Outubro

Hiyo khanniwerya osoma mirima ntoko Yehova ni Yesu. Hata vari siiso nnoowerya osuwela moonelo ni itthu sinaaxankiha atthu akina. (2 aKor. 11:29) Moovirikana ni atthu owiitthuna a olumwenku ola hiyo ninniimananiha weettela moolumo ari aFilipi 2:4 ani: “Khula mutthu ahiphavelé sinimurerela yowo pahi nto àphaveleleke-tho oreriwa akhw’awe”. Axitokweene ahaana okhala atthu oothunku. Awo annisuwela wira anookohiwa mwaha wa enamuna anikhapelela aya ipwittipwitthi avahereriwa aya. (aHéb. 13:17) Wira awerye waakhaliherya anna ni arokora axitokweene ahaana okhalana othunku. Masi anrowa wooniherya sai wira annithokorerya moonelo wa atthu akina? Mutokweene oothunku onniviriha okathi ori ene ni anna ni arokora. Owo onnipaka makoho ni onnaawiriyana anna ni arokora moopixa murima. Ti vootepa otthuneya opaka eyo akhala wira munna aahiiso murokora onniphavela omutthukulela murima mutokweene. Nave mutokweene owo ohaana ophavela moolumo oolipiha ni oomaaliha. (Mir. 20:5) Vaavo axitokweene aniviriha aya okathi ari ene ni anna awo anniphentiwa ororomeliwa ni waataana ni anna otheene a mmulokoni.​—Mit. 20:37. w19.03 17 itti. 14-17

Oxukhurela onlikana ni yoolya yooloka eyo ennisiva akhala wira ninnoolya ni atthu akina. Vaavo hiyo ninxukhurela ahu ninnihakalala vanceene. Nave vaavo nnaaxukhurela ahu atthu akina atthu awo annihakalala vanceene. Okathi nnaaxukhurela ahu atthu akina ninniwooniherya wira ninnivaha efaita onikhaliherya waya aahiiso etthu anivanhe aya. Akhala wira nnoopaka eyo ompatthani ahu ni mutthu owo onoolipa vanceene. Oxukhurela wahu wookhalana efaita yuulupale, ntoko enihimya aya yoolepa ya olelo. Nkahaya muupuwele moota anreera aya masa apakiwe ni eweero aahiiso eparatha! Tthiri masa awo aakhalana efaita yuulupale! Mwaarowa woonela sai vaakhanle wira moovahiwa masa ntoko awo? Moohaanyiherya mwaamuxukhurela vanceene. Moolikanasa moolumo anyu ooxukhurela aakhalana efaita yinceene. Nave musuweleke wira masa apakiwe ni eweero anniviriha okathi munceene. Mwa enamuna emosa-ru akhala wira munoomuxukhurela mutthu owo pooti ohiliyala moolumo anyu ooxukhuru okumi awe wotheene. w19.02 15 itti. 5-6

Vaavo Adamu ni Eva yaalyiiye aya muhokorokho wa mwiri waasuweliha yooreera ni yootakhala awo yaahooniherya wira khiyaakupali malamulo a xariya a Yehova. Awo yaahithanla opaka malamulo aya voohimya sa ele eri yooloka ni yoohiloka. Masi nkahaya muupuwele ele apweteiwale aya. Awo aapweteiwa waataana wooloka ni Yehova. Nave aayeleela eparakha ya okhala mahiku otheene valaponi. Ohiya-tho vo awo ahaaraviha etampi ni okhwa apinaatamu otheene. (aRom. 5:12) Enamuna oonenle awe mulopwana oohuliwa a wEthiyopia nuumala olaleeriwa ni Filipe waahivirikana ni moonelo wa Adamu ni Eva. Mulopwana ole oohuliwa aahisiveliwa vanceene etthu Yehova ni Yesu apanke aya nto moohipisa aahibatiziwa. (Mit. 8:34-38) Nto vaavo nniivahererya ahu wa Muluku ni obatiziwa ntoko mwEthiyopia ole ninnooniherya wira ninnixukhurela ele Yehova ni Yesu anipakenle aya. Nave ninnimphenta Yehova ni wooniherya wira tonireerela ohimya ele ekhanle yooloka ni yoohiloka. w19.03 2 itti. 1-2

Arumeyi a Muluku anooniherya sai ororomeleya waya? Awo annooniherya amphentaka Yehova ni murima wotheene nto eyo enniwiiriha opaka itthu sinimuhakalaliha Yehova. Enamuna emosa ninrumeeliwa aya nuulumo noowi “ororomeleya” nintaphulela okhala etthu yoomalela yoohirakala aahiiso yooloka. Mwa ntakiheryo inama saavahiwa mukuttho Yehova saahaana okhala soohirakala. (Onam. 22:21, 22) Nave atthu a Muluku khiyeemereriwa ovaha enama yahaarina mwetto niyaru niitho aahiiso yaawereyasiwa. Yehova aaphavela wira mwaamunama owo okhaleke oomalela oohirakala aahiiso ooloka. (Mal. 1:6-9) Nto ninnoona wira Yehova onnivaha efaita ororomeleya aahiiso omalela. Vaavo nimphavela ahu othuma etthu ntoko muhokorokho eliivuru aahiiso ekaruma ekina nimphavela wira ekhaleke yoomalela ni yooloka. Tthiri nimphavela etthu yoomalela yoohirakala aahiiso yooloka. Moolikanasa Yehova onnisiveliwa akhala wira ninnimphenta ni ororomeleya wa yena. Masi eyo ehaana okhala etthu yoomalela yoohirakala ni yooloka. w19.02 3 etti. 3

