Dezembro

Okathi mukina hiyo pooti ohiiwexexa itthu sikina sa mBiibiliyani aahiiso Yehova pooti ohaakhula mavekelo ahu ntoko naalipelela ahu. Nto eyo pooti oniiriha waanyiherya sookupali sahu. Nto akhala wira khanincalela itthu iyo nnaanyiherya ahu, pooti otteettheiha waamini ahu ni ohonona waataana wahu ni Yehova. (Yak. 1:7, 8) Nave waanyiherya iwo pooti oniiriha oyeleela nlipelelo nahu na muhoolo. Murummwa Paulo aahilikanyiha nlipelelo nahu na muhoolo ni nankura. (aHeeb. 6:19) Nankura onnikhaliherya ekalawa okathi wa epheyo yuulupale wira ehimane maluku. Masi, nankura onoovara saana muteko awe akhala wira ikwirinti sootthukweleliwa saana vakalawani wira ehinyaanyeye. Ntoko siisaale mukwitha wala murawa onihonona awe ekwirinti sa nankura, itthu nnaanyiherya ahu pooti ohonona waamini wahu. Vaavo mutthu onaanyiherya awe okathi onilupatthiwa awe, pooti opacerya wiikoha akhala Yehova onoomukhaliherya wala nnaari. Nto nayeleela waamini wahu, nnooyelela nlipelelo nahu na muhoolo. Nto mutthu siiso, woonasa wene pooti ohihakalala! w21.02 30 itti. 14-15

Vanikhala ntoko wira okathi aakhumme awe ni emusi awe epooma ya wUri, Abrahamu aarina iyaakha 70. (Maph. 11:31–12:4) Nave mwa iyaakha 100, Abrahamu aakhala muheemani ni aamakela othaamela mapuro oovirikana elapo ya oKanani. Abrahamu okhwiiye orina ene iyaakha 175. (Maph. 25:7) Abrahamu khaawenhe osuulu awe okelaka elapo yooleiheriwa. Nave khaawenhe etekiwaka epooma aalipelela awe, eyo piiyo, Omwene wa Muluku. Hata vaari siiso, Biibiliya onihimya wira Abrahamu okhwiiye ‘uluvanle ene vanjene’. (Maph. 25:8) Nnaamwi Abrahamu aarina mixankiho sinceene, owo khaahiyale olipiha waamini wawe ni omulipelela Yehova moopixa murima ohakalalaka. Exeeni yaamukhalihenrye Abrahamu ovilela? Etthu yaamukhalihenrye okumi awe wotheene, okhala wira aahoona wira aanikhapeleliwa ni Yehova ni aari mpatthani awe. (Maph. 15:1; Yes. 41:8; Yak. 2:22) Ntoko Abrahamu, hiyo ninnilipelela epooma erina mathipelo eekeekhai. (aHeeb. 11:10) Masi khahiyo wira ninlipelela otekiwa wa epooma eyo. Maana Omwene wa Muluku wookhalihiwa wiirimu mwaakha wa 1914 ni woopacerya olamulela wiirimu wotheene. (Wiis. 12:7-10) Masi hiyo ninlipelela okathi Omwene owo onrowa awe olamulelaka valaponi. w20.08 4-5 itti. 11-12

Wira niwerye waawiriyana oratteene atthu akina, nihaana wiiyeviha ni opixa murima. Vannireerela wiimananiha opaka eyo, mwaha wa mathowa mararu. Noopacerya, khaninrowa waakuvelaka waaphukela aahiiso okhalana moonelo woohiloka voohimya sa atthu akina. Na nenli, nnoosuwela moonelo ni etthu ewiirinhe opaka etthu eyo ni owoonela othunku. Na neeraru, hiyo pooti omukhaliherya mutthu owo wiisuwela. Ikwaha sikina mutthu pooti ohisuwela moonelo awe mpakha ophiya okathi onrowa awe waaleela atthu akina. Anna ni arokora akina, vannaavila ohimya moonelo aya mwaha wa makhalelo aya, soolema, itthu saakhumelenle ni omutthu aya. Pooti ovira okathi wira anna ni arokora anileele ele eri vamurimani vaya. Nto okathi anipaka aya eyo nihaana wiimananiha osuwela moonelo aya. Nakhala wira nnoomutakiha Yehova naapixeryaka murima, awo anooniroromelaka. Nto okathi annileela aya moonelo aya, nihaana waawiriyana oratteene. w20.04 15-16 itti. 6-7

Okhala wene, ihopa sinnisiveliwa okhala mapuro maasi ari aya ooreera ni ekhanle aya yoolya. Niireke wookhala okathi wooreerela orowa ototha ihopa? Nwehe ele yiiraneyale Ilha do Pacífico. Munna mmosa aahimulattula misionaario orowa omiserya. Misionaario ole aahimmye so: “Vaareera, kinimoophwanyani meelo 9 oora”. Munna ole aahimwaakhula wira: “Kinoona wira khamunisuwela. Khahiyo hiyo ninhimya okathi wooreerela ototha, masi ihopa ti sinhimya”. Eyo ti etthu yaapaka aya ale yaatotha aatthu eseekulu yoopacerya. Awo yaanirowa mapuro ni okathi yaakhanle aya oophwanya “ihopa”. Mwa ntakiheryo, atthareli a Yesu yaanilaleerya musinagoga, empa ni empa ni mapuro yakhala aya atthu anceene. (Mit. 5:42; 17:17; 18:4) Naatakihaka anamalaleerya a eseekulu yoopacerya, hiyo nave nihaana osuwela soolema sa atthu anikhala muttetthe ninlaleerya ahu. Nto nihaana waaturuka apalano ahu wira nrowe nalaleerye opuro ni okathi nikhanle ahu oowaaphwanya atthu.—1 aKor. 9:19-23. w20.09 4 itti. 8-9

