Abril

Ankhi hiyo? Niireke nnuupuwela ntoko Yehova, aahiiso ntoko atthu a elapo ela? Ntoko maKristau, ninnimananiha opaka itthu sinimusivela Muluku. Masi, sai voohimya sa itthu nnuupuwela ahu? Niireke ninnimananiha wuupuwela ntoko Yehova, niire so, woonaka itthu ntoko Yehova onoona awe? Eyo enivekela wiimananiha vanceene. Masi, ti vookhweya wuupuwela ntoko anuupuwela aya atthu a mulaponi, maana munepa wa elapo ela ohuulaana. (aÉf. 2:2) Nave-tho, atthu a moolumwenkuni waasivela wiisuupuwela mmensaya paahi, nto vanniweryaneya hiyo otthara muupuwelo aya. Tthiri, ti voovila wuupuwela ntoko Yehova onuupuwela awe masi, ti vookhweya wuupuwela ntoko anuupuwela aya atthu a elapo ela. Akhala wira ninnihiya muupuwelo ahu weettihiwaka ni olumwenku ola, ninrowa okhalaka atthu a nrima, ni nnimuupuwelaka wira nookhalana ehakhi ya othanla ele eri yooloka ni yoohiloka. (Mar. 7:21, 22) Tivonto, ti vootthuneya wiixutta wuupuwela “itthu sa Muluku”, ohiya “s’atthu”. w18.11 21 etti. 1; 22 itti. 3-4

Tthiri Yesu khaareere olipa okathi Yehova aalavunle awe ikwaha tthaaru ohimyaka wira aanimusuwela ni omphenta mwanawe. Moohipisa nuumala Yesu obatiziwa oMuro Yordani, Yehova aahihimya moolumo a yoolepa ya olelo. Vanikhala wira Yohani Mbatiza paahi taiwale masu ale a Yehova. Moottharelana, ohalaka mwaakha mmosa wira Yesu iiviwe, arummwa awe araru yaahimwiiwa Yehova omuhimyaka Yesu, wira: “Ola ti Mwan’aka onimphentexaka: yola t’osiveliwa waka. Mmwiweleleke yola!” (Math. 17:5) Nave, ahalaka mahiku vakhaani wira Yesu iiviwe, Yehova aahitthikela omulavula Mwanawe. (Yoh. 12:28) Yesu aanisuwela wira aamootheriwa onveeha Muluku ni wiiviwa vowooniha othunku. Masi aahivekela wira wiireye otthuna wa Muluku ohiya otthuna wawe. (Math. 26:39, 42) Yesu “ahivilela wiviwa” vamwirini va nihaaxeryo, “ahithokoreryaka wuliwa muru” mwaha woowi aaphavela ovuwihiwa ni Tiithi awe ohiya ni olumwenku.—aHéb. 12:2. w18.07 7-8 itti. 15-16

Nuumala Yesu opaceriha Yoolya ya Ohiyu ya Apwiya, owo ahooniherya olipa murima. Moota xeeni? Yesu aaheemererya yootthuna ya Tiithi awe hata aasuwela wira opaka eyo aamwiiviwa vowooniha othunku ntoko nakrime. (Math. 26:65, 66) Yesu aahivikaniha ororomeleya wira ovuwihe nsina na Yehova okhaliherye okhulupale wa Muluku ni wira apinaatamu anttharuwa itampi saya akhalane eparakha yoophwanya okumi woohimala. Masi okathi omosaru Yesu aahaalokiherya atthareli awe mwaha wa etthu yaarowa waakhumelela mohipisa. Yesu aahooniherya-tho olipa murima ohiwehexexaka mixankiho saarowa omukhumelela, masi owehexexaka sootthuneya sa arummwa awe oororomeleya. Yoolya yookhweya aapanke awe nuumala omulaxerya Yuda yaaniwuupuxerya ale yaarowa okhala aatthareli awe oowoottihiwa mireerelo yaarowa aya ophwanya mwaha wa ephome ya Yesu ni yaamwiirela mpantta nivarihano na niinaano aapanke awe.​—1 aKor. 10:16, 17. w19.01 22-23 itti. 7-8

Yesu aahiiwa nsu na Tiithi awe nikhumaka wiirimu nriki: “Kovuwiha nave kinovuwiha-tho”. Yesu aahiiniwa murima mwaha wa muritti aarina awe wa ovikaniha ororomeleya wa Yehova. Yesu aanisuwela wira aamuhasuliwa vanceene owaxuliwa ni wiiviwa vootakhala. (Math. 26:38) Etthu yootepa otthuneya Yesu aaphavela awe waari ovuwiha nsina na Tiithi awe. Owo aahootheriwa onveeha Muluku ni aahiiniwa murima okhala wira okhwa wawe waamunyoholiha nsina na Muluku. Nimutakihaka Yesu nihaana wiimananiha ohinyoholiha nsina na Yehova. Woonasa wene ntoko Yesu, hiyo pooti othokoreriwa moohixariya. Nave hiyo pooti oxanka mwaha wa itthu nnootheriwa ahu ni ale annilupattha. Nto nnapacerya wuupuwela moota wootheriwa iyo onrowa aya onyoholiha nsina na Yehova. Okathi owo moolumo a Yehova pooti onimaaliha vanceene. Musuweleke wira okathi wotheene Yehova onoovuwiha nsina nawe.​—Esal. 94:22, 23; Yes. 65:17. w19.03 11-13 itti. 14-16

