Abril

Niireke wookhala muxankiho muniwanana anyu? Woonasa wene, ookhala munna wala murokora a mmulokoni oonyoonyinheni. (Yak. 3:2) Aahiiso, ale munvarana anyu muteko wala munisomana anyu oxikola annooveehani mwaha wookhala Namoona a Yehova. (1 Ped. 4:3, 4) Nave pooti wira amusi anyu akina, anniimananiha weererya woohiihani orowela mithukumano ni olaleerya. (Math. 10:35, 36) Akhala wira muxankiho anyu muulupale, woonasa wene munuupuwela wira vaamuloka ohiya omurumeela Yehova. Masi, moohicikha muxankiho muniwanana anyu, mukupaliki ni murima wotheene wira Yehova onimoovahani ankhili ni ikuru wira nwerye ovilela mixankiho sanyu. Yehova oohela mBiibiliyani sowiiraneya sa arumeyi awe yaawo yaavilenle mixankiho. Mwaha wa xeeni? Mwaha woowi aanisuwela wira naamuttottela mureerelo itthu anniixuttiha aya. Eyo ti etthu Yehova aamurumme awe Paulo olepa. Moohaanyiherya, osoma sowiiraneya iyo siri mBiibiliyani sinoonimaaliha ni onivaha nlipelelo. Masi wira nittottele mureerelo sowiiraneya iyo, nihaana opaka etthu ekina ohiya paahi omusoma Biibiliya. Nihaana omweemererya Biibiliya oturuka enamuna nnuupuwela ahu ni ovara murima ahu. w21.03 14 itti. 1-2

Niireke munniwoona atthu ntoko mihokorokho soottokottha wira sihemphweke? Akhala wira ti siiso, sookhala itthu tthaaru sinrowa okhumelela. Itthu sene tiiya: Yoopacerya, munrowa olaleeryaka moowaakuveya. Okathi woohepha onkhala vakhaani; nto onvariwa moowaakuveya. Ya nenli, nyuwo munoohakalalaka vaavo munrowa anyu owoonaka atthu yeemereryaka ihapari sooreera. Biibiliya onihimya wira: “[Atthu] annitthapa oholo wanyu ntoko sintteliwaya murima okathi w’ohepha”. (Yes. 9:2) Ya neeraru, nyuwo munrowa omoonaka khula mutthu wira onniphwanelela okhala mutthareli a Yesu, nto munimwaalaleeryaka moovarihana ni makhalelo aya. Woonasa wene, awiixutti akina a Yesu yuupuwela wira khivaarowa oweryaneya aSamariya okhala atthareli a Yesu. Masi Yesu khaarina muupuwelo wa awiixutti awe. Maana aahoona wira aSamariya yanwerya okhala atthareli awe. Hiyo nave nihaana owoona atthu a muttetthe ahu wira anoowerya okhala atthareli a Kristu. Murummwa Paulo oonivaha ntakiheryo nooloka ninreerela ahu otthara. Owo aahisuwela soolema sa atthu aalaleerya awe, aaniimananiha osuwela itthu saasivela ni aaniwoona wira yanwerya okhala atthareli a Yesu. w20.04 8-9 itti. 3-4

Ohiya omakela waaphukela atthu mwaha wa etthu anipaka aya, mwiimananiheke osuwela moonelo aya. Mutthu onnisuwela oratteene ti Yehova paahi. Tivonto munvekeleke wira ookhaliheryeni waathokorerya atthu ntoko onaathokorerya awe. Nave munvekeleke Yehova wookhaliheryani okhala mutthu a othunku. Muhimuthanleke munna aahiiso murokora munrowa anyu omoonela othunku. Ootheene ahu sinniniphwanya mixankiho ntoko Yona, Eliya, Hagari ni Lothi. Awo yaahikhalana mixankiho yiikumihenrye aya mmensaya. Nto hiyo pooti oniiraneela etthu emosaru. Tivonto vari aya vookhalela Yehova onivekela wira niwooneleke othunku atthu akina. (1 Ped. 3:8) Vaavo nimmwiiwelela ahu Yehova, ninnikhaliherya wiiraana ntoko emusi emosa olumwenku wotheene, hata nri ene oovirikana. Nto mwiimananiheke waawiriyana, waasuwela ni owoonela othunku anna ni arokora otheene. w20.04 18-19 itti. 15-17

Yesu oovaha ntakiheryo noomalela na omwiiwelela Yehova. Nto enamuna yuulupale ya omwiiwelela Yehova ori ootthara oratteene ntakiheryo na Yesu. (Yoh. 8:29) Wira nihihiye weettela ekeekhai, nihaana okupali ni murima wotheene wira Yehova, Muluku eekeekhai ni itthu sotheene onihimya awe muNuulumoni mwawe ori Biibiliya, ti sekeekhai. Nave nihaana okupali ni murima wotheene wira Yesu tori Mesiya aaleiheriwe. Atthu anceene olelo-va, annaanyiherya wira Yesu tothanliwe wira okhale Mwene a Omwene wa Muluku. Yohani aahilopola wira yaamukhumelela “atthu anjene òwòtha”, yaawo aniphavela waahapuxa atthu yaale ahiilokihenrye oratteene wira yaakiherye ekeekhai voohimya sa Yehova ni Yesu. (2 Yoh. 7-11) Yohani aalempe so: “Nto vano, nawothe t’ani? T’ule onihimya wira Yesu khahiyó Mòpoli”. (1 Yoh. 2:22) Enamuna emosa enrowa onikhaliherya ohiwokiwa ori osoma oratteene Nuulumo na Muluku. Niira siiso, nnoomusuwela oratteene Yehova ni Yesu. (Yoh. 17:3) Nave, nnookupali ni murima wotheene wira nookhalana ekeekhai. w20.07 21 itti. 4-5