Enamuna emosa enrowa olipiha waataana wahu ni Yesu ori okhaliherya mareheryo a muloko wa ekristau. Ninnimwiiwelela Yesu ntoko muhooleli a miloko sotheene vaavo ninwiiwelela ahu ale aathanlale awe wira anihooleleke. (aEef. 4:16) Mwa ntakiheryo, ninniimananiha orumeela oratteene Ipa sotheene sa Omwene ninthukumana ahu. Wira epakiwe eyo, miloko sikina sootakaahiwa ni miloko sikina. Nuumala opakiwa eyo, vooweryaneya ohirumeeliwa musurukhu munceene onisonkheriwa mmutthenkesoni mwa Yehova. Okathi omosaru, eyo ehaakhaliherya anamalaleerya akina olimalela makhalelo masya. Anamalaleerya akina yaahiviriha iyaakha sinceene athukumanaka muloko mmosaru paahi, nto yaahikhalana apatthani anceene muloko aya wa khalai. Akina a yaawo annivekeliwa orumeela miloko sikina. Tthiri Yesu onnihakalala vanceene vaavo onaaweha awe anamalaleerya awo akhaliheryaka moororomeleya malakiheryo a mutthenkeso! w20.04 24 etti. 14

Mwene a osul ni mwene a onorte annivikaniha owana, awanelaka okhala namalamulela a olumwenku wotheene. Mwa ntakiheryo, nkahaya nwehe ele yaakhumelenle nuumala Ekhotto ya Nenli ya Olumwenku Wotheene, União Soviética ni ale animukhaliherya yaanilamulela ilapo sinceene sa wEuropa. Mwaha wa yeeyo, mwene a osul aahipaka nivarihano ni ilapo sikina wira okhalane anakhotto yaasuweliwa okhala OTAN (Organização do Tratado do Atlântico Norte) wira owane ni mwene a onorte. Mwene a onorte ni mwene a osul yaahiimananiha vanceene opaka ikapwitthi sa ekhotto. Okathi mukina, mwene a onorte aanikhaliherya ikhotto saawaniwa ni mwene a osul, vano mwene a osul onipaka etthu emosaru ni mwene a onorte, ntoko yiiraneyale aya wÁfrica, wÁsia ni wÁmérica Latina. Iyaakha vakhaani sivinre, Rússia ni ilapo sinimukhaliherya ahincererya owerya waya ilapo sikina. Awo anniwana ni mwene a osul ekhotto ya munterneetini [guerra cibernética]. Mamwene awo anihimya wira khula mmosa onnirumeela iprokrama sa komputatore sootakhala wira ohonone othaaciri ni epoliitika ya ilapo saya. Ntoko Daniyeli aahimmye awe vahinatthi, nlelo mwene a onorte onniwana ni atthu a Muluku.—Dan. 11:41. w20.05 13 itti. 5-6

“Muthiyana ommwamwiha mwan’awe onowerya omuliyala?” Nuumala-vo, Yehova aahaaleela atthu awe wira: “Onamwi uwo amuliyalaka mwan’awe, miyo nkinoliyalani”. (Yes. 49:15) Ela ekwaha emosa paahi Yehova oniilikanyiha awe ni maama. Maana owo khonimakela wiilikanyiha ni maama. Yehova onniilikanyiha ni maama ophavelaka wooniherya wira onnaaphenta vanceene arumeyi awe ntoko maama onaaphenta awe anaawe, mwaha woowi, oniphavela wira arumeyi awe yooneke wira onnaaphenta vanceene. Aximaama anceene arina moonelo mmosaru ntoko wa murokora oniihaniwa Jasmin. Owo onihimya so: “Vaavo munimwaamwiha anyu mwaninyu, waataana wanyu ni mwaninyu ti wa mahiku ootheene”. Yehova onnisuwela vaavo murumeyi awe onihiya awe olaleerya ni orowela mithukumano. Hiyo ninnihakalala vanceene vaavo anna ni arokora yaahiyale olaleerya antthikela aya mmulokoni! Nave Yehova oniphavela wira ahokolowele wa yena ni onnaakhaliherya opaka eyo.—1 Ped. 2:25. w20.06 18 itti. 1-3

Khahiyo wira itthu sotheene sa faita ninniwerya woona. Tthiri itthu sinceene sa faita khaninwerya woona. Okathi Yesu aalavula awe Mwaha awe Vamwaako, Yesu aahilavula mihakhu sinceene sa faita ovikana mihakhu sa werutthuni. Nuumala olavula mihakhu iyo, Yesu aahimmye so: “Vavo vari muhakhu anyu, vavo-tho t’uri murim’anyu”. (Math. 6:19-21) Vaavo nimphavela ahu etthu ya faita yinceene, hiyo ninniimananiha wira nikhalane. Hiyo nnoowerya wiithukumanyerya “mihakhu wirimu” vaavo nniimananiha ahu okhalana mweettelo wooloka aahiiso okhalana waataana wooloka ni Muluku. Ntoko Yesu aahimmye awe, mihakhu iyo khasinkhala-khala sipweteyaka nnakhala wiiyiwa. Murummwa Paulo oonitumererya owehexexa “itthu sihinòneya”. (2 aKor. 4:17, 18) Mihakhu iyo sihinooneya, sinihela muhina itthu sotheene ninrowa ahu okhalana elapo esya. Nave ninrowa woona moota nikhanle ahu oowooniherya wira ninnixukhurela vanceene mihakhu iyo sihinooneya. w20.05 26 itti. 1-2