Awiixutti a Yesu yaahinyoonyiheya! Maana Yesu khaapanke ele yuupuwela aya, niire so, otikitherya omwene wa Isarayeli, masi aahimmye wira moohipisa aarowa ohaaxiwa ni wiiviwa. Murummwa Pedru taapacenrye olavula oriki: “Pwiya, Muluku ahitthuné eyo. Nnari! Etthu iyo ehokhumeleleni!” Yesu aakhunle wira: “Satana wé! Khuma vamaithoni vaka! Weyo onokererya: khunupuwela itthu sa Muluku, onupuwela s’atthu pahi”. (Math. 16:22, 23; Mit. 1:6) Waakhula wa Yesu onooniherya wira muupuwelo wa Yehova ti woovirikana ni muupuwelo wa elapo ela eneettihiwa ni Satana. (1 Yoh. 5:19) Pedru aamutumererya Yesu wiisuupuwela mmansawe paahi, ntoko siniira aya anamunceene a olumwenku ola. Waakhula wa Yesu, wooniherya wira aaneemererya muupuwelo wa Yehova ni aanikhootta muupuwelo wa olumwenku. w18.11 21-22 itti. 1-2

Nkahaya muupuwele moota Yehova onoonela awe vaavo onaaweha awe atthu a olumwenku wotheene athukumanne ene wira yuupuwelele Yoolya ya Ohiyu ya Apwiya. Yehova khonweha paahi muttitthi wa atthu awo masi onninweha khula mutthu. Nave onnaaweha ale anrweela muthukumano owo khula mwaakha. Atthu akina annoorwa hata akumanaka mixankiho sinceene. Mwaha wa mixankiho, atthu akina khanwerya orowela mithukumano sahu sa khula esumana masi annirweela muthukumano wa Wuupuwelela maana annisuwela wira ti wootepa otthuneya. Yehova onnaaweha atthu ale anrweela muthukumano wa Wuupuwelela ekwaha yoopacerya woonasa wene aphavelaka osuwela etthu eniiraneya. Moohaanyiherya Yehova onnisiveliwa aawehaka atthu anceene arowelaka muthukumano wa Wuupuwelela. (Luka 22:19) Masi Yehova onnivaha efaita nthowa ninwiiriha atthu orowela muthukumano wa Wuupuwelela. Tthiri, ninnixukhurela wiixuttihiwa ni Yehova orumeelaka mutthenkeso awe.​—Yes. 30:20; Yoh. 6:45. w19.01 26-27 itti. 1-3

Yesu aahipaka eyo ohelaka soophavela sa arummwa awe nipuro noopacerya ohiya sawawe ni vaavo aavanhe awe okumi awe wira owoopole arummwa awe. Okathi mukina Yesu aanikhala ni arummwa awe hata okhulumunwe ene aahiiso oxankale ene. (Luka 22:39-46) Nave-tho Yesu aaniimananiha waarumeela atthu akina ohiya ophavela orumeeliwa. (Math. 20:28) Hiyo nniirela mpantta emusi ya maKristau eekeekhai a olumwenku wotheene ni ninniimananiha waalattula atthu akina wira nithukumaneke vamosa. Nave nihaana waakhaliherya mwa enamuna ya vameekhaaya “amus’ihu òwamini” yaawo ahiyale olaleerya. (aGal. 6:10) Ninnooniherya waaphenta wahu vaavo nnaalipiha ahu ni waatumererya orowela mithukumano sahu otepexa wene muthukumano wa Wuupuwelela. Nimutakihaka Yehova ni Yesu, hiyo ninnihakalala vanceene vaavo ale ahiyale olaleerya anhokolowela aya wa Yehova.—Math. 18:14. w19.01 29 itti. 12, 14; 30 etti. 15

