Novembro

Yehova aahookhaliheryani okhala oomaaleleya vaavo mwaavaanyihiwa anyu ni ale annilupattha. Ohiya-vo, pooti wira Yehova ootoko wookhaliheryani wuupuwela yoolepa ya mBiibiliyani wira mmooniherye mwaneene etthoko. Yehova onnovahani ikuru wira muhihiye olaleerya hata atthu akina a muttetthe anyu ahiphavelaka woowiriyanani. (Yer. 20:7-9) Yehova onninooniherya oreera wawe murima vaavo onniixuttiha awe moota woolaleerya. Mithukumano sahu sa eriyari ya esumana, ninniweha ni owiriyana sowooniherya sa ele nikhanle ahu oohimya okathi ninlaleerya ahu. Nto nihaana orumeela itthu iyo nniixutta ahu vaavo ninlaleerya ahu. Wanipacerya hiyo pooti oxanka vaavo nnuupuwela ahu orumeela enamuna esya ya opaceriha ovaanela. Masi vaavo nimpaka ahu eyo, ninnoona wira orumeela enamuna esya wala enamuna ekina ya opaceriha ovaanela ninnaakhaliherya vanceene atthu a muttetthe ahu. Nave okathi wa mithukumano ni akonkresu, ninniixutta orumeela inamuna sikina sa opaceriha olaleerya nihaatonko ahu orumeela. Ekeekhai wira wanipacerya hiyo pooti oxanka vanceene, masi musuweleke wira vaavo nneererya ahu opaka itthu iyo Yehova onninireeliha vanceene. w21.08 27 itti. 5-6

Epaphelo aalepenle awe aKorinto, murummwa Paulo aahihimya mowiiwanyeya etthu yahaalonke. Nuumala-vo, aahimuruma Tito orowa oKorinto. Paulo aaniikoha akhala wira epaphelo ele khiyaarowa waakhulumula anna ni arokora. Nto aahihakalala okathi aaleeliwe awe wira anna awo yaahixukhurela ni yaaneettela miruku aavanhe awe. (2 aKor. 7:6, 7) Axitokweene anoowerya otthara ntakiheryo na Paulo, evirihaka okathi eri ene ni axinnaya oowaamini. Enamuna emosa akhanle aya oopaka eyo, ophiya mithukumano sihinatthi opacerya wira ekhalaneke okathi woovaanela ni anna. Nave ahaana wiivaha okathi wira yaalipiheke atthu aniphavela olipihiwa. (aRom. 1:12) Mutokweene onitthara ntakiheryo na Paulo, onnaalipiha makristau akhwaawe orumeelaka Nuulumo na Muluku, nave onnaalipiherya wira Muluku onnaaphenta. Ohiya-vo, onniimananiha owooniherya makristau makina wira onnaaphenta. Owo onniivaha okathi woovaanela ni anna awo ni waavya inamuna sowaattottopela. Okathi onivaha awe miruku, onniimananiha wira miruku sawe sikhumeke mBiibiliyani. Onnilavula moohivitha etthu ni mooreera murima, wira ale onaavaha awe miruku saakhweeleke weemererya. — aGal. 6:1. w22.03 28-29 itti. 11-12

Olelo-va, Yehova onnaavaha arumeyi awe “owerya onivikana wa mutthu”. Enamuna emosa onnivaha awe ikuru ori ovekela. Eliivuru ya aEefeso 6:18, murummwa Paulo onnintumererya onvekela Muluku “khula okathi”. Nto Muluku onimwaakhula mavekelo ahu onivahaka ikuru. Okathi mukina, hiyo ninnikhalana mixankiho soovela-veliha nnakhala nihinoona etthu yoohimya vaavo ninvekela ahu. Masi muhiliyale wira Yehova onnintumererya ovekela hata vanivilaka ohimya moonelo ni muupuwelo ahu. (aRom. 8:26, 27) Biibiliya onninivaha ikuru. Murummwa Paulo aanikupali wira Soolempwa saamunvaha ikuru ni nimaaliho. Hiyo nave nikupaliki wira Biibiliya onoonivaha ikuru ni nimaaliho. (aRom. 15:4) Nto ti vooloka omusoma Biibiliya ni wuupuwelela ele ninsoma ahu. Niira siiso, Yehova onoonivaha munepa awe woowaarya wira nuupuwelele ele ninsoma ahu ni woona moota woovarihela muteko moovarihana ni muxankiho ahu. — aHeeb. 4:12. w21.05 22 itti. 8-10

Hiyo ninniluttuweliwa ovara muteko wowaapaka awiixutti Yesu onivanhe awe. Masi okathi mukina, hiyo ninnikumana mixankiho seiyo sinnikhoottiherya ovara muteko wowaapaka awiixutti ntoko naaphavela ahu. Makhalelo ahu pooti onikhoottiherya ovara ntoko naaphavela ahu. Mwa ntakiheryo, anamalaleerya akina toowuuluvala ni anniwereyasiwa. Niireke nyuwo mookhalana mixankiho iyo? Akhala wira ti siiso, musuweleke wira vanniweryaneya wiiriha yoosoma ya Biibiliya nimurumeelaka telefoni wala ikaruma sikina eletroniko! Nto nyuwo pooti opaceriha ni wiiriha soosoma sa Biibiliya muri ene owaani. Nave sookhala mireerelo sikina sinikhumelela. Mwaha woowi, atthu akina anniphavela omusoma Biibiliya ni hiyo, masi awo khanikhala owaani okathi anna ni arokora anilaleerya aya empa ni empa. Niireke mwaamwiivahererya wira mwaasomihe atthu awo? Nyuwo pooti waasomiha atthu vaavo anikhalana aya okathi voosiisu wala ohiyu. Niireke nyuwo munnuupuwela yowiiraneya ya Nikodemo? Owo aahirowa olavula ni Yesu ohiyu, nto Yesu aahimwiixuttiha okathi ene yoole Nikodemo aaphavela awe. — Yoh. 3:1, 2. w21.07 5 itti. 10-11

