Março

Vaavo ninsoma ahu Maphattuwelo ekapiitulu 1 ni 2, ninnoona wira Adamu ni Eva yaahikhalana otaphuwa atthu anceene aninlela aya olelo-va. Awo yaahikhalana itthu sotheene yaaphavela aya, khiyoova etthu ni khuuvo aathokorerya moohixariya. Nave, khiyaaxanka mwaha wa yoolya, muteko, owereiwa aahiiso okhwa. (Maph. 1:27-29; 2:8, 9, 15) Ti vooloka wuupuwela wira Yehova Muluku paahi torina otaphuwa ohirina mukano. Nthowa xeeni? Nthowa noowi Yehova topattunxe itthu sotheene ni tori Mukhulupale a olumwenku. (1 Tim. 1:17; Wis. 4:11) Moovirikana ni vo, otaphuwa wa soopattuxiwa sotheene wiirimu ni valaponi sookhalana mukano. Nto soopattuxiwa iyo khasirina otaphuwa woomalela. Yehova Muluku oniphavela wira nisuweleke wira yena paahi torina ehakhi ya ohimya akhala wira mikano iyo ti sooloka, sootthuneya ni soohivila. Okhuma woopaceryani, Yehova onnivaha mikano soopattuxa sawe. w18.04 4 itti. 4, 6

Olumwenku ola wootakhala vannixankiha ovilela, nto Yehova paahi tonnikhaliherya ovilela. (2 aKor. 4:7, 8) Vano nkahaya nwuupuwele atthu ale ahirina waataana wooloka ni Yehova. Tthiri vannaavila ovilela mixankiho sa olumwenku ola. Nimutakihaka Yesu nihaana owoonela othunku naaleelaka “ihapari sorera” sa murettele. Mwaapixeryeke murima atthu munaalaleerya anyu. Musuweleke wira atthu akina khansuwela oratteene ikeekhai sa mBiibiliyani. Akina annivarexexa itthu anikupali aya. Awo anuupuwela wira sookupali sa etiini aya sinnivarihana ni emusi aya soolema saya ni atthu a muttetthe aya. Nihinatthi waatumererya atthu akina ohiya sookupali saya sa “khalai” wanipacerya nihaana waakhaliherya olipiha osiveliwa waya soowiixuttiha ni ikeekhai “isya” sa mBiibiliyani seiyo khalai yahaasuwela aya. Yapaka eyo anrowa okhala oolikana ene ohiya sookupali saya sa khalai. Onnivira okathi wira atthu akina apake marukunuxo mookumini mwaya.​—aRom. 12:2. w19.03 23 etti. 10, 12; 24 etti. 13

Ophenta ni othokorerya wa Yehova onninikhaliherya woona inamuna nikhanle ahu oowaalipiha atthu akina. (Yoh. 5:20) Hiyo ninnihakalala vaavo nimphentiwa ahu ni ottottopeliwa mwaha wa itthu sooloka nimmwiirela ahu mutthu nimmuthokorerya ahu saana. Moolikanasa nihaana waaphenta ni waalipiha anna ni arokora vamosa ni atthu a etthoko ahu. Nto vaavo nnaattottopela ahu ninnilipiha waamini waya ni ninnaakhaliherya omurumeela Yehova moororomeleya. Nave nyuwo anamuyari muhaana waalipiha aniinyu. Vaavo anamuyari anaattottopela aya ni waaphenta anaaya eyo ennaakhaliherya anaaya wunnuwa momunepani. Moolumo oowi “Miyo kosiveliwa ni nyuwo”, annooniherya wira Yehova aanikupali wira Yesu ammaleliha moororomeleya yootthuna ya Tiithi awe. Okhala wira Yehova aanimukupali Mwanawe hiyo-tho nihaana okupali wira Yesu onrowa omaliherya moororomeleya sooleiherya sa Yehova. (2 aKor. 1:20) Vaavo nnuupuwela ahu ntakiheryo na Yesu nnoolipiha yoolakela ahu ya wiixutta ni ootthara mavalo awe.​—1 Ped. 2:21. w19.03 8 etti. 3; 9-10 itti. 5-6

Vaavo ninvahiwa ahu etthu yooreera, ninnimuxukhurela ole onivan-he. Masi aIsarayeli khiyaaxukhurenle otaphuwa yaavahiwa aya ni Yehova. Myeeri vakhaani nuumala Yehova waataphula wEjiitu, awo yaahipacerya wunlela yoolya ni itthu sikina yaarina aya wEjiitu. Awo yaaninlaseya mwaha wa emana, yoolya yeeyo yaavahiwa aya ni Yehova. Mooriipiha murima, awo yaaphavela otthikela wEjiitu! Itthu ntoko ‘ehopa, muxiri, mawuryo, mattuvi, esapola ni alyo’ saari itthu sootepa otthuneya ovikana otaphuwa yaavahiwa aya ni Yehova ni omukokhorela yena. Tivonto Yehova aaviruwenle awe. (Moth. 11:5, 6, 10; 14:3, 4) Yowiiraneya ela enniniixuttiha etthu yuulupale, Paulo aahaatumererya maKristau otheene wira axukhureleke otaphuwa avahiwa aya ni Yehova omurumeelaka Mwanawe, Yesu Kristu.​—2 aKor. 6:1. w18.04 10-11 itti. 6-7

