ekwaha emosa. (Yox. 7:1-9) Olelo-va, nnoowerya waalipiha axitokweene a mmulokoni ni a esirkwiitu, yaawo aniimananiha waakhapelela atthu a Muluku.​—1 aTes. 5:12, 13. w16.11 1:12, 13

Alipa-Oomusoma Biibiliya yahoona wira khivaaphiyerya waaleela amusi aya, apatthani ni atthu akina yeettana aya okerexa, wira khiyaakhaliherya-tho etiini yoowootha. Awo yaaphavela wira atthu otheene asuwele wira Babilonia Muulupale tori namararuwa! Tivonto, okhuma Dezembro a 1917 mpakha wanipacerya wa 1918, Alipa-Oomusoma Biibiliya anceene, mooluttuweliwa yaahikawa 10.000.000 ikoopiya sa etratato yaarina mwaha oni: “The Fall of Babylon” [Omora wa Babilonia]. Moolipa murima arumeelaka etratato eyo yahuupulula sowiixuttiha sa eKristau Yoowootha. Mwekeekhai, ahooleli a etiini yaahinanariwa vanceene! Masi, Alipa-Oomusoma Biibiliya khiyooceyale. Maana yaahilakela ovikaniha olaleerya ni omwiiwelela “Muluku ovikana owiwelela atthu”. (Mit. 5:29) Eyo enooniherya exeeni? Enooniherya wira okathi wa Ekhotto Yoopacerya ya Olumwenku Wotheene, maKristau ala alopwana ni athiyana, khiyaakhalihiwe ipottha; masi yaahikhuma etiini yoowootha ni yaanaakhaliherya atthu akina okhuma oBabilonia Muulupale. w16.11 5:2, 4

Atthu akina anuupuwela wira Paulo aahimya maKristau ni ale yahaakhanle maKristau. Masi iversiikulu iya, Paulo aalepenle maKristau yaawo ‘yathanleliwe okhala atthu’ a Muluku. (aRom. 1:7) Tivonto, moolumo oowi ale “antthara makhalelo aya” a werutthuni ni ale “antthara” munepa, Paulo aahimya maKristau paahi. Paulo aaphavela ohimya wira “Yale anèttela sa erutthuru” ni “sowunlela seiyo sonanara” aneettela “miteko” sa werutthuni. (aRom. 7:5) Ekapiitulu 7:5 ya aRoma Paulo aahimmye so: “Vekekhai, okathi nattharahu sowunlela sahu sotakhala, sowunlela seiyo sonanara, silipihiwe n’ikano, saninivarela miteko” sa werutthuni. Paulo onnitthokiherya va wira atthu yaale “antthara makhalelo aya” a werutthuni, taale anuupuwelela ni otthara soophavela saya soohiloka, ni annipaka ele eniphavela murima aya. w16.12 2:5, 7

Okathi mukina atthu annixanka mwaha wa itampi sipanke aya khalai. Ikwaha sikina Mwene Davidi, aahixanka mwaha wa itampi sawe. Owo aahimmye so: “Murim’aka wothuluwa, nkirere okhuwela”. (Esal. 38:4, 5, 9, 19) Okathi ole Davidi aahipaka etthu ya miruku wira ovukule oxanka. Owo aaniroromela wira Yehova aarowa ommorela ikharari ni omulevelela. Nave Davidi aanisuwela wira Yehova ammulevelela. (Esal. 32:2, 3, 5) Okathi mukina, woonasa wene nyuwo munnixanka mwaha wa itthu siniwiiraneelani. Mwa ntakiheryo, okathi Davidi aalempe awe Esalimo 55, owo aanoova wiiviwa. (Esal. 55:3-6) Hata vari siiso, owo kheemerenrye wira oxanka omwiirihe ohiya omuroromela Yehova. Davidi aahimuxonttela Yehova wira omukhaliherye mixankiho sawe, nave aanisuwela wira aahaana opaka etthu wira omalihe mixankiho sawe. (2 Sam. 15:30-34) Munoowerya wiixutta etthu ni Davidi. Ohiya oxanka vanceenexa, muhaana opaka etthu eniwerya anyu wira mphuke muxankiho owo, muroromelaka wira Yehova onimookhaliheryani. w16.12 3:14, 15

