Agosto

Atthu anrowa ottottela mureerelo mukuttho Yesu ovanhe awe, taale paahi arina waataana wooloka ni yena. Yesu aahimmye wira aahileva “ekumi awe mwaha w’apatthani awe”. (Yoh. 15:13) Atthu oororomeleya yaamurumeela Yehova, yaawo yaakhanle Yesu ohinatthi orwa valaponi anookhalana eparakha ya wiixuttihiwa voohimya sa Yesu ni omphenta. Alopwana ni athiyana awo oororomeleya nuumala ohihimuxiwa, anrowa wiixuttihiwa wira akhale apatthani a Yesu ni ophwanya okumi woohimala. (Yoh. 17:3; Mit. 24:15; aHeeb. 11:8-12, 24-26, 31) Ninnihakalala ovara vamosa ni Yesu muteko woolaleya ni owiixuttiha atthu ihapari sooreera sa Omwene. Okathi aari awe valaponi, Yesu aahisuweliwa okhala mwiixuttihi. Nuumala otthikela wiirimu, Yesu oothanliwa okhala muhooleli a miloko ni onnivikaniha ohoolela muteko woolaleerya ni owiixuttiha atthu. Owo onniweha ni onnivaha efaita wiimananiha wanyu waakhaliherya atthu anceene omusuwela yena ni Tiithi awe. Tthiri wira nivare muteko owo, nihaana okhaliheriwa ni Yehova vamosa ni Yesu.—Yoh. 15:4. w20.04 22 itti. 7-8

Nuulumo noowi ‘mwene a onorte’ yaavahiwa mamwene yaalamulela mittetthe sa onorte wIsarayeli, vano ‘mwene a osul’ yaavahiwa mamwene yaalamulela osul wIsarayeli. (Dan. 10:14) Ohinatthi Pentekoositi a 33 Nuumala Kristu orwa, aIsarayeli naari nloko noothanliwa ni Muluku. Masi okhuma Pentekoositi a 33 Nuumala Kristu orwa, Yehova ohooniherya oratteene wira awiixutti a Yesu tari atthu awe. Nto vannooneya wira mpantta muulupale wa eprofesia ya Daniyeli ekapiitulu 11 enaahimya awiixutti a Kristu, ohiya nloko na Isarayeli. (Mit. 2:1-4; aRom. 9:6-8; aGal. 6:15, 16) Nuuvira okathi, mamwene manceene yaahikhala mwene a onorte ni mwene a osul. Hata vaari siiso, sookhala itthu tthaaru [3] mamwene awo anlikana aya. Yoopacerya, otheene aya yaahaalupattha atthu a Muluku. Ya nenli, enamuna yaathokorerya aya atthu a Muluku, awo yaahooniherya wira annimunyokha Muluku eekeekhai Yehova. Ya neeraru, mamwene awo anniwanela omwene. w20.05 3 itti. 3-4

Yehova onniiriha itthu okhumelela, vaavo onipaka awe sotheene wira opake yootthuna awe. Nave, Yehova pooti owiiriha arumeyi awe okhala ele oniphavela awe wira opake yootthuna awe. (Yes. 64:8) Mwa inamuna iyo, Yehova onniiriha wiiraneya yoolakela awe ni yootthuna awe. Tthiri, khiivo etthu ekhanle ookhoottiherya wiiraneya soolakela sa Yehova. (Yes. 46:10, 11) Wuupuwelela etthu Tiithi ihu a wiirimu opanke awe ni onnikhaliherya awe opaka, enoonikhaliherya omuxukhurela vanceene. Mwa ntakiheryo, vaavo nnuupuwelela ahu itthu sotheene opattunxe awe, ninnitikinihiwa vanceene mwaha wa itthu iyo sootikiniha opanke awe. (Esal. 8:4, 5) Nave vaavo nnuupuwelela ahu itthu Yehova onikhalihenrye awe opaka wira nivare muteko awe, eyo ennincererya omuttittimiha wahu. Tthiri nsina na Yehova ti nookuxa murima! Nlo ninhela muhina omutthu wotheene wa Tiithi ihu a wiirimu, itthu sotheene opanke awe ni onrowa awe opaka.—Esal. 89:8, 9. w20.06 9-10 itti. 6-7

Tthiri epheyo etthu enaakhaliherya apinaatamu ni axinama omumula wira akhaleke akumi. Masientista anihimya wira, eriyari ya mwaakha mmosa paahi, soopattuxiwa sinnirumeela epheyo itonelaata ibilyau sinceene. Nuumala soopattuxiwa orumeela epheyo, awo annikumiha epheyo ekina eniitthaniwa dióxido de carbono. Hata vari siiso, epheyo soopattuxiwa enimumula aya khenimala, nave erimu khenisarya dióxido de carbono. Mwaha wa xeeni? Mwaha woowi Yehova opaka miri soovirikana, sikina saamukhaani sikina suulupale, seiyo sinimurumeela dióxido de carbono sinakumiha epheyo eniihaniwa oxigênio. Moota epheyo eyo eneetta aya enooniherya ekeekhai eri yoolepa ya olelo. Elapo enninivaha itthu sinceene sooloka. Nto ninrowa wooniherya sai wira ninnixukhurela vanceene yoovaha ela? (Esal. 115:16) Enamuna emosa, ori wuupuwelela itthu Yehova opattunxe awe. Opaka eyo, enoonikhaliherya omuxukhurela Yehova khula nihiku mwaha wa itthu onnivaha awe. Nave ninnooniherya wira ninnixukhurela vanceene ovahiwa elapo ela vaavo ninrattela ahu mapuro ninkhala ahu. w20.05 22 itti. 5, 7