Itthu Moise aawiixuttinhe awe aisarayeli saanilipiha waamini waya ntoko siisaale epula enikhaliherya aya vanceene miri ni malaxi. Ninrowa owiixuttiha sai atthu akina mwa enamuna yoomaaliha ni yoolipiha? Okathi ninlaleerya ahu empa ni empa, nihaana omurumeela Biibiliya wira niwooniherye atthu nsina na Muluku, Yehova. Nave nihaana waavaha iliivuru, owooniherya iviidiyu ni myaha sikina siri va jw.org wira nivuwihe nsina na Yehova. Ohiya-vo, omutekoni, oxikola wala okathi nneetta ahu mukwaha, nihaana wiimananiha waalaleerya atthu voohimya sa Muluku ahu ni mikhalelo sawe. Nave nihaana waaleela itthu sooloka Yehova onrowa awe onipakela ni onrowa awe opaka valaponi. Nto okathi aniiwa aya itthu iyo soohakalaliha, awo animoona wira Yehova onniniphenta vanceene. Musuweleke wira okathi nnaalaleerya ahu atthu wira Tiithi ihu a wiirimu onniniphenta, ninnikhaliherya otteeliha ni ovuwiha nsina na Muluku. Nave ninnaakhaliherya atthu osuwela wira yiixuttihiwa itthu sowoothiwa voohimya sa Yehova. Tthiri okathi aniixutta aya ikeekhai sa mBiibiliyani, awo annihakalala vanceene.—Yes. 65:13, 14. w20.06 10 itti. 8-9

Mikhalelo xeeni ninreerela ahu okhalana wira naakhaliherye ale ahiyale orowela mithukumano ni olaleerya ohokolowela wa Yehova? Vano nrowe niwehe itthu nniixutta ahu ni nlikanyiho na Yesu na mwaana oohiiwananeya aakhumme etthoko ya anamuyari awe. (Luka 15:17-24) Mwaana ole oonale awe wira aari mulolo ni aahaana ohokolowela etthoko ya anamuyari awe. Nuumala omoona mwanawe, paapa awe ahimutthimakela ni aahimukhupaarela omooniheryaka wira aanimphenta vanceene. Okhala wira mwaana ole aaniivaha nthowa mwaha wa itthu aapanke awe, owo oona wira khaaphwanela-tho wiihaniwa mwanawe paapa ole. Nuumala omwiiwa olavulaka moonelo ni muupuwelo awe, paapa ole aahimoonela othunku mwanawe. Paapa ole onnipaka etthu wira omooniherye mwanawe wira onnaakheliwa mwaha wootthikela owaani. Nave paapa ole onnimwaakhela ntoko mwaana onimphenta awe. Wira ooniherye wira aanimphenta mwanawe ni aanimwaakhela ni matata manli, paapa ole aahiruma wira mwaana ole owarihiwe ikuwo sooreera ni aahipaka efesta. Yehova ori ntoko paapa a nlikanyiho na Yesu. Tthiri Yehova onnaaphenta anna ni arokora ahiyale orowela mithukumano ni olaleerya, yaawo aniphavela ohokolowela wa yena. Nimutakihaka Yehova, nnoowerya waakhaliherya anna ni arokora awo ohokolowela mmulokoni. Nto wira nipake eyo, nihaana opixa murima, owoonela othunku, waamorela ikharari ni waaphenta. w20.06 25-26 itti. 8-9

Yesu aahimmye wira atthu akina yamweemererya ekeekhai “etteliwaka murima”. Masi waamini waya onnivukuwa okathi aneehereriwa aya. (Math. 13:3-6, 20, 21) Woonasa wene, awo khiyaasuwela wira ale animutthara Yesu anniphwanya mixankiho ni weehereriwa. (Math. 16:24) Nave yuupuwela wira yakhala muKristau khiyaarowa ophwanya mixankiho wala yuupuwela wira Muluku aarowa okumihaka mixankiho saya. Masi musuweleke wira olumwenku ola wootakhala ninkhala ahu, nnokumanaka mixankiho. Nave makhalelo ahu pooti oturukeya, nto eyo pooti ovukula ohakalala wahu. (Esal. 6:7; Mus. 9:11) Anna ni arokora anceene annikupali wira aaphwanya ekeekhai. Moota xeeni? Awo khanihiya ekeekhai hata maKristau makina apakaka itthu soohiloka. (Esal. 119:165) Hata okathi anikhalana aya mixankiho, waamini waya onnilipa ohiya ovukuwa. (Yak. 1:2-4) Nihaana okhalana waamini woolipa. w20.07 8 etti. 1; 9 itti. 4-5

Muhinatthi opacerya omusoma Biibiliya, munvekeleke Yehova wira moone moota woottottela mureerelo ele munrowa anyu osoma. Mwa ntakiheryo, akhala wira munaavya malakiheryo a moota woovilela muxankiho, munvekeleke Yehova wira ookhaliheryeni ophwanya malakiheryo a mBiibiliyani anrowa wookhaliheryani osuwela etthu yoopaka. (aFil. 4:6, 7) Yehova oonivaha etthu yootikiniha yuulupale ori wuupuwela. Wira sowiiraneya sa mBiibiliyani sinivare murima, nihaana wuupuwela moota itthu iyo siiraneya aya, opuro saakhumelela aya ni atthu anilavuliwa. Mmananiheke oweha itthu aapaka awe, aaweha awe ni moonelo awe okathi owo. Wuupuwelela onitaphulela wuupuwela oratteene ele munisoma anyu ni oweha moota mukhanle anyu oovarihela muteko khula eponto. Opaka eyo enimookhaliheryani oweha moota mwaha owo onivarihana awe ni myaha sikina ni wuncererya osuwela wanyu myaha sa mBiibiliyani. Omusoma Biibiliya mutthu ohinuupuwelela, onoolikana ni oweha itempeero sinheliwa mmathaapani. Wuupuwelela onninikhaliherya oweha itthu sotheene siiraneya. w21.03 15 itti. 3-5