Wira nikhapelele murima ahu khivanitthuneya paahi okhootta sookhanyererya soohiloka masi nihaana weemererya itthu sooloka. Epooma erina makokoro mulipa-oohula mukhora ahaana owala mikhora wira awanani ahikele masi okathi mukina owo aahaana ohula mikhora wira sivoloihiwe soolya ni mireerelo sikina. Akhala wira khaarowa ohula mikhora atthu a epooma eyo yaamookhwa etala. Moolikanasa okathi wotheene nihaana ohula murima ahu wira nivoloihe muupuwelo wa Muluku. Biibiliya ookhalana muupuwelo wa Yehova nto vaavo nimmusoma ahu khula nihiku ninneemererya muupuwelo wa Yehova weettiha moonelo ahu muupuwelo ni itthu nimpaka ahu. Ninrowa ottottela sai mureerelo omusoma Biibiliya? Wanipacerya nihaana onvekela Yehova wira onikhaliherye ‘wòna orattene ikano’ sawe siri mBiibiliyani. (Esal. 119:18) Nave nihaana wuupuwelela ele ninsoma ahu. Vaavo ninvekela ahu osoma ni wuupuwelela Nuulumo na Muluku ninniphenta muupuwelo wa Yehova.​—Mir. 4:20-22. w19.01 18 itti. 14-15

Yehova onnisuwela wira makhalelo ahu annivirikana ni atthu akina nave onnixukhurela ni ovaha efaita mikuttho ninwerya ahu onvaha. Nkahaya muupuwele mikuttho aIsarayeli yaavaha aya. AIsarayeli akina yaaniwerya ovaha ipwittipwitthi aahiiso ipuri. Masi ale oohaawa yaneemereriwa ovaha “masiya manli walá ipomba pili nlelo mihoro”. Akhala wira mwIsarayeli khaawerya ovaha ipomba piili Yehova aaneemererya ovahiwa “otthú w’etrigu mpantte wanamuloko w’efa”. (Onam. 5:7, 11) Otthu khiwaathummwa musurukhu munceene masi Yehova aanivaha efaita mukuttho owo akhala wira waari wooreerexa. Olelo-va Muluku ahu ooreera murima onnivaha efaita wiimananiha wahu. Vaavo ninvaha ahu ikomentaario sahu khivantthuneya orattela olavula ntoko Apolo aahiiso olavula ni wiilipiha ntoko murummwa Paulo. (Mit. 18:24; 19:8) Yehova khoniphavela wira ninvaheke itthu nihinwerya ahu. Nkahaya mmuupuwele naamukhweli ole aavanhe inoota piili. Yehova aahivaha efaita yoovaha ele okhala wira aavanhe ele aawerya awe.​—Luka 21:1-4. w19.01 8-9 itti. 3-5

Okhala wira na atthareli a Kristu nilipeleleke onyokhiwa. Yesu aahihimya vahinatthi wira mahiku ookiserya atthareli awe yaarowa otepaka olupatthiwa. (Math. 24:9; Yoh. 15:20) Eprofesia ya Yesaya yaahihimya vahinatthi wira ohiya paahi oninyokha awanani ahu yaarowa orumeelaka ikapwitthi soovirikana wira anlupatthe. Ikapwitthi iyo sinihela muhina oninyoonyiha onootherya itthu sotheene sootakhala ni onlupattha vootakhala. (Math. 5:11) Yehova khonrowa waahiiha awanani ahu orumeela ikapwitthi iyo wira awane ni hiyo. (aÉf. 6:12; Wis. 12:17) Masi khanintthuneya woova. Yehova ohimmye wira “iyuma sothene” sipakeliwe onlupattha “khasinvara-tho muteko”. (Yes. 54:17) Yehova onoowerya onikhapelela okathi wa mixankiho seiyo sinlikana ni munamukhaya nave onookhala ntthyawelo nahu vaavo ninwanana ahu “ikuru sa mamwene”. (Yes. 25:4, 5) Awanani ahu khanwerya onikumiherya muxankiho okhanle oonihiiha omurumeela Yehova. (Yes. 65:17) Awanani ihu otheene “anrowa oweriwa n’upweteya”.​—Yes. 41:11, 12. w19.01 6-7 itti. 13-16

