Outubro

Itthu nniixuttiha ahu ni ninkupali ahu, sinikhuma mBiibiliyani. Hata vari siiso, atthu anceene annikhumuwa ni khaneemererya muhupi ninlaleya ahu mwaha woowi, khanimpaka ifesta ni soolema soohiloka wira nimukokhorele Muluku. Nave itthu nniixuttiha ahu khahiyo itthu sinaasivela owiriyana. Nihaana opaka exeeni wira nihikhumuwe? Murummwa Paulo aahaaleela maKristau yaakhala oRoma wira: “Mutthu onaamini paahi nuumala wiiwa nuulumo. Nto, vanniweryaneya wiiwa nuulumo okathi onilaleiwa awe Kristu”. (aRom. 10:17) Ifesta sinipakiwa seiyo sihinivarihana ni Biibiliya, hata siri ene soohakalaliha ni sookuxa murima iyo khasinikhala-khala silipihaka waamini wahu. Etthu yuulupale enlipiha waamini wahu ori omusoma Biibiliya. Mwaha woowi Biibiliya onoonikhaliherya osuwela ekeekhai, maana “khivanweryaneya omusiveliha Muluku nihaaminiki”. (aHeeb. 11:1, 6) Nto khivanitthuneya olipelela ekanyeryo enikhuma wiirimu enrowa onikupaliha wira noophwanya ekeekhai. Osoma oratteene itthu Biibiliya oniixuttiha awe onoolipiha vanceene waamini wahu ni onoomala-maliha itthu sotheene ninhoverya ahu. w21.05 4-5 itti. 11-12

Murummwa Paulo aahaana ovahiwa ikuru otepexa wene okathi yoole aamaniwa awe, ovonyiwa maluku ni otthukweliwa mukhatteya. (2 aKor. 11:23-25) Nave Paulo aahihimya wira okathi mukina aaniwanana miyuupuwelelo soohiloka. (aRom. 7:18, 19, 24) Ohiya-vo, Paulo aahaana owanana ‘mwiiwa waaheliwe mweerutthuni mwawe’. Nto waahikhala okathi Paulo aamuxonttenle awe Muluku wira okumihe mwiiwa owo wala muxankiho awe. (2 aKor. 12:7, 8) Nnaamwi Paulo aarina mixankiho iyo sotheene, Yehova aahinvaha ikuru wira owerye olaleerya. Mwa ntakiheryo, okathi omosa, vaavo Paulo aahaawerya awe okhuma mwaha woowi aarootthukweliwa oRoma, owo aaniimananiha waalaleerya atthu waahela muhina makhulupale a kuvernu. (Mit. 28:17; aFil. 4:21, 22) Nave Paulo aahaalaleerya Makwarta otheene a Mwene ni atthu ale yaamuxukurya. (Mit. 28:30, 31; aFil. 1:13) Nave okathi ole, Paulo aahilepa ikarta, seiyo mpakha olelo-va sinaakhaliherya maKristau eekeekhai. w21.05 21 itti. 4-5

Mwaha wa wiixinnuwiha, Mwene Oziya a oYuda khaawiriyanne miruku aavahiwe awe ni atthu akina ni aahipaka etthu aaheemereriwa awe opaka. Owo aanikhumela saana, aahixintta ikhotto sinceene, aahiteka ipa sinceene ni aahikhalana imatta sinceene. Nto “Muluku [eekeekhai] ahimureriha”. (2 Wah. 26:3-7, 10) Masi Biibiliya onihimya wira “mwaha w’owerya wawe, murim’awe wahisareya wisona, khumpwetexa”. Yehova aahihimya oratteene wira anamukuttho paahi ti yeemereriwa ovaha erupani otemplo. Masi Oziya aahipaka etthu aheemereriwa awe opaka, owo aahikela mutemplo wira ovahe erupani. Yehova khaasiveliwe mwaha wa wiixinnuwiha wa Oziya ni aahimphwanyiha makuttula wala makokho. (2 Wah. 26:16-21) Niireke wiixinnuwiha pooti onihapuxa ntoko waamuhapunxe aya Mwene Oziya? Aayo, akhala wira ninnitepa wiisuupuwela ovikana vanireerela aya. Nihikhala-khale niliyalaka wira itthu sotheene ninsuwela ahu ni iparakha nrina ahu, soovaha sinikhuma wa Yehova. (1 aKor. 4:7) Akhala wira nnimwiixinnuwiha, Yehova khonrowa onirumeela. w21.06 16 itti. 7-8

Yesu aanisuwela wira khahiyo wira okathi wotheene awiixutti awe yaarowa okhalana sookumanana soohakalaliha okathi woolaleerya. Tthiri, hiyo khaninsuwela akhala wira atthu anceene yaalaleeriwe ni awiixutti yaahikhala makristau. Nto awiixutti ale yahaana ohakalala ohiya mwaha wa itthu yaawerya aya opaka masi mwaha woosuwela wira Yehova aanihakalala mwaha wa wiimananiha waya ni muteko yaavara aya. Akhala wira nnoovilela naalaleeryaka nnoophwanya okumi woohimala. Vaavo nnaala ahu ni olimela inuku sa Omwene nnaala ahu, hiyo ‘ninnaala neettihiwaka ni munepa wa Muluku’. Maana ninneemererya okhaliheriwa ni munepa woowaarya wa Muluku. Nave vaavo ‘nihinkhulumuwa’ ahu Yehova onninlipiherya wira nnoohepha okumi woohimala hata nihiwenrye omwiixuttiha mutthu Biibiliya mpakha opatisiwa. — aGal. 6:7-9. w21.10 26 itti. 8-9