Yehova onnivilela omwareeliwa iwo ooniheryaka opixa murima, ankhili ni exariya. Nave, Yehova onnooniherya owerya wawe mwa inamuna soovirikana. Ohiya-vo, itthu sotheene onipaka awe onipaka moophenta. (1 Yoh. 4:8) Tthiri, Yehova khonahiye otteeliha nsina nawe. Mpakha mahiku ahu ala, nlelo Satana onniveeha nsina na Muluku. Wira opake eyo, owo onniwiiriha atthu waanyiherya akhala wira Muluku tooreera murima, oowerya sotheene, a xariya, ankhili ni oophenta. Mwa ntakiheryo, Satana onniimananiha owiiriha atthu wuupuwelaka wira Yehova khahiyo Mpattuxa. Nave hata atthu akina akupaliki wira Muluku ookhala, Satana onniwiiriha atthu awo wuupuwela wira malamulo ni malakiheryo a Yehova khahiyo a xariya ni annaakhoottiherya opuha. Nave atthu awo aniixuttiha wira Yehova tootakhala murima ni onnaapaha atthu omooroni. Nto vaavo aniiwa aya itthu iyo sowoothiwa, vannikhweya okupali ni okhootta wira Yehova namalamulela a xariya. Nlelo Satana ohinatthi opwetexiwa, owo onnipaka eyo wira atthu akhale mpantta awe. Niireke onoowerya opaka eyo? w20.06 5 itti. 13-15

Miloko sinceene aakhala anna ni arokora aniimananiha wiixutta nttaava nsya. Nto eyo pooti waaxankiha ohimya mootaphuwa moonelo ni muupuwelo aya. Akhala wira khaninweha paahi moota anilavula aya nttaava nsya, nnimoona omphenta waya Yehova ni wiimananiha waya omurumeela. Nto vaavo ninweha ahu mikhalelo iyo sooloka arina aya, nnimwaavahaka efaita ni waattittimiha vanceene anna ni arokora awo. Tthiri khaninrowa ohimya wira: “Miyo nkinophavelani”, mwaha woowi khansuwela olavula oratteene nttaava nahu. (1 aKor. 12:21) Ninnimuxukhurela vanceene Yehova mwaha woowi onvaha khula mmosa a hiyo opuro awe mmulokoni. Hata niri ene alopwana wala athiyana, nithenle ene wala nihithenle, nri ene amiravo wala nuuluvanle ene, nilavulaka oratteene nttaava aahiiso nnaari, Yehova ni atthu akina anninivaha efaita ni oniphenta. (aRom. 12:4, 5; aKol. 3:10) Nto khula okathi niimananiheke oweha etthu nikhanle ahu oopaka wira naalipihe anna ni arokora mmutthenkesoni mwa Yehova. w20.08 31 itti. 20-22

Epooma ya wAthena yaahisareya amuluku a ethiru, orupihana woohiloka ni ifilosofia sa mapagau. Paulo khaahiyale waalaleerya atthu a wAthena mwaha wa itthu iyo soohiloka aahiiso, mwaha wa onveeha. Owo aanuupuwela wira aahikhala muKristau hata aari mutthu ooveeha, ‘alupattha, [ni] ahaxa’ awiixutti a Yesu. (1 Tim. 1:13) Ntoko Yesu aakupali awe wira Paulo aamukhala muKristau, Paulo aanikupali wira atthu a wAthena yanwerya okhala awiixutti a Yesu. Moonelo owo wooloka waahikhaliherya. (Mit. 9:13-15) Eseekulu yoopacerya, atthu a makhalelo oovirikana yaahikhala awiixutti a Yesu. Okathi Paulo aalepenle awe maKristau yaakhala oKorinto, owo aahimmye wira atthu akina a muloko ole yaari anakrime ni yaanirupihana moohiirya. Tivonto Paulo ancerenrye awe oriki: “Akinaku a nyuwo yetta siso. Nto vano morapihiwa”. (1 aKor. 6:9-11) Atthu ale a oKorinto yaahipaka marukunuxo khukhala atthareli a Yesu. Vaakhanle wira mwaakhala okathi ole, niireke mwanwerya oweha eyo? w20.04 12 itti. 15-16

Axitokweene ahaakuveleke ohiwoona saana ale aniikoha akhala wira ninniphwanya mireerelo mwaha wa omurumeela Yehova. Ohiya waakuvela waapwapwela, axitokweene ahaana wiimananiha osuwela etthu emmwiiriha olavula aahiiso opaka itthu mwa enamuna eyo. Nuumala osuwela ahaana omurumeela Biibiliya wira yaakhaliherye ni waalipiha. Waahikhala okathi Eliya aamutthyawa awe Pwiyamwene Yezabeli. (1 Mam. 19:1-3) Eliya uupuwela wira wiimananiha wawe omurumeela Yehova khiwaarina efaita ni onaphavela okhwa. (1 Mam. 19:10) Ohiya ompwapwela, Yehova aahimuleiherya Eliya wira khakhanle mekhawe ni ahaana ororomela okhaliheriwa ni ikuru sa Muluku, ni waahikhala muteko munceene Eliya aarowa awe ovara. Nave Yehova aahinwiriyana Eliya moopixa murima ni aahinvaha muteko mukina. (1 Mam. 19:11-16, 18) Etthu xeeni nniixutta ahu? Otheene ahu, otepexa wene axitokweene ahaana othokorerya oratteene ipwittipwitthi sa Yehova. Hata mutthu owo olavulaka itthu soohiloka aahiiso uupuwelaka wira Yehova khonrowa omulevelela, axitokweene ahaana onwiriyana oratteene mutthu owo. Nuumala-vo, ahaana wiimananiha omooniherya wira Yehova onnimphenta mutthu owo. w20.06 22 itti. 13-14