Enamuna emosa nikhanle ahu osyaka waakwattuliha ale nintthimakana ahu, ori osyaka waakhanyererya opaka itthu ahimphavela aya aahiiso ovarexexa moonelo ahu. (aRom. 14:19-21; 1 aKor. 8:9, 13) Eyo ennooniherya wira noovirikana ni ale antthimaka mooxinttana wira aphwanye etthuvo mekhaya. Eyo enooniherya wira awo aniisuupuwela mmansaya paahi. Nave, okathi anipaka aya eyo awo annaakakha akhwaaya wira akhale ohoolo. Moovirikana ni atthu antthimaka mooxinttana, hiyo khaninxinttana. (aGal. 5:26; 6:4) Yoolakela ahu okhaliheryana wira noopowe ni nikele elapo esya ninrowa ahu okhala mahiku otheene. Tivonto, nniimananiha ahu ovarihela muteko miruku sini: “Khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”. (aFil. 2:4) Mooreerela murima vaavo nintthimaka ahu, Yehova onileiherya wira onimwaatthuvela ale anrowa ophiya omukanoni aavahaka okumi woohimala wiirimu akina mparayiisu valaponi. w20.04 28 etti. 10; 29 etti. 12

Imilyau sinceene sa arumeyi a Yehova anrowa woopowa okathi wa maxakha maalupale anookela elapo esya. Atthu awo anrowa woopowa, anookhalana eparakha ya oweha ni maitho aya oxinttiwa okhwa ni ohihimuxiwa wa ibilyau sinceene sa atthu ale akhwiiye. Nkahaya muupuwele ohakalala onrowa okhumelela okathi owo! (Mit. 24:15) Nave atthu otheene anrowa wooniherya ororomeleya moomalela wa Yehova, anooxintta mwa enamuna ekina. Maana anooxintta okhwa aravihiwe aya ni Adamu ni okhala mahiku otheene valaponi. MaKristau otheene ahaana oxukhurela vanceene moolumo oomaaliha voohimya sa ohihimuxiwa Paulo aalepenle awe aKorinto. Nookhalana mathowa manceene anniiriha weemererya miruku sa Paulo aahimmye awe wira nihaana wiimananiha “okelela oholo mmutekoni mw’Apwiya”. (1 aKor. 15:58) Akhala wira nnimwiimananiha ovara muteko owo, nikupaliki ni murima wotheene wira nnookhalana okumi woohakalaliha muhoolo. Okumi ahu onrowa okhala wooloka ovikana nuupuwela ahu. Nto wiimananiha wahu wira nivare muteko wa Apwiya khonrowa okhala wa mahala. w20.12 13 itti. 16-17

Vanikhala ntoko wira yoolepa ya Ezekiyeli 38:10-23; Daniyeli 2:43-45; 11:44–12:1 ni Wisupulula 16:13-16, 21 enilavula etthu emosaru. Akhala wira wiiwexexa wahu ti wooloka, nwehe ele enrowa wiiraneya. Moohipisa nuumala opacerya maxakha maalupale, “mamwene a mulaponi mothene” anrowa wiiraana vanceene. (Wiis. 16:13, 14) Biibiliya onnihimya wiiraana wa maloko awo okhala “Gogi, mwené” oMagogi. (Ezek. 38:2) Gogi onrowa weererya waapwetexa atthu a Muluku ni waamalamaliha mulaponi motheene. Yowoonihiwa Yohani aarina awe ya okathi owo wa sowiiraneya sa apinaatamu, Yohani aahoona maluku maalupale ni oolemela a maralala yaamorela awanani a Muluku. Munamukhaya owo a maluku a maralala, pooti wira onihimmwa muhupi woophukela arumeyi a Yehova anrowa aya olaleyaka tonrowa omwiiriha Gogi waatuphela atthu a Muluku ni ophavela waamalamaliha.—Wiis. 16:21. w20.05 15 itti. 13-14

Ikuru sowaarya sa Muluku, muhakhu mukina nivahiwe ahu ohinooneya. Nnoowerya wuncererya oxukhurela wahu ikuru sowaarya sa Muluku vaavo nnuupuwela ahu itthu ikuru sa Muluku sinivara aya mahiku ala. Ohinatthi Yesu orowa wiirimu, owo aahaaleela awiixutti awe wira: “Nyuwo munimwakhela ikuru s’eroho yowarya enrowa wokhuruwelani; siso munrowa okhala anamon’aka . . . mpakha omalenle elapo”. (Mit. 1:8) Ikuru sa Muluku, soowerya waathukumanya atthu imilyau 8.5 olumwenku wotheene wira akhale arumeyi a Yehova. Nave, arumeyi a Yehova aakhalana murettele mwaha woowi ikuru sa Muluku sinnaakhaliherya okhalana mikhalelo sooloka ntoko ophenta, otteeliwa murima, murettele, ovilela, oreera murima, oloka, waamini, omaala ni wiihiiha. Mikhalelo iyo sotheene siniirela mpantta yoowiima ya ikuru sa Muluku. (aGal. 5:22, 23) Moohaanyiherya, ikuru sowaarya sa Muluku yoovaha yuulupale! w20.05 28 etti. 10; 29 etti. 13