Nyuwo amiravo, Yehova tootaphuwa ni oniphavela wira ni nyuwo mutaphuweke. Masi-tho, oniphavela wira murumeeleke otaphuwa wanyu mwa miruku wira otaphuwa iwo wookhapelelekeni. Woonasa wene, amiravo akina waasivela orupihana woohiloka, oweha epornografia, oweetta axooku ootakhala, olya mirette soohapala ni ohapaliwa. Itthu iyo pooti okhalaka ntoko sooloka aahiiso soohakalaliha, masi ikwaha sinceene sinnikumiherya maxakha, ntoko iretta, ihasara aahiiso okhwa. (aGal. 6:7, 8) Amiravo akina ampaka itthu iyo anuupuwela wira arootaphuwa, masi eyo khahiyo ekeekhai. (Tito 3:3) Omwiiwelela Yehova onniniphwanyiha mireerelo, ntoko okumi wooloka ni otaphuwa wekeekhai. (Esal. 19:8-12) Nto vaavo munirumeela anyu otaphuwa wanyu mwa miruku, eyo piiyo, wiiwelela moomalela malamulo ni malakiheryo a Muluku, nyuwo munnimooniherya Muluku ni anamuyari anyu wira mwa mutthu oororomeleya. Nto, woonasa wene, anamuyari anyu animoororomelakani ni ohitepa wooweha-wehani.—aRom. 8:21. w18.12 19 itti. 16-17

Musuweleke wira, nuumala Adamu ottheka, itthu sinceene sooturukeya. Apinaatamu annookhwa, nto eyo ennikumiherya marukunuxo mukasamentoni. Murummwa Paulo aahaatthokiherya maKristau wira okhwa, onnimaliha ekasamento, nto ole ori mukumi pooti othela aahiiso otheliwa. (aRom. 7:1-3) Nlamulo Muluku aavanhe awe aIsarayeli, naanihimya itthu sinceene sa ekasamento. Mwa ntakiheryo, aIsarayeli yaaneemereriwa waathela athiyana anceene. Yoolema eyo yaahikhala Muluku ohinatthi ovaha Nlamulo. Masi, Nlamulo naanaakhapelela athiyana ni anamwane wira ahihaaxiweke. Mwa ntakiheryo, akhala wira mulopwana aanithela epottha ni muhoolo mwaya onamuthela muthiyana mukina, owo ahaana omukhapelela mwaarawe oopacerya. Muluku aaphavela wira mulopwana owo omukhapeleleke ni onvaha itthu saamuthowa mwaarawe ole oopacerya. (Okhum. 21:9, 10) Olelo-va, hiyo khanintthara Nlamulo na Moise. Masi ninniixuttiha wira Muluku onnithokorerya ekasamento okhala yowaarya. Nto, eyo enninikhaliherya ottittimiha ekasamento. w18.12 9-10 etti. 3; 10-11 itti. 5-6

Nuumala Habakuki omuleela Yehova mixankiho sawe, woonasa wene, aaniikoha moota Yehova aarowa awe woonela. Ntoko Tiithi oophenta, Yehova aahisuwela oxanka wa Habakuki. Nave aahisuwela wira Habakuki aanihaawa ni aavekela nikhaliheryo. Tivonto, Yehova khampwapwenle Habakuki, masi aahimuleela ele aarowa awe owiiriha aYuda ale oohiroromeleya. Pooti wira wanipacerya Yehova aahimuleela Habakuki wira aarowa waaphukela atthu ale moohipisa. Yehova aahimutthokiherya Habakuki wira aarowa opaka etthu moohipisa. Yehova aarowa waahukhumu aYuda ale oowali ni ootakhala. Vaavo aahimmye awe wira yaarowa wiiraneya “mahiku anyu”, enooniherya wira Yehova aarowa waaphukela okathi wa Habakuki aahiiso aIsarayeli ale. Yehova aahaakhula mwa enamuna Habakuki ahaalipelela awe. Atthu oKhaldeya aahiiso aBabilonia, yaari atthu ootakhala. Otakhala waya waahaavikana aIsarayeli, yaawo yaasuwela malamulo a Yehova. Nto, xeeni Yehova ohalaka waaruma amalapo ale ootakhala wira yaaphukele atthu awe? Okhala wira eyo yaarowa otepa waakumiherya maxakha aYuda. w18.11 17 itti. 7-8

Muniwoonela sai atthu ahiixuntte ekeekhai? Murummwa Paulo aahaalaleerya aYuda yaawo yaasuwela itthu vakhaani voohimya sa Yehova. Nave-tho, aahaalaleerya ale yaakokhorela amuluku eethiru. Paulo aahirowa ni Baarnaba epooma ya oListra, ekwaha awe yoopacerya ya omisionaario. Nto atthu a oLikawonia yaakhala oListra, yaamuthokorerya Paulo ni Baarnaba ntoko amuluku, nave yaahaavaha masina aamuluku aya eethiru Zeu ni Herme. Niireke Paulo ni Baarnaba yaahiixinnuwiha? Niireke yoona ntoko eparakha othokoreriwa siisaale okhala wira yaahilupatthiwa mittetthe iye miili yaaxukunrye aya? Niireke yaahuupuwela wira eyo yanwiiriha atthu anceene owiriyana ihapari sooreera? Nnaari! Masi awo yaahinyoonyiwa anakhuwela ariki: “Apatthani, munìrela-ni siso? Hiyo n’atthu ntoko nyuwo!”​—Mit. 14:8-15. w18.09 5 itti. 8-9