Awiixutti a Yohani Mpatisa yaahitikinihiwa vanceene mwaha woowi awiixutti a Yesu khiyaatthara yoolema ya otthukwa. Yesu aahaatthokiherya etthu yaawiiriha awiixutti awe ohitthukwa. (Math. 9:14-17) Hata vaari siiso, awanani awe Yesu ni aFarisi yaahimphukela mwaha woowi khaatthara soolema. Nto awo yaahinanariwa vanceene vaavo Yesu aapenuxa awe wala aavoniha awe aretta nihiku na Saabadu. (Mar. 3:1-6; Yoh. 9:16) Nnaamwi yaikukumiha wira yaaniiwelela nlamulo na Saabadu, awo khiyoona okhala etthu yootakhala omweetta nakoso otemplo. Nto yaahinanariwa vanceene vaavo Yesu aapwapwenle awe mwaha woomweetta nakoso otemplo. (Math. 21:12, 13, 15) Nave atthu ale yanwiriyana Yesu okathi aalaleerya awe musinagoga oNazarethi, yaahinanariwa vanceene vaavo aarumenle awe matakiheryo a sowiiraneya sa aIsarayeli wira owooniherye atthu wira yaari oowiitthuna ni khiyaarina waamini. (Luka 4:16, 25-30) Nto atthu anceene yaahikhumuwa mwaha woowi Yesu khaapaka itthu atthu anceene yuupuwela aya wira ampaka. — Math. 11:16-19. w21.05 5-6 itti. 13-14

Enamuna emosa Yehova onniixuttiha awe wira nihiixinnuwiheke ni ohiphiyeriwa ori onitumererya wiixutta ni sowiiraneya sa atthu akina. Vaavo nnuupuwela ahu voohimya sa ohiphiyeriwa, woonasa wene nimmuupuwela Satana Diabo. Pooti wira Satana aahikhalana iparakha sinceene sa faita. Maana owo aari nlaikha na Yehova. Masi Satana khaaphiyeriwa, maana aaniphavela itthu sikina. Satana aaphavela wira okokhoreliweke, etthu yeeyo eri ya Yehova paahi. Satana oniphavela wira nikhale ntoko yena nihiphiyeriwaka wala ohakalala ni itthu nrina ahu. Ekwaha yoopacerya Satana aarumeelale awe muraakho owo, waari okathi yoole aavaanela awe ni Eva. Moophenta, Yehova aahinvaha Eva ni iyawe soolya sinceene soosiva. Awo yanwerya olya mihokorokho ‘sotheene sari mmatta’ ohiya muhokorokho mmosa paahi. (Maph. 2:16) Hata vaari siiso, Satana aahimwiiriha Eva ophavela olya muhokorokho aakhoottihiwe awe. Masi Eva khaaphiyeriwa ni khaavaha efaita itthu aarina awe, maana aaniphavela itthu sikina. Hiyo ninnisuwela etthu yaakhumelenle moottharelana. Eva aahipaka etampi, nuumala-vo aahikhwa. — Maph. 3:6, 19. w21.06 14 itti. 2-3; 17 etti. 9

Adamu ni Eva, yaahaana waayara anamwane ni okhapelela elapo. Vaakhanle wira yaahimwiiwelela Yehova ni yaahivara muteko aavanhe awe, Adamu ni Eva ni osuulu aya khiyaarowa ohiya wiirela mpantta emusi ya Muluku. Adamu ni Eva yaahikhalana opuro wa efaita yinceene mweemusini mwa Yehova. Esalimo 8:6, Davidi oohimya etthu ya faita yinceene emwiirinhe Yehova waapattuxa atthu. Owo ahimmye so: “Nyuwo mompattuxa mutthu onihala vakhani olikana ni nyuwo: momusariha ovuwa ni nttittimiho”. Ekeekhai wira apinaatamu kharina owerya, osuwela ni mikhalelo ntoko malaikha. (Esal. 103:20) Hata vari siiso, apinaatamu khatepenxe ovirikana ni malaikha oowerya. Mooriipiha murima, Adamu ni Eva yaahihiya wiirela mpantta emusi ya Yehova. Eyo yookumiherya mixankiho sinceene osuulu wotheene wa Adamu ni Eva. Hata vari siiso, ele Yehova oniphavela awe kheturukeyale. Mpakha-va, Yehova oniphavela wira apinaatamu oowiiwelela akhale anaawe mahiku otheene. w21.08 2-3 itti. 2-4