Sookhala itthu sinceene sinnikhaliherya woona wira nnimwaasuwela amusi ni apatthani ahu anrowa ohihimuxiwa. Mwa ntakiheryo, niwuupuwelaka atthu yaahihimuxiwe khalai, vanikhala wira Yehova onrowa waahihimuxa atthu ntoko yaari aya ahinatthi okhwa, niire so, makhalelo a owiitho waya, muupuwelo aya ni enamuna yaalavula aya. Muhiliyale wira Yesu aahilikanyiha okhwa ni orupa, nto okathi atthu ale akhwiiye anrowa aya ohihimuxiwa, anrowa okhalaka ntoko aroovenxiwa yaarupa aya. (Math. 9:18, 24; Yoh. 11:11-13) Vaavo mutthu onvinya awe aarupa awe, onikhala ntoko aari awe ohinatthi orupa. Owo onnikhalana makhalelo ni muupuwelo aarina awe. Nkahaya nwehe ntakiheryo na Laazaro. Owo aahiviriha mahiku maxexe okhwiiye ene, nto erutthu awe yaahipacerya wuntta. Masi okathi Yesu aamuhihimunxe awe, okathi ene yoole Laazaro aahisuweliwa ni axirokorawe, nave owo aahiwuupuwela axirokorawe.—Yoh. 11:38-44; 12:1, 2. w20.08 14 etti. 3; 16 etti. 8

MaKristau oothanliwa ni maKristau a ipwittipwitthi sikina anoolikana. Nto eyo enooniherya wira khiivo ekrupu Muluku enitepexa awe ophenta ovikana ekina, maana ikrupu sotheene sookhalana efaita yinceene vamaithoni vawe. Musuweleke wira Muluku ohaathuma maKristau a ipwittipwitthi sikina ni maKristau oothanliwa ni esisapo emosaru, eyo piiyo, ni ekumi ya Mwanawe onimphentexa awe. Ikrupu iyo soopiili sivirikanne paahi yoolipelela aya. Ikrupu iyo sotheene sihaana ororomeleya wa Muluku ni wa Kristu. (Esal. 31:24) Muhiliyale wira munepa woowaarya wa Muluku onninikhaliherya otheene ahu. Eyo enooniherya wira Yehova onninvaha khula mutthu munepa awe woowaarya moovarihana ni makhalelo awe moohicikha ari ene a ipwittipwitthi sikina wala oothanliwa. Yehova ohaavaha arumeyi awe otheene nlipelelo noohakalaliha na muhoolo. (Yer. 29:11) Wuupuwelela okhwa wa Kristu onnaavaha eparakha maKristau a ipwittipwitthi sikina ni oothanliwa onvuwiha Muluku ni Kristu mwaha wa itthu sotheene apanke aya wira niphwanye ekumi yoohimala. Moohaanyiherya, maKristau a ekeekhai annivaha efaita muthukumano wa Wuupuwelela okhwa wa Yesu Kristu onipakiwa khula mwaakha. w21.01 18 etti. 16; 19 etti. 19

Atthu anceene anrowela muthukumano wa Wuupuwelela arina nlipelelo noorowa okhalaka valaponi. Nto xeeni anrowela aya? Tthiri, awo annirowela muthukumano wa Wuupuwelela ntoko siisaale anrowela aya efesta ya ekasamento ya mpatthani aya. Tthiri awo annirowela efesta eyo ya ekasamento wira yooniherye wira annimphenta ni aniphavela omukhaliherya mpatthani aya owo onithela wala onitheliwa. Mwa enamuna emosaru, maKristau a ipwittipwitthi sikina annirowela muthukumano owo wa Wuupuwelela wira yooniherye wira annimphenta ni annimukhaliherya Kristu ni maKristau makina oothanliwa. Nave-tho, awo annirowela muthukumano owo wira yooniherye oxukhurela waya mukuttho wa Yesu Kristu yoowo onaavaha eparakha ya okhala mahiku otheene valaponi. Etthu yuulupale eniwiiriha maKristau a ipwittipwitthi sikina orowela muthukumano wa Wuupuwelela awo anniiwelela yooruma ya Yesu Kristu. Okathi Yesu aapacerinhe awe Yoolya ya Ohiyu ya Apwiya ni arummwa awe oororomeleya, owo aalenle so: “Muthipeleleke opaka ela mukuupuwelaka miyo”. (1  aKor. 11:23-26) Nlelo maKristau oothanliwa ari ene valaponi, maKristau a ipwittipwitthi sikina khanrowa ohiya orowela muthukumano wa Wuupuwelela. Tivonto, maKristau a ipwittipwitthi sikina aniimananiha aya waalattula atthu anceene orowela muthukumano wa Wuupuwelela. w21.01 17-18 itti. 13-14