Yehova oniphavela wira nikhalaneke okathi woohakalaliha ni apatthani ahu ni amusi ahu. (Esal. 133:1) Yesu aahikhalana apatthani ooloka. (Yoh. 15:15) Biibiliya onnihimya mareeliho anikhumelela mwaha wookhalana apatthani ooloka. (Mir. 18:24) Nave onnihimya wira khahiyo etthu yooloka wiivalaanya ni atthu akina. (Mir. 18:1) Atthu akina anuupuwela wira waarumeela redes sociais enamuna emosa yoowaaphwanya apatthani anceene ni ohiivalaanya. Masi nihaana okhalana ephoole vaavo nnaarumeela ahu redes sociais. Asomi akina anihimya wira atthu yaale aniviriha okathi munceene awehaka ifootu wala ikomentaario siheliwe redes sociais pooti waaphwanya omeekha wala oriipiwa murima. Mwaha wa xeeni? Vanikhala ntoko wira atthu anihela ifootu saya munternetini anihela okathi woohakalaliha wa okumi aya. Nave anithanla ifootu saya sooreerexa, sa apatthani aya ni mapuro oohakalaliha yaari aya. Nto atthu akina aniweha ifootu iyo, anniilikanyiha ni atthu awo, nto anoona wira makhalelo aya khalonke wala kharina efaita. w20.07 5-6 itti. 12-13

Erevista The Watchtower (Owehaweha) ya 1 a Outubro a 1988 yaahimmye wira: “Axitokweene ahaana osuwela wira Yesu pooti orumeela munepa wootteela wira omukhaliherye khula mutokweene ohimya malakiheryo a mBiibiliyani, anrowa waakhaliherya axitokweene otheene woona yoopaka ni opaka yoothanla yooloka. (Mit. 15:7-15) Munepa wootteela onnaakhaliherya axitokweene otheene ohiya mmosa paahi”. Mutokweene onaattittimiha axitokweene akhwaawe, khoneererya omakela okhala oopacerya olavula okathi axitokweene anithukumana aya. Owo khonilavula ikwaha sinceene ni khonoona wira okhala wene moonelo awe tori wooloka. Ohiya-vo, owo onnihimya moonelo awe moowiiyeviha ni moowiisuumaaliha. Nave onnaawiriyana oratteene okathi axitokweene akhwaawe anilavula aya. Ti vooloka otthara malakiheryo a mBiibiliyani ni malakiheryo anikumiheriwa ni “murumeyi òroromeleya ni ànkhili”. (Math. 24:45-47) Vaavo axitokweene aniphentana aya ni ottittimihana okathi anithokorerya aya myaha, munepa wootteela wa Muluku onnikhala naawo ni onimwaakhaliherya opaka yoothanla yooloka.—Yak. 3:17, 18. w20.08 27 itti. 5-6

Awanani a murummwa Paulo yaahikhalana ikuru ni owerya onvikana yena. Ikwaha sinceene awo yaanaaruma atthu ommana Paulo ni omutthukwela mukhatteya. Ntoko Davidi, Paulo aanihasuliwa ni atthu yaale yaarowa okhala apatthani awe. Hata atthu akina mmulokoni khiyamphavela Paulo. (2 aKor. 12:11; aFil. 3:18) Masi Paulo aahiwerya waaxintta atthu otheene yaamulupattha. Moota xeeni? Owo khaahiyale olaleerya hata aalupatthiwa vanceene. Owo aahivikaniha waaroromela anna ni arokora hata yaamunyoonyiha. Etthu yootepa otthuneya, okhala wira aahiroromeleya wa Muluku mpakha wiiviwa. (2 Tim. 4:8) Paulo aahixintta mixankiho sinceene, ohiya mwaha woororomela ikuru sawe, masi mwaha woororomela ikuru sa Yehova. Ankhi nyuwo? Niireke munoohasuliwa wala onyokhiwa? Yoolakela anyu ohela Nuulumo na Muluku mmuupuweloni ni vamurimani va mutthu oniphavela. Nyuwo pooti ophwanya yoolakela eyo akhala wira munoopaka itthu iya: Omuroromela Biibiliya okathi munaakhula anyu makoho a atthu; waattittimiha ni waareerela murima atthu ahinoothokoreryani saana ni owiirela itthu sooloka atthu othene waahela muhina ale anoonyokhani.—Math. 5:44; 1 Ped. 3:15-17. w20.07 17-18 itti. 14-15

Niireke Yehova toowiiyeviha? Aayo, ntoko Davidi aahimmye awe. (Esal. 18:36) Okathi aahimmye awe moolumo awo, woonasa wene Davidi uupuwela okathi profeta Samuweli aaronwe awe etthoko ya paapa awe Davidi wira omuthanle mwene a muhoolo a nloko na Isarayeli. Davidi aari mwaana ookiserya oyariwa, masi ti yoowo aathanliwe ni Yehova wira omuranttele Mwene Sawuli. (1 Sam. 16:1, 10-13) Davidi aarina moonelo mmosaru a mulipa-oolepa Esalimo 113. Omuhimyaka Yehova, owo aalempe so: “Apwiya annimwemexa masikhini vantthupini varyawe: annimukumiha mulipa-òthoiwa ori osalani . . . [anamukilaathiha] vamosá n’atthu òttittimiheya”. (Esal. 113:6-8) Vaavo ninweha ahu moota Yehova onaathokorerya awe apinaatamu oohimalela, ninniixutta itthu sinceene. Khahiyo paahi Yehova onneemererya omukokhorela, masi-tho onninthokorerya okhala apatthani awe. (Esal. 25:14) Wira vaweryaneye okhala apatthani awe, Yehova oonivaha Mwanawe wira nileveleliwe itampi sahu. Moohaanyiherya Yehova toothunku ni oomoriwa ikharari. Eyo enooniherya wira Yehova, Muluku oowiiyeviha. w20.08 8 itti. 1-3