Okathi aapacerinhe awe Wuupuwelela okhwa wawe, Yesu aakunxe itthu saahanle niira na Paasikha, ephaawu yoohiheliwa miropo ni eviinyu yaahanle. Yesu aahaaleela arummwa awe wira ithoonyeryo iye saataphulela erutthu awe ni ephome awe yoomalela yeeyo moohipisa aarowa awe ovaha ntoko mukuttho wowoopola. Arummwa ale khiyaatikinihiwe ni enamuna ele esya ya Wuupuwelela mwaha wookhala yookhweya aahiiso yohaattiheriwa itthu. Nthowa xeeni? Myeeri vakhaani saavinre aari etthoko ya apatthani awe Laazaro, Martha ni Maria. Nto okathi aaphumurya awe aahipacerya wiixuttiha. Martha aahikhala masi owo aahikhummwa murima ni ovelavela ophavelaka olokiherya yoolya yinceene wira aavahe aletto awe. Nuumala oweha eyo mooreera murima Yesu aahimukhaliherya Martha woona wira khivaatthuneya olokiherya yoolya yinceene. (Luka 10:40-42) Muhoolo mwaya sihalaka iwoora vakhaani paahi wira iiviwe Yesu aahivarihela muteko miruku sawe. Aahimananiha wira Wuupuweleliwa okhwa wawe okhale wookhweya. w19.01 20-21 itti. 3-4

Yehova aahinvuwiha Yesu mwa enamuna ahaalipelela awe. Nuumala omuhihimuxa ni omuroiha wiirimu “Muluku ònvuwiha [Yesu] vanjene”. Nave Yehova onvaha Yesu erutthu yomunepani ehinikhwa. Yesu paahi topacenrye ovahiwa etthuvo eyo! (aFil. 2:9; 1 Tim. 6:16) Tthiri moota Yehova omutthuvenle awe Yesu mwaha woororomeleya, ti woohakalaliha! Exeeni enrowa onikhaliherya ophavela osuweliwa ni Yehova ohiya ni olumwenku ola? Nihaana weemererya wira okathi wotheene Yehova onnaasuwela ni waatthuvela arumeyi awe oororomeleya ni ikwaha sinceene onnipaka eyo mwa enamuna yahaalipelela aya. Nave nihaana wuupuwelela moota Yehova onrowa awe onreeliha muhoolo! Masi, vaavo ninvilela ahu mixankiho sa olumwenku ola wootakhala, nihaana wuupuwela wira olumwenku ola onoomala moohipisa. Tivonto khula etthu enniiriha ovuwa olumwenku ola enoomala. (1 Yoh. 2:17) Tthiri Tiithi ihu oophen-ta Yehova, khonrowa oliyala muteko ahu ni ophenta noonihenrye ahu nsina nawe, maana owo “naxariya”.​—aHéb. 6:10. w18.07 8 itti. 17-18

Ohiyu wookiserya aari awe ni arummwa awe, Yesu aahilavula vanceenexa sa wiiraana. Ti maana aya, okathi aavekela awe ni awiixutti awe, Yesu aavekenle awe wira yaahaana okhala mmosaru aahiiso oowiiraana, ntoko owo ni Tiithi awe ari aya oowiiraana. Wiiraana wa awiixutti, waamwaakhaliherya atthu woona wira Yehova taamurumme Yesu orwa valaponi. Nave atthu yanweryaka waasuwela atthareli eekeekhai a Yesu mwaha wa ophentana mukina ni mukhwaawe. Vano ophenta iwo, wanwiiriha otepa wiiraana. (Yoh. 13:34, 35) Ohiyu ole Yesu aahilavula vanceene sa wiiraana. Mwaha wa xeeni? Mwaha woowi aahoona wira arummwa awe khayiiraanale vanceene. Mwa ntakiheryo, arummwa yaahinyakulihana aphavelaka omusuwela ole “òniwa okhala mulupalexa” eriyari aya, ntoko yiirale aya okathi mukina. (Luka 22:24-27; Mar. 9:33, 34) Nihiku nikina, Yakobo ni Yohani yaahinvekela Yesu wira aavahe opuro wootepa otthuneya Momweneni wa wiirimu, wira mmosa okhale moono woolopwana mukina woothiyana.​—Mar. 10:35-40. w18.06 9-10 itti. 1-2

Yehova oniphavela wira ale athelanne aphentaneke vanceene okumi aya wotheene. (Math. 19:3-6) Nto ole onraruwa onnipaka etampi yuulupale. Tivonto Nlamulo na neethanu nenli ninkhoottiha aya oraruwa. (Otum. 5:18) Tthiri ole onraruwa ‘oninveha Muluku’ ni onnooniherya ohimphenta ole othelanne awe. (Maph. 39:7-9) Vano ole oraruweliwe pooti oviriha iyaakha sinceene uupuwelaka. Nave Yehova oniphavela wira anamwane akhapeleliweke saana. Nave Yehova aahaaruma anamuyari wira yaavaheke anaaya ohiya paahi itthu sa werutthuni masi-tho itthu somunepani. Anamuyari yaahaana ottottela mureerelo khula okathi wira yaakhaliherye anaaya wiiwexexa ni osiveliwa Malamulo ni omphenta Yehova. (Otum. 6:6-9; 7:13) Anamuyari yaahaana owoonaka anaaya ntoko yoovaha ya Yehova yeeyo yaatthuneya ovahiwa efaita ni othokoreriwa saana.​—Esal. 127:3. w19.02 21 itti. 5, 7

