Dezembro

Yesu aahilikanyiha waataana orina awe ni atthareli awe ni waataana makampusi onikhalana awe ni ipwittipwitthi sawe. (Yoh. 10:14) Nlikanyiho nlo ti nookhalela. Maana ipwittipwitthi sinnimusuwela oratteene makampusi aya ni sinniiwelela nsu nawe. Mulopwana mmosa aahoona wira eyo ekeekhai. Owo aahimmye so: “Hiyo naaphavela olatha ifootu ipwittipwitthi, nto naahiitthana wira sinaattamele. Vaavo niitthana ahu, iyo khisaarwiiye, mwaha woowi khisaasuwela nsu nahu. Mmiravo mmosa aari makampusi a ipwittipwitthi iye aahirwa, moohipisa aahiitthana ipwittipwitthi iyo, nto saahirwa”. Yowiiraneya ya mulopwana ole, enninuupuxerya moolumo a Yesu okathi aahimyale awe wira awiixutti awe ari ntoko ipwittipwitthi. Owo aahimmye so: “Iyo sinrowa owiriyanaka nsu naka”. Masi Yesu ori wiirimu. Nto ninrowa owiriyana sai nsu nawe? Enamuna emosa nikhanle ahu owooniherya wira ninninwiriyana Pwiya ahu, ori weettela itthu oniixuttinhe awe.— Math. 7:24, 25. w21.12 16 itti. 1-2

Murummwa Paulo aanaalupattha makristau. Nuumala wiixutta wira etthu aapaka khiyaalonke, aaheemya orukunuxa murima awe. (1 Tim. 1:12-16) Okhaliheriwaka ni Yehova, Paulo aahikhala makampusi oophenta, oothunku, ni oowiiyeviha. Masi hata vari siiso, khaamakela wuupuwela itthu iyo. Ohiya-vo, aanikupali wira Yehova anwerya omulevelela. (aRom. 7:21-25) Paulo aanisuwela wira sookhala itthu ahaawerya awe opaka saana. Hata vari siiso, aahiimananiha wira olokiherye mikhalelo sawe sa ekristau. Nave mowiiyeviha aahiroromela wira Yehova ammukhaliherya ovara muteko aamuthanlenle awe. (1 aKor. 9:27; aFil. 4:13) Axitokweene khanithanliwa mwaha wookhala atthu oohittheka. Yehova oniphavela wira awo yeemereryeke ifaalya saya, ni yooniheryeke mikhalelo sa ekristau. (aEef. 4:23, 24) Mutokweene ohaana wiivarerya ottharaka nuulumo na Muluku. Nave-tho ohaana opaka marukunuxo vaatthuneyaka. Nuumala-vo, Yehova onoomukhaliherya okhala mutthu oohakalala ni mutokweene ooreera murima.— Yak. 1:25. w22.03 29-30 itti. 13-15

Nihaana opaka exeeni noona wira ninnaaphukela anna ni arokora? Muhiliyale wira hiyo nihaana waaphenta anna ni arokora. (Yak. 2:8) Nave nihaana omuxonttela Yehova wira onikhaliherye ohiya waaphukela anna ni arokora. Nto nihaana opaka etthu moovarihana ni nivekelo nahu, nivirihaka okathi niri ene ni munna wala murokora owo nimmulavula ahu voohiloka. Nave pooti onvekela munna wala murokora owo wira nalaleerye hoothe aahiiso orowa olya etthu. Vaavo ninrowa ahu omusuwelaka oratteene munna wala murokora owo, nnoowerya otthara ntakiheryo na Yehova ni Yesu niwehaka mikhalelo sawe sooloka. Niira siiso, nnimooniherya wira ninniiwelela yooruma ya makampusi ahu ooreera murima ya ohiya waaphukela atthu akina. Ntoko siisaale ipwittipwitthi siniiwa aya nsu na makampusi aya, atthareli a Yesu anniiwa nsu nawe. Hata niri ene a “nikoto naamukhaani” wala a “ipwittipwitthi sikina”, otheene ahu nihihiye owiriyana ni wiiwelela nsu na makampusi ahu ooreera murima.— Luka 12:32; Yoh. 10:11, 14, 16. w21.12 19 etti. 11; 21 itti. 17-18

Okathi Robowamuaakhanle awe mwene a wIsarayeli, atthu yaahinvekela opaka etthu emosa. Yaaphavela wira Robowamu ovukule miteko Salomoni aakhanyererya awe ovara. Woopaceryani aahipaka etthu yooreera, maana aahirowa waavekela miruku makhulupale a wIsarayeli wira osuwele etthu yoopaka. Makhulupale ale, yaahimuleela Robowamu wira vaanireerela owiiwelela atthu ale, maana iira siiso, yammurumeelaka. (1 Mam. 12:3-7) Vanikhala wira miruku iye khisaamusivenle Robowamu, tivonto, aahirowa waavekela miruku apatthani eettana awe okhuma enamwane awe. Awo yaahimuleela wira aahaana wuncererya miteko atthu ale yaavara aya. (1 Mam. 12:9-11) Robowamu aahaana omukoha Yehova wira osuwele miruku aareerela awe otthara. Ohiya opaka eyo, Robowamu aatthanre miruku sa apatthani awe, seiyo aaphavela awe owiriyana. Etthu aathanlale awe opaka, yaahimphwanyiha maxakha yena ni atthu ootheene. Hiyo-tho pooti onikhumelela etthu emosaru. Ikwaha sikina, pooti ovahiwaka miruku sihinnisivela. Masi akhala wira miruku iyo sinkhuma mBiibiliyani, nihaana weemererya. w22.02 9 etti. 6