Yehova onnisuwela okathi ni nihiku onrowa awe opwetexa olumwenku ola wootakhala. (Math. 24:36) Yehova khonrowa ohiya opixa murima wira opwetexe olumwenku ola okathi ohinatthi ophiya. Owo onniphavela waahihimuxa atthu akhwiiye, masi nlelo onnipixa murima wira opake eyo. (Yobi 14:14, 15) Yehova onlipelela okathi wooreerela wira aahihimuxe atthu awo. (Yoh. 5:28) Tthiri ninnixukhurela vanceene opixa murima wa Yehova, maana eyo enniniixuttiha etthu yuulupale. Nkahaya muupuwele ela: Mwaha wa opixa murima wa Yehova atthu anceene ‘arukunuxa murima’, onihela muhina hiyo. Yehova oniphavela wira atthu anceene akhalane eparakha ya ophwanya okumi woohimala. Nto nihaana wooniherya wira ninnixukhurela opixa murima wa Yehova. Moota xeeni? Niimananihaka owaavya atthu otheene aniphavela “ekumi ehinimala” wira naakhaliherye omphenta ni omurumeela Yehova. (Mit. 13:48) Niira siiso, nnimwaakhaliherya atthu awo ottottela mureerelo opixa murima wa Yehova ntoko hiyo ninttottela ahu. w20.08 18 etti. 17

Itthu sotheene naxikola anyu oniixutta awe mBiibiliyani sihikhaleke paahi mmuupuweloni mwawe, sihaana okela mpakha vamurimani vawe. Mwaha wa xeeni? Mwaha woowi, murima onihela muhina soophavela ni moonelo. Nto eyo tenrowa omukhaliherya ovarihela muteko ele eniixutta awe. Yesu anisuwela owiixuttiha oratteene atthu. Nto atthu ale yaanimutthara mwaha woowi aanaavara murima. (Luka 24:15, 27, 32) Naxikola anyu ohaana onweha Yehova ntoko Mutthu eekeekhai, eyo piiyo, mutthu onreerela awe okhalana waataana wooloka. Nave ohaana omoona Yehova ntoko Tiithi, Muluku awe ni Mpatthani awe. (Esal. 25: 5) Nto okathi munimusomiha anyu muhaana omukhaliherya naxikola anyu a Biibiliya oweha mikhalelo sookuxa murima sa Muluku ahu. (Okhum. 34:5, 6; 1 Ped. 5:6, 7) Moohicikha mwaha munithokorerya anyu, mwiimananiheke omukhaliherya naxikola anyu oweha omutthu wa Yehova ni mmukhaliheryeke woona mikhalelo sooloka sa Yehova ntoko ophenta, oreera murima ni othunku. Yesu aahimmye wira: “Yoruma yulupalexa ni yopajerya” tiila: “Mwaphenteke Apwiya Muluku anyu”. (Math. 22:37, 38) Nto mmukhaliheryeke naxikola anyu omphenta Yehova ni murima awe wotheene. w20.10 10 etti. 12

Yesu aanaattittimiha vanceene athiyana otheene. (Yoh. 4:27) Tthiri Yesu aanaattittimiha vanceene athiyana yaapaka yootthuna ya Tiithi awe. Owo aanaathokorerya athiyana ntoko axirokorawe. Nave aanaathokorerya alopwana ni athiyana ntoko amusi awe. (Math. 12:50) Nave-tho okathi wotheene, Yesu aari mpatthani a ekeekhai a arokora awo. Mwa ntakiheryo nkahaya muupuwele opatthani Yesu aarina awe ni Maria ni Martha. Woonasa wene, awo khiyaatheliwe. (Luka 10:38-42) Okathi wotheene Yesu aanaahiya ootaphuwa athiyana awo. Mwa ntakiheryo, Maria khoovelenle okilaathi aari Yesu ntoko awiixutti akina yiira aya. Nave okathi Martha aanyoonyihenye awe mwaha woowi Maria khaamukhaliherya olokiherya eyoolya, Martha khoovelenle omuleela Yesu moonelo ni muupuwelo awe. Nto Yesu aahittottela mureerelo okathi ole wira omwiixuttihe itthu sa efaita Martha ni Maria. Nave Yesu aahooniherya wira aanaathokorerya ni aanaavaha efaita, aaxukuryaka ikwaha sinceene awo ni murokoraya iihaniwa Laazaro. (Yoh. 12:1-3) Nto okathi Laazaro ahaareere awe owereiwa, Maria ni Martha yaanikupali wira yaamukhaliheriwa ni Yesu.—Yoh. 11:3. w20.09 20 etti. 3; 21 etti. 6

Awiixutti a Yesu yaanilipelela wira Omwene wa Muluku waamukhumelela voohilekela wira owoopole opuheriwa ni aRoma. Nave hiyo ninnilipelela wira Omwene wa Muluku orwe, omalihe mixankiho ni oruuha murettele olumwenku wotheene. (2 Ped. 3:13) Masi nihaana opixa murima nlipelelaka ophiya okathi Yehova othanlale awe. Ehinatthi Epula ya Mutaaseke, waahivira okathi munceene Nowe otekaka ekalawa ni olaleyaka exariya. (2 Ped. 2:5; 1 Ped. 3:20) Okathi Abrahamu aamukoha awe itthu sinceene Yehova voohimya sa moota yaarowa aya opwetexiwa epooma ya oSodoma ni oGomora, Yehova aahimpixerya murima. (Maph. 18:20-33) Saahivira iyaakha sinceene nloko na aIsarayeli nihiroromeleyaka wa Yehova, hata vari siiso Yehova aanapixerya murima. (Neh. 9:30, 31) Olelo-va, ninnoona wira Yehova onnipixa murima, maana nlelo onnaavaha eparakha atthu wira “erukunuxe murima”. (2 Ped. 3:9; Yoh. 6:44; 1 Tim. 2:3, 4) Vaavo nnuupuwela ahu ntakiheryo na Yehova, khamunoona wira nookhalana mathowa manceene wira nihihiye olaleya ni owiixuttiha atthu moopixa murima? w20.09 10 itti. 8-9

