Maio

Okathi aari awe mmiravo, Yesu aahithanla owiiwelela anamuyari awe. Owo khonakhootte malakiheryo aavahiwa awe ni anamuyari awe, ohimyaka wira aahikhalana ankhili waavikana anamuyari awe. Moohaanyiherya, Yesu aanivara oratteene muteko awe wookhala mwaana oopacerya oyariwa. Tthiri owo aahiimananiha wiixutta muteko wa okalapintero waavariwa ni tiithi awe wira oweryeke ophwanya musurukhu wira aakhaliheryeke amusi awe. Woonasa wene, anamuyari a Yesu yaahimuleela moota aayariwe awe mwa mwiiriirya ni itthu malaikha a Muluku yaahimmye aya. (Luka 2:8-19, 25-38) Masi Yesu khaikhuraanale uupuwelaka wira itthu iixuttihiwe awe saahiphiyerya, nto aahisoma mmensawe Soolempwa. Ninsuwela sai wira Yesu aanisiveliwa osoma Nuulumo na Muluku? Ninnisuwela eyo mwaha woowi, nlelo ori ene mmiravo awiixuttihi a oYerusalemu “yanithamala, mana Yesu aniwiwa n’usuwela, anakhula ni miruku”. (Luka 2:46, 47) Orina ene iyaakha 12 paahi, Yesu aahooniherya oratteene wira Yehova aari Tiithi awe.—Luka 2:42, 43, 49. w20.10 29-30 itti. 13-14

Okupali ohihimuxiwa wa Yesu ti etthu enlipiha nroromelo nahu na ekristau. Wanipacerya ya ekapiitulu 15 ya 1 aKorinto, murummwa Paulo onnittittimiherya iponto tthaaru. Iponto sene tiiya: (1) “Kristu okhwenle itampi sahu”. (2) “Krist’uwo ahivithiwa”. (3) “Khuhihimuwa mokhwani mmurottoni mwaya, ntoko silempwaya”. (1 aKor. 15:3, 4) Ontaphulela exeeni okhwa, ovithiwa ni ohihimuxiwa wa Yesu Kristu? Profeta Yesaya aahihimya vahinatthi wira Mesiya aarowa “òkumihiwa mulaponi mw’atthu akumi” ni “òvithiwa poromosa n’atakhali”. Masi khahiyo seiyo paahi. Maana Yesaya aahihimya vahinatthi wira Mesiya amukuxa “sottheka s’atthu” anceene. Nto Yesu aahipaka eyo vaavo aavanhe awe ekumi awe ntoko mukuttho wira onoopole. (Yes. 53:8, 9, 12; Math. 20:28; aRom. 5:8) Tivonto okhwa, ovithiwa ni ohihimuxiwa wa Yesu Kristu onninikupaliha wira nnimoopoliwa etampi ni okhwa. Nave nnimwaaweha ahihimuxiwaka amusi ahu ni apatthani ahu akhwiiye. w20.12 2-3 itti. 4-6; 5 etti. 11

Murummwa Paulo aalaleerya musinagoga mwa aYuda. Mwa ntakiheryo, esinagoga ya oTesalonika, Paulo “ahiviriha-wo isábadu ttharú, alavulanaka aYud’awo mwaha wa Solempwa sa Muluku”. (Mit. 17:1, 2) Vanikhala ntoko wira Paulo khaakhalana mixankiho okathi aalaleerya awe musinagoga. Maana aahuuwale etthoko ya aYuda. (Mit. 26:4, 5) Paulo aanisuwela makhalelo a aYuda, tivonto vahaamuxankiha aya waalaleerya. (aFil. 3:5) Nuumala waatthyawa awanani awe oTesalonika ni oBereya, Paulo aahiphiya wAthena. Nto aahitthikela ‘olavulana aYuda n’amalapo yamuttittimiha Muluku’. (Mit. 17:17) Masi okathi aalaleerya awe mapuro oowaatta atthu, Paulo aalavula ni atthu oovirikana ni ale aalavulana awe musinagoga. Maana eriyari ya atthu yanwiriyana mapuro oowaatta atthu, yaahikhala mafiloosofu ni Amalapo yaawo yuupuwela wira muhupi wa Paulo waari “mwixuttiho . . . wa nanano”. Awo yaahimya wira: “Sikina sinnilèlanyu ti sotikiniha”.—Mit. 17:18-20. w20.04 9 itti. 5-6

Muhuupuweleke wira khamurina efaita akhala wira munniimananiha oxintta soovonya sanyu. Muhiliyale wira khuuvo pinaatamu ori oomalela ohoolo wa Muluku. Maana otheene ahu ninniphavela omoreliwa ikharari ni Muluku orumeelaka mukuttho wa Mwanawe. (aEef. 1:7; 1 Yoh. 4:10) Nave anna ni arokora anoowerya onilipiha! Awo anooniwiriyana oratteene vaavo nimphavela ahu ovaanela ni olavula moolumo oolipiha. (Mir. 12:25; 1 aTes. 5:14) Murokora a oNigeria oniihaniwa Joy aahiwanana okhulumuwa, owo onihimya so: “Kiireke kanwerya ovilela kihikhaliheriwe ni anna ni arokora? Tthiri anna ni arokora aakooniherya wira Yehova onnaakhula mavekelo aka. Awo aakiixuttiha moota wowaalipiha atthu akina akhulumunwe”. Muhiliyale wira okathi mukina anna ni arokora pooti ohisuwela wira ninniphavela olipihiwa. Nto vaavo ninkhalana ahu muxankiho nihaana waaleela anna ni arokora oolipa momunepani wira anikhaliherye. w20.12 23-24 itti. 7-8

