Março

Okathi wa Yefte, aIsarayeli yaanihaaxiwa ni aFilisti vamosa ni Amoni, okhala wira aIsarayeli yaahimurukunuwela Yehova. (Makh. 11:1-3) Okathi akhulupale a nloko yaamuxonttenle aya wira aakhaliherye, owo aahipaka eyo mowaakuveya. (Makh. 11:4-11) Etthu yootepa otthuneya wa Yefte yaari waakiherya nsina na Yehova, ovikana owana-wana. Aahilakela ovikaniha ororomeleya wa Yehova, nto eyo yaahimukumiherya mireerelo vamosa ni akhwaawe. (aHéb. 11:32, 33) Niireke nnootthara ntakiheryo na Yefte? Waaniheryasa nootoko onyoonyiheya aahiiso othokoreriwa moohiloka ni annihu maKristau. Akhala wira eyo enimwiiraneya, niheemererye onttikiherya ottuli aahiiso ohiya orowela mithukumano wala omuhiya omurumeela Yehova ni onyanyala muloko. Nave, nimutakihaka Yefte, nnoowerya ohiya malamulo a Muluku onikhaliherya oxintta itthu soohiloka wira niimananiheke ovara itthu sooloka.​—aRom. 12:20, 21; aKol. 3:13. w16.04 1:7, 9, 10

Hiyo nohaana ovilela mpakha wanikisa, ohiya okathi vakhaani paahi. Nkahaya mmuupuwele pakiti onisama. Wira atthu yoopowe, ahaana okata mpakha ophiya okhopela. Mutthu onrowa ohiyererya opaceryakaru okata, onoomiryeya. Nave ole onrowa ohiyererya okata ohalaka vakhaani ophiya okhopela, nave onoomiryeya-tho. Akhala wira nimphavela okhala elapo esya, nohaana ovikaniha ovilela. Nto otheene ahu nikhalaneke muupuwelo mmosaru ntoko wa Paulo, yoowo aahimmye so: “Siso hiyo khannojela muteko ahu”. (2 aKor. 4:1, 16) Nimutakihaka murummwa Paulo, ninnikupali tthiri wira Yehova onoonikhaliherya ovilela mpakha wanikisa. Ntoko olempe eliivuru ya aRoma 8:37-39 wira: “Nto hiyo ninniweryexa itthu iya sothene n’ikuru sa Yesu oniphentale. Tthiri, kosuwelexa wira khivo enwerya onimwalanyiha n’uphenta wa Muluku: nnákhala okhwa walá ekumi, nnákhala malaikha walá owerya n’ikuru sa wirimu, nnákhala nanano walá oholo, nnákhala ikuru s’osulú walá ikuru sa vathí, nnákhala itthu sikina sipattuxiwe. Khivo etthu enwerya onimwalanyiha n’uphenta wa Muluku, omphwanyahu mwa Yesu Kristu Pwiy’ahu”. w16.04 2:17, 18

Munvekeleke miruku Yehova wira nweryeke oweha etthu yaarowa wooxankihani ovikaniha ohiirela mpantta myaha sa elapo. Munvekeleke Yehova wookhaliheryani opaka etthu yooloka. Nyuwo pooti otthukweliwa mukhatteya wala ohukhummwa mwa enamuna ekina, mwaha wa okhala oororomeleya wa Yehova. Eyo yiiraneya, munvekeleke Yehova olipa murima, wira nweryeke waatthokiherya akina oratteene, etthu eniwiirihani ohiirela mpantta myaha sa mulaponi. Mukupaliki wira Yehova onimookhaliheryani ovilela. (Mit. 4:27-31) Yehova oonivaha Biibiliya wira onilipiheke. Muupuweleke iversiikulu sinrowa wookhaliheryani ohiirela mpantta myaha sa mulaponi. Mweereryeke osuwela soolepa iyo, okhala wira sinimookhaliheryani okathi ohinrowa anyu omukuxa Biibiliya. Nuulumo na Muluku pooti wookhaliheryani olipiha nroromelo nanyu voohimya sa anatiri a muhoolo. Nohaana okhalana nroromelo nlo wira niweryeke ovilela olupatthiwa. (aRom. 8:25) Muthanleke iversiikulu siniromola itthu sooreera simphavela anyu wira siiraneye elapo esya, nto muupuweleke muryeene weiwo. w16.04 4:14, 15

