Setembro

Yesu aahimoonela othunku Martha ni Maria. Okathi aawenhe awe yinlaka mwaha wa okhweliwa murokoraya iihaniwa Laazaro “Yesu ahinla”. (Yoh. 11:32-35) Yesu khanlale paahi mwaha wookhweliwa mutthu aamusuwela awe aahiiso mpatthani awe muulupale. Masi aahinla mwaha woowi apatthani awe a vamurimani yaanihaawa mwaha wa okhwa wa Laazaro. Nto Yesu aahirowa omuhihimuxa Laazaro. Ninnittottela mureerelo wiixutta voohimya sa othunku wa Yesu. Tthiri hiyo khanimalenle ntoko Yesu ori awe oomalela. Hata vari siiso ninnimphenta mwaha woowi onnithokorerya moonelo wa atthu akina. Nto osuwela wira owo Mwene a Omwene wa Muluku onninlipiha vanceene. Yesu onrowa omaliha ohaawa wotheene. Nave onoowerya omaliha mirala sotheene sa apinaatamu sikumiheriwe ni olamulelo wa Satana maana Yesu aari pinaatamu. Ohiya-vo ninnixukhurela okhalana Mwene ‘èhereriwe n’uhawa’ ntoko hiyo.—aHéb. 2:17, 18; 4:15, 16. w19.03 17 itti. 12-13

Nihaana wiimananiha ovara mpantta ahu naakhaliheryaka atthu akina omusuwela Muluku masi khaninvara mekhihu. (1 aKor. 3:6, 7) Yehova paahi toniwiitthana atthu awo. Wira mutthu eemererye ekeekhai aahiiso nnaari onlipa ni mukhalelo wa murima awe. (Math. 13:4-8) Muupuweleke wira atthu anceene khiyeemererya muhupi wa Yesu yoowo aari Mwiixuttihi muulupale! Tivonto nihikhulumuweke akhala wira atthu anceene nneererya ahu waakhaliherya khaneemererya muhupi nnaaleela ahu. Nnoophwanya mireerelo sinceene akhala wira ninniwoonela othunku ni waathokorerya saana atthu nnaalaleerya ahu. Nave nnoosiveliwaka olaleerya ni ophwanya ohakalala wekeekhai mwaha wookhala atthu oovaha. Maana nnimwaakhaliherya atthu ale aniphavela ekumi yoohimala weemererya ihapari sooreera. (Mit. 13:48) Tivonto “okathi wothene ninweryahu niwireleke sorera atthu othene masi vanjenexa amus’ihu [annihu] òwamini”. (aGal. 6:10) Niira siiso nnootthapaka mwaha woosuwela wira ninninvuwiha Tiithi ihu a wiirimu.​—Math. 5:16. w19.03 25 itti. 18-19

Mwene Davidi aalempe so: “Apwiya t’àlupale t’òsareya ottittimiheya: ovuwa waya khunwerya ophimmwa”. (Esal. 145:3) Okhala wira Davidi aanimphenta Yehova omphenta iwo waahimwiiriha onvuwiha Yehova Muluku “mmuthukumanoni mw’atthu”. (1 Wah. 29:10-13; Esal. 40:5) Olelo-va, ninninvuwiha Yehova vaavo ninkomentari ahu mmuthukumanoni. Othene ahu onisivela owiriyana ikomentaario soovirikana mmuthukumanoni. Nave sinninsivela ikomentaario saamukhaani ni soolipiha sa anamwane. Tthiri ninnilipa vaavo munna aahiiso murokora onkomentari awe ekeekhai ophwannye awe. Nave ‘ninnilipa’ vaavo nniiwa ahu ekomentaario ya munna aahiiso murokora oowuuliwa muru wala oniixutta nttaava nahu. (1 aTes. 2:2) Niireke ninnixukhurela wiimananiha waya? Akhala wira ti siiso nihaana waaxukhurela nuumala mithukumano. Enamuna ekina nnooniherya ahu wira ninnaaxukhurela ori waattottopela. Ohiya paahi olipihiwa hiyo-tho ninnaalipiha anna ni arokora mmuthukumanoni vaavo ninkomentari ahu.​—aRom. 1:11, 12. w19.01 8 itti. 1-2; 9 etti. 6