Vaavo nniixutta ahu ekeekhai ni ovarihela muteko itthu siniixutta ahu mBiibiliyani, nihaana ophavela orukunuxa muupuwelo ahu ni sowiira sahu. Murummwa Pedru aalempe wira: “Ntoko anamwane òwìwelela, muhetteleké-tho makhalelo anyu òtakhala, yettenlyanyu khalai, okathi wahamusuwelanyu Muluku”. Nave ancerenrye oriki: “Mukhaleke atthu” oowaarya “ni mwettelo anyu wothene”. (1 Ped. 1:14, 15) Khalai epooma ya oKorinto, atthu anceene yaari anamuttompe. Ale yaakhala epooma ele yaahipaka marukunuxo maalupale wira akhale oowaarya vamaithoni va Yehova. Moolikanasa, olelo-va, atthu anceene annipaka marukunuxo awo wira yiixutte ekeekhai. Otthokiheryaka eyo, Pedru aalempe so: “Vekekhai, mòviriha mahiku manjene muttharaka sotakhala s’atthu ahinamini: mwahetta enamuttompe, mwahettela makhalelo anyu òtakhala, ohapaliwa, wipeliwa, owuryexa, wakokhorela amuluku ahikhanle ottittimihiwaka”.​—1 Ped. 4:3. w18.11 7 etti. 13

Ninrowa waaphwanya sai ale aniphavela ekumi ehinimala? MaKristau a eseekulu yoopacerya, yaahaana olaleerya wira yaaphwanye atthu awo. Yesu aahaaleela awiixutti awe wira: “Muttetthe ti muttetthe onrowanyu ophiya, mmwavyeke omphwanela”. (Math. 10:11) Olelo-va, nihaana opaka etthu emosa-ru. Atthu ahimphavela wiiwa, oowiixinnuwiha aahiiso ahinimphavela Muluku, khanrowa owiriyana ihapari sooreera naalaleeryaka. Masi nnaaphavela atthu aniphavela wiiwa, oowiiyeviha ni ale tthiri aniphavela wiixutta ekeekhai. Muteko ahu woowaaphavela atthu onlikana ni ele Yesu aapaka awe ntoko kalapintero. Wanipacerya, Yesu aahaana ophwanya ithaapwa sooloka ohinatthi opaka itthu aaphavela awe, ntoko mikhora aahiiso itthu sikina. Nto aahaana oweha ikaruma sawe saari mukaaxani, woona moota woorumeela wira opake etthu aaphavela awe. Moolikanasa, olelo-va, nihaana waaphavela atthu, nuumala-vo orumeela saana ikaruma sahu wira niwiirihe okhala awiixutti.​—Math. 28:19, 20. w18.10 10 itti. 3-4

Filipe namalaleya, ntakiheryo nooloka na mutthu iimananiha olaleerya hata makhalelo awe yaaturukeyale. Waahikhala okathi aavara awe moohakalala muteko aathanleliwe awe oYerusalemu. (Mit. 6:1-6) Moohipisa, makhalelo awe yaahiturukeya. Nuumala wiiviwa Siteefano, maKristau yaanilupatthiwa vanceene mpakha otthyawa oYerusalemu. Okhala wira Filipe aaphavela ovikaniha olaleerya, aahirowa oSamariya weiwo atthu anceene yaaphavela aya wiiwa ihapari sooreera. (Math. 10:5; Mit. 8:1) Nave, Filipe aaniphavela orowa khula opuro aathoonyeriwa awe ni munepa wa Muluku. Nto Yehova aahimuruma orowa waalaleerya atthu yahaatonko wiiwa ihapari sooreera. AYuda anceene yaanaanyokha aSamariya. Masi Filipe khaanyokha ni aahaalaleerya ihapari sooreera. Vano aSamariya yaahinwiriyana ni “murima mmosá”! (Mit. 8:6-8) Filipe aaniluttuweliwa olaleerya, nto Yehova aanivikaniha omureeliha Filipe ni etthoko awe.​—Mit. 21:8, 9. w18.10 25 itti. 14-16

Nihiku nimosa, Yesu ori ene muttetthe wa oDekaapoli, “ahiruheliwa mulopwana ahaiwa, ahalavula sana”. (Mar. 7:31-35) Vano Yesu aahimuroiha okhwipi khunvoniha. Xeeni ohalaka omuroiha okhwipi? Mwaha woowi mulopwana ole khaiwa, nto aamoovaka okhala ohoolo wa muttitthi ole. Nave, okhala wira Yesu aanithokorerya moonelo wa mulopwana ole, “ahimurowana okhwipi”, opuro yoowo yahaakhanle atthu wira ompenuxe. Ekeekhai wira khaninwerya opaka miiriirya, masi nnoowerya othokorerya moonelo wa anna ni waareerela murima. Yesu aanisuwela moonelo wa mulopwana ole, nto aahimureerela murima. Ntoko Yesu, nihaana waathokorerya anna oowuuluvala ni ahiniiwerya-werya. Ophenta tori mukhalelo wootthuneya mmulokoni mwa eKristau, ohiya osuwela opaka itthu. (Yoh. 13:34, 35) Ophenta onooniiriha waakhaliherya anna ni arokora oowuuluvala aahiiso ahiniiwerya-werya orowa olaleerya wala omuthukumanoni. Nave nnimwaakhaliherya hata noonaka wira anna awo khanivara vanceene aahiiso khanrina okathi.​—Math. 13:23. w18.09 29 itti. 7-8