Ahooleli a eKristau Yoowootha khanilaleya Omwene wa Muluku. Okathi anilavula aya voohimya sa Omwene, awo anihimya wira etthu eri va murimani va mutthu. (Luka 17:21) Khanaakhaliherya atthu wiiwexexa wira Omwene wa Muluku, ti eguvernu eri wiirimu, enihooleliwa ni Yesu Kristu, ni wira moohipisa tenrowa omaliha mixankiho sotheene sa apinaatamu, ohela muhina otakhala. (Wis. 19:11-21) Ohiya-vo, awo animuupuwela Yesu paahi okathi wa Natali ni Paasikha. Khanisuwela ele Yesu enrowa awe opaka, okathi onrowa awe okhala Mwene a Omwene wa Muluku. Tivonto, khanisuwela nthowa naya anitthuneya aya olaleerya. Awo aniimananiha ovekela musurukhu wira apakeke ipa suulupale. Masi Nuulumo na Muluku khanintumihiwa. (2 aKor. 2:17) Ale anilaleya Ihapari sa Omwene aahiphaveleke ophwanya musurukhu mwaha wa muteko anivara aya.​—Mit 20:33-35. w16.05 2:7, 8

Waaniheryasa yookhala enamuna yoowara ni wiitthokiha enoosivelani masi enrowa waaxankiha aahiiso waakhumula anna akina mmulokoni. Masi khanikhanle nlamulo na Biibiliya ninkhoottiha mooluluwanya mawarelo awo. Munrowa osuwela sai moonelo wa Yehova? Murummwa Paulo aahivaha miruku iya soovareleya muteko, oriki: “Siso-tho, athiyana ewareke ikuwo sinaphwanela, yireriheke vohùliha muru ni vohìsona: ehìreriheké n’utthava ikharari vottakala, nnákhala ni maniya àwero, walá ni mukhova worika hatá n’ikuwo sorikexa: nto yìreriheke ni miteko sorera, ntoko sinaphwanela athiyana amphavela omuttittimiha Muluku”. (1 Tim. 2:9, 10) Nave miruku iya sinnaahimya-tho alopwana maKristau. Tthiri wuupuwelela miruku iya sa Yehova, sinninikhaliherya owara ni wiitthokiha mwa enamuna ehinrowa waakhumuliha annihu. Mweettelo wooloka ni ophenta onniniiriha owuupuwela annihu wira nihipake etthu yaarowa waakhumuliha. Wuupuwelela miruku sa Biibiliya, sinoonikhaliherya ophavela osuwela moota Yehova onoonela awe mwaha ola ni oniiriha opaka soothanla sinimuhakalaliha.—1 aKor. 10:23; aFil. 3:17. w16.05 3:14

Adamu aahihiya okhala mwaana a Muluku, vaavo aamurukunuwenle awe Muluku. Masi aana anceene a Adamu aamuthanla Yehova okhala Namalamulela aya. (aHéb. 12:1) Mwaha wa omwiiwelela Mpattuxa aya, awo annooniherya wira aniphavela wira owo okhale Tiithi aya ni Mulipa-oniwuupa, ohiya omuthanla Satana. (Yoh. 8:44) Ororomeleya wa atthu awo, onnuupuxerya moolumo a yoolepa ya olelo. Olelo-va, otheene yaale animurumeela Yehova mwekeekhai, anniimananiha wiiyeviha ni omwiiwelela Yehova ntoko yiirale aya aIsarayeli ale a khalai. Annoona okhala eparakha yuulupale okhalana Yehova ntoko Tiithi aya ni Mulipa-oniwuupa. Niireke munniixoona okhala oloko wookhweya wuupeya mmatatani mwa Muluku, ni munneemererya okhalihiwa mwaapu wooloka? Niireke munnaathokorerya anninyu ni arokorinyu, ntoko atthu anuupiwa ni Muluku? w16.06 1:2, 3

Okhala wira ninnaattamela elapo esya, waamini wahu onnitepa weehereriwa. Tivonto, nihaana ovarerya waamini wahu waalimpe ene. Mwa ntakiheryo, nihaana othokorerya moolumo a Yesu alempwe eliivuru ya Matheyo 6:33. Mwiikoheke so: ‘Kiireke soolukama ni soothanla saka sinnooniherya wira kinnikupali masu ala? Kiireke kaamulakela ocompa mithukumano aahiiso muteko woolaleerya, wira kiphwanye musurukhu munceene? Kaarowa opaka exeeni akhala wira kinivekeliwa ovara muteko okathi munceene? Kiireke kaarowa weemererya wira olumwenku ola okuupe, ni okihiihe omurumeela Yehova?’ Vakhala wira khanintthara ele Biibiliya enihimya awe voohimya sa wataana woohiloka, moota woowoonela atthu ookumihiwa mmulokoni wala matthekulelo oohiloka, murima ahu pooti okhala woolipa. Exeeni enrowa anyu opaka akhala wira murima anyu woopacerya okhala woolipa? Muhaana ovarerya waamini wanyu moohipisa! Mwiivareryeke ni murima wotheene, murumeelaka Nuulumo na Muluku wira nookhaliheryeni olokiherya muupuwelo anyu. w16.06 2:8, 9