Otheene ahu ninniphavela ophen-tiwa ni othokoreriwa mwa xariya. Vaavo nihimphentiwa ahu ni ninthokoreriwa ahu moohixariya hiyo pooti ohikhalana nlipelelo ni wuupuwelaka wira khanrina efaita. Yehova onnisuwela wira ninniphavela ophentiwa ni othokoreriwa mwa xariya. (Esal. 33:5) Nikupaliki wira Muluku ahu onniniphenta vanceene ni oniphavela wira nithokoreriweke mwa xariya. Eyo ennooneya vaavo ninthokorerya ahu saana Nlamulo Yehova aavanhe awe aIsarayeli omurumeelaka Moise. Vaavo ninsoma ahu Nlamulo na Moise ninnoona othokorerya wa Tiithi ihu oophenta Yehova. (aRom. 13:8-10) Nnoowerya ohimya wira Nlamulo na Moise neettihiwa ni ophenta maana itthu sotheene Yehova ompaka awe sineettihiwa ni ophenta. (1 Yoh. 4:8) Malamulo otheene Yehova anvanhe awe Moise yaavarihana ni sooruma iya piili: Omphenta Muluku ni omphen-ta mukhwiihu. (Onam. 19:18; Otum. 6:5; Math. 22:36-40) Tthiri vannooneya wira malamulo 600 ni malamulo makina Yehova aavanhe awe aIsarayeli anooniherya ophenta wawe. w19.02 20-21 itti. 1-4

Yobi aanivaha ephoole enamuna aathokorerya awe athiyana akina ahikhanle amwaarawe. (Yobi 31:1) Okhala wira aari mulopwana oothela Yobi aanisuwela wira khivaareerela osiveliwa ni muthiyana mukina ohikhanle mwaarawe. Nimutakihaka Yobi, niireke ninnisyaka olavula moovekana ni muthiyana ohikhanle mwaarihu? Niireke ninnisyaka oweha epornografia mwa inamuna sotheene? (Math. 5:28) Akhala wira khula nihiku ninnisyaka itthu iyo nnoolipiha ororomeleya wahu. Nave Yobi aanimwiiwelela Yehova mwa enamuna aathokorerya awe itthu sa werutthuni. Yobi aanisuwela wira ororomela mihakhu wammwiiriha opaka etampi yuulupale ni aamuhukhummwa. (Yobi 31:24, 25, 28) Olelo-va ninkhala olumwenku atthu anceene anihela aya nipuro noopacerya mihakhu. Akhala wira nnookhalana moonelo wooloka voohimya sa musurukhu ni itthu sa werutthuni ntoko Biibiliya onnilopola awe nnoolipiha yoolakela ahu ya ovikaniha ororomeleya.​—Mir. 30:8, 9; Math. 6:19, 20. w19.02 6 itti. 13-14

Itthu sotheene Yesu aapaka awe ahooniherya wira aanitakiha moomalela ophenta wa Yehova. (1 Yoh. 4:8-10) Etthu yootepa otthuneya okhala wira moohikhanyereriwa Yesu oovaha okumi awe wira onoopole. Hata nri ene oowoottihiwa aahiiso a “ipwittipwitthi sikina” ninnittottela mureerelo ophenta wa Yehova ni Mwanawe. (Yoh. 10:16; 1 Yoh. 2:2) Nave itthu Yesu aarumenle awe wira opacerihe yoolya ya Wuupuwelela sinnooniherya wira aanaaphenta ni waavaha efaita awiixutti awe. Moota xeeni? Yesu aahooniherya waaphenta wawe atthareli awe oowoottihiwa ohipakaka yoolema yooxankiha masi opakaka yoolya yookhweya wira yuupuweleleke. Khula mwaakha atthareli a Yesu oowoottihiwa yaahaana Wuupuwelela okhwa wawe nto yaarowa opakaka eyo mapuro oovirikana ohela muhina mukhatteya. (Wis. 2:10) Niireke anniwerya omwiiwelela Yesu? Aayo! Okhuma eseekulu yoopacerya mpakha olelo-va maKristau ekeekhai anniimananiha wuupuwelela okhwa wa Yesu. w19.01 24 itti. 13-15

Ninnimuxukhurela Yehova mwaha woowi oonitaphula opotthiwa ni etiini yoowootha, woova itthu seethiru ni owokiwa. Muhoolo, ninnilipelela “otaphuwa n’uvuwa w’àna a Muluku”. (aRom. 8:21) Nto, munoowerya ophwanya otaphuwa iwo akhala wira munimwiiwelela soowiixuttiha sa Kristu. (Yoh. 8:31) Mwiira siiso, “munosuwela ekekhai” ohiya paahi wiixutta, masi okhala moovarihana ni ekeekhai eyo! Olumwenku ola wootakhala, ele enihimmwa okhala okumi wooloka ti wa okathi vakhaani. Maana khuuvo mutthu onsuwela ele enrowa omukhumelela. (Yak. 4:13, 14) Nto etthu yooloka ekhanle anyu oopaka, othanla itthu sinrowa wookhaliheryani ophwanya “ekumi yekekhai”, eyo piiyo, ekumi ehinimala elapo esya. (1 Tim. 6:19) Yehova khonimukhanyererya mutthu wira omukokhoreleke. Ola okathi woothanla ele munrowa anyu opaka. Mumpake Yehova okhala “othajiri” wanyu. (Esal. 16:5) Mwiimananiheke omwaattamela khula nihiku ni ovaha efaita itthu sotheene sooloka oovanhaaweni. (Esal. 103:5) Tthiri mukupaliki wira Yehova onimoovahani ohakalala ohinimala!​—Esal. 16:11. w18.12 26 itti. 19, 21

