Julyo

Nihaana okhalana waataana wooloka ni Yesu wira mavekelo ahu yaakhuliwe. Eyo enooniherya wira khoniphiyerya ohimya paahi “mwa nsina na Yesu” okathi ninvekela ahu. Maana nihaana osuwela moota Yehova onimurumeela awe Yesu wira aakhule mavekelo ahu. Yesu aahaaleela arummwa awe wira: “Etthu p’itthu enrowanyu ovekela ni nsina naka, miyo kinowirelani”. (Yoh. 14:13) Nnaamwi Yehova owiriyanaka ni waakhula mavekelo ahu, owo onvaha Yesu owerya woopaka soothanla sawe. Ohinatthi waakhula mavekelo ahu, Yehova onniweha akhala wira ninnivarihela muteko malakiheryo a Yesu. Mwa ntakiheryo, Yesu aahimmye so: “Mwalevelelaka akhw’inyu sottheka saya, nave Atith’inyu ari wirimu animolevelelani nyuwo. Nto nyuwo mwahaleveleleke akhw’inyu, nave Atith’inyu khanolevelelani sottheka sanyu”. (Math. 6:14, 15) Ninnoona wira ti vooloka waareerela murima atthu akina ntoko siisaale Yehova ni Yesu annireerela aya murima! w20.04 22 etti. 6

Murummwa Paulo aanisuwela itthu saasivela atthu aalaleerya awe, tivonto aanaalaleerya moovarihana ni makhalelo aya. Mwa ntakiheryo, atthu a oListra yaasuwela itthu vakhaani aahiiso khiyaasuwela Soolempwa. Nto Paulo aahaalaleerya mwa enamuna yaarowa aya wiiwexexa. Owo aahilavula sa oruwerya, ohepha ni ottottela mureerelo okumi. Paulo aahirumeela moolumo ni matakiheryo yaakhweela wiiwexexa ale yanwiriyana. Mwiimananiheke osuwela itthu sinaasivela vanceene atthu a muttetthe anyu ni mwaalaleeryeke moovarihana ni makhalelo aya. Okathi muniphiya anyu vatthokoni, munrowa osuwela sai itthu sinimusivela mwaneene etthoko? Nweheke mikhalelo ni itthu onivara awe mutthu owo. Woonasa wene, mutthu owo onilokiherya ejardim awe, onisoma eliivuru, onilokiha ekaaro awe aahiiso onivara etthu ekina. Nto niireke khivaareerela orumeela etthu enivara awe wira mpacerihe ovaanela? (Yoh. 4:7) Nave musuweleke wira ikuwo mutthu oniwara awe sinnooniherya etthu, ntoko elapo oyariwa awe, muteko onivara awe, wala axooku animusivela. w20.04 11 itti. 11-12

Okhala wira animakela oxanka, anna ni arokora akina anninyoonyiheya yuupuwelaka wira makhalelo aya toovirikana ni atthu akina. Awo annixanka vaavo anikhala aya eriyari ya atthu anceene. Hata vari siiso, awo khanihiya orowela mithukumano sa mmulokoni, asembeleya ni kongreso. Nave vannaavila olavula ni atthu ahinaasuwela aya, nnaamwi vari siiso awo anniimananiha waalaleerya atthu ahinaasuwela aya. Akhala wira eyo enniwiiraneelani, musuweleke wira khamukhanle mekhinyu. Maana arumeyi anceene a Yehova anniwanana muxankiho murina anyu. Muupuweleke wira Yehova onnisiveliwa ni itthu sotheene munipaka anyu ni murima wotheene. Tthiri okhala wira khamuhiyale omurumeela Yehova eyo enooniherya wira onnooreelihani ni onnoovahani ikuru wira nvilele. (aFil. 4:6, 7) Akhala wira nlelo munnimurumeela Yehova hata murina ene mixankiho mukupaliki wira Yehova onnooreelihani. Anamunceene a hiyo khanrina okumi wooloka masi hata vari siiso, ninniwerya ovilela. (2 aKor. 4:16) Nikhaliheriwaka ni Yehova, otheene ahu nnoowerya otthimaka mpakha ophiya omukanoni! w20.04 31 itti. 20-21

Ankhili a Muluku annooneya oratteene vaavo ninweha ahu moota opattunxe awe elapo. (aHeeb. 3:4) Elapo eplaneta ya vameekhaaya. Maana yookhalana itthu sotheene sinaakhaliherya apinaatamu okhala akumi. Mwa inamuna soovirikana, elapo eri ntoko ekalawa eneetta ephareya yuulupale. Masi, wookhala ovirikana wuulupale eriyari ya ekalawa epakiwe ni apinaatamu, asareyale atthu ni elapo ela ninkhala ahu. Mwa ntakiheryo, nkahaya muupuwele vaakhanle wira atthu ari mukalawani annipaka epheyo aya, yoolya ni maasi aya, masi ahinawerya orihela ota ikokhola sene. Yaarowa oviriha okathi mikavi ari ene akumi? Tthiri khiyaarowa oviriha okathi munceene, maana atthu otheene yaamookhwa. Moovirikana ni ekalawa ele, elapo ennaahuwa atthu ni inama ibilyau sinceene. Eyo ennikumiherya epheyo, yoolya ni maasi manceene anaaphiyerya atthu othene anikhala valaponi. Ikokhola sinikumiheriwa ni elapo khasinriheliwa wiirimu, masi hata vari siiso, eyo enniirattela saana ni opuro wooloka okhala. Eyo eniweryaneya sai? Yehova oopaka elapo mwa enamuna eniiriha itthu soohiloka otthikela okhala sooloka ni ohihonona elapo. w20.05 20 itti. 3-4