Etthu ya nenli enniiriha olaleerya ni wiixuttiha ekeekhai, okhala wira ninnaaphenta atthu. Okathi omosa, Yesu ni awiixutti awe yaahikhulumuwa mwaha woowi yaahiviriha nihiku notheene alaleeryaka. Nto yaaniphavelasa opuro wira aphumurye. Masi muttitthi muulupale wa atthu waahaaphwanya. Yesu aahiwoonela othunku, nto aahipacerya owiixuttiha “itthu sinceene” atthu ale. Yesu aaniihela nipuro na atthu ale. Nave Yesu aahoona wira atthu ale yaanihaawa ni yaaniphavela okhalana nlipelelo. Nto wuupuwela itthu iyo saahimwiiriha Yesu ophavela waakhaliherya. Etthu emosaru, enniiraneya ni atthu anceene olelo-va. Okathi mukina, pooti okhalaka ntoko wira atthu awo annihakalala ni aakhalana okumi wooloka, masi itthu iyo sihikhala-khale soowokakani. Maana atthu awo ari ntoko ipwittipwitthi sirimenle, sihirina nlipelelo ni sihirina makampusi. Murummwa Paulo aahimmye wira atthu ntoko awo khanimusuwela Muluku ni kharina nlipelelo. (aEef. 2:12) Vaavo nnuupuwela ahu mukhalelo woohiloka wa omunepani wa atthu anikhala muttetthe ahu, ophenta ni othunku onniniiriha waakhaliherya. Enamuna yuulupalexa nikhanle ahu oowaakhaliherya, ori waavaha yoosoma ya Biibiliya. w21.07 5 etti. 8

Mutthu oowiikuxererya, toowiixinnuwiha ni toowiitthuna. Mutthu a nrima khahiyo paahi oniphavela etthu ya mutthu mukina, masi-tho oniphavela wira mutthu onimukhalela awe nrima empweteye etthu orina awe. Tthiri nrima ninnimwiiriha mutthu omunyokha mukhwaawe. Wiikuxererya ni nrima, ori ntoko mukwitha wala ikokhola sinimuhonona kaaxi a eviyau. Ekeekhai wira eviyau eyo pooti ovava, masi nuuvira okathi mukwitha wala ikokhola iyo pooti ottiya etuubu wala mankeera onivara awe kaaxi owo. Nto eyo pooti wiiriha eviyau eyo omora, niire so, ompaka asitenti. Etthu emosaru, pooti omwiiraneela mutthu opacenrye khalai omurumeela Yehova. Nto akhala wira mutthu owo onniikuxererya ni ookhalana nrima, owo pooti omora. (Mir. 16:18) Mutthu owo pooti ohiya omukokhorela Yehova ni wiikumiherya mixankiho ni waakumiherya mixankiho atthu akina. Hiyo nnoowerya osyaka wiikuxererya akhala wira khaninliyala miruku Paulo sini: “Muhiireke itthu mphavelaka oxinttana wala wiittottopa, nto mwiiyeviheke, khula mutthu awooneleke vatthu akhwaawe ovikana mmensawe”. — aFil. 2:3. w21.07 15-16 itti. 6-8

Atthu akina anoona wira etiini yekeekhai tiile eniwerya waakhula makoho otheene, hata makoho yaale ahinaakhuliwa mBiibiliyani. Niireke eyo ekeekhai? Nkahaya nwehe ntakiheryo na murummwa Paulo. Owo aahaatumererya makristau wira yaahaana ‘ovarerya itthu sotheene’. Nave Paulo aaheemererya wira khaasuwela itthu sotheene sa mBiibiliyani. (1 aTes. 5:21) Paulo aalempe so: “Osuwela wahu khomalenle . . . Vano ninkhala ntoko ninweha vaxipelyuni ya eyuuma”. (1 aKor. 13:9, 12) Eyo enooniherya wira Paulo khaasuwela itthu sotheene sa mBiibiliyani ni hiyo khaninsuwela itthu sotheene sa mBiibiliyani. Masi hata vaari siiso, Paulo aanisuwela ele Muluku oniphavela. Nave aanisuwela oratteene wira itthu aakupali awe saari seekeekhai! Enamuna emosa nikhanle ahu ookupali wira noophwanya ekeekhai ori olikanyiha enamuna ya okokhorela yaakumiheriwe ni Yesu ni enamuna Anamoona a Yehova olelo-va animukokhorela aya Muluku. w21.10 18-19 itti. 2-4