Alopwana muloko yaahixanka vanceene. Awo yaarina makuttula ni khiyaasuwela akhala wira yampenuwa. Maana oretta aya waamutepa. Nihiku nimosa ari ene ottaiwene yaahinweha Yesu yoowo aari Mwiixuttihi Muulupale. Awo yaahiiwa wira Yesu aanaapenuxa aretta a khula enamuna. Vano awo yaahikhuwela ariki: “Yesu Mwixuttihi! Munimorele ikharari!” Alopwana ale muloko yaahipenuxiwa moomalela. Tthiri ninnikupali wira yaahimuxukhurela Yesu mwaha woowaareerela murima. Mulopwana mmosa aahooniherya ohiya paahi oxukhurela masi aahooniherya omuxukhurela wawe Yesu. MuSamariya ole aahipacerya onvuwiha Muluku “ni nsu nulupale”. (Luka 17:12-19) Nimutakihaka muSamariya nihaana waaxukhurela atthu ale annireerela murima. Yehova oonivaha ntakiheryo na oxukhurela. Enamuna emosa onooniherya awe oxukhurela ori waareeliha ale ammusiveliha. (2 Sam. 22:21; Esal. 13:7; Math. 10:40, 41) Biibiliya onnintumererya wira nihaana omutakiha ‘Muluku okhala wira nàn’awe òphentiwa’. (aÉf. 5:1) Nto etthu yuulupale enniiriha okhala atthu ooxukhuru okhala wira nimphavela omutakiha Yehova. w19.02 14 itti. 1-2; 15 etti. 4

Nihiku nimosa, mwali mmosa onisoma oxikola mwa nttittimiho onnikhootta wiirela mpantta niira na mulaponi maana onnisuwela wira khanimmusivela Muluku. Munna mmiravo oowuuliwa muru onlaleerya empa ni empa. Masi onnoona wira empa enittharelana onikhala mmiravo onisomana awe oxikola yoowo aamakela waanyohola Anamoona a Yehova. Hata vari siiso, owo kheemerenrye wuuliwa muru omukhoottiheryaka okela empa ele. Mulopwana mmosa onniimananiha ovara muteko wira olyihe etthoko awe. Masi nihiku nimosa patarau awe onninvekela opaka etthu yoohiloka aahiiso enooniherya ohiroromeleya. Nnaamwi osuwelaka wira akhootta opaka ele onivekeliwa awe onoopweteiwa muteko awe owo onnimutthokiherya wira ohaana okhala oororomeleya maana Muluku oniphavela wira nikhaleke atthu oororomeleya. (aRom. 13:1-4; aHéb. 13:18) Mukhalelo xeeni arina aya anna ala araru? Tthiri munnoona wira awo toolipa murima ni anneettela exariya. Masi awo aakhalana mukhalelo wootepa otthuneya eyo piiyo ororomeleya. Tthiri otheene aya annooniherya wira anniroromeleya wa Yehova. Nave anniiwelela malamulo a Muluku. Nto ororomeleya onniwiiriha opaka itthu sooloka. Tthiri ninnikupali wira Yehova onnihakalala mwaha wa ororomeleya wa anna awo. Nave hiyo nimphavela omusiveliha Tiithi ihu a wiirimu. w19.02 2 itti. 1-2

Nlamulo naanaakhapelela atthu yaale yahaawerya wiikhapelela ntoko ikwaasuni anaamukhweli ni anamurwa. Yehova aahaaleela makhulupale a wIsarayeli wira: “Muhapuheryé anamurwa nnákhala axinamwane ikwasuni. Mwamukophiha muthiyana namukhweli muhimukhanyereriheké wovahani nemexeryo”. (Otum. 24:17) Yehova aanaavaha efaita yinceene atthu yaale yahaawerya wiikhapelela mmuttettheni. Nave Yehova aanaahukhumu atthu yaale yaahasula atthu yahaawerya wiikhapelela. (Okhum. 22:22-24) Yehova oniphavela wira ale arina okhulupale yaaphenteke atthu anaahoolela aya. Owo onninyokha ikrime sa moorupihanani ni oniphavela wira atthu otheene otepexa wene ale ahiniwerya wiikhapelela athokoreriweke mwa xariya. (Onam. 18:6-30) Vaavo nnoona ahu wira Yehova onninthokorerya mwa xariya omphenta wahu onninnuwa. Nave omphenta Muluku ni malamulo awe a xariya onniniiriha waaphenta atthu akina ni waathokorerya mwa xariya. w19.02 24-25 itti. 22-26

Nrowe niwehe ntakiheryo ninrowa onikhaliherya wiikhapelela wira muupuwelo ahu ohihononiwe ni Satana. Yehova onihimya wira nihilavuleke “itthu s’òseje [orupihana woohiloka] ni sonanara sikina”. (aÉf. 5:3) Nto ninrowa opaka exeeni akhala wira amiravo akina omutekoni aahiiso oxikola annilavula itthu sa orupihana woohiloka? Okathi owo yowuupuxerya ya murima ahu enoonileela etthu. (aRom. 2:15) Nto niireke nnoowiriyana ele enihimya aya? Muhikuxeye murima mphavelaka owiriyana ele amiravo akhwiinyu anihimya aya aahiiso oweha ifootu aniwooniheryaayani. Nyuwo muhaana owala mikhora sanyu mulavulaka mwaha mukina. Onitthuneya olipa murima wira mukhootte sookhanyererya sa amiravo akhwiinyu. Musuweleke wira Yehova onniweha wiimananiha wanyu ni onimoovahani ikuru ni ankhili anrowa wookhaliheryani okhootta muupuwelo wa Satana.​—2 Wah. 16:9; Yes. 40:29; Yak. 1:5. w19.01 17-18 itti. 12-13