Vaakhala ntoko wira Satana aamuleela Eva wira Yehova nawoothe. Eyo ti etthu yaamwiirinhe Satana, okhala Diabo, eyo piiyo, nawoothe. Okhala wira Eva aaheemererya wootha wa Satana, owo aahiwokiwa vanceene. (1 Tim. 2:14) Ohiya-vo, Eva aahooniherya wira aanimuroromela vanceene Satana ohiya omuroromela Yehova. Eyo yaahimwiiriha Eva opaka yoothanla yootepexa otakhala, eyo piiyo, ohimwiiwelela Yehova. Nto Eva aahirukula ni khulya muhokorokho yoole aakhoottihiwe awe ni Yehova. Mooriipiha murima Adamu aahipaka etthu emosaru yaapanke aya amwaarawe. (Maph. 3:6) Nkahaya muupuwele ele Eva aakhanle awe oomuleela Satana. Muupuwele vaakhanle wira aahimwaakhula so: “Miyo nkinoosuwelani, masi kinimusuwela Tiithi aka, Yehova. Miyo kinnimuroromela ni kinnimphenta, masi nyuwo nnaari. Itthu sotheene miyo ni Adamu nrina ahu, Yehova tonivanhe. Nto xeeni munimulavula anyu moohiloka Yehova? Khuma va!” Tthiri Yehova aamuhakalala vanceene onweha ni omwiiwa mwanawe ole olavulaka siiso! (Mir. 27:11) Masi Eva aahiyeleela eparakha eyo. Eyo enooniherya wira Adamu ni Eva khiyamphenta Yehova ni khiyaamuroromela. Mwaha wa yeeyo, Adamu ni Eva yaahihiya waakiherya nsina na Tiithi aya. w20.06 4 itti. 10-11

Arokora ahaana ottottopeliwa mwaha wa itthu sotheene anivara aya mmutthenkesoni mwa Yehova. Miteko iyo sinihela muhina oteka ni olokiherya Ipa sa Omwene, okhaliherya ikrupu sinilavula nttaava na elapo ekina ni okhaliherya miteko sikina sa oBetheli. Arokora akina annikhaliherya ikrupu sinaakhaliherya anna sakhumelela ihasara, mapuro anitaphuleliwa iliivuru, orumeela ntoko mapioneera ni mamisionaaria. Ohiya-vo, arokora ootheliwa annaakhaliherya axiiyeya ovara miteko sa mmulokoni ni mmutthenkesoni mwa Yehova. Tthiri anna awo anniwerya okhala “sovaha” sa Muluku mwaha woowi annikhaliheriwa ni axaaraya. (aEef. 4:8) Axitokweene annisuwela wira athiyana aniirela mpantta muttitthi muulupale wa atthu anivara muteko wa Muluku moowiivahererya. Tthiri awo annikhaliherya vanceene muteko woolaleya ihapari sooreera. Nave, axitokweene annisuwela wira arokora oowuuluvala ni oororomeleya annikhumela saana vaavo anaakhaliherya aya arokora amiravo moota woophuka mixankiho saya. (Tito 2:3-5) Moohaanyiherya, arokora awo ahaana ottottopeliwa ni oxukhureliwa vanceene. w20.09 23-24 itti. 13-14

Yehova khonaaliyala atthu ale yaamurumeela ahiya omurumeela mwa okathi vakhaani. Nave Yehova khonliyala muteko wotheene avanre aya mmutthenkesoni mwawe. (aHeeb. 6:10) Profeta Yesaya, aahipaka nlikanyiho noovara murima nnooniherya moota Yehova onaathokorerya awe arumeyi awe. Owo aahimmye so: “Owo onniwettiha atthu awe, ntoko makampusi onlyihawe ipwittipwitthi sawe . . . onnakuxa axinama mmatatani mwawe, onnettiha vorera”. (Yes. 40:11) Yehova yoowo ori Makampusi Muulupale, onoonela sai vaavo oniwoona awe arumeyi awe akina ahiyaka omukokhorela? Yesu aahooniherya moonelo wa Yehova vaavo aakonhe awe atthareli awe wira: “Nyu munòna sai? Mutthu akhalana ipwittipwitthi miloko mulokó [100], yathwelela emosá, khino khanihiya iye sikina miloko mithanu na mixexe ni thanu na xexe [99] mmathalani, khíyarowa ophavela ethwelenle? Aphwanyá vale, kinohimeryani ekhweli wira, onotteliwa murima mwaha w’emosá yeyo ovikana iye sikina sothene [99] sahathwelenle”.—Math. 18:12, 13. w20.06 19-20 itti. 8-9

Hiyo ninnoona okhala eparakha yuulupale omurumeela Yehova. (Esal. 27:4; 84:11) Akhala wira munna onniphavela eparakha ya vameekhaaya, etthu yooloka oniphavela awe. Masi munna onivahiwa iparakha ohaana osyaka otepa wiisuupuwela ovikana vanreerela aya. (Luka 17:7-10) Yoolakela ya munna owo ehaana okhala waarumeela atthu akina moowiiyeviha. (2 aKor. 12:15) Biibiliya onninivaha matakiheryo oohiloka a atthu yiisuupuwela vanceene ovikana vanireerela aya. Mwa ntakiheryo, Diotrefe khahiyo aari mutthu oowiiyeviha, maana ‘aphavela okhala nipuro nopajerya’ mmulokoni. (3 Yoh. 9) Wiixinnuwiha waahimwiiriha Oziya ovara muteko Yehova aavanhe awe anamukuttho paahi. (2 Wah. 26:16-21) Moolavilavi Absalomi aaniphavela wooniwa saana ni atthu akina ni aaphavela wiikhaliha mwene. (2 Sam. 15:2-6) Matakiheryo ala a mBiibiliyani annooniherya wira Yehova khonaaphavela atthu antthuna wiivuwiha. (Mir. 25:27) Muhiliyale wira wiixinnuwiha ni nrima ninnikumiherya maxakha.—Mir. 16:18. w20.07 4 itti. 7-8