Okathi Yehova onrowa awe waahihimuxa atthu, owo onimwaattikiherya muupuwelo, mikhalelo ni anrowa okhala ntoko yaari aya ahinatthi okhwa. Nkahaya muupuwele ele enitaphulela aya. Yehova onnoophentani vanceene, maana onniweha itthu sotheene munuupuwela anyu, moonelo, malavulelo anyu, itthu munipaka anyu ni ookhalana owerya wa wuupuwela itthu iyo sotheene. Nto okathi onrowa awe woohihimuxani, vanoomukhweela woottikiheryani muupuwelo anyu, omutthu anyu ni mikhalelo sotheene mwaarina anyu. Mwene Davidi aanisuwela wira Yehova onnimuthokorerya khula mmosa a hiyo. (Esal. 139:1-4) Etthu xeeni nniixutta ahu mwaha woosuwela wira Yehova onninsuwela oratteene? Wuupuwela wira Yehova onninsuwela oratteene onninikhaliherya ohixanka. Mwaha wa xeeni? Muupuweleke wira Yehova onninikhapelela vanceene. Sinnimusivela mikhalelo murina anyu, seiyo siniwiirihani okhala mutthu a vameekhaaya. Nave onnuupuwela itthu sookhumelenleni mookumini mwanyu seiyo siniwiirihani okhala mutthu ntoko muri anyu. Ti vooloka osuwela eyo! Muhikhala-khale muupuwelaka wira muri mekhinyu. Maana Yehova ori ni nyuwo khula okathi wa okumi anyu wira ookhaliheryeni.—2 Wah. 16:9. w20.08 17 itti. 13-14

Yehova waanimusivela vanceene owiixuttiha atthu awe. Owo aaphavela wira amusuwele, amphenteke ni akhaleke mahiku otheene okhala wira anaawe oophentiwa. Itthu iyo sotheene sanweryaneya mwaha woowi aaniwiixuttiha. (Yoh. 17:3) Yehova aanirumeela muloko wa eseekulu yoopacerya wira owiixuttihe atthu awe. (aKol. 1:9, 10) Munepa wootteela yoowo ori “mulipa-òkhaliherya” Yesu aaleihenrye awe waahaakhaliherya vanceene atthareli ale a eseekulu yoopacerya. (Yoh. 14:16) Tthiri munepa wootteela waahaakhaliherya awiixutti wiiwexexa Nuulumo na Muluku ni waahiwuupuxerya itthu sotheene Yesu aahimmye awe vaavo muhoolo mwaya yaalepa aya Ivangelyo. Osuwela waahilipiha waamini wa maKristau a eseekulu yoopacerya, omphenta waya Muluku, omphenta waya Mwaana ni ophentana waya mukina ni mukhwaawe. Yehova aahihimya vahinatthi wira “yaphiyá mahiku aya” atthu a maloko otheene yaamurowa vamwaako vawe wira yiixuttihiwe iphiro sawe. (Yes. 2:2, 3) Olelo-va ninnoona yiiraneyaka eprofesia ela. w20.10 24 itti. 14-15

Etthu xeeni ekhanle oomwiiriha mutthu okhootta miruku onivahiwa awe ni mpatthani awe? Wiixinnuwiha. Tthiri atthu oowiixinnuwiha annikhootta soowiixuttiha sooreera. Nave awo annikhootta “wiwa ekekhai”. (2 Tim. 4:3, 4) Ohiya-vo atthu awo annikhootta ovahiwa miruku, mwaha woowi anuupuwela wira toosuwelexa ni aakhalana efaita waavikana atthu akina. Masi murummwa Paulo aalempe so: “Akhalá mutthu onìsona okhala etthu, ariki ahikhanle etthu, owo onimwisototha”. (aGal. 6:3) Nto Mwene Salomoni aahilavula mookwasa mwaha owo. Owo aahimmye so: “Halali mmiravo mmosá mmasikhini, orina ankhili, ovikana mwené owo òwuluvala ni mulolo”. (Mus. 4:13) Nkahaya nwehe ntakiheryo na Pedru. Owo aahipwapweliwa ni murummwa Paulo ohoolo wa atthu akina. (aGal. 2:11-14) Pooti wira Pedru aamunyoonyiheya mwaha wa etthu Paulo aahimmye awe, owehexexaka enamuna aalavunle awe ni opuro aalavunle awe. Masi ohiya opaka eyo, Pedru aahooniherya wira aari mutthu a ankhili. Owo aaheemererya miruku aavahiwe ni Paulo ni khaapwenhe mathowa vamurimani vawe. Muhoolo mwaya, Pedru aahimuhimya Paulo okhala “munn’ihu òphenteya”.—2 Ped. 3:15. w20.11 21 itti. 9, 11-12