Olumwenku wotheene, wookhala mutthenkeso orina atthu animphenta Yehova ni aniphavela omurumeela. Atthu awo ti Anamoona a Yehova. Nnaamwi atthu awo aryeene oohimalela ni avonyaka, Yehova onniweettiha ni munepa awe wootteela. Mwaakha wa 1914, atthu yaamurumeela Yehova yaari vakhaani. Masi Yehova onnireeliha muteko aya woolaleerya. Nto atthu imilyau sene anniixutta ekeekhai ni annikhala Anamoona a Yehova. Yehova aahihimya vahinatthi moota atthu awe yaarowa aya waatta mowaakuveya, nto enihimya aya yoolepa ya olelo. Olelo-va, ninnoona oratteene wiiraneya wa eprofesia ela. Mwekeekhai, sookhala ilapo sinceene atthu aya otheene ahiniphiyerya nummuru na Anamoona a Yehova olumwenku wotheene. w16.06 4:1, 2

Yesu khaanyiherya wira Tiithi awe onnaakhapelela axipalame, eyo enooniherya wira Muluku onrowa waakhapelelaka apinaatamu. (1 Ped. 5:6, 7) Tivonto, ntoko axipalame, hiyo nihooloweleke miteko sahu. Nihaana ovara muteko wira niphwanye yoolya aahiiso musurukhu wira nithume yoolya eyo. Yehova onrowa oreeliha wiimananiha wahu. Akhala wira khanrina yoolya aahiiso musurukhu oniphiyerya, Yehova onninivaha ele ennithowa. Mwa ntakiheryo, atthu akina pooti onivaha etthu ennithowa. Nave-tho, Yehova onnaavaha axipalame opuro wookhala. Ohaavaha owerya woopaka ipuru, ni ohaapaka mwa enamuna eniwerya aya opaka ipuru iyo. Moolikanasa, Yehova onninikhaliherya ophwanya opuro wookhala ni emusi ahu. Vaavo Yesu aalavunle awe masu a yoolepa ya olelo, owo aanisuwela wira aarowa ovaha okumi awe mmureerelo wa apinaatamu. (Mulikanyihe ni Luka 12:6, 7.) Tthiri, Yesu khaakhwenle axipalame aahiiso enama ekina. Owo onikhwenle hiyo wira niphwanye okumi ohinimala.​—Math. 20:28. w16.07 1:11-13

Nranve sai yoottheka ni okhwa? Biibiliya onihimya wira “mwaha wa yottheka ya mutthu mmosene yowo, okhwa ohawerya atthu othene”. Tivonto, okhala wira na osuulu wa Adamu, noorava etampi ni ninnookhwa. (aRom. 5:12, 14, 17) Hata vari siiso, hiyo nnoowerya okhootta olamuleliwa aahiiso weettihiwa ni etampi. Moota xeeni? Akhala wira nnimwaamini mukuttho onoopola wa Kristu, nnoottottela mureerelo oreera murima aahiiso ikharari sa Yehova. (aRom. 5:20, 21) Nnaamwi nryeene alipa-oottheka, nihihiyeke etampi enlamulelaka. Tivonto, vaavo vanipaka ahu etthu yoohiloka, ninninvekela Yehova wira onlevelele. Nto, moota xeeni ninttottela ahu mureerelo eparakha ya Muluku? Paulo ohimmye so: “Vekekhai, yokhumelela eparakha ya Muluku, khwaruhela wopowa atthu othene. Eparakh’ela enninixuttiha okhotta makhalelo ahu òtakhala n’uhiya itthu sintthunexiwa vathí-va, wira mahiku othene netteke ni wisumaliha n’ixariya n’omuttittimiha Muluku”.—Tito 2:11, 12. w16.07 3:5, 6

Ekasamento yoopacerya yaahihononeya mwaha woowi Adamu ni Eva khiyaamwiiwelenle Yehova. Satana Diabo, yoowo ori ‘enowa ya khalai’, yaahinwoka Eva emuhimeeryaka wira alya muhokorokho wa “mwirí onsuweliha oreriwa n’utakhaliwa” aarowa okhalana ankhili. Satana aahimmye wira Eva alya muhokorokho ole, wammwiiriha othanla etthu yooloka ni yoohiloka. Eva khaamuttittiminhe Adamu ntoko muhooleli a etthoko, okhala wira aahilya muhokorokho ole ohinatthi omuleela. Nave Adamu khaamwiiwelenle Muluku vaavo aakhenle awe muhokorokho aavahiwa awe ni mwaarawe. (Wis. 12:9; Maph. 2:9, 16, 17; 3:1-6) Okathi Yehova aakonhe awe, Adamu anvanhe nthowa mwaarawe. Nto Eva aahimmye wira enowa ti yanwonke. (Maph. 3:12, 13) Adamu ni Eva yahoothererya moohikhalela ohiiwelela waya, nto Yehova aahaaphukela. Tthiri, yowiiraneya ele enniniixuttiha etthu! Wira ekasamento ekhumele saana, anamathelana ahaana omwiiwelela Yehova ni weemererya soovonya saya. w16.08 1:1, 4, 5