MaKristau otheene ahaana ottittimiha ekasamento ntoko Yehova ni Yesu anttittimiha aya. Okhala wira na anatampi, ikwaha sikina, atthu akina khanttittimiha ekasamento. (aRom. 7:18-23) Eyo khennitikiniha mwaha woowi maKristau makina a eseekulu yoopacerya, yaahikhalana mixankiho suulupale mukasamentoni mwaya. Murummwa Paulo aahimmye wira “muthiyana otheliwe” ohivalaane ni iyawe. Masi okathi mukina eyo pooti wiiraneya. (1 aKor. 7:10) Paulo khaahimmye itthu siniwiiriha anamathelana ovalaana. Masi noosuwela wira muxankiho ene khahiyo orooraruwa. Vaakhanle wira ti siiso, muthiyana oraruweliwe aamukhalana mathowa ooloka wira omwalane ni otheliwa ni mutthu mukina. Paulo olempe wira, muthiyana onivalaana ni iyawe “ahitheliweké-tho ni mulopwana mukina: ohiya vo, atthikelane n’iy’awe”. Tivonto, Muluku onniwoona anamathelana awo ntoko mutthu mmosa. Paulo ohimmye wira, hata mixankiho iyo siri ene suulupale, ohikhan-le wira arooraruwelana awo ahaana wiimananiha otthikelana ni ophuka mixankiho saya wira avikaniheke okhala vamosa. Awo ahaana waavekela nikhaliheryo axitokweene. w18.12 13 itti. 14-15

Olelo-va, Muluku oniphavela wira nikhale apatthani awe ni niimananiheke olaleya ihapari sooreera. (Math. 28:19, 20; Yak. 4:8) Masi atthu akina arina mukhalelo wooloka pooti weererya onikhulumula. Mwa ntakiheryo, pooti wira patarau anyu omphavela woovahani musurukhu munceene, masi munnisuwela wira munrowa ovaraka muteko okathi munceene ni khamunrowa okhalana okathi woorowela mithukumano ni olaleerya ni muloko. Ankhi akhala wira munoosoma maprusoore anyu yoovahani eparakha yoorowa osoma opuro ottaivenle emusi anyu? Akhala wira eyo enoowiiraneelani, muhaana otokosa mwaha owo, ovekela ni ovaanela ni atthu akina muhinatthi opaka yoothanla. Ti vooloka osuwela niinano-va moota Yehova onoonela awe mwaha owo ni wiiriha muupuwelo awe okhala wawinyu. Akhala wira munoovahiwa itthu iyo, pooti wuupuwelaka wira khahiyo yooweeha. Munoopaka yoothanla yooloka, akhala wira moolakela ohela nipuro noopacerya omurumeela Yehova. w18.11 31-32 etti. 18

Salomoni aahikhalihiwa mwene a Isarayeli nlelo ori ene mmiravo. Wanipacerya wa olamulela wawe Yehova aahimukhumelela moolohani khumuleela wira: “Mukivekele entthunanyu ovahiwa”. Salomoni aahimwaakhula oriki: “Miyo ki mmiravo mwamukhani ohinsuwela owettiherya atthu. . . . Mukivahe miyo murumeyi anyu murima w’ankhili . . . kalamulaka atthu a nloko nanyu”. (1 Mam. 3:5-10) Tthiri mwaha woovekela “murima w’ankhili” eyo yaari etthu yooreera! Eyo ti yaamwiiriha Yehova omphenta Salomoni! (2 Sam. 12:24) Muluku ahu aahisiveliwa ni yooveka ele ya mmiravo Salomoni ni aahinvaha “murima wosuwela ni w’ankhili”. (1 Mam. 3:12) Okathi Salomoni aavikaninhe awe ororomeleya aahivahiwa mareeliho manceene. Aahikhalana eparakha yooteka etemplo yaavuwiha “nsina n’Apwiya Muluku a Isarayeli”. (1 Mam. 8:20) Salomoni aahivuwa mwaha wa ankhili aavahiwe awe ni Muluku. Yehova aahimuupuxerya Salomoni olepa iliivuru tthaaru siri mBiibiliyani. Emosa wa iliivuru iyo ti eliivuru ya Miruku. w19.01 14 itti. 1-2