Etthu xeeni enrowa omukhaliherya naxikola a Biibiliya okela vahoolo? Owo ohaana orowela mithukumano sotheene. Mwaha woowi mithukumano sinoomukhaliherya wuncererya osuwela wawe, olipiha waamini wawe ni wuncererya omphenta wawe Muluku. (Mit. 15:30-32) Nave munna owo ohaana omuleela ole onisomihiwa Biibiliya moota omphenta wawe Muluku omukhaliherya awe wiiwelela malamulo awe. (2 aKor. 7:1; aFil. 4:13) Nave vaavo ale anisomihiwa Biibiliya anweha aya matakiheryo ooloka a anamalaleerya a mmulokoni, awo anniixutta ele entaphulela aya wiiwelela yooruma ya omphenta Muluku ni atthu akina. (Yoh. 13:35; 1 Tim. 4:12) Awo annaaweha anamalaleerya aniwanana mixankiho ntoko iye aniwanana aya ni animoona wira anoowerya opaka marukunuxo anireerela wira akhale atthareli a Kristu. (Otum. 30:11) Moohaaniherya, vannooneya wira khula mutthu mmulokoni onookhaliherya mwa inamuna soovirikana wira ale anisomihiwa Biibiliya akele vahoolo momunepani.—Math. 5:16. w20.11 5 itti. 10-12

Woonasa wene, murummwa Paulo aahimya inama soowali aawananne awe wArena epooma ya wEefeso. (2 aKor. 1:8; 4:10; 11:23) Aahiiso aahimya aYuda ni atthu akina yaawo yaari ootakhala murima yaalikana ni inama soowali. (Mit. 19:26-34; 1 aKor. 16:9) Moohicikha etthu ene aahimya awe Paulo aahikhalana mixankiho. Masi hata vaari siiso, owo khaahiyale owehexexa itthu sooloka sa muhoolo. (1 aKor. 15:30, 31; 2 aKor. 4:16-18) Hiyo ninkhala okathi wooxankiha ni wootakhala. Anna ni arokora akina sinnaakhumelela ikrime. Akina anikhala ilapo wala mittetthe eniwaniwa ekhotto, nto khanikhala oovareleleya. Anna ni arokora akina anikhala ilapo muteko ahu woolaleerya onikhoottihiwa aya ni kuvernu, nto omurumeela Yehova ilapo iyo khivanikhweya. Maana eyo pooti owiiriha oyeleela okumi aya wala otthukweliwa mukhatteya. Hata vari siiso, anna ni arokora awo khanihiya omukokhorela Yehova ni anninivaha ntakiheryo nooloka ninreerela ahu otthara. Awo khanitepa woova nnakhala othukumela, maana annisuwela wira hata yiiviwaka, Yehova ooleiherya waahihimuxa ni waavaha okumi wooloka muhoolo. w20.12 9 itti. 3-4

Niireke mootoko okhulumuwa mwaha woowi atthu a muttetthe anyu khaniphavela owiriyana ihapari sooreera aahiiso munaaphwanya atthu vakhaani okathi munilaleerya anyu? Akhala wira ti siiso, muhaana opaka exeeni wira muhihiye ohakalala? Ti vooloka okhalana moonelo wooloka voohimya sa muteko woolaleerya. Eyo enitaphulela exeeni? Mwiimananiheke olaleya nsina na Muluku ni Omwene. Yesu aahooniherya oratteene wira atthu vakhaani paahi ti yaarowa ophwanya ephiro eniphwanyiha ekumi. (Math. 7:13, 14) Vaavo hiyo ninlaleerya ahu ninnikhalana eparakha ya ovara vamosa ni Yehova, Yesu ni malaikha. (Math. 28:19, 20; Wiis. 14:6, 7) Musuweleke wira Yehova onnaaphavela ale aniphavela ni murima wotheene omurumeela. (Yoh. 6:44) Nto akhala wira mutthu owo khoniphavela owiriyana muhupi nimmulaleerya ahu olelo, woonasa wene muhoolo onimweemererya. Murokora oniihaniwa Deborah ohimmye: “Okhuluumuwa kapwitthi muulupale onirumeeliwa ni Satana”. Masi akapwitthi a Satana khanimutekela etthu Yehova Muluku. w20.12 26 itti. 18-19; 27 etti. 21

MaKristau manceene oororomeleya, annivara muteko khula nihiku wira aphwanyeke yoowiikhuuriha awo ni emusi aya. Hata vari siiso, anna ni arokora awo oororomeleya annipaka sotheene aniwerya aya wira akhaliherye mutthenkeso wa Muluku. Mwa ntakiheryo, anna akina annikhaliherya vaavo sinikhumelela aya ihasara sa ephattu, akina annikhaliherya oteka ipa sinirumeeliwa ni mutthenkeso ahu, nave khula mutthu okhalana eparakha ya ovaha musurukhu awe wira okhaliherye muteko onivariwa olumwenku wotheene. Ohiya-vo, khula esumana ninnooniherya wira ninnaaphenta anna ni arokora nirowelaka mithukumano ni wiirela mpantta. Hata nikhulumunwe ene, hiyo ninnirowela mithukumano. Nave hata nixankale ene hiyo ninniimananiha okomentari. Nave-tho, hata niri ene mixankiho sahu hiyo ninnimananiha waalipiha anna ni arokora mmithukumanoni. (aHeeb. 10:24, 25) Tthiri hiyo ninnixukhurela vanceene itthu sotheene anivara aya anna ni arokora awo. w21.01 10 etti. 11