Khuuvo mutthu oothaaciri ni oowerya onvikana Salomoni. Owo aahiihimeerya mmensawe wira: “Haya, kèrerye: kone opuha wothene!” (Mus. 2:1-10) Tthiri, Salomoni aahiteka ipa soolokexa, ijardim ni iparkhi sootepa oreera ni aanipaka khula etthu aaphavela awe. Niireke aahiphwanya ohakalala wekeekhai? Nnaari. Maana nuumala oweha itthu aapanke awe, owo aahihimya masu a yoolepa ya olelo. Niireke ele yaamwiiranenle Salomoni yoowiixuttihani etthu? Atthu akina anniixutta etthu nuumala opaka etthu yoohiloka ni waakumiherya mixankiho. Yehova khoniphavela wira eyo yookhumeleleni. Maana oniphavela wira munwiriyaneke ni mmwiiweleleke. Nto onitthuneya waamini, masi khamunrowa othanana mwaha woopaka soothanla murumeelaka waamini wanyu. Nave Yehova khonikhala-khala oliyalaka ophenta moonihenrye anyu nsina nawe. (aHéb. 6:10) Tivonto, mwiimananiheke wira mukhalane waamini woolipa. Mwiira siiso, munoopaka soothanla sooloka ni munimoona wira Tiithi inyu a wiirimu oniphavela mureerelo anyu.​—Esal. 32:8. w18.12 18-19 itti. 14-15

Mutthu orina muupuwelo womunepani, onnimwaamini Muluku ni oweha itthu ntoko Yehova onoonela awe. Owo onneemererya weettihiwa ni Yehova ni onnimwiiwelela. (1 aKor. 2:12, 13) Davidi ntakiheryo nooloka na mutthu orina muupuwelo womunepani. Owo iipale so: “Muluku! Nyuwo mwá othajiri aka”. (Esal. 16:5) Davidi aanixukhurela “othajiri” wawe, eyo piiyo, waataana wooloka aarina awe ni Muluku ni aahimpaka okhala ntthyawelo nawe. (Esal. 16:1) Eyo yaahimwiiriha ohimya wira: “Murim’aka onnitteliwa”. Khiivo etthu yaamutteeliha murima Davidi ovikana waataana wawe ni Yehova! (Esal. 16:9, 11) Atthu yaale aniphavelasa musurukhu ni opuha paahi, khanihakalala ntoko Davidi. (1 Tim. 6:9, 10) Akhala wira munoomurumeela ni omwaamini Yehova, munoophwanya ohakalala wekeekhai. Nto, exeeni ekhanle anyu oopaka wira mulipihe waamini wanyu? Muhaana oviriha okathi munceene muri ene ni Yehova, munnipaka eyo vaavo munimusoma anyu Biibiliya, oweha itthu opattunxe awe ni wuupuwelela mikhalelo sa Yehova ntoko ophenta wawe.​—aRom. 1:20. w18.12 22-23 itti. 7-8

Paulo khahiyo aalavula sa ikasamento sa atthu otheene. Owo aaleela maKristau wira attittimiheke ekasamento aahiiso ethokoreryeke okhala yowaarya. Niireke munoonela siiso ekasamento, otepexa wene akhala wira moothela aahiiso mootheliwa? Akhala wira munnithokorerya ekasamento okhala yowaarya, nyuwo munnitthara ntakiheryo nooloka na Yesu. Maana owo aanittittimiha ekasamento. Okathi aFarisi yaamukonhe aya voohimya sa omwalana, Yesu aahilavula ele Muluku aahimmye awe sa ekasamento yoopacerya, oriki: “Tivó mulopwana onahiyawe atithi awe n’ame awe, anakhala vamosá ni mwar’awe: òwanli aya enakhala ntoko mutthu mmosaru pahi”. Nave, Yesu aahincererya wira: “Yeyo Muluku ephitanyalyawe, mutthu ahimwalanyihé-tho”. (Mar. 10:2-12; Maph. 2:24) Yesu aanisuwela wira Muluku paahi topanke ekasamento ni aaphavela wira ekhaleke mahiku otheene. Nto vaavo Muluku aapanke awe ekasamento, khaalenle Adamu ni Eva wira amwalaneke. Owo aaphavela wira “òwanli aya” akhaleke oowiiraana mahiku otheene. w18.12 9-10 itti. 2-4