Olelo-va, arumeyi a Yehova anceene annilupatthiwa. Mwa ntakiheryo ilapo sikina muteko ahu onnikhoottihiwa. Anna anikhala ilapo iyo, ikwaha sikina annivariwa ni ‘anniroihiwa ohoolo wa makuvernatoro ni mamwene’, nto eyo ennaavaha eparakha yowaalaleerya atthu awo. (Math. 10:17, 18) Ikwaha sikina, annikhumelela marukunuxo muhina mwa ekuvernu, nto eyo ennaakhaliherya anna ni arokora omurumeela Yehova mootaphuwa. Nave mphuki aahiiso ooreera murima pooti oopaka yoothanla ennikhaliherya omurumeela Yehova mootaphuwa. Nave Anamoona akina annivilela inamuna sikina sa olupatthiwa. Ekeekhai wira awo anikhala ilapo ohinikhoottihiwa aya omukokhorela Yehova, masi hata vari siiso annilupatthiwa ni amusi aya yaawo aniphavela waahiiha omurumeela Muluku. (Math. 10:32-36) Ikwaha sinceene anamalupattha awo anniweha wira hata yiimananihaka waalupattha amusi aya ari Anamoona a Yehova, khaniweerya waahiiha omurumeela Yehova. Nave ikwaha sikina atthu khalai yaari anamalupattha aalupale anniixutta ekeekhai ni annikhala Anamoona a Yehova. Nto okathi munlupatthiwa anyu muhikhulumuweke. Mulipiheke murima, maana Yehova ni munepa awe woowaarya ori ni nyuwo. Tivonto muhooveke. w22.03 16 etti. 8

Biibiliya onooniherya wira Yehova onninyokha “maitho òwisona; nlumi nowotha; [ni] matata animwiva ohitthenke”. (Mir. 6:16, 17) Nave-tho khonisiveliwa ni ‘anawiive n’anawoothe’. (Esal. 5:7) Yehova onninyokha vanceene itthu iya, nave-tho aahaaphwetexa atthu mahiku a Nowe okhala wira elapo yootheene yaahisareya otakhala. (Maph. 6:13) Omurumeelaka profeta Malakhiya, Yehova aahihimya wira khaasiveliwa ni atthu yaamwalana ni axaaraya vahikhanle nthowa. Mwa moonelo wa Yehova okokhorela wa atthu anipaka itthu iyo khorina efaita, nave onimwaaphukela mwaha wa mweettelo aya woohiloka. (Mal. 2:13-16; aHeeb. 13:4) ARoma 12:9 onihimya so: “Muthanyeke itthu sootakhala”. Nuulumo noowi “othanya”, nintaphulela onyokha ni ohisiveliwa ni etthu. Nihaana opaka etthu emosaru okathi nnuupuwela ahu opaka itthu sihinimusivela Yehova. w22.03 4-5 itti. 11-12

Moohipisa, Tiithi ihu a wiirimu onoonireeliha vanceene orumeelaka Omwene awe. Ale ahinihiya omulipelela Yehova animwaakhela mareeliho niinaano-va ni animwaakhela mareeliho muhoolo elapo esya. Nuumala ophiya elapo esya, atthu a Muluku khanrowa okhalana mixankiho arina aya olelo-va. Itthu soohixariya aniireliwa aya ni woona owereya khonrowa okhala-tho. (Wiis. 21:4) Okathi owo, khaninrowa olipelelaka vanceene itthu nimphavela ahu maana khula mutthu onookhalana itthu oniphavela awe. (Esal. 72:16; Yes. 54:13) Tthiri vannooneya wira Yehova, onoonireeliha vanceene! Okathi ola vakhaani ohanle, vaavo Yehova onnikhaliherya awe oxintta mikhalelo soohiloka ni okhalana mikhalelo sa eKristau, eyo enooniherya wira Yehova onoonilokiherya wira nakhaleke elapo esya nilamuleliwaka ni yoowo. Nto muhikhulumuwe ni muhihiye omurumeela Yehova maana sookhala itthu sinceene soohakalaliha ninlipelela ahu muhoolo. Nto nihihiye omulipelela Yehova moopixa murima wira omalelihe muteko awe! w21.08 13 itti. 17-19

Nuuvira okathi vakhaani nuumala makristau a oYudeya waakhela epaphelo ya murummwa Paulo, yaahihiya inupa saya, anakoso aya ni amusi aya yahaakhanle makristau ni ‘yaahitthawela omiyaakoni’. (Math. 24:16) Moohaanyiherya okathi ole vaanitthuneya okhaliheryana. Wiiwelela miruku yaavahiwe aya ni murummwa Paulo, sa okawana ni atthu akina itthu yaarina aya, waamwaakhaliherya woona okhweya orumeela mireerelo vakhaani yaarina aya opuro ole. Okathi mukina anna pooti ohinileela wira yookhala etthu enaathowa. Nto Mukhaleke mutthu ookhweya ovekeliwa nikhaliheryo. Moohaanyiherya, muloko anyu aakhala anna ni arokora oowaasivela waakhaliherya akhwaaya. Okhalawene awo khanuupuwela wira nnoowuukhula. Nave noosuwela wira okathi wootheene anna awo anoonikhaliherya. Tthiri anna awo annivaha ntakiheryo nooloka. w22.02 23-24 itti. 13-15