Mutthu oowiiyeviha ni oowiisuumaaliha, khoniwehexexa itthu amiravo ahinsuwela aya, masi oniwehexexa itthu amiravo aniwerya aya opaka. Nave khonaathokorerya amiravo awo ntoko awanani awe, masi onaathokorerya ntoko atthu onivarana awe muteko. Anna oowuuluvala, annoona wira amiravo yoovaha enikhuma wa Yehova ni annixukhurela itthu sotheene awo anipaka aya. Vaavo ikuru sa anna oowuuluvala sinivukuwa aya, awo annihakalala vanceene osuwela wira mmulokoni aakhala amiravo arina ikuru ni aniphavela ovara miteko sa mmulokoni. Ntakiheryo nimosa na mBiibiliyani na mutthu ooxukhuru ti Nowemi. Nnaamwi owo uuluvanle, owo aari mutthu ooxukhuru. Nowemi aaheemererya okhaliheriwa ni mwaara a mwanawe iihaniwa Ruthi yoowo aari mmiravo. Musuweleke wira wanipacerya, Nowemi aahimukhanyererya Ruthi otthikela elapo awe weiwo yaari aya amusi awe. Masi okathi Ruthi aamukhanyerenrye awe Nowemi omutthara vaavo aatthikela awe oBethelehemu, Nowemi aaheemererya okhaliheriwa ni Ruthi. (Ruth. 1:7, 8, 18) Nto eyo, yaahaapwanyiha mireerelo sinceene athiyana ale oowanli! (Ruth. 4:13-16) Tthiri anna ni arokora oowuuluvala ni oowiiyeviha, annitthara ntakiheryo na Nowemi. w21.09 10-11 itti. 9-11

Tiithi ihu a wiirimu onnisuwela makhalelo ahu. Woonasa wene nyuwo pooti osuwelaka opaka itthu sinceene, waavikana atthu anceene munaaphenta anyu ni munaasuwela anyu. Aahiiso pooti ohiweryaka ovara itthu sinceene ntoko atthu akina, waanyiheryasa mwaha wa iyaakha murina anyu, okumi anyu aahiiso miritti sa vatthokoni. Masi muhikhulumuwe. (aGal. 6:4) Yehova khonrowa oliyala muteko anyu. Akhala wira munonvaha ele muniwerya anyu ni mathowa ooloka, Yena onoohakalala. Yehova onniwerya osuwela etthu eri vamurimani vahu. Nave omphavela wira nitteeliweke murima ni itthu ninwerya ahu opaka wira ninvahe. Ohiya-vo, ninnikhalana murettele mmuupuweloni, maana ninnisuwela wira, Yehova onnaakhaliherya arumeyi awe okathi wa mixankiho. (Yes. 41:9, 10) Mwekeekhai, ninnikhalana mathowa anniiriha ohakalala okathi nimmukokhorela ahu Tiithi ahu oophenta, yoowo ‘oniphwanela ovuwihiwa ni ottittimihiwa’ ni itthu sootheene opattunxe awe! — Wiis. 4:11. w22.03 24 etti. 16; 25 etti. 18

Nihaana omutakiha Yesu, nto nihikhulumuweke akhala wira khaninwerya omutakiha Yesu moomalela. (Yak. 3:2) Okhalawene, naxikola khonisuwela itthu sinceene onvikana prusoore awe. Masi, vaavo oniimananiha awe omutakiha hata ikwaha sikina ofalyariki, nuuvira okathi naxikola owo onoosuwelaka itthu sinceene. Nave akhala wira nnimweettelaka itthu nniixutta ahu mBiibiliyani, nnoowerya otthara vakhiviru vene ntakiheryo Yesu onihiyenrye awe. (Esal. 119:59) Ninkhala olumwenku atthu anceene aniisuupuwela aya mmansaya paahi. Masi arumeyi a Yehova toovirikana ni atthu awo ootheene. Tthiri oreera murima Yesu oonihenrye awe, onninivara murima. Nave nimphavela otthara saana ntakiheryo nawe. (1 Ped. 2:21) Nakhalela nthiti otthara oreera murima wa Yesu, nnoophwanya ohakalala, mwaha woosuwela wira ninnimuhakalaliha Yehova. w22.02 24 etti. 16; 25 etti. 18

Olelo-va enamuna emosa Yehova onrumeela awe wira aavahe malakiheryo arumeyi awe, nuulumo nawe Biibiliya. Akhala wira nnimwiivaha okathi wowuupuwelela itthu Yehova onniixuttiha awe, nnoowerya otthara malakiheryo awe ni ovara muteko woolaleerya onirummye awe. (1 Tim. 4:15, 16) Nave-tho Yehova onninivaha malakiheryo omurumeelaka “murumeyi oororomeleya ni a ankhili”. (Math. 24:45) Ikwaha ikina murumeyi owo, pooti onivahaka malakiheryo nihiniiwexexa ahu. Mwa ntakiheryo, ikwaha sikina hiyo pooti ovahiwaka malakiheryo annitumererya wiilokiherya ehinatthi okhumelela ehasara ya ephattu. Masi nnuupuwela wira eyo khenrowa wiiraneya muttetthe ahu. Exeeni nikhanle ahu oopaka akhala wira nnuupuwela wira malakiheryo nivahiwe ahu khanivareleya muteko? Nkahaya muupuwele sowiiraneya sikina sa mBiibiliyani nitonko ahu osoma. Ikwaha sikina arumeyi a Muluku yaahivahiwa malakiheryo mwa moonelo wa apinaatamu yaakhala wira khiyaavareleya muteko, masi malakiheryo awo yaahoopola ikumi sinceene.— Makh. 7:7; 8:10. w22.03 18-19 itti. 15-16