Imusi sikina sa maKristau annitthaamela ilapo sikina mwaha wa mikhalelo soohiloka sa elapo aya aahiiso arowaka ophavelasa muteko. Vaavo eyo eniiraneya aya, pooti wira anaaya anrowa osomaka ixikola sa nttaava na elapo eyo athaamenle aya. Nave pooti wira anamuyari aya ahaana wiixutta nttaava nsya wira aphwanye muteko. Ankhi akhala wira muloko wala ekrupu ya mutteetthe owo ninlavuliwa nttaava naya? Muloko xeeni anrowa aya okhala? Niireke anrowa okhala muloko wa nttaava na elapo eyo wala muloko ninlavuliwa nttaava naya? Muhooleli a etthoko ohaana othanla muloko emusi awe enrowa aya okhala. Okhala wira yoothanla ela ti ya mutthu mwaneene, owo ohaana othanla etthu enrowa okhaliherya vanceene emusi awe. Nto nihaana ottittimiha yoothanla ya ahooleli a itthoko. Moohicikha yoothanla aya, nihaana weemererya yoothanla aya ni owaakhela saana mmulokoni ni waavaha efaita.—aRom. 15:7. w20.08 30 itti. 17-18

Naaphavelaka wira Yehova onivahe ikuru sawe, nihuupuweleke wira ikuru sahu, osoma wahu, okhulupale ahu mmuttettheni wala musurukhu nrina ahu ekhalaka etthu enniiriha okhala atthu a efaita. Itthu iyo khasinniiriha okhalana efaita vamaithoni va Yehova. Tthiri olelo-va, eriyari ya atthu a Yehova “khinnaphwanya asuweli anjene, nnákhala atthu òwerya, walá makhulupale manjene”. (1 aKor. 1:26) Nto muupuwelaka wira khamunisuwela itthu sinceene, eyo khenookhoottiheryani omurumeela Yehova. Ohiya-vo, nweheke mukhalelo anyu mwa enamuna yooloka. Munrowa owerya sai opaka eyo? Muupuweleke wira vaavo muhirina anyu itthu saarowa owiirihani okhala mutthu oovuwa mulaponi, nyuwo munoowerya woona moota Yehova onoovahaaweni ikuru. Mwa ntakiheryo, akhala wira munniwoova atthu ale aniphavela ohonona waamini wanyu, munvekeleke Yehova wira oovaheeni olipa murima wira mwaakiherye waamini wanyu. (aEef. 6:19, 20) Akhala wira murina oretta ohinivoniwa, munvekeleke Yehova ikuru wira mwiimananiheke ovara muteko awe. Vaavo munrowa anyu woonaka Yehova aakhulaka mavekelo anyu, waamini wanyu onrowa wunnuwaka ni olipa vanceene. w20.07 16 etti. 9

Naaphavelaka wira Omwene okhale nipuro noopacerya mookumini mwahu, nihaana oleva itthu sikina wira nimuhakalaliheke Muluku, ntoko Abrahamu. (Mar. 10:28-30; aHeeb. 11:8-10) Muhuupuweleke wira khamunrowa okhalana mixankiho. Hata atthu yaale aniviriha okumi aya wotheene amurumeelaka Muluku, annikhalana mixankiho. (Yak. 1:2; 1 Ped. 5:9) Olelo-va, nookhalana mathowa manceene wira niwehexexeke itthu sa muhoolo. Itthu siniiraneya molumwenkuni sinnooniherya wira ninkhala mpantta wookiserya wa mahiku ookiserya a olumwenku ola wootakhala. Ninnilipelela mareeliho manceene, okathi Omwene wa Muluku onrowa aya olamulelaka, ohela muhina okathi ninrowa ahu waaweha ale nnaaphenta ahu akhwiiye aahihimuxiwaka. Okathi owo, Yehova onoomureeliha Abrahamu mwaha wa waamini wawe ni opixa murima omuhihimuxaka owo ni emusi awe wira akhaleke valaponi. Niireke nyuwo munookhala okathi owo wira nwaakhele atthu awo? Munookhala, akhala wira ntoko siisaale Abrahamu munooleva itthu sikina mwaha wa Omwene wa Muluku, khamunihiya waamini wanyu hata murina ene mixankiho ni mwiixutta omulipelela Yehova moopixa murima.—Mik. 7:7. w20.08 5-6 itti. 13-14; 7 etti. 17

Hiyo noosuwela wira awanani ahu yaniiva vale, Yehova onoonihihimuxa. Nave ninnisuwela wira khiivo etthu anrowa aya opaka enrowa onimwalanyiha ni Yehova. (aRom. 8:35-39) Tthiri ti vooloka osuwela wira Yehova okhalana ankhili mwaha woonivaha nlipelelo na ohihimuxiwa! Moohaanyiherya, orumeelaka nlipelelo na ohihimuxiwa, Yehova onnimwaakha Satana kapwitthi yoowo onimukhumela saana ni okathi omosaru onninivaha nikhaliheryo nuulupale ninnikhaliherya wiixaakiha, eyo piiyo, olipa murima wuulupale. Akhala wira awanani a Yehova anniwoopopihani wira anoowiivani, munrowa opaka exeeni? Niireke munoomuroromela Yehova mukupaliki wira onimoohihimuxani? Enamuna emosa yoosuwela akhala wira munnimuroromela Yehova ori wiikoha so: ‘Kiireke soothanla saka hata siri ene saamukhaani kinnooniherya wira kinnimuroromela Yehova?’ (Luka 16:10) Nikoho nikina munreerela anyu wiikoha tinla: ‘Kiireke moota kinrumeela aka okumi aka kinnikupali wira kahela nipuro noopacerya Omwene, Yehova onookivaha itthu sikina sinkithowa?’ (Math. 6:31-33) Akhala wira munaakhula wira “aayo” muhiilokiherya wira nvilele soweeha sinrowa wookhumelelani muhoolo.—Mir. 3:5, 6. w20.08 17-18 itti. 15-16