Okhala wene, etthu yoopacerya nimpaka ahu wira nlipihe ompatthani ahu ni mutthu, ori oviriha okathi ni mutthu owo. Vaavo munivaanela anyu muleelanaka mixankiho sanyu, muupuwelo ni itthu sookhumelenleni munnikhala apatthani oolipa. Masi okathi mukina khivanikhweya okhala apatthani a Yesu, maana sookhala mixankiho. Muxankiho woopacerya: Hiyo khanitonko omoona Yesu. Ohiya hiyo paahi, maKristau manceene yaakhala okathi wa arummwa khiyaatonko onweha Yesu. Hata vaari siiso, murummwa Pedru aahimmye so: “Nyuwo munnimphenta, munamwi muhimonne: munnimwamini, nlelo muhimonaka”. (1 Ped. 1:8) Nave-tho, hiyo khaninwerya olavula ni Yesu. Musuweleke wira okathi ninvekela ahu, hiyo ninlavula ni Yehova ohiya ni Yesu. Ekeekhai wira ninvekela mwa nsina na Yesu, masi khaninlavula ni yena. Nave mwaneene Yesu, khoniphavela wira ninvekeleke. Mwaha wa xeeni? Mwaha woowi, nivekelo enamuna emosa ya okokhorela ni mutthu onireerela okokhoreliwa ti Yehova paahi. (Math. 4:10) Hata vari siiso, nihaana omphenta Yesu. w20.04 20 itti. 1-3

Ale yaawiirela mpantta axooku ootthimaka oGresia wa khalai yaahaana ovilela mixankiho ntoko okhulumuwa ni woona owereya. Masi otheene aya yaaroromela oterenari ni ikuru saya. Ntoko atthu awo yaatthimaka mooxinttana, nihaana oterenari moota wootthimaka. Masi moovirikana ni atthu ale anitthimaka mooxinttana, hiyo nookhalana eparakha ya vameekha aya. Maana Yehova onninivaha ikuru ni onninikhaliherya okathi wotheene. Akhala wira ninnimuroromela Yehova, owo onninileiherya oniixuttiha ni onlipiha! Murummwa Paulo aahikhalana mixankiho sinceene. Ohiya paahi oruwaniwa ni olupatthiwa, ikwaha sikina Paulo aanikhulumuwa ni aanivilela ele aahimmye awe okhala “ohawa mwerutthuni”. (2 aKor. 12:7) Masi Paulo kheemerenrye mixankiho iyo simwiirihaka ohiya omurumeela Yehova, ohiya-vo, owo aanimuroromela. (2 aKor. 12:9, 10) Okhala wira Paulo aahikhalana moonelo wooloka, Yehova aahimukhaliherya ovilela mixankiho sotheene. w20.04 29 itti. 13-14

Nookhalana eparakha yuulupale ya ovara “muteko vamosá ni Muluku”, Yesu ni malaikha. (2 aKor. 6:1) Tthiri vaavo ninlaleerya ahu, ninnivara vamosa ni atthu awo. Olavulaka sa muteko awe ni ale aavarana awe muteko, murummwa Paulo aahimmye so: “Ninvara vamosá . . . [ni] Muluku”. (1 aKor. 3:9) Nave vaavo ninlaleerya ahu, ninvara muteko vamosa ni Yesu. Muupuweleke wira, nuumala Yesu waaruma atthareli awe waapaka awiixutti “atthu a maloko othene”, Yesu aalenle so: “Miyo kinokhala ni nyuwo”. (Math. 28:19, 20) Ankhi malaikha? Niireke anninikhaliherya naalaleeryaka? Aayo. Tthiri, hiyo ninnixukhurela vanceene okhaliheriwa ni malaikha waalaleerya atthu “èhapari yorera . . . atthu ankhala mulaponi-mu”! (Wiis. 14:6) Exeeni ninwerya ahu opaka nikhaliheriwaka ni Yehova, Yesu ni malaikha? Vaavo nnaala ahu muhupi wa Omwene, sinnimela vamurimani va atthu akina ni sinninnuwa oratteene. (Math. 13:18, 23) Tani onikhaliherya ikeekhai iyo wunnuwa ni okumiherya mihokorokho? Yesu onnitthokiherya eyo yoolepa ya olelo. w20.05 30 itti. 14-15

Anamuyarai anceene olelo-va annimwalana. Hata akhalaka etthoko emosa awo anoona wira khanisuwelana. Mulopwana mmosa onvaha miruku itthoko ohimmye so: “Maama, paapa ni anamwane khanivaanela mukina ni mukhwaawe. Okathi wotheene animurumeela komputatore, ataablet ni atelefoni wala oweetta axooku. Nto hata akhalaka etthoko emosa-ru awo khanisuwelana oratteene”. Hiyo, khanimphavela otakiha mukhalelo wa atthu a olumwenku ola yaawo ahinooniherya ophenta. Ohiya-vo, hiyo nihaana wiimananiha waaphenta atthu a etthoko ahu vamosa ni anna ni arokora a mmulokoni. (aRom. 12:10) Ophentana ntoko axinna ontaphulela exeeni? Moolumo oowi ophentana ntoko axinna, onitaphulela okhalana waataana wooloka ni ophentana mukina ni mukhwaawe ntoko nnaaphenta ahu amusi ahu. Enamuna eyo ya ophenta, nihaana owooniherya anna ni arokora a mmulokoni. Ophentana wekeekhai onninikhaliherya waataana ni khula mutthu mmulokoni onnimurumeela Yehova moohakalala.—Mik. 2:12. w21.01 20 itti. 1-2