Yesu, aahimuleela ni murima wotheene Yehova moolumo a yoolepa ya olelo. Yesu aanisuwela oratteene wira okumi awe wa muhoolo waari mmatatani mwa Yehova. Nave, aanikupali ni murima wotheene wira Yehova ammuupuwela. Moolumo a Yesu anniixuttiha exeeni? Muhihiye ororomeleya wa Yehova hata murowaka okhwa. Okathi owo muhaana onvahererya Yehova okumi anyu. Wira mpake eyo, muhaana ‘waaroromela Apwiya [Yehova] ni murima anyu wothene’. (Mir. 3:5) Nkahaya nwehe ntakiheryo na Yoshua, mmiravo Namoona a Yehova yoowo aarina iyaakha 15. Owo aahiphwanyaniwa oretta waarowa omwiiva. Owo aahikhootta enamuna ya olooliwa ehinivarihana ni malamulo a Muluku. Ohalaka vakhaani okhwa, munna ole aahimuleela maama awe wira: “Maama, kiri mmatatani mwa Yehova. . . . Kinnihimya ni murima aka wotheene maama, mwaha woowi kinnisuwela wira Yehova onookihihimuxa. Owo onnisoma mirima sa atthu, nto onnisuwela wira kinnimphenta”. Otheene ahu, nihaana wiikoha so: ‘Akhala wira waamini waka onimweehereriwa wala kinookhalana muxankiho onrowa okiiriha wiiviwa, kiireke kinoorowa ovikaniha ororomeleya wa Yehova kikupaliki wira onookuupuwela?’ w21.04 12-13 itti. 15-16

Arumeyi a Yehova anniphwanya ikuru okathi anilaleerya aya. Vaavo nnaalaleerya ahu atthu akina ikeekhai sa mBiibiliyani, hata yeemereryaka wala nnaari, hiyo ninnilipa vanceene. Mwaha wa mixankiho sinaaphwanya anna ni arokora akina, awo anoona wira khaniwerya oviriha okathi munceene alaleeryaka. Niireke nyuwo mookhalana muxankiho owo? Akhala wira ti siiso, muhiliyale wira Yehova onnihakalala vanceene mwaha wa wiimananiha wanyu ovara ele muniwerya anyu. Yehova onnisuwela wira ninniphavela oviriha okathi munceene nilaleeryaka hata nihiweryaka okhuma owaani. Nto owo onoonikhaliherya waalaleerya ale annikhapelela, mamfirimeero ni mameediku. Tivonto muhilikanyiheke ele muniwerya ahu ovara olelo-va ni ele mwaapaka anyu khalai. Maana akhala wira munoopaka eyo, munookhulumuwa. Akhala wira nnooweha moota Yehova onnikhaliherya awe niinaano-va, eyo enoonivaha ikuru wira nivilele khula muxankiho moohakalala. Hiyo khanisuwela ipyo sinrowa omela ni wunnuwa. — Mus. 11:6. w21.05 24-25 itti. 14-17

Mwaha wa ohiphiyeriwa, Mwene Davidi aahiliyala itthu sotheene sooloka Yehova anvanhe awe ntoko mihakhu, ovuwa ni waaxintta awanani awe okathi wa ekhotto. Davidi aanisuwela wira itthu aavahiwa awe ni Muluku khisaareere waatta ni ‘khawerya’ okontari. Nave aanixukhurela itthu iyo aavahiwa awe. (Esal. 40:6) Masi waahiphiya okathi Davidi aaliyanle awe itthu sotheene aavahiwa awe ni Yehova. Nnaamwi Davidi aarina athiyana anceene, Davidi aahipacerya osiveliwa ni mwaara a mulopwana mukina. Muthiyana owo aari Bathi-Xeba iyawe iihaniwa Uriya muHiti. Mwaha wa ohiphiyeriwa, Davidi aahirupa ni Bati-Xeba aahimurupaliha. Etthu Davidi aapanke awe, yaari yoohiloka. Masi hata vaari siiso, Davidi aahipaka-tho etthu ekina yootakhala, owo aahimwiiviha Uriya! (2 Sam. 11:2-15) Etthu xeeni Davidi uupuwela awe? Niireke uupuwela wira Yehova khaaweha etthu ele aapaka awe? Nnaamwi Davidi aavirinhe okathi munceene omukokhorelaka Yehova ni ari oororomeleya, owo aahimorela ntapha na ohiphiyeriwa, nto eyo yaahimukumiherya mixankiho sinceene. Moohakalaliha, Davidi aaheemererya, aahihimya etampi awe ni aahittharuwa ni murima wotheene. Moohaanyiherya, Davidi aahixukhurela vanceene oleveleliwa ni Yehova! — 2 Sam. 12:7-13. w21.06 17 etti. 10