Vanweryaneya Paulo omakela owehexexa itthu saakhumelenle khalai ni omakela wuupuwela so: “Kaahaana opaka itthu mwa enamuna ekina, kinoona wira nkaarowa otthukweliwa mukhatteya”. Nave, vanweryaneya ohiya waaroromela apatthani awe a edistritu ya wÁsia, yaawo yaamuhiyale mekhawe. Masi Paulo kaapanke eyo. Nnaamwi oopopihiwa wira aamwiiviwa, Paulo khaaliyanle etthu ya faita aakhanle awe oopaka, eyo piiyo, ohihiya onvuwiha Yehova. Owo, aahivikaniha wuupuwelela inamuna aakhanle awe oowaalipiha atthu akina. Nave, aanimuroromela Yehova onvekelaka moohihiyererya. Paulo, khaayihale okathi awe omakelaka owuupuwela anna ale yaamutthyanwe. Ohiya-vo, owo aanaaxukhurela ni murima wotheene apatthani awe oororomeleya yaawo yahaahiyale omukhaliherya. Nave Paulo khaahiyale osoma Nuulumo na Muluku. (2 Tim. 3:16, 17; 4:13) Etthu yootepa otthuneya okhala wira Paulo aanikupali ni murima wotheene wira Yehova ni Yesu yaanimphenta. w21.03 18 itti. 17-18

Nuuvira iyaakha 100, anawoothe yaahipacerya okela mmulokoni mwa eKristau. Nto awo yaahipacerya wiixuttiha itthu sowoothiwa sa etiini ni yaanivitha ekeekhai ya Nuulumo na Muluku. Okhuma okathi ole mpakha 1870, khiyaakhanle ekrupu yootthokiheya ya arumeyi a Muluku valaponi. Ntoko siisaale nthakathaka nimmwareela aya mmatta, maKristau owootha yaahincerereya vahinaweryaneya waasuwela maKristau eekeekhai. (Math. 13:36-43) Xeeni vari aya vooloka osuwela eyo? Ti vooloka osuwela, mwaha woowi, ekapiitulu 11 ya eliivuru ya Daniyeli enooniherya wira iyaakha 100 ni 1870 khuuvo namalamulela aakhanle mwene a onorte ni mwene a osul. Maana khiyaakhanle ekrupu yootthokiheya ya arumeyi a Muluku yaarowa aya waatuphela. Masi, moohipisa nuumala mwaakha wa 1870, vaaniweryaneya omusuwela mwene a onorte ni mwene a osul. w20.05 3 etti. 5

Yoweli aahihimya vahinatthi wira muttitthi wa nasope waamuhonona elapo ya wIsarayeli. Nasope owo waarowa okhuura itthu sotheene saarowa aya ophwanya! (Yow. 1:4) Mwa iyaakha sinceene, hiyo nuupuwela wira eprofesia ela yaahimya atthu a Yehova. Naahimya wira, ntoko siisaale nasope, atthu a Yehova khiyaarowa ohiya olaleya, nto olaleerya iwo waamukumiherya mixankiho “elapo”, eyo piiyo, atthu yaale aneettihiwa ni ahooleli a etiini yoowootha. Masi, vaavo ninthokorerya ahu eprofesia yotheene ya Yoweli moovarihana ni enamuna elempwale aya, vannooneya wira nihaana olokiherya enamuna naiwexexa ahu iversiikulu iyo. Moone ele Yehova aaleihenrye awe voohimya sa nasope owo oriki: “Kinomomola nasope okhumme onikela epheyo [oNorte]”. (Yow. 2:20) Nto eyo ennikumiherya nikoho nna: Akhala wira nasope onitaphulela Anamoona a Yehova, yaawo aniiwelela yooruma ya Yesu ya olaleerya ni waapaka awiixutti, xeeni Yehova aarowa awe oleiherya wira aarowa ‘omomolela’ ottaiwene? (Ezek. 33:7-9; Math. 28:19, 20) Tthiri vannooneya wira khahiyo wira Yehova oniwoomolela ottaiwene arumeyi awe oororomeleya, masi oniwoomolela ottaiwene atthu ale aahiiso etthu yaarowa waakumiherya mixankiho arumeyi awe. w20.04 3 itti. 3-5

Nihaana opaka exeeni noonaka wira Yehova khonaakhula mavekelo ahu mowaakuveya? Yakobo ohimmye wira nihaana ‘ohihiya onvekela Muluku’. Musuweleke wira Yehova khonnanariwa okathi nninvekela ahu ankhili. Nave Yehova khonnipwapwela. Maana, Tiithi ihu a wiirimu onninivaha ni “murima wotheene” vaavo nninvekela ahu ankhili wira nivilele mixankiho. (Esal. 25:12, 13) Yehova onnisuwela mixankiho sahu, onninoonela othunku ni oniphavela onikhaliherya. Moohaanyiherya ninnihakalala vanceene osuwela eyo! Moota xeeni Yehova onnivaha awe ankhili? Onnimurumeela Biibiliya wira onivahe ankhili. (Mir. 2:6) Nto wira nikhalane ankhili, nihaana omusoma Biibiliya ni iliivuru sinimutthokiherya Biibiliya. Masi nihaana opaka etthu ekina ohiya paahi okhalana ankhili. Nto nnimooniherya wira nookhalana ankhili vaavo nneettela ahu ele Muluku onniruma awe opaka. Murummwa Yakobo olempe so: “Mukhaleke atthu aneettela masu awo, ohiya alipa-oowiiwa paahi”. (Yak. 1:22) Vaavo ninvarihela ahu muteko malakiheryo ari mBiibiliyani ninnikhalana murettele, ninnaareerela murima atthu akina ni omoriwa ikharari. (Yak. 3:17) Mikhalelo iyo sinoonikhaliherya ovilela mixankiho moohakalala. w21.02 29 itti. 10-11