Hiyo nihaana osuwela orumeela oratteene Nuulumo na Muluku. Inamuna sikina ninniixutta omithukumanoni. Masi wira naakupalihe atthu akina efaita Biibiliya orina awe, nihaana wiimananiha omusoma Biibiliya khula nihiku. Nto nihaana orumeela Nuulumo na Muluku wira nlipihe waamini wahu. Eyo enihela muhina ohiya paahi omusoma Biibiliya. Nihaana wuupuwelela ele ninsoma ahu ni otokosa muliivuruni mwahu. Niira siiso, nnoowerya wiiwexexa oratteene Soolempwa ni ovarihela muteko mookumini mwahu. (1 Tim. 4:13-15) Niira siiso, nnoowerya orumeela oratteene Nuulumo na Muluku wira niwiixuttihe atthu akina. Masi muhiliyale wira khoniphiyerya paahi waasomela iversu sa mBiibiliyani, nihaana waakhaliherya wiiwexexa ele yoolepa eyo enihimya aya ni moota woovarihela muteko mookumini mwaya. Akhala wira nnoomusomaka Biibiliya khula nihiku, nnookhala alipa-oowiixuttiha oratteene Nuulumo na Muluku.—2 Tim. 3:16, 17. w20.09 28 etti. 12

Etthu enrowa onikhaliherya ohela nipuro noopacerya muteko woolaleerya, ori wuupuwela moota Yehova onnikhaliherya awe. Mwa ntakiheryo, olelo-va nookhalana eyoolya yinceene yomunepani. Eyo enihela muhina iliivuru soowimpirimiriwa, eletroniko, audiyu, iviidiyu ni itthu sikina siri mwinternetini. Nave nookhalana esaiti ahu jw.org, yeeyo erina iliivuru mattaava anivikana 1.000! (Math. 24:45-47) Etthu ekina enrowa onikhaliherya ohela nipuro noopacerya muteko woolaleerya, ori otthara ntakiheryo na Yesu. Owo kheemerenrye nnakhala etthu emosa emuhiihaka olaleya ikeekhai. (Yoh. 18:37) Okathi Satana anvanhe awe Yesu “omwene wothene wa mulaponi n’uvuwa waya”, Yesu khaamorenle muraakho owo wa Satana, nave kheemerenrye okhalihiwa mwene. (Math. 4:8, 9; Yoh. 6:15) Nnaamwi aalupatthiwa, Yesu khaahiyale ovara muteko awe ni khaaphavela okhala thaaciri. (Luka 9:58; Yoh. 8:59) Okathi waamini wahu oneehereriwa aya, nihihiye ohela nipuro noopacerya muteko ahu woolaleerya, nave nihaana otthara miruku sa murummwa Paulo siniphwanyaneya yoolepa ya olelo. w20.09 9-10 itti. 6-7

Ninnihakalala vanceene okhalana arokora yaawo anikhaliherya miteko soovirikana mmulokoni! Awo anniirela mpantta mithukumano ni annikhaliherya muteko woolaleya ihapari sooreera sa Omwene. Arokora akina annikhaliherya oteka ni olokiherya Ipa sa Omwene ni annaakhaliherya anna ni arokora mmulokoni. Ekeekhai wira arokora awo annikumana mixankiho sinceene. Akina ahaana waakhapelela anamuyari aya oowuuluvala. Nave-tho akina annilupatthiwa ni amusi aya. Arokora akina toohitheliwa ni aakhalana anamwane, nto aahaana wiimananiha ovara muteko wira yaalyiheke anaaya. Xeeni vari aya vooloka waakhaliherya arokora a muloko ahu? Mwaha woowi atthu a mulaponi khanaattittimiha ni khanaathokorerya saana athiyana. Ohiya-vo, Biibiliya onnintumererya waakhaliherya athiyana. Mwa ntakiheryo murummwa Paulo aahaaleela anna a muloko wa oRoma wira yaahaana omwaakhela saana Febe ni ‘omukhaliherya mwa sothene sinimuthowa’. (aRom. 16:1, 2) Makhalelo ni mahuweliwo a Paulo, yaanimwiiriha wuupuwela wira athiyana khiyaarina efaita, nto khaathokorerya saana. Masi nuumala okhala muKristau, Paulo aahipacerya omutakiha Yesu aattittimihaka athiyana ni waareerela murima. w20.09 20 itti. 1-2

Wira naakhaliherye ale nnaasomiha ahu Biibiliya ophavela olaleeryahiyo pooti waakoha awo wira: “Ikeekhai sa mBiibiliyani sinookhaliheryani sai okhalana okumi wooloka? Nyuwo khamunoona wira atthu akina anniphavela wiiwa ikeekhai iyo? Exeeni mukhanle anyu oopaka wira mwaakhaliherye atthu awo?” (Mir. 3:27; Math. 9:37, 38) Muhiliyale wira Yesu onrumme owiixuttiha atthu “wettela sothene” onrumale awe. Eyo enihela muhina malamulo manli maalupale, eyo piiyo, omphenta Muluku ni namwaattamanani ahu. Malamulo awo manli, annivarihana ni muteko woolaleerya ni waapaka awiixutti. (Math. 22:37-39) Tthiri ophenta etthu yuulupale enniiriha olaleya ihapari sooreera. Ekeekhai wira atthu akina nnaasomiha ahu Biibiliya annoovelela olaleerya. Masi nihaana waakhaliherya woona wira Yehova onimwaakhaliherya. Nto vakhaani-vakhaani woova waya onrowa ovukuwaka.—Esal. 18:1-3; Mir. 29:25. w20.11 3 itti. 6-8