Wuupuwelaka wira khaninrowa owerya wiiriha yoosoma ya Biibiliya. Woonasa wene, nyuwo munuupuwela wira muhaana wuncererya osuwela wanyu muhinatthi opacerya omusomiha mutthu Biibiliya. Nrowe niwehe itthu tthaaru sinrowa wookhaliheryani okupali wira nyuwo munoowerya omusomiha mutthu Biibiliya. Yoopacerya, Yehova ohoona wira munoowerya waasomiha atthu akina. Ya nenli, Yesu yoowo ‘ovahiwe okhulupale wotheene wiirimu ni vathi-va’, toorummeni owiixuttiha atthu. (Math. 28:18) Ya neeraru, muroromeleke okhaliheriwa ni atthu akina. Yehova aahimwiixuttiha Yesu itthu sinceene aarowa awe olavula. Nto Yesu aaniroromela itthu iyo iixuttihiwe awe ni Yehova. Nyuwo nave muhaana opaka etthu emosaru. (Yoh. 8:28; 12:49) Nave nyuwo pooti onvekela muhooleli a ekrupu anyu yoolaleerya, pioneero wala namalaleerya orina sookumanana sinceene wira ookhaliheryeni moota woopaceriha ni wiiriha soosoma sa Biibiliya. Etthu ekina enrowa wookhaliheryani ori waahoola anna awo arina sookumanana sinceene okathi anrowa aya wiiriha soosoma saya sa Biibiliya wira nweheke moota aniiriha aya. w21.07 6 etti. 12

Wanikisa wa olumwenku ola wootakhala ori vakhiviru. Tivonto, nihaana otepaka ororomela moota Yehova onipaka awe itthu olelo-va. Mwaha wa xeeni? Mwaha woowi, okathi wa maxakha maalupale, nnoovahiwaka malakiheryo anrowa okhalaka wira tooxankiha ni khanivareleya muteko. Ntoko ninsuwela ahu, Yehova khonrowa olavulaka ni hiyo mmensawe. Onrowa onivahaka malakiheryo aarumeelaka atthu aathanlale awe. Owo khahiyo onrowa okhala okathi woovaanyiha malakiheryo awo. Hiyo pooti wuupuwelaka so: ‘Niireke tthiri malakiheryo ala anikhuma wa Yehova? Aahiiso khahiyo aroopakeleliwa ni anna annihoolela?’ Niireke okathi owo wooxankiha munoomuroromela Yehova ni mutthenkeso awe? Moota olelo-va munaathokorerya anyu ale athanliwe wira anihooleleke, onimooniherya waakhula wanyu. Akhala wira munoororomela malakiheryo munaakhela anyu, ni wiiwelela moohiixinliya, woonasa wene munoowerya opaka etthu emosaru okathi wa maxakha maalupale. w22.02 6 etti. 15

Okhaliheriwaka ni Yehova, Gideyoni ni atthu awe 300 yaahaaxintta awanani aya. Nto awo yanwerya wiittottopa mwaha wa etthu ele yaapanke aya. Vano alopwana a nloko na Efrayimi yaahirowa okumana ni Gideyoni, awo khiyaaronwe omuttottopela, masi yaaronwe onyakulihana ni Gideyoni, mwaha woowi. (Makh. 8:1) Gideyoni aahiwuupuxerya alopwana ale a nloko na Efrayimi moota Yehova aakhalihenrye awe opaka itthu suulupale. Etthu xeeni yaakhumelenle? “Atthu a Efrayimi yahikhurunuwa murima”. (Makh. 8:3) Vannooneya oratteene wira Gideyoni aahihiya wiixinnuwiha wira okhalihe murettele eriyari ya atthu a Muluku. Alopwana a nloko na Efrayimi anniixuttiha wira nihikhala-khale niwehexexaka ottittimihiwa wahu ohiya onvuwiha Yehova. Ele Gideyoni aapanke awe enniwiixuttiha etthu yuulupale ahooleli a etthoko ni axitokweene. Akhala wira ookhala mutthu onyoonyinwe mwaha wa etthu nipanke ahu, nihaana omananiha oweha etthu emwiirinhe mutthu owo onyoonyiwa. Nave nihaana omuttottopela mutthu owo mwaha wa itthu sooloka opanke awe, opaka eyo onitthuneya wiiyeviha. Masi musuweleke wira ti vootepa otthuneya okhalana murettele ni anna ni arokora ohiya wooniherya wira nookhalana erasau. w21.07 16-17 itti. 10-12

Yehova onipattunxe iilikanyihaka mmansawe. Hiyo apinaatamu, nipattuxiwe nilikanyihiwaka ni Muluku. Nto Yehova oonivaha owerya wa okhalana ni wooniherya mikhalelo sawe. Mikhalelo seiyo sinnikhaliherya okhala atthu onaaphavela awe mweemusini mwawe, ntoko ophenta, othunku, ororomeleya ni exariya. (Esal. 86:15; 145:17) Vaavo nniimananiha ahu wooniherya mikhalelo iyo, ninnimooniherya Yehova wira ninnimuxukhurela mwaha woonipattuxa iilikanyihaka mmansawe. (1 Ped. 1:14-16) Nto eyo, enninikhaliherya omuhakalaliha Tiithi ahu a wiirimu ni okhalana okumi wooloka ni woohakalaliha. Yehova oolokiherya opuro wooloka wira nikhaleke. Ohinatthi ompattuxa mulopwana oopacerya, Yehova aahipaka elapo wira apinaatamu akhaleke. (Yobi 38:4-6; Yer. 10:12) Okhala wira Yehova, Muluku oophenta ni oovaha, owo oohela valaponi itthu sinceene sooloka seiyo sinnihakalaliha. (Esal. 104:14, 15, 24) Okathi Yehova aaweha awe itthu sotheene aapattunxe awe vathi-va, owo “ahòna wira sothene sari sorera sana”. — Maph. 1:10, 12, 31. w21.08 3 itti. 5-6