Yobi aahilipiha ororomeleya wawe uupuwelelaka etthuvo Muluku aarowa awe onvaha muhoolo. Owo aanikupali wira Muluku aanimukhaliherya wira ovikaniheke ororomeleya. Hata aakumana mixankiho Yobi aanikupali wira Yehova ammutthuvela. Nto mwaha wookupali eyo Yobi aahivikaniha okhala oororomeleya. Nave Yehova aanisiveliwa vanceene ni ororomeleya wa Yobi. Nto aahimutthuvela vanceene hata aari mutthu oohimalela! (Yobi 42:12-17; Yak. 5:11) Muhoolo Yobi onrowa otthuveliwa mwa enamuna ya vameekhaaya. Muluku ahu Yehova khoturukeyale. (Mal. 3:6) Akhala wira ninnikupali wira Yehova onnivaha efaita ororomeleya wahu yoolipelela ahu ya muhoolo enoovikaniha okhala yekeekhai vamurimani vahu. (1 aTes. 5:8 9) Okathi mukina pooti wuupuwelaka wira khamunwerya ovikaniha ororomeleya masi musuweleke wira khamukhanle mekhinyu. Nyuwo mun-nikhaliheriwa ni arumeyi oororomeleya ikonto sinceene a olumwenku wotheene. Nave munnaasuwela alopwana ni athiyana a khalai yaawo yaalipinhe ororomeleya waya hata yaarina mixankiho sinceene aahiiso wiiviwa.​—aHéb. 11:36-38; 12:1. w19.02 7 itti. 15-16

Vaavo nnaattamela aya nihiku na Wuupuwelela, nihaana wiikoha makoho ala: ‘Kinrowa otakiha sai ophenta wa Yesu? Kiireke kinnihela nipuro noopacerya sootthuneya sa maKristau akhwaaka? Kiireke kinuupuwela wira anna ni arokora ahaana okhala oomalela aahiiso kinnisuwela wira sookhala itthu ahinwerya aya?’ Nto okathi wotheene nihaana omutakiha Yesu ni ‘okhupanyeryana’. Wuupuwelela okhwa wa Yesu khonrowa okhala wa mahiku otheene. Vaavo Yesu onrowa awe ‘orwa’ okathi wa maxakha maalupale owo onimwaathukumanya “atthu àthanlalyawe” ahanle valaponi wira arowe wiirimu. Okathi owo nnoohiya Wuupuwelela okhwa wa Yesu. (1 aKor. 11:26; Math. 24:31) Hata omalaka Wuupuwelela okhwa wa Yesu nikupaliki wira atthu a Yehova animuupuwelaka yoolya ela yohaattiheriwa itthu ntoko ethoonyeryo ya wiiyeviha olipa murima ni ophenta wa Yesu. w19.01 25 itti. 17-19

Nrowe niwehe moota okhalana okumi wooloka onivarihana aya ni omutthu ahu wa muhina. Wanipacerya, wira mutthu okhalane okumi wooloka ohaana olya yoolya yooloka ni ohaana wiina nikuruta ikwaha sinceene. Moolikanasa, wira nikhalane okumi wooloka womunepani nihaana omusoma Biibiliya ni iliivuru sinimutthokiherya Biibiliya ikwaha sinceene ni nihaana omwaamini Yehova. Ninnooniherya wira ninnimwaamini Yehova vaavo ninvarihela ahu muteko ele ninsoma ahu ni ohimya waamini wahu. (aRom. 10:8-10; Yak. 2:26) Ya nenli hata makhalelo ahu oota aniirihaka wuupuwela wira naakumi pooti wira nookhalana oretta muhina. Mwa enamuna emosaru oweha miteko sahu somunepani paahi pooti oniiriha wuupuwelaka wira nookhalana waamini woolipa masi soophavela soohiloka pooti wunnuwa vamurimani vahu. (1 aKor. 10:12; Yak. 1:14, 15) Nave muupuweleke wira Satana oniphavela ohonona muupuwelo ahu. w19.01 15 itti. 4-5

Nihaana wiikoha so: ‘Kiireke kinnipaka eyo? Kiireke kinnimutakiha muSamariya ole?’ (Luka 10:30-35) ‘Vaavo atthu anihaawa aya, kiireke kinnaakhaliherya? Mwa ntakiheryo, kinoowerya waakhaliherya anna oowuuluvala, anaamukhweli, aahiiso anamwane anamuyari aya ahikhanle anamoona a Yehova? Kiireke kinoowerya otthara miruku iya sini: “Mwalipiheke murima ale ahilimpe”?’ (1 aTes. 5:14; Yak. 1:27) Xeeni omoriwa ikharari onniphwanyiha aya ohakalala? Mwaha woowi waamorela ikharari atthu, enamuna emosa yoovaha, nto Yesu aahimmye wira ovaha onninihakalaliha. Nthowa nikina, okhala wira waamorela ikharari atthu onnimuhakalaliha Yehova. (Mit. 20:35; aHéb. 13:16) Olavulaka sa Yehova yoowo ori oomoriwa ikharari, Mwene Davidi aahimmye so: “Apwiya animwasuka, animwavaha ekumi n’ureriwa vathí-va”. (Esal. 41:2, 3) Vakhala wira ninnaamorela ikharari ni owoonela othunku atthu, Yehova onoonimorela ikharari ni oniphwanyiha ohakalala mahiku otheene.​—Yak. 2:13. w18.09 18 itti. 11-12