Okathi muniilokiherya anyu, munvekeleleke ole munimusomiha anyu ohela muhina itthu sinimuxankiha. Nave munvekeleke Yehova wira ookhaliheryeni omwiixuttiha mwa enamuna enrowa onvara murima. Muhiliyale wira yoolakela anyu omukhaliherya mpakha opatisiwa. Owo ohaana ovaanela ni Yehova, niire so, onvekela Yehova ni owiriyana ele Muluku enihimya awe. Nto onrowa owerya sai onwiriyana Yehova? Owo ohaana omusoma Biibiliya khula nihiku. (Yox. 1:8; Esal. 1: 1-3) Owo ohaana olavula ni Yehova. Onrowa owerya sai opaka eyo? Onvekelaka khula nihiku, nto ehinatthi ni nuumala yoosoma ya Biibiliya muhaana onvekelela naxikola anyu ni murima wotheene muhimyaka nsina nawe. Nto vaavo onrowa awe woowiriyanakani nvekelaka ni murima wotheene onimwiixutta onvekela Yehova ni murima wotheene mwa nsina na Yesu Kristu. (Math. 6:9; Yoh. 15:16) Nkahaya muupuwele moota naxikola anyu a Biibiliya onrowa awe okhalana waataana wooloka ni Yehova vaavo onrowa awe onwiriyanaka Yehova khula nihiku ni olavula ni Yehova onvekelaka!—Yak. 4:8. w20.10 8 etti. 8; 9 itti. 10-11

Nave olelo-va, mutthenkeso wa Yehova onniimananiha vanceene wira miloko sotheene sikhale sootthokiheya ni sa murettele ntoko saari aya miloko sa eseekulu yoopacerya. (Mit. 16:4, 5) Mwa ntakiheryo, akhala wira munrowa oweha Yoosoma ya Owehaweha muloko mukina ekhale elapo anyu wala elapo ekina, nyuwo munimoona wira yoosoma eyo enihooleliwa mwa enamuna emosa ni onisommwa mwaha mmosaru olumwenku wotheene. Tthiri moohipisa munimoona wira khamurimenle! Nto vanniweryaneya okhalana wiiraana iwo, mwaha woowi ninnikhaliheriwa ni munepa wootteela wa Muluku. (Sof. 3:9) Nto mwiikoheke so: ‘Kiireke kinnikumiherya wiiraana ni murettele mmulokoni? Kiireke kinniwiiwelela ale annihoolela? Kiireke atthu akina annikiroromela otepexa wene akhala wira kookhalana miritti mmulokoni? Kiireke kinnipeherya mithukumano, kinnaakhaliherya ni waarumeela atthu akina?’ (Yak. 3:17) Moona wira yookhala enamuna munireerela anyu olokiherya, nvekeleke munepa wootteela wira wookhaliheryeni. Vaavo munrowa anyu otepaka olokiherya omutthu anyu ni miteko sanyu, anna ni arokora animoophentakani vanceene. w20.10 23 itti. 12-13

Nuulumo na Muluku, Biibiliya, pooti okhala ntoko espeelyo ahu. (Yak. 1:23-25) Anamunceene a hiyo, voosiisu anniiweha vaspeelyoni ahinatthi okhuma owaani. Nto eyo enninikhaliherya opaka marukunuxo ahinatthi atthu akina oniweha. Mwa enamuna emosaru, vaavo nimmusoma ahu Biibiliya khula nihiku nihaana oweha etthu nikhanle ahu oopaka marukunuxo mmuupuweloni ni moonelo ahu. Anna ni arokora anceene onnaasivela osoma yoolepa ya nihiku voosiisu ahinatthi okhuma owaani, nto eyo ennaakhaliherya wuupuwela nihiku notheene etthu asomme aya. Nave annuupuwela inamuna akhanle aya oovarihela muteko miruku iyo sa mBiibiliyani asomme aya. Nto ehaana okhala yoolema ahu khula nihiku omusoma Biibiliya ni wuupuwelela ele ninsoma ahu. Eyo pooti okhalaka ntoko wira etthu yaamukhaani. Masi musuweleke wira omusoma Biibiliya wookhalana efaita yinceene, maana onninikhaliherya ohihiya weetta ephiro ya okumi. Tthiri Biibiliya ori nto Raio-X yoowo oniwerya oweha etthu eri mweerutthuni mwa mutthu. Masi naaphavelaka ottottela mureerelo miruku sa mBiibiliyani ni atthu Muluku onaaruma awe, nihaana wiiyeviha. w20.11 18 etti. 3; 20 etti. 8

Nnaamwi maKristau a eseekulu yoopacerya yaalupatthiwa, okathi mukina yaanikhalana murettele. Nto okathi owo, awiixutti yaapaka exeeni? Awo yaanittottela mureerelo okathi owo wa murettele wira alaleye ihapari sooreera. Eliivuru ya Miteko enihimya wira alopwana ni athiyana ale oororomeleya ‘yanattittimiha Apwiya’. Nave, yaanivikaniha olaleya ihapari sooreera. Nto yaakhumelenle exeeni? Biibiliya onihimya wira awo “yantepa wunjerereya”. Moohaanyiherya Yehova aanireeliha oluttuweliwa wa maKristau ale okathi wa murettele. (Mit. 9:26-31) MaKristau a eseekulu yoopacerya yaanittottela mureerelo khula okathi wira alaleye ihapari sooreera. Mwa ntakiheryo, okathi murummwa Paulo aasuwenle awe wira yaahikhala atthu anceene yaaphavela ihapari sooreera wEefeso, owo aahittottela mureerelo eparakha eyo wira aapake awiixutti epooma ele. (1 aKor. 16:8, 9) Awiixutti yaaniluttuweliwa “elaleyaka masu Àpwiya”. (Mit. 15:30-35) Nto exeeni yaakhumelenle? Yoolepa ya olelo ennaakhula. w20.09 16 itti. 6-8