Iyaakha vakhaani sivinre, miloko sinceene ni isirkwiitu, saahikawanyiwa, nave sikina saahitakaahiwa. Woonasa wene pooti wooxankihani othaama muloko ori apatthani anyu ni amusi. Masi niireke Yehova onnaaleela axitokweene muloko xeeni akhanle aya oomuthanlela khula namalaleerya? Nnaari. Tivonto pooti onixankihaka otthara malakiheryo ninvahiwa ahu. Masi Yehova onniroromela wira axitokweene anoopaka soothanla sooloka. Hiyo-tho nihaana waaroromela anna awo. Xeeni vanireerela aya owiiwelela axitokweene ni okhaliherya soothanla saya, hata sihinisivelaka? Mwaha woowi okathi ninwiiwelela ahu, ninnaakhaliherya arumeyi a Muluku okhala oowiiwanana. Vaavo atthu ootheene mmulokoni anikhaliherya aya soothanla sinipakiwa ni nikhuuru na axitokweene, muloko wootheene onniphwanya mureerelo. (aHeeb. 13:17) Nave ninnooniherya wira ninnimuroromela Yehova, okathi ninwiiwelela ahu atthu aathanlale awe wira anikhapeleleke. — Mit. 20:28. w22.02 4-5 itti. 9-10

Akhala wira mwa munna oopatisiwa, niireke munniimananiha olokiherya enamuna munilavula anyu mwaha ni wiixuttiha? Mwaha wa xeeni? Mwaha woowi, akhala wira munniimananiha osoma oratteene, olavula myaha oratteene ni wiixuttiha oratteene munimwakhaliherya ale anoowiriyanani. (1 Tim. 4:15) Nto mwiimananiheke osoma ni ovarihela muteko malakiheryo ari ebroxura Mwiilipiheryeke Osoma ni Wiixuttiha. Musomeke oratteene khula yoosoma ni mwinsayariki owaani. Ohiya-vo, vaavo munivahiwa anyu mpantta mwiimananiheke ovarihela muteko ele mwiixuntte anyu. Munvekeleke malakiheryo namavaha miruku ookhaliherya wala mutokweene mukina, yaawo aniimananiha ‘olavulaka nuulumo na Muluku ni wiixuttihaka’. (1 Tim. 5:17) Yoolakela anyu ehikhaleke paahi osuwela malakiheryo ari ebroxura eyo, masi ekhaleke waakhaliherya ale anoowiriyanani wuncererya waamini waya ni waakhaliherya weettela ele muniwiixuttiha anyu. Akhala wira munoopaka eyo, munimuncererya ohakalala waya. w21.08 24 etti. 17

Akhala wira nnimwaathokorerya atthu akina okhala aalupale onivikana hiyo, khaninrowa wiimananihaka oxinttana ni atthu ale anisuwela itthu sinceene onivikana hiyo. Ohiya-vo, nnoohakalala mwaha wa itthu iyo anisuwela aya. Ti voohakalaliha vaavo anirumeela aya itthu iyo anisuwela aya wira amukokhorele ni onvuwiha Yehova. Akhala wira nnimwiimananiha, muloko onrowa okhala wa murettele ni wowiiraana. Hiyo nnoosyaka waakhalela nrima atthu akina akhala wira nnimwiisuumaaliha, niire so, osuwela wira sookhala itthu ninwerya ahu opaka ni nihinwerya ahu opaka. Akhala wira naatthu oowiisuumaaliha, hiyo nnoosyakaka owooniherya atthu akina wira ninnisuwela itthu sinceene waavikana atthu otheene. Ohiya-vo, nnimwiimananihaka wiixutta itthu ni atthu ale anisuwela itthu sinceene onivikana hiyo. Mwa ntakiheryo, akhala wira muloko anyu ookhala munna onisuwela olavula myaha oratteene, etthu xeeni mukhanle anyu oopaka? Mmukoheke moota onilokiherya awe myaha sawe. Niireke munnimusuwela murokora oosuwela waapeya? Akhala wira ti siiso, munvekeleke wira oovaheeni malakiheryo a moota wowaapeya saana. w21.07 16 itti. 8-9

Eliivuru ya Mothakoni, ennooniherya wira Yehova aahirumiha wiiviwa mwisarayeli mmosa mwaha woophwanyiwa othayaka ikhuni esaabadu. Samuweli a nenli, ninniphwanya wira sivinre ene iyaakha sinceene, Mwene Davidi aahiraruwa ni mwaara aaneene ni aahimwiiviha iyawe muthiyana ole. Masi hata vari siiso Yehova aahimulevelela. (Moth. 15:32, 35; 2 Sam. 12:9, 13) Hiyo pooti wuupuwelaka so: ‘Xeeni Yehova aamulevelenle awe Davidi mwaha woomwiiva mutthu ni oraruwa, masi orumiha wiiviwa mutthu aapanke etampi yaakhala ntoko yaari yaamukhaani?’ Ikwaha sikina Biibiliya khonihimya itthu sootheene. Mwa ntakiheryo, ninnisuwela wira Davidi aahittharuwa itampi aapanke awe ni murima awe wootheene. (Esal. 51:4-6) Masi mulopwana ole ahaiwelenle nlamulo na esaabadu, mweettelo awe waari sai? Niireke aahittharuwa, aahiiso ahoona wira aahipaka etthu yootakhala? Niireke aahitoko ohiiwelela malamulo a Yehova? Niireke aahilopoliwa masi ohithokorerya etthu? Biibiliya khonihimya. Masi nikupaliki wira Muluku ahu “t’àxariya mwa itthu sothene” onipaka awe. — Esal. 145:17. w22.02 2-3 itti. 3-4