Ekiipa emosa yiiraanale pooti okanyari okathi wa xooku moovirikana ni ekiipa yookawanyeya. Murima anyu pooti okhala ntoko ekiipa enkanyari akhala wira muupuwelo, soophavela, ni moonelo anyu ohiiraana wira mmurumeeleke Yehova. Xontte, muhiliyale wira Satana oniphavela okawanya murima anyu. Nave oniphavela wira moonelo, soophavela ni muupuwelo anyu owaneke ni malamulo a Yehova yaawo nyuwo munisuwela anyu. Nto wira muxintte, nyuwo muhaana okhalana murima mmosa-ru. Mwiira siiso, munoowerya omukokhorela Yehova mwa enamuna yooloka. (Math. 22:36-38) Muhikhala-khale mmweemereryaka Satana okawanya murima anyu! Munvekeleke Yehova ntoko Davidi anvekenle awe oriki: ‘Mukivahe murima mmosaru, wira kòve nsina nanyu’. Mwiimananiheke okhala moovarihana ni nivekelo nla. Khula nihiku, okathi munipaka anyu soothanla sikhale saamukhaani wala suulupale, mooniheryeke wira munnoova ni munnittittimiha nsina noowaarya na Yehova. Mwapaka eyo, nyuwo munimooniherya wira mwa Namoona a Yehova. (Mir. 27:11) Othene ahu nnoowerya ohimya etthu emosa-ru aahimmye awe Mikeya oriki: ‘Vano hiyo nnowettela Apwiya Muluku ahu mpakha mahiku othene’.—Mik. 4:5. w20.06 13 itti. 17-18

Otuphela wa mwene a onorte okhaliheriwaka ni anamalamulela a ilapo sikina, onoomwiiriha Muluku Oowerya Sotheene onanariwa vanceene. Nto enrowa opacerya ekhotto ya Armagedoni. (Wiis. 16:14, 16) Okathi owo, mwene a onorte ni maloko makina ammukhaliherya Gogi a omagogi anrowa opwetexiwa ni “khavo ontthuna omukhaliherya”. (Dan. 11:45) Eversiikulu enittharelana ya yowiiraneya ya Daniyeli enninivaha itthu sikina sa moota mwene a onorte ni ale animukhaliherya anrowa aya opwetexiwa ni moota ninrowa ahu woopoliwa. (Dan. 12:1) Eversiikulu ela enitaphulela exeeni? Mikhayeli, nsina nikina na Mwene ahu Kristu Yesu. Owo ‘okhumelela’ wira owaakihe atthu a Muluku okhuma mwaakha wa 1914, mwaakha yoowo Omwene awe opacenrye aya ovara muteko wiirimu. Moohipisa, Mikhayeli “onokhumelela” eyo piiyo, onrowa waapwetexa awanani awe otheene okathi wa ekhotto ya Armagedoni. Ekhotto eyo enrowa okhala yookiserya, okathi yoowo Daniyeli onihimya awe okhala “mahiku òvelavela wulupale” ahitonko okhumelela.—Wiis. 6:2; 7:14. w20.05 15-16 itti. 15-17

Okhala wira Yosefe aari epottha ni muhoolo mwaya aahiriheliwa mukhatteya, khiivo etthu aakhanle awe oopaka wira orukunuxe muxankiho awe. Nto etthu xeeni yaamukhalihenrye okhalana moonelo wooloka? Ohiya owehexexa mixankiho sawe ni itthu ahaawerya awe opaka, Yosefe aanivara saana miteko aavahiwa awe. Yosefe aaniimananiha omusiveliha Yehova, mutthu aari ootepexa otthuneya mookumini mwawe. Nto Yehova aahikhaliherya wira itthu sotheene Yosefe aapaka awe sikhumeleke saana. (Maph. 39:21-23) Yowiiraneya ya Yosefe enninuupuxerya wira olumwenku ola ti wootakhala ni wira atthu akina pooti onithokorerya moohixariya. Nave munna wala murokora pooti oniwereiha murima. Masi akhala wira nnonwehexexa Yehova okhala Mwala ahu wala Ntthyawelo nahu, khaninrowa okhulumuwa nnakhala ohiya omurumeela. (Esal. 62:7, 8; 1 Ped. 5:10) Muupuweleke wira Yehova aahimwiiriha Yosefe oloha itthu sa vameekhaaya okathi aarina awe iyaakha 17. Vannooneya wira Yehova onnaaroromela oratteene amiravo animurumeela. Olelo-va, amiravo anceene khanihiya ororomeleya wa Muluku hata arowaka otthukweliwa mukhatteya ntoko Yosefe.—Esal. 110:3. w20.12 16 etti. 3; 17 itti. 5, 7

Murummwa Pedru ni Yohani yaanoona okhala eparakha olupatthiwa mwaha woomutthara Yesu ni owiixuttiha atthu akina voohimya sa Yesu. (Mit. 4:18-21; 5:27-29, 41, 42) Awiixutti ale khayuuleliwa muru. Hata atthu a mmuttettheni yahaattittimiha maKristau ale a eseekulu yoopacerya, awo yaahimananiha waakhaliherya atthu akina. Mwa ntakiheryo, iliivuru sikina sa mBiibiliyani saalempwale ni maKristau oowiiyeviha ni khiyaahiyale waakhaliherya atthu imilyau sinceene. Nave Omwene yaalaleya aya, vano onilamulela wiirimu ni moohipisa onirowa waalamulelaka apinaatamu otheene valaponi. (Math. 24:14) Masi eKuvernu yuulupale ya oRoma yaalupattha maKristau khekhanle mpakha olelo-va. Maana maKristau ale oororomeleya mamwene wiirimu. Masi atthu otheene yaalupattha ahookhwa, akhala wira anoohihimuxiwa, awo anrowa weettihiwaka ni Omwene alamuleliwaka ni atthu yaale yaalupattha aya.—Wiis. 5:10. w20.07 15 etti. 4