Wira ophenta wahu okhale wekeekhai, ohaana wooneya ni miteko. (Mulikanyihe ni Yakobo 2:17, 26) Mwa ntakiheryo, Yehova onniniphenta vanceene. (1 Yoh. 4:19) Nto moolumo oovara murima nimphwanya ahu mBiibiliyani annooniherya wira Yehova onniniphenta. (Esal. 25:10; aRom. 8:38, 39) Masi hiyo ninnikupali wira Yehova onniniphenta ohiya paahi mwaha wa itthu onihimya awe masi mwaha wa itthu onnipakela awe. Yehova aaheemererya wira Mwanawe amphentexa awe ohaawe ni okhwe wira onoopole. (Yoh. 3:16) Nto niireke eyo khenookupalihani wira Yehova onniniphenta vanceene? Ninnooniherya wira ninniphenta Yehova ni Yesu niwiiwelelaka. (Yoh. 14:15; 1 Yoh. 5:3) Yesu ooniruma wira nihaana ophentana mukina ni mukhwaawe. (Yoh. 13:34, 35) Hiyo nihihimyeke ni moolumo paahi wira ninnaaphenta anna ni arokora, masi itthu nimpaka ahu sihaana wooniherya wira ninnaaphenta vanceene.—1 Yoh. 3:18. w21.01 9 etti. 6; 10 etti. 8

Ale anithanliwa ni ikuru sowaarya sa Yehova, aakhalana nlipelelo na olamulela vamosa ni Yesu Momweneni mwa Muluku. Tthiri awo anrowa onweha, olavulana ni oviriha okathi akhalaka ni Yesu. (Yoh. 14:2, 3) Nave ale anrowa okhalaka valaponi anoottottela mureerelo ophenta ni okhapelela wa Yesu. Hata ahirowaka omoona Yesu, awo anrowa okhala apatthani ooloka a Yesu vaavo anrowa aya opuhaka okumi Yehova ni Yesu oniphavela awe wira akhalane. (Yes. 9:5, 6) Vaavo nneemererya ahu nlattulo na Yesu na okhala apatthani awe, ninniphwanya mareeliho manceene. Mwa ntakiheryo, niinaano-va ninnittottela mureerelo ophenta ni nikhaliheryo na Yesu. Muhoolo ninrowa okhalaka mahiku otheene mparayiisu. Etthu yootepa okhala ya efaita, okhala wira ompatthani ahu ni Yesu onninivaha eparakha ya vameekhaaya ya okhalana waataana wooloka ni Yehova, yoowo ori Tiithi awe Yesu. Moohaanyiherya, eparakha yuulupale okhala apatthani a Yesu! w20.04 25 itti. 15-16

Ekarta ela, murummwa Paulo aalepenle maKristau oothanliwa yaakhala oKorinto yaawo yaarowa ohihimuxiwa wira yakhaleke wiirimu. MaKristau ale ‘yahirerihiwa mwa Yesu Kristu [ni] yahihaneliwa okhala owarya’. Nave-tho Paulo onnaahimya “ale-tho akhwiye emwaminiki Kristu”. (1 aKor. 1:2; 15:18; 2 aKor. 5:17) Ekarta awe ekina uupuxeriwe awe olepa, Paulo aahilavula sa ale anrowa okhalihiwa “etthu emosaru ni [Yesu] yowo mokhwani” nave anrowa okhalihiwa “etthu emosaru ni yowo mohihimuwani, volikana n’uhihimuwa wawe”. (aRom. 6:3-5) Nuumala Yesu ohihimuxiwa, owo aahikhala mutthu oomunepani ni aahitthikela wiirimu. Eyo ti etthu enrowa wiiraneya ni atthu otheene ari “vamosá ni Kristu”, eyo piiyo, maKristau otheene athanliwe ni munepa wowaarya wa Muluku. Paulo olempe wira Kristu taapacenrye ohihimuxiwa ntoko “mulipu” aahiiso topacenrye ohihimuwa wa alipa okhwa. (1 aKor. 15:20) Masi Yesu topacenrye ohihimuxiwa ni munepa wowaarya wira aakhele okumi woohimala wiirimu. w20.12 5-6 itti. 15-16

MaKristau otheene oothanliwa anikhwa olelo-va, annihihimuxiwa mowaakuveya wira yakhaleke wiirimu. Murummwa Paulo aahihimya eyo 1 aKorinto 15:51, 52. Nto vaavo anrowa aya ohihimuxiwa maKristau oothanliwa anoohakalala vanceene. Biibiliya onnihimya muteko anrowa aya ovara maKristau oothanliwa wiirimu nuumala ohihimuxiwa “ntoko waphila”. Aahimyaka maKristau awo oothanliwa Yesu aahimmye so: “Ale anrowa oxintta n’uthipelela wettela miteko saka mpakha womalelani, kinimwavaha owerya weiwo kivahiwaka n’Atithi: eyo p’iyo waruma atthu othene, wira ewettiheke n’ikopo ya yuma, yapwexakase ntoko myapu s’oloko”.—Wiis. 2:26, 27. w20.12 12 itti. 14-15

Okhala wira Yesu tori “mulipu” aahiiso topacenrye, murummwa Paulo aahooniherya oratteene wira atthu akina yaamuhihimuxiwa wira yakhaleke wiirimu. (1 aKor. 15:18) Nto arummwa ni atthu akina ari “vamosá ni Kristu” yaarowa ohihimuxiwa wira yakhaleke wiirimu ntoko yiiraneyale aya ni Yesu. Okathi Paulo aalepenle awe ekarta aKorinto, ohihimuxiwa wa atthu ale ari “vamosá ni Kristu’’ yaawo anrowa wiirimu, nlelo khiwaapacenrye. Paulo aahooniherya moota eyo yaarowa aya wiiraneya muhoolo. Owo aahimmye so: “Vano, atthu anohihimuwa khula mutthu ntoko simphwanelawe: òpajerya ti Kristu; ottuli waya, ehihimuweke ale ari a Kristu, nihiku ninrwawe”. (1 aKor. 15:23; 1 aTes. 4:15, 16) Olelo-va hiyo ninkhala okathi wa okhala-vo wa Kristu. Nto arummwa ni maKristau makina oothanliwa, yaahaana olipelela mpakha ophiya okathi wa okhala-vo wa Kristu wira ahihimuxiwe yakhaleke wiirimu. Nave wira akhalihiwe “etthu emosa ni yowo [Yesu] mohihimuwani, volikana n’uhihimuwa wawe”.—aRom. 6:5. w20.12 5 etti. 12; 6 itti. 16-17