Murokora oororomeleya iihaniwa Yoshiko aahileeliwa itthu sooriipiha murima. Meedika awe aahimuleela wira aarowa okhala mukumi myeeri vakhaani paahi. Nto oonenle sai? Yoshiko aahuupuwela yoolepa ya olelo. Moomaaleleya aahimuleela meedika awe wira khoova etthu mwaha woowi Yehova aaninvarela ntata. Moolumo oolipiha aniphwanyaneya eveersu ela yaahimulipiha murokora ole omuroromela Yehova moomalela. Eveersu eyo pooti onikhaliherya omaaleleya okathi ninkumana ahu mixankiho suulupale. Wanipacerya, Yehova aahimuleela Yesaya waalepela aYuda moolumo ala oolipiha maana muhoolo mwaya yaamuroihiwa weepotthani oBabilonia. Masi Yehova aahiiriha olempwa moolumo ala wira aakhaliherye ohiya paahi aYuda ale masi-tho hiyo olelo-va. (Yes. 40:8; aRom. 15:4) Okhala wira ninkhala “mahiku òxanka” ni oovila okhala masu aniphwanyaneya eliivuru ya Yesaya anninlipiha vanceene.​—2 Tim. 3:1. w19.01 2 itti. 1-2

Anamathelana anivalaana mwaha wa mixankiho, nlelo Muluku oniwoona ntoko mutthu mmosa ni pooti wira sinimwaakhumelela mixankiho. Nave murummwa Paulo oohimya etthu eniwiiriha anamathelana awo ohivalaana, oriki: “Vekekhai, mulopwan’owo ohinamini onnakheliwa ni Muluku mwaha wo wamini wa mwar’awe owo. Siso-tho, muthiyana ohinamini onnakheliwa ni Muluku mwaha wo wamini wa iy’awe owo. Vahakhanle siso, an’inyu yarowa okhala ntoko àna àtthu ohibatiziwa. Nto vano, an’inyu annakheliwa ni Muluku”. (1 aKor. 7:14) MaKristau man-ceene annithanla okhala ni ole athelanne aya ohinimurumeela Yehova hata akhalanaka mixankiho suulupale. Awo aahakalala vanceene mwaha woowiimananiha, okhala wira muhoolo mwaya, ole athelanne aya ookhala Namoona a Yehova. (1 aKor. 7:16; 1 Ped. 3:1, 2) Olelo-va, olumwenku wotheene mmulokoni mwa eKristau sookhala ikasamento sookhumela saana. Woonasa wene, munnaaweha anamathelana anceene mmulokoni anihakalala. Alopwana annaaphenta axaaraya ni athiyana annaattittimiha vanceene axiiyaya. Otheene aya annooniherya wira ekasamento ehaana ottittimihiwa.​—aHéb. 13:4. w18.12 14 itti. 18-19

Nuulumo noowi “Edeni” nintaphulela “Oreera”, tthiri ejardim ele naari nipuro nooreera. Nave, waari opuro wootepa oreera, mwaha woowi yaahikhala yoolya yinceene ni murettele eriyari ya atthu ni inama. (Maph. 1:29-31) Nuulumo na eHeeberi noowi “ejardim”, nttaava na eGriki nintaphuleliwa pa·raʹdei·sos. Nto Enciclopédia ya M’Clintock ni Strong enihimya wira vaavo muGriki aiwa awe nuulumo noowi pa·raʹdei·sos, owo uupuwela opuro wooreera, eparkhi yuulupale yookhapeleliwa saana, erina miri siniima mihokorokho soovirikana, erina miro ni malaxi oreera anlyiwa ni ipaala ni ipwittipwitthi. (Mulikanyihe ni Maphattuwelo 2:15, 16) Yehova aahaavaha Adamu ni Eva ejardim yooreera, niire so eparayiisu. Masi, okhala wira khiyaamwiiwelenle aapweteiwa eparakha ya okhala mparayiisu. (Maph. 3:23, 24) Nnaamwi ahaakhala mutthu mParayiisu nuumala Adamu woomoliwa, vanikhala ntoko wira eParayiisu ele, yaahikhala mpakha okathi wa Mutaaseke a mahiku a Nowe. w18.12 4 itti. 3-5