Nto Abrahamu aaniwaamini vanceene anatiri a Muluku vanakhala ntoko wira aanimoona ole Othanliwe wala Mesiya wira okhale Mwene a Omwene wa Muluku. Tivonto Yesu aalenle awe aYuda a mahiku awe wira: “Abrahamu, tith’ihu, ahitteliwa murima aroromelaka wona nihiku naka: ohòna tthiri, khusareya otteliwa murima”. (Yoh. 8:56) Vannooneya wira Abrahamu aanisuwela wira osuulu awe waamwiirela mpantta Omwene yoowo onikhaliheriwa ni Yehova. Nave Abrahamu aanilipelela okathi Yehova aarowa awe omaliherya yooleiherya awe. Abrahamu oonihenrye sai wira aanilipelela epooma wala Omwene opakiwe ni Muluku? Yoopacerya, Abrahamu khiirela mpantta omwene wa valaponi. Owo aamakela othaamela mapuro makina ni khaakhaliherya ikuvernu sa apinaatamu. Nave, Abrahamu kheerenrye opaka omwene awe. Ohiya opaka eyo, Abrahamu aanimwiiwelela Yehova, olipelelaka wira Muluku aamwaamaliherya anatiri awe. Mwaha woopaka eyo, Abrahamu aahooniherya wira aanimwaamini vanceene Yehova. w20.08 3 itti. 4-5

Yehova ooleiherya wira Mparayiisu khuuvo onrowa ohimya wira: “Miyo ki muretta”. (Yes. 33:24) Eyo enooniherya wira ale anrowa ohihimuxiwa anrowa okhalana irutthu sooloka ni ikumi. Masi, nlelo khanrowa okhala oomalela. Vaakhanle wira yaarowa okhala oomalela, pooti wira amusi ni apatthani aya khiyaarowa waasuwela. Vanikhala ntoko wira okathi wa Olamulelo wa Yesu Iyaakha Ekonto Emosa, apinaatamu anrowa okhala oomalela vakhaani-vakhaani. Nto wanikisa wa Iyaakha Ekonto Emosa, Yesu onoomuttikiherya Omwene Tiithi awe. Okathi owo, Omwene oniira ovanre ene muteko aya moomalela, muteko yoowo onihela muhina waattikiherya apinaatamu okhala oomalela. (1 aKor. 15:24-28; Wiis. 20:1-3) Nkahaya muupuwele nwaakhelaka apatthani ni amusi munaaphenta anyu vanceene. Niireke munrowa otheyaka wala wunla mwaha wa ohakalala? Niireke munrowa wiipaka mmuxukhurelaka Yehova? Yookhala etthu munreerela anyu okupali ni murima wotheene. Etthu ene tiila: Ohihimuxiwa wa alipa-ookhwa onimuncererya omphenta wanyu Yehova ni Yesu. Maana wahaari ophenta ni oreera waya murima, atthu ale akhwiiye khiyaarowa ohihimuxiwa. w20.08 16-17 itti. 9-10

Murummwa Paulo aahaatumererya maKristau woona akhala wira yanwerya omurumeela Yehova ahithenle wala ahitheliwe. (1 aKor. 7:8-9) Eyo enooniherya wira Paulo khuupuwela wira maKristau oohithela wala oohitheliwa khiyaarina efaita. Paulo aahimuthanla mmiravo Timootheyo, munna oohithela wira ovareke muteko muulupale wa Yehova. (aFil. 2:19-22) Tthiri waarowa okhala voohiloka wuupuwela wira munna owo onniphwanelela wala khoniphwanelela ovara etthu eyo mwaha woowi khothenle wala oothela. (1 aKor. 7:32-35, 38) Yesu ni murummwa Paulo khatonko wiixuttiha wira muKristau ohaana othela wala ohithela. Nto, ankhi othela wala ohithela? Erevista Owehaweha 1 a Outubro 2012, yaahaakhula oratteene nikoho nno, vaavo yaahimmye awe wira: “Tthiri akhale [ale athenle wala ahithenle] ahaana woona eparakha arina aya ntoko yoovaha ya Muluku. . . . Yehova khoniphavela wira ale ahithenle ahittittimihiweke wala ariipiweke murima mwaha woowi khathenle wala khatheliwe”. Nuupuwelaka eyo, nihaana waattittimiha vanceene anna oohithela ni arokora oohitheliwa mmulokoni. w20.08 28 itti. 8-9

Ilapo sikina, atthu annisiveliwa ihapari sooreera, maana awo yaanilipelela owiriyana ihapari iyo. Masi ilapo sikina atthu akina khaniphavela owiriyana myaha voohimya sa Muluku wala Biibiliya. Ankhi muttetthe munikhala anyu, atthu onnaasivela owiriyana ihapari sooreera? Hata yeemereryaka wala nnaari, Yehova oniphavela wira nihihiye olaleya ihapari sooreera mpakha muteko woolaleerya omala. Yehova onnisuwela okathi muteko woolaleerya onrowa aya omala ni nihiku ‘olumwenku ola onrowa aya omala’. (Math. 24:14) Yesu aahihimya makhalelo a atthu ni itthu saarowa okhumelela mahiku ookiserya, nave aanisuwela wira itthu iyo sanwiiriha awiixutti awe ohihela nipuro noopacerya muteko woolaleerya. Nto aahaaleela so: “Mulipeleleke!” (Math. 24:42) Ehinatthi Epula ya Mutaaseke, atthu yaaniluttuweliwa ovara miteko saya sa khula nihiku, nto eyo yaahiwiiriha ohiiwelela nlopolo na Nowe. (Math. 24:37-39; 2 Ped. 2:5) Etthu emosaru enniiraneya olelo-va, nto nihaana owehexexa ovara muteko Yehova onivanhe awe. w20.09 8 itti. 1-2, 4