Davidi aaheemererya okhaliheriwa ni Yehova. Mwa ntakiheryo, owo aheemererya olakiwa ni Natani, profeta a Yehova. Davidi aahinvekela Yehova ni aahimuleela soottheka sawe, ooniheryaka wira aaniphavela otthikela wataana ni Yehova. (Esal. 51:3-19) Davidi khaamakela wiivaha nthowa mwaha wa soovonya sawe, masi aahiixutta etthu ni soovonya sawe. Nave khaatthikenle opaka itampi iye suulupale. Muhoolo mwaya, Davidi aahikhwa moororomeleya, nto Yehova onimuupuwela ntoko mutthu oororomeleya. (aHéb. 11:32-34) Exeeni nniixutta ahu ni ntakiheryo na Davidi? Akhala wira noopaka etampi yuulupale, nihaana ottharuwa ni murima wotheene, omuleela Yehova yoottheka eyo ni onvekela wira onlevelele. (1 Yoh. 1:9) Nave nihaana waaleela axitokweene maana anoowerya onikhaliherya olokiherya wataana wahu ni Yehova. (Yak. 5:14-16) Akhala wira nnimweemererya nikhaliheryo na Yehova, nnimooniherya wira ninnikupali yooleiherya awe ya onilevelela. Nave nihaana wiixutta ni soovonya sahu ni ovikaniha omurumeela Yehova moororomeleya.​—aHéb. 12:12, 13. w17.01 1:13, 14

Onitaphulela exeeni wiixuxererya aahiiso ‘wisòna’? Onitaphulela opaka etthu eheemereriwa ahu aahiiso ehirina ahu ehakhi, waaniheryasa nipanke mwaha woohipixa murima aahiiso wiikuxererya. Mwaha woohimalela, okathi mukina ninnipaka itthu mowiisoona wala wiikuxererya. Masi ntoko noonale ahu ntakiheryo na Mwene Sawuli, nto akhala wira eyo ti yoolema ahu, Yehova khonrowa osiveliwa. Esalimo 119:21 enihimya wira Yehova ‘onimwapwapwela alipa-òwisòna’. Xeeni Yehova onipaka awe eyo? Wanipacerya, akhala wira ninnipaka etthu mowiikuxererya, nnooniherya wira khanimmuttittimiha Yehova Muluku ahu ni Namalamulela ahu. Yanenli, vaavo vanipaka ahu itthu sihirina ahu ehakhi, ikwaha sinceene ninrowa onyakulihanaka ni atthu akina. (Mir. 13:10) Yaneeraru, akina yasuwela wira noopaka etthu mowiikuxererya, hiyo pooti wiixoonaka okhala ntoko alolo. (Luka 14:8, 9) Tthiri ninnoona nthowa naya Yehova oniphavela awe wira niiyeviheke. w17.01 3:4, 5

Okhuma vaavo, Adamu khiyaawerya-tho otakiha moomalela mikhalelo sa Yehova. Awo khahiyo paahi yaayelenle okumi aya wa muhoolo wooloka, masi-tho wa anaaya. Awo yaarowa waaravihaka anaaya ohimalela, etampi ni okhwa. (aRom. 5:12) Adamu ahaakhoottiherya anaaya eparakha ya okhalana okumi woohimala. Adamu ni Eva yaarowa waayaraka anamwane oottheka, nave osuulu aya waarowa waayaraka anamwane oottheka. Tthiri okhuma okathi yoole Satana aawiirihale awe Adamu ni Eva omutthekela Muluku, Diabo onneererya owiiriha apinaatamu otheene opaka etthu emosa-ru. (Yoh. 8:44) Yehova onnivikaniha waaphenta apinaatamu. Nnaamwi Adamu ni Eva yammwarenle, Yehova aaniphavela wira apinaatamu akhale apatthani awe. Nave khaaphavela wira anamwane a Adamu akhwe. (2 Ped. 3:9) Tivonto, moohipisa Muluku aahipaka marehereryo wira apinaatamu atthikele okhalana wataana wooloka ni yena.​—Yoh. 3:16. w17.02 1:12-14