Anamuyari annivikaniha owiixuttiha anaaya makhalelo ooloka. Maana vaavo anamwane aninnuwa aya ni okhuma vate, anrowa opakaka soothanla saya. Akhala wira anootthara makhalelo ooloka yiixuttihiwa aya, anrowa opakaka soothanla sooloka, osyaka mixankiho sinceene, ohithanana nnakhala wooceya. Ntoko tiithi ooreera murima, Yehova oniphavela wira anaawe akhalane okumi wooloka. (Yes. 48:18) Tivonto onniixuttiha awe okhalana mweettelo wooloka ni moota wowaathokorerya akina. Nave onniniixuttiha woona itthu ntoko onoona awe, ni otthara malakiheryo awe. Opaka eyo khahiyo ohaaxa. Maana onninikhaliherya okhalana ankhili ni opaka soothanla sooloka. (Esal. 92:6; Mir. 2:1-5; Yes. 55:9) Nnoowerya okhalana moonelo ahu ni opaka soothanla sinrowa onihakalaliha. (Esal. 1:2, 3) Tthiri, vaavo nnuupuwela ahu ntoko Yehova, ninniphwanya mareeliho manceene! w18.11 23 itti. 7-8

Wira nivikanihe weettela ekeekhai, nihaana osyaka ohapuxiwa ni ale ahinimurumeela Yehova. Okathi niixutta ahu ekeekhai, naahituruka waataana wahu ni apatthani ni amusi ahikhanle Anamoona. Woonasa wene, atthu akina yaahisiveliwa sookupali sahu isya, masi akina khiyaasiveliwe. Amusi ahu, atthu anivarana ahu muteko ni ale anisomana ahu oxikola, pooti ophavelaka wira nuupuweleleke hoothe mahiku a iferiado. Exeeni enrowa onikhaliherya okhootta yookhanyererya ya wiirela mpantta soolema ni iferiado sihinimusivela Yehova? Nihaana ovikaniha woona mathowa animwiiriha Yehova ohisiveliwa iferiado iyo. Nave pooti otokosa iliivuru sahu ni wuupuwelela moota iferiado sipacenrye aya. Vaavo nnuupuwelela ahu mathowa a mBiibiliyani anniiriha ohiirela mpantta iferiado iyo, ninrowa otepaka woona wira ninnivara “itthu sinasivela Apwiya”. (aÉf. 5:10) Akhala wira ninnimuroromela Yehova ni Nuulumo nawe, khaninrowa owoovaka atthu.​—Mir. 29:25. w18.11 12-13 itti. 10, 12

Vaavo itthu sinturukeya aya mootutuxerya, ninnixanka nnuupuwela mixankiho sahu paahi. Eyo yanwerya omwiiraneela Yosefe. Masi Yosefe aahiimananiha opaka ele aawerya awe moovarihana ni mukhalelo awe. Ntoko siisaale aimananiha awe onvarela muteko Potifari, Yosefe aaniimananiha-tho ovara khula etthu aavahiwa awe ni muulupale a mukhatteya. (Maph. 39:21-22) Moolikanasa ni Yosefe, pooti onikhumelela muxankiho nihinwerya ahu weettiherya. Masi, akhala wira nnoopixa murima ni opaka ele eniwerya ahu, Yehova onoonireeliha. (Esal. 37:5) Hata nixankale ene wala nihisuwelaka yoopaka, hiyo “khannojeya” aahiiso ohikhalana nlipelelo. (2 aKor. 4:8) Yehova onookhala ni hiyo, akhala wira ninniluttuweliwa olaleerya. w18.10 24-25 itti. 11, 13

Mwaarowa woonela sai vaakhanle wira mutthu onimusuwela anyu ni omuttittimiha ooliyala nsina nanyu ni khoniwuupuwelani? Eyo pooti wira yaamookhulumulani. Mwaha wa xeeni? Mwaha woowi otheene ahu ninniphavela osuweliwa ni atthu akina. Nnaamwi vari siiso, atthu awo ahaana opaka etthu ekina ohiya onisuwela paahi. Maana nimphavela wira asuweleke omutthu ahu ni ele enivara ahu. (Moth. 11:16; Yobi 31:6) Naahikhalane ephoole, yoophavela eyo yeephattu ya ophavela ovuwa pooti onihapuxa. Maana olumwenku wa Satana oniphavela oniiriha okhala atthu oovuwa. Nto eyo yakhumelela, khaninrowa onvuwiha nnakhala omukokhorela ole oniphwanela, eyo piiyo, Tiithi ihu a wiirimu, Yehova Muluku.​—Wis. 4:11. w18.07 3 itti. 1-2