Nuumala Adamu opaka etampi owo ohiiphwanyiha okhwa ni ohaaphwanyiha okhwa anaawe ni osuulu awe wotheene. Mpakha olelo-va, hiyo ninnookhwa mwaha wa ohiiwelela wa Adamu. Masi, vaavo Muluku aamuhihimunxe awe mwanawe, hiyo nookhalana nlipelelo na muhoolo noohakalaliha. Paulo aahimmye so: “Siso-tho ohihimuwa w’alipa-òkhwa orwiye mwaha wa mutthu mmosá” Yesu. Nave murummwa Paulo aahimmye so: “Ntoko atthu othene sinkhwaya mw’Adamu, siso-tho othene anokhalihiwa-tho akumi mwa Kristu.” (1 aKor. 15:22) Paulo aaphavela ohimya exeeni vaavo aalempe awe wira “atthu othene sinkhwaya mw’Adamu”? Paulo uupuwela osuulu wa Adamu. Okhala wira osuulu wa Adamu woorava etampi ni ohimalela, awo annookhwa. (aRom. 5:12) Masi Adamu khonrowa wiirela mpantta ekrupu ya atthu anrowa ‘okhalihiwa-tho akumi’. Mwaha wa xeeni? Mwaha woowi mukuttho wowoopola Yesu ovanhe awe khoonttipiha etampi ya Adamu, maana Adamu aari mutthu oomalela ni aroolakelela ohimwiiwelela Muluku. Ele yaamwiiranenle Adamu, etthu emosaru enrowa owiiraneela atthu ale anlikanyihiwa “n’ipuri” vaavo “Mwana a mutthu” onrowa awe waaphukela, awo khanrowa ophwanya okumi woohimala.—Math. 25:31-33, 46; aHeeb. 5:9. w20.12 5 itti. 13-14

Malaikha oororomeleya anninivaha ntakiheryo nooloka. Okathi wa olamulelo wa Mwene Akhabi, Yehova aahivekela malaikha enamuna ya onwoka mwene ole ootakhala. Nto malaikha manceene yaahihimya moonelo aya. Masi Yehova aathanlale nlaikha nimosa paahi ni aahimmye wira moonelo wa nlaikha nne waamukhumela saana. (1 Mam. 22:19-22) Niireke malaikha makina yaahikhulumuwa yuupuwelaka so ‘xeeni moonelo aka ohithanliwe aya?’ Khekhanle etthu mBiibiliyani ekhanle oonikupaliha wira yaahikhalana moonelo owo. Maana malaikha toowiiyeviha ni murima wotheene ni aniphavela wira ovuwa wotheene ovahiweke Yehova. (Mak. 13:16-18; Wiis. 19:10) Nivarexexeke eparakha nrina ahu ya okhala Namoona a Yehova ni olaleya Omwene awe. Musuweleke wira iparakha khasinniiriha okhala atthu a faita vamaithoni va Muluku. Masi akhala wira naatthu oowiiyeviha ni oowiisumaaliha nnoophentiwaka vanceene ni Yehova vamosa ni anna. Nto mmuxontteleke Yehova wira ookhaliheryeni ohihiya okhala mutthu oowiisuumaaliha ni oowiiyeviha. Nave mwiimananiheke wuupuwela matakiheryo ooloka a arumeyi a Yehova yaari oowiisumaaliha ni oowiiyeviha aalempwale mBiibiliyani. Mwiira siiso, eyo enimookhaliheryani waarumeela anna ni arokora mpakha vaniwerya anyu ni moohikhanyereriwa.—1 Ped. 5:5 w20.12 26 itti. 16-17

Ekapaseeti, ori woopowa, enthoonyerya nlipelelo Yehova onivanhe awe. Nto nlipelelo ninniniiriha okupali wira Yehova onimwaatthuvela atthu otheene anipaka yootthuna awe ni hata akhwaaka onimwaahihimuxa. (1 aTes. 5:8; 1 Tim. 4:10; Tito 1:1, 2) Nlipelelo nahu na woopoliwa ninnikhapelela muupuwelo ahu. Nlipelelo nahu ninninikhaliherya waawehexexa anatiri a Muluku ni ninnikhaliherya ohitepa oxanka okathi wa mixankiho. Ninrowa wooniherya sai wira noowara ekapaseeti? Ninnooniherya wira noowara ekapaseeti, akhala wira moota nnoonela ahu itthu onoolikana ni moonelo wa Yehova. Mwa ntakiheryo, nlipelelo nahu khaninlipa ni mihakhu sowaakuva omala, masi ninlipa ni Muluku ahu. (Esal. 26:2; 104:34; 1 Tim. 6:17) Xoowa a munepa, onthoonyerya Nuulumo na Muluku, Biibiliya. Xoowa owo ookhalana owerya woopwetexa miyuupuwelo seiyo siniwiiriha atthu okhala ipottha sa sowiixuttiha ni soolema soohiloka. (2 aKor. 10:4, 5; 2 Tim. 3:16, 17; aHeeb. 4:12) Ninniixutta omurumeela oratteene xoowa owo nipakaka yoosoma ahu ya Biibiliya ni itthu nniixuttihiwa ahu ni mutthenkeso wa Muluku.—2 Tim. 2:15. w21.03 27 etti. 4; 29 itti. 10-11