Atthu oowiixinnuwiha khaniphavela waattottopela atthu akina, awo aniphavela wira attottopeliweke paahi. Awo anniilikanyiha ni atthu akina, nto eyo enniwiiriha ophavela oxinttana. Nave ohiya owiixuttiha ni waavaha okhulupale, atthu oowiixinnuwiha anuupuwela so: “Mwaphavelaka wira etthu eyo ekhumele saana, muhaana opaka mmensinyu”. Otakhala waya, okhala wira atthu awo anuupuwela wira etthu yooloka ti ele enipakiwa ntoko aniphavela aya. Ohiya-vo, atthu oowiixinnuwiha annaakhalela nrima atthu akina vaavo anaaweha aya akhumelaka saana. Nto akhala wira ninnoona wira noopacerya wiixinnuwiha, nihaana onvekela Yehova wira onikhaliherye ‘wùlula osuwela wahu’ ni okumiha muupuwelo owo wowiixinnuwiha vamurimani vahu. Niira siiso, nrima khaninrowa omaka vamurimani vahu. (aRom. 12:2) Tthiri ninnimuxukhurela Yehova mwaha woonivaha ntakiheryo nawe! Ninniweha wiiyeviha wa Yehova mwa enamuna onathokorerya awe arumeyi awe ni nihaana omutakiha. Nave nimphavela otthara matakiheryo a mBiibiliyani a atthu yaari oowiisumaaliha, yaawo yaarina eparakha ya weetta ni Muluku. Niira siiso, nnoomuttittimihaka ni onvuwiha Yehova ntoko oniphwanela awe.—Wiis. 4:11. w20.08 13 itti. 19-20

Ekasamento yoovaha ya Muluku. Masi atthu anithelana toohimalela. (1 Yoh. 1:8) Tivonto Biibiliya onaaleela awe atthu ale aniphavela othelana wira khahiyo okathi wotheene anrowa ohakalalaka, maana “anookhalana mixankiho mookumini mwaya”. Yehova oniphavela wira mulopwana oothela aakhapeleleke momunepani, mmuupuweloni ni waavaha itthu sinaathowa atthu a etthoko awe. (1 Tim. 5:8) Masi hata arokora ootheliwa yaatteliwaka miteko, ahaana onvekela Yehova ni murima aya wotheene. Opaka eyo khivanikhweya. Mwaha wa xeeni? Mwaha woowi, athiyana ootheliwa waatteliwa miteko, nto awo pooti ohikhalana okathi wala ikuru wira avare itthu iyo. Masi hata vari siiso, wiimananiha opaka eyo enookhaliherya vanceene ekasamento aya. Mwaha wa xeeni? Mwaha woowi Yehova oniphavela wira khula mmosa a hiyo okhalane ni olipihe waataana wawe ni yena. (Mit. 17:27) Moohaanyiherya, athiyana ootheliwa ahaana wiimananiha vanceene wira awiiweleleke axiiyeya hata ari ene oohimalela. Vanimwaakhweela opaka eyo, akhala wira annisuwela ni anneemererya mathowa a mBiibiliyani anooniherya wira ahaana omuttittimiha ni omwiiwelela iyawe. w21.02 9 itti. 3, 6-7

Mixankiho sinlikana ni mooro atthu anirumeela aya wira ahane iyuuma. Nuumala eyuuma wooxiwa vamooroni evola, eyuuma eyo ennitepa olipa. Mwa enamuna emosaru, vaavo ninvilela ahu mixankiho, waamini wahu onnitepa olipa. Eyo ti etthu yaamwiirinhe Yakobo olepa wira: “Muhiye wira ovilela omaliherye muteko aya, wira mukhale oomalela ni oohittheka mwa inamuna sotheene, ehoothowakani etthu”. (Yak. 1:4) Tthiri vaavo nnoona ahu wira mixankiho sinnilipiha waamini wahu, ninnivilela mixankiho moohakalala. Muxankiho mmosa ori ohinsuwela etthu yoopaka. Okathi wa mixankiho nihaana omuroromela Yehova wira onikhaliherye opaka soothanla sinimuhakalaliha, sinrowa waakhaliherya anna ni arokora ni sinrowa onikhaliherya ohihiya ororomeleya wahu. (Yer. 10:23) Nihaana okhalana ankhili wira nisuwele etthu yoopaka ni osuwela owaakhula ale annilupattha. Nto akhala wira hiyo khaninsuwela etthu yoopaka, pooti okhulumuwa ni ohihakalala. w21.02 28 itti. 7-9

Yehova oonivaha ntakiheryo nooloka, maana onniniphenta vanceene. Nto akhala wira nnoovikaniha ororomeleya wa yena owo khonikhala-khala ohiyaka oniphenta. (aRom. 8:38, 39) Nuulumo na eKereku nitaphuleliwe-va wira “vanceene” nintaphulela wiimananiha. Okathi mukina, khivanikhweya waaphenta anna ni arokora. Nto nihaana wiimananiha. Vaavo atthu akina anninyoonyiha aya nihaana ovikaniha ‘ovilelana mukina ni mukhwaawe niphentanaka. Niimananiheke okhalana wiiwanana omosa-ru onikumiheriwa ni munepa woowaarya, ni murettele onnikhaliherya wiiraana’. (aEef. 4:1-3) Hiyo khaninwehexexa soovonya sa anna ni arokora. Maana ninrowa wiimananihaka waathokorerya anna ntoko Yehova onaathokorerya awe. (1 Sam. 16:7; Esal. 130:3) Khivanikhweya waaphenta mwekeekhai anna ni arokora. Otepexa wene akhala wira ninnisuwela soovonya saya. Vanikhala ntoko wira maKristau a eseekulu yoopacerya yaahikhalana muxankiho owo, ntoko yoowiirananeya ya Evodia ni Sintikhe. Murummwa Paulo aahaatumererya “okhalana muupuwelo mmosa-ru, onivarihana ni Apwiya”.—aFil. 4:2, 3. w21.01 22-23 itti. 10-11