Satana khoreere onanariwa, nto vaarowa okhala voohiloka wuupuwela wira khaninrowa oviriha mixankiho sinikumiheriwa ni Satana owo. (Wiis. 12:12) Moohipisa, otheene ahu nnimweehereriwa waamini wahu. Maana “okathi yowo, anokhala maxakha malupale, ehinákhumelele okhuma wopajeryani w’olumwenku mpakha vano”. (Math. 24:21) Okathi owo, woonasa wene amusi ahu anrowa onilupatthaka ni muteko ahu onookhoottihiwa. (Math. 10:35, 36) Okathi uwo waphiya, munrowa opaka exeeni? Niireke munrowa omutakiha Mwene Asa mmuroromelaka Yehova ni mukupaliki wira onimookhapelelani? (2 Wah. 14:11) Yehova onninikhaliherya niinaano-va olipiha waamini wahu wira niwerye ovilela itthu sinrowa onikhumelela muhoolo. Omurumeelaka “murumeyi òroromeleya ni ànkhili”, Yehova onninivaha yoolya ya omunepani “okathi aya” wira nihihiye omukokhorela. (Math. 24:45) Nto nihiikhuraane, otheene ahu nihaana opaka ele ninwerya ahu wira nilipihe omwaamini wahu Yehova.—aHeeb. 10:38, 39. w20.09 18 itti. 16-18

Yehova pooti orumeela owerya wa munepa wowaarya wira owiirihe makhulupale a mulaponi opaka yootthuna awe. Apinaatamu pooti othipa muro wira maasi ahapuweleke opuro aniphavela aya. Mwa enamuna emosaru, Yehova pooti orumeela munepa awe wowaarya wira owiirihe anamalamulela opaka etthu enivarihana ni otthuna wawe. Nto vaavo eyo eniiraneya aya, anamalamulela annipaka soothanla sinaaphwanyiha mireerelo atthu a Muluku. (Mulikanyihe ni Ézira 7:21, 25, 26) Nihaana opaka exeeni? Otheene ahu nihaana waavekelela “mamwene ni matokwene othene” vaavo anrowa aya opaka soothanla sinivarihana ni okumi ahu wala muteko ahu woolaleerya. (1 Tim. 2:1, 2; Neh. 1:11) Ntoko yaapanke aya maKristau a eseekulu yoopacerya, hiyo nave ninnaavekelela wa Muluku anna ni arokora yaawo atthukweliwe mukhatteya.—Mit. 12:5; aHeeb. 13:3. w20.11 15 itti. 13-14

Akhala wira ti nyuwo mwaamusomiha mutthu owo, nyuwo munnitthapa onweha opatisiwaka! (1 aTes. 2:19, 20) Vannooneya wira ale anipatisiwa niinaano ‘ipaphelo soloka sa olavuleliwa’ ohiya paahi wa mutthu ole aamusomiha masi muloko wotheene. (2 aKor. 3:1-3) Ti voohakalaliha woona wira iyaakha xexe sivinre olumwenku wotheene, khula mweeri sinniirihiwa soosoma sa Biibiliya sinivikana 10.000.000. Nave okathi ene yoowo wa iyaakha xexe, atthu anivikana 280.000 yaanipatisiwa, khukhala Anamoona a Yehova ni atthareli a Yesu Kristu. Nto ninrowa waakhaliherya sai atthu awo anisomihiwa Biibiliya okela vahoolo mpakha opatisiwa? Nlelo moopixa murima, Yehova onnaavaha eparakha atthu wira akhale Anamoona awe ni atthareli a Kristu. Nto nihaana waakhaliherya okela vahoolo ni opatisiwa moohipisa. Maana okathi onnivira moowaakuveya!—1 aKor. 7:29a; 1 Ped. 4:7. w20.10 6 itti. 1-2

Mwene Sawuli khaamwiiwelenle Yehova. Nave okathi Samuweli aalavunle awe ni Sawuli voohimya sa ohiiwelela wawe, Sawuli aahikhootta weemererya soovonya sawe. Nave ohiya weemererya soovonya sawe Sawuli aahipacerya wiixaakiha, woothererya wala ovevereiha soovonya sawe ni waavaha nthowa atthu akina. (1 Sam. 15:13-24) Musuweleke wira Sawuli khahiyo ampacerya wooniherya moonelo owo. Maana khalai ene ootoko opaka etthu emosaru. (1 Sam. 13:10-14) Mooriipiha murima, Sawuli aahikhala mutthu oowiixinnuwiha vanceene. Okhala wira Sawuli khaaturunke muupuwelo awe, Yehova aahimukhootta ni aahimunyanyala. Khuuvo mutthu oniphavela okhala ntoko Sawuli, nto nihaana wiikoha so: ‘Vaavo kinisoma aka malakiheryo wala miruku sa Nuulumo na Muluku, Biibiliya kiireke kinnikhootta ovarihela muteko? Kiireke kinnivevereiha etthu kipanke aka kuupuwelaka wira khetempe otakhala? Kiireke kinnoothererya wala kinnaavaha nthowa atthu akina mwaha wa etthu yoohiloka kipanke aka?’ Akhala wira munaakhula wira “aayo” hata nikhalaka nikoho nimosa, nto muhaana oturuka moonelo ni muupuwelo anyu. Mwaahire siiso, munrowa okhala mutthu oowiixinnuwiha ni Yehova onimookhoottani okhala mpatthani awe. w20.11 20 itti. 4-5