Nlelo otthukweliwe ene, murummwa Yohani khaahiyale waalaleerya atthu voohimya sa Yesu. Nave aahooniherya wira aanaaphenta atthu akina. Mwa ntakiheryo, Yohani aahivekeliwa ni Muluku olepa eliivuru ya Wiisuupulula. Nave aahiroiha mmulokoni wira atthu otheene esuwele “itthu saarowa wiiraneya voohipisa”. (Wiis. 1:1) Woonasa wene nuumala Yohani otaphuliwa esisiro ya oPatmo, vanikhala ntoko wira owo aahilepa evangelyo awe voohimya sa okumi ni muteko woolaleerya wa Yesu. Nave Yohani aahilepa ikarta tthaaru wira aalipihe ni waamaliha anna ni arokora. Nyuwo munoowerya otakiha wiimananiha wa Yohani. Ele munipaka anyu mookumini mwanyu, munimooniherya akhala wira munnaaphenta atthu aahiiso nnaari. Muhiliyale wira olumwenku ola wa Satana oniphavela wira murumeeleke okathi ni ikuru sanyu sotheene wira mwiiphwanyihe mireerelo. Woonasa wene, mwiimananihaka ophwanya musurukhu munceene aahiiso ophavela ovuwa. Olelo-va, olumwenku wotheene maKristau eekeekhai anniimananiha olaleya Omwene. Anniviriha okathi wira alaleye ihapari sooreera ni waakhaliherya atthu okhalana waataana wooloka ni Yehova. w21.01 10 itti. 9-10

Vanweryaneya Yonathani omukhalela nrima Davidi. Okhala wira yena aari mwaana a Mwene nto aahikhalana ehakhi ya omuranttela paapa awe. (1 Sam. 20:31) Masi Yonathani aari mutthu oowiiyeviha ni aaniroromeleya wa Yehova. Maana Yonathani aahikhaliherya yoothanla ya Yehova ni murima wotheene vaavo aamuthanlale awe Davidi okhala mwene aattharelana. Nave Yonathani aahiroromeleya wa Davidi nnaamwi paapa awe aarowa onanariwa vanceene. (1 Sam. 20:32-34) Okhala wira Yonathani aanimphenta mwekeekhai Davidi, nto khaamuthokorerya ntoko nwanani awe. Yonathani aanisuwela orumeela saana ikaruma sa ekhotto, nave owo aari nakhotto oolipa murima. Yonathani ni Sawuli yaanisuweliwa okhala “atthu yari òveyaveya onvikana xaka: yari a ikuru onvikana kharamu”. (2 Sam. 1:22, 23) Tthiri Yonathani anwerya wiivuwiha mwaha wa itthu sooloka aapanke awe. Ohiya-vo, owo khaimananiha okhala mutthu ootepexa ovuwa onvikana Davidi ni khaakhalenle nrima itthu sooloka Davidi aarina awe. Masi Yonathani aanisiveliwa vanceene olipa murima wa Davidi ni omuroromela wawe Yehova. Musuweleke wira Yonathani aapacenrye omphenta Davidi ntoko iiphenta awe nuumala owo omwiiva Goliyathi. w21.01 21 etti. 6; 22 itti. 8-9

MaKristau otheene ahaana wiiwelela okhulupale wa Yesu Kristu yoowo ori muhooleli oomalela. Masi vaavo muthiyana muKristau onitheliwa awe, owo ohaana wiiwelela okhulupale wa mulopwana oohimalela. Opaka eyo khivanikhweya. Nto vaavo murokora onuupuwela awe otheliwa, ohaana wiikoha so: ‘Exeeni enikikupaliha wira munna ola onoorowa okhala muhooleli a etthoko ooloka? Kiireke onniluttuweliwa ovara miteko sa Muluku? Akhala wira khoniluttuweliwa, etthu xeeni enikikupaliha wira nuumala othelana onoorowa okikhaliherya okhalana waataana wooloka ni Yehova?’ Nave, ti vooloka murokora owo wiikoha so: ‘Mikhalelo xeeni kirina aka sinrowa okhaliherya ekasamento ahu? Kiireke ka mutthu oopixa murima ni oovaha? Kiireke kookhalana waataana woolipa ni Yehova?’ (Mus. 4:9, 12) Akhala wira muthiyana onoopaka soothanla sooloka ohinatthi otheliwa, eyo enookhaliherya ekasamento awe okhumela saana ni ohakalala. Arokora anceene, annivaha ntakiheryo nooloka na owiiwelela axiiyeya. Nto ahaana ottottopeliwa! w21.02 8 itti. 1-2

Iyaakha iya sookiserya, anna ni arokora anceene anniixutta nttaava nsya wira yincererye muteko aya woolaleerya ni wira yarumeeleke miloko soothowa anamalaleerya nihinlavuliwa nttaava naya. Awo annipaka yoothanla eyo wira amurumeeleke moomalela Yehova. Nnaamwi siviraka iyaakha sinceene wira asuwele olavula oratteene nttaava nsya, awo annikhaliherya muloko mwa inamuna soovirikana. Mikhalelo sooloka ni itthu anisuwela aya sinnaalipiha anna ni arokora mmulokoni. Tthiri ninnaavaha efaita anna ni arokora awo! Nikhuuru na axitokweene nihooveleleke omuthanla munna wira okhale mutokweene wala murumeyi oorumeela mwaha woowi khonsuwela olavula oratteene nttaava ninlavuliwa muloko owo. Axitokweene ahaana onvarerya munna owo attharaka ele Biibiliya onihimya awe wira munna okhale mutokweene wala murumeyi oorumeela ohiya akhala wira onnisuwela olavula oratteene nttaava na muloko owo aahiiso nnaari.—1 Tim. 3:1-10, 12, 13; Tito 1:5-9. w20.08 30 itti. 15-16