Okathi naapacenrye ahu wiixutta ekeekhai, naahoona otthuneya waya wiiwelela malamulo a Yehova. Vaavo naarowa ahu vahoolo, naahipacerya osuwela muupuwelo wa Yehova, niire so, itthu sinimusivela, itthu sihimmusivela ni moota onoonela awe itthu. Nto mwaha wa eyo, ninnipaka itthu aahiiso othanla nittharaka muupuwelo wa Yehova. Okhala wira na atthu oohimalela, hata nisiveliwaka wiixutta wuupuwela ntoko Yehova, ikwaha sikina vannivila woona itthu ntoko onoona awe. Mwa ntakiheryo, ninnisuwela moota Yehova onoonela awe orupihana woohiloka, ophenta muhakhu, olaleerya, orumeela ephome moohiloka ni itthu sikina. Masi pooti ovila wiiwexexa nthowa naya orina awe moonelo owo. Nto, ninrowa owerya sai otepa wuupuwela ntoko Yehova onuupuwela awe? waakhuliwa wa nikoho nla, onlipa ni wuuluula osuwela wahu niixuttaka Nuulumo na Muluku, ophavela wiiwexexa muupuwelo awe, wuupuwelela ele enisoma ahu ni omananiha okhalana muupuwelo wa Yehova. w18.11 27-28 itti. 2-4

Habakuki aakhala okathi wootepa oxankiha. Atthu a okathi awe yaari oowali ni ootakhala, nto eyo yaanimuriipiha murima vanceene. Khula opuro, Habakuki aanaaweha aIsarayeli ahaaxanaka. Vano Habakuki aaniikoha wira: ‘Niireke otakhala nno onoomala? Xeeni Yehova onihiya awe oviraka okathi munceene?’ Tthiri Habakuki aahivela-vela. Tivonto Habakuki aahimuxonttela Yehova wira omukhaliherye. Waanyiheryasa, Habakuki aahipacerya wuupuwela wira Yehova khaathokorerya atthu Awe aahiiso khaarowa opaka etthu. Niireke mootoko woona siiso? Niireke makoho a Habakuki anooniherya wira khaamuroromela Yehova ni sooleiherya sawe? Nnaari! Habakuki aaveka wira Yehova omukhaliherye ovela-vela wawe ni omaliha mixankiho sawe, nto eyo yooniherya wira nlelo aanimuroromela ni khooceyale. Habakuki aahixanka ni aahivela-vela. Nave khaasuwela ele yaamwiiriha Yehova ohipaka etthu ni waahiya atthu atepaka ohaaxana. w18.11 16 itti. 4-5

Mwa ntakiheryo, Pedru ni Andreya yaari atothi a ihopa, masi vaavo Yesu aalattunle awe wira akhale awiixutti awe, awo yaahihiya muteko ole. (Math. 4:18-20) Eyo khentaphulela wira muhaana ohiya muteko anyu wira mwiixutte ekeekhai. Maana mutthu ohaana ovara muteko wira okhapeleleke etthoko awe. (1 Tim. 5:8) Masi vaavo muniixutta anyu ekeekhai, moonelo anyu itthu sa werutthuni onniturukeya. Maana munnipacerya ovaha efaita itthu sootepa otthuneya. Maria aaphavela omusuwela saana xooku ole, wira ophwanyeke musurukhu munceene. Muhoolo mwaya, aahipacerya wiixuttihiwa Biibiliya. Maria aanisiveliwa ni itthu iixutta awe khuvarihela muteko. Owo onihimya wira: “Vaavo kaatepa aka ovarihela muteko itthu kiixutta aka mBiibiliyani, kaanitepa ohakalala”. Maria aahoona wira khaarowa owerya ovara itthu piili, niire so, waataana wawe ni Yehova vamosa ni omweetta xooku ole. (Math. 6:24) Tivonto, aahithanla ohiya omweetta xooku ole wira opakeke etthu yootepa otthuneya. Olelo-va, Maria onirumeela ntoko pioneera ni onihimya wira “ootepa ohakalala vano”. w18.11 5-6 itti. 9-10

Okathi aarina awe iyaakha 30, Yesu aahihiya okhala kalapintero khukhala mwiixuttihi, maana aanisuwela wira aahaana ovara muteko owo wootepa otthuneya. Nave, aanisuwela wira olaleya ihapari sooreera sa Omwene wa Muluku ti waamwiirinhe orwa valaponi. (Math. 20:28; Luka 3:23; 4: 43) Olaleya ihapari sooreera waari muteko wootepa otthuneya mookumini mwa Yesu ni aaphavela wira atthu akina apakeke eyo. (Math. 9:35-38) Anamunceene a hiyo, khahiyo makalapintero, masi otheene ahu ninniwiixuttiha atthu ihapari sooreera. Muluku onnivara muteko ola, okhala wira ti wootepa otthuneya. Tivonto “ninvara vamosá . . . [ni] Muluku”. (1 aKor. 3:9; 2 aKor. 6:4) Nave, ninnikupali moolumo a nasaalimo ani: “Olipa wa masu anyu t’ikekhai”. (Esal. 119:159, 160) Tthiri Nuulumo na Yehova ti ekeekhai. Ti maana aya nimphavela ahu olaleya “vophwanela ehapari y’ekekhai”. (2 Tim. 2:15.) Nto nimphavela omurumeelaka oratteene Biibiliya, ekaruma yeeyo ennikhaliherya owiixuttiha atthu voohimya sa Yehova, Yesu ni Omwene. w18.10 9-10 itti. 1-2