Mutthu oowiisuumaaliha, khoniimananiha opaka itthu ohinwerya awe. Nto eyo ennimukhaliherya ohihiya ohakalala ni ovara muteko. Hiyo pooti omulikanyiha mutthu oowiisuumaaliha ni mutthu onimweettiha moota ephiro yowaatta malitti. Owo ohaana weetta vakhaani-vakhaani, masi hata vari siiso onnirowa ohoolo. Mwa enamuna emosaru, mutthu oowiisuumaaliha onnisuwela okathi onireerela awe weetta vakhaani-vakhaani wira ohihiye ovara muteko wa Yehova. (aFil. 4:5) Nkahaya muupuwele ntakiheryo na Barizilayi. Okathi aarina awe iyaakha 80, owo aahilattuliwa ni Mwene Davidi wira akhaleke epalasiyu ya mwene. Okhala wira aari mutthu oowiisumaaliha, Barizilayi aahikhootta. Maana aanisuwela wira saahikhala itthu ahaawerya awe ovara. Nto Barizilayi aahinvekela Mwene Davidi omukuxa mmiravo iihaniwa Kimihami nipuro na Barizilayi. (2 Sam. 19:35-37) Amutakihaka Barizilayi, anna oowuuluvala annihakalala waavaha amiravo miteko sikina. w21.09 10 itti. 6-7

Niireke vannoovilani omuthokorerya Yehova ntoko Tiithi oophenta? Atthu akina onnaavila. Vannivila omuthokorerya Yehova okhala Tiithi oophenta akhala wira paapa ahu khaanithokorerya saana. Masi ti voomaaliha osuwela wira Yehova onnisuwela oratteene moonelo ahu! Nave owo oniphavela onaattamela. Tivonto Nuulumo nave ninhimya aya wira: “Mmwaattameleke Muluku, vano owo onoowaattamelani”. (Yak. 4:8) Yehova onniniphenta vanceene ni oniphavela okhala Tiithi ahu oolokexa. Yesu onoowerya onikhaliherya omwaattamela Yehova. Maana Yesu aanimusuwela oratteene ni aahooniherya moomalela mikhalelo sa Tiithi awe okathi aari awe valaponi. Tivonto Yesu aahimmye awe wira: “Ole okiwenhe, nave-tho ohaaweha Atiithi”. (Yoh. 14:9) Ntoko muulupale ahu, Yesu onoowerya oniixuttiha moota woomuttittimiha ni omwiiwelela Tiithi ihu. Nave moota nikhanle ahu ookhootta opaka itthu saarowa omuriipiha murima ni okhalana waataana wooloka ni yena. Nave-tho Yesu onninikhaliherya osuwela oratteene wira Yehova tooreera murima ni toophenta. w21.09 21 itti. 4-5

Arumeyi a Yehova toowiiraana, maana animukokhorela Muluku mmosa paahi eekeekhai. Yehova ohaavaha axitokweene muritti muulupale wookhaliherya muloko okhala woowaarya. Akhala wira ookhala mukristau opanke etampi yuulupale, axitokweene ahaana ovarerya wira awehe vakhala wira mutthu owo onnireerela nlelo okhala mmulokoni, aahiiso ohaana okumihiwa. Okathi anipaka aya eyo, ahaana wiikoha so: ‘Nnaamwi ohimyaka wira oottharuwa, masi niireke tthiri onninyokha etthu opanke awe? Khonrowa otthikela opaka etampi emosaru? Akhala wira apatthani awe tamwiirinhe opaka etampi eyo, niireke onnikhootta weetta ni atthu awo?’ Anna awo anninvekela Yehova, annivarerya mwaha owo attharaka Nuulumo na Muluku. Nave annivarerya itthu sootheene sikhumelenle ni moota mutthu owo onoonela awe etampi eyo opanke awe. Nuumala-vo, anniweha vakhala wira mutthu owo nlelo onnireerela okhala mmulokoni aahiiso nnaari. Ikwaha sikina mutthu owo pooti okumihiwaka mmulokoni. — 1 aKor. 5:11-13. w22.02 5 itti. 11-12

Hata nipatisiwe ene niinaano aahiiso khalai, ootheene ahu nimphavela okhalana mweettelo onimusivela Yehova. Mwaha wa xeeni? Esiiri enikhaliherya owerya opaka eyo, okhapelela miyuupuwelo sahu. Akhala wira nimmakela wuupuwela itthu siniphavela aya erutthu yoottheka, moohaanyiherya nnoopaka aahiiso olavula etthu yoohiloka. (aEef. 4:17-19) Nto akhala wira nnoosarya muupuwelo ahu ni itthu sooreera, nnimoona okhweya olavula ni opaka itthu mwa enamuna enimusivela Yehova. (aGal. 5:16) Masi, khaninwerya ottharuwa moomalela wuupuwela itthu sootheene soohiloka. Masi nookhalana owerya woothanla itthu nimphavela ahu. Nihinatthi opatisiwa, nihaana ottharuwa opaka ni olavula itthu sihinimusivela Yehova. Etthu yoopacerya ni yuulupale nikhanle ahu oopaka, orula omutthu wa khalai. Wira nimuhakalalihe moomalela Yehova, nihaana owara omutthu wa niinaano. w22.03 8 itti. 1-2