Anna oowuuluvala, musuweleke wira hata nvaraka muteko wa Muluku wa okathi wotheene wala nnaari, nyuwo munoowerya opaka itthu sinceene wira mwaakhaliherye atthu akina. Moota xeeni? Mwiimananiheke olimalela makhalelo anyu masya, mukhalaneke soolukama ni mwiimananiheke ovara ele muniwerya anyu ohiya ele muhiniwerya anyu. Mwene Davidi aaniphavela ni murima wotheene oteka empa ya Yehova. Masi Yehova aahimuleela wira yena khahiyo taarowa oteka, masi mwanawe iihaniwa Salomoni taarowa oteka. Davidi aaheemererya yoothanla ele ya Yehova ni aahipaka itthu sotheene aawerya awe wira okhaliherye otekiwa empa ele. (1 Wah. 17:4; 22:5) Davidi khuupuwela wira yena paahi taaphwanelela oteka empa ele ya Yehova mwaha woowi Salomoni aari mmiravo ahaasuwela itthu sinceene. (1 Wah. 29:1) Davidi aanisuwela oratteene wira empa ele yaamutekiwa mwaha woowi Yehova aamureeliha. Ohiya mwaha wa iyaakha wala osuwela wa atthu ale yaarowa otekaka. Amutakihaka Davidi, anna oowuuluvala olelo-va, annivikaniha ovara muteko hata soothanleliwa saya siturukiwaka. Awo annisuwela wira Yehova onimwaareeliha amiravo anivara muteko yoowo yaavara aya khalai. w21.09 9 etti. 4; 10 itti. 5, 8

Okhalana soolukama sa omunepani onnikhaliherya vanceene okumi ahu. Masi etthu ninreerela ahu opaka, ori okhalana soolukama sinivarihana ni makhalelo ahu ni itthu ninsuwela ahu, ohiya okhalana soolukama sinivarihana ni makhalelo a atthu akina. Akhala wira nnookhalana soolukama nihinwerya ahu ophwanya, hiyo pooti onyoonyiheya ni okhulumuwa. (Luka 14:28) Okhala wira munimukokhorela Yehova, nyuwo mookhalana efaita ni munniirela mpantta emusi awe ya olumwenku wotheene, yeeyo erina atthu oovirikana. Yehova ohoothanlani nyuwo, ohiya mwaha woowi mwa mutthu oolokexa waavikana atthu akina, masi ohoothanlani mwaha woowi ohoona wira mookhalana murima wooloka, mwa mutthu oowiiyeviha, munniphavela wiixuttihiwa ni opaka marukunuxo. Nto mukupaliki ni murima wotheene wira Yehova onnivaha efaita khula etthu munipaka anyu mmutthenkesoni mwawe. Ovilela ni ororomeleya wanyu, munnooniherya oratteene wira nyuwo mookhalana murima wooloka. (Luka 8:15) Nto mwiimananiheke ovara oratteene muteko wa Yehova. Mwiira siiso, nyuwo munookhalana mathowa ooloka anrowa owiirihani ‘otteeliwa murima [mmensinyu]’. — aGal. 6:4. w21.07 24 etti. 15; 25 etti. 20

Nihaana opixa murima okathi ninlipelela ahu wiireliwa exariya. Mwa ntakiheryo, vaavo axitokweene ansuwela aya wira ookhala mutthu mmulokoni opanke etampi yuulupale, awo annaavekela “ankhili anikhuma wiirimu” wira akhalane moonelo wa Yehova. (Yak. 3:17) Yoolakela ya axitokweene omukhaliherya mutthu owo opanke etampi yuulupale ‘otthikela ephiro yooreera’. (Yak. 5:19, 20) Nave awo annipaka sotheene aniwerya aya wira akhapelele muloko ni waamaaliha ale akumiheriwe mixankiho. (2 aKor. 1:3, 4) Vaavo axitokweene anithokorerya aya myaha sinivarihana ni itampi suulupale, awo ahaana ovarerya itthu sotheene siiraneyale. Nto pooti ovira okathi munceene. Axitokweene awo annivekela, anninvaha miruku sinikhuma mBiibiliyani ni annimpwapwela mutthu owo opanke etampi eyo yuulupale. (Yer. 30:11) Ekeekhai wira axitokweene khamphavela opaka yoothanla moowakuveya. Tthiri vaavo axitokweene anithokorerya aya myaha mwa enamuna yooloka, muloko wotheene onnittottela mureerelo. w21.08 11 itti. 12-13

Mwaha wa etala yaakhumelenle wIsarayeli, Nowemi, iyawe ni anaaya anli axilopwana yaahithaamela oMowabi. Akhalaka oMowabi, iyawe Nowemi aahikhwa. Moottharelana anaawe anli yaahithela ni mooriipiha murima yaahikhwa. (Ruth. 1:3-5) Ihasara iye sootheene, saahimukhulumula vanceene Nowemi. Nto owo aahixanka vanceene mpakha wuupuwela wira ihasara iye saakumiheriwa ni Yehova. Nkahaya nwehe etthu aahimmye awe oriki: “Apwiya kharere okihaxa”. “Munkìhanela-ní Nowemi, Apwiya ekiyevihalé, Muluku oweryexa akihaxalene?” (Ruth. 1:13, 20, 21) Yehova, aanisuwela wira mixankiho pooti omwiiriha musuweli ‘opacerya okhala mulolo’. (Mus. 7:7) Yehova aahimuruma Ruthi wira omooniherye Nowemi ophenta wekeekhai. Tthiri Ruthi aahimooniherya ophenta wekeekhai Nowemi vaavo aamureerela awe murima, omulipiha ni omooniherya wira aaniphentiwa ni Yehova. w21.11 9 etti. 9; 10 itti. 10, 13