Vaavo mulopwana onitakiha awe ophenta wa muhooleli awe, niire so, Yesu Kristu, eyo ennimukhweiherya mwaarawe ‘omuttittimiha’. (aÉf. 5:22-25, 33) Nave, vaavo muthiyana onimuttittimiha awe iyawe, onoosuwelaka mukhalelo wa iyawe akhala wira oovareya ni miteko sa muloko aahiiso yookhala etthu enimuxankiha. Vaavo anamuyari anittittimihana aya ni oreerelana murima, animwaavaha anaaya ntakiheryo nooloka. Nave, ahaana owiixuttiha anaaya owuupuwela atthu akina ni waareerela murima. Mwa ntakiheryo, anamuyari ahaana owiixuttiha anaaya wira ahitthimakeke Empa ya Omwene. Vaavo anitthekula aya, pooti waaleela anamwane wira yaalipeleleke atthu aalupale opacerya okuxa yoolya. Tivonto, nihaana omuttottopela mwaana apaka etthu yooloka, ntoko onihulela mukhora. Eyo enoomulipiha mwaana ni omukhaliherya woona wira, “mulipa-òvaha onoreriwa onvikana mulipa-òvahiwa”. w18.09 28-29 itti. 5-6

Malakiheryo ninvahiwa ahu ni Yesu Kristu, Mwene ahu onilamulela, anoonikhaliherya vano ni muhoolo. Mmananihe woona mareeliho akhumelenle mwaha wootthara marukunuxo a niinaano. Okathi wa omulompa Muluku vatthokoni, muthokoreryeke moota marukunuxo a mithukumano ni muteko woolaleerya akhalihenrye aya etthoko anyu. Etthu enrowa onikhaliherya otthara malakiheryo ni ophwanya ohakalala, wuupuwela wira wiiwelela malakiheryo a mutthenkeso wa Yehova anniphwanyiha mareeliho manceene. Mwa ntakiheryo, okhala wira khasinimpirimiriwa iliivuru sinceene ntoko khalai, eyo enniiriha ohirumeeliwa musurukhu munceene. Nave, okhala wira ninrumeela etekonologia, ninnikhaliherya waaphwanyiha ihapari sooreera atthu anceene. Niireke ninnirumeela vanceene iliivuru eletroniko ni iviidiyu? Opaka eyo enamuna emosa nimmukhaliherya ahu Kristu, yoowo oniphavela wira nirumeeleke mwa miruku mireerelo sa mutthenkeso. Vaavo nintthara ahu ohoolela wa Kristu, ninnaakhaliherya anna ni arokora olipiha waamini waya ni otepa wiiraana. w18.10 21 itti. 17-19

Akhala wira ninnaareerela murima ni owoonela othunku anna nnaave-kelela ahu, ninrowa omutakihaka Yehova. (2 aKor. 1:3-6) Muhuupuweleke wira anna toomalela. Muhiiwoke muupuwelaka wira anna toomalela ni khanrowa woonyoonyihani. (Mus. 7:21, 22) Muupuweleke wira Yehova khonlipelela itthu nihinwerya ahu. Tivonto nihaana opixeryana murima. (aÉf. 4:2, 32) Khanimphavela owiiriha anna wuupuwelaka wira khaniimananiha ovara miteko sa Muluku aahiiso waalikanyiha ni atthu akina. Ohiya-vo, ninnaalipiha naattottopelaka mwaha wa itthu aniwerya aya opaka saana. Nto eyo enimwaahakalaliha vaavo anivikaniha aya omurumeela Yehova.—aGal. 6:4. w18.09 12-13 itti. 16-17

Yesu aanoona okhala yoolya awe opaka yootthuna ya Muluku. Olya yoolya yooloka onnikhaliherya erutthu ahu, nto opaka yootthuna ya Muluku onnilipiha waamini wahu. Vaavo nimpaka ahu ele Yehova onnivekela awe, ninniwooniherya ankhili. (Esal. 107:43) Nave, atthu arina ankhili anniphwanya itthu sooloka. Miruku 3:13-18, oni: “Khivo etthu yophaveleya enlikananaya [ankhili]. . . . Awo ti mwiri onavaha ekumi ale anatthara: onavaha oreriwa ale aniwettela”. Yesu aahimmye wira: “Nyuwo mosuwela itthu iya: vano, mwettelakaru, munoreriwa”. (Yoh. 13:17) Awiixutti yaamuhakalalaka akhala wira yanvikaniha opaka ele Yesu aavekenle awe. Nto okumi aya wotheene, yaahaana otthara ntakiheryo ni sowiixuttiha sa Yesu. w18.09 4 itti. 4-5