Nto khanintikhina woona wira Satana ni malaikha awe ootakhala anniwiiriha atthu oowerya “wotha”. (1 Tim. 4:1, 2) Ti vootepa otakhala vaavo ahooleli a itiini anaawoka aya atthu. Nthowa xeeni? Mwaha woowi, akhala wira mutthu onookupali soowiixuttiha saya sowootha, onapaka itthu Muluku oninyokha awe, mutthu owo pooti ohikela elapo esya. (Hos. 4:9) Yesu aanisuwela wira ahooleli a itiini a mahiku awe yaanaawoka atthu. Moolipa murima aahaaleela wira: “Motakhaliwa nyuwo, awixuttihi a ikano n’aFarisi, anawothe! Nyuwo munnettetta ilapo n’iphareya, wira mumphwanye nnákhala mutthu mmosá, òmukhaliha mwixutti anyu: mwamphwanyá vale, munnimukhaliha mwana òmoroni”, eyo piiyo, opwetexiwa moohilipelela ohihimuxiwa. (Math. 23:15) Nave, Yesu aahimmye wira ahooleli ale yaalikana ni tiithi aya Diabo, yoowo ori “mulipa-òwiva”.—Yoh. 8:44. w18.10 4-5 itti. 5-6

Exeeni Yesu aaphavela awe ohimya ni masu ala? Yesu aahincererya oriki: “Mutthapeke, mutteliweke murima, okhala wira otthuveliwa wanyu wirimu onokhala wulupale. Tthiri ti siso salupatthiwaya maprofeta a khalai muhinatthi nyuwo”. (Math. 5:12) Okathi yaamaniwa aya ni okhoottiheriwa olaleerya, “arummwa yahikhuma mmuthukumanoni etteliwene murima”. Khahiyo wira yaatteeliwe murima mwaha woomaniwa. Masi etthu yaatteeliha murima, “okhala wira Muluku ahaphwaneliha ohaxiwa mwaha wa nsina na Yesu”. (Mit. 5:41) Olelo-va, Anamoona a Yehova annivilela ni ohakalala okathi anlupatthiwa aya mwaha woomutthara Yesu. (Yak. 1:2-4) Ntoko arummwa, etthu ennihakalaliha khahiyo ohaawa aahiiso olupatthiwa. Masi akhala wira nnoovikaniha ororomeleya wa Yehova, owo onoonivaha olipa murima wira nivilele. Nave-tho, vaavo Yehova, yoowo ori Muluku oohakalala, onisiveliwa awe ni hiyo, ninnihakalala hata nilupatthiwaka ni itiini sowootha aahiiso ni ale nnaalaleerya ahu.​—1 Tim. 1:11. w18.09 20 itti. 18-20

Okhala wira ninkhala “mahiku òxanka”, ninnihaawa mwa inamuna sinceene, nto eyo, enniwiiriha atthu anceene ophavela wiixiiva. (2 Tim. 3:1-5) Nto khula mwaakha atthu anivikana 800.000 anniixiiva, eyo enooniherya wira khula isegundo 40 onniixiiva mutthu mmosa. Mooriipiha murima, vaavo anna akina sinaaphwanya aya mixankiho anniixiiva. Olelo-va, anna ni arokora anceene aakhalana mixankiho suulupale, nto nihaana waaphenta. Akina anniveehiwa aahiiso olupatthiwa. Akina anninyoholiwa omutekoni waya. Nave pooti wira aaxanka mwaha woovirihaka okathi munceene avaraka muteko aahiiso muteko anivara aya ti wookhulumula. Akina-tho aakhalana mixankiho suulupale vatthokoni vaya. Woonasa wene, athelanne ni mutthu ohinimurumeela Yehova, nto onimakela waaramusa. Itthu iyo ni sikina pooti owiiriha anna anceene okhulumuwa ni woona wira kharina efaita. w18.09 9 itti. 3, 5

Anamuyari maKristau anoowerya ovara vamosa ni Yehova, yaakhaliheryaka anaaya okhalana soolukama mmutthenkesoni mwa Yehova. Anamuyari anceene aapaka eyo. Nto eyo, yoowiiriha anaaya okela muteko wa Yehova wa okathi wotheene, hata arowaka orumeela opuro woorakamela. Akina a yaawo, mamisionaario, akina mapioneero anirumeela mapuro oothowa anamalaleerya ni akina anirumeela oBetheli. Vaavo anamwane awo anirowa aya opuro woorakamela, anamuyari aya khaniwerya oviriha okathi hoothe ntoko yaaphavela aya. Masi annaalipiha anaaya wira avikaniheke omurumeela Yehova opuro ari aya. Nthowa xeeni? Nthowa noowi, annihakalala waaweha anaaya apwehaka muteko wa Yehova opuro woopacerya mookumini mwaya. Anamuyari anceene annoona ntoko Ana, yoowo aahimmye wira ‘kinninvaha’ Yehova, mwanaka Samuweli. Anamuyari awo annoona okhala eparakha yuulupale ovara vamosa ni Yehova mwa enamuna eyo.​—1 Sam. 1:28. w18.08 22 etti. 4