Murummwa Paulo aahimya atthu anrowa ohihimuxiwa wira yakhaleke wiirimu, niire so, ale anrowa ovahiwa “erutthu yowarya”. (1 aKor. 15:43, 44) Okathi aari awe valaponi, Yesu aarina erutthu ya apinaatamu. Masi nuumala ohihimuxiwa khurowa wiirimu, Kristu “t’iroho enivaha ekumi”. Mwa enamuna emosaru, maKristau oothanliwa yaarowa ohihimuxiwa ni erutthu yaarowa waakhaliherya okhala wiirimu. Paulo aatthokiherye so: “Sisale sinlattanahu ni mutthu okumihiwe mutthayani, siso-tho nintthuna olattana ni mutthu orwiye wirimu”. (1 aKor. 15:45-49) Ti vooloka wuupuwela wira okathi Yesu aahihimuxiwe awe khavahiwe erutthu ya apinaatamu. Maana Paulo aatthokihenrye so: “Erutthu ni ephome kheniwerya okela Moomweneni mwa Muluku” wiirimu. (1 aKor. 15:50) Tthiri arummwa ni maKristau makina oothanliwa khiyaarowa ohihimuxiwa ni erutthu enintta, niire so, erutthu ni ephome. w20.12 10-11 itti. 10-12

Muluku aahaaruma atthareli akina a eseekulu yoopacerya a Yesu olepa voohimya sa ohihimuxiwa wa atthu anrowa okhalaka wiirimu. Murummwa Yohani aahimmye so: “Hiyo n’àna a Muluku: nto nlelo khinòneya enamuna enrowahu okhala. Nosuwela wira, vanrowaya woneya makhalelo ahu, ninrowa ophwanyiwa nilikanaka ni Yesu”. (1 Yoh. 3:2) Yoolepa ela ennooniherya oratteene wira maKristau oothanliwa khansuwela makhalelo aya wiirimu nuumala ohihimuxiwa. Masi annisuwela wira nuumala ovahiwa etthuvo aya wiirimu, awo anoowerya onweha Yehova. Biibiliya khonihimya itthu sotheene voohimya sa ohihimuxiwa wa atthu anrowa okhalaka wiirimu. Musuweleke wira maKristau oothanliwa anrowa okhala vamosa ni Kristu vaavo onrowa awe ‘wapwetexa makhulupale othene n’ikuru sothene n’uwerya wothene’ eyo enrowa ohela muhina “nwanani onrowa okiserya opwetexiwa, okhwá”. Wanikisa waya, Yesu ni ale anrowa olamulelaka vamosa ni yena anrowa onvahererya itthu sotheene Yehova. (1 aKor. 15:24-28) Tthiri okathi owo onrowa okhala woohakalaliha! w20.12 8 etti. 2

Makristau otheene oororomeleya, ahirina nlipelelo na orowa wiirimu nave annilipelela ohihimuxiwa. Biibiliya onihimya wira murummwa Paulo ni maKristau makina arina nlipelelo na orowa okhalaka wiirimu, aniirela mpantta “ohihimuwa woopacerya”. (aFil. 3:11) Eversiikulu ela, ennooniherya wira yaamukhala enamuna ekina ya ohihimuxiwa yaarowa wiiraneya muhoolo. Eyo ennivarihana ni ele Yobi aahimmye awe voohimya sa etthu enrowa wiiraneya muhoolo. (Yobi 14:15) Nto ale ari vamosa ni Kristu okathi wa okhala-vo wawe anrowa wiiraka ari ene wiirimu vaavo Yesu onrowa awe opwetexa ikuvernu sotheene, okhulupale wotheene ni owerya wotheene. Nave “nwanani onrowa okiserya opwetexiwa, okhwá”. Ale anrowa ohihimuxiwa wira yakhaleke wiirimu, khanrowa-tho okhwa. (1 aKor. 15:23-26) Ale anrowa okhalaka valaponi nlipelelo naya naahihimmwa ni murummwa Paulo ntoko nnoona ahu moolumo a yoolepa ya olelo. Okhala wira wiirimu khanrowa atthu oohixariya, moolumo ala anooniherya wira onookhala ohihimuwa valaponi. w20.12 6-7 itti. 18-19