Atthu akina khaniphavela oleeliwa etthu yoopaka. Awo anihimya wira: “Miyo kihaana opaka ele kimphavela aka”. Woonasa wene, awo aniphavela ohimya wira ahaana opaka soothanla saya maana aakhalana ehakhi yoopaka eyo. Nto khaniphavela okhanyereriwa waatakiha atthu akina aahiiso oleeliwa etthu yoopaka. Ti vooloka osuwela wira, weemererya muupuwelo wa Yehova, khonnikhoottiherya okhalana moonelo ahu. AKorinto a nenli 3:17, onihimya so: “Apwiy’awo ti eroho [munepa]: vavo vankhalaya eroho [munepa wa Yehova], vavo-tho onniphwanyaneya otaphuwa”. Yehova oonivaha othanla mootaphuwa wira nikhale atthu onaaphavela awe. Hiyo pooti okhalana moonelo ahu ni othanla itthu sinnisivela. Maana Yehova onipanke siiso. Masi eyo khentaphulela wira otaphuwa wahu khorina mukano. (1 Ped. 2:16) Okathi nimphavela ahu osuwela etthu yooloka ni yoohiloka, Yehova oniphavela wira nirumeeleke Nuulumo nawe. w18.11 22 itti. 5-6

Okathi niixutta ahu ekeekhai, naahoona wira omurumeela Yehova ti etthu yootepa otthuneya ovikana itthu sa werutthuni, tivonto naalenve ahu sotheene wira niixutte ekeekhai. Masi nuuvira okathi, nnimwaawehaka atthu yaathumaka aparelyo eletroniku a niinaano aahiiso itthu sa musurukhu munceene. Nave pooti opaceryaka woonaka wira yookhala nimpweteiwa ahu. Nto khaninrowa ohakalalaka ni itthu sirina ahu, masi ninrowa opaceryaka oluttuweliwa itthu sa werutthuni ohiya omurumeela Yehova. Ela ennuupuxerya ele yiiraneyale ni Dema. Okhala wira Dema aaniphenta vanceene ‘itthu sa vathí’, owo aahihiya muteko aavara awe ni murummwa Paulo. Pooti wira Dema aaniphenta vanceenexa itthu sa werutthuni ovikana omurumeela Muluku. Aahiiso pooti wira khaaphavela-tho wiimananiha wira ovareke vamosa ni Paulo. Nniixutta exeeni? Waaniheryasa khalai naaniphenta vanceene itthu sa werutthuni. Nto naahiivahe ephoole pooti otthikela ophenta itthu iyo mpakha oniiriha ohiya ekeekhai. w18.11 12 etti. 9

Wootha wa Satana ti wootepa otakhala, maana aanisuwela wira Eva amukupali, khulya muhokorokho ole, Eva aamookhwa. Tthiri eyo ti etthu yiiraneyale. Vano Eva ni Adamu khiyiiwelenle yooruma ya Yehova, nto muhoolo mwaya yaahikhwa. (Maph. 3:6; 5:5) Nave, mwaha wa etampi ya Adamu “okhwa ohaphwanya atthu othene”. Tthiri ‘ohawerya atthu othene, hatá ale yahatthenke volikana n’uhìwelela w’Adamu’. (aRom. 5:12, 14) Ti maana aya hiyo nranve ahu etampi ni nihinkhala ahu mahiku otheene ntoko Muluku aaphavela awe. Masi “iyakha miloko mithanu na mili [70] sinniphiyerya ekumi ahu: nakhalanaka ikuru sinjene, nnophiya iyakha miloko mithanu na miraru [80]. Vano olekela waya, ovelavela n’uhawa pahi”. (Esal. 90:10) Itthu iya sotheene sihiiraneya mwaha wa wootha wa Satana! Omulavulaka Satana, Yesu aahimmye so: “Owo khanakhale n’ikekhai, okhala wira mwa yowo khivo ekekhai”. (Yoh. 8:44) Satana khoturukeyale. Nlelo onnivikaniha ‘owototha atthu othene’. (Wis. 12:9) Masi, hiyo khanimphavela owokiwa ni Satana. w18.10 3-4 itti. 1-4

Vaavo nniimananiha ahu okhalana murettele ni atthu akina, ninnihakalala. Mwiixutti Yakobo olempe so: “Ale anaphavelela murettele atthu othene, annàla murettele, annìmiha exariya”. (Yak. 3:18) Akhala wira khamuniiwanana ni munna aahiiso mmusi anyu, mmuxonttele Yehova wira ookhaliheryeni okhaliha murettele. Nto Yehova onimoovahani munepa awe wootteela wira mooniherye mikhalelo sa eKristau ni okhala oohakalala. Yesu aahittittimiherya otthuneya waya opacerya okhaliha murettele ni atthu akina, oriki: “Tivó, mwarowaka ovelela yovah’anyu waltari, weiwo mùpuwelá wira munn’inyu khakhanle sana ni nyuwo, muhiye yovah’anyu oholo w’altari, murowé toko, mwatàne ni munn’iny’uwo. Vano-nto muhalé murwaka ovelela yovah’anyu”.​—Math. 5:23, 24. w18.09 19-20 etti. 17