Akhala wira niinaano-va ninniimananiha ovara muteko wa Yehova, niireke eyo enitaphulela wira khivanireerela-tho wiimananiha opaka itthu sikina? Nnaari! Nihaana okhalana soolukama sikina somunepani sinrowa onikhaliherya olokiherya muteko ahu woolaleerya ni wiixuttiha ni waakhaliherya anna ni arokora. Masi wira niphwanye soolukama sahu, nihaana okhala atthu aankhili ni oowiisuumaaliha. Ohiya wuupuwela itthu sinniphwanyiha mireerelo hiyo paahi, nihaana wiimananiha waarumeela atthu akina. (Mir. 11:2; Mit. 20:35) oolukama xeeni munireerela anyu okhalana? Munvekele Yehova wira ookhaliheryeni osuwela soolukama muniwerya anyu okhalana ni ophwanya. (Mir.  16:3) Niireke nyuwo pooti okhala pioneero ookhaliherya, ookilaatheya, orumeela oBetheli wala okhaliherya oteka ipa sinirumeeliwa ni mutthenkeso ahu? Niireke munoowerya wuncererya muteko anyu woolaleerya, wiixutta nttaava nikina wala othaamela elapo ekina wira mwalaleeryeke? w21.08 23 itti. 14-15

Yehova onnivaha efaita yinceene ophenta wekeekhai. (Hos. 6:6) Omurumaka profeta Mikeya, Muluku ahu onnintumererya wira nihaana okhalana ophenta wekeekhai. (Mik. 6:8) Masi nihinatthi oweha moota nikhanle ahu oowooniherya ophenta wekeekhai, nrowe niwehe ele onitaphulela aya ophenta wekeekhai. Ophenta wekeekhai exeeni? Nuulumo noowi ophenta wekeekhai, ninniphwanyaneya ikwaha 230 Tradução do Novo Mundo da Bíblia Sagrada. Masi onitaphulela exeeni ophenta wekeekhai? “Moolumo Ootthokiheriwa a mBiibiliyani”, ataphulenle so nuulumo noowi ophenta wekeekhai: “Ophenta ohinimala, woororomeleya ni ovarexexana. Ikwaha sinceene onnihimmwa ophenta Muluku oniwooniherya awe apinaatamu. Nave, onnihimmwa ophenta apinaatamu anooniheryana aya mukina ni mukhwaawe”. Yehova ntakiheryo nuulupale na mutthu onooniherya ophenta wekeekhai. Eyo ti etthu yaamwiirinhe mwene Davidi ohimya wira: “Muluku! Oniphenta wanyu onkhuma osulu . . . Oniphenta wanyu ti wororomeleya tthiri”. (Esal. 36:5, 7) Nimutakihaka Davidi, niireke ninnixukhurela ophenta wekeekhai wa Yehova? w21.11 2 itti. 1-2; 3 etti. 4

Yehova onnaaphenta vanceene atthu otheene animukokhorela, omuhela muhina Yesu yoowo ‘opacenrye opattuxiwa mwa itthu sotheene’ ni malaikha. (aKol. 1:15; Esal. 103:20) Okathi aari awe valaponi, Yesu aahooniherya wira apinaatamu oororomeleya pooti omuthokorerya Yehova ntoko Tiithi aya. Olavulaka ni awiixutti awe, Yesu aahimuhimya Yehova okhala ‘Tiithi awe yoowo-tho, okhanle Tiithi aya’. (Yoh. 20:17) Nave vaavo nniivahererya ahu wa Yehova ni opatisiwa, ninniirela mpantta emusi yoophenta ya anna ni arokora ya olumwenku wotheene. (Mar. 10:29, 30) Yehova Tiithi oophenta. Nave Yesu oniphavela wira nimuthokoreryeke Yehova ntoko yena onimuthokorerya awe. Ntoko namuyari ookhweya olavulana ohiya ntoko mutthu oopuherya. Owo aapacerinha nivekelo na ntakiheryo ni moolumo oowi: “Tiithi ihu”. Yesu oonitumererya omuhimya Yehova okhala ‘Nanwerya sothene’, ‘Mpattuxa’ ni ‘Mwene a mahiku otheene’. Khahiyo vootakhala orumeela maihaneliwo awo a nttittimiho mwaha woowi Biibiliya onnirumeela omuhimyaka Yehova. (Maph. 49:25; Yes. 40:28; 1 Tim. 1:17) Masi Yesu oonitumererya omwiitthana Yehova okhala “Tiithi”. w21.09 20 itti. 1, 3

Yehova aahaaruma maprofeta orowa omulopola mwene Manase, masi owo aahikhootta waawiriyana. Nto Yehova aahaarumihela “mukhulupale ànakhotto a wAsiria. Anakhotto awo yahinvara Manasé, yahimutthuka n’unyolo w’eboronze, khumuroiha oBabilonia”. Otthukiwe ene elapo ele ya oBabilonia, woonasa wene Manase aahuupuwela oratteene itthu soohiloka aapanke awe. Nto “owo ahìyeviha, ahihokolowela w’Apwiya Muluku awe, yari Muluku àxitithi awe”. Nave Manase aahipaka itthu sikina. Maana aahimuxonttela Yehova wira omureerele murima. Tthiri Biibiliya onihimya wira Manase “ahinvekela Muluku”. (2 Wah. 33:10-12) Nuuvira okathi, Yehova ahaakhula mavekelo a Manase nave Yehova ahoona wira Manase aahituruka mweettelo awe. Okhala wira Manase aahimuxonttela vanceene Yehova, nto Yehova aahimweemererya Manase otthikela okhala mwene. Manase aahittottela mureerelo eparakha ele aavahiwe awe wira ooniherye wira aahittharuwa ni murima awe wootheene. w21.10 4 itti. 10-11