Othene ahu nookhalana muritti woolaleerya ni waapaka awiixutti. (Math. 28:19, 20; aRom. 10:14) Niireke munniphavela olokiherya inamuna sanyu soovara muteko owo wa efaita yinceene? Akhala wira ti siiso, musomeke ni nvariheleke muteko malakiheryo a ebroxura Osoma ni Wiixuttiha. Muhiliyale wira yoolukama ya faita yinceene munreerela anyu okhalana ori okhalana mikhalelo sinimuhakalaliha Yehova. (aKol. 3:12; 2 Ped. 1:5-8) Moohaanyiherya, otheene ahu ninniphavela ovara muteko wa Yehova mpakha vaniwerya ahu. Nto elapo esya hiyo ninrowa omurumeelaka Yehova moomalela. Nlipelelaka ophiya okathi owo, niimananiheke ovara oratteene yoothanleliwa ahu. Niira siiso, nnoohakalalaka ni khaninrowa onyoonyiheyaka. Etthu yootepa otthuneya onvuwiha ni omuhakalaliha Yehova, yoowo ori “Muluku oohakalala”. (1 Tim. 1:11) Nto ootheene ahu nihakalaleke ni eparakha nirina ahu! w21.08 25 itti. 18-20

Niireke nyuwo muyariwe etthoko ya Anamoona a Yehova? Akhala wira ti siiso, okhuma enamwane anyu, nyuwo muhiixuttihiwa itthu voohimya sa Yehova. Nave anamuyari anyu aawiixuttihani wira Yehova tori Mpattuxa, ookhalana mikhalelo sooloka ni oniphavela wiiriha elapo okhala Eparayiisu. (Maph. 1:1; Mit. 17:24-27) Atthu anceene, khanikupali wira Muluku ookhala ni khanikupali wira owo tori Mpattuxa. Awo anikupali wira okumi okhumelenle mekhaya, nuumala-vo sinapacerya othatuwa itthu saamukhaani sirina okumi mpakha itthu suulupale sikumi. Atthu anceene anikupali itthu iyo, toosoma vanceene. Woonasa wene, atthu awo anihimya wira siensia ohooniherya wira Biibiliya khahiyo eekeekhai ni atthu ale anikupali wira ookhala Mpattuxa, atthu oohisoma, ahinsuwela etthu ni oowaakuwa owokiwa. Hata ovinre ene okathi munceene nri ene Anamoona a Yehova, otheene ahu nihaana olipiha waamini wahu. Akhala wira nnoopaka eyo, khaninrowa owokiwa ni “moolumo oowoototha ni miyuupuwelo seethiru” sinivirikanya Nuulumo na Muluku. — aKol. 2:8. w21.08 14 itti. 1-3

Abeli, Nowe, Abrahamu ni Yobi, yaahooniherya wira yaanimuttittimiha ni omphenta Yehova. Amwiiwelelaka, omwaamini, ni wiivahererya wa Yena. Vanooneya wira yaahipaka sootheene yaawerya aya wira anvuwihe, nto Yehova aahisiveliwa ni moota yaamukokhorela aya. Muhoolo mwaya, Yehova aahaavaha aisarayeli nlamulo na Moise. Nlamulo nlo yaanihimya saana moota atthu yaakhanle aya omukokhorelaka Yehova, mwa enamuna eemererya awe. Nuumala Yesu okhwa ni ohihimuwa, Yehova aahittharuwa waatumererya atthu wiiwelela nlamulo na Moise. (aRom. 10:4) Okhuma okathi ole, makristau yaahaana wiiwelela “nlamulo na Kristu”. (aGal. 6:2) Awo yaawerya wiiwelela ‘nlamulo nlo’, ahihelaka mmuruni wala otthara elista yinceene ya itthu yaakhanle aya oopaka aahiiso nnaari. Masi yaahaana opaka eyo attharaka ntakiheryo na Yesu ni soowiixuttiha sawe. Nave olelo-va, makristau annikhalela nthiti otthara yooruma ya Kristu ya omuhakalaliha Yehova, nto ‘annilipihiwa’. — Math. 11:29. w22.03 20-21 itti. 4-5

Yehova onnaawiriyana oratteene anaawe Yehova aahiwiriyana mavekelo manceene Mwanawe aapanke awe okathi aari awe valaponi. Nave Yehova aahiwiriyana mavekelo a Yesu vaavo aaphavela awe opaka soothanla suulupale ntoko waathanla arummwa awe 12. (Luka 6:12, 13) Nave-tho Yehova aahiwiriyana mavekelo a Yesu vaavo owo aaxanka awe. Ohalaka okathi vakhaani wira ovarihiwe ni Yuda, Yesu aahinvekela Tiithi awe wira omukhaliherye itthu saarowa omukhumelela moohipisa. Khahiyo wira Yehova aawiriyana mavekelo Yesu aapaka awe paahi, masi-tho owo aahiruma nlaikha wira namulipihe Mwanawe ole amphentexa awe. (Luka 22:41-44) Olelo-va, Yehova onniwiriyana mavekelo a arumeyi awe. Nave onnaakhula okathi wooreerela. (Esal. 116:1, 2) Murokora mmosa a wÍndia, aahoona wira Yehova onnaakhula mavekelo awe. Owo aanixanka ni oriipiwa murima vanceene. Nto Yehova aahaakhula mavekelo a murokora ole voohimya sa muxankiho awe. Murokora ole, olempe so: “Eprograma ya JW Broadcasting^® ya Maio 2019, yaahilavula itthu nikhanle ahu oopaka akhala wira ninnixanka wala oriipiwa murima. Nto eprograma ele yaari waakhuliwa wa mavekelo aka”. w21.09 21-22 itti. 6-7