Amiravo, mmuthanle ole munrowa anyu omukokhorelaka. Nyuwo muhaana omusuwela oratteene Yehova ni yootthuna awe. Nuumala-vo, mpakeke yootthuna eyo mookumini mwanyu. (aRom. 12:2) Mwiira siiso, nyuwo munoowerya opaka yoothanla eri yootepexa otthuneya mookumini mwanyu, ori omurumeela Yehova. (Yox. 24:15) Nto mwaahihiye omusoma Biibiliya khula nihiku, omphenta wanyu Yehova onimunnuwa ni omwaamini wanyu onrowa otepaka olipa. Muthanle ohela nipuro noopacerya mookumini mwanyu opaka yootthuna ya Yehova. Olumwenku wa Satana, onihimya wira akhala wira munoorumeela itthu munisuwela anyu wira mwiiphwanyihe mireerelo mekhinyu paahi, munoophwanya ohakalala. Masi hiyo ninnisuwela wira ale aniimananiha ophavelasa mihakhu paahi, anniphwanya “masoso malupale”. (1 Tim. 6:9, 10) Masi akhala wira munonwiriyana Yehova ni othanla ohela nipuro noopacerya mookumini mwanyu opaka yootthuna awe, nyuwo munookhumela saana mookumini ni munookhalana ankhili.—Yox. 1:8. w20.10 30-31 itti. 17-18

Eseekulu yoopacerya. Muhupi Yesu aalaleya awe waanaavaha nlipelelo apinaatamu otheene. Nto Yesu ohaaruma atthareli awe ovara muteko yoowo opacerinhe awe alaleyaka ihapari sooreera “mpakha omalenle elapo”. (Mit. 1:8) Ekeekhai wira awo khanivara muteko owo ni ikuru saya, niire so, mekhaya paahi. Awo annikhaliheriwa ni munepa wootteela wa Muluku, yoowo ori “mulipa-òkhaliherya” Yesu aaleihenrye awe wira aamwaavaha. (Yoh. 14:26; Zak 4:6b) Atthareli a Yesu Kristu yaahaakhela munepa wootteela nihiku na Pentekoositi a 33, nuumala Kristu orwa. Akhaliheriwaka ni munepa owo wootteela, moohipisa yaahipacerya olaleerya. Nto okathi vakhaani paahi atthu anceene yaaheemererya ihapari sooreera. (Mit. 2:41; 4:4) Okathi yaapacenrye aya olupatthiwa, atthareli ale khiyoovale ni khiyaahiyale olaleerya. Ohiya-vo, awo yaahinvekela Muluku wira aakhaliherye. Awo yaavekenle so: “Munivahe hiyo arumeyi anyu, ikuru s’olaleya molumo anyu ni wilipiha, nihòvaka etthu”. Nuumala-vo, otheene aya yaahisareya munepa wootteela “khukelela olaleya molumo a Muluku ni wilipiha, ehòvaka etthu”.—Mit. 4:18-20, 29, 31. w20.10 21 itti. 4-5

Etthu xeeni ennikupaliha wira Yesu aahihihimuxiwa tthiri? Atthu anceene yaahinweha Yesu nuumala ohihimuxiwa. (1 aKor. 15:5-7) Mutthu oopacerya onweha Yesu onilavuliwa ni murummwa Paulo aari Pedru wala Simoni. Nuumala-vo ekrupu ya awiixutti yaahihimya wira Pedru aahimoona Yesu nuumala ohihimuxiwa. (Luka 24:33, 34) Moottharelana, Paulo ohimmye wira nuumala Yesu ohihimuxiwa aahisooniherya wa arummwa “muloko nanli”, eyo piiyo, 12. Nuumala-vo Kristu “ahìsoniherya-tho okathi omosá w’atthu òwamini yavikanne miloko miloko mithanu [500]”. Woonasa wene waari okathi yoole Yesu aapanke awe muthukumano oGalileya onilavuliwa Matheyo 28:16-20. Nave Yesu “ahìsoniherya wa Yakobo” vanikhala ntoko wira Yakobo onihimmwa-va aari munna awe Yesu, yoowo wanipacerya ahaakupali wira Yesu aari Mesiya. (Yoh. 7:5) Nuumala Yakobo onweha Yesu ohihimuxiwe ene, owo aahimwaamini. Ti voohakalaliha woona wira mwaakha wa 55 vaavo Paulo aalempe awe ewarakha ela atthu anceene yanwenhe Yesu ohihimuxiwe ene, nlelo yaari akumi. Nto akhala wira mutthu aanaanyiherya, aahiiso khaakupali wira Yesu aahihihimuxiwa, owo aahaana olavula aahiiso waakoha atthu awo. w20.12 3 itti. 5, 7-8

Hiyo ninnixanka vaavo ninwereiwa ahu otepexa wene akhala wira oretta onniwerya khonivoniwa. Nto eyo pooti oniiriha okhalana moonelo woohiloka. Nto munvekeleke Yehova wira ookhaliheryeni. Nnaamwi ohirowaka onipenuxa mwa mwiiriirya, owo pooti onimaaliha ni onivaha ikuru wira niwerye ovilela muxankiho ahu. (Esal. 94:19) Mwa ntakiheryo, Yehova pooti omwiiriha munna wala murokora orwa onikhaliherya ovara miteko sa vate wala orowa othuma mireerelo sahu omerkaatu. Nave pooti owiiriha anna ni arokora akina onivekelela. Aahiiso pooti onikhaliherya wuupuwela moolumo wala yoolepa ya mBiibiliyani yoomaaliha aahiiso nlipelelo na okhala mahiku otheene nihiwereiwaka nnaakhala woona owereya elapo esya. (aRom. 15:4) Masi hiyo pooti ohiwerya olaleerya ntoko naalaleerya ahu khalai. Murokora oniihaniwa Laurel aahiviriha iyaakha 37 orumeelaka maakina animukhaliherya mutthu omumula aniihaniwa, Pulmão de aço. Owo aahikhalana Kanser, aahooperariwa ikwaha sinceene ni aahikhalana iretta sikina sa erutthu. Nnaamwi vari siiso, murokora owo khaahiyale olaleerya. Owo aanaalaleerya mameediku, manfirimeero ni atthu akina yaarwa omuxukurya owannyawe ni ohaakhaliherya atthu 17 wiixutta ekeekhai ya mBiibiliyani! w20.12 24 etti. 9; 25 etti. 12