Wira ale anisomihiwa Biibiliya akele vahoolo mpakha opatisiwa, ahaana okhaliheriwa ni atthu otheene a mmulokoni. Khula namalaleerya onoowerya okhaliherya muloko okela vahoolo. Pioneera oniihaniwa Leilani, onihimya so: “Vanihimmwa wira atthu otheene a mmuttettheni annikhaliherya omuhuwa mwaana. Kinoona wira muupuwelo mmosaru onnivareleya muteko mmulokoni, maana vanitthuneya muloko wotheene wira mutthu eemererye ekeekhai”. Tthiri anamuyari, amusi, apatthani ni maprusoore annikhaliherya wira mwaana innuwe saana. Awo annipaka eyo amwiixuttihaka itthu sooloka ni sa faita yinceene. Mwa enamuna emosaru, anamalaleerya pooti waavaha miruku, waalipiha ni waavaha ntakiheryo nooloka ale anisomihiwa Biibiliya. Opaka eyo, animwaakhaliherya okela vahoolo mpakha opatisiwa. (Mir. 15:22) Anamalaleerya otheene a mmuloko anoowerya waakhaliherya ale anisomihiwa Biibiliya. Nto anamalaleerya arina soosoma sa Biibiliya ahaana oxukhurela okhaliheriwa ni anamalaleerya akina. Mwaha wa xeeni? Atthu otheene a mmulokoni anoowerya waakhaliherya ale anisomihiwa Biibiliya okela vahoolo momunepani. w21.03 8 itti. 1-3

MaKristau otheene, akhale amiravo ni oowunnuwa ahaana osyaka okhalana mirima miili, niire so, omurumeela Yehova okathi omosaru apakaka itthu soohiloka. Murummwa Yohani ohimmye wira khivaniweryaneya weettela ekeekhai okathi omosaru nipakaka itthu soohiloka ntoko orupihana woohiloka. (1 Yoh. 1:6) Akhala wira ninniphavela weemereriwa ni Yehova niinaano-va ni muhoolo, nihaana osuwela wira Yehova onniweha itthu sotheene nimpaka ahu. Musuweleke wira khiivo etampi envitheya vamaithoni va Yehova. Hata atthu akina ahiwehaka itthu nimpaka ahu wiiphiini, Yehova onniweha itthu iyo. (aHeeb. 4:13) Otheene ahu nihaana osyaka moonelo wa atthu a mulaponi voohimya sa etampi. Mahiku a Yohani, anammwareya yaahimya wira mutthu pooti opaka etampi moolakela okathi omosaru onakhala mpatthani a Muluku. Olelo-va, ninkhala eriyari ya atthu arina moonelo owo. Atthu anceene anihimya wira annimukupali Muluku, masi khaneemererya moonelo wa Muluku voohimya sa etampi, otepexa wene etampi enivarihana ni orupihana woohiloka. Yehova onihimya wira orupihana woohiloka etampi, masi atthu awo anihimya wira akhala wira mutthu onniphavela pooti opaka. w20.07 22 itti. 7-8

Niireke nyuwo munniwaakiha arokora oowaamini a muloko anyu? Nkahaya muupuwele ela: Muupuwele wira muloko anyu ookhala murokora otheliwe ni mulopwana ohikhanle Namoona a Yehova. Anamalaleerya akina annoona wira murokora owo ommakela ophiya mithukumano sipacenrye ene ni onkhuma wiiriwakaru “Amem”. Ohiya-vo, okathi onrwa awe mithukumano, owo khonrwa ni anaawe. Nto anamalaleerya a mmulokoni annimulavula voohiloka murokora owo ahimyaka wira: “Xeeni ohinimukhanyererya awe iyawe omweemererya waakuxa anamwane aarwaaka mithukumano?” Masi anniliyala woona wira murokora owo onnipaka sotheene oniwerya awe wira orweele mithukumano. Nave okathi onipaka awe eprokrama khahiyo wira oneettela murima awe. Ohiya-vo, khahiyo owo tompaka soothanla sotheene voohimya sa anaaya. Mmuttottopeleke mwaha wa wiimananiha onipaka awe ni mwaaleeleke atthu akina itthu sooloka onipaka awe khula nihiku. Mwiira siiso, nyuwo munimwaakhaliherya atthu akina ottharuwa omulavula voohiloka murokora owo. Axitokweene annisuwela wira Yehova oniphavela wira arokora akhapeleliweke saana. (Yak. 1:27) Axitokweene ahaana otakiha oreera murima wa Yesu, ahipakaka malamulo wira yaaxankihe atthu akina, vareerelaka waareerela murima ni osuwela etthu enaaxankiha. (Math. 15:22-28) Vaavo axitokweene aniimananiha aya waakhaliherya arokora, awo annoona wira annithokoreriwa ni Yehova vamosa ni mutthenkeso awe. w20.09 24-25 itti. 17-19

Okumi awe wotheene, Daniyeli aari oowiiyeviha ni okathi wotheene aaniphavela ni aanitthara malakiheryo a Yehova. Mwa ntakiheryo, okathi aarumeeliwe awe ni Yehova wira otaphulele oloha wa Nabukhodonosori, Daniyeli khaphavenle ovuwihiwa mwaha wootaphulela. Ohiya opaka eyo, moowiisumaaliha aahinvaha Yehova ovuwa wotheene. (Dan. 2:26-28) Etthu xeeni nniixutta ahu? Akhala wira ninnittottopeliwa mwaha woolavula saana mwaha wala mwaha wookhumela saana naalaleeryaka, nihaana onvaha Yehova ovuwa wotheene, ohiya ophavela ovuwihiwa hiyo. Nihaana wiisuumaaliha ni osuwela wira khinaarowa owerya opaka etthu nihikhaliheriwaka ni Yehova. (aFil. 4:13) Vaavo nimpaka ahu eyo, ninnimutakiha-tho Yesu. Yesu aahooniherya wira aanimuroromela moomalela Yehova. (Yoh. 5:19, 30) Yesu khonakhala-khale uupuwelaka okuxa okhulupale wa Tiithi awe a wiirimu. Yoolepa ya aFilipi 2:6, Biblia Solempwa sa Muluku, enihimya wira Yesu “khakhanyerenrye ottittimihiwa ntoko Muluku”. Ntoko Mwaana oowiiwelela, Yesu aanisuwela wira sookhala itthu ahaawerya awe opaka ni aanittittimiha okhulupale wa Tiithi awe. w20.08 11 itti. 12-13