Etthu enrowa onikhaliherya wuncererya wiiyeviha wahu ori oweha itthu sooloka sa atthu akina ntoko Yehova oniira awe. Ohiya okathi wotheene ophavela ohimmwa aahiiso waaleela akina etthu yoopaka, nihaana waavekela miruku ni weemererya moonelo aya. Ninnihakalala vanceene okathi anna ni arokora anivahiwa aya muritti wa vameekhaaya. Nave ninnimuxukhurela Yehova oneemererya omurumeela. (1 Ped. 5:9) Nave nnoowerya wuncererya wiiyeviha wahu ori orumeela malakiheryo a Biibiliya wira niixuttihe yowuupuxerya ya murima ahu. Malakiheryo awo anninikhaliherya osuwela moonelo ni muupuwelo wa Yehova. Vaavo nniixutta ahu woona itthu mwa enamuna Yehova onoona awe, nnooweryaka opaka soothanla sinimuhakalaliha. Osoma, ovekela ni ovarihela muteko ele eniixutta ahu, yowuupuxerya ya murima ahu ennilipa. (1 Tim. 1:5) Nave-tho ninniixutta waahela akina nipuro noopacerya. Akhala wira nnoopaka eyo, Yehova ooleiherya wira onrowa omaliherya oniixuttiha ni onikhaliherya wira nincererye wiiyeviha wahu.​—1 Ped. 5:10. w17.01 4:17, 18

Anna ni arokora anniphwanela olemelihiwa ni ottittimihiwa. Nave ti vootthuneya waattittimiha anna aneettiha muloko, niire so, axitokweene a mmulokoni, a esirkwiitu, a Ekomisau ya eFiliyaali, ni anna a Nikhuuru Noolamulela. Otheene aya annaakhapelela atthu a Muluku, nto Biibiliya onnaahimya okhala ‘sovaha sa atthu’. (aÉf. 4:8) Tivonto, nihaana waalemeliha ni waattittimiha nihiwehaka elapo aya, osoma waya, makhalelo aya, aahiiso yaari oothaaciri wala oohaawa. MaKristau a eseekulu yoopacerya aanivaha ntakiheryo nooloka. Maana awo yaanaattittimiha ahooleli, nto hiyo nimpaka etthu emosaru. Okathi onikhala ahu ni axitokweene, nihaathokoreryeke ntoko malaikha aahiiso ntoko Muluku. Masi naalemeliheke ni waattittimiha mwaha wa muteko aya ni wiiyeviha waya.​—2 aKor. 1:24; Wis. 19:10. w17.03 1:13

Herodi Agripa I, yoowo aari mwene a oYudeya, aahikhalana moonelo woovirikana ni wa Yesu. Nto nihiku nimosa na muthukumano wa vameekhaaya, Herodi aahiwara ikuwo sa omwene ni sa musurukhu munceene. Nuumala onweha ni onwiriyana, atthu awo yaahikhuwela eriki: “Ola olavunle mulukú, kahiyó mutthu!” Herodi aahisiveliwa ottottopeliwa. “Okathi ene yowo, nlaikha n’Apwiya nahimmana Herodi, okhala wira khamuttittimihale Muluku. Herodi uwo ahitthumpwa ni miyunku, khukhwa”. (Mit. 12:21-23) Tthiri, Yehova khaamuthanlale Herodi wira okhale muhooleli. Masi, Yesu ahooniherya wira aahithanliwa ni Muluku, ni okathi wotheene aaninvuwiha Yehova ntoko Muhooleli Muulupale a atthu Awe. Yehova aaphavela wira Yesu okhale Muhooleli, ohiya paahi iyaakha vakhaani. Nto nuumala Yesu ohihimuxiwa, owo ahaaleela awiixutti awe wira: “Kovahiwa owerya wothene wirimu ni vathí”. Nave aahincererya oriki: “Miyo kinokhala ni nyuwo mahiku othene mpakha elapo omala”.​—Math. 28:18-20. w17.02 3:20, 21