Ohiyu wookiserya aari awe ni awiixutti awe ohinatthi wiiviwa, Yesu aahilavula ophenta ikwaha sinaattamela 30. Yesu aahaaleela awiixutti awe wira yaahaana ‘ophentana mukina ni mukhw’awe’. (Yoh. 15:12, 17) Ophentana waya, waarowa okhala ekanyeryo yaarowa waasuwanyeiha wira awiixutti eekeekhai a Kristu. (Yoh. 13:35) Ophenta Yesu aahimmye awe khahiyo olavula paahi, maana ophenta aalavula awe mukhalelo muulupale ni wowiileva. Yesu aahimmye wira: “Khavo onaphen-ta akhw’awe vanjene onvikana ole onleva ekumi awe mwaha w’apatthani awe. Nyuwo munokhala apatthani aka, mwettelakaru itthu kinorumakani”. (Yoh. 15:13, 14) Olelo-va, arumeyi a Yehova annisuweliwa mwaha wa ophentana mwekeekhai ni wiiraana waya. (1 Yoh. 3:10, 11) Awo anniphentana hata ari ene a ilapo soovirikana, nikhuli, nttaava, opuro anikhala aya aahiiso aahuuwale aya. w18.09 8-9 itti. 1-2

Yehova oniphavela wira nikhapeleleke etthoko ahu. Mwa ntakiheryo, nyuwo muhaana ovara muteko wira mukhapelele etthoko anyu. Aximaama anceene anikhala owaani ni anaaya. Nave, vaavo anamuyari ahu ahiniwerya aya wiikhapelela, hiyo nihaana waakhapelela. Nto akhala wira mookhalana miritti sinceene vatthokoni, pooti wira khamunwerya ovara muteko wa Yehova ntoko mwaaphavela anyu. Masi muhikhulumuwe! Yehova onnihakalala vaavo munikhaliherya anyu etthoko anyu. (1 aKor. 10:31) Vakhala wira khamurina miritti sinceene vatthokoni vanyu, niireke munoowerya waakhaliherya anna ni arokora aniwereiwa, oowuuluvala ni oothoiwa? Aahiiso, niireke munoowerya waakhaliherya ale anaakhapelela amusi aya arina mixankiho iyo? Opaka eyo munnivara vamosa ni Yehova vaavo onaakhula awe mavekelo aya.​—1 aKor. 10:24. w18.08 22 itti. 3, 5

Nkahaya muupuwele ntakiheryo na Yosefe. Yakobe aanimphenta vanceene Yosefe waavikana anaawe akina. Eyo yaahiwiiriha annawe omukhalela nrima Yosefe. Okathi Yosefe aarina awe iyaakha 17, annawe yaahimutumiha. (Maph. 37:2-4, 23-28) Nave okathi Yosefe aari awe wEjiitu, aahiviriha iyaakha 13 ohaawaka, wanipacerya ntoko epottha nuumala-vo aahitthukweliwa mukhatteya. Tthiri owo aari ottaiwene wa apapawe, yaawo yamphenta vanceenexa. Mukhalelo ole khiwaamwiirinhe Yosefe onanariwa ni ohikhalana nlipelelo. Exeeni yaamukhalihenrye? Ori ene mukhatteya, Yosefe aahivikaniha wuupuwelela moota Yehova aamukhalihenrye awe. (Maph. 39:21; Esal. 105:17-19) Woonasa wene, Yosefe aahuupuwela sooloha aarina awe oyenve ene, seiyo saathoonyerya itthu saarowa wiiraneya muhoolo, nto saahimukhaliherya woona wira Yehova aari ni yena. (Maph. 37:5-11) Pooti wira, Yosefe aaninvekela Yehova ikwaha sinceene omuleelaka khula etthu yaamuxankiha. (Esal. 145:18) Nto Yehova aanimwaakhula Yosefe ni omulipiherya wira aarowa okhala “ni yowo” hata okathi wa mixankiho. w18.10 23 itti. 3-4

Hiyo pooti waathokorerya atthu nittharaka othaaciri aahiiso ohaawa waya. Niireke vanniweryaneya omuthokorerya mutthu nittharaka othaaciri aahiiso ohaawa wawe? Salomoni aahuupuxeriwa olepa moolumo ooriipiha murima ari yoolepa ya olelo. Exeeni eniixutta ahu ni moolumo ala? Nniixutta wira, naahiivahe ephoole nnimwaapakaka apatthani anna yaale arina muhakhu paahi. Xeeni vari aya vootakhala waathokorerya atthu nittharaka mireerelo saya? Eyo pooti okawanya muloko. Eyo yaahiiraneya miloko sikina sa eseekulu yoopacerya, nto Yakobo aahaalopola maKristau ale voohimya sa mwaha ole. (Yak. 2:1-4) Niheemererye mukhalelo owo okawanyaka muloko ahu. Nto nihaana osyaka waathokorerya atthu nittharaka makhalelo aya. w18.08 11-12 itti. 8-10

Enamuna nnaathokorerya ahu anna ni arokora, enimooniherya wira ninnixukhurela wataana nrina ahu ni Yehova. Awo atthu a Yehova ntoko hiyo. Akhala wira ninnuupuwela eyo, enoonikhaliherya waareerela murima ni waaphenta. (1 aTes. 5:15) Xeeni opaka eyo eri aya yootthuneya? Yesu aahaaleela atthareli awe wira: “Atthu othene anosuwela wira mwá awixutti aka, mwaphentanaka mukina ni mukhw’awe”. (Yoh. 13:35) Malakhiya ohimmye wira Yehova ‘onnawiriyana, khwiwa anihimyaya’ atthu awe ni moota anaathokorerya aya atthu akina. (Mal. 3:16) Tthiri “Apwiya [Yehova] annasuwela atthu ari awaya”. (2 Tim. 2:19) Nave onnisuwela khula etthu enipaka ahu ni enihimya ahu. (aHéb. 4:13) Nto vaavo nihinaareerela ahu murima anna ni arokora, Yehova onnisuwela. Masi nisuweleke wira Yehova onnoona vaavo nnaavaha ahu, owaakhela, waalevelela ni waareerela murima anna ni arokora.—aHéb. 13:16. w18.07 25-26 itti. 15, 17