Woonasa wene, nyuwo munniikoha so: “Kinrowa osuwela sai wira Yehova ookilevelela?” Akhala wira nyuwo muniikoha siiso, eyo enooniherya wira muhaakhula nikoho nanyu. Iyaakha sinceene sivinre, erevista A Sentinela yaahimmye so: “Pooti wira hiyo naamakela opaka itthu soohiloka, nto nnuupuwela wira khinaarowa owerya ohiya opaka itthu iyo soohiloka. . . . Muhuupuweleke wira mpanke itampi Yehova ohinwerya awe woolevelelani. Maana Satana oniphavela wira muupuweleke wira Yehova khonrowa woolevelelani. Akhala wira nyuwo munnixanka ni munniriipiwa murima mwaha wa itthu iyo soohiloka mwaapanke anyu, eyo enooniherya wira nyuwo khahiyo mwa mutthu ootakhala ni Yehova onimoolevelelani. Nto mwiiyeviheke ni muhihiye onvekela Yehova wira ooleveleleni ni wookhaliheryani okhalana murima wooloka ni ohiya opaka itthu iyo soohiloka. Ohinatthi okhala muKristau, murummwa Paulo aahipaka itampi sinceene suulupale. Owo aahisuwela wira aahipaka itthu soohiloka. (1 Tim. 1:12-15) Masi owo aanikupali ni murima wotheene wira aamuleveleliwa mwaha wa mukuttho wa Yesu, maana Yesu aahivaha okumi awe wira omoopole Paulo. Vannooneya wira Paulo khaamakela wiivaha nthowa. Masi aaniimananiha ovara muteko wa Yehova. w20.11 27 etti. 14; 29 etti. 17

Satana onnirumeela itthu soohiloka wira oniirihe opaka etampi. Nto nnoonela sai itthu iyo? Musuwele wira, ti vookhweya mutthu wuupuwela wira itthu iyo khasinrowa omwiiriha opaka etthu yoohiloka. Mwa ntakiheryo, mutthu pooti wuupuwela so: ‘Kinoona wira nkinrowa okumihiwa mmulokoni mwaha woopaka etthu ela, maana khetempe otthekeya’. Wupuwela mwa enamuna eyo ti wootakhala. Nave ti vooloka wiikoha makoho ala: ‘Kiireke Satana onirumeela etthu ela wira okawanye murima aka? Kiireke kapaka etthu yoohiloka nkinrowa oveehiha nsina na Yehova? Kiireke opaka etthu ela enookaataaniha ni Muluku wala enrowa ohonona waataana waka ni yena?’ Wuupuwelela makoho ala, onimookhaliheryani vanceene. Okathi munuupuwelela anyu, munvekeleke Muluku ankhili wira mwaakhule moovarihana ni ele eri vamurimani vanyu. Musuweleke wira opaka eyo enimookhapelelani vanceene. Nave enimookhaliheryani okhootta soweeha, ntoko Yesu yoowo aakhoottale vaavo aamulenle awe Satana wira: “Khuma va, Satana!” (Math. 4:10) Muupuweleke wira murima wookawanyeya khorina efaita yinceene. w20.06 12-13 itti. 16-17

Wiiyeviha onninikhaliherya weemererya malamulo a Yehova. Nave onninikhaliherya woona wira okathi wotheene Muluku oniphavela mureerelo ahu. (aEef. 4:22-24) Wiiyeviha onninikhaliherya ohela nipuro noopacerya yootthuna ya Yehova ohiya yawihu ni waathokorerya atthu akina okhala aalupale onivikana hiyo. Niira siiso, nnookhalana waataana wooloka ni Yehova vamosa ni anna ni arokora. (aFil. 2:3) Akhala wira khanniivaha ephoole, nnoohapuxiwa ni atthu oowiixinnuwiha ni oowiitthuna a olumwenku ola wa Satana. Vanikhala ntoko wira eyo yahiwiiraneela maKristau makina a eseekulu yoopacerya, maana murummwa Paulo aahaalepela aRoma wira: “Kinohimeryani nyuwo othene, mutthu ti mutthu wira: ahikhalé onìsona ovikana simphwanelawe, nto mwisupuwele muttharihaka miruku”. Paulo aanisuwela wira ti vooloka wiivaha efaita. Masi nihaana okhalana moonelo wooloka. Nto wiiyeviha tonrowa onikhaliherya okhalana moonelo owo wooloka, nave onoonikhaliherya ohiixinnuwiha. w20.07 2 itti. 1-2

Mahiku a Mwene Asa okathi wa murettele waahimala. Muttitthi muulupale wa anakhotto yaavikana emilyau emosa yaahirwa akhumaka wEthiyopia. Awo yaahooleliwa ni Zerahi. Nto Zerahi aanikupali wira anakhotto awe yanwerya opwetexa muttetthe wa oYuda. Masi Asa khaaroromenle nummuru na anakhotto awe. Masi aamuroromenle Muluku awe, Yehova. Asa avekenle oriki: “Nyuwo Apwiya Muluku ahu, munikhaliherye! Tthiri ti nyuwo ninlipanahu: ni nsina nanyu ti nirwiyahu womola muttitthi ula w’atthu”. (2 Wah. 14:10) Nnaamwi anakhotto a wEthiyopia yahaareere, Mwene Asa aanisuwela wira Yehova aamurumeela ikuru sawe wira aakhaliherye atthu awe. Tthiri Yehova ahaakhaliherya atthu awe. Maana ahaakhaliherya waapwetexa anakhotto a wEthiyopia. (2 Wah. 14:7-12) Khaninsuwela itthu sotheene sinrowa onikhumelela muhoolo. Masi ninnisuwela wira murettele arumeyi a Muluku arina aya olelo-va, khonrowa okhala wa mahiku otheene. Maana Yesu aahaaleela awiixutti awe wira: “Maloko othene animonyokhani”.—Math. 24:9. w20.09 17-18 itti. 14-16