Anna oowuuluvala annihakalala vanceene omurumeela Yehova vamosa ni nyuwo amiravo! (Sof. 3:9) Awo annixukhurela vanceene okhalela wanyu nthiti ni oluttuweliwa ovara saana miteko sotheene munivahiwa anyu mmulokoni. Tthiri awo annoovahani efaita yinceene. Nyuwo amiravo, muhikhala-khale muliyalaka wira Yehova onnoophentani ni onnoororomelani. Owo aahihimya vahinatthi wira mahiku ala ookiserya yaamukhala amiravo anceene ntoko anakhotto, yaarowa wiivahererya vootthuna vaya wira amurumeeleke. (Esal. 110:1-3) Nave Yehova onnisuwela wira munnimphenta vanceene ni munniphavela omurumeela mpakha vaniwerya anyu. Nto mwaapixeryeke murima atthu akina ni mwiipixeryeke murima mmansinyu. Akhala wira munnivonya, mweemereryeke wiixuttihiwa ni mweemereryeke malakiheryo munivahiwa anyu. Musuweleke wira malakiheryo awo anikhuma wa Yehova. (aHeeb. 12:6) Nto mwiimananiheke ovara saana miteko sotheene munivahiwa anyu, otepexa wene, itthu sotheene munipaka anyu, mpakeke wira mmuhakalalihe Tiithi inyu a wiirimu.—Mir. 27:11. w21.03 7 itti. 17-18

Sookhala itthu sinceene sinnikhulumula, itthu sikina nniikumiherya mmansihu sikina ninkumiheriwa ni atthu akina. Itthu iyo sinihela muhina, ohimalela, otteettheya wahu ni owereyasiwa. Nave hiyo pooti okhulumuwa akhala wira naanilipelela ovahiwa iparakha mmutthenkesoni mwa Yehova aahiiso atthu nnaalaleerya ahu muttetthe ahu khaniphavela oniwiriyana. Vannikhweya wuupuwela wira khanirina efaita mwaha wa ohimalela wahu ni sootteettheya sahu. Nto eyo, pooti oniiriha wuupuwelaka wira Yehova khonrowa oneemererya okela elapo esya. Moonelo owo ti wootakhala. Biibiliya onihimya wira omuhiya Yesu paahi, apinaatamu “othene aya attheka”. (aRom. 3:23) Masi hata vari siiso, Yehova khoniwehexexa soovonya sahu ni khonuupuwela wira nihaana okhala atthu oomalela. Ohiya-vo, Tiithi ahu oophenta a wiirimu oniphavela onikhaliherya. Nave toopixa murima. Nave-tho, owo onnisuwela wira anamunceene a hiyo annimananiha opaka itthu sooloka, nto owo onniimananiha onikhaliherya.—aRom. 7:18, 19. w20.12 22 itti. 1-3

Otheene ahu nneetta mukwaha. Yoolakela ahu okela elapo esya enilamuleliwa ni Tiithi ahu oophenta Yehova. Nto khula nihiku ninniimananiha otthara ephiro eniphwanyiha okumi. Masi ntoko Yesu aahimmye awe, ephiro eyo ti yoophunyeya ni yookhalana mixankiho sinceene. (Math. 7:13, 14) Nave okhala wira naatthu oohimalela vannikhweya ohiya weetta ephiro ya okumi. (aGal. 6:1) Naphavela weetta ephiro ela yoophunyeya eniphwanyiha ekumi, nihaana opaka marukunuxo a muupuwelo ahu, moonelo ahu ni miteko sahu. Murummwa Paulo onnintumererya ootheene ahu ohihiya opaka marukunuxo. Khivanikhweya ovarerya muupuwelo ni moonelo ahu. Mwaha wa xeeni? Mwaha woowi murima woototha, nto okathi mukina vannixankiha osuwela opuro murima ahu onniroiha awe. (Yer. 17:9) Vannooneya wira vannikhweya wiiwoka ni muupuwelo ‘wowototha’. (Yak. 1:22) Tivonto nihaana omurumeela Biibiliya wira niivarerye. Maana Biibiliya onimooniherya ele eri vamurimani vahu, omutthu ahu, ‘otokosa osuwela ni sophavela sa murima ahu’.—aHeeb. 4: 12, 13. w20.11 18 itti. 1-3

Vaavo nniiyeviha ahu ni wiisuumaaliha, nnoohakalalaka vanceene. Mwaha wa xeeni? Mwaha woowi nnoosuwelaka wira sookhala itthu ninsuwela ahu ni itthu nihinwerya ahu opaka. Nave nnoosuwelaka mikano sahu, okhala ooxukhuru ni ohakalala vaavo ninkhaliheriwa ahu ni atthu akina. Mwa ntakiheryo, nkahaya muupuwele okathi Yesu aapenunxe awe anamakuttula 10. Namakuttula mmosa paahi taatthinke wira omuxukhurele Yesu mwaha wompenuxa oretta ole wootakhala ni woohiirya. Mulopwana ole khaarowa owerya wiipenuxa mekhawe ohikhaliheriwe ni Yesu. Wiiyeviha ni wiisuumaaliha wa mulopwana ole waahimwiiriha orowa oxukhurela ni onvuwiha Muluku mwaha wookhaliheriwa mwa enamuna ele. (Luka 17:11-19) Atthu oowiiyeviha ni oowiisuumaaliha annaataana ni atthu akina ni vannaakhweela waapaka apatthani asya. Mwaha wa xeeni? Mwaha woowi atthu ntoko awo annaakuva woona mikhalelo sooloka sa atthu akina ni annaaroromela. Nave atthu oowiiyeviha ni oowiisuumaaliha annihakalala vaavo anaaweha aya atthu akina akhumelaka saana wala avahiwaka iparakha sikina. Nave-tho annaattottopela ni waattittimiha atthu awo. w20.08 12 itti. 17-18