Aakila ni Prisila yaahaana okhuma muttetthe yaasuwela aya, ophwanya empa ekina ni omweetta nakoso aya a opaka itenta muttetthe mukina. Akhalaka empa aya esya oKorinto, Aakila ni Prisila yaaniimananiha okhaliherya muloko wa muttetthe ole ni wiimananiha ovara hoothe ni Paulo yaalipihaka anna ni arokora a epooma ele. Muhoolo mwaya, awo yaahithaamela ipooma sikina yaahaareere othowa anamalaleerya a Omwene. (Mit. 18:18-21; aRom. 16:3-5) Tthiri anamathelana ale yaaniimananiha ovara muteko wa Yehova ni yaanihakalala! Anamathelana a mahiku ala anoowerya omutakiha Prisila ni Akila ahelaka nipuro noopacerya Omwene. Nto ti vooloka ovaanela voohimya sa soolukama saya okathi annamorari aya. Vaavo anamathelana anikhalana aya soolukama sa ovara muteko wa Yehova ni aniimananiha aya ovara muteko hoothe, eyo enimwaakhaliherya vanceene oweha moota Yehova onaakhaliherya awe mookumini mwaya. — Mus. 4:12. w21.11 17 itti. 11-12

Moohaanyiherya, nihaana weettela ele Muluku onirumme awe wira naattittimiheke anamuyari ahu. Muhiliyale wira yooruma eri Onamukuttho 19:3 ya waattittimiha apaapi inyu ni amaami inyu, enirwa nuumala moolumo anihimya wira “mukhalé atthu òrera murima [oowaarya], mana Miyo ki òrera murima [oowaarya]. Miyo Apwiya, Muluku anyu”. (Onam. 19:2) Muupuwelaka yooruma ya Yehova ya waattittimiha anamuyari anyu, mwiikoheke so: ‘Kiireke miyo, kinnaattittimiha apaapa ni amaama?’ Akhala wira khalai khimwaapaka eyo, muhaana opaka marukunuxo. Ekeekhai wira nyuwo khamunwerya orukunuxa itthu mpanke anyu khalai, masi pooti wiimananiha vanceene waattittimiha anamuyari anyu niinaano-va. Woonasa wene, nyuwo pooti opaka eprokrama wira nviriheke okathi munceene muri ene ni anamuyari anyu. Nave mwaakhaliheryeke mwaavahaka itthu aniphavela aya, waakhaliherya olipiha waataana waya ni Muluku ni waakhaliherya mukhalelo wa mmuupuweloni. Mwiira siiso, munimooniherya wira munneettela yooruma ya Onamukuttho 19:3. w21.12 4-5 itti. 10-12

Mwene Davidi, aahipaka itampi suulupale. Mwa ntakiheryo, Davidi aahiraruwa ni Bathi-Xeba ni aahimwiiviha iyawe Bathi-Xeba. (2 Sam. 11:2-4, 14, 15, 24) Nto mwaha wa etthu yoohiloka Davidi aapanke awe, aahiikumiherya mixankiho ni aahaakumiherya mixankiho atthu a etthoko awe waahela muhina axaarawe akina. (2 Sam. 12:10, 11) Okathi mukina, Davidi aahooniherya wira khaamuroromela Yehova ni murima wotheene vaavo aarumme awe okontariwa anakhotto otheene a wisarayeli. Yaahikhumelela etthu yooriipiha murima. Eretta, yaahiwiiva atthu 70.000 a wisarayeli! (2 Sam. 24:1-4, 10-15) Mwaakhanle okathi ole, niireke mwaarowa wuupuwelaka wira khivaareerela Yehova ommorela ikharari? Yehova khaapanke eyo. Maana Yehova aahoona wira khalai Davidi aari mutthu oororomeleya ni aahittharuwa ni murima wotheene. Mwaha waivaavo, Yehova aahimulevelela Davidi itampi sawe sotheene. Yehova aanisuwela wira Davidi aanimphenta vanceene ni aaniphavela opaka itthu sooloka. Niireke nyuwo khamunihakalala osuwela wira Muluku ahu oophenta, onniweha itthu sooloka nimpaka ahu? — 1 Mam. 9:4; 1 Wah. 29:10, 17. w21.12 19 itti. 11-13

Yesu aaniwoonela othunku atthu oorakala. Muupuweleke wira Yesu aahiruma oleeliwa Yohani Mpatisa wira: “Alipa-oorakala, anneetta oratteene. Anamakokho, annipenuxiwa. Alipa-oohiiwa, vano anniiwa. Alipa-ookhwa, annihihimuxiwa”. Nuumala oweha miiriirya iye Yesu aapaka awe, “atthu otheene yaahipacerya omuttottopela Muluku”. (Luka 7:20-22) Makristau eekeekhai, onnaasivela otakiha othunku wa Yesu yaathokoreryaka oratteene atthu oorakala. Tthiri hiyo, onninsivela waareerela murima, waakhapelela ni waapixerya murima atthu oorakala. Ekeekhai wira, Yehova khonivanhe owerya woopaka miiriirya. Masi nookhalana eparakha ya waaleela atthu akina waahela muhina ale oorakala voohimya sa eparayiisu opuro yoowo atthu anrowa aya okhalana okumi wooloka ni waataana wooloka ni Muluku. (Luka 4:18) Ihapari iyo sooreera sinniwiiriha atthu anceene onvuwiha Muluku. w21.12 9 etti. 5