Okathi mukina khivanikhweya axitokweene woona akhala wira mutthu owo opanke etampi yuulupale oottharuwa ni murima wotheene. Mwaha wa xeeni? Mwaha woowi axitokweene khaniwerya osoma murima wa mutthu. Nto awo anlipa ni itthu sinooniherya wira munna aahiiso murokora owo ohiixutta etthu ni etampi opanke awe ni onninyokha vanceene etampi eyo. Sihaana okhala itthu sinooniherya wira muupuwelo awe, moonelo awe ni itthu onipaka awe sinnooniherya wira oottharuwa ni murima wotheene. Woonasa wene, pooti ovira okathi wira mutthu owo opake marukunuxo. Sookhala itthu mutthu okumihiwe mmulokoni onireerela awe opaka wira ooniherye wira oottharuwa ni murima wotheene. Owo ohaana orowela mithukumano sotheene ni otthara malakiheryo a axitokweene, ovekela ni omusoma Biibiliya. Nave ohaana wiimananiha osyaka itthu saarowa omwiiriha opaka etampi. Nto akhala wira mutthu owo onniimananiha vanceene wira otthikele okhalana waataana ni Yehova, owo ohaana okupali wira Yehova onoomulevelela nave axitokweene anoomuttikiherya mmulokoni. w21.10 6 itti. 16-18

Okhala wira aanimphenta vanceene Muluku, okathi aari awe wiirimu ni aarwiiye awe valaponi, Yesu aamukokhorela Yehova paahi. (Luka 4:8) Nave aahiwiixuttiha atthareli awe wira yaahaana omukokhorela Yehova paahi. Yesu ni awiixutti awe khiyaarumeela ilatarato wira amukokhorele Muluku. Okhala wira Muluku ti munepa, khuuvo mutthu oniwerya opaka elatarato enaattamela ovuwa wa Yehova! (Yes. 46:5) Ankhi opaka elatarato ya masanto ni waavekela masanto awo? Yooruma ya nenli sa Sooruma Muloko, Yehova aahimmye awe yoolepa ya olelo. Vannooneya oratteene wira ale aniphavela omusiveliha Muluku ahirumeeleke ilatarato okathi animukokhorela aya. Alipa-oolepa sowiiraneya sa mulaponi, annisuwela wira makristau a okathi wa arummwa yaamukokhorela Muluku paahi. Olelo-va, Anamoona a Yehova annitthara enamuna ya okokhorela yaatthariwa ni makristau a okathi wa arummwa. w21.10 19-20 itti. 5-6

Yesu aahaalopola makristau yaakhala oYudeya wira wamphiya okathi Yerusalemu aarowa awe ‘orukureriwa ni anakhotto’. (Luka 21:20-24) Okathi eyo yaarowa aya wiiraneya, atthu yaahaana “otthyawela omiyaakoni” wira ehiiviwe. Masi yaahaana oleva itthu sinceene wira yoopole ikumi saya. Iyaakha sivinre, erevista Owehaweha yaahaalavula makristau ale a oYudeya ehimyaka so: “Yaahihiya imatta ni ipa saya, ni khiyaakuminhe mireerelo saya mpaani mwaya. Yaahiroromela okhapeleliwa ni okhaliheriwa ni Yehova. Nave yaahooniherya wira yaanihela opuro woopacerya okokhorela weekeekhai ovikana itthu sootheene”. Erevista ele enincererya so: “Muhoolo pooti weehereriwaka ni moota nnoonela ahu itthu nirina ahu. Masi exeeni erina efaita yuulupale? Niireke mireerelo iyo, aahiiso woopowa wa atthu animwiiwelela Yehova? Woonasa wene okathi olumwenku ola onrowa awe ophiya wanikisa vanoopirisariki ovilela ni oleva itthu sikina. Nihaana wiilokiherya wira nipake itthu sikina sinrowa otthuneyaka”. w22.01 4 itti. 7-8

Moohipisa nuumala aIsarayeli okhuma wExiitu, Yehova aahimuleela Moise nsina nawe ni mikhalelo sawe. Owo aahimmye so: “Miyo k’Apwiya, Apwiya Muluku òmoriwa ikharari ni òvilela, òpisa onanariwa, òrera murima ni òroromeleya. Miyo kinnarerela murima atthu n’an’aya n’osulu aya mpakha oholo onkelelahu; miyo kinnileva sottheka saya n’uhiwelela waya n’itampi saya”. (Okhum. 34:6, 7) Ni moolumo ala oovara murima, Yehova aahimuleela Moise etthu ya faita yinceene, eyo piiyo, ophenta wawe wekeekhai. Eyo enihela muhina exeeni? Yehova khahiyo paahi onihimya wira ookhalana ophenta wekeekhai. Masi-tho, owo ‘tòsareya’ ophenta wekeekhai. Moolumo ala anniphwanyaneya ikwaha sinivikana 6 mBiibiliyani. (Moth. 14:18; Neh. 9:17; Esal. 86:15; 103:8; Yow. 2:13; Yona 4:2) Ikwaha sotheene anrumeeliwa aya moolumo awo, onihimmwa Yehova paahi, ohiya apinaatamu. Khamunoona wira etthu yoovara murima Yehova wiihimya mmansawe wira toosareya ophenta wekeekhai? w21.11 2-3 itti. 3-4