Nnaamwi Adamu ni Eva yaari mekhaya ejardim ya wEedeni, awo yaahaana owuupuwela atthu akina. Atthu xeeni? Muupuweleke wira Yehova aahaavaha muritti, eyo piiyo, waayara anamwane wira asareye valaponi ni wiiriha elapo okhala eparayiisu. (Maph. 1:28) Adamu ni Eva yaaphavela wira anaaya ahakalaleke, ntoko Yehova aaphavela awe. Nto otheene aya yaarowa ovaraka muteko mowiiraana wira elapo yotheene ekhale eparayiisu. Tthiri owo waari muteko muulupale! Nave apinaatamu ale oomalela, yaahaana ovara vamosa ni Yehova wira yiirihe elapo okhala eparayiisu ni omaleliha yootthuna awe. Nto eyo yanwiiriha ophwanya omumula vamosa ni Muluku. (aHéb. 4:11) Tthiri awo yaamuhakalalaka ovara vamosa ni Yehova! Nave Yehova aamwaareeliha vanceene mwaha wookhala atthu oovaha ni waathokorerya akina. w18.08 15 etti. 2; 17 itti. 8-9

Munrowa opaka exeeni akhala wira munimootheriwa etthu? Moone wira Yesu ni Yohani Mbatiza aatoko wootheriwa. (Math. 11:18, 19) Yesu aapanke exeeni? Owo khaahononne okathi awe ni ikuru sawe wira owiirihe atthu woona wira aamootheriwa. Masi aatumerenrye atthu ale woona miteko sawe. Maana aaphavela wira aweheke ele aapaka awe ni iixuttiha awe. Yesu aahimmye so: “Ankhili annòneya okhala òloka mwaha wa miteko saya”. (Math. 11:19) Ele yaamwiiranenle Yesu enniniixuttiha etthu yuulupale. Okathi mukina, atthu pooti onootherya etthu, vano nnoova wira anoohonona omutthu ahu. Masi mweettelo ahu onimooniherya akhala wira eyo ekeekhai aahiiso nnaari. Ntakiheryo na Yesu, ninnooniherya wira mweettelo ahu wooloka onimwaakhaliherya atthu woona wira nnimootheriwa paahi. w18.08 6-7 itti. 11-13

Kayini, Salomoni ni aIsarayeli otheene, yaahikhalana eparakha ya ottharuwa ni orukunuxa murima aya. (Mit. 3:19) Maana Yeho-va khaanyanyanle moowaakuveya mwaha wa soovonya saya. Nkuupuwelani moota Yehova aamulevelenle awe Aroni. Olelo-va, moophenta Yehova onninlopola wira nisyakeke opaka itthu soohiloka. Owo onnimurumeela Biibiliya, iliivuru sa mutthenkeso ahu ni maKristau akhwiihu. Vaavo nniiwelela ahu soolopola sa Yehova, nikupaliki wira onoonimorela ikharari. Omoriwa ikharari wa Yehova onninikhaliherya. (2 aKor. 6:1) Mwaha woowi onninivaha eparakha ya “okhotta makhalelo ahu òtakhala n’uhiya itthu sintthunexiwa vathí-va”. (Tito 2:11-14) Nuupuweleke wira okathi mukina sookhala itthu sinrowa weehererya waamini wahu. Muhaana olakela okhala mpantta wa Yehova. w18.07 20 itti. 20-21

Moota xeeni osuweliwa wahu ni Yehova ontepa aya olipa vaavo ninkhootta ahu osuweliwa ni olumwenku ola? Nrowe nithokorerye ikeekhai piili sinrowa onikhaliherya. Yoopacerya, okathi wotheene Yehova onnaasuwela arumeyi awe oororomeleya. (aHéb. 6:10; 11:6) Yehova onninvaha efaita khula murumeyi awe oororomeleya. Tivonto khonrowa oliyala miteko sahu, maana Muluku “naxariya”. Yehova “onnijaliha ephiro y’atthu òloka” ni onnisuwela owoopola. (Esal. 1:6; 2 Ped. 2:9) Ya nenli, Yehova pooti onitthuvela mwa enamuna nahaalipelela ahu. Akhala wira ninnipaka itthu sooloka niphavelaka ottottopeliwa ni atthu akina, Yehova khonrowa onitthuvela. Mwaha wa xeeni? Mwaha woowi, Yesu aahimmye wira vaavo akina annittottopela aya, eyo ti etthuvo ahu. (Math. 6:1-5) Masi Yehova ‘onniwona’ atthu yaale ahinttottopeliwa nnaamwi apakaka itthu sooloka. Nto onrowa waatthuvela mwaha wa itthu iyo anipaka aya. w18.07 5 itti. 8, 10

Pedru khaasuwela ele nsu nne naaphavela aya omwiixuttiha. Moohipisa, yaahirwa anamuhupi yaarummwale ni Kornelio. Vano olakiheriwaka ni munepa wootteela, Pedru aahaatthara anamuhupi ale etthoko ya Kornelio. Vaakhanle wira Pedru aahaaphukela ‘ottharaka itthu sinòneya pahi’, khaarowa etthoko ya Kornelio. AYuda khiyaarowa itthoko sa Amalapo. Nto xeeni Pedru ohalaka orowa? Nnaamwi aathanya Amalapo, yowoonihiwa ni malakiheryo a munepa wootteela yaahimwiiriha oturuka muupuwelo awe. Nuumala Pedru onwiriyana Kornelio, owo aahimmye wira: “Vano kosuwela orattene wira Muluku khanathanla atthu. Tthiri Muluku onnaphenta atthu a nloko ti nloko, yale animuttittimiha, enettela exariya”. (Mit. 10:34, 35) Wiiwexexa nno wa niinaano waahimutikiniha Pedru, nave waarowa waatikiniha maKristau otheene. w18.08 10 itti. 3-4