Itthu Yakobo aixuttiha awe, saakhuma munuulumoni na Muluku. Nto aahirumeela nuulumo na Muluku wira aakhaliherye atthu woona wira Yehova okathi wootheene onnaatthuvela, ale aniroromeleya ntoko Yobi. Yakobo aarumeela moolumo ookhweya ni aatthokiherya itthu mwa enamuna yookhweya wiiwexexa. Tivonto, khaapaka itthu wira okupaliwe, masi aaninvuwiha Yehova. Etthu nniixutta ahu: Mwiixuttiheke mwa enamuna yookhweya ni mmurumeeleke Biibiliya. Okathi nimmusomiha ahu Biibiliya mutthu, nihiphaveleke omooniherya wira naatthu oosuwelexa, masi niphaveleke omooniherya wira Yehova tori oosuwelexa ni onniphenta. (aRom. 11:33) Nnoowerya opaka eyo nimurumeelaka Biibiliya okathi wootheene nniixuttiha ahu. Mwa ntakiheryo, nihimuhimeeryeke naxikola ahu a Biibiliya etthu naarowa ahu opaka vaakhanle wira muxankiho omphwannye, onikhumelenle hiyo. Masi nimuleeleke matakiheryo a mBiibiliyani, wira yena iiwexexe moota Yehova onoonela awe mwaha owo. Opaka eyo enoomukhaliherya woona wira etthu yootepa otthuneya omuhakalaliha Yehova, ohiya hiyo nimmwiixuttiha. w22.01 11 itti. 9-10

Muluku oniphavela wira naathokoreryeke saana atthu akina ni nihaakumiheryeke mixankiho. Mukristau oniphavela omusiveliha Muluku, ohaana waaphenta atthu akina ntoko oniiphenta awe. Yesu, aahooniherya wira nlamulo niri Onamukuttho 19:18 nookhalana efaita yinceene. Nfarisi mmosa aahimukoha Yesu wira: “Tiivi eri yooruma yuulupalexa ya Nlamulo?” Omwaakhulaka, Yesu aahimuleela wira “yooruma yuulupalexa ni yoopacerya” tiila: Mumphenteke Yehova ni murima anyu wotheene, ni okumi anyu wotheene, ni muupuwelo anyu wotheene. Nuumala-vo, Yesu aahilavula moolumo ari Onamukuttho 19:18, oriki: “Yooruma ya nenli, yeeyo enlikana ni yoopacerya, tiila: ‘Mumphenteke mukhwiinyu ntoko muniiphenta anyu’”. (Math. 22:35-40) Sookhala inamuna sinceene nikhanle ahu oowooniherya wira ninnaaphenta atthu akina. Enamuna emosa ori weettela miruku siri Onamukuttho 19:18. Miruku iyo sinihimya so: “Muhiwunlelé ikuhu atthu a nloko nanyu”. w21.12 10-11 itti. 11-13

Yesu aahimookolela ntata, omoopola. Moone wira murummwa Pedru aahiwerya weetta vasulu va maasi vaavo anwehexexa awe Yesu. Masi okathi Pedru aawehexexa awe epheyo yuulupale, owo aahipacerya woova, waanyiherya, oxanka ni opacerya osama. (Math. 14:24-31) Yowiiraneya ya murummwa Pedru, enooniixuttiha itthu sinceene. Okathi Pedru aakhumme awe mukalawani orowaka mphareya, owo khaalipelela wira aamuxanka ni osama. Maana aaphavela weetta vasulu va maasi mpakha aari awe Pwiya awe. Masi Pedru aahihiya onwehexexa Yesu, onawehexexa epheyo. Olelo-va, hiyo nihaana okhalana waamini wira niwerye ovilela mixankiho ntoko siisaale Pedru aatthuneya awe waamini wira owerye weetta vasulu va maasi. Nto hata nirina ene mixankiho suulupale, nihaana ohihiya onwehexexa Yehova ni okupali wira onoonikhaliherya. w21.12 17-18 itti. 6-7

Ovekela, omusoma Biibiliya ni wuupuwelela oniirela mpantta okokhorela wahu. Okathi ninvekela ahu, ninlavula ni Tiithi ahu a wiirimu, yoowo onniphenta. Okathi nimmusoma ahu Biibiliya ninniixutta “omuttittimiha Muluku”, yoowo onisuwela itthu sinceene waavikana atthu otheene. (Mir. 2:1-5) Nave okathi nnuupuwelela ahu itthu ninsoma ahu, ninnitthokelela mikhalelo sooreera sa Yehova, niitthu oleihenrye awe opaka muhoolo. Eyo enamuna yootepexa oreera mukhanle anyu oorumeela okathi anyu. Masi okhala wira ninnaatteliwa miteko, ninrowa orumeela sai okathi ahu oratteene? Vaaweryaneyaka, muthanleke opuro woomaaleleya. Nkahaya nuupuwele ntakiheryo na Yesu. Ohinatthi opacerya muteko awe woolaleerya valaponi, Yesu aahiviriha mahiku 40 ori ene moothakoni. (Luka 4:1, 2) Okathi aari awe opuro ole woomaaleleya, aaniwerya onvekela Tiithi awe Yehova. Nave aanuupuwelela itthu Tiithi awe aaphavela awe wira yena opake. Moohaanyiherya, opaka eyo waahimukhaliherya Yesu wiilokiherya wira owerye ovilela mixankiho saarowa omphwanya muhoolo. w22.01 27-28 itti. 7-8