Murummwa Paulo aaniphavela okhaliheriwa. Mwaakha 56 nuumala Kristu orwa, muttitthi waahimukumiha Paulo mutemplo oYerusalemu ni waaphavela omwiiva. Nihiku naattharelana vaavo Paulo aaroihiwe awe oSineedrio, aahaala vakhaani wiiviwa ni awanani awe. (Mit. 21:30-32; 22:30; 23:6-10) Okathi ole, woonasa wene Paulo aaniikoha so: ‘Mpakha silini kinrowa aka ovilela mixankiho iya?’ Paulo aakhaliheriwe sai? Ohiyu, Paulo ohinatthi ovariwa ni otthukweliwa, “Apwiya” Yesu yaahimukhumelela amuhimeerya wira: “Mulipihe murima! Nyuwo mokikhalela onamona oYerusalemu nno: siso muhana okikhalela-tho onamona oRoma”. (Mit. 23:11) Tthiri moolumo ale yaahimulipiha vanceene Paulo ni yaaphiyale okathi wooreerela! Maana Yesu aahimuttottopela Paulo mwaha woovaha onamoona oYerusalemu. Ohiya-vo, Yesu aahimuleiherya Paulo wira amphiya oRoma moovareleleya, weiwo aarowa awe ovaha onamoona. Nuumala wiiwa moolumo ale oolipiha Paulo khoova etthu ntoko mwaana ohinoova awe vaavo onikhala awe mmatatani mwa paapa awe. w20.11 12 itti. 1, 3; 13 etti. 4

Nlipelelo nahu na Omwene “nri ntoko nankura a okumi ahu”, owo onninivaha ikuru wira nivilele mixankiho sinniphwanya mookumini mwahu. Nto okathi wotheene muupuweleleke nlipelelo Yehova onivanhe awe na muhoolo. Mwiira siiso, muupuwelo woohiloka onoolakaseya. (Yes. 65:17) Mwiimananiheke wuupuwela muri ene elapo esya ya murettele sihinrowa aya okhala mixankiho soovelaveliha. (Mik. 4:4) Nave nyuwo pooti olipiha nlipelelo nanyu mwaaleelaka atthu akina. Nto mwiimananiheke wiirela mpantta muteko woolaleya ihapari ni waapaka awiixutti. Mwiira siiso, nyuwo munrowa ‘ororomelaka voomalela mpakha wookiseryani’. (aHeeb. 6:11) Vaavo olumwenku ola wootakhala onrowa aya waattamela aka wanikisa, ninrowa okumanaka mixankiho seiyo sinrowa onixankihaka vanceene. Nnoowerya ovilela mixankiho iyo ni ohihiya okhala oomaaleleya, ohiya ni ikuru sahu masi mwaha wa omuroromela Yehova ni murima wotheene. Tivonto, mooniherye ni miteko sanyu wira nyuwo munnaamini ni murima wotheene yooleiherya ya Yehova eni: “Mwakiroromela ni murima, munolipa”.—Yes. 30:15. w21.01 7 itti. 17-18

Moone wira Yakobo 5:11, onnooniherya wira ophenta wa Yehova onnivarihana ni mukhalelo mukina yoowo onnikhaliherya okhalana waataana wooloka ni Yehova, eyo piiyo, omoriwa wawe ikharari. (Okhum. 34:6) Yehova onnooniherya wira toomoriwa ikharari vaavo onnilevelela awe okathi nimmutthekela ahu. (Esal. 51:3) Mbiibiliyani nuulumo noowi “omoriwa ikharari” ninhela muhina itthu sikina ohiya paahi olevelela. Maana omoriwa ikharari khontaphulela paahi omulevelela mutthu opanke etthu yoohiloka, masi-tho onihela muhina omukhaliherya mutthu onihaawa. Yehova onniphavela onikhaliherya vanceene okathi sinniphwanya aya mixankiho, ovikana othunku wala omoriwa ikharari maama onimooniherya awe mwanawe. (Yes. 49:15) Mwaha woowi etthu enimwiiriha Yehova onikhaliherya okathi ninkumana ahu mixankiho, okhala wira owo onninimorela ikharari. (Esal. 37:39; 1 aKor. 10:13) Hiyo nihaana waamorela ikharari anna ni arokora ni ohinyakulihana okathi awo annitthekela aya. (aEef. 4:32) Masi enamuna yuulupale nikhanle ahu oowaamorela ikharari anna ni arokora ori waakhaliherya okathi sinaaphwanya aya mixankiho. Nto ninnimutakiha Yehova yoowo ori ntakiheryo nuulupale na ophenta wekeekhai.—aEef. 5:1. w21.01 21 etti. 5