Xeeni ikasamento sinceene sirina aya mixankiho? Woonasa wene atthu akina, ekasamento aya kheneetta ntoko saalipelela aya, tivonto anninyoonyiheya aahiiso onanariwa. Ikwaha sikina, mixankiho sinnikhumelela mwaha woovirikana ihuweliwo aahiiso mikhalelo saya. Mixankiho sa amusi, ohiiwanana mwaha wa moota woorumeela musurukhu, ni waahuwa anamwane, onnikumiherya mixankiho mukasamentoni. Masi, ti voohakalaliha oweha wira anamathelana anceene maKristau, anniwerya ophuka mixankiho saya, okhala wira anneemererya malakiheryo a Muluku. Okathi sinikhumelela aya mixankiho iyo, mutthu owo onihasuliwa pooti ovekela nikhaliheryo na axitokweene. Mwaha wa okhalana sookumanana sinceene, axitokweene awo pooti waakhaliherya ovarihela muteko mookumini mwaya malakiheryo a Muluku. Vaavo mmosa a anamathelana onvekela awe munepa wootteela wa Yehova, eyo enimwaakhaliherya ovarihela muteko malakiheryo a Biibiliya ni okhalana mikhalelo sa eKristau.​—aGal. 5:22, 23. w16.08 2:11-13

Yesu aari mutthu oowaatteliwa miteko. Masi okathi atthu yaaphavela aya onwiriyana, owo aahiviriha okathi munceene naawo ni aahiwiixuttiha itthu sinceene. Mwa ntakiheryo, nihiku nimosa muttitthi wa atthu waahithukumana mukerekhere wa ephareya wira anwiriyaneke Yesu. Tivo, Yesu ni Pedru yaahisuseriha ekalawa ele mukerekhere mwa ephareya, nto Yesu khupacerya owiixuttiha atthu. Nuumala-vo, aahiphavela omwiixuttiha Pedru etthu. Yesu aahipaka mwiiriirya, khwiiriha okela ihopa sinceene muntthavini mwa Pedru. Moohipisa, Pedru ni ale aarina awe “yahihiya sothene”, khumutthara Yesu (Luka 5:1-11) Nave Nikodemo aaniphavela wiixuttihiwa vanceene ni Yesu. Masi okhala wira Nikodemo aari muulupale a eSineedrio, aanoova owehiwa ni atthu olavulaka ni Yesu. Tivo, aahimuxukurya Yesu ohiyu. Yesu khaamomonle masi aahiviriha okathi nuuwo omutthokiheryaka ikeekhai sootthuneya. (Yoh. 3:1, 2) Imaara sotheene, Yesu aanirumeela okathi awe wira owiixuttihe atthu ekeekhai ni olipiha waamini waya. Moolikanasa, nihaana waaxukurya atthu okathi oniphavela aya, ni oviriha okathi munceene naakhaliheryaka omwiiwexexa Biibiliya. w16.08 4:10, 11

Mowiiyeviha ninnisuwela wira Yehova toowaarya, ooratta ni wira malamulo awe tanireerela oneettihaka. Nakhala atthu oowiiyeviha, ninrowa ottharaka malamulo awe mookumini mwahu. Nave anoonikhaliherya ottittimiha moonelo ni muupuwelo wa atthu akina. Ikuwo sahu sihaana owiiriha atthu osuwela wira na arumeyi a Yehova. Malamulo a Yehova tooloka, nto ninnisiveliwa weettela. Okhala wene, anna ni arokora ahaana ottottopeliwa mwaha wa mawarelo ni mweettelo aya wooloka. Maana awo anniwiiriha atthu osiveliwa ihapari sa Biibiliya sinoopola ikumi, onvuwiha ni omuhakalaliha Yehova. w16.09 3:18-20

Yakobe aahilakela ni aahooniherya wira aaniimananiha wira aakhele mareeliho! (Maph. 32:24-26) Yehova aahimureeliha Yakobe mwaha wa ovilela wawe ni khunvaha nsina na Isarayeli, nsina nenno nintaphulela: “Owana ni Muluku, Khuvilela”. Yakobe aahitthuveliwa. Nto hiyo ninniphavela otthuveliwa, eyo piiyo, weemereriwa ni Yehova ni oreelihiwa. Nave, Rakheli, mwaara a Yakobe, aaniphavela vanceene woona moota Yehova aarowa awe oreeliha osuulu wa iyawe. Masi Rakheli khaayara. Khalai, ohiyara wanaaxankiha vanceene athiyana. Moota xeeni Rakheli aavikaninha awe owana nnaamwi aariipiwe murima? Owo khaakhulumunwe. Masi aahivikaniha owana onvekelaka Yehova ikwaha sinceene. Yehova aahiwiriyana mavekelo a Rakheli khumureeliha onvahaka anamwane.​—Maph. 30:8, 20-24. w16.09 2:6, 7