Ikwaha sikina hiyo pooti ovahiwaka miruku ni mutokweene aahiiso munna mukina oophwanelela. Nto akhala wira mutthu mukina onninivaha miruku sinikhuma mBiibiliyani, nihaana weettela. Ohimya ekeekhai, okathi ninvahiwa ahu miruku, khivanikhweya weemererya ni ovarihela muteko. Hiyo ninneemererya wira na anatampi. Masi pooti okhala vooxankiha weemererya miruku, vakhala wira mutthu owo onninleela etthu enreerela ahu olokiherya. (Mus. 7:9) Ikwaha sikina hiyo pooti woothereryaka itthu. Aahiiso pooti onyoonyiwaka ni mutthu onivanhe miruku iyo, nnapacerya wuupuwelaka wira onooninyokha. Hiyo pooti wuupuwelaka so: ‘Ale tani wira ekivaheke miruku miyo? Ale-tho annittheka!’ Nto akhala wira miruku iyo nivahiwe ahu khasinisivenle, hiyo pooti okhoottaka wiiwelela, nnamuhaavya mutthu mukina onrowa onivaha miruku sinrowa onisivela. w22.02 8-9 itti. 2-4

Niireke elapo esya ya Muluku sinookhala mixankiho sikhanle ooniiriha ohiroromela moota Yehova onipaka awe itthu? Mwa ntakiheryo, nkahaya nuupuwele etthu yaakhumelenle moohipisa nuumala aisarayeli okhuma wExiitu, weiwo yaakhalihiwe aya ipottha. Atthu akina yaahipacerya wiixinliha mwaha wa wunkheliwa eyoolya ya wExiitu. Nuumala-vo, yaahipacerya othanya emana yaavahiwa aya ni Yehova. (Moth. 11:4-6; 21:5) Niireke nuumala maxakha maalupale pooti oniiraneela etthu emosaru? Khaninsuwela miteko xeeni ninrowa ahu ovaraka wira nireerihe elapo para okhala eparayiisu. Woonasa wene onookhala muteko munceene nave woopaceryani itthu sikina sinooxankihaka. Niireke nnoohakalala ni itthu Yehova onrowa awe onivahaka okathi owo? Akhala wira nnooxukhurela itthu sootheene Yehova onnivaha awe olelo-va, nave nnoowerya ohakalala ni iye onrowa awe onivaha muhoolo. w22.02 7 itti. 18-19

Moolumo ari Zakariya 8:23 anihimya wira “mutthu òYuda” ni “nyuwo”, anihimmwa atthu amosaru athanliwe orowa wiirimu, masi nlelo ari valaponi. (aRom. 2:28, 29) “Amalapo muloko a maloko otheene”, anithoonyerya makristau a ipwittipwitthi sikina. Makristau awo, ‘annaavara metto’ aahiiso waatthara ale oothanliwa emurumeelaka hoothe Yehova. Mwa enamuna emosaru eniiraneya aya eprofesia eri Ezekiyeli 37:15-19, 24, 25, Yehova onniwiiriha makristau oothanliwa vamosa naale a ipwittipwitthi sikina, evareke saana muteko hoothe ni okhala oowiiraana. Eprofesia ele enniromola mapawe manli. Ale arina nlipelelo noorowa okhalaka wiirimu anlikana ni nipawe naalempwale nloko na “Yuda” (nloko na mamwene a wIsarayeli yaathanliwa ni Yehova). Nave ale arina nlipelelo nookhala mahiku otheene valaponi, anlikana ni nipawe naalempwale “Efrayimi”. Yehova onootakaaha igrupu iyo piili ni sinookhala “nipawe nimosa pahi”. Eyo entaphulela wira igrupu iyo soopiili sinvara muteko vamosa simwiiwelelaka Mwene Yesu Kristu. — Yoh. 10:16. w22.01 22 itti. 9-10

Yesu aahaalavula atthu yaavaha esimola amasikhini ohoolo wa atthu anceene, aphavelaka ohimmwa paahi. Masi para Yehova, akhala wira mutthu onnipaka etthu ophavelaka paahi ohimmwa, etthu eyo khahiyo etthu. (Math. 6:2-4) Mutthu onrowa owiirela itthu sooreera atthu akina paahi, akhala wira onnipaka itthu moohilipelela ovahiwa etthu. Mwiikoheke so: ‘Kiireke kinniphavela opaka etthu yooreera, masi kihinapaka? Exeeni enkiiriha owiirela itthu sooreera atthu akina?’ Yehova, Muluku ooluttuweliwa, nave onnirumeela munepa awe woowaarya,wira opake itthu. (Maph. 1:2) Nto khula mukhalelo wa munepa woowaarya wa Muluku, ohaana oniirihaka opaka etthu. Mwa ntakiheryo, murummwa Yakobo aalempe so: “Waamini ohirina miteko, ti wookhwa”. (Yak. 2:26) Etthu emosaru pooti wiiraneyaka ni mikhalelo sikina sootheene sa munepa wa Muluku. Khula okathi nnooniherya ahu wira nookhalana mikhalelo sinikumiheriwa ni munepa wa Muluku, nave ninnooniherya-tho wira ninnikhaliheriwa ni munepa owo. w22.03 11-12 itti. 14-16