Khuuvo mutthu oniphavela oruwaniwa. Masi awanani ahu anniruwana aphavelaka oninyoonyiha mwaha wa itthu anihimya aya, nto okathi owo hiyo pooti okhulumuwa. (Mir. 24:10) Nto nooneleke sai vaavo ale annilupattha anniruwana aya? Nimutakihaka Paulo, nihaana ‘otteliwa murima . . . naruwaniwaka’. Mwaha wa xeeni? Mwaha woowi vaavo atthu anniveeha aya ni annilupattha aya enooniherya wira naatthareli eekeekhai a Yesu. (1 Ped. 4:14) Nave muhiliyale wira Yesu aahihimya wira atthareli awe yaarowa olupatthiwaka. (Yoh. 15:18-20) MaKristau a eseekulu yoopacerya yaanilupatthiwa. Okhuma okathi ole, atthu otheene yaahapuxiwe ni soolema sa aKriki yoona wira maKristau yaari atthu oohisoma ni ahirina efaita. Nave eriyari ya aYuda maKristau yaathokoreriwa okhala “atthu yahasomme” ntoko murummwa Pedru ni Yohani. (Mit. 4:13) Atthu anceene yaaniwoona maKristau okhala atthu oohilipa. Mwaha woowi awo khayiirela mpantta myaha sa epoliitika ni yaanikhootta orowa owana ekhotto. Nto atthu a mmuttettheni khiyaattittimiha ni khiyaaphavela. Niireke maKristau a eseekulu yoopacerya yaaheemererya okhulumuliwa ni moonelo woohiloka wa atthu ale yaalupattha? Nnaari. w20.07 14-15 itti. 3-4

Murummwa Yohani aanaaphenta vanceene axinnawe oowaamini ni aaphavela wira akhaleke saana momunepani. Eyo ennooneya ni miruku aavanhe awe iwarakha tthaaru uupuxeriwe awe olepa ni Muluku. Ti voohakalaliha osuwela wira aathanliwa alopwana ni athiyana wira yalamuleleke ni Yesu wiirimu! (1 Yoh. 2:27) Ti vooloka ovarihela muteko ni murima wotheene miruku onivanhe awe. Xontte, muhihiye weettela ekeekhai mmwiiwelelaka Yehova mwa itthu sotheene munipaka anyu. Musomeke ni muroromeleke Nuulumo na Muluku, Biibiliya. Mulipihe omwaamini wanyu Yesu. Mukhootteke sowiixuttiha sa apinaatamu ni sa anammwareya. Muhimorele muraakho wa okhalana mirima miili ni omakela opaka etampi. Mukhaleke moovarihana ni malamulo a xariya a Yehova. Nave mwaakhaliherye anna ni arokora ohihiya weettela ekeekhai, mwaaleveleleka ale aniwiirelani itthu soohiloka ni waakhaliherya vaareerelaka. Niira siiso, hata nrina ene mixankiho, nnoowerya ohihiya weettela ekeekhai. w20.07 24-25 itti. 15-17

Moophenta Yehova onvaha opuro mmulokoni khula murumeyi awe oororomeleya. Nnaamwi khula mutthu mmulokoni orina ene muritti awe, otheene ahu nookhalana efaita ni nihaana okhaliheryana mukina ni mukhwaawe. Murummwa Paulo ohooniherya oratteene wira khuuvo murumeyi a Yehova okhanle onweha mukhwaawe onahimya wira: “Miyo nkinophavelani”. (1 aKor. 12:21) Naaphavelaka wira okhale murettele mmulokoni, nihaana ovahana efaita mukina ni mukhwaawe ni ovara mowiiraana. (aEef. 4:16) Vaavo otheene ahu ninvara ahu mowiiraana, khula mutthu onnoona wira onniphentiwa ni muloko onnilipa vanceene. Axitokweene otheene mmulokoni anithanliwa ni munepa wootteela wa Yehova. Hata vari siiso, khula mutokweene ookhalana mikhalelo sawe ni itthu onsuwela awe. (1 aKor. 12:17) Akina athanliwe niinaano wira akhale axitokweene, nto kharina sookumanana sinceene. Axitokweene akina khaniwerya opaka itthu sinceene ntoko khalai mwaha wa owereyasiwa aahiiso mwaha wa wuuluvala. Hata vari siiso, ohikhale nnakhala mutokweene mmosa okhanle onweha mutokweene mukhwaawe onahimya wira: “Miyo nkinophavelani”. Ohiya-vo, khula mutokweene ohaana otthara oratteene malakiheryo a murummwa Paulo ari aRoma 12:10. w20.08 26 itti. 1-2; 27 etti. 4