Ti vootthuneya owiixuttiha aniinyu wira anoophwanya ohakalala wuulupale yeettelaka ele Biibiliya enihimya awe. (Esal. 1:1-3) Mwa ntakiheryo, nyuwo pooti waakoha wira: muupuwele vaakhanle wira nvekeliwe orowa okhala vasisironi. Nave moovekeliwa waathanla atthu wira yakhaleke ni nyuwo. Nuumala-vo, pooti omukoha so: “Mwaarowa waathanla atthu a mukhalelo xeeni wira mwakhaleke saana opuro ole?” Nto mmusome aGalasia 5:19-23, wira nwehe muthinto wa atthu Yehova onaaphavela awe wira yakhaleke elapo esya. Mwa enamuna ela, munoowerya owiixuttiha aniinyu itthu piili sootthuneya. Yoopacerya: Yehova onniniixuttiha moota wookhalana okumi woohakalaliha vano ni okhalana murettele ni atthu akina. Yanenli: Owo onniniixuttiha moota wookhala elapo esya. (Yes. 54:13; Yoh. 17:3) Nave pooti owooniherya aniinyu moota Biibiliya aakhalihenrye awe annihu. Mwa ntakiheryo, nwehe sowiiraneya sa mweekumini siri muliivuruni mwahu, woonasa wene, myaha sini: “Biibiliya Onnirukunuxa Mirima sa Atthu”, sa erevista Owehaweha. w16.09 5:13, 14

Nnaamwi naatteliwe ene miteko, nihaana ophavelasa okathi wira nipake yoosoma ahu yoomwaneene ni omulompa Muluku vatthokoni. (aÉf. 5:15) Yoolakela ahu khahiyo osoma paahi ni wiilokiherya wira navahe ikomentaario omuthukumanoni. Masi, yoolakela ahu ohiya Nuulumo na Muluku nivaraka murima ahu ni olipiha waamini wahu. Okathi ninsoma ahu, nihuupuweleke sootthuneya sa atthu akina paahi, masi nihaana wuupuwela-tho sootthuneya sahu. (aFil. 1:9, 10) Masi vaavo vaniilokiherya ahu wira nrowe olaleerya, omuthukumanoni, aahiiso olavula mwaha, hiyo pooti wuupuwelaka wira ele esomme ahu khenivareleya muteko mookumini mwahu. Mwa ntakiheryo, nnaamwi mulipa onaapeya olawihaka yoolya enaapeya awe ohinatthi okawa, owo khonvona yoolya yeele onlawiha awe. Masi wira ovikanihe okhalana okumi wooloka, owo nave ohaana waapeya yoolya awe yooloka. Moolikanasa, naaphavelaka wira nlipihe wataana wahu ni Yehova, nihaana omusoma Biibiliya khula nihiku. Yoosoma eyo enoonikhaliherya vanceene. w16.10 2:10, 11

Eliivuru ya aHéberi 11:1, ennitthokiherya ele waamini ontaphulela aya. (1) Waamini “t’inamuna y’okhalana itthu sinlipelelahu”. Itthu sinlipelela ahu, sinaahela muhina anatiri a Muluku voohimya sa muhoolo. Mwa ntakiheryo, hiyo ninnikupali wira otakhala onrowa omala ni enimoorwa elapo esya. (2) Waamini ti enamuna “y’okhalana” itthu sinnikupaliha “sihinònahu”. Nnaamwi nihimoonaka, hiyo ninnisuwela wira ookhala Yehova Muluku, Yesu Kristu, malaikha ni Omwene wa wiirimu. Vano, ninrowa wooniherya sai wira ninniwaamini tthiri anatiri a Muluku ni itthu sihinoona ahu? Moota nneettiha ahu okumi ahu, moolumo ahu ni sowiira sahu, sinimooniherya wira ninniwaamini anatiri a Muluku. w16.10 4:6

Okathi onipaka ahu eyo, nimmutakiha Yehova ni Yesu. Awo annixukhurela miteko sahu sooloka, nnaamwi nihiweryaka opaka ntoko simphavela ahu. (Luka 21:1-4; 2 aKor. 8:12) Mwa ntakiheryo, ninnisuwela wira khivanikhweya annihu oowuuluvala orowa omuthukumanoni ni olaleerya ntoko yiiraaya khalai. Niireke ninnaalipiha ni waattottopela mwaha wa wiimananiha waya? Mwaalipiheke akina khula okathi onireerela aya. Khula okathi muninweha anyu mutthu opakaka etthu yooloka, muhaana omuttottopela. Okathi Paulo ni Baarnaba yaaryaaya wAntiyokiya ni oPisidia, akhulupale a esinagoga yaahimenrye wira: Anna “mwariná molumo òwatumererya atthu, himyakani”. Nto Paulo aahittottela muraarelo okathi ole wira aalipihe atthu. (Mit. 13:13-16, 42-44) Vaavo vanaalipiha ahu akina, nave awo anrowa onlipihaka.​—Luka 6:38. w16.11 1:3, 15, 16