Ti va miruku omwaattamela Yehova. Maana owo paahi tori oowerya, a miruku ni oophenta! Tivonto, okathi wotheene nihaana ororomeleya wa Yehova ni okhala mpantta awe. (Esal. 96:4-6) Masi atthu akina yaamukokhorela Muluku yaahihiya opaka eyo. Nkahaya muupuwele ntakiheryo na Kayini. Owo khaakokhorela amuluku eethiru, masi Yehova aahikhootta okokhorela wa Kayini. Mwaha wa xeeni? Mwaha woowi, Yehova aahoona itthu sootakhala saari vamurimani va Kayini. (1 Yoh. 3:12) Vano Yehova aahimulopola, oriki: “Mwira-ru sorera, ekhove anyu enimokokolani. Mwahiré sorera, etampi enowipithelani, ephavelaka wovarani. Nto nyuwo munniwerya oxintta?” (Maph. 4:6, 7) Masi Kayini khaiwelenle miruku sa Yehova. w18.07 15-16 itti. 1, 3-4

Muteko woolaleerya ni waapaka awiixutti enamuna yootepa otthuneya ya ohiya muthuko ahu waaryaka. (Math. 28:19, 20) Nave-tho, mweettelo ahu wooloka onninvuwiha Yehova. Nto vaavo ninlaleerya ahu, atthu anceene anniniweha. Waathokorerya saana ni waakhomasa onoowiiriha onithokorerya saana ni omuttittimiha Muluku onimukokhorela ahu. Yesu aahaaleela awiixutti awe wira: “Vano, mukelaka mpani-mmo, muxonttele murettele”. (Math. 10:12) Tthiri muttetthe Yesu aalaleerya awe, atthu yaaniweemererya aletto okela mpaani. Masi, mittetthe sinceene olelo-va yoolema eyo khekhanle. Axineene etthoko anninyoonyiheya yanweha muletto ori ene vamukhora vaya. Masi akhala wira ninnaareerela murima ni opatthaneya, eyo enoowiiriha ohixanka. Vaavo munlaleerya anyu murumeelaka ekarinyu, atthu anaweha wira munnaakhomasa ni munnipatthaneya, niireke eyo khenrowa owiiriha okuxa iliivuru? Tthiri eyo enoowiiriha ophavela ovaanela ni nyuwo! w18.06 22 itti. 4-5

Murummwa Pedru aalaleerya aYuda paahi. Nuumala-vo, Muluku aahooniherya wira maKristau ahikhalaneke nthalu. Nto Pedru aahimulaleerya Kornelio, nakhotto ooRoma. (Mit. 10:28, 35) Moottharelana, Pedru aahiviriha okathi ni Kornelio ni maKristau yahaakhan-le aYuda. Muhoolo mwaya, epooma ya wAntiyokiya, Pedru aahihiya olya ni maKristau yahaakhanle aYuda. (aGal. 2:11-14) Paulo aahimpwapwela Pedru, nto Pedru aaheemererya nikhaliheryo na Paulo. Ninsuwela sai? Ninnisuwela eyo maana Pedru aahaalepela epaphelo awe yoopacerya maKristau yahaakhanle aYuda a wAsia Menor, ottittimiheryaka otthuneya waya waaphenta anna otheene. (1 Ped. 1:1; 2:17) Tthiri mwaha wa ntakiheryo na Yesu, arummwa yaahiixutta waaphenta “atthu othene”. (Yoh. 12:32; 1 Tim. 4:10) Nnaamwi waavinre okathi munceene, awo yaahirukunuxa moota yaawoonela aya atthu. Okhala wira maKristau ‘àwara omutthu wa nanano’, awo ahiixutta wira atthu otheene anoolikana ohoolo wa Muluku.—aKol. 3:10, 11. w18.06 13 itti. 15-16

Ikwaha sikina yoowara ya yuuma ya nakhotto, yaapakiwa mwa enamuna yaakhaliherya okela saana mmakhatani mwa nakhotto. Okathi mukina, aahaana oweha akhala wira sookweecereya saana, maana yoowara eyo, yaanikhapelela murima ni mipantta sikina sa erutthu awe! Malamulo a xariya a Yehova, annikhapelela ‘murima’ ahu aahiiso omutthu ahu wa muhina, ntoko yoowara ya yuuma. (Mir. 4:23) Nakhotto khaatthuneya oturuka yoowara awe ya yuuma yoolipa, onawara yoohilipa. Moolikanasa, nihikhala-khale nturukaka malamulo a Yehova voohimya sa ele eri yooloka, vano nnatthara ele nnoona ahu okhala yooloka. Maana khanrina osuwela onwerya okhapelela murima ahu. (Mir. 3:5, 6) Ti nthowa naya okathi wotheene, nintthuneya ahu oweha “yowara [ahu] y’ayuma”, wira noone akhala wira ennivikaniha okhapelela murima ahu. Nave vaavo nintepa ahu wiixutta ni ophenta ikeekhai iyo, vanoonikhweelaka weettela sooruma sa Muluku, aahiiso owara “yowara y’ayuma”.​—Esal. 111:7, 8; 1 Yoh. 5:3. w18.05 22-23 itti. 3-4, 6-7