Nihaana onyokha itthu Muluku onnyokha awe. Ninrowa opaka exeeni akhala wira ninnikumana muxankiho Biibiliya ohinvaha awe nlamulo nooluluwanya? Ninrowa osuwela sai ele Muluku omphavela awe wira nipakeke? Akhala wira nnoomweemererya Biibiliya wiixuttiha yowuupuxerya ya murima ahu, nnoopakaka soothanla sooloka. Okhala wira onniniphenta, Yehova oonivaha malakiheryo wira yeettiheke yowuupuxerya ya murima ahu. Yehova onihimya so: “Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erinanyu otthara”. (Yes. 48:17, 18) Wuupuwelela saana malakiheryo a Biibiliya ni weemererya ovara murima ahu, nnoowerya olokiherya yowuupuxerya ya murima ahu. Tthiri eyo enoonikhaliherya opaka soothanla sooloka. Malakiheryo, ti ikeekhai suulupale sineettiha muupuwelo ahu wira nipakeke soothanla sooloka. Osuwela malakiheryo a Yehova, onoonikhaliherya osuwela muupuwelo awe ni nthowa nimmwiiriha onivaha malamulo. w18.06 16 etti. 5; 17-18 itti. 8-10

Nto “atthu a Herodi”, taale yaakhaliherya miyuupuwelo sa epoliitika ya Herodi. Awo yaaphavela wira Yesu aakhoottiherye oliva mpoosito, maana eyo yanwiiriha omootherya okhala nwanani a Mwene ooRoma. Masi akhala wira Yesu aamuhimya wira aliveke mpoosito, atthu yaamuhiya omutthara. Nto, Yesu aapanke exeeni? Yesu aaniivaha ephoole wira ohiikelihe muhina mwaha ole. Hata Yesu aasuwela wira alipa-ooliviha mpoosito yaari anatarau, owo khaattittimihenrye eyo. Ohiya-vo, Yesu aattittimihenrye ele yaarowa omaliha mixankiho sa apinaatamu, eyo piiyo, Omwene wa Muluku. Nto Yesu oonivaha ntakiheryo. Khanintthuneya okhaliherya myaha sa epoliitika, hata vakhalaka ntoko wira akina aakhalana exariya. MaKristau anittittimiherya Omwene wa Muluku paahi ni ele Muluku onihimya awe okhala exariya. Tivonto, khinnikhaliherya ohixariya nnakhala waanyohola atthu awo. (Math. 6:33) Anamoona a Yehova anceene aaxintta miyuupuwelelo sa ipoliitika yaarina aya. w18.06 6-7 itti. 9-11

Ohiya paahi orumeela oraruwa aahiiso onamuttompe wira ohapuxe malaikha ale, woonasa wene, Satana aahileiherya wira yaarowa waalamulelaka apinaatamu. Vamosaru, Satana aaheererya okhoottiherya wiiraneya eprofesia ya Yehova voohimya sa ‘muthiyana ni osùlu awe’. (Maph. 3:15) Masi Yehova kheemerenrye wira Satana okhoottiherye wiiraneya wa eprofesia eyo. Yehova aahiruuha Epula ya Mutaaseke wira omuhonone palano a Satana ni malaikha ootakhala. Nto orupihana woohiloka ni wiixinnuwiha ihelelo sinimwiiriha Satana okhumela saana. Malaikha amutthanre Satana yaahikhala ni Muluku wiirimu iyaakha sinceene! Hata vaari siiso, malaikha manceene yaahihiya soophavela soohiloka sinnuwaka vamurimani vaya. Okathi wotheene, nuupuweleke wira hata sivinre ene iyaakha sinceene nimurumeelaka Yehova, soophavela soohiloka pooti wunnuwa vamurimani vahu. (1 aKor. 10:12) Ti maana aya, okathi wotheene vanitthuneya ahu oweha ele eri vamurimani vahu ni okumiha khula etthu enivarihana ni orupihana woohiloka ni wiixinnuwiha!​—aGal. 5:26; aKol. 3:5. w18.05 18 itti. 11-12