Yehova ni Yesu annaavaha efaita arumeyi ootheene oororomeleya. (aGal. 2:20) Okhala wira ninnaaphenta vanceene anna ni arokora, nihaana waathokorerya saana. Hiyo “niphaveleke itthu sinniphwanyiha murettele, sinnikhaliherya olipiheryana wamini wahu”. (aRom. 14:19, Biblia Solempwa sa Muluku) Tthiri, ninnilipelela okathi atthu anrowa aya okhalaka mParayiisu, ahinyoonyiheyaka! Nave khasinrowa okhala iretta nnakhala ikhotto. Atthu khanrowa okhwaaka mwaha wa etampi, okhalana mixankiho vatthokoni, olupatthiwa aahiiso onyoonyiheya. Wanikisa wa iyaakha ekonto emosa, apinaatamu otheene anrowa okhala oomalela. Atthu anrowa ororomeleya weehereriwa wookiserya, anookhalihiwa anamwane a Yehova. Nave anrowa ophwanya “otaphuwa n’uvuwa w’àna a Muluku”. (aRom. 8:21) Tivonto otheene ahu nrowe nooniherye ophenta onlipiha ni okhaliheryana mukina ni mukhwaawe wira noopowe nikelaka elapo esya ya Muluku. w18.09 11 etti. 10; 13 etti. 18

Wiixutta onnivirikana ni osoma aahiiso ohela ekanyero opuro anaakhuliwa aya makoho a yoosoma eyo. Vaavo nniixutta ahu, ninnuupuwelela etthu nniixuttiha ahu voohimya sa Yehova, ele ompaka awe ni muupuwelo awe. Ninnimananiha osuwela ele enimwiiriha Yehova onileela opaka etthu ni onyokha itthu sikina. Nave-tho, nihaana woona marukunuxo nikhanle ahu oopaka mookumini ni mmuupuweloni mwahu. Ekeekhai wira khivaniweryaneya wuupuwelela itthu sotheene khula okathi nniixutta ahu. Masi vaavo ninsoma ahu nihaana ophavelasa okathi wira nuupuwelele ele niixuntte ahu. (1 Tim. 4:15) Vaavo nimmakela ahu wuupuwelela Nuulumo na Muluku, hiyo ‘ninnikupali’ wira muupuwelo wa Yehova ti woomalela. Nave, ninnisuwela moota Yehova onoonela awe mwaha owo ni ninneemererya moonelo awe. Eyo enninikhaliherya wuuluula osuwela wahu ni okhalana muupuwelo musya. (aRom. 12:2) Nto vakhaani-vakhaani ninnipacerya wiiriha muupuwelo wa Yehova okhala wawihu. w18.11 24-28 itti. 5-6

Paulo aahimmye wira yena ni maKristau akina a eseekulu yoopacerya, ‘yavara vamosá . . . [ni] Muluku’, maana yanaalaleerya atthu ni owiixuttiha ekeekhai. (1 aKor. 3:6) Olelo-va, hiyo-tho nnoowerya ‘ovara vamosá . . . [ni] Muluku’, nirumeelaka okathi, ikuru ni mireerelo sahu wira nikhaliherye muteko woolaleerya nivahiwa ahu ni Muluku. Tthiri ela eparakha yuulupale! Vaavo ninrumeela ahu okathi ni ikuru sahu, nilaleeryaka ni wiixuttiha ninnihakalala vanceene. Eyo ti etthu anna ni arokora anceene arina eparakha ya wiiriha soosoma sa Biibiliya anihimya aya. Tthiri ninnihakalala waaweha ale anaasomiha ahu Biibiliya atteeliwaka murima mwaha wowiiwexexa ele Biibiliya onniixuttiha awe. Nave vaavo waamini waya onlipa aya, apakaka marukunuxo ni waaleela atthu akina itthu siniixutta aya. Yesu aahihakalala vanceene waaweha awiixutti awe 70, yaawo ‘yahokolonwe n’utteliwa murima’, mwaha wa sookumanana saya sooloka.​—Luka 10:17-21. w18.08 18 itti. 11-12

Hiyo pooti opacerya wiiroromela vanceene, woonasa wene, nittharaka moonelo ni muupuwelo ahu paahi. Opaka eyo etthu yootakhala! Maana Biibiliya onninlopola wira nihiroromeleke muupuwelo ahu. Nave pooti oxankiha ophavela osuwela ekeekhai akhala wira mwaha owo ti wa munna nihinoonana ahu saana. Navikaniha ohiiwanana, eyo pooti oniiriha opacerya ohiwoona saana anna ni arokora. Nto akhala wira ninniiwa etthu yoohiloka voohimya sa munna owo, hiyo pooti okupali mwaha owo, nihinatthi otokosa saana. Exeeni nniixutta ahu? Akhala wira nnoovikaniha ohiwoona saana annihu, eyo pooti oniiriha woona wira itthu anootheriwa aya anna awo ti sekeekhai. (1 Tim. 6:4, 5) Tivonto, niheemererye moonelo woohiloka ntoko nrima nthaamelaka vamurimani vahu. Nave, muhiliyale wira Yehova oniphavela wira naaphenteke ni waalevelela annihu ni murima wotheene.​—aKol. 3:12-14. w18.08 7 etti. 15; 8 etti. 18