Tthiri eparakha yuulupale wiirela mpantta otthokeya wa Yehova ni osuwela ele ennivekela awe! Nto, okhala wira ninnisuwela ele enimusivela Muluku, nookhalana muritti womwiiwelela ni opaka itthu sooloka. Nave hata atthu anceene asiveliwaka opaka itthu soohiloka, hiyo nihaana ‘okhotta sotakhala’ ntoko Yehova oninyokha awe. (Esal. 97:10) Nihikhala-khale naatakihaka atthu yaale ‘anona sorera khwìhana sotakhala: anìra sotakhala, khwìhana sorera’. (Yes. 5:20) Okhala wira nimphavela omuhakalaliha Yehova, noolakela okhala ooloka mmikhalelo sotheene. (1 aKor. 6:9-11) Ele Yehova onnileela awe mBiibiliyani ti ya mureerelo ahu. Hiyo ninnimphenta, nave nimphavela okhala oororomeleya wa yena. Tivonto nintthara ahu malakiheryo awe owaani, mmulokoni, omutekoni, oxikola aahiiso khula opuro oryaahu. w16.11 3:13

Alipa-Oomusoma Biibiliya yaari ooluttuweliwa. Masi eriyari ya mwakha wa 1914 ni 1919 awo khiyiiwexexa saana ele enitaphulela aya masu a Yehova oowi: mwiiweleleke iguvernu. Tivonto, ntoko egrupu, khivaakhweya okathi wotheene ohiirela mpantta ekhotto. Mwa ntakiheryo, okathi presidenti a wEstados Unidos aavekenle awe atthu wira avekeleke wira okhale murettele, nihiku 30 na Maio, 1918, erevista The Watch Tower yaahaatumererya Alipa-Oomusoma Biibiliya wira apakeke etthu emosaru. Anna akina yaanivaha musurukhu aya wira akhaliherye ekhotto, nave akina yaahirowa etoropa wira yawaneke. Masi nnaamwi itthu sikina saareerela olokiheriwa, khivanireerela ohimya wira yaahiroihiwa weepotthani oBabilonia Muulupale mwaha wa itthu iyo. Mwaha woowi yiira akhumme ene moomalela olamulelo wa olumwenku wotheene wa etiini yoowootha, okathi wa Ekhotto Yoopacerya ya Olumwenku Wotheene.—Luka 12:47, 48. w16.11 5:9

Xeeni Paulo ohalaka waalopola maKristau oowoottihiwa wira ‘ahitthareke makhalelo aya’ a werutthuni? Nave, xeeni yoolopola ela eryaaya yootthuneya wa maKristau otheene olelo-va? Mwaha woowi, arumeyi oororomeleya a Muluku pooti opaceryaka woona soophavela saya okhala sootepa otthuneya mookumini mwaya. Mwa ntakiheryo, Paulo aalempe wira anna akina a oRoma yaari ipottha sa “erukulu aya”. Eyo enitaphulela wira orupihana woohiloka, olya aahiiso itthu sikina saahakalaliha erutthu aya saari sootepa otthuneya. (aRom. 16:17, 18; aFil. 3:18, 19; Yuda 4, 8, 12) Nave-tho, waahikhala muxankiho muulupale muloko wa oKorinto, maana yaahikhala ‘alopwana yarupa ni mwara a tithi aya’. (1 aKor. 5:1) Tthiri, Paulo aahaana waalopola maKristau ale a eseekulu yoopacerya, okhala wira ‘yatthara makhalelo aya’ a werutthuni. (aRom. 8:5, 6) Tthiri yoolopola ela ennivareleya muteko olelo-va. w16.12 2:5, 8, 9

Omuleela mutthu onimuroromela anyu itthu sinooxankihani, onimookhaliheryani oxintta mixankiho iyo. Pooti okhala ole othelanne anyu, mpatthani anyu muulupale, aahiiso mutokweene a mmulokoni pooti wookhaliherya woona ele mukhanle anyu oopaka. Biibiliya onihimya wira: “Mwahikoheru miruku, munimojela miteko sanyu: yattá anvaha miruku sorera, miteko iyo sinokelela oholo”. (Mir. 15:22) Mithukumano sahu sa mmulokoni sinnikhaliherya-tho ovukula oxanka. Maana mithukumano iyo sa khula esumana, nyuwo munnikhala ni anna ni arokora, yaawo anoothokoreryani ni aniphavela woolipihani. (aHéb. 10:24, 25) Nto, ‘olipihana vamosá’, onimookhaliheryani olipa momunepani ni ovukula oxanka.​—aRom. 1:12. w16.12 3:17, 18