Paulo aahinyoonyiheya mwaha wa aYuda yaakhootta wiiwa muhupi wa Omwene. Masi, Paulo khaatonko ohiya waalaleerya atthu ale. Nave Paulo onnitthokiherya moota aawoonela awe aYuda ale oriki: “Etthu emphavelaka ni murim’aka wothene, eninvekelaka Muluku, t’ila: wira aYuda yòpowe. Miyo kinnakhalela onamoona wira awo anetetela omuttittimiha Muluku, nto khansuwela enamuna y’omuttittimiha Muluku vophwanela”. (aRom. 10:1, 2) Paulo onihimya wira etthu yaamwiiriha waalaleerya aYuda mwaha woowi eyo ti ‘etthu yaphavela awe ni murima wothene’. Tthiri Paulo aaphavela wira atthu ale yoopowe. (aRom. 11:13, 14) Nto Paulo aanimuxonttela Yehova wira omukhaliherye khula muYuda weemererya muhupi wa Omwene. Nave Paulo aahimmye wira: “Awo anetetela omuttittimiha Muluku”. Ela enooniherya wira Paulo aanoona mikhalelo sooloka sa atthu ale ni wira yanwerya omurumeela Yehova. Nave, aahisuwela wira aYuda ale ooluttuweliwa yanwerya okhala awiixutti ooluttuweliwa a Kristu, ntoko Paulo. w18.05 4 etti. 4; 6-7 itti. 13-14

Khula mmosa a hiyo ohaana wuupuwela etthu nikhanle ahu oopaka wira naakhaliherye atthu akina. Paulo aahaalepela maKristau aHeeberi wira: “Mòkolole matata akhulumunwe, mulipihe makutha attèttheiye: mokolole iphiro sinviranyu, wira nnawu nrakanle nihituthunye, masi nivolé”. (aHéb. 12:12, 13) Otheene ahu nnoowerya olipihana mukina ni mukhwaawe ni moolumo ahu hata niyenve ene. Paulo aahaalepela maKristau wira: “Axinn’aka, vakhalaka wira munnihakalala mwa Kristu, walá wophentani wawe onnilipiha makhuv’anyu; vakhalaka wira mothukumanyiwa n’iroho yowarya [munepa wootteela], walá mwakhalanaka ophentana n’umoriwa ikharari, nanso musarihele otteliwa waka murima, mwiwananaka vomalela. Mukhalaneke ophentana omosaru, murima mmosaru ni mukhalelo mmosaru yowo. Ehikhale etthu enìranyu mphavelaka oxinttana walá wittottopa: nto mwiyeviheke, khula mutthu awonelaka vatthu akhw’awe vowivikana mmansawe. Khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”.​—aFil. 2:1-4. w18.04 23 etti. 10; 24 etti. 12

Tthiri Yehova oomurumeela Yesu wira onoopole okhala ipottha sa etampi ni okhwa. Nto eyo enniniiriha okhala “arumeyi a Muluku” okumi ahu wotheene. Enamuna emosa yoorumeela mwa miruku otaphuwa wahu, ti orumeela okathi ahu ni ikuru sahu, wira nimukokhoreleke Yehova ni murima wotheene. Opaka eyo enoonikhaliherya osyaka wira soophavela sahu ni sa olumwenku ola sihikhale sootepa otthuneya mookumini mwahu. (aGal. 5:16) Nkahaya muupuwele ele Nowe ni emusi awe yaapanke aya. Awo yaakhala olumwenku wootakhala ni woosareya orupihana woohiloka. Masi awo khiyaatthara soophavela sa atthu ale, nnakhala ovara itthu saavara aya. Nto yaahithanla oluttuweliwa miteko sa Yehova. Nave yaahiteka ekalawa, othukumanya soolya wira alyeeke awo ni inama ni yaanaalopola atthu wira aamoorwa Mutaaseke. Biibiliya onihimya wira Nowe aahiira “sothene sarummwawe ni Muluku”. (Maph. 6:22) Nto eyo yaahimwiiriha Nowe ni emusi awe woopowa okathi waapwetexiwe aya olumwenku wa mahiku ale.​—aHéb. 11:7. w18.04 11 etti. 8; 12-13 itti. 11-12

Satana ni malaikha awe ootakhala annirumeela etiini yoowootha ni olumwenku wa nakoso wira aawoke “atthu othene” a valaponi. (Wis. 12:9) Satana onnirumeela etiini yoowootha wira yiixuttiheke itthu sowootha voohimya sa Yehova, ohela muhina weererya ovitha nsina na Muluku. (Yer. 23:26, 27) Nto eyo enniwiiriha atthu wuupuwelaka wira animukokhorela Muluku, masi akokhorelaka malaikha ootakhala. (1 aKor. 10:20; 2 aKor. 11:13-15) Nave, Satana onnirumeela olumwenku wa nakoso wira omwara-mware wootha wawe, ntoko yoowootha yoowi musurukhu aahiiso mihakhu sinnaaphwanyiha ohakalala. (Mir. 18:11) Ale anikupali wootha iwo, anniviriha okathi munceene athukumanyaka “Muhakhu”, ohiya omurumeela Muluku. (Math. 6:24) Hata yamphenta Muluku, ophenta waya muhakhu onninnuwa mpakha ovuvurya omphenta waya Muluku.​—Math. 13:22; 1 Yoh. 2:15, 16. w18.05 16-17 itti. 6-7