Okhala wira taapattunxe apinaatamu, otheene ahu na atthu awe. (Esal. 100:3; Wis. 4:11) Okhuma khalai, Muluku onnaathanla atthu wira akhale awawe. Mwa ntakiheryo, Esalimo 135 ennaahimya aIsarayeli okhala ‘awawe’, maana yaanimukokhorela Yehova moororomeleya. (Esal. 135:4) Nave, Hoseya aahihimya vahinatthi wira atthu akina yahaakhanle aIsarayeli, yaamukhala atthu a Yehova. (Hos. 2:25) Eprofesia ela yaahiiraneya okathi Yehova aapacenrye awe waathanla atthu yahaakhanle aIsarayeli wira yalamuleleke ni Kristu wiirimu. (Mit. 10:45; aRom. 9:23-26) Atthu awo oothanliwa ni munepa wootteela aniihaniwa “nloko n’atthu òwarya”. Nave awo “nloko n’atthu a Muluku”. (1 Ped. 2:9, 10) Ankhi maKristau oororomeleya arina nlipelelo na okhalaka mahiku otheene valaponi? Nave Yehova onnaahimya okhala “atthu aka” oothanliwa.​—Yes. 65:22. w18.07 21-22 itti. 1-2

Okhala wira na maKristau eekeekhai, ninnimutakiha Yesu, yoowo aavanhe apinaatamu ntakiheryo noomalela na ovaha. (Math. 20:28) Tivonto, nihaana wiikoha so: ‘Kiireke kinnitthara vakhiviru vene ntakiheryo na Yesu?’ (1 Ped. 2:21) Yehova onnihakalala vaavo nintthara ahu ntakiheryo nawe ni na Yesu. Hiyo ninnitthara ntakiheryo naya, vaavo nnaathokorerya ahu atthu ni ophavela waakhaliherya. Yesu aahooniherya otthuneya waya opaka eyo, vaavo aalavunle awe nlikanyiho na muSamariya ooreera murima. (Luka 10:29-37) Nto Yesu aahiwiixuttiha atthareli awe wira yaahaana waakhaliherya atthu ahiwehaka makhalelo ni elapo aya. Niireke munnuupuwela etthu yaamwiirinhe Yesu olavula nlikanyiho nne? Nthowa noowi muYuda mmosa aahimukoha wira: “Mukhw’aka t’ani?” Moota Yesu aakhunle awe, onniniixuttiha wira naaphavelaka omusiveliha Yehova, nihaana okhala oovaha ntoko muSamariya. w18.08 16 itti. 5-6

Niireke Yehova anvikaniha omureeliha Maria mwaha woororomeleya ni omuhuwa Yesu? Aayo. Muluku aahiiriha wira itthu Maria aahimmye awe ni aapanke awe silempwe mBiibiliyani. Vanikhala wira Maria khaawenrye omutthara Yesu okathi aalaleerya awe iyaakha iye tthaaru nnimeya. Woonasa wene, mwaha woowi aari naamukhweli, Maria aahivikaniha okhala oNazarethi. Eyo enooniherya wira Maria khaawenhe itthu sikina sooloka Yesu aapanke awe. Masi okathi Yesu aiviwe awe, Maria aahikhala. (Yoh. 19:26) Muhoolo mwaya, Maria aahikhala ni awiixutti a Yesu okathi yaakhenle aya munepa wootteela Pentekoositi a 33 EC. (Mit. 1:13, 14) Tthiri Maria aahoottihiwa vamosa ni awiixutti akina. Nto eyo, enooniherya wira aahivahiwa eparakha ya okhala ni Yesu wiirimu mahiku otheene. Tthiri ororomeleya wawe waahimwiiriha waakhela etthuvo ele yoohakalaliha! w18.07 6 etti. 11; 7 etti. 14

Yesu aahirumeela malakiheryo wira owooniherye awiixutti awe wira muupuwelo ni sowiira pooti okumiherya maxakha. Mwa ntakiheryo, Yehova onnihimya wira onanariwa pooti okumiherya itthu sootakhala, nave wuupuwelela itthu soohiloka, pooti omwiiriha mutthu oraruwa. (Math. 5:21, 22, 27, 28) Neemererya weettihiwa ni malakiheryo a Yehova ni okhalana yowuupuxerya ya murima yowiixuttihiwa saana, nnoopakaka soothanla sininvuwiha Muluku. Hata maKristau arina yowuupuxerya ya murima yiixuttihiwe ni Biibiliya, pooti okhalana moonelo woovirikana. Ntakiheryo nimosa ti na eviinyu. Biibiliya khonikhoottiha owurya eviinyu, masi onninlopola wira nihiwuryeke vanceene aahiiso ohapaliwa. (Mir. 20:1; 1 Tim. 3:8) Niireke eyo entaphulela wira muKristau ohinwuryexa, khonitthuneya wuupuwela okathi ompaka awe soothanla? Nnaari. Hata yowuupuxerya ya murima awe emweemereryaka owurya eviinyu, ohaana wuupuwela yowuupuxerya ya murima ya atthu akina. w18.06 18 itti. 10-11