Tthiri khahiyo vaari vookhweya makristau a okathi wa arummwa oleva itthu saya sootheene ni opacerya makhalelo a niinaano. Yaahaana waamini ni ororomela wira Yehova aamwaavaha itthu sootheene saarowa waathowa. Nave etthu ekina yaakhalihenrye, saari miruku murummwa Paulo aavanhe awe makristau aheeberi, sihalaka iyaakha 5 wira aroma arukurerye epooma ya oYerusalemu. Aahimmye so: “Muhiphenteke musurukhu, masi muhakalaleke ni itthu murina anyu, maana Muluku onihimya wira: ‘Miyo nkinikhala-khala koohiyakani, nave nkinikhala-khala koonyanyalakani’. Tivo, nihimyeke ni nroromelo wira: ‘Yehova tonikikhaliherya. Miyo nkinrowa woova etthu. Exeeni mutthu oniwerya awe okiiriha?’” (aHeeb. 13:5, 6) Makristau yaiwelenle miruku iye sa Paulo, khiyoonale okhala vooxankiha wiilimaleliha makhalelo masya ni ohakalala ni itthu vakhaani yaarina aya opuro ole yathaamenle aya. Yaanikupali wira Yehova aamwaakhaliherya, aavahaka itthu saarowa waathowa. w22.01 4 itti. 7, 9

Okathi nimmuupuwela ahu mutthu oomooriwa ikharari, nimmuupuwela mutthu ooreera murima, oopatthaneya, oothunku ni oovaha. Mutthu ntoko owo, onninuupuxerya nlikanyiho Yesu aalavunle awe na musamariya ooreera murima. Mulopwana ole khahiyo aari muyuda, masi hata vaari siiso, “aahimmorela ikharari” muyuda ole, yoowo iiyeriwe ni aamaniwe ni alatarau. (Luka 10:29-37) Nlikanyiho nne ninnittittimiherya oratteene mukhalelo wooreera wa Muluku ahu, eyo piiyo, omoriwa ikharari. Khula nihiku, Yehova onninooniherya wira onninimorela ikharari mwa inamuna soovirikana. Nto eyo enooniherya wira onniniphenta. Okathi nniiwa ahu nuulumo noowi omoriwa ikharari, woonasa wene ninnuupuwela etthu ekina. Maana omoriwa ikharari onihela muhina ohimuhukhumu mutthu opanke etthu yoohiloka akhala wira vannireerela. Okhala wira ti siiso, Yehova toomoriwa ikharari vanceene. Esalimo 103:10, enihimya wira owo ‘khonnirela hiyo siso simphwanelahu: khannilivela sotakhala’. Okathi mukina, Yehova onnimuhukhumu wala omuttaruxa mutthu opanke etampi. w21.10 8 itti. 1-2

Yehova onniwooniherya ophenta wekeekhai atthu yaale paahi arina waataana wooloka ni yena, niire so, arumeyi awe. Moolumo a Mwene Davidi ni profeta Daniyeli, annooniherya eyo. Mwa ntakiheryo, Mwene Davidi aahimmye so: “Mwasuke mophentani mwanyu ale anosuwelani”. “Apwiya annaphenta vohimala-tho ale anattittimiha”. Nave profeta Daniyeli aahimmye so: “Nyuwo Apwiya Muluku! Nyuwo mw’àlupale ni òttittimiheya: nyuwo munnisuka watàna n’ale aníwelela ikano sanyu; nyuwo m’òroromeleya n’ale anophentani”. (Esal. 36:11; 103:17; Dan. 9:4) Moovarihana ni moolumo ala, Yehova onniwooniherya ophenta wawe wekeekhai arumeyi awe mwaha woowi annimusuwela, annimoova, annimphenta ni anniiwelela malamulo awe. Yehova onniwooniherya ophenta wawe wekeekhai ale animurumeela ntoko oniphavela awe. Nihinatthi opacerya omurumeela Yehova, owo aaninooniherya ophenta oniwooniherya awe apinaatamu otheene. (Esal. 104:14) Masi nuumala opacerya omukokhorela, hiyo ninnittottela mureerelo ophenta wawe wekeekhai. w21.11 4 itti. 8-9

Hiyo ‘noolakela wiiwelela moolumo a Yesu ari yoolepa eri vasulu-vo. Olelo-va, atthu anceene anaatthara ahooleli a itiini. Nto eyo, enniwiiriha waakokhorela amuluku eethiru. Atthu anceene annirowa ikerexa sa ahooleli awo a itiini, annithuma iliivuru saya ni annaavaha musurukhu wira akhaliherye itthu sinipakiwa ni ahooleli awo a itiini. Nave atthu akina annikupali itthu sotheene anihimya aya ahooleli awo a itiini. Nto atthu awo annihakalala vanceene okathi anikhala aya ni ahooleli aya a itiini vanakhala ntoko wira anwenhe mwaneene ene Yesu. Moovirikana ni atthu awo, ale animukokhorela Yehova ntoko oniphavela awe, khanaatthara apinaatamu. Nnaamwi yaattittimihaka vanceene ale anaahoolela, awo annikupali ni murima wotheene ele Yesu aahimmye awe oriki: “Nyuwo otheene mwa axinna”. (Math. 23:8-10) Hiyo khannaakokhorela apinaatamu akhale ahooleli a itiini wala anamalamulela a mulaponi. Nave khaninkhaliherya itthu soohiloka sinipakiwa ni ahooleli a itiini ni a epoliitika. Maana hiyo nimmukokhorela Muluku paahi ni khanniirela mpantta olumwenku. Vannooneya oratteene wira noovirikana ni itiini sikina siniihimya okhala makristau. — Yoh. 18:36. w21.10 20 itti. 6-7