Ntakiheryo na murummwa Pedru ni mwaarawe nnoowiixuttiha itthu sinceene anamathelana. Nuuvira myeeri 6 okhuma ekwaha yoopacerya murummwa Pedru aamusuwenle awe Yesu, murummwa Pedru aahaana opaka yoothanla ya efaita yinceene. Pedru aatotha ihopa wira okhapeleleke etthoko awe. Nto nuumala Yesu omulattula Pedru wira okhale mutthareli awe, Pedru aahaana omuupuwela mwaarawe ohinatthi opaka yoothanla. (Luka 5:1-11) Masi Pedru aahithanla olaleerya hoothe ni Yesu! Mwaarawe Pedru aahikhaliherya yoothanla ya iyawe. Biibiliya onnooniherya wira nuumala Yesu ohihimuxiwa, mwaarawe Pedru aanimuhoola Pedru mikwaha eetta awe. (1 aKor. 9:5) Moohaanyiherya, okhala wira mwaarawe Pedru aari muthiyana ooloka, eyo yaahimukhaliherya Pedru waavaha miruku alopwana othela ni athiyana ootheliwa. (1 Ped. 3:1-7) Vannooneya oratteene wira Pedru ni mwaarawe yaaniroromela sooleiherya sa Yehova. Maana yaanikupali ni murima wotheene wira yaahela nipuro noopacerya Omwene, Yehova aamwaavaha itthu sikina. — Math. 6:31-34. w21.11 18 etti. 14

Murummwa Paulo aanaaphenta axinnawe. Aahipaka itthu sinceene wira aakhaliherye. (Mit. 20:31) Ti nthowa naya anna awo ni arokora yaamphenta aya vanceene. Okathi omosa nuumala axitokweene a wEefeso osuwela wira khiyaarowa otthikela onweha Paulo, “otheene aya yaahipacerya wunla vanceene, enamukhupaarela”. (Mit. 20:37) Axitokweene ahu annaaphenta vanceene anna. Nave annipaka sootheene aniwerya aya wira yaakhaliherye. (aFil. 2:16, 17) Masi hata vari siiso, ikwaha sikina sookhala itthu sinaaxankiha axitokweene awo. Nto exeeni enrowa waakhaliherya oxintta mixankiho iyo? Osoma ntakiheryo na Paulo pooti waakhaliherya axitokweene awo a nthiti. Murummwa Paulo khaarina owerya sintoko malaikha. Aari mutthu oottheka, nave ikwaha sikina aanipaka itthu soohireerela. (aRom. 7:18-20) Nave-tho aahikhalana mixankiho sinceene. Masi hata vari siiso, aanaakhaliherya anna ni khaahiya otteeliwa murima. Okathi axitokweene anitthara aya ntakiheryo na Paulo, khanihiya omurumeela Yehova moohakalala hata sikhumelelaka mixankiho. w22.03 26 itti. 1-2

Onamukuttho 19:3, onilavula sa ottittimiha nihiku na Saabadu. Ekeekhai wira makristau khaneettela Nlamulo Muluku anvanhe awe Moise. Tivonto, hiyo khaninkhanyereriwa ottittimiha nihiku na Esaabadu. Masi hata vari siiso, sookhala itthu nniixutta ahu sa moota aisarayeli yaattittimiha aya nihiku na Saabadu ni moota yaattottela aya mureerelo ottittimiha nihiku na Saabadu. Musuweleke wira, nihiku na Saabadu waari okathi aisarayeli yaamumulela aya miteko saya wira amukokhoreleke Muluku. Nto mwaha waivaavo, nihiku na Saabadu, Yesu aahilimalela orowa osinagoga ni osoma Nuulumo na Muluku. (Okhum. 31:12-15; Luka 4:16-18) Yooruma ya Muluku eri Onamukuttho 19:3, yeeyo enihimya wira muttittimiheke nihiku na Saabadu, ehaana oniiriha khula nihiku waavya okathi wira nimukokhorele Muluku. Niireke nyuwo munoona wira muhaana opaka marukunuxo voohimya sa mwaha owo? Akhala wira nnimwaavyaka okathi wira nimukokhorele Yehova, eyo enoonikhaliherya okhalana waataana wooloka ni Yehova ni okhala atthu oowaarya. w21.12 5 etti. 13