Yesu khaaphavela ohimya wira khivaniweryaneya, owo ahimmye so: “Moreriwa nyuwo, alipa-òhawa, okhala wira Omwene wa Muluku ti wawinyu”. (Luka 6:20) Masi eyo khiyaataphulela wira atthu otheene oohaawa yaaninwiriyana Yesu wira yaakhele mareeliho a vameekhaaya. Maana yaahikhala anamuhaawi anceene yahaamutthara Yesu. Eyo enooniherya wira, wataana ni Yehova khonlipa ni mireerelo nrina ahu. Mmutthenkesoni mwa Yehova aakhala anna ni arokora oothaaciri ni oohaawa. Masi awo annimurumeela Yehova ni murima wotheene. Biibiliya onnaalakiherya athaaciri wira “ehiroromeleké mihakhu seiyo sihinlekela. Nto emuroromeleke Muluku”. (1 Tim. 6:17-19) Nave Biibiliya onnaalopola arumeyi otheene a Yehova, athaaciri ni oohaawa, wira ti vootakhala ophenta musurukhu. (1 Tim. 6:9, 10) Vaavo nnaathokorerya ahu annihu nimutakihaka Yehova, khaninrowa waaphukela mwaha wa mireerelo saya. w18.08 12-13 itti. 11-12

Nimphavela omooniherya Yeho-va wira ninnimuxukhurela mwaha wookhala atthu awe. Nave noosuwela wira vaavo naivaherenrye ahu wa yena, naahipaka yoothanla ya miruku. Tivonto noolakela ohipaka khula etthu Yehova oninyokha awe. Nave-tho, ninnaaphenta ni waattittimiha anna ni arokora okhala wira awo atthu a Yehova. (aRom. 12:10) Biibiliya onileiherya so: “Nyuwo [Yehova] khamunanyanyala atthu anyu”. (Esal. 94:14) Tthiri eyo enninlipiha. Moohicikha etthu enrowa onikhumelela, Yehova onookhala ni hiyo. Nto hata nikhwaaka, Yehova khonrowa oniliyala. (aRom. 8:38, 39) Tivonto “nakhalaka akumi walá nakhwá, hiyo n’àtthu Àpwiya”. (aRom. 14:8) Tthiri ninnilipelela okathi Yehova onrowa awe waahihimuxa apatthani awe akhwiiye. (Math. 22:32) Nave olelo-va, ninniphwanya itthu soohakalaliha sa Tiithi ihu, ntoko Biibiliya onihimya awe oriki: “Noreriwa nloko Muluku aya akhanle Apwiya [Yehova]: nenlo Muluku nìthanlenlyawe okhala nawawe”.​—Esal. 33:12. w18.07 26 itti. 18-19

Atthu akina anuupuwela wira, okhala wira myaha iyo ti sa mutthu mwaneene, nto ahaana opaka soothanla aniphavela aya akhala wira khasinixan-kiha yowuupuxerya ya murima aya. Awo pooti wuupuwela so: “Otaphuwa waka onlamuleliwa-ni n’ankhili a mutthu mukina?” (1 aKor. 10:29) Nnaamwi nrina ene otaphuwa woopaka soothanla sahu voohimya sa osoma ni muteko, nihaana wuupuwela wira otaphuwa wahu wookhalana mukano ni wira soothanla sahu pooti onikumiherya maxakha. Eyo ti etthu yaamwiirinhe Paulo ohimya masu a yoolepa ya olelo. Tivonto, nnaamwi nri ene ootaphuwa opaka soothanla sahu, nihaana ohela muhina yowuupuxerya ya murima ya atthu akina. w18.04 12 etti. 10

Olelo-va, muKristau oniihimya omukokhorela Yehova, pooti opacerya opaka itthu Yehova oninyokha awe. (Yuda 11) Waaniheryasa, owo onniluttuweliwa olaleerya ni khonicompela mithukumano. Masi okathi omosaru oneemererya ovikaniha wuupuwelela orupihana woohiloka, nrima ni nthalu. (1 Yoh. 2:15-17; 3:15) Itthu iyo pooti omwiiriha opaka etampi yuulupale. Hata atthu akina ahisuwelaka itthu sinuupuwela ahu aahiiso opaka, Yehova onnisuwela. Nave Yehova onnisuwela akhala wira khanikhanle mpantta awe. (Yer. 17:9, 10) Hata nivonyaka, Yehova khonaakuva onihiya. Akhala wira nimphavela opaka etthu yoohiloka, Yehova onnileela wira: “Muhokoloweleke wa miyo”. Yehova onnisuwela wira nin-niwanana sootteettheya sahu. Masi Yehova oniphavela wira nikhaleke oororomeleya ni onyokha itthu soohiloka. (Yes. 55:7) Akhala wira nnoopaka eyo, Yehova ooleiherya wira onoonikhaliherya ni onivaha ikuru wira nixintte soophavela sahu soohiloka.​—Maph. 4:7. w18.07 16 itti. 5-6