Nnaamwi Moise aavikaninhe waahoolela aIsarayeli iyaakha sinceene, nlelo awo yaaniixinliha ohiya paahi mwaha woohikhala maasi masi-tho yaaninvaha nthowa Moise yuupuwelaka wira taawiiriha ovoliwa ntthona. (Moth. 20:1-5, 9-11) Nto Moise aahinanariwa vanceene khuhiya okhala oomaala. Ohiya olavuliha mwala ntoko Yehova aahimmye awe owo aahaapwapwela vootakhala atthu ale ni aahiivuwiha mmensawe. Nto aahimana mwala ole ikwaha piili khukhuma maasi manceene. Onanariwa ni wiixinnuwiha waahimwiiriha Moise opaka etampi yuulupale. (Esal. 106:32, 33) Mwaha woohiya mwa okathi vakhaani okhala oomaala Moise kheemereriwe okela Elapo Yooleiheriwa. (Moth. 20:12) Yowiiraneya ela enniniixuttiha etthu yuulupale. Yoopacerya okathi wotheene nihaana wiimananiha okhala oomaala aahiiso oowiiyeviha. Masi vakhala wira nnoonyoonyeriwa wiimananiha iwo mwa okathi vakhaani wiixinnuwiha pooti oniiriha ohimya wala opaka itthu soololo. Ya nenli akhala wira nooxanka aahiiso noonyoonyiheya vanoonivila okhala oowiiyeviha. Nto nihaana wiimananiha okhala atthu oowiiyeviha hata nrina ene mixankiho. w19.02 12-13 itti. 19-21

Niireke muteko woolaleerya ti woolemela? Nnakhala vakhaani. Nuumala olavula nlikanyiho na evidera, Yesu aahimmye wira vaavo ninlaleerya ahu nnoophwanya otteeliwa murima wa Kristu. (Yoh. 15:11.) Moota xeeni? Nlikanyiho na Yesu, owo aahiilikanyiha ni evidera, nto awiixutti awe ni iritta. (Yoh. 15:5) Okhala wene, iritta sinnikhalana maasi ni yoolya mwaha woowi siri vamwirini vaya. Moolikanasa, nnoowerya otteeliwa murima akhala wira nihaataana ni ninnitthara mavalo a Yesu. Eyo enooniphwanyiha otteeliwa murima aarina awe ni ohakalala mwaha woopaka yootthuna ya Muluku. (Yoh. 4:34; 17:13; 1 Ped. 2:21) Hanne, yoowo ovirinhe iyaakha sinivikana 40 ori ene pioneero onihimya so: “Ohakalala oniphwanya aka nuumala olaleerya, onnikiiriha ovikaniha ovara muteko wa Yehova”. Otteeliwa murima onoonikhaliherya ovikaniha olaleerya hata atthu anceene ahiphavelaka oniwiriyana.—Math. 5:10-12. w18.05 9 etti. 2; 12-13 itti. 14

Murummwa Paulo ntakiheryo noolokexa na mutthu aalipiha annawe. Masi, munepa wootteela waahimwiiriha Paulo waalaleerya atthu a oGresia, oRoma ni atthu akina yaakokhorela amuluku anceene. (aGal. 2:7-9) Paulo aahilaleerya ilapo seiyo olelo-va sinisuweliwa okhala oTurquia, oGresia ni wItália. Owo aahaalaleerya atthu yahaakhanle aYuda yaakhala mapuro awo ni aahipaka miloko. Masi maKristau ale masya yaanixanka vanceene. Maana atthu a elapo aya yaanaalupattha, tivonto yaanitthuneya olipihiwa. (1 aTes. 2:14) Mwakha 50 EC, Paulo aahilepela muloko musya wa oTesalonika epaphelo yoolipiha, oriki: “Mahiku othene ninnimuxukhuru Muluku mwaha wa nyuwo othene, niwupuwelakani mmalompeloni mwahu. . . . Ninnupuwela vohihiyererya wira munnittharihela wamini wanyu ni miteko sorera, ni wira munniphentana muhawelanaka ni wira munnikhalela nthiti”. (1 aTes. 1:2, 3) Nave, Paulo aahaavekela wira alipihaneke mukina ni mukhwaawe oriki: “Mulipihaneke murima, mukhaliheryaneke ntoko sinìranyu vano”.​—1 aTes. 5:11. w18.04 19-20 itti. 16-17