Atthu akina antthimaka ephiro ya ekumi aakhalana mixankiho saya seiyo atthu akina ahinweha aya ni ahinsuwela aya. Akhala wira mookhalana muxankiho munoona anyu wira atthu akina khansuwela oratteene, ntakiheryo na Mefiboxethi nnimookhaliheryani vanceene. (2 Sam. 4:4) Owo aari mutthu oorakala, nto okathi omosa Mwene Davidi aahimuthokorerya mwa enamuna yoohiloka. Tthiri itthu iyo khisaamwiirinhe onanariwa. Owo aanixukhurela khula etthu yooloka yaamukhumelela mookumini mwawe. Nave, aanixukhurela mwaha wa Mwene Davidi omureerela murima. (2 Sam. 9:6-10) Nto, okathi Davidi aamuthokorenrye awe moohiloka, Mefiboxethi aahoona wira Davidi khasuwela itthu sotheene saakhumelenle. Tthiri kheemerenrye yoovonya ya Davidi emwiirihaka okhala mutthu oohiloka. Nave Mefiboxethi khanvanhe nthowa Yehova mwaha wa itthu Davidi aapanke awe. Mefiboxethi aaniimananiha oweha etthu aakhanle awe oopaka wira omukhaliherye mwene aathanliwe ni Yehova. (2 Sam. 16:1-4; 19:24-30) Nto Yehova oheemererya wira ntakiheryo na Mefiboxethi nilempwe mBiibiliyani wira nniixuttiheke.—aRom. 15:4. w20.04 26 etti. 3; 30 itti. 18-19

Anna akina a mmulokoni annithanliwa wira arumeeleke ntoko mamisionaario, mapioneero a vameekhaaya aahiiso mapioneero ookilaatheya. Awo annithanla olaleerya ni waapaka awiixutti okhala muteko aya wa okathi wotheene. Nnaamwi anna awo anivara muteko wa okathi wotheene ahirina itthu sinceene sa werutthuni, Yehova onnaareeliha aavahaka itthu sinceene sooloka. (Mar. 10:29, 30) Hiyo ninnaaphenta anna ni arokora awo ni ninnixukhurela okhala wira aniirela mpantta muloko. Niireke anna arina miritti wala anivara muteko wa Muluku wa okathi wotheene ti yaawo paahi arina opuro mmulokoni? Nnaari! Khula namalaleerya a ihapari sooreera onnivahiwa efaita ni Muluku ni atthu akina a mmulokoni. (aRom. 10:15; 1 aKor. 3:6-8) Eyo ekeekhai okhala wira yoolakela ekina yuulupale ya muloko ori waapaka awiixutti a Pwiya ahu Yesu Kristu. (Math. 28:19, 20; 1 Tim. 2:4) Atthu otheene aniirela mpantta muloko, akhale anamalaleerya oopatisiwa ni oohipatisiwa anniimananiha ohela nipuro noopacerya muteko woolaleerya.—Math. 24:14. w20.08 21 itti. 7-8

Ntoko anooniherya aya moolumo a yoolepa ya olelo, okathi ninkhalana ahu mixankiho, Yesu onoonikhaliherya. Moolumo ala a Yesu anninivaha ikuru. Mwaha wa xeeni? Mwaha woowi, mahiku makina toovila ovilela. Mwa ntakiheryo, vaavo ninkhweliwa ahu mpatthani wala mmusi ahu, hiyo ninnoona owereya ni oriipiwa murima vanceene ohiya paahi mahiku vakhaani, masi owereya iwo pooti oviriha iyaakha sinceene. Atthu akina annikhalana mahiku ooxankiha mwaha wa mixankiho sinikumiheriwa ni wuuluvala. Nave atthu akina anniviriha mahiku ootepexa oxankiha mwaha woowi anriipiwa murima. Hata vari siiso, hiyo ninniphwanya ikuru wira nivilele mwaha woowi Yesu ori ni hiyo “mahiku othene” mookumini mwahu hata mahiku yaale ootepexa oxankiha. (Math. 11:28-30) Biibiliya onninlipiherya wira Yehova onniruma malaikha wira anikhaliherye. (aHeeb. 1:7, 14) Mwa ntakiheryo, malaikha anninikhaliherya ni onivaha malakiheryo vaavo nnaalaleerya ahu ihapari ‘sorera s’Omwene’ atthu “a maloko othene ni a mahimo othene ni a malavulelo othene ni a ilapo sothene”.—Math. 24:13, 14; Wiis. 14:6. w20.11 13-14 itti. 6-7