Atthu anceene anuupuwela wira anoohakalala akhala wira anookhalana okumi wooloka, musurukhu munceene ni ohakalala vatthokoni vaya. Masi enamuna ya ohakalala murummwa Yakobo aalempe awe eniirela mpantta mikhalelo sinikumiheriwa ni munepa wowaarya wa Muluku. Nto ohakalala iwo khonivarihana ni mukhalelo wa mutthu. (aGal. 5:22) MuKristau onniphwanya ohakalala wekeekhai mwaha woosuwela wira onnimusiveliha Yehova ni onnitthara ntakiheryo na Yesu. (Luka 6:22, 23; aKol. 1:10, 11) Ohakalala wahu onlikana ni mooro wa ekhanttiyero, nto wira ohittiphe ohaana okhapeleliwa wira ohiphwanyihe epheyo ni epula. Mwa enamuna emosaru, vanniweryaneya ohihiya ohakalala hata siniphwanyaka mixankiho sinceene. Tthiri khaninrowa ohiya ohakalala hata niwereiwaka aahiiso nihirina musurukhu munceene. Nave vanniweryaneya ohakalala hata niruwaniwaka wala nilupatthiwaka ni amusi ahu wala atthu akina. Tthiri ohakalala wahu onnincerereya ntoko mooro hata atthu akina anilupatthaka. Nto vaavo ninlupatthiwa ahu mwaha wa waamini wahu, eyo enooniherya wira na atthareli eekeekhai a Kristu. (Math. 10:22; 24:9; Yoh. 15:20) Eyo ti etthu yaamwiirinhe murummwa Yakobo olepa moolumo a yoolepa ya olelo. w21.02 28 etti. 6

Vaavo munimusoma anyu Biibiliya, mwaphwanya soolepa sinittittimiherya otthuneya waya okhala oomaaleleya ni omuroromela Yehova muheleke mmuru. Nyuwo pooti osoma soolepa iyo moorunya ni olepa nipuro vanrowa aya wookhweelakani oweha. Yehova aahimuruma Yoxuwa osoma moohirunya eliivuru ya Nlamulo khula nihiku. (Yox. 1:8, 9) Opaka eyo yammukhaliherya ohiya paahi opaka itthu mwa miruku masi-tho oxintta woova wawe vaavo aavare awe yoothanleliwa awe. Mwa enamuna emosaru, iversiikulu sinceene sa mBiibiliyani, pooti wookhaliheryani okhala oomaaleleya okathi munikumanana anyu mixankiho saarowa owiirihani okhala mutthu oowoova. (Esal. 27:1-3; Mir. 3:25, 26) Okathi wa mithukumano hiyo ninnilipihiwa vanceene ni ipantte sinilavuliwa, ikomentaario ni ovaanela woolipiha wa anna ni arokora. (aHeeb. 10:24, 25) Ohiya-vo, etthu ekina enrowa onikhaliherya okhala saana ori waatthukulela murima ahu apatthani nnaaroromela ahu a mmulokoni. w21.01 6 itti. 15-16

Okathi mwaapatisiwe anyu, mwaahooniherya waamini wuulupale ni omuroromela Yehova. Tthiri moohakalala, Yehova aahoovahani eparakha ya wiirela mpantta emusi awe. Nto vano, etthu mukhanle anyu oopaka, ori ohihiya omuroromela Yehova. Nyuwo pooti woonaka wira vannikhweya omuroromela Yehova vaavo muniphavela anyu opaka yoothanla enrowa oturuka okumi anyu. Masi ankhi soothanla sikina? Ti vooloka omuroromela Yehova vaavo munipaka anyu soothanla. Ohela muhina soothanla voohimya sa matthekulelo, muteko wa mulaponi munrowa anyu ovaraka ni soolukama sanyu sa muhoolo! Nto okathi munipaka anyu soothanla, muhiroromeleke osuwela anyu. Ohiya-vo, muroromeleke malakiheryo a mBiibiliyani wira yookhaliheryeni opaka soothanla ni ovarihela muteko malakiheryo awe. (Mir. 3:5, 6) Mwiira siiso, munoomuhakalaliha Yehova ni munoottittimihiwaka ni atthu akina a mmulokoni. Okhala wira otheene ahu na anatampi, nto okathi mukina nyuwo pooti opaka itthu soohiloka. Masi, eyo ehookhoottiheryekeni opaka sotheene muniwerya anyu wira nvare muteko wa Yehova. w21.03 6 itti. 14-15

Niireke nyuwo munoolupatthiwa ni amusi anyu? Niireke munikhala elapo muteko ahu onikhoottihiwa aya ni kuvernu? Akhala wira ti siiso, yoolepa ya 2 Timootheyo 1:12-16 ni 4:6-11, 17-22, enimookhaliheryani ni woomaalihani vanceene. Murummwa Paulo aalempe iversiikulu iyo otthukweliwe ene mukhatteya. Muhinatthi osoma yowiiraneya eyo, munvekele Yehova mmuleelaka muxankiho anyu ni moota munoonela anyu. Okathi munivekela anyu, muhimyeke muxankiho anyu mooluluwanya. Nuumala-vo, munvekeleke Yehova wira ookhaliheryeni oweha malakiheryo a yowiiraneya ela ya Paulo ni moota enrowa aya wookhaliheryani woona etthu mukhanle anyu oopaka. Yehova, aahimuleela Paulo wira aamulupatthiwa mwaha wookhala muKristau. (Mit. 21:11-13) Masi Yehova aamukhalihenrye sai Paulo? Yehova aahaakhula mavekelo a Paulo ni aamakela onvaha ikuru. Paulo aahileiheriwa wira aamutthuveliwa mwaha wa muteko wotheene aavanre awe. Nave Yehova aahaaruma apatthani oororomeleya a Paulo wira amukhaliheryeke. w21.03 17-18 itti. 14-15, 19