Khula mukristau oniphavela okhalana mweettelo woowaarya, oheemereryeke etthu nnakhala mutthu mukina okhalana efaita yinceene ovikana waataana wawe ni Yehova. Hiyo nniihaneliwa nsina na Anamoona a Yehova, noolakela ohipaka etthu yaarowa ohonona nsina noowaarya na Yehova. (Onam. 19:12; Yes. 57:15) Aisarayeli, yaanimweemererya Yehova okhala Muluku aya yiiwelelaka malamulo manceene. Onamukuttho 18:4 onihimya so: “Mwetteleke ikano saka: mwiweleleke soruma saka. Miyo k’Apwiya, Muluku anyu”. Ekapiitulu 19, ennihimya ikano sikina yaavahiwe aya aisarayeli. Mwa ntakiheryo, iversiikulu 5-8, 21, 22, sinnilavula mikuttho sa inama. Iyo sahaana ovahiwa mwa enamuna yahaarowa aya “òveha etthu ettittimiheriwe Apwiya [Yehova]”. Osoma iversiikulu iya, sihaana oniiriha ophavela omusiveliha Yehova ni onvaha mikuttho oneemererya awe ntoko onnitumererya awe opaka aHeeberi 13:15. w21.12 5-6 itti. 14-15

Olelo-va, anamathelana a niinaano anoottottela mureerelo sowiiraneya sa atthu akina yiixuntte omuroromela Yehova. Anamathelana akina aaviriha iyaakha sinceene avaraka muteko wa Muluku wa okathi wotheene. Munoonela sai ovekela miruku akhala wira munoona wira muhaana ovarerya soolukama sanyu? Eyo enamuna ekina munrowa anyu wooniherya wira munnimuroromela Yehova. (Mir. 22:17, 19) Muhiliyale wira ekasamento yoovaha enikhuma wa Yehova. (Math. 19:5, 6) Nto Yehova oniphavela wira nyuwo mphuheke yoovaha eyo. Anamathelana a niinano, niireke munnivarerya moota munirumeela anyu okumi anyu? Niireke munnipaka itthu muniwerya anyu wira mmooniherye Yehova omuxukhurela wanyu mwaha wa yoovaha eyo? Akhala wira ti siiso, mmuleeleke Yehova. Mutokoseke malakiheryo ari nuulumo nawe, Biibiliya ni nweheke ale anivarihana ni makhalelo anyu. Nuumala-vo, mutthareke miruku Yehova onoovahaaweni. Mukupaliki ni murima wotheene wira munoohakalalaka akhala wira munoohela nipuro noopacerya mookumini mwanyu omurumeela Yehova! w21.11 19 itti. 16, 18

Yakobo khaixoona okhala mutthu ootepexa okhalana efaita waavikana atthu akina. Yakobo khaixoona okhala mukristau ootepexa okhalana efaita waavikana makristau makina, mwaha wookhala muhima awe Yesu paahi, aahiiso mwaha woothanleliwa ovara miteko sinceene mmulokoni mwa ekristau. Mwa ntakiheryo, aahiwiitthana makristau makina aasuwela awe, orumeelaka moolumo oowi, “annaka oophentiwa”. (Yak. 1:16, 19; 2:5) Khaamananiha owiiriha atthu akina wuupuwela wira yena khahiyo aari mutthu oottheka. Etthu nniixutta ahu: Muhiliyale wira otheene ahu naatthu oottheka. Nihuupuweleke wira naatthu ootepexa oloka waavikana anaxikola ahu a Biibiliya. Mwaha wa xeeni? Vakhala wira ninniwiiriha anaxikola ahu wuupuwelaka wira okhala wene khaninttheka, awo pooti okhulumuwa maana anrowa wuupuwela wira khanirowa owerya opaka itthu Muluku onaavekela awe. Masi, mooreerela murima neemereryeke wira ikwaha sikina khivanikhweya wiiwelela malakiheryo a mBiibiliyani. Nave-tho naatthokiheryeke anaxikola ahu a Biibiliya woona moota Yehova onnikhaliherya awe ovilela mixankiho, ni waakhaliherya oweha wira naawo-tho anoowerya omurumeela Yehova. w22.01 11-12 itti. 13-14

Nto akhala wira nnimuupuwela ntoko Yesu uupuwela awe, nnimoonaka okhweya opaka itthu ntoko aapaka awe, ni okhalana moonelo awe. (aHeeb. 1:3) Hiyo pooti wuupuwelaka so: ‘Yesu aayariwe ohirina etampi. Nkinrowa owerya omutakiha moomalela’. Akhala wira munuupuwela siiso, sookhala itthu 3 muhikhanle anyu ooliyala. Yoopacerya, hiyo nipattuxiwe wira nilikaneke ni Yehova ni Yesu. Nto nnoowerya waatakiha nave nnoowerya olikanaka naawo. (Maph. 1:26) Ya nenli, nihiliyale wira munepa woowaarya, ikuru sootepexa owerya sa olumwenku wootheene. Onoonikhaliherya opaka itthu nahaarowa ahu owerya opaka mekhihu. Ya neeraru, Yehova oosuwela wira khamunrowa owerya wooniherya moomalela, mikhalelo sinikumiheriwa ni munepa woowaarya. Tivonto Yehova, oosuka iyaakha 1.000, wira ale arina nlipelelo nookhala valaponi mwa mahiku ootheene, akhale oohittheka. (Wiis. 20:1-3) Tiithi ahu oniphavela wira khula mmosa, ovareke ele eniwerya awe ni ororomeleke wira onoomukhaliherya. w22.03 9 itti. 5-6