Yesu aahaalopola awiixutti awe wira asyakeke “miropo” aahiiso sowiixuttiha sa igrupu iye tthaaru. (Math. 16:6, 12) Nave, moone wira Yesu aaloponle moohipisa nuumala atthu ophavela omukhaliha mwene aya. Vaavo itiini sinikhaliherya aya myaha sa epoliitika, ikwaha sinceene sinnikumiherya ikhotto. Yesu aahiwiixuttiha atthareli awe wira ahiireleke mpantta epoliitika. Eyo ti etthu yaamwiiriha mukhulupale aanamukuttho ni aFarisi ophavela omwiiva Yesu. Maana yoova wira atthu yanwiriyana, yaarowa omuttharaka Yesu paahi. Vaakhanle wira eyo yaamwiiraneya, ipartido ni itiini saya sammala-mala. Awo yaahimmye wira: “Namuhiyá sisa, atthu othene anrowa omwaminiki: aRoma animorwa, anopwexakasa empa ya Muluku, nave anopwetexa nloko nahu”. (Yoh. 11:48) Ti maana aya, Mukhulupale Anamukuttho Kaifa, ampanke awe palano wira omwiive Yesu.​—Yoh 11:49-53; 18:14. w18.06 7 itti. 12-13

Ehelelo Satana onirumeela awe ni enimukhumela saana, ori onammunepani. Olelo-va, Satana onneererya owiiriha atthu ophavela osuwela minepa sootakhala orumeelaka etiini yoowootha ni matthekulelo. Iviidiyu, axooku a mukomputatoreni ni matthekulelo makina pooti omwiiriha mutthu woonaka onammunepani okhala etthu yoohakalaliha. Ninrowa osyaka sai ehelelo ela? Nihilipeleleke mutthenkeso wa Muluku onivaha elista ya matthekulelo ooloka ni oohiloka. Nihaana wiiniha nikuruta yowuupuxerya ya murima ahu wira nipakeke soothanla sooloka moovarihana ni malakiheryo a Yehova. (aHéb. 5:14) Wira nipakeke soothanla sooloka, nihaana ovarihela muteko masu a murummwa Paulo ari yoolepa ya olelo. Nawoothe, onnihimya etthu emosa onapaka ekina. Tivonto, vaavo ninthanla ahu matthekulelo, nihaana wiikoha so: ‘Kiireke kinnitthara malakiheryo kinaaleela aka atthu akina wira atthareke? Ale kinaasomiha aka Biibiliya ni atthu akina ankiweha anrowa woonela sai matthekulelo aka?’ Vaavo nintthara ahu malakiheryo nnaaleela ahu akina, eyo enoonikhaliherya osyaka ehelelo ya Satana.—1 Yoh. 3:18. w18.05 19 etti. 13

Ninrowa omutakiha sai Paulo? Wanipacerya, nihaana waaphavela ni murima wotheene atthu ‘othene athanleliwe ekumi ehinimala’. Ya nenli, ninnimuxonttela Yehova wira aakhaliherye atthu a murima saana waakhelela muhupi onlaleya ahu. (Mit. 13:48; 16:14) Eyo ti etthu aapanke awe Silvana, yoowo ovirinhe iyaakha waattamela 30 ori ene pioneera. Owo onihimya so: “Kihinatthi orowa olaleerya muttetthe aka, kinninvekela Yehova wira okiirihe okhalana moonelo wooloka”. Nave, hiyo ninnivekela wira malaikha anikhaliherye waaphwanya atthu yaale aniphavela wiiwa masu. (Math. 10:11-13; Wis. 14:6) Robert, yoowo ovirinhe iyaakha sinivikana 30 ori ene pioneero onihimya wira: “Ti voohakalaliha ovara vamosa ni malaikha, maana annaasuwela atthu anaalaleerya ahu”. Ya neeraru, ninneererya oweha mikhalelo saya sooloka ni woona wira anoowerya okhala arumeyi a Yehova. Carl, yoowo ori mutokweene, oni: “Kinnimananiha oweha etthu yaamukhaani enooniherya wira mutthu owo onniphavela wiiwa masu, vaavo vantheya awe, enamuna enkiweha awe, aahiiso nikoho nimpaka awe”. Akhala wira ninnipaka itthu iya, nnoowerya wiima “mihokorokho mwaha wa nthiti”, ntoko Paulo. w18.05 6-8 itti. 13, 15

Ninnihakalala wiiwa wira ale naakhalihenrye ahu khalai annivikaniha omurumeela Yehova moororomeleya. Murummwa Yohani olempe so: “Kaiwaka wira an’aka annettela ekekhai, kinnitteliwa murima vanjene: khivo etthu ekina enkitteliha murima siso”. (3 Yoh. 4) Mapioneero manceene annihakalala vaavo animphwanya aya mutthu yaamukhalihenrya aya wiixutta ekeekhai khalai, ovikanihaka omurumeela Yehova moororomeleya, nto woonasa wene orumeelaka ntoko pioneero. Tthiri akhala wira mapioneero awo annikhulumuwa, nihaana owuupuxerya itthu sotheene sooloka apanke aya yaakhaliheryaka akina. Axitokweene anceene a esirkwiitu ni axaaraya ahimmye wira annilipa, vaavo anaakhela aya ikarta sooxukhurela nuumala oxukurya muloko. Nave eyo, ennaalipiha axitokweene, mamisionaario, mapioneero, maBethelita ni otheene ale animurumeela Yehova moororomeleya. Awo anoolipa vanceene vaavo nnaaxukhurela ahu mwaha wa muteko anivara aya. w18.04 24-25 itti. 14-15