Okathi aari awe valaponi, Yesu aari mpatthani a atthu otheene. Owo aanilya vamosa ni athaaciri ni atthu yaarina okhulupale. Nave aaniviriha okathi ori ene ni atthu oohaawa ni ale yaapuheriwa. Ohiya-vo, Yesu aaniwoonela othunku atthu ale yooniwa okhala “anatampi”. Nto atthu akina yiihimya okhala anaxariya, yaahikhumuwa mwaha wa itthu Yesu aapanke awe. Nto awo, yaahaakoha awiixutti a Yesu wira: “Xeeni nyuwo munilya anyu ni owurya ni alipa-ooliviha mpoosito ni anatampi?” Yesu aahiwaakhula ni moolumo a yoolepa ya olelo. (Luka 5:29-31) Iyaakha sinceene Mesiya ohinatthi orwa, profeta Yesaya aahihimya vahinatthi wira owo khaarowa weemereriwa ni atthu otheene. Eprofesia ele yaahimmye so: “Owo anithanyiwa, ari esapalá y’atthu: ari mulipa-òhawa, ahòna ohawa wothene. Ari ntoko mutthu ohiniphaveliwa owehiwa owitho wawe: khajaliwa, ari mulipa-ònyokhiwa”. (Yes. 53:3) Ntoko enooniherya aya eprofesia ela, Mesiya aarowa ‘othanyiwa ni atthu’ otheene. Nto aYuda a eseekulu yoopacerya, yaahaana osuwela wira Yesu aamukhoottiwa. w21.05 8-9 itti. 3-4

Makristau makina yaanipisa vakhaani weettela malakiheryo yaavahiwa aya. (Yak. 1:22) Akina yaanaattittimiha vanceene athaaciri waavikana atthu oohaawa. (Yak. 2:1-3) Nave akina khiyaawerya wiikasoopa ni itthu yaalavula aya. (Yak. 3:8-10) Iyo saari mixankiho suulupale. Masi Yakobo aanisuwela wira axinna awe yanwerya oopaka marukunuxo. Yakobo aahaavaha malakiheryo anna awo mwa enamuna yoophenta, masi aaleelaka mooluluwanya itthu yaareerela aya olokiherya. Ohiya vo, Yakobo aahaatumererya anna ale wira yaahaana waavekela nikhaliheryo axitokweene wira awerye oopaka marukunuxo awo. (Yak. 5:13-14) Etthu nniixutta ahu: Muhuupuweleke wira atthu akina khanikhala-khala apakaka marukunuxo. Nihaana okhalana moonelo wooloka ni weemya wira atthu anceene nnaasomiha ahu Biibiliya, vannaavila weettela malakiheryo a mBiibiliyani. (Yak. 4:1-4) Pooti ovira okathi wira atthu akina attharuwe soolema soohiloka yaarina aya, ni opacerya ookhalana mikhalelo sa eKristau. Nihaana olipiha murima wira naaleele anaxikola ahu a Biibiliya itthu anreerela aya olokiherya. Nihaana okhalana moonelo wooloka, niroromelaka wira Yehova onimwaathanla atthu oowiiyeviha ni onimwaavaha ikuru ale aniphavela opaka marukunuxo mookumini mwaya.— Yak. 4:10. w22.01 11 itti. 11-12

Makristau otheene ahaana okhala oomoriwa ikharari amutakihaka Yehova. Mwaha wa xeeni? Mwaha woowi, Yehova khoniwiriyana mavekelo aatthu ahinimoriwa ikharari. Khuuvo mutthu oniphavela wira Yehova ohiye owiriyana mavekelo awe. Nto nihaana wiimananiha waathokorerya saana anna ni arokora anihaawa ni okathi wotheene waareerela murima “amasikhini”. Nave nihaana weettela malakiheryo ala anihimya wira: “Ole ohinaamorela ikharari akina, onrowa ophukeliwa voohimoreliwa ikharari”. (Yak. 2:13) Vaavo ninsuwela ahu wira nihaana omoreliwa ikharari ni atthu akina ninniwerya waamorela ikharari atthu akina. Enamuna emosa nikhanle ahu oowooniherya wira ninnaamorela ikharari atthu akina, ori omulevelela mutthu aapanke etampi yuulupale ottikiheriwa mmulokoni. Biibiliya ookhalana matakiheryo manceene anrowa onikhaliherya okhala atthu oomoriwa ikharari. w21.10 12 itti. 16-17

Ohiyu wookiserya ari awe valaponi, ohalaka vakhaani omaliha muteko awe woolaleerya, Yesu aahihaavya-tho opuro woomaaleleya wira ovekele ni wuupuwelela. Aahirowa ojardim ya oXeseemani. Okathi ole Yesu aahaaleela awiixutti awe etthu ya efaita yuulupale enivarihana ni nivekelo. Woonasa wene okathi Yesu ni awiixutti awe yaaphiyale aya oJardim, waari ohiyu eriyari. Nuumala-vo, Yesu aahaahimeerya arummwa awe wira: “Muthipeleleke owehaweha”. Nuumala-vo aahikhuma opuro ole onarowa ovekela. (Math. 26:37-39) Masi mooriipiha murima okathi aavekela awe awiixutti awe yaamurupa. Ewoora Yesu aatthinke awe ni aaphwanya erupasaka, aahaaleela wira: “Muthipeleleke owehaweha, nvekeleke voohihiyererya”. (Math. 26:40, 41) Yesu aahisuwela wira awiixuttihi awe yaarookhulumuwa ni oxanka vanceene. Yena khaapwapwenle, maana aanisuwela wira erutthu ti “yootteettheya”. Masi nuumala-vo exeeni yaakhumelenle? Yesu aahirowa ovekela ikwaha piili, ni ewoora aahokolonwe awe, aaphwannye arummwa erupasaka. — Math. 26:42-45. w22.01 28 itti. 10-11