Ahooleli a etthoko ahaana okhalana ephoole. Vaarowa okhala voohiloka muhooleli a etthoko oviriha okathi munceene ovaraka muteko ohiya waakhaliherya atthu a vatthokoni vawe okhalana waataana wooloka ni Yehova ni waaphenta ni owiixuttiha. Yehova onniniixuttiha ni onninittaruxa wira niphwanyeke mireerelo. (aHeeb. 12:7-9) Omutakihaka Tiithi awe, Yesu aniwiixuttiha moophenta atthu otheene aakhapelela awe. (Yoh. 15:14, 15) Owo aanilavula itthu mooluluwanya masi mooreerela murima. (Math. 20:24-28) Yesu aanisuwela wira apinaatamu toohimalela nave annivonya ikwaha sinceene. (Math. 26:41) Muhooleli a etthoko onimutakiha Yehova ni Yesu onniwoonela othunku atthu a vatthokoni vawe ni onnisuwela wira mwaarawe ni anaawe annivonya. Nto owo khoninviruwela mwaarawe aahiiso anaawe. (aKol. 3:19) Ohiya opaka eyo, owo onnitthara malakiheryo ari aGalasia 6:1 ni onnaakhaliherya atthu otheene a etthoko awe mooreerela murima ohiliyalaka wira owo nave toohimalela. Nave omutakihaka Yesu, owo onnisuwela wira enamuna yooloka ya owiixuttiha atthu akina ori waavaha ntakiheryo nooloka. w21.02 6-7 itti. 16-18

Orumeelaka mukuttho wa Yesu Kristu, Yehova oomuthuma khula mmosa a mmulokoni ni atthu otheene aniphavela omutthara. (Mar. 10:45; Mit. 20:28; 1 aKor. 15:21, 22) Tivonto, Yesu oniphwanelela awe okhala muhooleli a muloko okhala wira oovaha okumi awe wira onoopole. Nave Yesu ookhalana ehakhi ya waavaha malakiheryo atthu otheene ohela muhina imusi vatthokoni, ni atthu otheene a mmulokoni voohimya sa etthu otheene ahu nikhanle ahu oopaka. Ohiya-vo, owo onniweha akhala wira ninniiwelela aahiiso nnaari malamulo awe. (aGal. 6:2) Masi khahiyo paahi Yesu onnivaha malakiheryo maana owo onniniphenta ni onninikhapelela. (aEef. 5:29) Arokora annooniherya wira annimwiiwelela Kristu yiiwelelaka malakiheryo anivahiwa aya ni anna yaawo athanliwe wira yaakhapeleleke. Anna anaattittimiha arokora, annooniherya wira annisuwela mareheryo a okhulupale Yehova opanke awe. Vaavo atthu otheene a mmulokoni, anisuwela aya ni ottittimiha malakiheryo a okhulupale, muloko onnihakalala ni onnikhalana murettele. Tthiri ti vooloka onvuwiha Tiithi ihu oophenta Yehova. w21.02 18-19 itti. 14-17

Okathi Davidi aakhala awe mittetthe sa aFilisti omutthyawaka mwene Sawuli wira ohimwiive, Davidi ni atthu awe yaahaana waahiya axaaraya ni anaaya wira yawane ekhotto. Nlelo ari ene okhottoni, awanani aya yaahirwa anyaanya ipa saya ni waakuxa anaaya ni axaaraya. Okhala wira Davidi aanisuwela owana ekhotto pooti wira aamuupuwela enamuna yoolokexa ya moota wowoopola atthu ale yaakuxiwe ni awanani aya. Masi ohiya opaka eyo, Davidi aahinvekela Yehova malakiheryo. Nto Davidi aahimukoha Yehova wira: “Katthimakeleke alavilavi ale? Kinimwaphwanya?” Nuumala-vo, Yehova aahimuleela Davidi wira aahaana waatthimakela alavilavi ale ni anwoopola atthu awe otheene. (1 Sam. 30:7-10) Yowiiraneya ela eniwiixuttihani exeeni? Muhinatthi opaka yoothanla mwaavekeleke miruku atthu akina. Nyuwo pooti waavekela anamuyari anyu. Nave ovaanela ni axitokweene arina sookumanana sinceene animoovahani miruku sooloka. Yehova, onnaaroromela vanceene axitokweene. Nave, oniphavela wira nyuwo mwaaroromeleke ni murima anyu wotheene. Yehova onnaathokorerya axitokweene awo ntoko “soovaha” sawe mmulokoni. (aEef. 4:8) Tthiri, munoottottela mureerelo otakiha waamini waya ni weettela malakiheryo otheene anoovahaayani. w21.03 4-5 itti. 10-11

Yesu aahimmye wira mutthu ohinivarihela muteko etthu oniixutta awe onoolikana ni mulopwana oniteka empa awe vamihaavani. Muteko wotheene onivara awe oniyeeha okathi awe mahala. Mwaha wa xeeni? Mwaha woowi akhumelela munamukhaya wala epheyo yuulupale, empa eyo enoomora. (Math. 7:24-27) Mwa enamuna emosaru, akhala wira khaninvarihela muteko ele nniixutta ahu, ninhonona okathi ahu mahala. Maana, okathi ninrowa ahu weehereriwaka, ntoko mixankiho wala olupatthiwa, khaninrowa owerya ovilela mixankiho iyo. Masi vaavo ninvarihela ahu muteko ele nnixutta ahu, nnoowerya opaka soothanla sooloka, nnookhalana murettele ni waamini wahu onoolipa vanceene. (Yes. 48:17, 18) Wira nihihiye ororomeleya wa Yehova hata nirina ene mixankiho, nihaana ohihiya ovekela ni omusoma Biibiliya khula nihiku. Nave, nihikhala-khale niliyalaka wira etthu yuulupale nikhanle ahu oopaka ori onvuwiha Yehova. Nikupaliki ni murima wotheene wira Yehova khonikhala-khala oninyanyalaka ni khiivo etthu apinaatamu akhanle aya oopaka enrowa omuhiiha Yehova oniphenta.—aHeeb. 13:5, 6. w21.03 15 etti. 6; 18 etti. 20