Okathi onikhalana ahu mixankiho sa ekumi aahiiso mixankiho sihiniwerya ahu orukunuxa, nihaana ohela mmatatani mwa Yehova muxankiho ahu nikupaliki wira onninikhapelela. (1 Ped. 5:6, 7) Nave ninnipaka eniwerya ahu wira nittottele mureerelo mithukumano sa mmulokoni ni iprograma sikina sinikumiheriwa ni mutthenkeso wa Yehova. (aHéb. 10:24, 25) Ankhi anamuyari oororomeleya arina anamwane ahiyale omurumeela Yehova? Profeta Samuweli khaawerya waakhanyererya anaawe oowunnuwa ovikaniha ororomeleya wa Yehova. (1 Sam. 8:1-3) Owo aahimuhiyerya mwaha owo Yehova. Masi, Samuweli aahipaka yaawerya awe wira ovikanihe ororomeleya wa Muluku ni omuhakalaliha Tiithi awe a wiirimu. (Mir. 27:11) Olelo-va, aakhala anamuyari maKristau arina anamwane ahiyale omurumeela Yehova. Awo annimuroromela Yehova yoowo onniwaakhela ale anittharuwa itampi saya. (Luka 15:20) Nave, anamuyari awo anniimananiha ovikaniha ororomeleya wa Yehova, alipelelaka wira ntakiheryo naya nnimwaakhaliherya anaaya otthikela wa Yehova. w17.01 1:15, 16

Mutthu oowiiyeviha okhala wene towiisumaaliha. Onnisuwela itthu sihiniwerya awe opaka ni mowiiyeviha onneemererya soovonya sawe. Owo onniwiriyana miruku sa atthu akina ni onniixutta etthu. Yehova onnisiveliwa vanceene ni mutthu oowiiyeviha. Biibiliya onnooniherya wira mutthu oowiisumaaliha onnisuwela itthu oniwerya awe ni ohiniwerya awe. Eyo ennimukhaliherya waattittimiha atthu akina ni waathokorerya mwa xariya. Moohisuwela, hiyo pooti opaka itthu sinooniherya wiixinnuwiha. Eyo eniweryaneya sai? Hiyo pooti opaceryaka wiixoona okhala a faita waavikana atthu akina, mwaha wa atthu nnasuwela ahu, aahiiso mwaha wookhalana miritti mmulokoni. (aRom. 12:16) Nave hiyo pooti opaka itthu niphavelaka ohimmwa paahi. (1 Tim. 2:9, 10) Waaniheryasa ninnipacerya waaleela atthu akina etthu anitthuneya aya opaka aahiiso ohipaka.​—1 aKor. 4:6. w17.01 3:6-8

Olelo-va muteko woolaleerya onninnuwa, nto mutthenkeso wa Yehova onnirumeela etekonologia ya naanano wira ihapari sooreera saaphwanye atthu anci. Masi okathi mukina, vannaavila atthu oowuuluvala wiixutta inamuna isya sa ovara muteko. (Luka 5:39) Nave-tho, okathi mutthu onuuluvala awe ikuru sawe sinnivukuwa. Tivonto, ti vooloka atthu oowuuluvala owiixuttiha amiravo wira akhalaneke miritti mmutthenkesoni mwa Yehova. (Esal. 71:18) Tthiri khivankhweya ale arina miritti waavaha miteko sikina amiravo. Anna akina pooti oriipiwa murima mwaha woopweteiwa muritti waasivela vanceene. Nave pooti waawereya okathi anuupuwela aya ohiya muritti wa vameekhaaya waasivela. Aahiiso pooti oxanka yuupuwelaka wira yaahikhale vaavo, muteko owo khonrowa ovariwa saana. Woonasa wene anoona wira kharina okathi wa owiixuttiha atthu akina. Nave-tho, amiravo ahaana opixa murima okathi ahinivahiwa aya miritti sinceene. w17.01 5:3, 4

Yesu aari mutthu oomalela ntoko Adamu yaari aya oomalela ahinatthi ottheka. (Yoh. 1:14) Masi moovirikana ni Adamu, Yesu aahiiwelela malamulo a Yehova, yaawo-tho Adamu yaavekeliwa aya. Hata okathi eehereriwa awe vanceene, Yesu aahivikaniha wiiwelela malamulo a Muluku. Okhwa wa Yesu ntoko mutthu, onoowerya owoopola apinaatamu mwa yoottheka ni okhwa. Yesu aahipaka oratteene itthu sotheene Adamu yaavekeliwa aya opaka, masi khuhipaka. Nave Yesu aari mutthu oohittheka, aahiroromeleya ni aahimwiiwelela Muluku moomalela. (1 Tim. 2:6) Yesu oonikhwela, nto mukuttho awe ohaavaha alopwana, athiyana ni anamwane otheene eparakha ya okhalana okumi woohimala. (Math. 20:28) Tthiri mukuttho wowoopola wa Yesu, ti muhulelo onikhaliherya wiiraneya yoolakela ya Muluku.—2 aKor. 1:19, 20. w17.02 1:15, 16