Ohiya paahi ovekela, sihaavo itthu sikina sikhanle oonikhaliherya olipiha opatthani ahu ni Yehova. Nave hiyo pooti olipiha opatthani ahu nimusomaka Biibiliya ni orowela mithukumano sa ekristau. Exeeni mukhanle anyu oopaka wira murumeele oratteene okathi muthanlale anyu wira mpake itthu? Mwiikoheke so: ‘Exeeni enimakela okaakanyerya okathi kiniweha aka mithukumano sa ekristau, aahiiso kinsoma aka?’ Etthu emosa ekhanle oomwaakanyerya mutthu, oligareliwa, waakhela mensagem muselularini aahiiso aparelyo akina eletroniko. Ewoora ekina, okathi ninsoma ahu aahiiso oweha mithukumano, hiyo pooti wuupuwelaka itthu sikina. Akhala wira eyo enimwiiraneya, munvekeleke Yehova wira ookhaliheryeni. Ekeekhai wira okathi ninriipiwa ahu murima ni oxanka, vannivila wuupuwela itthu sinlipiha opatthani ahu ni Yehova, masi vannireerela opaka eyo. Tivonto nvekeleke wira nvahiwe murettele wa Muluku, yoowo onrowa osuka ohiya paahi murima anyu, masi-tho “miyuupuwelo sanyu”. — aFil. 4:6, 7. w22.01 29-30 itti. 12-14

Mwene Oziya aahikhootta miruku. Nihiku nimosa Oziya, aahivolowa mutemplo opuro yeemereriwa anamukuttho paahi, ni aahimananiha opaha erupani aahiiso nsenso. Alipa a mukuttho yaahimuleela wira: “Nyuwo mwené Oziya! Khahiyó muteko anyu wapaherya erupani Apwiya: owo muteko w’alipa a mukuttho”. Oziya oonenle sai? Vakhanle wira aaheemererya miruku iye ni okhuma mutemplo okathi ene yoole, woonasa wene Yehova aammulevelela. Ohiya opaka eyo, Oziya “ahinanariwa vanjene”. Xeeni Oziya aakhoottale awe Miruku? Mwaha wookhala mwene, woonasa wene uupuwela wira aahikhalana etireitu yoopaka khula etthu aaphavela awe. Masi Yehova khaamweemererya opaka ele. Mwaha wa etthu yoohiloka aapanke awe, Oziya yaahimphwanya makuttula aahiiso maretta. Nto “ahikhala namakuttula mpakha okhwa wawe”. (2 Wah. 26:16-21) Ninniixuttihani ntakiheryo na Oziya? Etthu nniixutta ahu tiila: Naaphavelaka weemereriwa ni Yehova, nihikhootteke miruku sa mBiibiliyani, hata nirineene iparakha sinceene aahiiso nnaari. w22.02 9 etti. 7

Okhalawene mutthu oneettihiwa ni “omutthu wa khalai”, itthu onipaka awe ni onuupuwela awe khasimmusivela Yehova. (aKol. 3:9) Owo pooti okhala oowiittottopa, oowaakuva onanariwa, ni oohixukhuru. Pooti osiveliwaka oweha epornografia, aahiiso ifilme sintumererya otakhala. Ikwaha sikina mutthu owo pooti ookhalana mikhalelo sooreera, nave-tho pooti wiivahaka nthowa mwaha wa itthu soohiloka ohimmye awe wala opanke awe. Masi khoniphavela olokiherya muupuwelo awe ni moota onipaka awe itthu. (aGal. 5:19-21; 2 Tim. 3:2-5) Ootheene ahu niyariwe nitthenke ene. Tivonto khaninwerya okumiha moomalela vamurimani vahu itthu soohiloka murima ahu oniphavela aya. Ikwaha sikina hiyo pooti wuupuwelaka etthu aahiiso olavula nuumala-vo nnaikhupanyerya. (Yer. 17:9; Yak. 3:2) Masi okathi ninrula ahu omutthu wa khalai, ninnihiya weettihiwa ni itthu siniphavela aya erutthu yoottheka. Okathi owo ninnipakeya mutthu mukina. — Yes. 55:7. w22.03 3 itti. 4-5

Nyuwo axitokweene, nwehexexeke mikhalelo sooloka sa anna ni arokora. Ekeekhai wira otheene aya toottheka, masi hata vari siiso khula mmosa ookhalana mikhalelo soolipiha. Ikwaha sikina axitokweene pooti woonaka oreerela waavaha miruku anna ni arokora. Masi hata vari siiso, sintoko murummwa Paulo, awo ahaana owehexexa itthu sooreera anna awo anipaka aya. Nave ahaana wiimananiha ohiwehexexa khula etthu anlavula aya anna awo wala anipaka aya. Ohiya-vo, axitokweene ahaana owehexexa moota anna awo animphenta aya Yehova, ovilela waya, ni ikuru arina aya wira evareke itthu sooreera. Akhala wira axitokweene annipaka eyo, annaakhaliherya anna otheene woona wira anniphentiwa ni muloko wootheene. Muhiliyale wira Yehova khonoovekelani okhala atthu oohittheka. Masi oniphavela wira muroromeleyeke. (1 aKor. 4:2) Nto mukupaliki wira onnihakalala ni itthu munipaka anyu mmutekoni mwawe. Nave muhiliyale wira Yehova “khonrowa oliyala muteko anyu ni ophenta wanyu nsina nawe mwaarumeelaka ni muhihiyaka waarumeela ale oororomeleya”. — aHeeb. 6:10. w22.03 31 itti. 19, 21