Vaavo muniimananiha anyu omusiveliha Yehova, munoophavelaka waaleela akina voohimya sa yena. Tivonto, muteko woolaleerya ohaana opakiwa moowaakuveya ni ohaana okhala wootepa otthuneya mookumini mwahu. Niireke nyuwo pooti okhalana yoolukama ya olaleerya ikwaha sinceene? Munoowerya okhala pioneero? Masi, ankhi akhala wira muteko woolaleerya khonoosivelani vanceene? Munrowa owerya sai otthokiherya saana sookupali sanyu? Itthu piili sinoowerya wookhaliheryani: Yoopacerya, mwiilokiheryeke saana. Ya nenli, muhooceyeke waaleela akina ele enisuwela anyu voohimya sa Yehova. Nto munimoona wira muteko woolaleerya onimoosivelakani vanceene. Mwiilokiheryeke wira mwaakhule makoho anipakiwa ni anaxikola akhwiinyu. Mwa ntakiheryo, awo pooti okoha so: “Kiireke Kihaana Okupali Wira Atthu Aroothatuwa?” Ebroxura Makoho Muloko ennaakhula nikoho nna, nto nyuwo pooti orumeela wira nwaakhule. Aahiiso pooti oweha eviidiyu eri va websaite ahu jw.org. Nave-tho, munoophwanya mpantta oni: Omwaamini Muluku. Ikaruma iyo pooti wookhaliheryani okathi woolaleerya. w18.04 29-30 itti. 10-11

Nnaamwi Adamu ni Eva yaataphun-we vanceene, otaphuwa waya waahikhalana mukano. Mikano sikina saari sa ephattu. Mwa ntakiheryo, wira avikaniheke okhala akumi, awo yaahaana omumula, olya ni orupa. Niireke eyo enitaphulela wira khiyaataphunwe? Nnaari. Maana Yehova aanisuwela wira opaka itthu iyo samwaaphwanyiha ohakalala wekeekhai. (Esal. 104:14, 15; Mus. 3:12, 13) Yehova aahaavaha Adamu ni Eva nlamulo nooluluwanya. Owo aahaaleela wira yaayareke anamwane, asareyeke valaponi ni akhapeleleke elapo. Niireke nlamulo nna nanaakhoottiherya otaphuwa? Nnakhala vakhaani! Maana naanaavaha eparakha ya wiiriha elapo yotheene okhala eparayiisu, opuro yaarowa aya okhalaka ni anaaya mahiku otheene. Eyo yaari yoolakela ya Muluku. (Esal. 127:3; Yes. 45:18) Vaakhanle wira Adamu ni Eva yaahimwiiwelela Yehova, awo ni anaaya yaarowa ohakalalaka mahiku otheene. w18.04 4-5 itti. 7-8

Akhala wira ninnaapixerya murima atthu nnaalaleerya ahu khaninrowa waakhanyereryaka weemererya ni wiiwexexa ikeekhai sa mBiibiliyani ekwaha yoopacerya aniiwa aya. Mwa ntakiheryo nkahaya muupuwele moota nikhanle ahu oomukhaliherya mutthu wiiwexexa nlipelelo na okumi woohimala mparayiisu valaponi. Atthu anceene ankupaliki wira okhwa omala wa itthu sotheene. Aahiiso anuupuwela wira atthu otheene ooreera murima anrowa wiirimu. Munna mmosa onnihimya moota onaakhaliherya awe atthu okupali wira enookhala eparayiisu valaponi. Wanipacerya owo onsoma yoolepa ya Maphattuwelo 1:28. Nuumala-vo onnimukoha mwaneene etthoko opuro Muluku aaphavela awe wira apinaatamu akhaleke ni mikhalelo yaarowa aya okhalana. Nto atthu anceene animwaakhula wira: “Valaponi ni mikhalelo sooloka”. Moottharelana onnimusoma Yesaya 55:11 ni onaakoha akhala wira yoolakela ya Muluku yooturukeya. Ikwaha sinceene anaakhula wira: Nnaari. Wanikisa onnisoma Esalimo 37: 10, 11 onaakoha makhalelo aapinaatamu muhoolo. Tthiri omurumeela Biibiliya mwa enamuna eyo ennaakhaliherya atthu anceene woona wira Muluku oniphavela wira atthu akhaleke valaponi ni makhalelo ooloka. w19.03 24 itti. 14-15; 25 etti. 19

Yehova aahooniherya wira oniphavela wira niwiriyaneke ni wiiwelela moolumo a Mwanawe. Moophenta Yesu aahiwiixuttiha atthareli awe moota woolaleya ihapari sooreera ni ikwaha sinceene aamakela owuupuxerya wira avikaniheke okhala oowehaweha. (Math. 24:42; 28:19, 20) Nave-tho aahaatumererya wira yiimananiheke ni ahooceyeke. (Luka 13:24) Yesu aahaalipiherya atthareli awe wira yahaana ophentana okhala oowiiraana ni wiiwelela malamulo awe. (Yoh. 15:10, 12, 13) Olelo-va malakiheryo awo tootepa otthuneya ntoko okathi ole Yesu aavanhe awe. Yesu aahimmye so: “Othene ale anettela ekekhai annìwelela molumo aka”. (Yoh. 18:37) Ninnooniherya wira ninniwiriyana moolumo a Yesu vaavo ninvikaniha ahu ‘olevelelana imara sothene nintthekelanahu’. (aKol. 3:13; Luka 17:3, 4) Nave-tho ninnooniherya wira ninniiwelela moolumo a Yesu vaavo ninluttuweliwa ahu olaleya ihapari sooreera okhale “okathi worera hatá okathi wohiphwanelela”.​—2 Tim. 4:2. w19.03 10 itti. 9-10