Otheene ahu nimphavela wira ale nnaasomiha ahu Biibiliya akupaliki ni murima wotheene wira ele aniixutta aya enikhuma Nuulumo na Muluku, Biibiliya. (1 aTes. 2:13) Ninrowa owerya sai opaka eyo? Mmutumereryeke ole munimusomiha anyu Biibiliya ohimya itthu oniixutta awe. Ohiya omakela omutthokiherya soolepa sa mBiibiliyani, munvekeleke wira ootthokiheryeni ele enihimya aya yoolepa eyo. Nave mmukhaliheryeke naxikola anyu woona moota Biibiliya onivareleya awe muteko mookumini mwawe. Munrowa owerya sai opaka eyo? Mumpakeleke makoho anrowa omukhaliherya ohimya moonelo ni muupuwelo awe voohimya sa yoolepa musomme anyu. (Luka 10:25-28) Mwa ntakiheryo, nyuwo pooti omukoha so: “Yoolepa ela enookhaliheryani sai oweha mikhalelo sa Yehova?” “Ekeekhai ela ya mBiibiliyani mwiixuntte anyu enrowa wookhaliheryani sai mookumini mwanyu?” “Munoonela sai ele mwiixuntte anyu?” Etthu yootepa otthuneya khahiyo itthu naxikola anyu onsuwela awe masi moota onisiveliwa awe ni ovarihela muteko ele onsuwela awe. Tivonto mmuhiye Biibiliya wira omwiixuttiheke. Mwaaphavelaka okhala mwiixuttihi oolokexa, muhaana okhala mutthu oowiiyeviha. w20.10 15 itti. 5-6

Ninnikupali wira muteko woolaleerya, onoomala okathi Yehova othanlale awe. Nkahaya muupuwele ele yiiraneyale okathi wa Nowe. Yehova aahooniherya wira onnipaka itthu okathi wooreerela. Sihalaka iyaakha 120, Yehova aahihimya nihiku aarowa awe opacerya Mutaaseke. Iyaakha sinceene muhoolo mwaya, Yehova aahimuleela Nowe wira opake ekalawa. Woonasa wene, saahivira iyaakha 40 aahiiso 50 ohinatthi mutaaseke. Nto Nowe aaniluttuweliwa ovara muteko owo. Nnaamwi atthu yahanwiriyana Nowe, owo aahivikaniha olaleya muhupi woophukela wa Yehova mpakha okathi Yehova aamulenle awe wira ohele inama mukalawani. Nto okathi wooreerela Yehova aahitthuka ‘mukhora ottuli wa Nowe’ (Maph. 6:3; 7:1, 2, 16) Ninnikupali wira moohipisa Yehova onoohimya wira muteko woolaleerya woomala, nto owo ‘onotthuka mukhora’ wa olumwenku wa Satana wira oruuhe olumwenku musya ni wa xariya. Nlipelelaka ophiya nihiku nno, nihaana omutakiha Nowe, Habakuki ni arumeyi akina yahaahiyale matata aya amumulaka. Nto muhihiye ohela nipuro noopacerya muteko woolaleerya, opixa murima ni omwaamini Yehova ni sooleiherya sawe. w20.09 13 itti. 18-19

Vaakhanle wira khakhanle malamulo a okhala muhooleli, emusi ya Yehova yaarowa okhala yoohitthokiheya ni khiyaarowa ohakalalaka. Mwa ntakiheryo, khuuvo mutthu aarowa osuwela tani okhanle oopaka soothanla sookiserya ni tani anrowa ohoolelaka okathi sinrowa aya ovariheliwaka muteko soothanla iyo. Akhala wira mareheryo a Yehova a okhala muhooleli etthu yooloka, nto xeeni athiyana anceene olelo-va anoona aya wira anoopuheriwa? Eyo enniiraneya, mwaha woowi alopwana akina khanitthara malamulo a Yehova voohimya sa emusi, masi anitthara soolema sa muttetthe aya. Nave alopwana akina annaahasula axaaraya wira aphwanye ele aniphavela aya. Mwa ntakiheryo, alopwana akina annaahasula axaaraya wira yincererye ottittimihiwa waya aahiiso wira awooniherye atthu akina wira awo tari “aneene etthoko”. Owo pooti wuupuwelaka wira miyo nkimphavela omukhanyererya mwaaraka okiphenta, masi owo ohaana okoova. Nto mulopwana owo pooti orumeela wooviwa iwo, wira onweha-weheke mootepana mwaarawe. Muupuwelo owo onnimwiiriha muthiyana ohikhala oolemeliheya ni oottittimiheya. Nave eyo ennivirikana ni ele Yehova oniphavela awe.—aEef. 5:25, 28. w21.02 3 itti. 6-7

Okathi muntepa anyu oxanka munvekeleke Yehova wira ookhaliheryeni. Owo onimoovahani “murettele wa Muluku, yoowo onvikana osuwela wotheene wa apinaatamu”. (aFil. 4:6, 7) Nto orumeelaka munepa awe woowaarya, ikuru seiyo siri sootepexa owerya, Yehova onimoomaalihani. (aGal. 5:22) Vaavo muninvekela anyu, mmutthukuleleke murima anyu Yehova. Nave mmuleeleke itthu mooluluwanya. Mmuleeleke muxankiho anyu ni moota munoonela anyu. Akhala wira yookhala etthu mukhanle anyu oopaka wira mmalihe muxankiho anyu, munvekeleke Yehova wira ookhaliheryeni woona etthu yoopaka ni woovahani ikuru wira nvarihele muteko malakiheryo awo. Masi, akhala wira muxankiho anyu khamunoona etthu yoopaka wira mmalihe, munvekeleke Yehova wira ookhaliheryeni ohitepexa oxanka. Vaavo munivekela anyu mooluluwanya, munniwerya oweha oratteene moota Yehova onaakhula awe mavekelo anyu. Nto akhala wira Yehova khonaakhula moowaakuveya nivekelo nanyu, muhikhulumuwe, muhaana otthikela ovekela. Musuweleke wira Yehova khoniphavela paahi wira munvekeleke mwa enamuna yooluluwanya, masi-tho oniphavela wira muthipeleleke ovekela.—Luka 11:8-10. w21.01 3 itti. 6-7