Yehova onninivaha malakiheryo wira neetteke ephiro ya okumi orumeelaka mpantta wa valaponi wa mutthenkeso awe. Moohaanyiherya, okathi mutthenkeso wa Muluku onitthokiherya awe mwa enamuna esya eversiikulu emosa ya mBiibiliyani ni sowiixuttiha sikina, wala onnivaha awe malakiheryo a mweettelo wooloka, hiyo ninneemererya ni ninnivarihela muteko mookumini mwahu. Masi ankhi okathi mutthenkeso wa Yehova onipaka awe marukunuxo annivara, ntoko otumiha Empa ya Omwene naathukumana ahu? Nnoovikaniha ohakalala akhala wira khaninliyala wira nninvarela Yehova ni okupali ni murima wotheene wira owo onneettiha mutthenkeso awe. (aKol. 3:23, 24) Mwene Davidi oonivaha ntakiheryo nooloka vaavo aavanhe awe musurukhu awe wira etekiwe etemplo. Owo aahimmye so: “Miyo ka pani? Walá atthu aka t’apani, wira niwerye wovahani itthu iya sothene votthuna wahu? Itthu sothene sinkhuma mwa nyuwo: vano hiyo, nimanlene wakhela mmatatani mwanyu, ninnovahani-tho nyuwo”. (1 Wah. 29:14) Nto vaavo ninvaha ahu musurukhu ahu nimmuttikiherya Yehova itthu onivanhe awe. Hata vari siiso, Yehova onnihakalala vanceene vaavo ninviriha ahu okathi ahu, ikuru sahu ni ninvaha ahu musurukhu ahu wira nikhaliherye muteko awe.—2 aKor. 9:7. w20.11 22-23 itti. 14-16

Etthu eniwiiriha Anamoona a Yehova okhumela saana khahiyo nummuru na atthu naakhalihenrye ahu okela mmutthenkesoni mwa Yehova. (Luka 8:11-15) Akhala wira nnoovikaniha ovilela nivaraka muteko wowaapaka awiixutti, Yehova onoonithokorerya okhala atthu anikhumela saana. Mwaha wa xeeni? Mwaha woowi ninnimwiiwelela Yena ni Mwanawe. (Mar. 13:10; Mit. 5:28, 29) Hiyo ninnitumereriwa wiimananiha olaleerya vanceene mahiku ala. Mwaha wa xeeni? Mwaha woowi omala wa olumwenku onnitepa waattamela! Nto ohanle okathi vakhaani wira noopole ikumi sa atthu. Nto muhipise ni muhilipeleleke ophiya okathi wooreerela wala wooloka wira mpacerye wiirela mpantta muteko ola wootepa otthuneya onivariwa olelo-va. Muhaana ottottela mureerelo okathi ola wira mulipihe yoolakela anyu ya olaleerya, wiixutta itthu sinceene sa mBiibiliyani ni wiimananiha. Mukhale vamosa ni atthu anivikana imilyau 8, yaawo ari atothi aatthu, mwiira siiso munoophwanya ohakalala onrwa wa Yehova. (Neh. 8:10; Luka 5:10) Mpakeke itthu sotheene muniwerya anyu wira mwiirele mpantta muteko woolaleerya mpakha wanikisa. w20.09 7 itti. 18-20

Niheemererye ohapuxiwa ni itthu sa werutthuni. “Wototha wa muhakhu” pooti ohonona omphenta wahu Yehova ni Biibiliya. Nave pooti oniiriha ohiphavela waalaleerya atthu akina ihapari sooreera. (Math. 13:22) Akhala wira ninniphavela okhapelela ele Yehova onroromenle awe, nihaana opaka etthu mowaakuveya vaavo enikhumelela aya etthu yootakhala. Nihaana osuwela etthu yoopaka sakhumelela itthu soohiloka TV, munternetini, ilatarato sintumererya orupihana woohiloka, otakhala aahiiso myaha sa anammwareya. Akhala wira nnimwiilokiherya niinaano-va, nnoowerya opaka etthu mowaakuveya, wiikhapelela momunepani ni nnoovikaniha okhala atthu ooloka vamaithoni va Yehova. (Esal. 101:3; 1 Tim. 4:12) Nihaana osuka oratteene itthu sa faita nivahiwe ahu ni Yehova, ntoko ikeekhai sa faita sa mBiibiliyani ni eparakha ya owiixuttiha atthu akina. Niira siiso, nnoophwanya itthu sinceene sooloka ntoko okumi wooloka, murima wooloka ni ohakalala mwaha wowaakhaliherya atthu akina omusuwela Yehova. w20.09 30 itti. 16-19

Niireke nyuwo moopatisiwa? Akhala wira ti siiso, okathi mwaapatisiwa anyu, nyuwo mwaahiwooniherya atthu otheene wira munnimwaamini Yehova ni muniphavela omurumeela yena vamosa ni mutthenkeso awe. Olelo-va, Yehova onneettiha mutthenkeso awe mwa enamuna enooniherya omutthu awe, soolakela sawe, malamulo ni malakiheryo awe a xariya. Vano nrowe niwehe mikhalelo miraru sa Yehova sinooneya mmutthenkesoni mwawe. Woopacerya, “Muluku khanathanla atthu”. (Mit. 10:34) Ophenta woomwiiriha Yehova onivaha Mwanawe mmoseene wira “awòpole atthu othene”. (1 Tim. 2:6; Yoh. 3:16) Nave Yehova ohaaruma atthu awe wira alaleyeke ihapari sooreera sa Omwene. Eyo ennaakhaliherya atthu otheene aniphavela ottottela mureerelo mukuttho wowoopola wa Yesu wira yoopowe. Wa nenli, Yehova Muluku ootthokiheya ni a murettele. (1 aKor. 14:33, 40) Nto atthu otheene animukokhorela ahaana okhala ootthokiheya ni a murettele. Wa neeraru, Yehova ‘Mwixuttihi ahu’ Muulupalexa. (Yes. 30:21) Tivonto mutthenkeso awe oniimananiha awe owiixuttiha atthu Nuulumo nawe, okhale mmulokoni wala muteko woolaleerya. w20.10 20 itti. 1-3