Nkahaya muupuwele vaakhanle wira muri eriyari ya nikhuku noorakama ni nooriipela. Nyuwo pooti oxanka muupuwelaka wira khivaniweryaneya woona okokola. Moolikanasa, ikwaha sikina okumi ahu pooti olemeliwa ni mixankiho suulupale. Hata Yesu, woonasa wene oonenle siiso. Okathi ookotthiwa awe vamwirini, aahiveehiwa ni woonihiwa owereya vanceene. Tthiri ole waari okathi wootepexa oxankiha valaponi! Exeeni yaamukhalihenrye ovilela? Biibiliya onihimya wira Yesu aahivilela mwaha wa etthuvo yoohakalaliha aarowa awe waakhela. (aHéb. 12:3) Yesu aaniwehexexa etthuvo aarowa awe waakhela mwaha wa ovilela, vanceenexa aanisuwela wira ovikaniha ovilela waamukhaliherya otteeliha nsina na Muluku ni waakiherya ehakhi ya olamulela wa Yehova. Yesu aanisuwela wira mixankiho iye khisaarowa opisa ni aanisuwela wira etthuvo aarowa awe waakhela wiirimu ti yoohimala. Olelo-va, mixankiho sinikumana anyu pooti woolemelani ni woowereyani, masi muupuweleke wira khasimpisa. w16.04 2:10

Okhala wira olelo-va atthu anceene khanoova opaka itampi, nto khanoona wira apinaatamu ahaana woopoliwa. Atthu khansuwela etampi exeeni, moota aranve aya, ni ele enitthuneya aya opaka wira ataphuwe okhala epottha ya etampi. Nuumala osuwela ele etampi enitaphulela aya, atthu a murima saana annimuxukhuru Yehova mwaha wa omuruma Mwanawe orwa valaponi wira onoopole yoottheka ni okhwa. Yehova onnipaka eyo mwaha wa ophenta wawe ni oreera wawe murima. (1 Yoh. 4:9, 10) Mukuttho wowoopola wa Kristu ti ethoonyeryo yuulupalexa wira Muluku onniniphenta ni enooniherya oreera murima wuulupale wa Muluku. Tthiri etthu yoohakalaliha osuwela wira naamini mukuttho wa Yesu, nnooleveleliwa soottheka sahu ni nnookhalana yowuupuxerya ya murima yooloka! (aHéb. 9:14) Moohaaniherya, iya ihapari sooreera wira naaleeleke atthu akina! w16.07 4:6, 7

Yehova onninikupaliha wira mwaha woowaamini yowoopola, itampi sahu sinrowa ‘ottipihiwa’. Nto onoonlevelela itampi sahu moomalela. (Mit. 3:19-21) Orumeelaka yowoopola Yehova onoowiiriha apinaatamu akina okhala anaawe wiirimu. Awo ti yaale ari oowoottihiwa. (aRom. 8:15-17) Nave onnaalattula ale a “ipwittipwitthi sikina” wiirela mpantta emusi awe valaponi. Nuumala okhala oomalela, anrowa weehereriwa ekwaha yookiserya. Nave, akhala wira anrowa ovikaniha ororomeleya, Yehova onrowa waakhaliha anaawe. (aRom. 8:20, 21; Wis. 20:7-9) Okathi wotheene, Yehova onrowa waaphentaka anaawe. Yowoopola enrowa ovikanihaka okumiherya mareeliho oohimala. Yehova oonivaha eparakha ela ya vameekhaaya, nto khuuvo mutthu aahiiso owerya onrowa onaakha. w17.02 2:15, 16

Okathi Yehova aanisuwelihale awe ekeekhai, owo aanisuwela itthu saarowa onixankihaka mwaha wa ohimalela wahu. Hata vari siiso, Yehova aaniphavela wira mukhale mpatthani awe. Yehova onniniphenta vanceene, tivonto oonivaha Mwanawe oophentiwa ntoko mukuttho wowoopola. (Yoh. 3:16) Okathi onivonya ahu, nihaana onvekela Yehova wira onlevelele. Mwaha wa yowoopola, hiyo pooti ororomelaka wira onoonilevelela ni nnoovikaniha okhala apatthani awe, hata nryeene oohimalela.​—1 Tim. 1:15. w16.05 4:6, 7