Hiyo pooti wiimananiha vanceene omukokhorela Yehova ni waapakela itthu sooloka atthu akina. Masi, murummwa Pedru onnaatumererya makristau opaka etthu ekina ya efaita yinceene. Nuumala waatumererya makristau wira mweettelo aya wotheene okhaleke woowaarya, Pedru onnaatumererya oriki: “Mulokiherye muupuwelo anyu wira nvare muteko”. (1 Ped. 1:13) Muteko xeeni owo? Pedru ohimmye wira axinnawe Kristu oothanliwa ahaana “‘olaleya sootikiniha sa Muluku’ yoowo owiihanne”. (1 Ped. 2:9) Tthiri, makristau otheene olelo-va, aakhalana eparakha ya ovara muteko owo wa efaita yinceene ovikana miteko sikina. Eparakha yuulupale nrina ahu ya okhala atthu oowaarya a Muluku, yaawo aniimananiha olaleya ni owiixuttiha ihapari sooreera! (Mar. 13:10) Vaavo nniimananiha ahu opaka eyo ninnooniherya wira ninnimphenta Muluku ni atthu akina. Nave ninnooniherya wira nimphavela wira mweettelo ahu wotheene “okhaleke woowaarya”. w21.12 13 etti. 18

Murummwa Paulo khaakuvela waaphukela axinnawe. Owo aanisuwela wira akhala wira mutthu onnipaka etthu yoohiloka, eyo khentaphulela wira mutthu owo toonanara murima. Paulo aanaaphenta anna ni aaniwehexexa itthu sooreera yaavara aya. Nave akhala wira aahikhala munna wala murokora vaamuxankiha opaka itthu sooloka, Paulo khaaliyala wira hata vari siiso, murima awe mutthu owo waaniphavela opaka itthu sooreera. Nwehe moota murummwa Paulo aaphunke awe muxankiho wa arokora anli a muloko wa oFilipi. (aFil. 4:1-3) Vanikhala wira Evodia ni Sintikhe yaahikhalana muxankiho waawiiriha ohiiwanana. Masi hata vari siiso, Paulo khaapwapwenle ni aahiwehexexa mikhalelo saya sooreera. Arokora ale yaahimurumeela Yehova moororomeleya mwa iyaakha sinceene. Paulo aanisuwela wira Yehova aanaaphenta. Moonelo awe wooloka, waahimwiiriha omutumererya Evodia ni Sintikhe wira ephuke muxankiho ole. Nave waahimukhaliherya ohihiya otteeliwa murima, ni ohihonona opatthani awe ni arokora ale. w22.03 30 itti. 16-18

Murettele owo onoonikhaliherya okhala oomaaleleya ni otthokelela itthu mwa enamuna yoohakalaliha. Murokora mmosa oniitthaniwa Luz, aahoona wira eyo ekeekhai. Yena ohimmye: “Ikwaha sikina onnikiphwanya omeekha. Okathi mukina kinniriipiwa murima kinapacerya wuupuwela wira Yehova khonkiphenta. Okathi eyo eniiraneya aya, moowakuveya kinnimuleela Yehova itthu kinuupuwela. Nave ovekela onnikikhaliherya okhala oomaaleleya”. Moolumo a murokora Luz, anninooniherya saana wira ovekela pooti onikhaliherya okhala oomaaleleya. (aFil. 4:6, 7) Ninnikupali wira Yehova ni Yesu anoonikhaliherya, akhala wira nnookhweliwa. Nave nihiixutta wira vannireerela waalaleerya atthu ni waareerela murima, maana Yehova ni Yesu Kristu annooniherya mikhalelo iyo sooreera. Osuwela wira Yehova ni Yesu annisuwela mixankiho sahu ni sootteettheya sahu, onninlipiha ni onikhaliherya ovilela. Ninnilipelela nihiku Yehova onrowa awe omaleliha yooleiherya awe ohimmye awe wira: ‘onoopuputtha maithori ahu otheene’! — Wiis. 21:4. w22.01 15 etti. 7; 19 itti. 19-20

Yesu aahilavula mikhora miili soovirikana. Khula mukhora oniroiha estaraata yoovirikana, estaraata “yuulupale” ni estaraata “yaamukhaani”. (Math. 7:14) Masi khekhanle estaraata ya neeraru, maana siri istaraata piili paahi. Nto khula mmosa a hiyo, ohaana othanla estaraata onrowa awe ovira. Eyo yoothanla yuulupale ninreerela ahu opaka. Maana yoothanla ahu enooniiriha ophwanya okumi woohimala wala ohiphwanya. Atthu anceene annithanla ovira estaraata “yuulupale”, mwaha woowi ti yookhweya ovira. Ti vooriipiha murima woona wira atthu anceene annithipelela ovira estaraata yuulupale apakaka itthu atthu anceene anipaka aya. Awo khanisuwela wira estaraata eyo ti ya Satana ni eniroiha wookhwaani. (1 aKor. 6:9, 10; 1 Yoh. 5:19) Estaraata “yuulupale” yoovirikana vanceene ni estaraata “yaamukhaani” ni Yesu aahimmye wira atthu vakhaani paahi tanivira estaraata yaamukhaani. Mwaha wa xeeni? Mwaha wa maprofeta oowootha. Eyo ti etthu yaamwiirinhe Yesu waalopola awiixutti awe ntoko enooniherya aya ntoko enooniherya aya eversiikulu enittharelana.— Math. 7:15. w21.12 22-23 itti. 3-5