Salomoni aahikhalana axaarawe 700 ni axihawala awe 300! (1 Mam. 11:3) Axaarawe anceene yaari amalapo ni yaakokhorela amuluku eethiru. Nave-tho, Salomoni khaiwelenle nlamulo na Muluku vaavo aathenle awe athiyana a amalapo. (Otum. 7:3, 4) Vakhaani-vakhaani, Salomoni aahihiya ophenta malamulo a Yehova. Muhoolo mwaya, aahipaka itthu sootakhala. Aahim-pakela altari muluku eethiru Astarte ni Kemoxi, vano Salomoni ni axaarawe aahipacerya waakokhorela amuluku awo. Ohiya-vo, Salomoni aahaateka altari awo vamwaako ohoolo wa etemplo oYerusalemu! (1 Mam. 11:5-8; 2 Mam. 23:13) Okhala wira Salomoni aaninvaha mikuttho Yehova, owo oona wira Yehova khaarowa ocalela itthu soohiloka Salomoni aapaka awe. Yehova khaasiveliwe ni ele Salomoni aapanke awe. w18.07 16-17 itti. 7-9

Nto “matthere [xeeni] a moro” Satana okhanle awe oowoovonyeryani? Satana pooti omootherya Yehova ophavelaka woowokani. Satana oniphavela woowokani wira Yehova khonoophentani ni wira khuuvo oniwoonelani vatthu. Ida, orina iyaakha 19, onihimya wira: “Ikwaha sinceene kuupuwela wira khivaaweryaneya okhala Mpatthani a Yehova”. Exeeni emukhalihenrye oxintta muupuwelo owo? Owo onihimya wira: “Mithukumano sinnikhaliherya olipiha waamini waka. Karowa omuthukumanoni kaamukilaathi paahi, nkaakomentari kuupuwelaka wira khuuvo aarowa ophavela okiwiriyana. Vano kinnilokiherya mithukumano ni weererya okomentari ikwaha piili aahiiso tthaaru. Nikula na nakhotto naapakiwa mwa enamuna emosa. Masi, ntoko noonale ahu ni yowiiraneya ya Ida, waamini wahu khoniira siiso. Waamini wahu pooti wunnuwa aahiiso ovukuwa, nave pooti olipa aahiiso otteettheya. Maana eyo enlipa ni hiyo. (Math. 14:31; 2 aTes. 1:3) Wira “nikula no wisakihana, ori wamini” nnikhapelele, nihaana ovikaniha olipiha ni wunnuwiha! w18.05 24-25 itti. 12-14

Nuumala okhumelela etetere, guarda ole aahituruka moonelo awe onavekela nikhaliheryo. (Mit. 16:25-34) Moolikanasa, atthu yaale ahimphavela wiiwa muhupi wa Biibiliya, pooti oturuka moonelo aya ni ovekela nikhaliheryo vaavo enaakhumelela aya ehasara. Atthu akina pooti oxanka mwaha wowoomoliwa omutekoni aahiiso omwalana. Akina pooti oriipiwa murima vanceene okathi ansuwela aya wira aakhalana eretta yuulupale aahiiso okhweliwa mmusi aya. Nave awo pooti wiikoha so: ‘Kipakeke exeeni wira koopowe?’ Nto pooti ophavelaka wiiwa muhupi wa nlipelelo onilaleya ahu. Tivonto, akhala wira moororomeleya ninnivikaniha olaleerya, nnimwaakhaliherya atthu awo aniphavela wiiwa.​—Yes. 61:1. w18.05 12 itti. 10-12

Olelo-va, Satana oottiyela miruku sa atthu anceene wira ahooneke wira awo ipottha sa etiini yoowootha, anniphavelasa mihakhu ni olamuleliwa ni epoliitika. (2 aKor. 4:4) Ntoko Yesu, nookhalana eparakha ya waakhaliherya atthu omusuwela ni omukokhorela Yehova, Muluku ootaphuwa. (Math. 28:19, 20) Olaleerya khahiyo muteko wookhweya. Maana ilapo sikina, atthu khaniphavela omusuwela Muluku ni akina anninanariwa okathi nnaalaleerya ahu. Masi okhala wira Yehova ni Yesu tanrumme olaleerya, nto nihaana wiikoha so: ‘Niireke kinnirumeela otaphuwa waka wira kikhaliheryeke vanceene muteko wa Yehova?’ Ti voolipiha woona wira arumeyi anceene a Yehova ahoona wira wanikisa wa olumwenku ola ohaattamela, nto aalakela okhweiherya okumi aya wira akhale mapioneero. (1 aKor. 9:19, 23) Anna akina annikhala mapioneero muttetthe aya, akina annirowa mapuro oothowa anamalaleerya. Ti voohakalaliha woona wira atthu anceene annirumeela otaphuwa waya wira anvuwiheke Yehova mwa enamuna ela!​—Esal. 110:3. w18.04 13 itti. 13-14