Olelo-va, mmulokoni aakhala anamathelana ni imusi sinceene. Nave akhala anna oohithela ni arokora oohitheliwa. Nto naathokorerye sai anna oohithela ni arokora ahitheliwe? Nrowe niwehe moota nikhanle ahu ootakiha moota Yesu aathokorerya awe atthu oohithela ni oohitheliwa. Okathi wa muteko awe woolaleerya valaponi, Yesu khaathenle. Owo aahirumeela ikuru sawe ni okathi awe ovaraka yoothanleliwa awe. Yesu khotonko wiixuttiha wira othela wala ohitheliwa yooruma. Masi aahimmye wira maKristau makina annithanla ohithela wala ohitheliwa. (Math. 19:12) Yesu aanaattittimiha vanceene ale yahaathenle wala otheliwa. Owo khuupuwela wira ale ahithenle wala ahitheliwe kharina efaita aahiiso yookhala etthu enaahaleela mookumini mwaya. Omutakihaka Yesu, okathi wotheene wa muteko awe woolaleerya, murummwa Paulo khaathenle. Musuweleke wira murummwa Paulo khotonko wiixuttiha wira ti voohiloka othela. Maana aanisuwela wira owo mwaha wa mutthu mwaneene. w20.08 28 itti. 7-8

Yohani aahikhala iyaakha sinceene ni aahikhalana sookumanana soohakalaliha. Owo aahikhalana mixankiho seiyo saarowa ovukula waamini wawe. Masi Yohani aahipaka sotheene aawerya awe wira iiwelele yooruma ya Yesu ya waaphenta anna ni arokora. Tivonto, Yohani aanikupali ni murima wotheene wira Yehova ni Yesu yaanimphenta ni yaamunvaha ikuru wira ovilele khula muxankiho waarowa omphwanya. (Yoh. 14:15-17; 15:10) Tthiri khiivo etthu Satana ni olumwenku awe wootakhala yaapanke aya yaamukhoottihenrye wooniherya wira aanaaphenta anna ni arokora ni moolumo ni miteko sawe. Ntoko Yohani, hiyo ninkhala olumwenku ola onilamuleliwa ni Satana, olumwenku yoowo atthu ahinaaphenta aya akhwaaya. (1 Yoh. 3:1, 10) Ekeekhai wira Satana aaniphavela wira naahiyale waaphenta anna ni arokora, masi owo onoowerya opaka eyo akhala wira hiyo nnoomweemererya. Tivonto, mwiimananiheke waaphenta anna ni arokora ni owooniherya wira munnaaphenta ni moolumo ni miteko sanyu. Mwiira siiso, nyuwo munoohakalala vanceene wiirela mpantta emusi ya Yehova ni munoohakalalaka vanceene mookumini mwanyu.—1 Yoh. 4:7. w21.01 13 itti. 18-19

Olumwenku ola onilamuleliwa ni Satana ti wooxankiha vanceene. Okathi mukina khannoona etthu yoopaka. (2 Tim. 3:1) Masi, khivanitthuneya otepa oxanka ni woova vanceene. Yehova onnisuwela mixankiho sahu. Moophenta, owo ooleiherya wira onoonivarela ni moono awe woolopwana wa xariya. (Yes. 41:10, 13) Ninnikupali ni murima wotheene wira Yehova onoonikhaliherya. Biibiliya onninivaha ikuru wira nivilele khula muxankiho onniphwanya. Nyuwo pooti ophwanya mipantta sa osommwa wa Biibiliya woovara murima, iviidiyu ni mpantta oni: “Mutakiheke Waamini Waya”, seiyo sinooniherya waamini wa atthu aniromoliwa mBiibiliyani. Nto, muhinatthi orumeela okathi munipaka anyu yoosoma anyu aya Biibiliya, munvekeleke Yehova wira ookhaliheryeni ophwanya iponto sinrowa wookhaliheryani mookumini mwanyu. Nave mwiimananiheke wiihela nipuro na mutthu onilavuliwa. Muupuweleleke etthu arumeyi awo a Yehova yaapanke aya ni moota Yehova aakhalihenrya awe ovilela mixankiho saya. Nuumala-vo, nvariheleke muteko mookumi mwanyu ele mwiixuntte anyu. Muhiliyale omuxukhurela Yehova mwaha wa nikhaliheryo notheene onoovahaaweni. Nave, mooniheryeke wira munnixukhurela itthu sotheene mphwannye anyu mwaakhaliheryaka ni waalipiha atthu akina. w21.03 19 itti. 22-23

Akhala wira moothela wala mootheliwa ni muniphavela waayara anamwane, mwiikoheke so: ‘Niireke naatthu oowiiyeviha ni ninnimphenta Yehova ni Nuulumo nawe? Niireke Yehova aamunithanla wira nimukhapelele mwaana?’ (Esal. 127:4) Akhala wira mwa namuyari mwiikoheke so: ‘Kiireke kinniwiixuttiha anaaka osuwela ovara muteko?’ (Mus. 3:12, 13) ‘Kiireke kinniimananiha waakhapelela anaaka wira sihaakhumelele ihasara sa werutthuni ni itthu saarowa ohonona mweettelo aya wooloka?’ (Mir. 22:3) Ekeekhai wira khamunrowa owerya waakhapelela aniinyu mixankiho sotheene. Masi nyuwo pooti waakhaliherya aniinyu ovilela mixankiho sa mookumini nwiixuttihaka moophenta ororomela miruku sa Nuulumo na Muluku, Biibiliya. (Mir. 2:1-6) Mwa ntakiheryo, akhala wira ookhala mmusi anyu ohiyale omurumeela Yehova, nwiixuttiheke aniinyu efaita erina aya ororomeleya wa Yehova murumeelaka matakiheryo a mBiibiliyani. (Esal. 31:24) Nave akhala wira ohookhwa mutthu mwamphenta anyu, nwooniherye aniinyu iveersu sa mBiibiliyani sinrowa waakhaliherya oxintta oriipiwa murima ni ophwanya murettele.—2 aKor. 1:3, 4; 2 Tim. 3:16. w20.10 27 etti. 7